ⵜⴰⵔⵉⴷⵉⵔⵜ ⵏ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ
ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ
“ⵜⵣⵎⵔ ⵜⴼⵔⴽⵜ ⵜⴰⵏⵎⵓⵜⵜⵉⵜ ⴳ ⵍⵎⵖⵔⵉⴱ ⴰⴷ ⵜⴱⴱⵉ ⴰⴽⴷ ⵉⵣⵔⵉ ⵏ ⵜⵕⵥⵉⵢⵉⵏ, ⵜⴳ ⴰⵎⵣⴰⵔⴰⵢ ⵏ ⵉⴱⵔⴷⴰⵏ ⵏ ⵓⵎⵙⴰⴳⴰⵔ ⵏ ⵉⵣⵔⵉ ⴷ ⵜⵉⵍⴰⵡⵜ ⴷ ⵢⵉⵎⴰⵍ ⵙ ⵜⵡⵉⵍⴰ ⵉⵙⵔⵙⵏ ⵜⵉⵔⵙⴰⵍ ⵏ ⵓⴱⵔⵉⴷ ⵏ ⵓⵙⵏⴼⵍ ⴰⴷⵉⵎⵓⵇⵕⴰⵟⵉ ⴳ ⵍⵎⵖⵔⵉⴱ”.
ⵉⵙⵡⵓⵜⵜⵙ ⵓⵙⵉⵜ ⴰⴷ ⴰⴷ ⵉⴼⵙⵔ ⵜⵉⵔⵎⵉⵜ ⵏ ⵍⵎⵖⵔⵉⴱ ⴳ ⵢⵉⴳⵔ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ, ⵙ ⵉⵙⴳⵔⵏ ⵏⵏⵙ ⴷ ⵜⴼⵔⵉⵙⵉⵏ ⵏⵏⵙ ⵜⵉⵎⵣⵡⴰⵔⵉⵏ ⴷ ⵜⵉⵏ ⵖⵉⵍⴰⴷ, ⵏⵏⵉ ⵉⴳⴰⵏ ⵜⵉⵔⵎⵉⵜ ⵉⵜⵜⵡⴰⵕⵥⴰⵎⵏ ⵖ ⵓⵙⴰⵜⵉ ⵏ ⵓⵙⴰⴽⴰ ⵉⴽⵔⵙⵏ ⴷ ⴰⴳⵜⵉⵎⵏⵉⴷⵏ, ⵉⵕⵛⵎⵏ ⴰⵎⵣⵔⵓⵢ ⵏ ⵍⵎⵖⵔⵉⴱ ⴰⵜⵔⴰⵔ; ⴰⵙⴰⴽⴰ ⵉⴱⵖⵔⵏ ⵙ ⵜⵎⵓⵛⴰ ⴷ ⵜⵎⵙⵙⵉⵔⴷⵉⵏ ⵉⵜⵜⵓⵙⴱⵖⵔⵏ ⵉⵣⴷⵉⵏ ⵙ ⵜⵎⵙⵉⵔⵉⵏ ⵏ ⵢⵉⴽⵉⵣ ⵏ ⵜⵉⴷⵜ ⴷ ⵓⵎⵙⴼⵔⵓ ⴷ ⵓⵙⵏⴼⵍ ⴰⴷⵉⵎⵓⵇⵕⴰⵟⵉ ⴳ ⵓⵣⵎⵣ ⵏ ⵜⵉⵣⵉ ⵜⴰⵎⵣⵔⴰⵢⵜ ⵏⵏⵉ ⵉⵣⵎⵎⴻⵎⵏ ⵜⵉⵕⵥⵉⵢⵉⵏ ⵀⵔⵛⵏⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ.
ⵜⵙⵡⵓⵔⵉ ⵜⵉⵔⵎⵉⵜ ⵜⴰⵎⵖⵔⵉⴱⵉⵜ ⴳ ⵢⵉⴳⵔ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ ⵅⴼ ⵓⵙⵕⵚⵚⴰ ⵏ ⵓⵎⵙⴰⴳⴰⵔ ⴰⵎⴷⵔⵓ ⵉⵏⴳⵔ ⵙⵏⴰⵜ ⵜⵔⵙⴰⵍ ⵜⵉⴷⵙⵍⴰⵏⵉⵏ : ⵜⴰⵣⵔⴼⵜ ⵜⴰⵏⵎⵓⵜⵜⵉⵜ ⴷ ⵜⵓⵚⴽⴰ ⵜⴰⵎⵔⵙⴰⵍⵜ. ⵉⴳ ⵓⵎⵙⴰⴳⴰⵔ, ⵏⵏⵉ ⵢⵓⵎⴰⵏ ⴰⵙⵎⴽⵍ ⵏ ⵜⵕⵥⵉⵢⵉⵏ ⵜⵉⵎⵣⵔⴰⵢⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵎⵓⴽⵏ ⵏ ⵓⵎⴰⵍⴰⴷ ⴷ ⵓⵙⴳⴳⴷ ⴰⵎⵔⵙⴰⵍ ⴷ ⵓⵣⵔⵉⴼ, ⵜⵉⵍⴰⵡⵜ ⵏ ⵉⵎⴹⴰⴽⴰⵕⵏ ⵉⵎⵙⵙⵉⴷⴼⵏ ⴷ ⵉⵎⵢⴰⵏⴰⵡⵏ ⵏ ⵜⴼⵓⵍⵉⵏ ⵏⵏⵉ ⵉⵙⵙⵏ ⵓⵙⴰⴽⴰ ⴰⴷⵉⵎⵓⵇⵕⴰⵟⵉ ⴰⵏⴰⵎⵓⵔ.
ⴰⵔ ⴰⵡⵏ ⵏⵇⵇⴰⵔ ⵙ ⵉⵥⵕⵉ ⵏ ⵓⵙⵉⵜ ⴰⴷ, ⴰⴼⴰⴷ ⴰⴷ ⵜⴰⴷⴼⵎ ⴳ ⵉⴼⵔⵓⵔⵉⵜⵏ ⵏ ⵜⵉⵔⵎⵉⵜ ⵜⴰⵎⵖⵔⵉⴱⵉⵜ ⴷ ⵓⵙⵙⴰⴼⵖ ⵏ ⵜⵎⵙⵙⵉⵔⴷⵉⵏ ⵜⵜⵓⵙⴱⵖⵔⵏⵉⵏ ⴷ ⵢⵉⴽⵉⵣ ⵏ ⵜⵎⵙⴽⵔⵉⵏ ⵜⵉⵎⵓⴼⴰⵢⵉⵏ. ⵎⴰⵛ ⴷⴰⵜ ⵎⴰⵢⴰ ⵏⵏ, ⵏⵔⴰ ⴰⴷ ⵏⵙⵙⴽⵕⵥ ⵅⴼ ⵜⵉⵏⴷⵉ ⵏ ⵓⵙⴽⴰⵔ ⵙ ⵓⵎⵏⴰⴹ ⵏⵏⵉ ⵉⵙⵙⵏⵜⵉⵏ ⵉ ⵉⵍⵍⵡⵉ ⵏⵏⵙ, ⵉⴷⴷⵖ ⴷⴰⵔⵙ ⵜⵍⵍⴰ ⵜⵉⵏⴷⵉ ⵎⵇⵇⵓⵔⵏ ⴳ ⵓⵎⵣⵔⵓⵢ ⵏ ⵍⵎⵖⵔⵉⴱ ⴰⵜⵔⴰⵔ, ⴷ ⵉⴷⴷⵖ ⴷⴰⵔⵙ ⵍⵍⴰⵏ ⵉⵣⵎⴰⵣ ⵏ ⵓⵙⵎⴽⵍ ⵏ ⵉⵣⵔⵉ ⵏ ⵜⵕⵥⵉⵢⵉⵏ ⴷ ⵓⵙⴽⴰⵔ ⵏ ⵓⵎⵢⴰⵙ ⵉⵏⴳⵔ ⵓⵙⴰⴽⴰ ⵏ ⵜⵙⵓⵍⴰⵏⵜ ⴷ ⵓⵙⵏⴼⵍ. ⵜⵣⴷⵉ ⵜⵉⵣⵉ ⴰⴷ ⵜⴰⵏⵎⵓⵜⵜⵉⵜ ⵙ ⵓⵙⴰⴽⴰ ⵏ ⵉⵙⴳⴳⴷⵏ ⵉⵎⵉⵔⵉⵡⵏ ⵉⵏⵏⵓⵎⵙⴰⵏ ⵙ ⵓⵎⴰⵜⴰ ⵅⴼ ⵡⴰⵍⴰⵙ ⵏ ⵜⵓⵚⴽⵉⵡⵜ ⵏ ⵜⵎⵔⵙⴰⵍ ⵜⵉⵙⵔⵜⴰⵢⵉⵏ ⴷ ⵉⵎⴰⵙⵙⵏ ⵏ ⵓⵙⵖⵓⴷⵓ ⵏ ⵉⴱⴹⵉ ⴷ ⵓⴼⵔⴰⴳ ⵏ ⵉⵣⵔⴼⴰⵏ ⴷ ⵓⵙⴷⵓⵙ ⵏⵏⵙⵏ.
ⵜⴳⴰ ⵜⵉⵣⵉ ⴰⴷ ⵜⴰⵏⵎⵓⵜⵜⵉⵜ ⵜⵉⴼⵔⴽⵜ ⵜⴰⵎⵖⵜⴰⵙⵜ ⴳ ⵓⵎⵣⵔⵓⵢ ⵏ ⵓⵙⵏⴼⵍ ⴰⵙⵔⵜⴰⵏ ⴷ ⵓⵏⴰⵎⵓⵏ ⴳ ⵍⵎⵖⵔⵉⴱ ⴰⵣⵡⵍ ⵏⵏⵙ ⴰⴷⵙⵍⴰⵏ ⵉⴳⵉ ⵏ ⵜⵣⵔⴼⵜ ⴷ ⵜⵙⵉⵍⴰⵡⵜ ⵏ ⵓⵙⵏⴼⵍ. ⵉⴳ ⴰⵏⴱⵣⴰⵣ ⴰⴷ ⵢⵉⵍⵉ ⵓⵙⴷⴷⴻⴷ ⴳ ⵓⵎⵏⴰⴹ ⴰⴷ ⵎⴰⵙ ⴳⴰⵏⵜ ⵜⵉⵣⵉⵢⵉⵏ ⵜⵉⵏⵎⵓⵜⵜⵉⵜⵉⵏ, ⵉⴷⴷⵖ ⴷⴰ ⵜⵜⵙⵉⵍⴰⵡⵏⵜ ⴳ ⵓⴳⵏⵙ ⵏ ⵉⵎⵏⴰⴹⵏ ⴽⵔⵙⵏⵉⵏ ⵏ ⵜⵣⵣⵉⴳⵣⵉⵏ ⵜⵉⵎⵣⵔⴰⵢⵉⵏ ⴷ ⵜⵙⵔⵜⴰⵏⵉⵏ ⴷ ⵜⵏⴰⵎⵓⵏⵉⵏ, ⵓⵔ ⴷ ⵅⵙ ⵜⴰⵏⴰⴱⴱⴰⵢⵜ ⴰⴽⴷ ⵉⵣⵔⵉ ⵏ ⵜⵕⵥⵉⵢⵉⵏ ⴷⴰⵢ ⵎⴰⵛ ⴰⵡⴷ ⴰⵎⵣⴰⵔⴰⵢ ⵏ ⵉⴱⵔⴷⴰⵏ ⵉⴽⵔⵙⵏ, ⴷⴰ ⵉⵜⵜⵎⵙⴰⴳⴰⵔ ⵖ ⵓⴳⵏⵙ ⵏⵏⵙ ⵉⵣⵔⵉ ⴷ ⵜⵉⵍⴰⵡⵜ ⴷ ⵢⵉⵎⴰⵍ ⵃⵎⴰ ⴰⴷ ⵙⵔⵙⵏ ⵜⵉⵔⵙⴰⵍ ⵏ ⵉⵙⵏⴼⵍⵏ ⴳⴰⵏⵉⵏ ⵜⴰⴷⴰⵙⵉⵍⵜ ⵏ ⵉⵙⴷⴷⵉⵜⵏ ⵏ ⵓⵙⴷⵓⵙ ⴰⴷⵉⵎⵓⵇⵕⴰⵟⵉ.
ⵉⴷⴷⴰ ⴷ ⵓⵙⴰⴽⴰ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ ⴰⵎⵖⵔⵉⴱⵉ ⴰⵎ ⵜⴰⵢⴰⴼⵓⵜ ⵏ ⵜⵣⵣⵉⴳⵣⵉⵏ ⴷ ⵜⵙⵏⵜⴰⵢⵉⵏ ⵜⵉⴳⵯⵏⵙⴰⵏⵉⵏ ⴷ ⵜⵏⵉⵎⴰⵏⵉⵏ ⵏⵏⵉ ⵉⵜⵜⵓⵙⵉⵍⴰⵡⵏ ⴳ ⵍⵎⵖⵔⵉⴱ, ⴷ ⴰⵎ ⴰⵙⵎⵀⵍ ⵏ ⵜⵉⵔⴰⵜ ⵉⵛⵛⴰⵔⵏ ⵉⵙⵡⵓⵜⵜⵙⵏ ⴰⵍⴰⵙ ⵏ ⵜⵓⵚⴽⴰ ⵏ ⵓⵥⵟⵟⴰ ⴰⵎⵓⵏⴰⵏ ⴷ ⵓⵙⵔⵜⴰⵏ ⵅⴼ ⵜⵔⵙⴰⵍ ⵜⵉⵎⴰⵢⵏⵓⵜⵉⵏ. ⴳ ⵓⵎⵏⴰⴹ ⴰⴷ, ⵜⴳⴰ ⴽⵓ ⵜⵉⴼⵔⴽⵜ ⵙⴳ ⵜⴼⵔⴽⵉⵡⵉⵏ ⵏ ⵜⵓⵚⴽⴰ ⴰⴷ, ⵙ ⵎⴰⴷ ⵜⵓⵎⴰ ⵏ ⵉⴳⵉⵜⵏ, ⴰⵎ ⴰⵙⵔⵓⵙ ⵏ ⵓⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ ⴷ ⵜⵙⵖⵣⵏⵜ ⵏ ⵓⴷⵓⵙⵜⵓⵔ ⴰⵎⴰⵢⵏⵓ ⴷ ⵉⵣⵓⵔⵜⵏ ⵉⵏⴳⵎⵓⵜⵏ ⵉⵎⵙⵙⵉⴷⴼⵏ, ⵜⴰⵙⵓⵔⵉⴼⵜ ⵜⴰⵎⵔⵏⵓⵜ ⴳ ⵓⵙⴰⴽⴰ ⵏ ⵓⵙⵏⴼⵍ ⴰⴷⵉⵎⵓⵇⵕⴰⵟⵉ. ⴷ ⵉⵇⵇⴰⵏ ⴷ ⴰⴷ ⵏⵙⵙⴽⵜⵉ ⵖ ⴷⵉ ⵎⴰⵙ ⵙⵔⵙⵏ ⵉⵎⵏⴰⴷⵏ ⵉⵎⵣⵡⵓⵔⴰ ⵣⴷⵉⵏⵉⵏ ⵙ ⵡⵏⴰⵡ ⴷ ⵜⵥⵍⴰⵢⵉⵏ ⵏ ⵉⵎⵉⵙ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ ⵉⵙⵇⵙⵉⵜⵏ ⴳⴳⵓⵜⵏⵉⵏ ⴷ ⴽⵔⵙⵏⵉⵏ ⵉⵣⴷⵉⵏ ⵙ ⵉⴱⵔⴷⴰⵏ ⵣⵎⵔⵏⵉⵏ ⴰⴷ ⵉⵏⵏⴼⵔⵓ ⴰⵎⵢⴰⵙ ⵉⵏⴳⵔ ⵉⵙⵉⵜⴰⵎ ⴷ ⵜⵉⵍⴰⵡⵜ ⵜⴰⵏⴰⵎⵓⵔⵜ ⴷ ⵜⵙⵔⵜⴰⵏⵜ, ⴷ ⵉⴱⵔⴷⴰⵏ ⵏ ⵓⵎⵓⴽⵏ ⵏ ⵓⵎⴰⵍⴰⴷ ⵏⵏⵉ ⵢⵓⵡⴹⵏ ⵓⵏⴳⵉⵙⵏ ⵏ ⵓⵎⵣⵔⵓⵢ ⵏ ⵜⵕⵥⵉⵢⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵜⵎⴰⵎⴽⵜ ⵏ ⵜⵓⵚⴽⴰ ⵏ ⵜⵎⴽⵜⵉⵜ ⵜⴰⵎⴳⵔⵓⵜ ⵉⵎⵎⴰⵍⵏ ⵜⵉⴷⵜⵉⵏ ⵜⵉⵎⵣⵔⴰⵢⵉⵏ ⵙ ⵓⵎⵙⴰⵙⴰ ⴷ ⵜⵡⴰⵍⵉⵜ ⵜⵜ ⵉⴳⴰⵏ ⴷ ⵢⴰⵏ ⵜⵡⵉⵍⴰ ⵙⴳ ⵜⵡⵉⵍⴰⵜⵉⵏ ⵏ ⵓⵎⵓⴽⵏ ⵏ ⵓⵎⴰⵍⴰⴷ. ⵎⴽⴷⴰ ⴷ ⵓⵡⵉⵏ ⵉⵎⴹⴰⴽⴰⵕⵏ ⵣⴷⵉⵏⵉⵏ ⵙ ⵓⵏⴰⵎⴽ ⴷ ⵓⵙⴰⴽⴰ ⵏ ⵜⵉⵔⵎⵉⵜ ⵜⴰⵎⵖⵔⵉⴱⵉⵜ ⵅⴼ ⵉⴷⵔⵉⵣⵏ ⴷ ⵉⴽⵔⵙⵏ ⴷ ⵜⵏⵥⴰⵕ ⵉⵜⵜⵓⴷⵎⴰⵏ, ⴷ ⵓⵍⴰ ⵜⵉⵣⵣⵉⴳⵣⵉⵏ ⵜⵉⵙⵔⵜⴰⵏⵉⵏ ⴷ ⵜⵔⵙⴰⵍ ⵜⵉⵎⵔⵎⵎⵓⵙⵉⵏ ⵏⵏⵉ ⵙ ⵉⵅⵚⵚⴰ ⴰⴷ ⵙⵔⵙⵏⵜ ⵉⵜⵜⵡⴰⵙⴽⴰⵔ, ⴷ ⵉⴱⵔⴷⴰⵏ ⵣⵎⵔⵏⵉⵏ ⴰⴷ ⵏⵏⴼⵔⵓⵏⵉⴼⵙⵙⴰⵢⵏ ⵉⵎⵢⴰⵙⵏ ⴷ ⵉⵖⵣⵓⵔⴰⵏⵏ ⵉ ⵇⴰⵃ ⵜⵎⵓⴽⵔⵉⵙⵉⵏ ⵏⵏⵉ ⵉⵙⵙⵏ ⵓⵙⴰⴽⴰ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ. ⴽⵓ ⵎⴰⴷ ⵏⴷⵔⵓ ⴳ ⵓⵙⴼⵙⵉ ⵏ ⵜⵉⵔⵎⵉⵜ, ⵏⵏⵉ ⵎⵉ ⵣⵔⵉⵏⵜ ⵜⵖⵍⴰⵖⴰⵍⵉⵏ ⵏⵏⵙ ⵉⵡⵜⵜⴰ ⵉⵊⵖⵔⴰⴼⵏ ⴷ ⵉⴷⵍⵙⴰⵏⵏ ⵉⵏⴰⵎⵓⵔⵏⵏ ⵙ ⵓⵙⴷⴷⵉⴷ, ⵉⵜⵜⵡⴰⵔⵏⴰⵡ ⵓⴷⴳⵉ ⵎⴰⵙ ⵜⵙⵎⴷⵢⴰ ⵜⴰⴱⵔⵉⴷⵜ ⵉⵕⵚⴰⵏ ⴷ ⵉⴷⵓⵙⵏ ⴷ ⵜⵎⵙⴽⵔⵜ ⵜⴰⵎⵓⴼⴰⵢⵜ ⵉⵖⵉⵢⵏ ⴰⴷ ⵉⴳ ⵙ ⵜⵣⵣⵉⴳⵣⵉⵏ ⵏⵏⵙ ⴷ ⵉⴷⵔⵉⵣⵏ ⵏⵏⵙ ⴷ ⵜⵢⴰⴼⵓⵜⵉⵏ ⵏⵏⵙ, ⵜⴰⵙⴰⵖⵓⵍⵜ ⵏ ⵜⵉⵔⵎⵉⵜⵉⵏ ⵢⴰⴹⵏⵉⵏ, ⴰⵔ ⵏⵙⵙⴽⵜⴰⵢ ⵖⵉⴷ ⵎⴰⵙ ⴷ ⵉⵇⵇⴰⵏ ⴰⴷ ⵉⵜⵜⵡⴰⵙⴽⴰⵔ ⵙ ⵜⵎⵏⵜⵉⵍⵉⵏ ⵜⵉⵕⵚⵍⵉⵢⵉⵏ ⵖ ⴽⵓ ⴰⵎⵏⴰⴹ ⵖ ⵜⵜⵓⵙⵉⵍⵉⵡⵏⵜ ⵜⵉⵔⵎⵉⵜⵉⵏ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ ⵖ ⵓⴳⵏⵙ ⵏⵏⵙ.
ⵎⵍⴰⵏⵜ ⵜⵣⵣⵉⴳⵣⵉⵏ ⵉⵜⵜⵓⵣⵎⵎⴰⵎⵏ ⴳ ⵓⵙⴰⴽⴰ ⵏ ⵜⵉⵔⵎⵉⵜ ⵜⴰⵎⵖⵔⵉⴱⵉⵜ ⵉⵙⵉⵣⵡⵉⵔⵏ ⴷ ⵉⵏⵣⴳⵓⵎⵏ ⵉⵏⴰⵎⵓⵔⵏ, ⵜⵜⵡⴰⵙⵔⴰⵙⵏ ⵉⵣⵔⴼⴰⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵜⵎⵙⴰⵔⵉⵏ ⵏ ⵡⴰⵏⴰⵡ ⴷ ⵉⴱⵔⴷⴰⵏ ⵏ ⵓⵃⵟⵟⵓ ⵏ ⵜⵎⴽⵜⵉⵜ ⴰⵎ ⵉⴳⵊⴷⴰ ⵏⵏⵙ. ⴳ ⵓⵙⴰⵜⵉ ⴰⴷ, ⴰⵔ ⵉⵜⵜⴼⵙⴰⵔ ⵓⵙⵉⵜ ⴰⴷ ⵜⵉⵎⵓⵛⴰ ⴷ ⵓⵎⵍⴰⵏ ⴼⵍⵍⴰⵙ, ⵢⴰⵡⵉ ⴷ ⵅⴼ ⵜⵓⴳⵜ ⵏ ⵜⵢⴰⴼⵓⵜⵉⵏ ⵏⵏⵉ ⵢⵓⵙⵉ ⵓⵙⴰⴽⴰ ⴰⵎⵖⵔⵉⴱⵉ ⵓⴼⵔⵉⴷ ⵜⴻⵜⵜⵓⵙⵏⴰⴳⴰⵔ ⵜⵖⵍⴰⵖⴰⵍⵜ ⵏⵏⵙ ⴱⵕⵕⴰ ⵏ ⵉⵡⵜⵜⴰ ⵏ ⵍⵎⵖⵔⵉⴱ.
ⴳ ⵓⵖⴰⵍ ⵏⵏⵖ, ⵜⵙⵙⴼⴰⵡ ⵜⵉⵔⵎⵉⵜ ⵜⴰⵎⵖⵔⵉⴱⵉⵜ ⵎⴰⵙ ⵓⵔ ⵉⴳⵉ ⵓⵎⵙⴼⵔⵓ ⵅⵙ ⵜⴰⵡⵏⴳⵉⵎⵜ ⵜⴰⵡⵏⴳⵉⵎⵜ, ⵉⵡⵀⵏ ⵓⵍⴽⴰⵎ ⵙⵔⵙ ⵖ ⵜⵉⵍⴰⵡⵜ, ⵎⴰⵛ ⵏⵜⵜⴰⵜ ⴷ ⵓⵙⴰⴽⴰ ⵉⵖⵣⵣⵉⴼⵏ ⵉⵙⵖⴰⵡⵙⴰⵏ ⵙ ⵜⵉⵔⴰⵜ ⴷ ⵓⵙⵓⵖⵏ ⴷ ⵜⴱⵖⵙⵜ, ⴷ ⵓⵔ ⵜ ⵢⵓⴷⴰ ⵓⴼⵙⵙⴰⵢ ⵏ ⵜⵎⵓⴽⵔⵉⵙⵉⵏ ⵜⵉⵎⵙⵓⵜⵍⵉⵏ. ⵖⵉⴷ ⵉⵇⵇⴰⵏ ⴷ ⴰⴷ ⵏⴽⵜⵉ ⵎⴰⵙ ⵓⵔ ⵓⴷⴰⵏⵜ ⵜⵓⴳⴳⴰⵣ ⵏ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ ⴰⵎⵖⵔⵉⴱⵉ ⵙ ⵓⴼⵙⵙⴰⵢ ⵏ ⵜⵎⵓⴽⵔⵉⵙⵉⵏ ⵏ ⵉⵣⵔⵉ, ⵎⴰⵛ ⴽⵔⵣⵏⵜ ⴰⵎⵓⴷ ⵏ ⵓⵙⵏⴼⵍ ⴰⵙⵓⵍⴰⵏ ⵉⵔⵛⵎⵏ ⵙ ⵉⴷⵔⵉⵣⵏ ⵏⵏⵙ ⵜⵉⵎⵥⵕⵉⵜ ⵜⴰⵙⵔⵜⴰⵏⵜ ⵜⴰⵎⵖⵔⵉⴱⵉⵜ, ⵉⵣⵎⵔ ⴰⴷ ⵉⵙⴱⵖⵔ ⵜⵉⵎⴽⵜⵉⵜ ⵜⴰⵎⴳⵔⵓⵜ ⴷ ⵓⵙⴷⵓⵙ ⵏ ⵜⴷⵔⴰⵡⵜ ⵏ ⵉⵏⵎⵓⵔⴰⵏ ⴳ ⵓⵙⴷⴷⵉ ⴰⴷⵉⵎⵓⵇⵕⴰⵟⵉ.
ⵉⵜⵜⵡⴰⵙⵔⴰⵙ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ ⴳ ⵓⵙⴰⵜⵉ ⵏ ⵜⴷⵉⵏⴰⵎⵉⵜ ⵜⴰⵙⵓⵍⴰⵏⵜ ⴷ ⵓⵙⴰⴽⴰ ⴰⵎⵙⵎⵓⵏ ⴷ ⵓⵎⵙⵙⵉⴷⴼ, ⵉⴳ ⵜⴰⵢⴰⴼⵓⵜ ⵏ ⵓⵙⴰⴽⴰ ⴰⵎⵅⴰⵙ ⵉⵙⵡⵓⵜⵜⵙⵏ ⴰⵙⵎⴽⵍ ⵏ ⵜⵕⵥⵉⵢⵉⵏ ⵀⵔⵛⵏⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏⵏⵉ ⵉⵜⵜⵓⴳⴰⵏ ⴳ ⵉⵣⵔⵉ ; ⵉⴷⴷⵓ ⴷ ⵓⵙⵔⵓⵙ ⵏⵏⵙ ⵉⴳ ⵜⴰⵢⴰⴼⵓⵜ ⵏ ⵉⵎⴹⴰⴽⴰⵕⵏ ⵉⵏⴳⵔ ⵜⵓⴳⵜ ⵏ ⵉⵎⴳⴳⴰⵢⵏ ⴳ ⵍⵎⵖⵔⵉⴱ, ⵖ ⵍⵍⴰⵏ ⴰⵡⴷ ⵉⵎⵙⴽⴰⵔⵏ ⵏ ⵡⴰⵎⵓⵏ ⵓⵖⵔⵉⵎ ⴷ ⵓⵏⴳⵉⵙⵏ ⴷ ⵜⵡⵊⵉⵡⵉⵏ ⵏⵏⵙⵏ.
ⵉⵜⵜⵡⴰⵥⵍⴰⵢ ⵓⵏⴳⵎⴰⵎ ⵙ ⵜⵙⵖⵣⵏⵜ ⵏⵏⵙ ⵉ ⵜⵎⵢⴰⴷⴰⵙⵜ ⵜⴰⵎⴰⴼⴰⵡⵜ ⴷ ⵜⵏⵊⵎⵓⵜ. ⴰⵏⵥⴰ ⵉⴼⵓⵍⴽⵉⵏ ⵅⴼ ⵜⵕⵡⵉ ⵏ ⵜⵎⵢⴰⴷⴰⵙⵜ ⴰⴷ ⵜⴳⴰ ⵜ ⵜⴰⵡⵉⵜ ⵎⵇⵇⵓⵔⵏ ⵏⵏⵉ ⵉⵜⵜⵡⴰⴼⴽⴰⵏ ⵉ ⵜⵖⵉⵎⵉⵜⵉⵏ ⵜⵉⴳⴷⵓⴷⴰⵏⵉⵏ ⵏⵏⵉ ⵉⵜⵜⵓⵣⵓⵣⵣⵔⵏ ⴳ ⵉⵎⴰⵙⵙⵏ ⵏ ⵓⵙⵏⵖⵎⵙ ⴰⴳⴷⵓⴷⴰⵏ ⴳ ⵜⵙⵔⴰⴳⵉⵏ ⵏ ⵜⵎⵙⵍⵉⵡⵜ ⵏ ⵉⵏⵎⵓⵔⴰⵏ ⵉⵎⵖⵔⵉⴱⵉⵢⵏ ⵙ ⵜⵓⴳⵜ, ⵍⵍⵉⵖ ⴰⴽⴽⵯ ⴷⴰ ⵜⵜⴳⴳⴰⵏ ⵡⴰⵙⵓⴽⵏ ⴰⵎ ⴰⴼⵓⴹⵏ ⴳ ⵜⵉⵣⵉ ⵏ ⵓⵣⵓⵣⵣⵔ ⵏⵏⵙⵏⵜ. ⵜⴰⵡⵙ ⵜⴱⵔⵉⴷⵜ ⴰⴷ ⴳ ⵓⵕⵥⵥⵓⵎ ⵏ ⵓⵎⵙⴰⵡⴰⵍ ⵏ ⵜⵉⴷⵜ ⵉⵏⴳⵔ ⵜⵎⵏⴰⴹⵉⵏ ⵏⵜⴰⵢⵏⵉⵏ ⴷ ⵓⵙⴽⴰⵔ ⵏ ⵜⵙⵉⵍⴰ ⴷ ⵢⵓⵙⴰⵏ ⵉ ⵜⵓⵚⴽⴰ ⵏ ⵜⴼⵍⵙⵜ ⴳ ⵓⵎⵏⵉⴷ ⵏ ⵓⵡⴰⴹ ⵙ ⵜⵣⵔⴼⵜ.
ⵉⵜⵜⵓⵙⵏⴰⵢ ⵓⵏⴳⵎⴰⵎ ⵙ ⵜⵡⵉⵍⴰ ⴷ ⵢⵓⵙⴰⵏ ⴰⴽⴷ ⵓⵎⵏⴰⴹ ⴰⵏⴰⵎⵓⵔ ⴳ ⵜⵉⵣⵉ ⴰⵏⵏ ⴷ ⵉⵣⵎⴰⵣ ⴷ ⵜⵏⵥⴰⵕ ⵏⵏⵉ ⵢⵓⵙⵉ, ⵜⵓⵔⴰⵔ ⵜⵉⵔⴰⵜ ⵜⴰⵙⵔⵜⴰⵏⵜ ⴳ ⵓⵙⵡⵉⵔ ⴰⵏⴰⴼⵍⵍⴰ, ⴷ ⵜⵔⵙⴰⵍ ⵏⵏⵉ ⵅⴼ ⵉⴱⴷⴷ ⵓⵏⴳⵎⴰⵎ ⴷ ⵜⵙⵉⵎⴰⵏⵜ ⵏⵏⵙ ⴳ ⵉⴳⵉ ⵏ ⵜⵙⵎⵉⴳⴰⵍ ⵏⵏⵙ ⵜⵉⵎⵍⴰⵍⵉⵏ ⵜⵉⵎⵖⵜⴰⵙⵉⵏ ⴳ ⵓⵎⵓⵔⵙ ⵏ ⵜⵡⵓⵔⵉⵡⵉⵏ ⵏⵏⵙ.
ⵉⴽⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⵉⵙⵎⴰⴳⵍ ⴰⵙⵇⵇⵉⵎ ⴰⵎⵙⵎⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ (ⴰⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵖⵉⵍⴰⴷ), ⴰⵙⴳⴳⵯⴰⵙ ⵏ 2006), ⵙ ⵓⴹⴼⴼⵓⵕ ⵏ ⵓⵣⵣⴳⵉⵔ ⵏ ⵉⵙⵖⵍⴰⴼ ⵏ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ, ⵖ ⴰⵎⵓⵏ ⴰⵡⴷ ⵡⵉⴷ ⵣⴷⵉⵏⵉⵏ ⵙ ⵓⵎⵓⴽⵏ ⵏ ⵓⵎⴰⵍⴰⴷ ⴷ ⵡⴰⵔⵔⴰⵣ ⴰⵥⵕⴼⴰⵏ ⴷ ⵓⵙⵉⴷⴼ ⴰⵏⴰⵎⵓⵏ ⴷ ⵓⵙⵎⵙⴰⵙⴰ ⵏ ⵉⵙⵓⵔⵙⵏ ⵉⵎⵙⵙⵓⴳⵓⵔⵏ ⴷ ⵉⵥⵕⴼⴰⵏⵏ ⴷ ⵓⵖⴰⵎⵓⵙ ⴰⴷⵓⵙⴰⵏ ; ⴰⵔ ⵏⵉⵜ ⵙⵓⵍ ⵉⵜⵜⴳⴳⴰ ⵓⵙⵇⵇⵉⵎ ⵜⴰⵙⵎⵉⴳⵍⵜ ⴰⴷ ⵙ ⵓⵏⵀⵍⵍⴰ ⵏ ⵜⵣⵣⵉⴳⵣⵉⵏ ⵏⵏⵉ ⵉⵣⵎⵔⵏ ⴰⴷ ⵙⴷⵓⵙⵏⵜ ⴰⵙⴰⴽⴰ ⴰⴷ. ⵙ ⵓⵎⴷⵢⴰ ⴷⴰⵢ, ⵏⴳⴰ ⴰⵙⴳⴳⵯⴰⵙ ⵏ 2020 ⴰⵍⴰⵙ ⵏ ⵓⵥⵟⵟⴰ ⵏ ⵜⵙⵇⵇⵉⵎⵜ ⵏ ⵓⵙⵎⵀⵍ ⵏ ⵉⵙⵖⵍⴰⴼ ⵏ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ, ⵏⵙⵡⵓⵔⵉ ⵅⴼ ⵓⵙⵔⵓⵙ ⵏ ⵓⴼⵔⴷⵉⵙ ⵏ ⵓⵃⵟⵟⵓ ⵏ ⵜⵎⴽⵜⵉⵜ ⴷ ⵜⵏⴽⵔⴰ ⵙ ⵓⵎⵣⵔⵓⵢ ⴰⵎⵖⵔⵉⴱⵉ ⵙ ⵜⵓⴳⵜ ⵏ ⵉⵎⵓⵖⵍⵏ ⵏⵏⵙ ⴰⵙⴳⴳⵯⴰⵙ ⵏ 2021. ⴷ ⵓⵍⴰ ⴰⵣⴷⴰⵢ ⵏⵏⵖ ⵜⵉⴹⴼⵕⵉ ⵏ ⵜⵣⵣⵉⴳⵣⵉⵏ ⵜⵜⵓⵣⵎⵎⴻⵎⵏⵉⵏ ⴳ ⵢⵉⴳⵔ ⵏ ⵜⵙⵏⵉⵊⵊⵉⵜ ⵜⵓⵍⴳⵉⵏⵜ ⴷ ⵓⵙⴼⵙⵉ ⴰⵊⵉⵏⵉ ⴰⴼⴰⴷ ⴰⴷ ⵏⵙⵎⵙⴰⵙⴰ ⴰⴷⴷⴰⴷⵏ ⵜⵜⵢⴰⴳⴰⵍⵏⵉⵏ, ⵏⴳ ⵜⵉⵎⴳⴳⵉⵜⵉⵏ ⵜⵉⵎⴳⴳⵓⵔⴰ ⴳ ⵓⵎⵏⵉⴷ ⴰⴷ ⴰⵙⴳⴳⵯⴰⵙ ⵏ 2023.
ⵙ ⵎⴰⵏ ⴰⵢⴰ, ⵔⴰⴷ ⴷⵉⴷⵓⵏ ⵏⴼⵙⵔ, ⵎⵇⵇⴰⵔ ⴷ ⵙ ⵓⵣⴳⵣⵍ, ⵜⵉⵔⵎⵉⵜ ⵜⴰⵎⵖⵔⵉⴱⵉⵜ ⵙ ⵜⵔⵙⴰⵍ ⵏⵏⵙ ⴰⴽⴽⵯ, ⴰⴼⴰⴷ ⴰⴷ ⵏⴱⴷⴷ ⵅⴼ ⵜⴼⵔⵉⵙⵉⵏ ⵏ ⵜⵎⵙⴽⵔⵉⵏ ⵏⵏⵙ ⴷ ⵜⵢⴰⴼⵓⵜⵉⵏ ⵏⵏⵙ ⴷ ⵜⵏⵥⴰⵕ ⵏⵏⵉ ⵜⵜ ⵉⵎⵏⴰⵍⴰⵏ, ⵏⵙⵙⵉⵜⵎ ⴰⴷ ⵉⵡⵛ ⵓⵙⵉⵜ ⴰⴷ ⵉⵙⵙⵉⴷⴷⵏ ⴷ ⵜⵎⵓⵛⴰ ⵣⵎⵔⵏⵉⵏ ⴰⴷ ⴳⵏⵜ ⴰⵙⴰⴳⵎ ⵏ ⵜⵡⵏⴳⵉⵎⵜ ⵉ ⵡⴰⵎⵓⵏⵏ ⵍⵍⴰⵏⵉⵏ ⴳ ⵓⴱⵔⵉⴷ ⵏ ⵜⵖⵓⵔⵉ ⵏ ⵉⵙⴰⴽⴰⵜⵏ ⵏ ⵓⵙⵎⴰⵢⵏⵓ ⴷ ⵜⵓⵚⴽⴰ ⵜⴰⴷⵉⵎⵓⵇⵕⴰⵟⵉⵜ, ⵢⴰⵡⵙ ⴳ ⵓⵙⴱⵖⵔ ⵏ ⵜⵓⵙⵙⵏⴰ ⵜⴰⴽⴰⴷⵉⵎⵉⵜ ⴳ ⵢⵉⴳⵔ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ.
ⴰⵎⵉⵏⴰ ⴱⵓⵄⵢⵢⴰⵛ
ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ
ⵉⵙⵔⴰⵙ ⵉⵎⵇⵇⵔⴰⵏⵏ
- 1990
- 1999
- 2000
- 2001
- 2003
- 2004
- 2006
- 2009/2010
-
8 ⵎⴰⵢⵢⵓ 1990
- ⴰⵙⵔⵓⵙ ⵏ ⵓⵙⵇⵇⵉⵎ ⴰⵎⵙⵎⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ;
-
2 ⵉⴱⵔⵉⵔ 1999
- ⵢⵓⵍⵍ ⵓⵙⵇⵇⵉⵎ ⴰⵎⵙⵎⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⴰⵎⵙⵙⴽⵜⵉⵜ ⵉ ⴱⴰⴱ ⵏ ⵡⴰⴷⴷⵓⵔ ⴷⴰ ⴳⵉⵙ ⵉⵙⵖⵍⴰⴼ ⴰⵙⵔⵓⵙ ⵏ ⵓⵏⴳⵎⴰⵎ ⵏ ⵜⵏⴼⵔⵉⵜ;
-
17 ⵖⵓⵛⵜ 1999
- ⵉⴱⵔⵔⵃ ⴱⴰⴱ ⵏ ⵡⴰⴷⴷⵓⵔ ⵙ ⵓⵙⵔⵓⵙ ⵏ ⵓⵏⴳⵎⴰⵎ;
-
14 ⵛⵓⵜⴰⵏⴱⵉⵔ 1999
- ⵉⵣⵓⵣⵣⵔ ⵓⵏⴳⵎⴰⵎ ⴰⵏⴳⵔⴰⵡ ⵏⵏⵙ ⴰⴳⵯⵏⵙⴰⵏ;
-
3 ⵉⵏⵏⴰⵢⵔ 2000
- ⵜⵜⵎⵉ ⵏ ⵜⵉⵣⵉ ⵏ ⵓⵙⵎⵏⵉⴷ ⵏ ⵜⵓⵜⵜⵔⵉⵡⵉⵏ ⵏ ⵡⴰⵔⵔⴰⵣ;
-
10 ⵉⴱⵔⵉⵔ 2001
- ⴰⵙⵙⵓⴼⵖ ⵏ ⵓⴹⴰⵀⵉⵔ ⵓⵟⵟⵓⵏ 1.00.350 ⵉⵣⴷⵉⵏ ⵙ ⵡⴰⵍⴰⵙ ⵏ ⵓⵙⵏⵎⴰⵍⴰ ⵏ ⵓⵙⵇⵇⵉⵎ ⴰⵎⵙⵎⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴷⵓⵙ ⵏ ⵜⵥⵍⴰⵢⵉⵏ ⵏⵏⵙ ⴷ ⵓⵙⴷⵓⵙ ⵏ ⵜⵎⵢⴰⵏⴰⵡⵜ ⵏⵏⵙ ⴷ ⵜⵙⵉⵎⴰⵏⵜ ⵏⵏⵙ ⵙ ⵓⵎⵙⴰⵙⴰ ⴰⴽⴷ ⵉⵎⵏⵣⴰⵢⵏ ⵏ ⴱⴰⵔⵉⵙ ⵏⵏⵉ ⵉⵙⵏⵎⴰⵍⴰⵏ ⵜⵉⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ;
-
14 ⵢⵓⵍⵢⵓⵣ 2003
- ⵉⵙⵎⴷ ⵓⵏⴳⵎⴰⵎ ⵏ ⵜⵏⴼⵔⵉⵜ ⵜⵉⵡⵓⵔⵉⵡⵉⵏ ⵏⵏⵙ;
-
6 ⵉⵏⵏⴰⵢⵔ 2004
- ⵉⵙⵎⵏⵉⴷ ⵓⵏⴳⵎⴰⵎ ⵏ ⵜⵏⴼⵔⵉⵜ ⵜⴰⵏⴰⴹⵜ ⵏⵏⵙ ⵎⵏⵉⴷ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.
-
7 ⵉⵏⵏⴰⵢⵔ 2004
- ⵉⴱⵔⵔⵃ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵙ ⵓⵙⵔⵓⵙ ⵏ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ;
-
6 ⵉⵏⵏⴰⵢⵔ 2006
- ⵉⵖⵔⴰ ⴰⴷⴷⵓⵔ ⴰⴳⵍⵍⵉⴷ ⵢⴰⵜ ⵜⵉⵏⴰⵡⵜ ⵙ ⵜⵎⵍⴷⴰ ⵏ ⵜⵜⵎⵉ ⵏ ⵜⵙⵎⵉⴳⵍⵜ ⵏ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ ⴷ ⵓⵙⵎⵏⵉⴷ ⵏ ⵢⴰⵜ ⵜⵣⵔⴰⵡⵜ ⵅⴼ ⵜⴳⵎⵉ ⵜⴰⵏⴼⴳⴰⵏⵜ ⴳ ⵍⵎⵖⵔⵉⴱ ⴷ ⵓⴱⵔⵔⵃ ⵙ ⵜⵖⵜⴰⵙⵜ ⵏ ⵓⴼⵙⵔ ⵏ ⵜⴰⵏⴰⴹⵜ ⵜⴰⵎⴳⴳⴰⵔⵓⵜ ⵏ ⵓⵏⴳⵎⴰⵎ ⴷ ⵜⵣⵔⴰⵡⵜ ⵅⴼ ⵜⵎⴰⵖⵓⵏⵜ ⴷ ⵉⵎⵏⵉⴷⵏ ⵏ ⵜⴳⵎⵉ ⵜⴰⵏⴼⴳⴰⵏⵜ ⴳ ⵍⵎⵖⵔⵉⴱ, ⴷ ⵓⵙⵣⵎⵔ ⵏ ⵓⵎⵏⴰⴷ ⴰⵎⴰⵜⴰⵢ ⴰⴼⴰⴷ ⴰⴷ ⵜⵏⵜ ⵉⵥⵕ;
-
6 ⵉⴱⵔⵉⵔ 2006
- ⵉⵙⵏⴱⴳⵉ ⴰⴷⴷⵓⵔ ⵏ ⵓⴳⵍⵍⵉⴷ ⵉⴳⵎⴰⵎⵏ ⵏ ⵓⵙⵓⵎⵓ ⴷ ⵓⵎⵙⴼⵔⵓ, ⵢⵓⵏⴹ ⵙ ⵓⵣⵓⵣⵣⵔ ⵏ ⵜⴰⵏⴰⴹⵜ ⵏⵏⵙ ⵜⴰⵎⴳⴳⴰⵔⵓⵜ, ⵉⵙⵎⴰⴳⵍ ⴰⵙⵇⵇⵉⵎ ⴰⵎⵙⵎⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⴷ ⵉⴹⴼⵓⵕ ⴰⵣⵣⴳⵉⵔ ⵏ ⵉⵙⵖⵍⴰⴼ ⵏⵏⵙ;
-
ⴷⵓⵊⴰⵏⴱⵉⵔ 2009 - ⵉⵏⵏⴰⵢⵔ 2010
- ⴰⴼⵙⴰⵔ ⵏ ⵜⴰⵏⴰⴹⵜ ⵜⴰⵎⵣⵡⴰⵔⵓⵜ ⵏ ⵜⵙⵇⵇⵉⵎⵜ ⵏ ⵓⴹⴼⴼⵓⵕ ⵏ ⵉⵙⵖⵍⴰⴼ ⵏ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ.