ⴷⴰ ⵜⴰⴽⴽⴰ ⵜⵣⵣⵉⴳⵣⵜ ⵜⴰⵜⵉⴽⵏⵓⵍⵓⵊⵉⵜ ⴷ ⵜⵖⵉⵙⵜ ⵜⵉⵎⵍⵥⵉⵜ ⵜⵉⵡⵉⵍⴰⵜⵉⵏ ⵜⵉⵎⴰⵢⵏⵓⵜⵉⵏ ⵏ ⵜⵎⵙⴽⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵔⴷⴼⵉⵏ ⴷ ⵓⵙⴷⵓⵙ ⵏ ⵜⴷⵔⴰⵡⵜ ⵜⴰⵏⵎⵓⵔⵉ, ⵎⴰⵛⴰ ⵉⵣⵎⴰⵣ ⵉⵎⵣⵡⴰⵔⵏ ⵏⵏⴰ ⵅⴼ ⴱⴷⴷⵏⵜ ⵜⵣⵣⵉⴳⵣⵉⵏ ⴰⴷ ⵜⵎⵙⴰⴷⴰⵖ ⴷⵉⵙ ⵜⴳⵔⵓⵎⵎⴰ ⵏ ⵜⵎⵙⴰⵔⵉⵏ ⵜⵉⵖⴰⵔⴰⵏⵉⵏ ⴷ ⵉⵎⵉⵣⵉⵜⵏ ⵉⵣⴷⵉⵏ ⴷ ⵓⴷⴰⵙⵉⵍ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵣⵎⵔ ⴰⴷ ⵙⵢⴰⴼⴰⵏⵜ ⵙ ⵜⵕⵥⵉⵢⵉⵏ ⵏ ⵜⵥⵍⴰⵢⵉⵏ ⴷ ⵓⵎⵍⴰⵏ ⵓⴷⵎⴰⵡⴰⵏⵏ ⴷ ⵓⵣⵔⴼ ⴳ ⵜⴷⵔⴰⵡⵜ ⴳ ⵜⵎⵀⴰⵍ ⵜⵉⴷⵉⵎⵓⵇⵕⴰⵟⵉⵢⵉⵏ ⴷ ⵢⵉⴹⵉⵚ ⵅⴼ ⵡⵓⴳⴳⵉⴷⵏ ⴷ ⵜⴽⵏⴷⴰⵡⵜ ⵏⵏⵙⵏ ⴷ ⵓⵣⵓⵣⵣⵔ ⵏ ⵉⵏⵖⵎⵉⵙⵏ ⴰⵔⵎⵉⴷⵉⵜⵏ.
ⵙ ⵓⴼⵔⴰⴽ ⵏⵏⵙ ⵙ ⵉⵙⵖⵡⴰⵏ ⵎⵎⵔⴽⵙⵏⵉⵏ ⴳⵔ ⵓⵏⴳⵔⴰⵡ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴰⵢⵔⴰⵔ ⴰⵎⵓⵟⵟⵓⵏ, ⵉⵙⵙⴽⵛⵎ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⵎⵢⴰⴱⴱⴰⵢ ⴰⴷ ⴳ ⵢⵉⴳⵔⴰⵏ ⵏ ⵜⵡⵓⵔⵉ ⵏⵏⵙ ⵜⴰⴷⵙⵍⴰⵏⵜ ⴳ ⵜⴰⵏⴰⴹⵉⵏ ⵏⵏⵙ ⵡⴰⵍⴰ ⵉⵎⵓⵙⵙⵓⵜⵏ ⵏⵏⵙ, ⵉⵖⵔ ⴳ ⵜⴰⵏⴰⴹⵜ ⵏⵏⵙ ⵜⴰⵙⴳⵯⵙⴰⵏⵜ ⵏ ⵓⵙⴳⴳⵯⴰⵙ ⵏ 2020 ⵙ “ⵓⵏⵏⵓⵕⵥⵎ ⵏ ⵓⵎⴹⴰⴽⴰⵕ ⴰⴳⴷⵓⴷⴰⵏ ⵅⴼ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵢⵉⴳⵔ ⵏ ⵜⴰⵜⵉⴽⵏⵓⵍⵓⵊⵉⵜ ⴷ ⵉⵣⵔⴼⴰⵏ ⵏ ⵓⴼⴳⴰⵏ”, ⵉⵙⴷⴷⵉⴷ ⴳ ⵜⴰⵏⴰⴹⵉⵏ ⵏⵏⵙ ⵅⴼ ⵓⵙⵓⵖⵏ ⵏ ⵓⵙⵎⴰⵜⴰ ⵏ ⵜⵉⵏⴷⵉⵜⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⴰⵜⵉⴽⵏⵓⴽⵓⵊⵉⵜ ⴷ ⵓⵙⵎⵔⵙ ⵏⵏⵙⵏⵜ ⴳ ⵓⵙⵖⵣⵏ ⵏ ⵉⵎⵉⵔⵓⵜⵏ ⵉⴳⵔⴰⵖⵍⴰⵏⵏ ⵉⵣⴷⵉⵏ ⴷ ⵓⵙⵏⵜⵍ, ⴷ ⵓⵙⵔⵓⵙ ⵏ ⵜⵙⵜⵕⴰⵜⵉⵊⵉⵜ ⵜⴰⵎⵓⵟⵟⵓⵏⵜ ⴷ ⵜⵏⴰⵎⵓⵔⵜ ⵉⵏⵏⴰⵍⵏ ⵅⴼ ⵉⵎⵏⵣⴰⵢⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴷⵓⵙ ⵏ ⵜⵎⵢⴰⴷⴰⵙⵜ ⵜⴰⵣⵔⴼⴰⵏⵜ ⴳ ⵉⴹⵕⵉⵚⵏ ⵓⵍⴳⵉⵏⵏ ⵉⵙⵏⵎⴰⵍⴰⵏ ⵉⴳⵔ ⴰⴷ. ⵉⵙⵙⴽⵕⵥ ⴰⵡⴷ ⵓⵙⵇⵇⵉⵎ ⵅⴼ ⵓⵙⵓⵖⵏ ⵏ ⵓⵙⴽⴰⵔ ⵙ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⵉⵣⵉ ⵏ ⵓⵙⵖⵉⵡⵙ ⵏ ⵜⵙⵏⵙⵉⵡⵉⵏ ⴷ ⵉⵍⴳⵓⵔⵉⵜⵎⵏ ⵉⵣⴷⵉⵏ ⵙ ⵜⵖⵉⵙⵜ ⵜⵉⵎⵍⵥⵉⵜ ⴷ ⵓⵣⵓⵛⵛⵍ ⵏ ⵓⵙⴷⵓⵙ ⵏ ⵜⵖⴰⵔⴰⵙⵉⵏ ⵏ ⵓⵙⵓⵎⵓ ⵓⵏⵣⵔⴰⴼ ⵏ ⵜⵏⵎⵓⵔⵉⵢⵉⵏ ⴷ ⵉⵏⵎⵓⵔⴰⵏ ⵙ ⵜⵣⴷⴰⵢⵜ ⴰⴽⴷ ⵜⵉⵜⵉⴽⵏⵓⵍⵓⵊⵉⵢⵉⵏ ⵜⵉⵜⵔⴰⵏⵉⵏ.
ⵙ ⵓⵡⵜⵜⴰⵙ ⵏⵏⵙ ⴰⴷ ⵢⴰⴼ ⵉⵎⵓⴽⵔⵉⵙⵏ ⵉⵣⵔⴼⴰⵏⵏ ⵏⵏⴰ ⴷ ⵉⵜⵜⴳⴳⵔⵓⵏ ⵙⴳ ⵜⴰⵣⵣⴰⵣⵜ ⵏ ⵡⴰⵍⴰⵢ ⴰⵜⵉⴽⵉⵏⵓⵍⵓⵊⵉ, ⵉⵕⵥⵎ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙⴳ ⵜⴳⵉⵔⴰ ⵏ ⵓⵙⴳⴳⵯⴰⵙ ⵏ 2019 ⵢⴰⵏ ⵓⵙⴷⴷⵉ ⵏ ⵉⵎⵛⵛⵉⵡⴰⵕ ⵉⵎⵉⵔⵉⵡⵏ ⴰⴽⴷ ⵉⵎⵓⵣⴰⵢⵏ ⴷ ⵉⵎⴳⴳⴰⵢⵏ ⴳ ⵢⵉⴳⵔ ⴷ ⵓⵏⵎⵓⵇⵇⴰⵔ ⴰⵎⵛⵛⵉⵡⴰⵕ ⴰⵏⴰⵎⵓⵔ ⴰⵙⴳⴳⵯⴰⵙ ⵏ 2021 ⵉ ⵜⵙⵉⵍⴰⵡⵜ ⵏ ⵜⵎⵔⴰⵔⵓⵜⵉⵏ ⵉⵎⴳⵔⴰ ⵏ ⵉⵎⵙⵓⵔⴰⵙ ⴰⴷ. ⴷ ⵢⵉⵡⵉ ⴷ ⵓⵙⵇⵇⵉⵎ ⵉⵣⴳⵣⵍⵏ ⵉⵎⵙⵏⵉⵢⵏ ⴷ ⵉⴼⴼⵖⵏ ⵙⴳ ⵉⵏⵎⵓⵇⵇⴰⵔⵏ ⴰⴷ ⴳ ⵜⴰⵏⴰⴹⵜ ⵜⴰⵙⴳⵓⵎⴰⵏⵜ ⵉⵙⵙⴼⴰⵖ ⵜⵜ ⵉⴷ ⴳ ⵓⵙⴳⴳⵯⴰⵙ ⵏ 2022 ⵙ ⵓⵙⵎⵀⵍ ⵏ ⵜⵙⵜⵕⴰⵜⵉⵊⵉⵜ ⵏⵏⵙ ⴳ ⵓⵎⵏⵉⴷ ⴰⴷ, ⵉⵎⴹⴰⴽⴰⵕ ⴳⵉⵙ ⵜⵉⵖⴰⵔⵉⵡⵉⵏ ⵏ ⵜⵖⵉⵙⵜ ⵜⵉⵎⵍⵥⵉⵜ, ⵉⴼⵙⵔ ⵜⵉⵢⴰⴼⵓⵜⵉⵏ ⵏ ⵜⵉⴹⴰⴼ ⵉⵜⵜⵢⴰⵡⵙⴽⴰⵔⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵎⴰⴹⴰⵍ ⴰⵎⵓⵟⵟⵓⵏ ⴷ ⵜⵖⵉⵙⵜ ⵜⵉⵎⵍⵥⵉⵜ.
ⵎⴽⵍⵍⵉ ⵜⵜ ⵉⵏⵏ ⵉⴽⴽⴰ ⵓⵙⵇⵇⵉⵎ ⵉⵕⵥⵎ ⵉ ⵜⴷⴰⴱⵓⵜ TaabiratRaqmya.ma ⵜⴰⵎⵢⴰⵖⵜ ⴰⵙⴳⴳⵯⴰⵙ ⵏ 2020 ⵅⴼ ⵜⴷⵔⴼⵉ ⵏ ⵓⵎⵏⴰⴷ ⴷ ⵓⵡⵏⵏⵉ ⴳ ⵓⵙⵢⵔⴰⵔ ⴰⵎⵓⵟⵟⵓⵏ ⵉ ⵓⴹⴼⴼⵓⵕ ⵏ ⵓⵎⵛⴰⵡⴰⵕ ⴷ ⵓⵎⵙⴰⵡⴰⵍ ⵅⴼ ⵜⵎⵙⴰⵔⵉⵏ ⵜⵉⵣⵔⴼⴰⵏⵉⵏ ⴷ ⵜⴷⵔⴰⵡⵜ ⴳ ⵓⵎⴹⴰⴽⴰⵕ ⴰⴳⴷⵓⴷⴰⵏ ⵅⴼ ⵜⵎⴰⵎⴽⵜ ⵏ ⵓⵎⵏⴰⵍⴰ ⵏ ⵜⵏⵥⴰⵕ ⵉⵣⴷⵉⵏ ⵙ ⵜⵏⴼⵔⵓⵜ ⵏ ⵜⵎⵙⴽⵔⵜ ⵏ ⵜⵡⵉⵍⴰⵜⵉⵏ ⵜⵉⵎⴰⵢⵏⵓⵜⵉⵏ ⵏ ⵜⴷⵔⴼⵉ ⵏ ⵓⵎⵏⴰⴷ ⴷ ⵓⵡⵏⵏⵉ ⴷ ⵜⵎⵙⴽⵔⵜ ⴷ ⵓⵙⵡⵉⵏⴳⵎ ⴰⵎⴳⵔⵓ ⴳ ⵉⵎⵏⴰⴷⵏ ⵉⵣⴷⵉⵏ ⴷ ⵜⵖⴰⵔⵉⵡⵉⵏ ⵏ ⵓⵙⵎⵔⵙ ⵏ ⵜⴰⵜⵉⴽⵏⵓⵍⵓⵊⵉⵜ ⵜⴰⵎⵓⵟⵟⵓⵏⵜ ⴷ ⵉⵎⴰⵙⵙⵏ ⵏ ⵓⵏⵢⴰⵍⴽⴰⵎ ⴰⵏⴰⵎⵓⵏ, ⴷ ⵓⵙⵡⵉⵏⴳⵎ ⴳ ⵜⵎⴰⵎⴽⵜ ⵏ ⵓⵙⵎⵔⵙ ⵏ ⵜⵉⵔⵎⵉⵜⵉⵏ ⴷ ⵜⵎⵙⴽⵔⵉⵏ ⵜⵉⵎⵓⴼⴰⵢⵉⵏ ⴳ ⵢⵉⴳⵔ ⴰⴷ ⴰⴼⴰⴷ ⴰⴷ ⵜⴻⵜⵜⵓⴳⴰ ⵜⵙⵉⵍⴰⵡⵜ ⵏ ⵓⵎⵉⵔⵓ ⴰⵏⴰⵎⵓⵔ ⵏ ⵜⵖⴰⵔⵉⵡⵉⵏ ⵏ ⵓⵙⵎⵔⵙ ⵏ ⵓⵙⴰⵢⵔⴰⵔ ⴰⵎⵓⵟⵟⵓⵏ ⴳ ⵢⵉⴳⵔ ⴰⵎⴰⵜⴰⵢ.
ⴳ ⵓⵎⵏⴰⴹ ⴰⴷ ⵏⵉⵜ, ⵉⵙⵏⵎⴰⵍⴰ ⵓⵙⵇⵇⵉⵎ ⵜⵓⴳⵜ ⵏ ⵉⵎⵓⵙⵙⵓⵜⵏ ⴳ ⵓⵎⵏⴰⴷ ⴰⴷ, ⴳ ⵜⵍⵍⴰ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⴰⵙⴳⴳⵯⴰⵙ ⵏ 2021, ⵙⴱⵓⵖⵍⴰⵏ ⵉⵎⵓⵣⴰⵢⵏ ⵉⵎⵖⵔⵉⴱⵉⵢⵏ ⴷ ⵉⴳⵔⴰⵖⵍⴰⵏⵏ ⵜⵉⵍⴰⵍ ⵏⵏⵙ ⴰⴼⴰⴷ ⴰⴷ ⵜⵉⵍⵉ ⵜⵎⵢⴰⴷⴰⵙⵜ ⵏ ⵉⵏⴰⵡⴰⵢⵏ ⴷ ⵜⵙⵏⵜⴰⵢⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵢⵓⴳⴳⴰⵏ ⴳ ⵢⵉⴳⵔ ⴰⴷ, ⵙⵢⴰⴼⴰⵏⵜ ⵙ ⵓⵙⵖⵣⵏ ⵏ ⵓⵍⵖⵓ ⵏ ⵕⵕⴱⴰⵟ ⵅⴼ “ⵜⵉⵖⵉⵙⵜ ⵜⵉⵎⵍⵥⵉⵜ ⴷ ⵜⵏⵎⵓⵔⵉ ⵜⴰⵎⵓⵟⵟⵓⵏⵜ : ⵉ ⵢⴰⵜ ⵜⵉⵖⵉⵙⵜ ⵜⵉⵎⵥⵍⵉⵜ ⵉⵣⵔⴰⴽⵏ ⵉⵣⵔⴼⴰⵏ ⵏ ⵓⴼⴳⴰⵏ” ⵏⵏⴰ ⵢⵓⵙⵉⵏ ⵙ ⵜⴳⵔⵓⵎⵎⴰ ⵏ ⵉⵙⵖⵍⴰⴼ, ⵉⵙⵔⵙ ⵙ ⵓⵙⵔⴰⴳ ⵏⵏⵙ ⵢⴰⵜ ⵜⵙⵇⵇⵉⵎⵜ ⵜⴰⵎⴰⵙⵙⴰⵏⵜ ⵉⵜⵜⵓⵙⵎⴰⴳⴰⵍⵏ ⵙ ⵓⵣⵣⴳⵉⵔ ⵏⵏⵙ.
ⴳ ⵓⵎⵢⴰⵙⵙⴰ ⵏ ⵜⵣⵣⵉⴳⵣⵜ ⵜⴰⵜⵉⴽⵏⵓⵍⵓⵊⵉⵜ ⴰⴽⴷ ⵜⵎⵙⴽⵔⵜ ⵜⴰⵏⵖⵎⴰⵙⵜ, ⵉⵙⵎⴰⵏⴰⵔ ⵓⵙⵇⵇⵉⵎ ⴳ ⵓⵎⵏⴰⴷ ⴰⵎⵙⵎⵍⴰⵏ ⵏⵏⴰ ⴷ ⵉⴼⴼⵖⵏ ⴰⵙⴳⴳⵯⴰⵙ ⵏ 2021 ⵅⴼ ⵓⵙⵏⵜⵉ ⵏ ⵓⵙⵍⴳⵏ ⵓⵟⵟⵓⵏ 17-71 ⵏⵏⴰ ⵉⵙⵓⵖⵏⵏ ⴰⵙⵏⴼⵍ ⴷ ⵓⵙⵎⴰⴷ ⵏ ⵓⵙⵍⴳⵏ 13.88 ⵉⵣⴷⵉⵏ ⴷ ⵜⵏⵖⵎⴰⵙⵜ, ⴰⵙⵓⵖⵏ ⵏ ⵜⵙⵉⵍⴰⵡⵜ ⵏ ⵉⵎⴰⵙⵙⵏ ⴷ ⵡⴰⵎⵎⴰⴽⵏ ⵉⵜⵜⵓⵙⵏⴼⵍⵓⵍⵏ ⵉ ⵜⴰⵎⵓⵏⵜ ⴰⴽⴷ ⵉⵙⵏⴼⵍⵏ ⵏⵏⴰ ⵙⵙⵓⵖⵏⵏⵜ ⵜⵉⵜⵉⴽⵏⵓⵍⵓⵊⵉⵢⵉⵏ ⵜⵉⵜⵔⴰⵔⵉⵏ ⵏ ⵓⵏⵢⴰⵍⴽⴰⵎ ⵙ ⵓⵎⴰⵜⴰ, ⴷ ⵉⵎⴰⵙⵙⵏ ⵏ ⵓⵏⵢⴰⵍⴽⴰⵎ ⴰⵏⴰⵎⵓⵏ ⵙ ⵓⵥⵍⴰⵢ, ⵏⵏⴰ ⵉⵏⴼⵍⵏ ⵉⵎⵉⴽⴽ ⵙ ⵉⵎⵉⴽⴽ ⵙ ⵉⵙⵓⵔⴰ ⵉⴷⵙⵍⴰⵏⵏ ⵏ ⵜⵎⵙⴽⵔⵜ ⵏ ⵜⴷⵔⴼⵉ ⵏ ⵓⵙⵏⵖⵎⵙ.
ⴳ ⵓⵙⵓⵖⵍ ⴰⴽⵎⴰⵎ ⵏ ⵓⵙⵓⵖⵏ ⵏⵏⵙ ⵙ ⵜⴷⵔⴰⵡⵜ ⴳ ⵓⵙⴰⴷⵎⵔ ⵉ ⵜⵏⵥⴰⵕ ⵏⵏⴰ ⵙⵙⵓⵖⵏⵏⵜ ⵜⵉⵜⵉⴽⵏⵓⵍⵓⵊⵉⵢⵉⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ, ⵙⵢⴰⴼⴰⵏⵜ ⵜⵓⴳⴳⴰⵣ ⵏ ⵓⵙⵇⵇⵉⵎ ⴳ ⵢⵉⴳⵔ ⴰⴷ ⴰⵙⵔⵓⵙ ⵏ ⵜⵣⵓⵏⵉ ⵉⵜⵜⵓⵙⵎⴰⴳⴰⵍⵏ ⵙ ⵜⵎⵙⴰⵔⵉⵏ ⵏ ⵜⴰⵜⵉⴽⵏⵓⵍⵓⵊⵉⵜ ⴷ ⵓⵙⵢⵔⴰⵔ ⴰⵎⵓⵟⵟⵓⵏ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵉⵥⵟⵟⴰⵜⵏ ⵏⵏⵙ ⴰⵙⴳⴳⵯⴰⵙ ⵏ 2023, ⴰⴼⴰⴷ ⴰⴷ ⵉⴹⵓⴼ ⵉ ⵉⴷⵔⵉⵣⵏ ⵏ ⵉⵙⵎⵔⵙⵏ ⵏ ⵜⴰⵜⵉⴽⵏⵓⵍⵓⵊⵉⵜ ⴳ ⵍⵎⵖⵔⵉⴱ ⴷ ⵓⴹⴼⴼⵓⵕ ⴰⵙⵓⵍⴰⵏ ⵉ ⵎⴰ ⵔⴰⴷ ⴷ ⴳⵉⵙ ⵉⴼⴼⵖ ⵏ ⵜⵉⵕⵥⵉⵢⵉⵏ ⵏ ⵉⵣⵔⴼⴰⵏ ⴷ ⵜⴷⵔⴼⵉⵏ, ⴷ ⵡⴰⵡⴰⴹ ⵏ ⵓⵎⵢⴰⵙ ⴳⵔ ⵡⴰⵍⴰⵢ ⴰⵜⵉⴽⵏⵓⵍⵓⵊⵉ ⴷ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵙⵏ.
