ⵉⴼⴼⵓⵖ ⴷ ⵎⴰⵙⵙ ⵎⵓⵏⵉⵔ ⴱⵏⵚⴰⵍⵃ, ⵏⵏⴰ ⵉⵙⵎⴰⴳⵍ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙⵙ ⵚⴹⵉⵚ, ⴰⵙⵙ ⵏ ⵓⵙⵉⵎⵡⴰⵙ 19 ⵢⵓⵍⵢⵓⵣ 2019, ⴰⵏⴼⵍⵓⵙ ⴰⵎⴰⵜⴰⵢ ⵉ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙⴳ ⵜⵉⵏⵎⵍ ⵍⵎⵓⵃⵎⵎⴰⴷⵉⵢⴰ ⵉ ⵉⵎⵏⵣⴰⴳⵏ ⴳ ⵕⵕⴱⴰⵟ ⴰⵙⴳⴳⵯⴰⵙ ⵏ 2002. ⵉⵙⵎⵓⵏ ⵎⴰⵙⵙ ⴱⵏⵚⴰⵍⵃ, ⵍⵍⵉ ⵉⵍⵓⵍⵏ ⴳ 1979, ⵢⴰⵜ ⵜⵉⵔⵎⵉⵜ ⵜⴰⵣⵣⵓⵍⴰⵏⵜ  ⵢⵓⵜⵉⵏ, ⴳ ⵓⵣⵎⵣ ⵏ ⵓⵙⵎⵉⴳⵍ ⵏⵏⵙ, 17 ⵏ ⵓⵙⴳⴳⵯⴰⵙ ⴳ ⵢⵉⴳⵔ ⵏ ⵓⵙⵡⵓⴷⴷⵓ ⴷ ⵜⵎⵙⵙⵓⴳⵓⵔⵜ ⵏ ⵉⵙⵏⴼⴰⵔ ⵓⵚⴽⵉⵡⵏ ⴷ ⵜⵢⴰⵏⵉⵏ ⵜⵉⵙⵖⵏⴰⵏⵉⵏ ⴷⴰⵔ ⵎⵏⵏⴰⵡⵜ ⵏ ⵜⴳⵔⵓⵎⵎⴰ ⵜⵉⵎⴳⵓⵔⴰⵏⵉⵏ, ⵉⵖ ⴳⴰⵏⵜ ⵜⵉⵎⵖⵔⵉⴱⵉⵢⵉⵏ ⵏⵉⵖ ⵜⵓⴳⵜⵖⵍⴰⵏⵉⵏ. ⵉⴽⴽⴰ ⵎⴰⵙⵙ ⴱⵏⵚⴰⵍⵃ ⴰⴳⵎⴰⵎ ⴰⵎⵙⴽⴰⵔ ⴳ ⵓⴳⵯⵏⵙ ⵏ ⵜⵓⴳⵜ ⵏ ⵜⴳⵔⵓⵎⵎⴰ ⵏ ⵜⵡⵓⵔⵉ ⴷ ⵓⵏⵄⴰⵕ ⴷ ⵓⵙⵎⵓⵙⵙⵓ ⵅⴼ ⵜⵎⵙⴰⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵍⴻⵍⵍⵉⵢⵉⵏ, ⴳ ⵍⵎⵖⵔⵉⴱ ⴷ ⵓⵍⴰ ⴳ ⵓⵙⴰⵜⵉ ⴰⵙⴳⴰⵡⴰⵏ ⴷ ⵓⴳⵔⴰⵖⵍⴰⵏ.
ⵉⵙⵙⵉⵅⴼ ⵎⴰⵙⵙ ⵎⵓⵏⵉⵔ ⴱⵏⵚⴰⵍⵃ, ⴰⵙⴳⴳⵯⴰⵙ ⵏ 2005, ⴰⴳⵔⴰⵡ ⵏ ⵜⵎⵙⵎⵓⵏⵜ ⵏ ⵉⵎⵏⵣⴰⴳⵏ ⵏ ⵜⵎⵙⵎⵓⵏⵜ ⵍⵎⵓⵃⵎⵎⴰⴷⵉⵢⴰ ⵉ ⵉⵎⵏⵣⴰⴳⵏ, ⵙ ⵜⴰⵙⵓⵔⵜ.  ⵉⴽⴽⴰ ⵙⴳ 2006 ⴰⵔ 2018 ⴽⵉⴳⴰⵏ ⵏ ⵜⵡⵓⵔⵉⵡⵉⵏ ⵙⴳ ⵜⵎⵙⵜⴳⴳⴰⵔⵜ ⴳ ⵓⴳⵯⵏⵙ ⵏ ⵜⵎⴰⴷⴷⴰⵙⵜ ⵜⴰⵎⵖⵔⵉⴱⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⵎⴰⵙⵙ ⴱⵏⵚⴰⵍⵃ ⵉⴽⴽⴰ ⵉⴳⴰ ⵢⴰⵏ ⵙⴳ ⵉⵏⵖⵍⴰⴼ ⵏ ⵓⵎⵓⵙⵙⵓ  ⵏ 20 ⴱⵕⴰⵢⵕ, ⵉⵙⵔⵙ ⵜⵉⵔⵙⴰⵍ ⵏ ⵜⵎⵙⵎⵓⵏⵜ “ⴰⵎⵓⵙⵙⵓ ⵉⵎⴰⵏ ⵉⵎⴰⴳⴷⵓⵢⵏ”(حركة أنفاس ديمقراطية)  ⴳ ⵓⵙⴳⴳⵯⴰⵙ ⵏ 2013, ⵉⵙⵙⵉⵅⴼ ⵜ ⴰⵔ 2018.
ⵉⵍⵍⴰ ⵖ ⵓⴳⴰⵍⴰⵣ ⵏ ⵎⴰⵙⵙ ⴱⵏⵚⴰⵍⵃ, ⵏⵏⴰ ⵉⴽⴽⴰⵏ ⵉⴳⴰ ⴰⴳⵎⴰⵎ ⴳ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⴳⵎⵎⵉ ⵜⵓⵎⵍⵉⵍⵜ - ⵙⵟⵟⴰⵜ ( ⵙⴳ 2011 ⴰⵔ 2018 ), ⴽⵉⴳⴰⵏ ⵏ ⵉⵎⴰⴳⵔⴰⴷⵏ ⴷ ⵜⵣⵔⴰⵡⵉⵏ ⴷ ⵡⴰⵔⵔⴰⵜⵏ, ⵙⴳⵉⵙⵏ ⴰⴷⵍⵉⵙ ⵅⴼ “ⵉⵥⵟⵟⴰⵜⵏ ⵏ ⵓⵎⵙⴰⵡⴰⴹ ⴰⵏⴰⵎⵓⵏ ⴷ ⵉⵎⵓⵙⵙⵓⵜⵏ ⴰⵄⵕⴰⴱⵏ” "شبكات التواصل الاجتماعي والثورات العربية" (2012) ⴷ ⵢⴰⵏ ⵡⴰⵔⵔⴰ ⴳ 2019 ⵙ ⵓⵣⵡⵍ “ⴰⵙⵎⵓⴷⵎ ⵏ ⵓⵎⵍⴰⵏ ⵉⵍⴰⵡⴰⵢⵏ - ⴰⵙⵎⴰⵢⵏⵓ ⵏ ⵜⵖⴰⵔⴰⵙⵜ ⴰⵔ ⴰⵍⴰⵡⴰⵢ” Railway Information Modeling RIM - The Track to Rail Modernization.  ⵎⴰⵙⵙ ⵎⵓⵏⵉⵔ ⴱⵏⵚⴰⵍⵃ ⵉⵜⴰⵀⵍ ⵉⴳ ⵉⴱⴱⴰ ⵉ ⵙⵏⴰⵜ ⵜⵔⴱⴰⵜⵉⵏ.