ⴷⴰ ⵢⴰⴽⴽⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⵉⵏⴷⵉ ⵉⵥⵍⵉⵏ ⵉ ⵓⵎⵢⴰⵖ ⴰⴽⴷ ⵓⵏⴰⴳⵔⴰⵡ ⵏ ⵉⴼⵔⵉⵇⵉⵢⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⵉⵣⵡⵉⵔ ⵏ ⵜⵙⵜⵕⴰⵜⵉⵊⵉⵜ ⵏⵏⵙ, ⵉⴷⴷⵖ ⴷⴰⵔⵙ ⵜⵉⵏⴷⵉ ⴳ ⵢⵉⴳⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵔⵙⵏ.

ⴰⵔ ⵉⵙⵡⵓⵔⵉ ⵓⵙⵇⵇⵉⵎ ⴳ ⵓⵙⴰⵜⵉ ⴰⴷ ⵅⴼ ⵓⵙⴷⵓⵙ ⵏ ⵓⵎⵢⴰⵖ ⵏⵏⵙ ⴷ ⵓⵎⵔⴰⵔⴰ ⵏ ⵜⵉⵔⵎⵉⵜⵉⵏ ⴷ ⵜⵎⵙⴽⵔⵉⵏ ⵜⵉⵎⵓⴼⴰⵢⵉⵏ ⴰⴽⴷ ⵜⵓⴳⵜ ⵏ ⵉⵎⴰⵙⵙⵏ ⵏ ⵜⴰⵎⵓⵏⵜ ⵏ ⵉⴼⵔⵉⵇⵉⵢⴰ, ⵍⵓⵎⴰⵕ ⴰⴽⴷ ⵜⵙⵇⵇⵉⵎⵜ ⵏ ⵉⴼⵔⵉⵇⵉⵢⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵔ ⵉⵜⵜⴷⵔⵓ ⴳ ⵜⵙⵓⵜⵍⵉⵏ ⵏⵏⵙ ⴷ ⵉⵏⵎⵓⵇⵇⴰⵔⵏ ⵏⵏⵉ ⵜⵙⵏⵎⴰⵍⴰ, ⴷ ⵓⵍⴰ ⴰⵙⴷⵓⵙ ⵏ ⵓⵎⵙⴰⵡⴰⵍ ⴷ ⵓⵎⵢⴰⵖ ⵅⴼ ⵜⵎⵙⴰⵔⵉⵏ ⵏⵏⵉ ⵅⴼ ⵜⵍⵍⴰ ⵜⴰⵡⵉⵜ ⴳ ⵓⵙⵡⵉⵔ ⴰⵙⴳⴰⵡⴰⵏ ⴷ ⵓⵎⵏⵥⴰⵡ, ⴷ ⵓⵎⵔⴰⵔⴰ ⵏ ⵉⵔⵣⴰⴼⵏ, ⴷ ⵓⵙⴷⵓⵙ ⵏ ⵜⵣⵎⵎⴰⵔ, ⴷ ⵡⴰⵏⵏⴰⵍ ⵏ ⵜⴷⵔⴰⵡⵜ ⵏ ⵜⵎⴰⴷⴷⴰⵙⵉⵏ ⵏ ⵡⴰⵎⵓⵏ ⵓⵖⵔⵉⵎ ⵙⴳ ⵍⵎⵖⵔⵉⴱ ⴷ ⵉⵥⵥⵍⵎⴹ ⵏ ⵉⴼⵔⵉⵇⵉⵢⴰ ⴳ ⵜⵓⴳⵜ ⵏ ⵉⵎⵓⵙⵙⵓⵜⵏ.

ⵢⴰⵎⵓ ⴳ ⵓⵎⵢⴰⵡⴰⵙ ⵉⵏⴳⵔ ⵓⵙⵇⵇⵉⵎ ⴷ ⵜⴰⵎⵓⵏⵜ ⵏ ⵓⵕⵓⴱⴱⴰ ⵜⵉⵙⴳⴳⵯⵉⵏ ⵎⵢⴰⵏⴰⵡⵏⵉⵏ, ⵉⵖ ⵉⴳⴰ ⵜⵉⴽⵏⵜ ⵜⴰⵎⵔⵙⴰⵍⵜ ⴷ ⵓⵙⵏⵜⵉ ⵅⴼ ⵓⵙⵔⵇⴱ ⵏ ⵓⵙⴱⴷⴷⵉ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⵏⵏⵉ ⵜⴳⴰ ⵜⵎⴰⴷⴷⴰⵙⵜ ⵏ ⴽⵓⵍⵍⵓ ⴰⵖ ⵎⴳⴰⵍ ⵜⴰⵎⵔⵔⵓⵜ ⵏ ⵜⵎⵏⵖⵉⵡⵜ (ECPM).

ⴰⵔ ⵉⵙⵡⵓⵔⵉ ⵓⵙⵇⵇⵉⵎ ⵅⴼ ⵓⵙⵏⵎⴰⵍⴰ ⵏ ⵉⵏⵎⵓⵇⵇⴰⵔⵏ ⵉⵍⵓⴳⴰⵏⵏ ⴰⴽⴷ ⵓⵙⵇⵇⵉⵎ ⵏ ⵓⵕⵓⴱⴱⴰ ⴷ ⵓⴹⴼⴼⵓⵕ ⵏ ⵜⵎⴷⵔⴰⵡⵜ ⵏ ⵜⵉⴷⵊⵓⵕⴰ ⵏⵏⵉ ⵉⵙⵎⵓⵏⵏ ⵍⵎⵖⵔⵉⴱ ⴷ ⵓⵙⵇⵇⵉⵎ ⵏ ⵓⵕⵓⴱⴱⴰ ⴷ ⵓⵣⵣⴳⵉⵔ ⵏ ⵉⵙⵏⵜⴰⵢ ⵏⵏⵉ ⵉⵜⵜⵓⵙⵎⵓⵜⵜⴳⵏ ⴳ ⵓⵎⵏⴰⴹ ⴰⴷ. ⵉⵙⵏⴰⵍ ⵓⵎⵢⴰⵡⴰⵙ ⴰⴷ ⵙ ⵜⵡⵉⵍⴰ ⵉⵥⵍⵉⵏ ⵅⴼ ⵉⵎⴰⵙⵙⵏ ⵏ ⵓⵙⴷⵓⵙ ⵏ ⵜⵣⵎⵎⴰⵔ ⴳ ⵢⵉⴳⵔⴰⵏ ⵏ ⵓⵙⴼⵔⴽ ⴷ ⵓⵏⵄⴰⵕ, ⵎⴰⵢⴰ ⵏⵏ ⴳ ⵓⵙⴰⵜⵉ ⵏ ⵜⵓⴳⵜ ⵏ ⵜⵓⵏⵖⵉⵍⵉⵏ ⵏ ⵉⵖⴰⵡⴰⵙⵏ ⵏ ⵉⴼⴼⵓⵙ (Programmes Sud).

ⵙ ⵜⵎⵔⵏⵉⵡⵜ ⵉ ⵎⴰⵢⴰ, ⵉⴷⵔⵓ ⵓⵙⵇⵇⵉⵎ ⴳ ⵜⵙⵓⵜⵍⵉⵏ ⵏ ⵓⴳⵔⴰⵡ ⴰⴱⵕⵍⴰⵎⴰⵏⵉ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ (APCE) ⵏⵏⵉ ⵉⵛⴰⵡⵕ ⴳ ⴽⵉⴳⴰⵏ ⵏ ⵉⵣⵎⵓⵣⵣⵓⵜⵏ ⵅⴼ ⵜⵓⴳⵜ ⵏ ⵜⵎⵙⴰⵔⵉⵏ ⵣⴷⵉⵏⵉⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ.

ⵉⵣⴷⵉ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⵙⴷⵓⵙ ⵏ ⵜⵎⵍⴰⵍⵉⵏ ⵏⵏⵙ ⵜⵉⵏⴰⵎⵎⴰⵙⵉⵏ ⴳ ⵓⵙⵡⵉⵔ ⵏ ⵉⵥⵟⵟⴰⵜⵏ ⵉⴳⵔⴰⵖⵍⴰⵏⵏ ⴷ ⵉⵙⴳⴰⵡⴰⵏⵏ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵍⵍⵉⵖ ⵏⵏ ⵜⵡⴰⵍⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⵙⴰ ⵏ ⵜⵎⴰⵔⵉⵜ ⵏ ⵜⵏⵙⵙⵉⵅⴼⵜ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⵉ ⴳ ⵍⵍⴰⵏⵜ 130 ⵏ ⵜⵎⵔⵙⵍⵜ ⵜⴰⴳⵎⴰⵎⵜ ⴳ ⵜⴳⵉⵔⴰ ⵏ 2022, ⵙⴳⵉⵙⵏⵜ 89 ⵏ ⵜⵎⵔⵙⵍⵜ ⵢⵓⵎⵥⵏ ⵜⴰⵙⵖⵣⵏⵜ ⴳ ⵜⵙⴽⵯⴼⵍⵜ ⵢⴰ “ⴰ”. ⵎⴽⴷⴰ ⵢⵓⵡⵣ ⵓⵙⵇⵇⵉⵎ ⵅⴼ ⵜⴷⵔⴰⵡⵜ ⵉⵕⵡⴰⵏ ⴳ ⵉⵎⵓⵙⵙⵓⵜⵏ ⴷ ⵜⵙⵎⵓⵏⵉⵏ ⴷ ⵜⵉⵏⴰⵡⵉⵏ ⵏⵏⵉ ⵜⵙⵏⵎⴰⵍⴰ ⵜⴰⴹⴰ ⵜⴰⵎⴰⴹⵍⴰⵏⵜ.

ⵉⴳⴰ ⵓⵙⵇⵇⵉⵎ ⴰⴳⵎⴰⵎ ⴳ ⵜⴳⵔⵓⵎⵎⴰ ⵏ ⵜⵡⵓⵔⵉ ⵏ ⵜⴰⴹⴰ ⵉⵏⵜⴰⵢⵏ ⵙ ⵜⵎⵙⵙⵏⵜⵉⵢⵉⵏ ⴷ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⵉ ⵜⵙⵙⵉⵅⴼ ⵜⵎⵔⵙⵍⵜ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵛⵛⵉⵍⵉ, ⴷ ⵓⴳⵎⴰⵎ ⴳ ⵜⵎⵓⵏⵉ ⵉⵏⵜⴰⵢⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵏⴼⵍ ⵏ ⵓⵏⴳⵉⴳⵜ ⵉⴹⴼⵕⵏ ⵉ ⵜⴰⴹⴰ ⵜⴰⵎⴰⴹⵍⴰⵏⵜ, ⵏⵏⵉ ⴳ ⵍⵍⴰⵏⵜ 33 ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵓⴳⵎⴰⵎ ⵉⵎⵏⵥⵉ ⴳ ⵜⴳⵔⵓⵎⵎⴰ ⵏ ⵜⵡⵓⵔⵉ ⵉⵏⵜⴰⵢⵏ ⵙ ⵉⵣⵔⴼⴰⵏ ⵏ ⵓⴳⴳⵉⴷⵏ ⵉⴷ ⴱⵓ ⵓⵎⵎⵓⵄⴹⵕ.

ⵢⴰⵙⵉ ⵓⵙⵇⵇⵉⵎ ⴰⵡⴷ ⵜⵉⵎⴰⵙⴰⵢⵉⵏ ⴳⴳⵓⵜⵏⵉⵏ ⴳ ⵓⴳⵏⵙ ⵏ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵜⵉⴼⵔⵉⵇⵉⵢⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⵙⵙⵉⵅⴼ ⴳ ⵓⵎⵏⵉⴷ ⴰⴷ ⵜⴰⴳⵔⵓⵎⵎⴰ ⵏ ⵜⵡⵓⵔⵉ ⵉⵏⵜⴰⵢⵏ ⵙ ⵜⵎⵣⵡⴰⴳⵜ, ⵉⴼⵊⵊⵉⵊ ⵙ ⵜⴳⵎⴰⵎⵜ ⵏ ⵜⵙⵇⵇⵉⵎⵜ ⵏ ⵓⵜⵓⵢ ⵉⴹⴼⵕⵏ ⵉ ⵥⵟⵟⴰ ⴰⴷ, ⴰⴽⴷ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ; ⵓⴼⴳⴰⵏ ⴳ ⵖⴰⵏⴰ ⴷ ⵕⵓⵡⴰⵏⴷⴰ ⴷ ⵎⴰⵍⴰⵡⵉ ⴷ ⵣⵉⵎⴱⴰⴱⵡⵉ ⴷ ⵜⴳⴷⵓⴷⴰⵏⵜ ⵏ ⵍⴽⵓⵏⴳⵓ ⵜⴰⴷⵉⵎⵓⵇⵕⴰⵟⵉⵜ ⴷ ⵟⵟⵓⴳⵓ ⴷ ⴽⵉⵏⵢⴰ ⴷ ⵎⵉⵚⵕ.

ⵙⴳ ⵜⵙⴳⴰ ⵢⴰⴹⵏⵉⵏ, ⵉⴳⴰ ⵓⵙⵇⵇⵉⵎ ⴰⴳⵎⴰⵎ ⴰⵙⵔⵓⵙ ⵏ ⵓⵥⵟⵟⴰ ⴰⵄⵕⴰⴱ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⴳⵎⴰⵎ ⴳ ⵜⵙⵇⵇⵉⵎⵜ ⵏⵏⵙ ⵜⴰⵎⵣⵣⴳⴰⵔⵜ ⵙⴳ ⵍⵍⵉⵖ ⵉⵜⵜⵡⴰⵙⵔⴰⵙ. ⵉⴷⵔⵓ ⴳ ⵇⴰⵃ ⵉⴳⵔⴰⵡⵏ ⵏⵏⵙ ⵉⵎⴰⵜⴰⵢⵏ ⵉⵙⴳⵯⵙⴰⵏⵏ, ⵢⴰⵡⵣ ⵅⴼ ⵜⴷⵔⴰⵡⵜ ⴳ ⵉⵎⵓⵙⵙⵓⵜⵏ ⴷ ⵜⵙⵓⵜⵍⵉⵏ ⵏ ⵓⵙⵉⵔⵎ ⵏⵏⵉ ⵉⵙⵏⵎⴰⵍⴰ.

ⵎⴽⴷⴰ ⵉⴳⴰ ⵓⵙⵇⵇⵉⵎ ⴰⴳⵎⴰⵎ ⴳ ⵓⵙⵉⵔⴰ ⵏ ⵜⵎⵙⵙⵓⴳⵓⵔⵜ ⵏ ⵜⵎⵙⵎⵓⵏⵜ ⵜⴰⴼⵕⵓⵏⴽⵓⴼⵓⵏⵉⵜ ⵏ ⵜⵙⵇⵇⵉⵎⵉⵏ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⵉ ⵉⵙⵙⵉⵅⴼ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⴽⵓⵜ ⴷⵉⴼⵡⴰⵕ ⴷ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵓⵙⵡⵉⵏⴳⵎ ⵅⴼ ⵜⵎⵣⵡⴰⴳⵜ ⵉⴹⴼⵕⵏ ⵉ ⵜⵎⵙⵎⵓⵏⵜ ⵜⴰⴼⵕⵓⵏⴽⵓⴼⵓⵏⵉⵜ.

ⴳ ⵓⵙⴰⵜⵉ ⵏ ⵓⵙⴷⵓⵙ ⵏ ⵜⵡⵓⵔⵉⵡⵉⵏ ⵏⵏⵙ ⴳ ⵢⵉⴳⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵔⵙⵏ, ⴷⴰ ⵉⵙⵡⵓⵔⵉ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵓⵙⴷⵓⵙ ⵏ ⵉⵎⵢⴰⵙⵙⴰⵜⵏ ⵏⵏⵙ ⵉⵙⵉⵏⵔⴰⵏⵏ ⴰⴽⴷ ⵉⵎⴷⵔⴰⵡⵏ ⵏⵜⴰⵢⵏⵉⵏ ⵙ ⵜⵎⵙⴰⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵙⴳⵎⴹ ⵏ ⵜⵎⴷⵔⴰⵡⵉⵏ ⴷ ⵓⵙⵎⵀⵍ ⵏ ⵜⵎⵙⵙⴽⵜⵉⵜⵉⵏ ⵏ ⵓⵎⵙⴰⵙⴰ ⵉⵙⵡⵓⵜⵜⵙⵏ ⴰⵎⵔⴰⵔⴰ ⵏ ⵜⵉⵔⵎⵉⵜⵉⵏ ⴷ ⵜⵎⵓⵣⴰⵢⵉⵏ, ⴷ ⴰⵡⴷ ⵜⴰⴷⵔⴰⵡⵜ ⴳ ⴽⵉⴳⴰⵏ ⵏ ⵉⴱⵔⴳⵔⴰⵡⵏ ⴷ ⵜⵙⴰⵡⵔⵉⵏ ⵏ ⵓⵙⵎⵓⵜⵜⴳ, ⴷ ⵓⵙⵏⵎⴰⵍⴰ ⵏ ⵜⵙⵎⵓⵏⵉⵏ ⴷ ⵉⵎⵛⴰⵡⴰⵕⵏ ⵉ ⵜⵖⵓⵔⵉ ⵏ ⵉⵎⵏⵉⴷⵏ ⵏ ⵓⵎⵢⴰⵡⴰⵙ.

ⵉⵙⵏⵎⴰⵍⴰ ⵓⵙⵇⵇⵉⵎ ⵜⵉⵎⴷⵔⴰⵡⵉⵏ ⵜⵉⵙⵏⵔⴰⵏⵉⵏ ⵎⵢⴰⵏⴰⵡⵏⵉⵏ ⴰⴽⴷ ⵜⴰⵎⵓⵏⵜ ⵏ ⵓⵕⵓⴱⴱⴰ, ⴷ ⵓⵙⵇⵇⵉⵎ ⵏ ⵓⵕⵓⴱⴱⴰ, ⴷ ⵜⵙⵎⵉⵔⵉⵜ ⵜⴰⵏⴰⴼⵍⵍⴰⵜ ⵏ ⵜⵖⴰⵡⵙⵉⵡⵉⵏ ⵏ ⵉⵎⵔⴳⵓⵙⵏ, ⴷ ⵜⵎⵙⵎⵓⵏⵜ ⵅⴼ ⵓⵙⴳⴷⵍ ⵏ ⵓⵙⵔⴼⵓⴼⵏ ⴳ ⵊⵓⵏⵉⴼ.

ⵎⴽⴷⴰ ⵉⴱⵟⵟⵓ ⵓⵙⵇⵇⵉⵎ ⵓⵎⵍⴰⵏ ⴷ ⵜⴰⵏⴰⴹⵉⵏ ⵅⴼ ⵜⵎⵙⴰⵔⵉⵏ ⵜⵉⵣⵔⴼⴰⵏⵉⵏ ⴰⴽⴷ ⵜⵓⴳⵜ ⵏ ⵉⵎⴷⵔⴰⵡⵏ ⴷ ⵜⵙⴳⴳⵯⵉⵏ ⵜⵉⴳⵔⴰⵖⵍⴰⵏⵉⵏ.

ⵉⵣⴷⵉ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⵙⴷⵓⵙ ⵏ ⵓⵎⵢⴰⵡⴰⵙ ⵏⵏⵙ ⴰⴽⴷ ⴽⵉⴳⴰⵏ ⵏ ⵜⵎⴰⴷⴷⴰⵙⵉⵏ ⵜⵉⴳⵔⴰⵖⵍⴰⵏⵉⵏ ⵜⴰⵔⵓⵏⴱⵉⴹⵉⵏ ⴷ ⵉⵏⴳⵎⴰⵎⵏ ⵉⴷⵉⴱⵍⵓⵎⴰⵙⵉⵢⵏ ⵉⵜⵜⵓⵙⵖⵣⵏⵏ ⴳ ⵜⵎⴰⵣⵉⵔⵜ ⵏⵏⵖ ⴷ ⵉⴽⴰⴱⴰⵕⵏ ⵉⴱⵕⵕⴰⵏⵉⵢⵏ ⵙ ⵓⵙⵎⵀⵍ ⵏ ⵜⵎⴷⵔⴰⵡⵉⵏ ⵉⵜⵜⵓⵙⵙⴳⵎⴹⵏ ⴷ ⵓⵙⴷⵓⵙ ⵏ ⵓⵎⵙⴰⵡⴰⵍ ⴷ ⵓⵎⵔⴰⵔⴰ ⵏ ⵓⵎⵍⴰⵏ ⴷ ⵉⵎⵏⴰⴷⵏ ⴷ ⵓⵙⵏⵎⴰⵍⴰ ⵏ ⵉⵎⵛⴰⵡⴰⵕⵏ ⵅⴼ ⵉⵙⵓⵔⵙⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⵏⵉⴷⵏ ⵏ ⵓⵎⵢⴰⵡⴰⵙ.

ⵙ ⵓⵎⴷⵢⴰ, ⴷⴰ ⵉⵜⵜⵎⵢⴰⵖ ⵓⵙⵇⵇⵉⵎ ⴰⴽⴷ ⵜⵎⵙⵎⵓⵏⵜ ⵜⴰⴳⵔⴰⵖⵍⴰⵏⵜ “ⴽⵓⵍⵍⵓ ⴰⵖ ⵎⴳⴰⵍ ⵜⵎⵔⵔⵓⵜ ⵏ ⵜⵎⵏⵖⵉⵡⵜ”, ⴷ ⵓⵙⵉⵏⴰⴳ ⴰⴷⴰⵏⵉⵎⴰⵕⴽⵉ ⵉ ⵓⵙⴱⴷⴷⵉ ⵏ ⵓⵙⵔⴼⵓⴼⵏ (Dignity), ⴷ ⵜⵎⵙⵎⵓⵏⵜ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ (APT), ⴷ ⵓⵍⴰ ⵉⵏⴳⵎⴰⵎⵏ ⵉⴷⵉⴱⵍⵓⵎⴰⵙⵉⵢⵏ ⴳ ⵍⵎⵖⵔⵉⴱ ⴷ ⵜⵙⵎⴷⵢⴰⵜⵉⵏ ⵏ ⵜⵎⵜⵜⴰ ⵉⵎⵓⵏⵏ ⴳ ⵜⴳⵍⴷⵉⵜ.