ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵙⵙ ⵏ ⵓⴽⵕⴰⵙ 30 ⵏⵓⵡⴰⵏⴱⵉⵔ 2022 ⴳ ⵓⵙⵖⵉⵎ ⵏⵏⵙ ⴳ ⵕⵕⴱⴰⵟ, ⵢⴰⵜ ⵜⵙⴰⵡⵔⵜ ⵏ ⵓⴷⵉⵡⵍ ⵅⴼ ⵜⵙⵓⵎⵔⵜ ⵏ ⵓⵙⵍⴳⵏ ⵉⵙⵡⵓⵜⵜⵙⵏ ⴰⵙⵏⴼⵍ ⴷ ⵓⵙⵎⴰⴷ ⵏ ⵓⵙⵍⴳⵏ ⵓⵟⵟⵓⵏ 97.13 ⵣⴷⵉⵏⵉⵏ ⵙ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⴷ ⵜⵏⴽⵔⴰ ⵙⵔⵙ, ⴷ ⵜⵙⵓⵎⵔⵜ ⵏ ⵓⵙⵍⴳⵏ ⵉⵏⴱⴹⵏ ⵙ ⵓⵙⵏⴼⵍ ⴷ ⵓⵙⵎⴰⴷ ⵏ ⵜⵎⵜⵜⴰ 8 ⵏ ⵓⵙⵍⴳⵏ ⵓⵟⵟⵓⵏ 10.03 ⵣⴷⵉⵏⵉⵏ ⵙ ⵉⵙⴰⴷⴰⴼⵏ. 

"ⵙ ⵜⵖⵣⵏⵜ ⵏⵏⵙ ⵅⴼ ⵜⵎⵢⴰⵇⵇⴰⵏⵜ ⵜⴰⴳⵔⴰⵖⵍⴰⵏⵜ ⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⴷ ⵓⴱⵕⵓⵜⵓⴽⵓⵍ ⵏⵏⵙ ⴰⵏⴹⴼⴰⵕ ⴷ ⵓⵕⵥⵥⵓⵎ ⵏⵏⵙ ⵉ ⵓⵎⴹⴰⴽⴰⵕ ⵏ ⵓⵙⵡⵉⵏⴳⵎ ⴰⵎⴳⵓⵔⴰⵏ ⵅⴼ ⵉⵎⵔⵙⵉ, ⵉⵣⵣⴳⵣ ⵍⵎⵖⵔⵉⴱ ⵙ ⵜⵙⵖⵣⵏⵜ ⵏ ⵜⵎⵢⴰⴷⴰⵙⵜ ⵜⴰⵖⵣⵓⵔⴰⵏⵜ ⵉ ⵜⵎⵙⴰⵔⵜ ⵏ ⵓⵎⵎⵓⵄⴹⵕ ⵙ ⵓⵎⵎⴰⵜⵜⵉ ⵙⴳ ⵜⵥⵕⴰⵢⵜ ⵜⴰⵏⴱⴷⴰⴷⵜ ⵉⴼⴰⵡⵏ ⵙ ⵓⵎⵓⴳⴳⵓ ⴰⵖⵣⵓⵔⴰⵏ ⴰⵏⵊⵎⵓ ⴰⵎⵙⵙⵓⵎⵓ ⵏⵏⵉ ⵉⵙⴰⵡⴰⵍⵏ ⵉ ⵓⴳⴳⵉⴷ ⴰⵎⵄⴹⵓⵕ ⵙ ⵎⴰⴷ ⵉⵙⵙⵓⵔⵓⴼⵏ ⵙ ⵜⵏⴼⵔⵓⵜ ⵏ ⵉⵣⵔⴼⴰⵏ ⵏⵏⵙ ⵙ ⵓⵎⴰⵜⴰ" , ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵜⴳⵓⵔⵉ ⵏ ⵓⵏⵏⵓⵕⵥⵎ ⵏⵏⵉ ⵉⵙⵎⵏⵉⴷ ⵎⴰⵙⵙ ⵄⴱⴷ ⵍⵇⴰⴷⵔ ⴰⵣⵔⵉⵄ, ⴰⵏⵙⵙⵉⵅⴼ ⵏ ⵓⴼⵔⴷⵉⵙ ⵏ ⵜⵏⴳⵔⵜ ⴷ ⵉⵎⵢⴰⵙⵙⴰⵜⵏ ⴰⴽⴷ ⵓⴱⵕⵍⴰⵎⴰⵏ ⴳ ⵓⵙⵇⵇⵉⵎ, ⵙ ⵜⵎⵓⵔⴰⵢⵜ ⵏⵏⵙ. 

ⵜⵙⵉⵙⴼⵉⵡ ⵎⴰⵙⵙⴰ ⴱⵓⵄⵢⵢⴰⵛ, ⵙ ⵓⵎⵙⴰⵙⴰ ⴰⴽⴷ ⵜⵥⵍⴰⵢⵉⵏ ⴷ ⵜⵙⵎⵉⴳⴰⵍ ⵏⵏⵉ ⴰⵙ ⵉⵜⵜⵡⴰⴼⴽⴰⵏ ⵙ ⵓⵙⵍⴳⵏ, ⵢⵉⵡⵣ ⵅⴼ ⵓⴹⴼⴼⵓⵕ ⵏ ⵉⵙⵖⵏⵓⵜⵏ ⴷ ⵜⵙⵓⵎⵔⵉⵏ ⵏ ⵉⵙⵍⴳⵏⵏ ⵣⴷⵉⵏⵉⵏ ⵙ ⵉⵙⵎⵉⵍ ⴰⴷ ⴳ ⵓⵎⵏⵉⴷ ⵏ ⵓⵙⴱⵓⵖⵍⵓ ⵏ ⵓⵎⴹⴰⴽⴰⵕ ⵓⵣⵔⵉⴼ ⴷ ⵓⵍⴳⵉⵏ ⴷ ⵓⵣⵔⴼⴰⵏ ⴷ ⵓⵙⴷⵓⵙ ⵏ ⵓⵎⵛⴰⵡⴰⵕ ⴷⵜⴷⵔⴰⵡⵜ ⴰⴽⴷ ⵜⵎⵔⵙⵍⵜ ⵜⵓⵣⵔⵉⴼⵜ ⴷ ⵉⵎⴳⴳⴰⵢⵏ ⵓⵏⴱⵉⴹⵏ ⴷ ⵓⵖⵔⵉⵎⵏ ⴷ ⵜⴼⵓⵍⵉⵏ ⴰⵎⵓⵏⵉⵏ ⴰⴼⴰⴷ ⴰⴷ ⵉⵜⵜⵓⵙⴷⵓⵙ, ⵉⵜⵜⵓⵙⵖⵓⴷⴰ ⵓⴼⵔⴰⴳ ⵓⵍⴳⵉⵏ ⴷ ⵓⵍⴰ ⵜⵉⵏⴼⵔⵓⵜⵉⵏ ⵣⵎⵔⵏⵉⵏ ⴰⴷ ⴰⵡⵙⵏⵜ ⴳ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⵏ ⵓⵙⵎⵉⵍ ⴰⴷ. 

ⴳ ⵓⵙⵉⵡⵍ ⵏⵏⵙ ⵅⴼ ⵜⵉⵍⴰⵍⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⵖⵓⴷⵓ ⵏ ⵓⵙⵍⴳⵏ ⵏ ⵓⵙⴰⵜⵉ ⵣⴷⵉⵏⵉⵏ ⵙ ⵓⴼⵔⴰⴳ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ, ⵜⵙⵙⵎⵜⵔ ⵎⴰⵙⵙⴰ ⵏⵣⵀⴰ ⵍⵃⵓⵕⵕ, ⵜⴰⵎⵣⴷⴰⵢⵜ ⵏ ⵉⵎⵉⵙ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⴷ ⵓⵏⴳⵎⴰⵎ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙ ⵉⵍⵍⴰ ⵉⵎⵔⵙⵉ ⴰⴷ ⴳ ⵜⵣⵡⵉⵔⵉ ⵏ ⵜⵙⴽⵯⴼⵍⵉⵏ ⵏ ⵉⵙⵉⵣⵡⵉⵔⵏ ⵉⵙⵜⵔⴰⵜⵉⵊⵉⵢⵏ ⵏ ⵓⵙⵇⵇⵉⵎ ⵙⵡⵓⵜⵜⵙⵏⵉⵏ ⴰⵙⴷⵓⵙ ⵏ ⵜⵓⵙⵏⵜ ⵙ ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⵙ ⵓⵙⴷⵓⵙ ⵏ ⵉⴹⵕⵉⵚⵏ ⵓⵍⴳⵉⵏⵏ ⴷ ⵓⵙⵖⵓⴷⵓ ⵏⵏⵙⵏ ⵙ ⵎⴰⴷ ⵉⵜⵜⵏⴼⵔⵓⵏ ⴰⵡⴰⴹ ⵏ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⵏ ⵓⵙⵎⵉⵍ ⴰⴷ ⵙ ⵉⴱⴷⴷⵉ ⵅⴼ ⵉⵙⴽⵉⵍ ⴷ ⵡⴰⵔ ⴰⵙⵏⵓⵃⵢⵓ. 

ⵙⵡⵓⵔⵉⵏ ⵉⵎⴷⵔⴰⵡⵏ ⴳ ⵜⵙⴰⵡⵔⵜ ⴰⴷ, ⵏⵏⵉ ⵉⵜⵜⵡⴰⵙⵙⴰⵏⵏ ⵙ ⵜⴷⵔⴰⵡⵜ ⵏ ⵜⵓⴳⵜ ⵏ ⵉⵎⴳⴳⴰⵢⵏ ⵓⵏⴱⵉⴹⵏ ⴷ ⵉⴳⵏⵙⴰⵙ ⵏ ⵜⵔⵓⴱⴱⴰ ⵜⵉⴱⵕⵍⴰⵎⴰⵏⵉⵢⵉⵏ ⴷ ⵜⵎⵙⵎⵓⵏⵉⵏ ⵏ ⵡⴰⵎⵓⵏ ⵓⵖⵔⵉⵎ ⵙⵡⵓⵔⵉⵏⵉⵏ ⴳ ⵢⵉⴳⵔ ⴰⴷ, ⴷ ⵓⵍⴰ ⵉⴳⵏⵙⴰⵙ ⵏ ⵉⵏⴳⵎⴰⵎⵏ ⵏ ⵓⵏⴱⴰⴹ, ⵅⴼ ⵓⵎⵙⴳⴷⴰⵍ ⵏ ⵜⵓⵎⴰⵢⵉⵏ ⵏ ⵉⵎⵙⵙⵓⵎⵔⵏ ⵓⵍⴳⵉⵏⵏ ⴰⴼⴰⴷ ⴰⴷ ⴰⵡⵙⵏ ⴳ ⵓⵙⴱⵓⵖⵍⵓ ⵏ ⵓⵎⴹⴰⴽⴰⵕ ⵓⵍⴳⵉⵏ ⴷ ⴰⵣⵔⴼⴰⵏ ⵅⴼ ⵉⵙⴽⵉⵍ ⴷ ⵡⴰⵔ ⴰⵙⵏⵓⵃⵢⵓ ⵏⵏⵉ ⵉⴳⴰⵏ ⴰⵎⵏⵣⴰⵢ ⴰⴽⵙⵡⴰⵜ ⴳ ⵜⵎⵢⴰⵇⵇⴰⵏⵜ ⵜⴰⴳⵔⴰⵖⵍⴰⵏⵜ ⵏ ⵓⴼⵔⴰⴳ ⵏ ⵓⴳⴳⵉⴷⵏ ⵉⴷ ⴱⵓ ⵓⵎⵎⵓⵄⴹⵕ. 

ⵜⵙⵎⴷ ⵜⵙⴰⵡⵔⵜ ⴰⴷ ⵙ ⵡⴰⵍⵍⴰⵍ ⵏ ⴽⵉⴳⴰⵏ ⵏ ⵉⵙⵖⵍⴰⴼ ⵣⵎⵔⵏⵉⵏ ⴰⴷ ⵙⴷⵓⵙⵏ ⴰⴼⵔⴰⴳ ⵓⵍⴳⵉⵏ ⴷ ⵜⵏⴼⵔⵓⵜⵉⵏ ⵏ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ, ⴷ ⵓⵍⴰ ⴰⵎⴹⴰⴽⴰⵕ ⵅⴼ ⵉⵎⵙⴰⵔⴰⵙⵏ ⵏⵏⵉ ⵉⵜⵜⵎⵏⴰⵍⴰⵏ ⵜⴰⵏⴽⵔⴰ ⵙ ⵓⵙⵓⵔⵙ ⵏ ⵓⵙⵎⵉⵍ ⴰⴷ, ⴰⵎ: ⴰⵙⵓⵖⵏ ⵏ ⵓⵣⵣⵔⴰⵢ ⵅⴼ ⵉⵙⵍⴳⵏⵏ ⵃⵎⴰ ⴰⴷ ⵎⵙⴰⵙⴰⵏ ⴰⴽⴷ ⵜⵙⴰⵖⵓⵍⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵉⵙⴱⴷⴰⴷⵏ ⵉⴷⵙⵜⴰⵔⵏ ⵥⵍⵉⵏⵉⵏ ⵙ ⵓⴼⵔⴰⴳ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ (ⵍⵓⵎⵎⵏ ⵎⴰⴷ ⵉⵥⵍⵉⵏ ⵙ ⵉⵙⵏⵎⵍⵏ, ⴰⵣⵔⴼ ⴳ ⵜⵣⵎⵔⵜ ⵜⵓⵍⴳⵉⵏⵜ, ⵉⵙⵙⵡⵀⵏ ⵉⵎⵏⵍⵍⵉⵜⵏ, ⵉⵙⴰⴷⴰⴼⵏ, ⴷ ⵓⴳⴳⴰⵔ) ⴷ ⵓⵙⵓⵖⴷ ⵏ ⵓⵎⴰⵟⵍ ⵍⵍⴰⵏⵉⵏ ⴳ ⵓⵙⵙⵓⴼⵖ ⵏ ⵉⴹⵕⵉⵚⵏ ⵉⵎⵙⵙⵓⴷⵙⵏ ⵏⵏⴰ ⴷ ⴷⴰⵔ ⴰⵣⴷⴰⵢ, ⴰⵙⵓⵖⵏ ⵏ ⵓⵙⵙⵉⴷⴼ ⵏ ⵓⵎⵏⵉⴷ ⵏ ⵓⵎⵎⵓⵄⴹⵕ ⴳ ⵜⵙⵔⵜⴰⵢ ⵜⵉⵏⵊⵎⵓⵜⵉⵏ ⵉⴷⴷⵖ ⴳⴰⵏⵜ ⵜⴳⵔⴰⵡⵉⵏ ⵜⵉⵎⵓⵔⴰⵏⵉⵏ ⵉⵎⴰⵙⵙⵏ ⵏ ⵡⴰⴷⴰⵙ, ⴰⵙⴷⵓⵙ ⵏ ⵜⵣⵎⵎⴰⵔ ⵏ ⵉⵎⴳⴳⴰⵢⵏ ⵏⵜⴰⵢⵏⵉⵏ ⵙ ⵓⵣⵣⵓⴳⵣ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵣⴷⵉⵏⵉⵏ ⵙ ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ, ⴰⵙⵙⵓⵊⴷ ⵏ ⵉⵙⵓⴳⴰⵎ ⵓⵥⵕⵉⴼⵏ ⴷ ⵉⵙⵓⴳⴰⵎ ⵉⵏⴼⴳⴰⵏⵏ ⵉⵎⵙⵖⴰⵔⵓⵜⵏ ⵉ ⵜⴰⵎⵓⵏⵜ ⴰⴽⴷ ⵓⵣⵣⵓⴳⵣ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵏⵏⵉ ⴷ ⴷⴰⵔ ⴰⵣⴷⴰⵢ, ⴷ ⵓⴳⴳⴰⵔ.