ⴰⴽⵡⴰⵙ 12 ⴽⵟⵓⴱⵕ 2023 ⴳ ⵜⵙⵔⴰⴳⵜ ⵜⵉⵙⵙ ⵜⵥⴰⵜ ⴷ ⵓⵣⴳⵏ (09.30) ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵕⵕⴱⴰⵟ ⵔⴰⴷ ⵉⵜⵜⵓⵙⴼⵓⴳⵍⵓ ⵓⴽⵜⵜⵓⵢ ⵡⵉⵙ 20 ⵏ ⵡⴰⵙⵙ ⴰⵎⴰⴹⵍⴰⵏ ⵏ ⵓⵙⴱⴷⴷⵉ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴰⵙⴳⴳⵯⴰⵙ ⴰⴷ ⴷⴷⴰⵡ ⵜⵎⴰⵜⴰⵔⵜ "ⵜⴰⵎⵔⵔⵓⵜ ⵏ ⵜⵎⵏⵖⵉⵡⵜ: ⴰⴱⵔⵉⴷ ⵉⵏⴳⴰⴷⴷⴰⵏ ⵉ ⵓⵙⵔⴼⵓⴼⵏ".
ⵙ ⵜⵎⵍⴷⴰ ⴰⴷ, ⵔⴰⴷ ⵜⵙⵡⵓⵔⵉ ⵜⴰⴹⴰ ⵜⴰⵎⵖⵔⵉⴱⵉⵜ ⵎⴳⴰⵍ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴰⴹⴰⴼ ⴰⵎⵖⵔⵉⴱⵉ ⵏ ⵉⵖⵣⵓⵜⵏ ⴷ ⵜⵎⵙⵎⵓⵏⵜ ⴽⵓⵍⵍⵓ ⴰⵖ ⵎⴳⴰⵍ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴷ ⵉⵥⵟⵟⴰⵜⵏ ⵏ ⵉⴱⵕⵍⴰⵎⴰⵏⵉⵢⵉⵏ ⴷ ⵉⵎⵙⵜⴰⵏⵏ ⴷ ⵉⵏⵖⵎⴰⵙⵏ ⴷ ⵉⵙⵍⵎⴰⴷⵏ ⴷ ⵉⵎⵙⵙⵏⵜⵉⵢⵏ ⵎⴳⴰⵍ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⵅⴼ ⵓⵙⵎⴰⵢⵏⵓ ⴷ ⵓⵙⴷⵓⵙ ⵏ ⵓⵏⵄⴰⵕ ⵏⵏⵙ ⵅⴼ ⵜⵓⵙⵙⵔⴰ ⵏ ⵜⵎⵔⵔⵓⵜ ⴰⴷ, ⵙⵍⴰⵡⴰⵏ ⴰⴽⴽⵯ ⵙ ⵜⵖⵓⵔⵉ ⵉ ⵜⵏⴱⴰⴹⵜ ⵙ ⵓⵙⵜⴰⵢ ⵉⵚⴰⵃⴰⵏ ⵉ ⵜⵖⵜⴰⵙⵜ ⵏ ⵓⴳⵔⴰⵡ ⴰⵎⴰⵜⴰⵢ ⵏ ⵜⵎⵜⵜⴰ ⵉⵎⵓⵏⵏ ⵉⵇⵇⴰⵔⵏ ⵙ ⵓⵙⴱⴷⴷⵉ ⵏ ⵜⵙⵏⵙⵉ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ.
ⵔⴰⴷ ⵉⵣⴷⵉ ⵓⵏⵄⴰⵕ ⴰⴷ ⵉⵇⵇⴰⵔⵏ ⵙ ⵜⵓⵙⵙⵔⴰ ⵏ ⵜⵎⵏⵖⵉⵡⵜ,ⵙⵍⴰⵡⴰⵏ ⴰⴽⴽⵯ ⴳ ⵜⴼⵔⴽⵜ ⵏⵏⵉ ⴷ ⵉⴷⴷⴰⵏ ⵏⵏⵉ ⵔⴰⴷ ⵢⵉⵙⴰⵏ ⴰⵎⴹⴰⴽⴰⵕ ⵅⴼ ⵓⵙⴳⴳⴷ ⵏ ⵓⵙⵍⴳⵏ ⴰⵏⴱⴽⴰⴹ, ⴰⴼⴰⴷ ⴰⴷ ⵢⵉⵍⵉ ⵓⵏⵄⴰⵕ ⵅⴼ ⵓⵣⵔⴼ ⴳ ⵜⵓⴷⵔⵜ ⴷ ⵜⵖⵓⵔⵉ ⵉ ⵜⵏⴱⴰⴹⵉⵏ ⵜⵉⵎⵖⵔⵉⴱⵉⵢⵉⵏ ⴰⴼⴰⴷ ⴰⴷ ⵙⵖⵣⵏⵏⵜ ⴰⴱⵕⵓⵟⵓⴽⵓⵍ ⴰⵔⵓⵛⵛⵉⵍ ⵡⵉⵙ ⵙⵉⵏ ⵏ ⵓⵎⵉⵔⵓ ⴰⴳⵔⴰⵖⵍⴰⵏ ⵉⵥⵍⵉⵏ ⵙ ⵉⵣⵔⴼⴰⵏ ⵓⵖⵔⵉⵎⵏ ⴷ ⵉⵙⵔⵜⴰⵏⵏ ⵏⵏⵉ ⵉⵙⵡⵓⵜⵜⵙⵏ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ. ⵉ ⵓⵙⴽⵜⵉ, ⴰⵎⵏⵉⴷ ⴰⵎⴰⵜⴰⵢ ⵉⴳⴳⵓⴷⵉⵢⵏ ⴳ ⵓⵎⴰⴹⴰⵍ ⵉⴳⴰ ⵜ ⵜⵓⵙⵙⵔⴰ ⵏ ⵜⵎⵔⵔⵓⵜ ⴰⴷ, ⵉⴷⴷⵖ ⵢⵓⵡⴹ ⵓⵟⵟⵓⵏ ⵏ ⵉⵡⴰⵏⴽⵏ ⵏⵏⴰ ⵉⵙⵙⵔⵏ ⵜⴰⵎⵔⵔⵓⵜ ⴰⴷ ⵓⴳⴳⴰⵔ ⵏ ⵙⵉⵏ ⵉⴷ ⵡⵉⵙⵙ ⴽⵕⴰⴹ ⵏ ⵉⵡⴰⵏⴽⵏ (144 ⵏ ⵉⵡⴰⵏⴽⵏ), ⴳ ⵓⵙⵡⵉⵔ ⵓⵍⴳⵉⵏ ⴷ ⵓⵙⵡⵉⵔ ⵏ ⵜⵎⵙⴽⵔⵜ.
ⵎⴽⴷⴰ ⵢⵓⵡⴹ ⵓⵟⵟⵓⵏ ⵏ ⵉⵡⴰⵏⴽⵏ ⵏⵏⵉ ⵉⵙⵖⵥⵏⵏ ⴰⴱⵕⵓⵜⵓⴽⵓⵍ ⴰⵔⵓⵛⵛⵉⵍ ⵡⵉⵙ ⵙⵉⵏ ⵉⴹⴼⵕⵏ ⵉ ⵓⵎⵉⵔⵓ ⴰⴳⵔⴰⵖⵍⴰⵏ ⵥⵍⵉⵏⵉⵏ ⵙ ⵉⵣⵔⴼⴰⵏ ⵓⵖⵔⵉⵎⵏ ⴷ ⵉⵙⵔⵜⴰⵏⵏ ⵉⵙⵡⵓⵜⵜⵙⵏ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, 90 ⵏ ⵉⵡⴰⵏⴽⵏ, ⴳ ⵓⵣⵎⵣ ⵍⵍⵉ ⵖ ⵙⵙⵔⵏ ⵏⵉⵖ ⵙⵓⵖⵏⵏ ⵙ ⵓⵙⴱⴷⴷⵉ ⵏ ⵓⵣⵣⴳⵉⵔ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⵙ ⵜⵡⵉⵍⴰ ⵜⴰⵔⵓⵛⵛⵉⵍⵜ 33 ⵏ ⵉⵡⴰⵏⴽⵏ ⵙⴳ 57 ⵏ ⵉⵡⴰⵏⴽⵏ ⵉⴳⵎⴰⵎⵏ ⴳ ⵜⵎⴰⴷⴷⴰⵙⵜ ⵏ ⵓⵎⵢⴰⵡⴰⵙ ⴰⵎⵓⵏⵙⵍⵎ.
ⵉⴳⴰ ⵡⴰⵙⵙ ⴰⵎⴰⴹⵍⴰⵏ ⵏ ⵓⵙⴱⴷⴷⵉ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⵜⴰⵎⵍⴷⴰ ⵏ ⵓⵙⴼⵔⴽ ⵏ ⵓⵎⵏⴰⴷ ⴰⵎⴰⵜⴰⵢ ⴷ ⵉⵎⵙⵜⴳⴳⴰⵔⵏ ⵉⵙⵔⵜⴰⵏⵏ ⵙ ⵜⵓⵅⵅⵓⵜ ⵏ ⵜⵎⵔⵔⵓⵜ ⴰⴷ ⴷ ⵡⴰⵔ ⵜⵕⵡⵉ ⵏⵏⵙ ⴳ ⵓⵙⴱⴷⴷⵉ ⵏ ⵓⴱⴽⴽⵉⴹ, ⵎⴽⴷⴰ ⵉⴳⴰ ⵜⴰⵎⵍⴷⴰ ⵏ ⵓⵙⴼⵔⴽ ⵏ ⵜⵙⵓⵜⵉⵏ ⵏ ⵉⵎⴰⵍ ⵙ ⵓⵎⵏⵣⴰⵢ ⵏ ⵓⵡⴰⴹ ⵏ ⵜⵣⵔⴼⵜ ⴱⵍⴰ ⵡⵓⵖⵓⵍ ⵙ ⵜⵎⵔⵔⵓⵜ ⵏ ⵜⵎⵏⵖⵉⵡⵜ.
