ⵉⵙⴽⵔ ⵓⵙⵇⵇⵉⵎ ⵙⴳ “ⵜⵎⴰⵢⴰⴳⴰⵏⵜ ⵏ ⵉⵣⵔⴼⴰⵏ” ⴰⵣⵡⵍ ⴰⵎⴰⵏⴰⵔ ⵉ ⵜⵙⵜⵕⴰⵜⵉⵊⵉⵜ ⵏ ⵜⵡⵓⵔⵉ ⵏⵏⵙ ⴷ ⵜⵙⵏⵜⴰⵢⵉⵏ ⵏⵏⵙ, ⴳ ⵜⵍⵍⴰ ⵜⵙⵏⵙⵉ ⵏ ⵉⵙⴽⵉⵍ ⴷ ⵓⵙⴱⴷⴷⵉ ⵏ ⵡⴰⵏⴰⵡⵏ ⴰⴽⴽⵯ ⵏ ⵓⵙⵏⵓⵃⵢⵓ ⵉⴱⴷⴷⵏ ⵅⴼ ⵡⴰⵏⴰⵡ ⴰⵏⴰⵎⵓⵏ ⵓⵙⵔⵉⴷ ⴷ ⵡⴰⵔ ⵓⵙⵔⵉⴷ, ⴰⴼⴰⴷ ⴰⴷ ⵢⴰⵡⵙ ⴳ ⵓⵙⵣⵎⵔ ⵏ ⵜⵎⵖⴰⵔⵉⵏ ⴷ ⵓⵍⴽⴰⵎ ⵏ ⵉⵙⴽⵉⵍ ⴰⵎⵢⴰⴳⴰⵏ ⵉⴱⴷⴷⵏ ⵅⴼ ⵓⴼⵊⵊⵉⵊ ⴰⵎⵢⴰⴳⴰⵏ ⵏ ⵉⵣⵔⴼⴰⵏ ⴰⴽⴽⵯ ⴳⴰⵏⵉⵏ ⵜⴰⴼⴰⴷⴰ ⵜⴰⴷⵙⵍⴰⵏⵜ ⵏ ⵓⵚⴽⵓ ⵏ ⵡⴰⵎⵓⵏ ⵓⵖⴷⵉⵎ ⵉⴼⵔⴳⵏ ⴰⴷⴷⵓⵔ ⵏ ⵉⵡⴷⴰⵏ ⴰⴽⴽⵯ ⴱⵍⴰ ⵃⵜⵜⴰ ⴽⵔⴰ ⵏ ⵓⵙⵏⵓⵃⵢⵓ.
ⴱⴹⵓⵏ ⵉⵏⵣⴳⵓⵎⵏ ⵏ ⵓⵙⵇⵇⵉⵎ ⴳ ⵢⵉⴳⵔ ⴰⴷ ⵅⴼ ⴽⵕⴰⴹ ⵉⵎⵏⵉⴷⵏ :
- ⴰⵎⵏⵉⴷ ⵓⵣⵔⵉⴼ ⵏⵏⴰ ⵉⵥⵍⵉⵏ ⵙ ⵓⵙⵜⴰⵍ ⵏ ⵓⵏⴰⴳⵔⴰⵡ ⵓⵍⴳⵉⵏ ⴰⵏⴰⵎⵓⵔ ⴳ ⵢⵉⴳⵔ ⵏ ⵉⵙⴽⵉⵍ ⴷ ⵓⵙⴱⴷⴷⵉ ⵏ ⵡⴰⵏⴰⵡⵏ ⴰⴽⴽⵯ ⵏ ⵓⵙⵏⵓⵃⵢⵓ.
- ⴰⵎⵏⵉⴷ ⴰⵎⵔⵙⴰⵍ ⵏⵏⴰ ⵉⵣⴷⵉⵏ ⵙ ⵜⴰⵎⵓⵏⵜ ⴰⴽⴷ ⵓⵙⵎⵀⵍ ⵏ ⵜⵎⵙⵔⵙⴰⵍ ⵜⵉⴷⵙⵜⴰⵔⵉⵏ ⵎⵉ ⵖⵓⵔ ⵜⵍⵍⴰ ⵜⵣⴷⴰⵢⵜ.
- ⴰⵎⵏⵉⴷ ⴰⴷⵍⵙⴰⵏ ⵏⵏⴰ ⵉⵣⴷⵉⵏ ⴷ ⵉⵎⵙⴽⴰⵔⵏ ⵏ ⵜⴷⵍⵙⴰ ⴷ ⵡⵉⵏ ⵜⵉⵏⴷⵉ ⵏⵏⴰ ⵙ ⴷ ⵉⵇⵇⴰⵏ ⴰⴷ ⴳⵉⵏ ⴰⵎⵙⴷⴰⵍ ⵏ ⵜⵓⴳⴳⴰⵙ ⵉⵡⴰⵜⵜⵙⵏ ⵜⵉⵙⵏⵙⵉ ⵏ ⵉⴹⵕⵉⵚⵏ ⵓⵍⴳⵉⵏⵏ.
ⵉⴳⴰ ⵓⵣⵣⵔⴰⵢ ⵅⴼ ⵓⵙⵍⴳⵏ ⵏ ⵜⵡⵊⴰ ⵜⴰⴼⵔⴽⵜ ⵜⴰⵎⴰⵢⵏⵓⵜ ⴳ ⵓⵙⴰⴽⴰ ⵏ ⵓⵙⴷⵓⵙ ⵏ ⵉⵙⴽⵉⵍ ⴷ ⵜⵎⵙⵓⵎⵓⵜ ⴷ ⵓⵙⴽⴰⵔ ⵏ ⵓⵎⴹⴰⴽⴰⵕ ⴰⵎⵓⵏⴰⵏ ⵉⵕⵚⴰⵏ ⵉⵍⴰⵏ ⴰⵙⵡⵉⵔ, ⴷ ⴳ ⵓⵙⵜⴰⵢ ⴰⵎⵅⴰⵙ ⴷ ⵓⵏⴱⴰⴹ, ⵉ ⵓⵚⴽⵓ ⵏ ⵢⴰⵜ ⵜⴷⵍⵙⴰ ⵜⴰⵎⵓⵏⴰⵏⵜ ⵉⵏⵏⴰⵍⵏ ⴰⵙⴰⴽⴰ ⵏ ⵜⴳⵎⵉ ⴷ ⵉⵙⴷⵍⵏ ⵉ ⵢⵉⵙⵉⴽⵍ. ⵉⴳ ⵓⵣⵔⵔⴰⵢ ⴰⴷ, ⵏⵏⴰ ⵉⵖⵜⵙ ⴱⴰⴱ ⵏ ⵡⴰⴷⴷⵓⵔ ⴳ ⵢⵉⵏⴰⵡ ⵏⵏⵙ ⴳ ⵢⵓⵍⵢⵓⵣ 2022, ⵡⵉⵙ ⵙⵉⵏ ⴳ ⵎⴰⴷ ⵓⵔ ⵉⵍⴽⵎⵏ ⵙⵉⵎⵔⴰⵡ ⵏ ⵓⵙⴳⴳⵯⴰⵙ.
ⴳ ⵜⵙⴳⴰ ⵢⴰⴹⵏ, ⵉⵖⴰⵎⴰ ⵢⵉⴹⵉⵚ ⵏ ⵉⵙⵍⴳⵏⵏ ⵅⴼ ⵜⵉⵍⴰⵡⵜ ⵏ ⵜⵎⵖⴰⵔⵉⵏ ⵉⵍⴰ ⵜⴰⴼⴰⴷⴰ, ⵙ ⵜⵡⵉⵍⴰ ⵎⵇⵇⵓⵔⵏ, ⵙ ⵓⵙⵓⵊⴷ ⵏ ⵜⵡⵏⵏⴰⴹⵜ ⵏⵏⴰ ⵉⴼⵍⵙⵏ ⵙ ⵜⵡⵏⴳⵉⵎⵜ ⵏ ⵉⵙⴽⵉⵍ ⴳⴰⵏⵉⵏ ⵜⵉⵏⴷⵉ ⵜⴰⵏⴼⴳⴰⵏⵜ, ⵙ ⵜⵎⵔⵏⵉⵡⵜ ⵏ ⵓⵙⵣⵎⵔ ⵏⵏⵙⵏⵜ ⴳ ⵜⵙⴳⴰ ⵜⴰⴷⵎⵙⴰⵏⵜ ⴷ ⵜⵏⴰⵎⵓⵏⵜ ⴷ ⵜⵙⵔⵜⴰⵏⵜ, ⵉⴷⴷⵖ ⴷⴰ ⵉⵙⵙⵓⵖⵏ ⵓⵙⴱⴷⴷⵉ ⵏ ⵜⵓⵎⴰⵏⵜ ⵏ ⵓⵙⵏⵓⵃⵢⵓ ⵎⴳⴰⵍ ⵜⴰⵎⵖⴰⵔⵜ ⵉⴳⵉ ⵏ ⴽⵉⴳⴰⵏ ⵏ ⵜⵓⴳⴳⴰⵙ ⴳ ⵓⵙⵡⵉⵔ ⵏ ⵓⵙⴼⵙⵉ ⵏ ⵜⵖⵎⵔⵉⵏ ⵜⴰⵔⵓⵍⴳⵉⵏⵉⵏ ⵣⴷⵉⵏⵉⵏ ⵙ ⵉⵎⵏⵉⴷⵏ ⵉⴷⵍⵙⴰⵏⵏ ⴷ ⵉⵏⴰⵎⵓⵏⵏ ⵙ ⵉⴼⵔⴷⵉⵙⵏ ⵏⵏⵙ ⴳ ⵍⵍⴰⵏⵜ ⵜⵎⵢⵓⵔⵉⵏ ⴷ ⵜⵎⵙⴽⵔⵉⵏ ⵜⵉⵙⵏⴰⵡⴰⵢⵉⵏ ⵜⵉⵎⴰⴷⵔⵉⵏ, ⴷ ⴰⵔ ⵜⵎⵎⴰⵍ ⴰⵙⵓⵖⵏ ⵏ ⵓⵣⴷⴰⵢ ⵏ ⵉⵎⵙⴽⴰⵔⵏ ⵉⵙⵓⵙⵢⵓ ⵉⴷⵍⵙⴰⵏⵏ ⴷ ⵉⴼⵔⵓⵔⵉⵜⵏ ⵉⵏⴰⵎⵓⵏⵏ ⵉ ⵜⵓⵎⴰⵏⵜ ⴳⴰⵏⵉⵏ ⴰⵡⵜⵜⴰⵙ ⴰⴱⴷⴷⴰⵢ ⴷ ⵓⴳⵔⵉⴳⵜ ⵙ ⵉⵅⵚⵙⴰ ⴰⴷ ⵢⵉⵍⵉ ⴳ ⵜⵓⴳⴳⴰⵣ ⵏ ⵓⵙⵎⵀⵍ ⵏ ⵢⵉⵙⵉⴽⵍ ⴰⵎⵢⴰⴳⴰⵏ.
ⵙ ⵓⵎⵙⴰⵙⴰ ⴷ ⵜⵙⵜⵕⴰⵜⵉⵊⵉⵜ ⵏⵏⵙ ⵉⵏⵏⴰⵍⵏ ⵅⴼ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ, ⵉⵕⵥⵎ ⵓⵙⵇⵇⵉⵎ ⴰⵙⴳⴳⵯⴰⵙ ⵏ 2022 ⴰⵎⵣⵉⵣⵣⵍ ⴰⵏⴰⵎⵓⵔ ⵏ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵜⵉⵡⵜⵎⵉⵏ, ⴷⴷⵓ ⵜⵎⴰⵜⴰⵔⵜ “ⴰⴷ ⵓⵔ ⵏⴼⵉⵙⵙ ⵅⴼ ⵜⴽⵕⴹⵉ” ⴰⴼⴰⴷ ⴰⴷ ⵢⵉⵍⵉ ⵓⵙⵙⵔⵇⴱ ⵏ ⵡⵓⵏⴳⵉⵙⵏ ⴰⴷ ⵙⵙⵉⵡⴹⵏ ⵜⵉⴽⵕⴹⵉ, ⵢⵉⵍⵉ ⵓⵙⴱⴷⴷⵉ ⵏ ⵓⴼⴼⵔⵜⵍ ⵙⴳ ⵜⵎⵔⵔⵓⵜ, ⵎⴽⵍⵍⵉ ⵉⵙⵎⵏⵉⴷ ⵙ ⵓⵎⵙⴰⵙⴰ ⴷ ⵓⵢⴰ ⵏⵏ, ⴰⵏⵏⴰⵍ ⴰⴽⵎⴰⵎ ⵉ ⵜⵎⵙⵎⵓⵏⵉⵏ ⵙⴳ ⵜⵎⵏⴰⴹⵉⵏ ⵇⴰⵃ ⵏ ⵜⴳⵍⴷⵉⵜ ⴰⴼⴰⴷ ⴰⴷ ⵙⴽⵔⵏⵜ ⵉⵙⵖⵏⵓⵜⵏ ⴳ ⵢⵉⴳⵔⴰⵏ ⵏ ⵓⵙⴱⵓⵖⵍⵓ ⵏ ⵓⴼⵔⴰⴽ ⴷ ⵓⵙⴼⵔⴽ ⵙ ⵜⵓⵎⴰⵏⵜ ⵏ ⵜⴽⵕⴹⵉ ⵎⴳⴰⵍ ⵜⵡⵜⵎⵉⵏ ⴷ ⵜⵔⴱⴰⵜⵉⵏ, ⴷ ⵓⵙⵙⵔⵇⴱ ⵅⴼ ⵓⵙⵙⵉⵡⴹ ⴷ ⵓⵏⵄⴰⵕ ⵃⵎⴰ ⴰⴷ ⵢⵉⵍⵉ ⵓⵙⴱⴷⴷⵉ ⵏ ⵓⴼⴼⵔⵜⵍ ⵙⴳ ⵜⵎⵔⵔⵓⵜ, ⴷ ⵡⴰⵏⵏⴰⵍ ⴷ ⵜⴰⵎⵓⵏⵜ ⴰⴽⴷ ⵜⵡⵜⵎⵉⵏ ⴷ ⵜⵔⴱⴰⵜⵉⵏ ⵜⵓⵏⴳⵉⵙⵉⵏ ⵏ ⵜⴽⵕⴹⵉ.
ⵉⴼⴽⴰ ⵓⵙⵇⵇⵉⵎ ⵜⵉⵏⴷⵉ ⵉⵥⵍⵉⵏ ⵉ ⵓⵣⵔⴼ ⵏ ⵜⵎⵖⴰⵔⵜ ⴳ ⵜⴷⵔⴰⵡⵜ ⴷ ⵜⴰⵎⵙⵓⵎⵓⵜ ⴳ ⵢⵉⴳⵔ ⴰⵙⵔⵜⴰⵏ, ⵉⴷⴷⵖ ⵉⴳⴰ ⵙⴳ ⵜⵔⵙⴰⵍ ⵜⵉⴷⵙⵜⴰⵔⵉⵏ ⵏ ⵜⵙⵔⵜⴰⵢ ⵏ ⵓⵙⴱⴷⴷⵉ ⵏ ⵓⵙⵏⵓⵃⵢⵓ ⴳⵔ ⵉⵔⴳⴰⵣⵏ ⴷ ⵜⵡⵜⵎⵉⵏ, ⴰⵔ ⵉⵜⵜⵙⴷⴷⵉⴷ ⵓⵙⵇⵇⵉⵎ ⵅⴼ ⵓⵙⵓⵖⵏ ⵏ ⵓⵙⴱⴷⴷⵉ ⵏ ⵜⵡⵍⴰⴼⵉⵏ ⵜⵉⵙⵏⴰⵡⴰⵢⵉⵏ ⵏ ⵜⵎⵖⴰⵔⵜ ⴷ ⵓⴱⵓⵢ ⴰⴽⴷ ⵜⵎⵉⵜⴰⵔ ⵏ ⵓⵙⵙⵉⵏⴼ ⴷ ⵓⵙⴼⵔⵓⵔⵉ ⵏ ⵢⵉⵏⴰⵡ ⵏ ⵓⵙⵏⵓⵃⵢⵓ, ⴷ ⵓⵙⵙⵔⵇⴱ ⵏ ⵡⴰⴷⴰⴼ ⵏ ⵜⵎⵖⴰⵔⵜ ⵉ ⵜⵥⵍⴰⵢⵉⵏ ⵏ ⵉⵙⵜⴰⵢⵏ, ⴷ ⵓⵍⴽⴰⵎ ⵏ ⵓⵎⵢⴰⵙ ⵏ ⵜⵙⵎⴷⵢⴰⵜ ⴳⵔ ⵜⴰⴳⴳⴰⵢⵉⵏ ⴳ ⵉⵏⴳⵎⴰⵎⵏ ⵉⵜⵜⵡⴰⵙⵜⴰⵢⵏ ⴷ ⵡⴰⵎⵎⴰⵙⵏ ⵏ ⵜⵏⴰⵔⴰ, ⴷ ⵉⴷⵖⴰⵔⵏ ⵏ ⵓⵙⴽⴰⵔ ⵏ ⵜⵖⵜⴰⵙⵜ, ⴷ ⵓⵍⴰ ⴰⵙⵣⵎⵔ ⵏ ⵓⵣⴳⵏ ⵏ ⵡⴰⵎⵓⵏ ⵙ ⵉⵣⵎⴰⵣ ⵏ ⵜⴷⵔⴰⵡⵜ ⴳ ⴳⵜⵎⵉ, ⴷ ⵓⵙⵙⵓⵜⴳ ⵏ ⵜⵎⵍⴰⵍⵉⵏ ⵜⵉⵎⵣⵡⴰⵔⵉⵏ ⵏ ⵜⵎⵖⴰⵔⵜ ⴳ ⵓⵙⵏⵖⵎⵙ.
ⵜⵉⵎⵉⵔⵉⵏ
