ⴷⴰ ⵉⵜⵜⵙⴷⴷⵉⴷ ⵓⴷⵓⵙⵜⵓⵔ ⵏ ⵜⴳⵍⴷⵉⵜ, ⵏⵏⴰ ⵉⴳⴰⵏ ⵜⴰⵏⵜⴰⵎⵜ ⵜⴰⴷⵙⵍⴰⵏⵜ ⵉⵙⵡⵓⵜⵜⵙⵏ ⵜⴰⵏⴼⵔⵓⵜ ⵏ ⵓⴼⵔⴰⴳ ⴰⵖⵣⵓⵔⴰⵏ ⵉⵙⵎⴷⵏ ⵉ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵍⴳⵏ ⴰⴳⵔⴰⵖⵍⴰⵏ ⵙ ⵓⵎⵙⴰⵙⴰ ⴷ ⵉⵏⴰⵡⴰⵢⵏ ⵉⴳⵔⴰⵖⵍⴰⵏ, ⵜⴰⵙⵓⵍⵜ ⵏ ⵜⵓⴳⴳⴰⵣ ⵏ ⵍⵎⵖⵔⵉⴱ ⴳ ⵓⵙⵎⴰⴷ ⵏ ⵓⵏⴳⵔⴰⵡ ⵏⵏⵙ ⴰⴷⵙⵜⴰⵔ ⴰⴽⴷ ⵉⵏⴰⵡⴰⵢⵏ ⵉⴳⵔⴰⵖⵍⴰⵏⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴷⵉⵎⵓⵇⵕⴰⵟⵉⵜ, ⴰⵢⵍⵍⵉ ⵉⴳⴰⵏ ⵜⴰⵔⵏⴰⵡⵜ ⵏ ⵓⵙⴰⴽⴰ ⵏⵏⵙ ⵉⵖⵣⵣⵉⴼⵏ ⴳ ⵓⵙⴰⵜⵉ ⵏ ⵓⵏⴳⵔⴰⵡ ⴰⴳⵔⴰⵖⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵍⴳⵏ ⴰⴳⵔⴰⵖⵍⴰⵏ ⴰⵏⴼⴳⴰⵏ.
ⴳ ⵓⵙⴰⵜⵉ ⵏ ⵓⵙⴷⴷⵉⴷ ⵅⴼ ⵉⵎⵏⵣⴰⵢⵏ ⴷ ⵉⵍⵓⴳⵏⵏ ⵉⴷⵙⵜⴰⵔⵏ ⵉⵣⴷⵉⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⴳ ⵓⵙⴰⵜⵉ ⵏ ⵜⵓⴳⴳⴰⵣ ⵏ ⵜⵓⵎⵙⵉⵙⵜ ⵏ ⵉⵣⵣⵔⴰⴼⵏ ⵉⵏⴰⵎⵓⵔⵏ ⴰⴽⴷ ⵉⵏⴰⵡⴰⵢⵏ ⵉⴳⵔⴰⵖⵍⴰⵏⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵙⵙⵏ ⵍⵎⵖⵔⵉⴱ, ⴳ ⵜⵎⵔⴰⵡⵜ ⵉⴳⴳⵔⴰⵏ, ⵜⴰⵣⵣⴰⵣⵜ ⵜⴰⴽⵎⴰⵎⵜ ⴳ ⵓⵙⴷⵓⵙ ⵏ ⵜⵉⵔⴰⵜ ⵜⴰⵏⴰⵎⵓⵔⵜ ⵉⵜⵜⵓⵙⵡⴰⵍⴰⵏ ⵙ ⵓⵙⴷⵓⵙ ⴷ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⵜⵉⵍⵉ ⵜⵡⵓⵔⵉ ⵙ ⵉⴹⵕⵉⵚⵏ ⵓⵣⵔⵉⴼⵏ ⵉⵎⴰⵢⵏⵓⵜⵏ ⴷ ⵓⵙⵏⴼⵍ ⵏ ⵉⴹⵕⵉⵚⵏ ⵢⴰⴹⵏ ⵏⵏⵉ ⵙ ⵜⵍⵍⴰ ⵜⵡⵓⵔⵉ ⴰⵎ ⴰⴳⵣⵣⵓⵎ ⵙⴳ ⵜⵓⴳⴳⴰⵣ ⴰⴷ.
ⵙ ⵓⵙⵎⵀⵍ ⵏ ⵜⵡⵓⵔⵉⵡⵉⵏ ⵏⵏⵙ ⵙ ⵓⵎⵙⴰⵙⴰ ⴷ ⵓⵙⵍⴳⵏ ⵉⵣⴷⵉⵏ ⵙ ⵡⴰⵍⴰⵙ ⵏ ⵓⵙⵏⵎⴰⵍⴰ ⵏⵏⵙ, ⵉⴹⴼⵕ ⵓⵙⵇⵇⵉⵎ ⵜⵉⵎⵙⴽⵔⵜ ⵏ ⵜⵙⵎⵉⴳⴰⵍ ⵏⵏⵙ ⴳ ⵢⵉⴳⵔ ⵏ ⵓⵙⵎⴰⵔ ⵏ ⵉⵎⵏⴰⴷⵏ ⴷ ⵜⵎⵙⵙⴽⵜⵉⵜⵉⵏ ⵉⵣⴷⵉⵏ ⵙ ⵜⵓⵎⵙⵉⵙⵜ ⵏ ⵉⴹⵕⵉⵚⵏ ⵓⵣⵔⵉⴼⵏ ⴰⴽⴷ ⴰⵔⵔⴰⵜⵏ ⵉⴳⵔⴰⵖⵍⴰⵏⵏ ⵉⵣⴷⵉⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⵏⵏⴰ ⵜⵙⵖⵣⵏ ⵜⴳⵍⴷⵉⵜ ⵏⵉⵖ ⴳⵉⵙⵏ ⵜⴰⵎⵓ, ⵎⴽⵍⵍⵉ ⵉⵙⵡⵓⵔⵉ ⵅⴼ ⵓⵙⵙⵔⵇⴱ ⵏ ⵜⵏⴱⴰⴹⵜ ⵅⴼ ⵓⴹⴼⴼⵓⵕ ⵏ ⵜⵙⵖⵣⵏⵜ ⵏ ⵜⴳⵍⴷⵉⵜ ⴳ ⵓⵎⵏⵉⴷ ⴰⴷ, ⵏⵉⵖ ⵜⴰⵎⵓⵜ ⴳⵉⵙⵏ, ⴷ ⵓⵙⴷⵓⵙ ⵏ ⵜⵎⴷⵔⴰⵡⵜ ⵏ ⵓⵎⵢⴰⵡⴰⵙ ⴰⴽⴷ ⵜⵎⵔⵙⵍⵜ ⵜⵓⵣⵔⵉⴼⵜ ⵙ ⵜⵎⵚⵕⵉⵢⵉⵏ ⵏⵏⵙ ⵙ ⵙⵏⴰⵜ, ⵙ ⵓⵙⴰⵜⵉⴳ ⵏ ⵜⵎⵍⴰⵍⵜ ⵜⴰⵅⴰⵜⴰⵔⵜ ⵏⵏⴰ ⵜⴻⵜⵜⵓⵔⴰⵔ ⴳ ⵢⵉⴳⵔ ⵏ ⵜⵓⵎⵙⵉⵙⵜ ⵏ ⵉⵣⵣⵔⴰⴼⵏ ⵉⵏⴰⵎⵓⵔⵏ ⵏ ⵓⵙⴱⵓⵖⵍⵓ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴷⵔⴼⵉⵏ ⴷ ⵜⵏⴽⵔⴰ ⵙⵉⵙⵏ.
ⴳ ⵓⵎⵏⵉⴷ ⴰⴷ, ⵉⵙⵙⴰⴼⵖ ⴷ ⵓⵙⵇⵇⵉⵎ ⴳ ⵓⵙⴳⴳⵯⴰⵙ ⵏ 2022 ⴽⴽⵓⵥ ⵉⵎⵏⴰⴷⵏ, ⵙ ⵜⵔⵏⴰⵡⵜ ⵏ ⵜⴰⵏⴰⴹⵜ ⵏⵏⵙ ⵜⴰⵙⴳⵯⵙⴰⵏⵜ, ⴰⵙⴳⴳⵯⴰⵙ ⵏ 2021 ⴷ 2022.
ⵙ ⵓⵙⴰⵜⵉⴳ ⵏ ⵜⵎⵔⵉⵙⵉⵏ ⵜⵉⴳⵔⴰⵖⵍⴰⵏⵉⵏ ⵏ ⵜⵎⴰⵣⵉⵔⵜ ⵏⵏⵖ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙⵍⴰⵡⴰⵏ ⴰⴽⴽⵯ ⵜⴰⵏⵏⴰⵢⵉⵏ ⵜⵉⵎⴳⴳⵓⵔⴰ ⴷ ⵉⵙⵖⵍⴰⴼ ⵏⵏⴰ ⴰⵙ ⵉⵜⵜⵓⵙⵡⴰⵍⴰⵏ ⵙⴳ ⴷⴰⵔ ⵉⵏⴳⵎⴰⵎⵏ ⵏ ⵜⵎⵢⴰⵇⵇⴰⵏⵉⵏ ⴷ ⵉⵏⵙⵎⴰⴳⴰⵍⵏ ⵙ ⵜⵡⴰⵍⵉⵡⵉⵏ ⴳ ⵓⵙⴰⵜⵉ ⵏ ⵜⵎⴳⴳⵉⵢⵉⵏ ⵥⵍⵉⵏⵉⵏ ⴷ ⵉⵎⵉⵙ ⵏ ⵓⵙⵎⵏⵉⴷ ⴰⵣⵎⵣⴰⵏ ⴰⵖⵣⵓⵔⴰⵏ, ⵙ ⵡⴰⵏⵏⴰⵍ ⵅⴼ ⵉⵙⵡⴰⵍⴰⵜⵏ ⵉⵙⵜⵕⴰⵜⵉⵊⵉⵢⵏ ⵏⵏⴰ ⵅⴼ ⵉⵏⵏⴰⵍ ⵓⵙⵇⵇⵉⵎ ⴳ ⵓⵣⴳⵏ ⵡⵉⵙ ⵙⵉⵏ ⴳ ⵜⵥⵍⴰⵢⵜ ⵏⵏⵙ ⴷ ⵅⴼ ⵉⵎⴹⴰⴽⴰⵕⵏ ⵉⵏⴰⵎⵓⵏⵏ ⵏⵏⴰ ⵎⵉ ⵉⵕⵥⵎ ⴷ ⵅⴼ ⵉⵙⴳⵣⴰⵍ ⵏ ⵉⵏⵎⵓⵇⵇⴰⵔⵏ ⵉⵏⵎⵏⴰⴹⵏ ⵏⵏⴰ ⵉⵙⵏⵎⴰⵍⴰ, ⴷⴰ ⵉⵜⵜⵙⴷⴷⵉⴷ ⵓⵙⵇⵇⵉⵎ ⵅⴼ ⵉⵙⵖⵍⴰⴼ ⵏⵏⴰ ⵉⵙⵎⵏⵉⴷ ⴳ ⵜⴰⵏⴰⴹⵉⵏ ⵏⵏⵙ ⴷ ⵜⵎⵙⵙⴽⵜⵉⵜⵉⵏ ⵏⵏⵙ ⴷ ⵉⵎⵏⴰⴷⵏ ⵏⵏⵙ ⵉⵎⵙⵎⵍⴰⵏⵏ ⵏⵏⴰ ⵉⵜⵜⵢⴰⴱⴷⴰⵔⵏ ⴳ ⵉⵣⴷⴰⵔ, ⴷ ⵅⴼ ⵜⵎⵙⴽⵔⵉⵏ ⵏⵏⴰ ⵉⵣⵎⵎⵉⵎ, ⵜⵉⵍⵉ ⴷⴰⵔ ⵓⵙⵎⵀⵍ ⵏⵏⵙⵏⵜ ⵢⴰⵜ ⵜⵉⵏⴷⵉ ⵉⵥⵍⵉⵏ ⴳ ⵓⵙⵙⵉⴷⵔⵓⵙ ⵏ ⵓⵎⵣⴰⵔⴰⵢ ⵏⵏⵉ ⵉⵍⵍⴰⵏ ⴳ ⵓⵙⵡⵉⵔ ⵏ ⵓⴼⵔⴰⴳ ⵏ ⵓⵏⴳⵔⴰⵡ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⴷⴷⵖ ⴳⴰⵏ ⵉⵙⵖⵍⴰⴼ ⵓⵚⴽⵉⵡⵏ ⵉⵜⵜⵓⵙⵡⴰⵍⴰⵏ ⵉ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵉⵣⴷⵉⵏ ⵙ ⵜⵎⵙⴽⵔⵜ ⵏ ⵜⵎⵢⴰⵇⵇⴰⵏⵜ ⵏ ⵜⵎⴰⵣⵉⵔⵜ ⵏⵏⵖ ⴷ ⵓⵎⵢⴰⵖ ⵏⵏⵙ ⴰⴽⴷ ⵓⵏⴳⵔⴰⵡ ⴰⴳⵔⴰⵖⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵙ ⵓⵙⴰⵜⵉ ⵓⵍⴳⵉⵏ ⴷ ⵓⵎⵔⵙⴰⵍ, ⴷ ⵙ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵉⵖⴰⵡⴰⵙⵏ ⴷ ⵜⵎⵙⴽⵔⵉⵏ.
ⴽⵔⴰ ⵏ ⵉⵎⵏⴰⴷⵏ ⵉⵎⵙⵎⵍⴰⵏⵏ ⵏⵏⴰ ⵉⵙⵎⵏⵉⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ :
ⵙ ⵡⴰⵏⵏⴰⵍ ⵅⴼ ⵜⵓⵜⵔⴰ ⵏ ⵜⵉⴽⴽⵉ ⵏ ⵓⵎⵏⴰⴷ ⵏⵏⴰ ⴷ ⵉⵍⴽⵎⵏ ⴰⵙⵇⵇⵉⵎ ⵙⴳ ⴷⴰⵔ ⵎⴰⵙⵙ ⴰⵎⴰⵡⵙⴰⵙ ⵏ ⵉⵄⵔⵔⵉⵎⵏ ⴷ ⵜⴷⵍⵙⴰ ⴷ ⵓⵏⵢⴰⵍⴽⴰⵎ ⴳ 02 ⴷⵓⵊⴰⵏⴱⵉⵔ 2021, ⵉⵙⵙⴰⴼⵖ ⴷ ⵓⵙⵇⵇⵉⵎ ⴰⵎⵏⴰⴷ ⴰⵎⵙⵎⵍⴰⵏ ⵅⴼ ⵓⵙⵖⵏⵓ ⵏ ⵓⵙⵍⴳⵏ ⵓⵟⵟⵓⵏ 71.17 ⵉⵜⵜⴰⵡⵉⵏ ⵙ ⵓⵙⵏⴼⵍ ⴷ ⵓⵙⵎⴰⴷ ⵏ ⵓⵙⵍⴳⵏ ⵓⵟⵟⵓⵏ 88.13 ⵉⵣⴷⵉⵏ ⵙ ⵜⵏⵖⵎⴰⵙⵜ ⴷ ⵜⵥⵕⵉⴳⵜ.
ⴳ ⵓⵙⴳⴳⵯⴰⵙ ⵏ 2022 ⵉⵙⵙⴰⴼⵖ ⴷ ⵓⵙⵇⵇⵉⵎ ⵢⴰⵏ ⵓⵎⵏⴰⴷ ⵙ ⵡⴰⵏⵏⴰⵍ ⵅⴼ ⵜⵓⵜⵔⴰ ⵏ ⵜⵉⴽⴽⵉ ⵏ ⵓⵎⵏⴰⴷ ⵅⴼ ⵓⵙⵖⵏⵓ ⵏ ⵓⵙⵍⴳⵏ ⵓⵟⵟⵓⵏ 01.18 ⵉⵜⵜⴰⵡⵉⵏ ⵙ ⵓⵙⵏⴼⵍ ⴷ ⵓⵙⵎⴰⴷ ⵏ ⵓⵙⵍⴳⵏ ⵓⵟⵟⵓⵏ 22.11 ⵉⵣⴷⵉⵏ ⴷ ⵓⵙⵍⴳⵏ ⴰⵏⴱⴽⴰⴹ, ⵏⵏⴰ ⴰⵙ ⵉⵙⵡⴰⵍⴰ ⵓⵎⴰⵡⵙⴰⵙ ⵏ ⵜⵣⵔⴼⵜ ⴳ 28 ⵉⵏⵏⴰⵢⵔ 2022.
ⴳ ⴱⵕⴰⵢⵕ 2022 ⵉⵙⵎⵏⵉⴷ ⵓⵙⵇⵇⵉⵎ ⵢⴰⵏ ⵓⵎⵏⴰⴷ ⵅⴼ ⵓⵙⵖⵏⵓ ⵏ ⵓⵙⵍⴳⵏ ⵏ ⵜⴱⵔⵉⴷⵜ ⵜⵓⵖⵔⵉⵎⵜ, ⵙ ⵡⴰⵏⵏⴰⵍ ⵅⴼ ⵜⵓⵜⵔⴰ ⵏ ⵜⵉⴽⴽⵉ ⵏ ⵓⵎⵏⴰⴷ ⵏⵏⵉ ⴰⵙ ⵉⵙⵡⴰⵍⴰ ⵎⴰⵙⵙ ⴰⵎⴰⵡⵙⴰⵙ ⵏ ⵜⵣⵔⴼⵜ ⴳ 26 ⵉⵏⵏⴰⵢⵔ 2022.ⵉⵙⵙⴰⴼⵖ ⴷ ⵓⵙⵇⵇⵉⵎ ⴳ 18 ⵢⵓⵏⵢⵓ 2022 ⵢⴰⵏ ⵓⵎⵏⴰⴷ ⵅⴼ “ⴰⵙⵖⵏⵓ ⵏ ⵓⵙⵍⴳⵏ ⵉⵣⴷⵉⵏ ⵙ ⵜⵎⵔⵔⵓⵜⵉⵏ ⵜⵉⵎⵉⴷⴷⵣⵉⵜⵉⵏ”, ⵙ ⵡⴰⵏⵏⴰⵍ ⵅⴼ ⵜⵓⵜⴰⵔⴰ ⵏ ⵜⵉⴽⴽⵉ ⵏ ⵓⵎⵏⴰⴷ ⵏⵏⵉ ⴰⵙ ⵉⵙⵡⴰⵍⴰ ⵎⴰⵙⵙ ⴰⵎⴰⵡⵙⴰⵙ ⵏ ⵜⵣⵔⴼⵜ ⴳ 27 ⵎⴰⵢⵢⵓ 2022.
ⵜⵉⵎⵉⵔⵉⵏ
