ⵎⴽⴷⴰ ⵉⵎⵢⴰⵙⵙⴰ ⵓⵙⵇⵇⵉⵎ ⵙ ⵜⵎⵢⴰⵇⵇⴰⵏⵜ ⵏ ⵜⵎⴷⵔⴰⵡⵜ ⴷ ⵓⵎⵢⴰⵡⴰⵙ ⴰⴽⴷ ⵜⵎⵔⵙⵍⵜ ⵏ ⵓⵎⴰⵣⵣⴰⵍ ⵏ ⵜⴳⵍⴷⵉⵜ ⵏⵏⵉ ⵉⵜⵜⵓⵙⴳⵎⴹⵏ ⴳ 18 ⴽⵟⵓⴱⵕ 2021 ⴳ ⵕⵕⴱⴰⵟ, ⵏⵏⵉ ⵉⵙⵡⵓⵜⵜⵙⵏ: ⴰⵙⵡⵓⵜⵜⵓ ⵏ ⵓⵙⴰⵜⵉ ⴰⵙⴰⵖⵓⵍ ⵉ ⵓⵙⵓⵜⴳ ⵏ ⵉⵎⵢⴰⵙⵙⴰⵜⵏ ⵏ ⵓⵎⵢⴰⵡⴰⵙ ⴷ ⵜⵎⴷⵔⴰⵡⵜ ⵉⵏⴳⵔ ⵜⵎⵔⵙⴰⵍ ⵙ ⵙⵏⴰⵜ ⴳ ⵢⵉⴳⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵔⵙⵏ; ⴰⵙⴷⵓⵙ ⵏ ⵜⵡⵓⵔⵉ ⵉⵛⵛⴰⵔⵏ ⴰⴼⴰⴷ ⴰⴷ ⵜⴻⵜⵜⵓⵣⵓⵣⵣⵔ ⵜⵓⵙⵙⵏⴰ ⵏ ⵓⵣⵔⴼ ⴷ ⵓⵣⵓⵛⵛⵍ, ⴷ ⵓⵙⴳⵎⵉ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵓⵔⵉ ⴳ ⵜⵎⵙⴽⵔⵜ ⵏ ⵉⵣⵔⴼⴰⵏ; ⴰⵙⴷⵓⵙ ⵏ ⵉⵙⴳⵔⵏ ⵏ ⵓⵏⴱⴰⴹ ⴳ ⵓⵙⵡⵓⴷⴷⵓ ⴰⵎⵙⵙⵓⴳⵓⵔ; ⴷ ⵓⵎⵔⴰⵔⴰ ⵏ ⵜⵉⵔⵎⵉⵜⵉⵏ ⴷ ⵜⵎⵓⵣⴰⵢⵉⵏ ⴳ ⵢⵉⴳⵔⴰⵏ ⵏ ⵓⵙⵎⴽⵍ ⵏ ⵜⵏⵓⵔⵣⵉⵏ ⴷ ⵓⵙⵎⵓⵜⵜⴳ ⴷ ⵓⵙⵉⵔⵎ; ⴷ ⵓⴳⴳⴰⵔ.

ⵉⵙⵙⴳⵎⴹ ⵓⵙⵇⵇⵉⵎ ⵜⴰⵎⵢⴰⵇⵇⴰⵏⵜ ⵏ ⵜⵎⴷⵔⴰⵡⵜ ⴰⴽⴷ ⵜⵣⵍⵖⴰ ⵜⴰⵎⵓⵃⵎⵎⴰⴷⵉⵜ ⵏ ⵉⵎⵓⵙⵏⴰⵡⵏ, ⵜⴰⵙⵎⵉⵔⵉⵜ ⵜⴰⵎⴰⵜⴰⵢⵜ ⵏ ⵜⵎⵙⵙⵓⴳⵓⵔⵜ ⵏ ⵉⵖⵣⵓⵜⵏ ⴷ ⵡⴰⵍⴰⵙ ⵏ ⵓⵙⵉⴷⴼ, ⵜⴰⵎⴰⵡⴰⵙⵜ ⵜⴰⵏⵖⵍⴰⴼⵜ ⵉⵜⵜⵓⵙⵎⴰⴳⵍⵏ ⵙ ⵜⵎⵙⴰⵙⵜⵍⵜ ⴷ ⵜⵎⵔⵙⵍⵜ ⵎⵓⵃⵎⵎⴷ ⵡⵉⵙ ⵚⴹⵉⵚ ⵏ ⵡⴰⵍⴰⵙ ⵏ ⵓⵙⵉⴷⴼ ⵏ ⵉⵎⵖⵣⵓⵜⵏ ⴰⵙⵙ ⵏ 2 ⵏⵓⵡⴰⵏⴱⵉⵔ 2023, ⵉ ⵓⵙⵔⵓⵙ ⵏ “ⴰⵎⵎⴰⵙ ⵏ ⵓⵎⵙⴼⵔⵓ”. ⵜⵙⵡⵓⵜⵜⵙ ⴰⵍⴰⵙ ⵏ ⵓⵙⵖⵔⵜ ⴷ ⵓⵙⵉⴷⴼ ⵏ ⵉⵎⵖⵣⵓⵜⵏ ⵏⵏⵉ ⵅⴼ ⵉⵜⵜⵡⴰⵏⴱⴰⴹ ⴳ ⵜⵎⵙⴰⵔⵉⵏ ⵏ ⵜⵉⵟⵟⵓⵕⴼⴰ ⴷ ⵓⴱⵔⵙⵉⵡⴷ ⴷ ⵉⴳⵉ ⵏ ⵓⴳⴳⴰⵔ ⵏ ⵜⵕⵡⵉ ⵉ ⵜⵎⴷⵔⴰⵡⵜ ⵜⴰⵎⵔⵙⴰⵍⵜ ⵏⵏⵉ ⵉⵍⵍⴰⵏ ⵉⵏⴳⵔ ⵜⴼⵓⵍⵉⵏ ⵉⵙⵙⴳⵎⴹⵏ ⴷ ⵉⵎⴷⵔⴰⵡⵏ ⵢⴰⴹⵏⵉⵏ ⴷ ⵉⵎⴷⵔⴰⵡⵏ ⵢⴰⴹⵏⵉⵏ ⴷ ⵉⵎⴳⴳⴰⵢⵏ ⵉⵎⵔⵙⴰⵍⵏ.  
ⵔⴰⴷ ⵉⵏⵏⵖⵍⴼ ⵡⴰⵎⵎⴰⵙ ⵙ ⵜⵙⵎⵉⴳⴰⵍ ⵜⵉⵎⴰⵢⵏⵓⵜⵉⵏ ⵉⵣⴷⵉⵏ ⵙ ⵓⵥⵍⴰⵢ ⵙ ⵓⵙⵎⴰⵔ ⵏ ⵉⵖⴰⵡⴰⵙⵏ ⵏ ⵡⴰⵔⴰⵢ ⵙⴳ ⵉⵎⵉⵣⵉⵜⵏ ⵏ ⵜⴹⵓⵕⵉ ⴳ ⵜⵉⵟⵟⵓⵕⴼⴰ, ⴷ ⵉⴳⵉ ⵏ ⵉⵙⵡⵓⴷⴷⵓⵜⵏ ⵉⵜⵜⵓⵣⵎⵔⵏ ⵉ ⵓⴼⵔⴰⴳ ⵏ ⵓⴳⴰⵔⴰⵡ ⴰⵡⵊⴰⵡⴰⵏ ⵓⵙⵔⵉⴷ ⵏ ⵉⵏⴱⵖⵓⵔⵏ ⵙⴳ ⵓⵖⴰⵡⴰⵙ ⵏ ⵓⵎⵙⴼⵔⵓ ⵙⴳ ⵉⵎⵉⵣⵉ ⵏ ⵓⵙⴽⴰⵔ ⵙ ⵜⵡⵏⴳⵉⵎⵉⵏ ⵏ ⵜⵉⵟⵟⵓⵕⴼⴰ, ⴷ ⵉⴳⵉ ⵏ ⵜⵣⵔⴰⵡⵉⵏ ⴷ ⵉⵔⵣⵣⵓⵜⵏ ⴷ ⵉⵏⵎⵓⵇⵇⴰⵔⵏ ⴷ ⵜⵙⵓⵜⵍⵉⵏ ⵏ ⵓⵙⵎⵓⵜⵜⴳ ⵏⵏⵉ ⴷ ⴷⴰⵔ ⴰⵣⴷⴰⵢ, ⴷ ⵓⴳⴳⴰⵔ.

ⵉⵙⵙⴳⵎⴹ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵢⴰⵜ ⵜⵎⵢⴰⵇⵇⴰⵏⵜ ⵏ ⵓⵙⴰⵜⵉ ⵏ ⵜⵎⴷⵔⴰⵡⵜ ⴷ ⵓⵎⵢⴰⵡⴰⵙ ⴰⴽⴷ ⵓⵙⵉⵏⴰⴳ ⴰⵏⴰⴼⵍⵍⴰ ⴷ ⵓⵙⵏⵖⵎⵙ ⴷ ⵓⵎⵢⴰⵡⴰⴹ ⴳ ⵕⵕⴱⴰⵟ ⴰⵙⵙ ⵏ 7 ⵢⵓⵏⵢⵓ 2022 ⴳ ⵉⵎⵓⵙⵙⵓⵜⵏ ⵏ ⵓⵙⴼⵙⵔ ⴰⴳⵔⴰⵖⵍⴰⵏ ⵏ ⵜⵥⵕⵉⴳⵜ ⴷ ⵓⴷⵍⵉⵙ. ⵜⵓⵡⵉ ⴷ ⵜⵎⵢⴰⵇⵇⴰⵏⵜ ⵅⴼ ⵓⵙⵎⵓⵜⵜⴳ ⵏ ⵉⵖⴰⵡⴰⵙⵏ ⵏ ⵓⵙⵎⵓⵜⵜⴳ ⴷ ⵓⵙⵎⵓⵜⵜⴳ ⴰⵙⵓⵍⴰⵏ, ⴷ ⵓⵙⵡⵓⵜⵜⵓ ⵏ ⵉⵙⵓⴳⴰⵎ ⵏ ⵓⵔⵣⵣⵓ ⴷ ⵜⵣⵔⴰⵡⵉⵏ ⵉⵎⵙⵖⴰⵔⵓⵜⵏ, ⴷ ⵓⵙⴷⵓⵙ ⵏ ⵜⵣⵎⵎⴰⵔ ⴳ ⵢⵉⴳⵔ ⵏ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵏⵖⵎⵙ. ⵎⴽⴷⴰ ⵜⵙⵡⵓⵜⵜⵙ ⵜⵎⴷⵔⴰⵡⵜ ⵉⵏⴳⵔ ⵜⵎⵔⵙⴰⵍ ⵙ ⵙⵏⴰⵜ ⴰⵎⵔⴰⵔⴰ ⵏ ⵜⵎⵓⵣⴰⵢⵉⵏ ⴳ ⵢⵉⴳⵔ ⵏ ⵓⵙⵎⵓⵜⵜⴳ, ⵉⵖ ⵉⴳⴰ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏⵉⵖ ⵢⵉⴳⵔ ⵏ ⵏ ⵓⵙⵏⵖⵎⵙ ⴷ ⵓⵎⵢⴰⵡⴰⴹ, ⴷ ⵓⵔⵣⵣⵓ ⴳ ⵢⵉⴳⵔ ⵏ ⵜⴷⵔⴼⵉⵏ, ⵙⵍⴰⵡⴰⵏ ⴰⴽⴽⵯ ⵜⴰⴷⵔⴼⵉ ⵏ ⵓⵙⵏⵖⵎⵙ ⴷ ⵜⴷⵔⴼⵉ ⵏ ⵜⵏⵖⵎⴰⵙⵜ ⴷ ⵓⵎⵏⴰⴷ ⴷ ⵓⵡⵏⵏⵉ.
ⴰⵎⵓⵏ ⴳ ⵜⵎⵢⴰⵇⵇⴰⵏⵜ ⴰⴷ ⴽⵕⴰⴹ ⵉⵙⵓⴳⴰⵎ ⵉⴷⵙⵍⴰⵏⵏ: ⴰⵎⵣⵡⴰⵔⵓ ⴳⵉⵙⵏ, ⴰⵙⵎⵓⵜⵜⴳ ⴰⴷⵙⵍⴰⵏ ⵉ ⵉⵎⵃⴹⴰⵕⵏ ⵉⵏⵖⵎⴰⵙⵏ ⴷ ⵓⵙⵎⵓⵜⵜⴳ ⴰⵙⵓⵍⴰⵏ ⵉ ⵉⵣⵣⵓⵍⴰⵏⵏ, ⴳ ⵢⵉⴳⵔⴰⵏ ⵎⵢⴰⵏⴰⵡⵏⵉⵏ ⵉⵣⴷⵉⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ. ⴰⵙⴰⴳⵎ ⵡⵉⵙ ⵙⵉⵏ ⵉⵣⴷⵉ ⵙ ⵜⵉⵍⴰⵍ ⵏ ⵜⵉⵎⵥⵏⵥⵕⵉⵏ ⵉ ⵜⵏⴽⵔⴰ ⵙ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⵉ ⴳ ⵢⴰⵎⵓ ⵓⵙⵏⵎⴰⵍⴰ ⵏ ⵉⵏⵎⵓⵇⵇⴰⵔⵏ ⴷ ⵜⵉⵏⴰⵡⵉⵏ ⴷ ⵉⵎⴹⴰⴽⴰⵕⵏ ⵉⵎⴰⵜⴰⵢⵏ. ⵉⵣⴷⵉ ⵓⵙⴰⴳⵎ ⵡⵉⵙ ⴽⵕⴰⴹ ⵙ ⵓⴼⴰⵔⵙ ⴰⵎⴰⵙⵙⴰⵏ ⴷ ⵓⴽⴰⴷⵉⵎⵉ ⴳ ⵢⵉⴳⵔ ⵏ ⵓⵙⵏⵖⵎⵙ ⴳ ⵓⵎⵢⴰⵙⵙⴰ ⵏⵏⵙ ⵙ ⵉⵙⵎⴽⵍⵏ ⵉⵎⴰⵜⴰⵢⵏ ⵉ ⵜⵎⵙⴰⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⵙ ⵜⵎⵍⴷⴰ ⴰⴷ ⵉⵜⵜⵡⴰⴱⵔⵔⴰⵃ ⵙ ⵓⵙⵏⵜⵉ ⵏ ⵓⵙⵔⵓⵙ ⵏ ⵜⵙⵎⵖⵓⵔⵜ ⵉⵛⵛⴰⵔⵏ ⵉⵏⴳⵔ ⵓⵙⵉⵏⴰⴳ ⴷ ⵓⵙⵇⵇⵉⵎ ⵉⵚⴰⵃⴰⵏ ⵉ ⵉⵎⵃⴹⴰⵕⵏ ⵏ ⵓⵙⵉⵏⴰⴳ ⵏⵏⵉ ⵉⴳⴰⵏ ⵜⴰⵎⵙⵙⵉⵍⵉⵜ ⵏ ⵓⴽⴰⵎ ⵅⴼ ⵓⵔⵣⵣⵓ ⴰⴽⴰⴷⵉⵎⵉ ⵙ ⵓⵣⴷⴰⵢ ⵙ ⵉⵣⵔⴼⴰⵏ ⵏ ⵓⴼⴳⴰⵏ.

ⴳ ⵓⵙⴰⵜⵉ ⵏ ⵓⵎⵢⴰⵙⵙⴰ ⵉⵏⴳⵔ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵢⵉⴳⵔⴰⵏ ⵓⵏⴱⵉⴹⵏ ⵎⵣⴰⵔⴰⵢⵏⵉⵏ, ⵉⵙⵙⴳⵎⴹ ⵓⵙⵇⵇⵉⵎ ⵢⴰⵜ ⵜⵎⵢⴰⵇⵇⴰⵏⵜ ⵏ ⵜⵎⴷⵔⴰⵡⵜ ⴰⴽⴷ ⵜⵎⴰⵡⴰⵙⵜ ⵏ ⵜⴱⴷⴰⴷⵜ ⴷ ⵓⵙⵉⴷⴼ ⴰⵏⴰⵎⵓⵏ ⴷ ⵜⵡⵊⴰ ⴳ 19 ⴷⵓⵊⴰⵏⴱⵉⵔ 2022, ⵜⵙⵡⵓⵜⵜⵙ ⵎⴰⵢⴰ:
ⴰⴼⵔⴰⴳ ⵓⵍⴳⵉⵏ ⴷ ⵓⵙⴷⵍⵙ ⴷ ⵓⵙⵎⵓⵜⵜⴳ ⴷ ⵡⴰⵏⵏⴰⵍ ⴷ ⵓⴼⵔⴰⴳ ⵏ ⵉⵙⵎⵉⵍⵏ ⴽⵓⴽⴹⵏⵉⵏ, ⵖ ⵢⴰⵎⵓ ⴰⵡⴷ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵜⵡⵜⵎⵉⵏ ⴷ ⵜⵔⴱⴰⵜⵉⵏ ;
ⴰⵙⴷⵓⵙ ⵏ ⵜⵣⵎⵎⴰⵔ ⵏ ⵉⵎⵙⵜⴳⴳⴰⵔⵏ ⵏ ⵓⴳⵊⴷⵉ ⴰⵏⴰⵎⵓⵏ ⴳ ⵢⵉⴳⵔⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵎⵢⴰⵡⴰⵙ ⵉⵏⴳⵔ ⵉⵎⵉⵙ ⵓⵏⴱⵉⴹ ⴷ ⵉⵎⵉⵙ ⴰⵏⴰⵎⵓⵔ ⵉⵥⵍⵉⵏ ⵙ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ, ⴷ ⵓⴳⴳⴰⵔ.

ⵜⵙⵡⵓⵜⵜⵙ ⵜⵎⵢⴰⵇⵇⴰⵏⵜ ⵏ ⵓⵙⴰⵜⵉ ⵏⵏⵉ ⵉⵙⵙⴳⵎⴹ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵉⵍⵖ ⴰⵣⵣⵓⵍⴰⵏ ⴷ ⵓⵙⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⴰⵙⴷⵓⵙ ⴷ ⵜⵎⴷⵔⴰⵡⵜ ⵉⵏⴳⵔ ⵜⵙⴷⴰⵡⵉⵢⵉⵏ ⴷ ⵜⴽⴰⴷⵉⵎⵉⵢⵉⵏ ⵜⵉⵏⵎⵏⴰⴹⵉⵏ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ, ⵙⴳ ⵢⴰⵜ ⵜⵙⴳⴰ, ⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵙⵇⵇⵉⵎⵉⵏ ⵜⵉⵏⵎⵏⴰⴹⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙⴳ ⵜⵙⴳⴰ ⵢⴰⴹⵏⵉⵏ, ⴳ ⵢⵉⴳⵔⴰⵏ ⵏ ⵓⵙⵙⵍⵎⴷ ⴰⵏⵎⵍⴰⵏ ⴷ ⵓⵙⵎⵓⵜⵜⴳ ⴰⵣⵣⵓⵍⴰⵏ ⴷ ⵓⵙⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ, ⵃⵎⴰ ⴰⴷ ⵜⵉⵍⵉ ⵜⵏⴽⵔⴰ ⵙ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵡⵓⵔⵉ ⵏ ⵓⴱⴰⵔⴰⵣ ⵏⵏⵉ ⴷⵉⴷⵙ ⵉⵣⴷⵉⵏ, ⴷ ⵓⵙⴷⵓⵙ ⵏ ⵓⵙⴳⵎⵉ ⵅⴼ ⵜⵓⵙⵙⵏⴰ ⵏ ⵉⵙⴽⵉⵍ ⴷ ⵓⵙⴱⴷⴷⵉ ⵏ ⵓⵙⵏⵓⵃⵢⵓ, ⴷ ⵜⵡⵍⴰⴼⵉⵏ ⵜⵉⵎⴷⵢⴰⵜⵉⵏ ⴷ ⵉⵎⵏⴰⴷⵏ ⵓⵣⴷⵉⵔⵏ ⵏⵏⵙⵏⵜ.
ⵣⴷⵉⵏ ⵉⴳⵔⴰⵏ ⵏ ⵓⵎⵢⴰⵡⴰⵙ ⵉⵥⵍⵉⵏ ⵙ ⵜⵎⵢⴰⵇⵇⴰⵏⵜ ⴰⴷ ⵙ ⵓⵙⴷⵓⵙ ⵏ ⵓⵏⴰⴳⵔⴰⵡ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴳⵔⵜ ⵜⴰⵏⴰⵎⵓⵏⵜ ⴳ ⵉⵙⴰⵢⵔⴰⵔⵏ ⵉⵏⵎⵍⴰⵏⵏ ⴷ ⵉⵙⴷⴰⵡⴰⵏⵏ ⴷ ⵓⵍⴰ ⵜⵉⵎⵔⵙⴰⵍ ⵏ ⵓⵙⵎⵓⵜⵜⴳ ⴰⵣⵣⵓⵍⴰⵏ ⵙ ⵓⵎⵙⴰⵙⴰ ⴷ ⵜⵎⵢⴰⴷⴰⵙⵜ ⵜⴰⵏⵊⵎⵓⵜ ⵉⵙⵡⵓⵜⵜⵙⵏ ⴰⵕⵚⵚⴰ ⵏ ⵜⵉⵏⴷⵉⵜⵉⵏ ⵏ ⵜⵎⵓⵔⵉ ⴷ ⵓⵙⴱⵖⵔ ⵏ ⵜⵡⵏⴳⵉⵎⵜ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵣⵓⵣⵣⵔ ⵏ ⵜⵓⵙⵙⵏⴰ ⵏ ⵓⵙⵓⵔⴼ ⴷ ⵓⵎⴹⴰⴽⴰⵕ ⴰⵎⵕⵚⵓ ⴷ ⵓⵏⴳⵔⴰⵢ ⴳ ⵉⵖⴰⵡⴰⵙⵏ ⵉⵏⵎⵍⴰⵏⵏ ⴷ ⵉⵙⴰⴽⴰⵜⵏ ⵏ ⵓⵙⵎⵓⵜⵜⴳ, ⴷ ⵓⵍⴰ ⴰⵙⵎⵓⵜⵜⴳ ⵏ ⵉⵙⵓⵜⴰⵢ ⴷ ⵜⵙⵓⴳⴰⵔ ⵜⵉⵎⵖⵔⵉⴱⵉⵢⵉⵏ ⴷ ⵜⴱⵕⵕⴰⵏⵉⵢⵉⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵓⵙⵔⵇⴱ ⵏ ⵜⵉⵍⴰⵍ ⵜⵉⴷⵍⵙⴰⵏⵉⵏ ⴷ ⵜⵏⴰⵥⵓⵕⵉⵏ ⵉⵣⴷⵉⵏ ⵙ ⵢⵉⴳⵔ ⴰⴷ.

ⵙⵙⵏⵏ ⵉⵎⵢⴰⵙⵙⴰⵜⵏ ⵏ ⵓⵎⵢⴰⵡⴰⵙ ⴷ ⵜⵎⴷⵔⴰⵡⵜ ⵏⵏⵉ ⵉⵍⵍⴰⵏ ⵉⵏⴳⵔ ⵓⵙⵇⵇⵉⵎ ⴷ ⵜⵎⴰⵡⴰⵙⵜ ⵏ ⵜⴷⵓⵙⵉ ⴳ ⵢⵉⴳⵔ ⵏ ⵓⵏⵄⴰⵕ ⵅⴼ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⵉⵎⵢⵉⴷⵉⵔⵏ ⴰⴽⴷ ⵓⴼⵉⵔⵓⵙ ⵏ ⵙⵙⵉⴷⴰ  ⴷ ⵉⵙⵎⵉⵍⵏ ⴳⴰⵏⵉⵏ ⵜⵉⵙⵓⵔⴰ ⵜⵉⴼⵔⴽⵉⵡⵉⵏ ⴳⴳⵓⵜⵏⵉⵏ, ⵜⴰⵎⵣⵡⴰⵔⵓⵜ ⵜⵓⵎⵥ 2013-2017, ⵜⵉⵙ ⵙⵏⴰⵜ 2019-2021, ⵜⴻⵜⵜⵡⴰⵖⵔⴰⴷ ⴰⵔ 2023, ⴰⵙⵙ ⵏ 4 ⴷⵓⵊⴰⵏⴱⵉⵔ 2023 ⵜⵙⵙⵏ ⵜⵎⴷⵔⴰⵡⵜ ⴰⴷ ⵜⴰⵣⵣⵉⴳⵣⵜ ⴳ ⵜⵙⵜⵕⴰⵜⵉⵊⵉⵜ ⵜⴰⵎⵙⵙⵉⴷⴼⵜ ⵜⴰⵎⴰⵢⵏⵓⵜ ⵉⵣⴷⵉⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⴼⵉⵔⵓⵙ ⵏ ⵙⵙⵉⴷⴰ, ⴷ ⵜⵎⴰⴹⵓⵏⵜ ⵏ ⵜⵓⵔⵉⵏ ⴷ ⵓⴼⴷⵓⴷⴷⵔ ⵏ ⵜⴰⵙⴰ ⴰⴼⵉⵔⵓⵙⵉ, ⵉⵣⴷⵉⵏ ⵙ ⵜⵉⵣⵉ ⵜⴰⵣⴳⵔⴰⵔⵜ ⵏ 2023-2030.

ⵜⵙⴳⵎⴹ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏⵏ ⵓⴼⴳⴰⵏ, ⴷ ⵎⴰⵙⵙ ⵄⴱⴷ ⵍⵍⴰⵟⵉⴼ ⵃⵎⵎⵓⵛⵉ, ⴰⵏⵎⵀⴰⵍ ⴰⵎⴰⵜⴰⵢ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴷ ⵡⵉⵏ ⵓⵎⴰⵜⵔ ⵏ ⵡⴰⵎⵓⵔ ⴰⵏⴰⵎⵓⵔ, ⴰⵙⵙ ⵏ ⵓⴽⵕⴰⵙ 14 ⵛⵓⵜⴰⵏⴱⵉⵔ 2022, ⵜⴰⵎⵢⴰⵇⵇⴰⵏⵜ ⵏ ⵓⵙⴰⵜⵉ ⵉ ⵜⵎⴷⵔⴰⵡⵜ ⴷ ⵓⵎⵢⴰⵡⴰⵙ ⴰⵎⵔⵙⴰⵍ ⴳ ⵢⵉⴳⵔ ⵏ ⵓⵙⴰⵏⵓⵏ ⴷ ⵓⵙⴷⵓⵙ ⵏ ⵓⵣⵔⴰⴽ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵣⵣⵓⵍⵜ ⵏ ⵜⵏⴼⵔⵓⵜ. ⵜⵙⵡⵓⵜⵜⵙ ⵜⵎⵢⴰⵇⵇⴰⵏⵜ ⴰⴷ, ⵏⵏⴰ ⵉⵙⵙⵕⵚⴰⵏ ⴰⵏⵏⴰⵍⵏ ⵏ ⵓⵎⵢⴰⵡⴰⵙ ⴰⵎⵔⵙⴰⵍ ⴰⵙⵓⵍⴰⵏ, ⴰⵙⴱⵓⵖⵍⵓ ⵏ ⵜⵡⵓⵔⵉ ⵉⵛⵛⴰⵕⵏ ⵉⵏⴳⵔ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ
ⵜⵏⵓⴼⴰ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵅⴼ ⵜⵏⴽⵔⴰ ⵙ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⴱⵔⵉⴷⵉⵏ ⵏ ⵓⵙⴰⵏⵓⵏ ⴷ ⵓⵙⵎⵓⵜⵜⴳ ⵏ ⵍⴱⵓⵍⵉⵙ ⵃⵎⴰ ⴰⴷ ⵜⴳ ⵜⴰⵙⴰⵖⵓⵍⵜ ⴷ ⵓⵙⵎⵎⴰⵍ ⵉⵙⵙⵓⵜⵉⵢⵏ ⵉ ⵜⵙⵎⵉⴳⴰⵍ ⵏ ⵉⵎⵙⵖⴰⵏⵏ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵉⵜⵜⵓⵎⴰⴳⵍⵏ ⵙ ⵓⵙⵎⵀⵍ ⵏ ⵉⵙⵍⴳⵏⵏ, ⴷ ⵡⴰⵏⵏⴰⵍ ⵏ ⵜⵓⴳⴳⴰⵣ ⵏⵏⴰ ⵜⵜⴳⴳⴰ ⵜⵎⵔⵙⵍⵜ ⵏ ⵜⵏⴼⵔⵓⵜ ⵉ ⵓⵙⴷⵓⵙ ⵏ
ⵜⵎⵙⴽⵔⵉⵏ ⵜⵉⵣⵣⵓⵍⴰⵏⵉⵏ ⴷ ⵉⴽⵛⵛⵓⵎⵏ ⵏ ⵓⴱⴰⵔⴰⵣ ⵙ ⵓⵎⵙⴰⵙⴰ ⴰⴽⴷ ⵉⵏⴰⵡⴰⵢⵏ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⴰⵎⵓⵏⵏ ⴳ ⵢⵉⴳⵔⴰⵏ ⵏ ⵓⵎⵢⴰⵡⴰⵙ, ⵉⵏⵏⵓⵕⵥⵎⵏ ⵅⴼ ⴽⵉⴳⴰⵏ ⵏ ⵜⵙⵏⵜⴰⵢⵉⵏ ⴷ ⵉⵙⵖⵏⵓⵜⵏ ⵏ
ⵓⵎⵓⵔⵙ ⵏ ⵢⵉⵎⴰⵍ, ⴰⵙⵏⵎⴰⵍⴰ ⵏ ⵜⵙⵓⵜⴰⵍ ⴷ ⵉⵖⴰⵡⴰⵙⵏ ⵏ ⵓⵙⵎⵓⵜⵜⴳ ⵉ ⵓⵙⴷⵓⵙ ⵏ ⵜⵓⵙⵙⵏⴰ ⴷ ⵜⵙⵓⴳⴰⵔ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⵚⴰⵃⴰⵏ ⵉ ⵉⵙⵓⵜⴰ ⴷ ⵉⵎⵙⵖⴰⵏⵏ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴷ ⵓⵙⴱⵖⵔ ⵙⴳ ⵜⵎⵓⵣⴰⵢ ⴷ ⵜⵙⵓⵖⴰⵍ ⵣⴷⵉⵏⵉⵏ ⵙ ⵉⵣⵔⴼⴰⵏ ⴷ ⵜⴷⵔⴼⵉⵏ ⴷ ⵉⵎⵓⵙⵙⵓⵜⵏ ⵉⵎⵔⵙⴰⵍⵏ, ⴷ ⵓⵍⴰ ⴰⵙⴷⵓⵙ ⵏ ⵓⵎⵏⵉⴷ ⴰⵣⵔⴼⴰⵏ ⵉⴳⴰⵏ ⴰⵍⵍⴰⵍ
ⴰⴷⵙⵍⴰⵏ ⴳ ⵜⴱⵔⵉⴷⵉⵏ ⵏ ⵓⵙⵎⵓⵜⵜⴳ ⵏ ⵍⴱⵓⵍⵉⵙ ⴷ ⵇⴰⵃ ⵜⵎⵙⴽⵔⵉⵏ ⵜⵉⵙⵖⵏⴰⵏⵉⵏ.

ⴷⴰ ⵉⵜⵜⵎⵢⴰⵡⴰⵙ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⴽⴷ ⵜⵓⴳⵜ ⵏ ⵢⵉⴳⵔⴰⵏ ⵓⵏⴱⵉⴹⵏ ⴳ ⵉⵙⵡⵉⵔⵏ ⴰⵏⴰⵎⵓⵔ ⴷ ⵓⵏⵎⵏⴰⴹ. ⴳ ⵓⵙⴰⵜⵉ ⴰⴷ, ⵉⵙⵡⴰⵍⴰ ⵓⵙⵇⵇⵉⵎ, ⴹⴰⵕⴰⵜ ⴰⵙⵔⵓⵙ ⵏ ⵜⵏⴱⴰⴹⵜ ⵜⴰⵎⴰⵢⵏⵓⵜ ⴷⴰⵜ ⵉⵙⵜⴰⵢⵏ ⵏ 2021, ⵢⴰⵜ ⵜⵎⵙⵙⴽⵜⵉⵜ ⵉ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⴳ ⴽⵟⵓⴱⵕ 2021, ⵍⵍⴰⵏⵜ ⴳⵉⵙ ⵜⵙⵓⵎⵔⵉⵏ ⴷ ⵉⵙⵖⵍⴰⴼ ⵏ ⵓⵙⴷⵓⵙ ⵏ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⴷ ⵜⴷⵔⴼⵉⵏ ⴳ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ. ⵜⵙⵏⵎⴰⵍⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵢⴰⵏ ⵓⵏⵎⵓⵇⵇⴰⵔ ⴰⴽⴷ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵙ ⵜⵎⵍⴷⴰ ⵏ ⵎⴰⴷ ⵜ ⵉⵙⵎⵎⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.
ⵙ ⵓⵎⵙⴰⵙⴰ ⴰⴽⴷ ⵜⵎⵜⵜⴰ 35 ⵏ ⵓⵙⵍⴳⵏ ⵉⵣⴷⵉⵏ ⵙ ⵡⴰⵍⴰⵙ ⵏ ⵓⵙⵏⵎⴰⵍⴰ ⵏⵏⵙ, ⵢⵓⵡⵣ ⵓⵙⵇⵇⵉⵎ ⵅⴼ ⵓⵙⵡⴰⵍⴰ ⵏ ⵢⴰⵜ ⵜⵓⵏⵖⵉⵍⵜ ⵏ ⵜⴰⵏⴰⴹⵉⵏ ⵏⵏⵙ ⵜⵉⵙⴳⵯⵙⴰⵏⵉⵏ ⵅⴼ ⵡⴰⴷⴷⴰⴷ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵉⵏⵏⵓⵔⵣ ⵓⵙⵇⵇⵉⵎ ⵙ ⵎⴰⵏ ⴰⵢⴰ ⴰⴷ ⵜⴳ ⵜⵓⵎⴰⵢⵜ ⵏ ⵜⴰⵏⴰⴹⵉⵏ ⵜⵉⵙⴳⵯⵙⴰⵏⵉⵏ ⵢⴰⵏ ⵉⵎⵉⵙ ⵏ ⵜⵖⵔⵉ ⵙ ⵜⵖⴹⴼⵜ ⵏ ⵜⵏⴱⴰⴹⵜ ⴷ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵏⵜⴰⵢⵏⵉⵏ ⵙ ⵜⵕⵥⵉⵢⵉⵏ ⵏⵏⵉ ⵉⵜⵜⴻⵟⵟⴰⵚⵏ ⵉⵣⵔⴼⴰⵏ ⴷ ⵜⴷⵔⴼⵉⵏ, ⴷ ⵜⵖⵓⵔⵉ ⵙ ⵓⵙⵎⴽⵍ ⵏⵏⵙⵏⵜ ⵙ ⵎⴰⴷ ⵉⵎⵙⴰⵙⴰⵏ ⴰⴽⴷ ⵜⵎⵔⵉⵙⵉⵏ ⵜⵉⵏⴰⵎⵓⵔⵉⵏ ⴷ ⵜⴳⵔⴰⵖⵍⴰⵏⵉⵏ ⴷ ⵓⵙⵎⵀⵍ ⵏ ⵉⵙⵖⵍⴰⴼ ⵏⵏⵉ ⵢⴰⵎⵓⵏ ⴳ ⵜⵡⵓⵔⵉⵡⵉⵏ ⵏⵏⵙⵏⵜ.