ⵜⴷⵔⵓ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ (CNDH), ⴰⵙⵙ ⵏ ⵓⵙⵉⵎⵡⴰⵙ 4 ⴽⵟⵓⴱⵕ 2024 ⴳ ⵕⵕⴱⴰⵟ, ⴳ ⵢⴰⵜ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⵅⴼ ⵓⵙⴳⵓⵎ "ⵜⵉⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⴳ ⵓⵏⴳⵔⴰⵡ ⵓⵣⵔⵉⴼ ⴰⴳⵯⵏⵙⴰⵏ, ⴰⵏⵙⴰ ⴷ ⵓⵙⵏⵓⴱⴳ" ⵏⵏⴰ ⵜⵙⵏⵎⴰⵍⴰ ⵜⵏⴼⵍⵓⵙⵜ ⵜⴰⵎⴰⵜⴰⵢⵜ ⵏ ⵜⵏⴱⴰⴹⵜ ⴷ ⵜⵙⵇⵇⵉⵎⵜ ⵜⵓⵕⵓⴱⴱⵉⵜ ⵏ ⵜⴷⵉⵎⵓⵇⵕⴰⵟⵉⵜ ⵙ ⵓⵙⵍⴳⵏ (ⵜⴰⵙⵇⵇⵉⵎⵜ ⵏ ⴼⵉⵏⵉⵚ) ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ.

ⵉⵙⵎⵓⵏ ⵓⵏⵎⵓⵇⵇⴰⵔ ⴰⴷ ⵉⵎⴰⵡⵙⴰⵙⵏ ⵏ ⵜⵣⵔⴼⵜ ⴷ ⵉⵎⴰⴷⴷⵓⴷⵏ ⴷ ⵉⵎⵙⴽⴰⵔⵏ ⴷ ⵡⴰⵎⵓⵏ ⵓⵖⵔⵉⵎ ⵙⴳ ⵍⵎⵖⵔⵉⴱ ⴷ ⴱⵕⵕⴰ ⵏⵏⵙ, ⴷ ⵉⵔⴰ ⴰⴷ ⵉⵎⵔⴰⵔⴰ ⴰⵡⴰⵍ ⵅⴼ ⵡⴰⴷⴷⴰⴷ ⵏ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⴳ ⵓⵏⴳⵔⴰⵡ ⵓⵣⵔⵉⴼ ⴰⴳⵯⵏⵙⴰⵏ, ⴷ ⵡⴰⴷⴷⴰⴷ ⵏ ⵓⵙⵍⴳⵏ ⴰⴳⵔⴰⵖⵍⴰⵏ ⴳ ⵉⴷⵓⵙⵜⵓⵔⵏ, ⴷ ⵡⴰⵜⵉⴳ ⵏ ⵉⵙⴱⴷⴰⴷⵏ ⴰⵎ ⵡⵉⴷ, ⴳ ⵓⵙⴰⵜⵉ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴷⵓⵙ ⵏ ⵜⵏⴼⵔⵓⵜⵉⵏ ⵏ ⵓⵡⴰⵏⴽ ⵏ ⵓⵣⵔⴼ ⴷ ⵓⵙⵍⴳⵏ.

ⵜⵏⵏⴰ ⵎⴰⵙⵙⴰ ⴱⵓⵄⵢⴰⵛ ⵎⴰⵙ ⵉⴱⴷⴷ ⵓⴼⵔⴰⴳ ⵉⵕⵡⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵓⵙⵎⵙⴰⵙⴰ ⵏ ⵓⵣⵔⵉⴼⵏ ⵉⵏⴰⵎⵓⵔⵏ ⴰⴽⴷ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ, ⵜⵙⴷⴷⵉⴷ ⵎⴰⵙ ⵓⵔ ⵉⴳⵉ ⵓⵙⵎⵙⴰⵙⴰ ⴰⴷ ⴷⴰⵢ ⴰⵙⵎⵙⴰⵙⴰ ⴰⵜⵉⵇⵏⵉ, ⵎⴰⵛⴰ ⵉⴳⴰ ⵢⴰⵜ ⵜⴱⵔⵉⴷⵜ ⵜⵓⵏⵚⵉⴱⵜ ⵏⵏⵉ ⵙ ⵉⵅⵚⵚⴰ ⴰⴷ ⵉⵎⵓⵏ ⴰⴽⴷ  ⵉⵎⵓⴽⵏⵏ ⵙⵡⴰⵜⵜⵙⵏⵉⵏ ⴰⵙⵏⴼⵍ ⵏ ⵜⵉⵡⵏⴳⵉⵎⵉⵏ.

ⵜⵙⵎⴰⵢⵏⵓ ⴷⴰⵖ ⵎⴰⵙ ⵓⵔ ⵜⵙⵖⴰⵡⵙⴰ ⵜⵎⵙⴽⵔⵜ ⴰⴷ ⵜⵓⴷⴷⵉⵙⵜ ⵅⵙ ⵙ ⵉⵎⵉⴽⴰⵏⵉⵙⵎⵏ ⵓⵍⴳⵉⵏⵏ ⴷ ⵉⵎⵔⵙⴰⵍⵏ ⵉⴷⵓⵙⵏ, ⵎⴰⵛⴰ ⴰⵡⴷ ⵜⵉⵣⵎⵎⴰⵔ ⵉⵕⵚⴰⵏ ⵏ ⵜⵏⴽⵔⴰ ⵃⵎⴰ ⴰⴷ ⵢⵉⵍⵉ ⵓⵎⵙⴰⵙⴰ ⴳⵔ ⵓⴼⵔⴰⴳ ⵏ ⵉⵣⵔⴼⴰⵏ ⴷ ⵜⵏⴽⵔⴰ ⵜⴰⵎⵢⴰⴳⴰⵏⵜ ⵙⵔⵙⵏ.

ⴳ ⵓⵎⵏⴰⴹ ⴰⴷ, ⵜⵙⵙⵉⴷⴷ ⵜⵏⵙⵙⵉⵅⴼⵜ ⵅⴼ ⵎⵏⵏⴰⵡⵜ ⵏ ⵜⵎⵓⴽⵔⵉⵙⵉⵏ ⵉⵣⴷⵉⵏ ⴷ ⵓⵎⵙⴰⵙⴰ ⴰⴷ, ⴰⵎ ⴰⵢⵏⵏⴰ ⴷ ⵢⵓⵡⵉ ⵓⵙⵇⵇⵉⵎ ⴳ ⵜⴰⵏⴰⴹⵏ ⵏⵏⵙ ⵜⵉⵙⴳⵯⵙⴰⵏⵉⵏ, ⵙⵍⴰⵡⴰⵏ ⴰⴽⴽⵯ ⵉⵍⵉⵃ ⵏ ⵉⴹⵕⵉⵚⵏ ⵓⵍⴳⵉⵏⵏ ⵉⵥⵍⵉⵏ ⵙ ⴽⵔⴰ ⵏ ⵉⵣⵔⴼⴰⵏ ⵉⴷⵙⵍⴰⵏⵏ, ⵏⵖⴷ ⵜⴰⴷⵔⵙⵉ ⵏ ⵜⵏⴼⵔⵓⵜⵉⵏ ⵍⵍⴰⵏⵉⵏ ⴳ ⵢⵉⴳⵔ ⵏ ⵓⴼⵔⴰⴳ.

ⵉⵇⵇⴰⵏ ⴷ ⴰⴷ ⵏⵙⵙⴽⵜⵉ ⵎⴰⵙ ⵉⵖⵔⴰ ⵓⵙⵇⵇⵉⵎ, ⴳ ⵓⵡⵜⵜⵓ ⵏ ⵜⵡⵓⵔⵉⵡⵉⵏ ⵏⵏⵙ, ⴰⵙⵎⵙⴰⵙⴰ ⵏ ⵉⴹⵕⵉⵚⵏ ⵓⵍⴳⵉⵏⵏ ⴷ ⵉⵍⵓⴳⴰⵏⵏ ⵉⵍⵍⴰⵏ ⴷ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⵉⵣⴷⵉⵏ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⵏⵏⴰ ⵜⵙⴳⵎⴹ ⵜⴳⵍⴷⵉⵜ ⵏⵖⴷ ⵏⵏⴰ ⴳ ⵜⴰⵎⵓ, ⴷ ⴳ ⵓⵙⴰⵜⵉ ⵏ ⵜⴰⵏⵏⴰⵢⵉⵏ ⵜⵉⵎⴳⴳⵓⵔⴰ ⴷ ⵉⵙⵖⵍⴰⴼ ⴷ ⴼⴼⵖⵏⵉⵏ ⵙⴳ ⵉⴳⵔⴰⵡⵏ ⵏ ⵜⵎⵜⵜⴰ ⵉⵎⵓⵏⵏ, ⵙⵍⴰⵡⴰⵏ ⴰⴽⴽⵯ ⵉⵎⴰⵙⵙⵏ ⵉⵎⵢⴰⵇⵇⴰⵏⵏ, ⴷ ⵉⵙⵖⵍⴰⴼ ⵏⵏⴰ ⵜⵙⵢⵢⵉⵀ ⵜⴳⵍⴷⵉⵜ ⵏ ⵍⵎⵖⵔⵉⴱ.

ⴰⴳⴰⵎ ⵏ ⵜⴳⵓⵔⵉ ⵏ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ (ⵙ ⵜⴼⵕⴰⵏⵚⵉⵚⵜ)