ⵜⵙⴷⴷⵉⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵅⴼ ⵡⴰⵜⵉⴳ ⵏ ⵓⵙⵏⵏⴷ ⵏ ⵉⴱⴹⵉⵢⵏ ⵉⵣⵔⴼⴰⵏⵏ ⵅⴼ ⵜⵎⵔⵉⵙⵉⵏ ⵜⵉⴳⵔⴰⵖⵍⴰⵏⵉⵏ ⵏ ⵍⵎⵖⵔⵉⴱ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴷⵔⴼⵉⵏ ⵜⵉⴷⵙⵍⴰⵏⵉⵏ. ⵢⵓⵛⴽⴰⴷ ⵖⴰⵢⴰ ⴷ ⴳ ⵓⵕⵥⵥⵓⵎ ⵏ ⵜⵙⵓⵜⵍⵜ ⵜⴰⴳⵔⴰⵖⵍⴰⵏⵜ ⵅⴼ "ⵉⵙⵍⴳⵏⵏ ⵓⵎⵀⵉⵍⵏ ⴳ ⵓⴱⵔⵉⴷ ⵏ ⵓⵙⵏⴰⵎ: ⵜⵉⵏⵥⴰⵕ ⵏ ⵓⵣⵔⴼ ⴳ ⵓⵎⵣⴰⵖ ⴷ ⵓⴼⵔⴰⴳ ⵏ ⵉⵣⵔⴼⴰⵏ", ⵏⵏⴰ ⵜⵙⵏⵓⴱⴳ ⵜⵎⴷⵉⵏⵜ ⵏ ⴼⴰⵙ ⴰⵙⵙ ⵏ 14 ⴷ 15 ⴱⵕⴰⵢⵕ ⴰⴷ, ⵏⵙ ⵓⵙⵏⵎⴰⵍⴰ ⵏ ⵓⴳⵔⴰⵡ ⵏ ⵉⵎⵙⵜⴰⵏⵏ ⴳ ⴼⴰⵙ ⵜⴰⵎⵓⵏⵜ ⵜⴰⴳⵔⴰⵖⵍⴰⵏⵜ ⵏ ⵉⵎⵙⵜⴰⵏⵏ ⴷ ⵜⵎⵙⵎⵓⵏⵜ ⵏ ⵉⴳⵔⴰⵡⵏ ⵏ ⵉⵎⵙⵜⴰⵏⵏ ⴳ ⵍⵎⵖⵔⵉⴱ.
ⵜⵙⵙⴽⵕⵥ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵅⴼ ⵡⴰⵜⵉⴳ ⵏ ⵓⵙⵙⵓⵖⵍ ⵏ ⵉⵎⵏⵣⴰⵢⵏ ⵉⵣⵔⴼⴰⵏⵏ ⵖⵔ ⵜⵎⴳⴳⵉⵜⵉⵏ ⵜⵉⵎⵢⴰⴳⴰⵏⵉⵏ ⵏⵏⴰ ⵉⵜⵜⴰⵊⵊⴰⵏ ⵇⵇⴰⵃ ⴰⴷ ⵢⴰⵡⴹ ⵖⵔ ⵜⵣⵔⴼⵜ, ⵢⵉⵍⵉ ⵓⵙⴷⵓⵙ ⵏ ⵉⵙⴽⵉⵍ ⵎⵏⵉⴷ ⵏ ⵓⵙⵍⴳⵏ, ⵜⵙⵓⵙⴼⵓⵡ ⵎⴰⵙ ⵉⵙⵖⴰⵡⵙⴰ ⵎⴰⵢⴰ ⵏⵏ ⵙ ⵢⴰⵜ ⵜⵎⵢⴰⴷⴰⵙⵜ ⵜⴰⵖⵣⵓⵔⴰⵏⵜ ⵢⵓⵎⴰⵏ ⵉⵎⵏⵣⴰⵢⵏ ⵉⴷⵙⵍⴰⵏⵏ ⵣⵓⵏ ⴷ: ⵜⴰⵣⵔⴼⵜ, ⴰⵙⵏⴰⵎ, ⴰⵙⵓⵖⵏ, ⵜⵓⵍⴳⵉⵏⵜ, ⴰⵎⵙⴰⵙⴰ, ⵜⴰⵙⵓⵍⴰⵏⵜ, ⵜⴰⵜⵉⴽⵏⵓⵍⵓⵊⵉⵜ, ⵜⴰⵎⵢⴰⴳⴰⵏⵜ ⵏ ⵉⵣⵔⴼⴰⵏ, ⴰⴷⴰⴼ ⵖⵔ ⵜⵣⵔⴼⵜ, ⴰⵣⵔⴼ ⴳ ⵓⵎⵣⴰⵖ, ⴰⵎⵚⵉⵕⵉⴹ ⵓⵖⴷⵉⵎ, ⵜⵉⵡⵉⵙⵉ ⵜⴰⵣⵔⴼⴰⵏⵜ, ⵉⵣⵔⴼⴰⵏ ⵏ ⵉⵙⵎⵉⵍⵏ ⴽⵓⴽⴹⵏⵉⵏ, ⴷ ⵓⵙⴷⵓⵙ ⵏ ⵜⵏⵢⵉⵎⴰⵏⵜⴷ ⵓⵙⴳⴷⵍ ⵏ ⵜⵕⵥⵉⵢⵉⵏ.
ⵎⴽⴷⴰ ⵜⵙⵙⵉⴷⴷ ⵅⴼ ⵜ ⵓⵙⵓⵖⵏ ⵏ ⵓⵙⵎⴽⵍ ⵏ ⵉⵎⵓⴽⵔⵉⵙⵏ ⵉⵣⴷⵉⵏ ⴷ ⵓⵎⴰⵟⵍ ⵏ ⵜⵎⴳⴳⵉⵜⵉⵏ ⵜⵉⵏⵣⵔⴰⴼⵉⵏ, ⴷ ⵜⵏⴼⵔⵓⵜ ⵏ ⵓⵙⵎⵓⵏ ⵏ ⵜⵎⴰⴳⵍⴰⵢⵉⵏ ⵜⵓⵍⴳⵉⵏⵉⵏ, ⴷ ⵓⵍⴰ ⴰⵙⴷⵓⵙ ⵏ ⵜⵕⵡⵉ ⵏ ⵓⵎⵚⴰⵕⴰⴹ ⵓⵖⴷⵉⵎ, ⴷ ⵜⵏⴼⵔⵓⵜ ⵏ ⵜⵉⵍⵉⵜ ⵏ ⵓⵎⵣⴰⵖ ⴳ ⵜⵓⴳⵜ ⵉⵙⵡⵉⵔⵏ ⵏ ⵓⵎⵚⵉⵕⵉⴹ, ⴷ ⵓⵙⵙⵡⵀⵏ ⵏ ⵜⴱⵖⵓⵔⵜ ⵙⴳ ⵜⵡⵉⵣⵉ ⵜⴰⵏⵣⵔⴰⴼⵜ, ⴷ ⵜⵓⴽⴽⵙⴰ ⵏ ⵉⴼⵉⴽⵛⵏ ⵉⴽⵎⴰⵎⵏ ⵏⵉⵖ ⵓⵎⵀⵉⵍⵏ ⵏⵏⴰ ⵓⵔ ⵉⵜⵜⴰⴷⵊⴰⵏ ⵉⵏⵎⵓⵔⴰⵏ ⴰⴷ ⴰⴷⴼⵏ ⵖⵔ ⵜⵣⵔⴼⵜ.
ⴳ ⵓⵙⴰⵜⵉ ⵏ ⵜⴳⵓⵔⵉ ⵏⵏⵙ ⵅⴼ ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵡⴰⴷⴰⴼ ⵖⵔ ⵜⵣⵔⴼⵜ, ⵜⵙⵉⵙⴼⵉⵡ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵉⵙⵖⴰⵡⵙⴰ ⵓⵙⵎⵀⵍ ⵏ ⵓⵣⵔⴼ ⴰⴷ ⴳⵏ ⵉⵣⵔⴼⴰⵏ ⴰⴷ ⵜⵉⵍⴰⵡⵜ ⵉⵍⵍⴰⵏ ⴽⵓ ⴰⵙⵙ ⴷ ⵜⴰⵙⴽⵔⵜ "ⴳ ⵜⴷⴰⵍⵉⵡⵉⵏ ⵏ ⵜⵙⵏⴱⴹⴰⵢⵉⵏ, ⴳ ⵉⵙⵉⵔⴰⵜⵏ ⵏ ⵓⵙⵇⵙⴰⵢ ⴷ ⵓⵔⵣⵣⵓ, ⴳ ⵉⵏⵄⴰⵕⵏ ⵏ ⵉⵙⵜ ⵎⴰⵙⵙⵙⴰ ⴷ ⵉⴷ ⵎⴰⵙⵙ ⵉⵎⵙⵜⴰⵏⵏ, ⴷ ⴳ ⴽⵓ ⵜⵎⴳⴳⵉⵜ ⵉⵣⴷⵉⵏ ⴷ ⵉⵣⵔⴼⴰⵏ ⵏ ⵓⴳⴳⵉⴷⵏ ⴷ ⵜⴷⵔⴼⵉⵏ ⵏⵏⵙⵏ", ⴷⴰⵜ ⴰⴷ ⵜⵔⵏⵓ ⵎⴰⵙ "ⴷⴰ ⵉⵜⵜⵙⵖⵍ ⵓⵡⵇⵇⵔ ⵏⵏⵖ ⵉ ⵉⵣⵔⴼⴰⵏ ⵏ ⵓⴼⴳⴰⵏ ⴰⵡⵙ ⵙ ⵜⵕⵡⵉ ⵏ ⵜⵎⵀⵍⵉⵏ ⵜⵉⵏⵣⵔⴰⴼⵉⵏ ⵉ ⵓⵙⵓⵎⵓ ⵏ ⵓⵏⴳⵉⵙⵏ". ⵎⴰⵢⴰ ⵓⵔ ⵉⵣⴷⵉ ⵖⴰⵙ ⵙ ⵓⵙⴳⴷⵍ ⵏ ⵜⵕⵥⵉⵢⵉⵏ ⴷ ⵜⵎⵔⵔⵓⵜ ⵏⵏⵙⵏⵜ, ⵎⴰⵛⴰ ⴰⵡⴷ ⵅⴼ ⵜⵏⴽⵔⴰ ⵙ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴷⵓⵙ ⵏⵏⵙ, ⴷ ⵅⴼ ⵓⵙⵎⵀⵍ ⴰⵎⵢⴰⴳⴰⵏ ⴷ ⵓⵙⵖⵓⵏ ⵏ ⵜⵎⵔⵙⴰⵍ ⵙ ⵜⵎⵢⴰⴳⴰⵏⵜ ⵏⵏⵙⵏ ⴷ ⵓⵙⵖⵓⴷⵓ ⵉⵣⴷⵉⵏ ⵏ ⵉⵣⵎⴰⵣ ⵏ ⵡⴰⴷⴰⴼ ⵖⵔⵙⵏⵜ.
ⵅⴼ ⵉⴳⴳⵉ ⵏ ⵎⴰⵢⴰ, ⵜⵙⴷⴷⵉⴷ ⵎⴰⵙⵙⴰ ⵉⵙⵓⵍ ⴱⵓⵄⵢⵢⴰⵛ ⵎⴰⵙ ⴰⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷⴰ ⵉⵜⵜⴹⴼⵓⵕ ⵉⵎⴹⴰⴽⴰⵕⵏ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ ⵉⵣⴷⵉⵏ ⴷ ⵓⵙⵏⴰⵎ ⵏ ⵜⵣⵔⴼⵜ, ⴰⵔ ⵉⵜⵜⴰⵡⵙ ⵙ ⵜⴰⵏⵏⴰⵢⵜ ⵏⵏⵙ ⴳ ⵜⵓⴳⵜ ⵏ ⵉⵙⵏⴼⴰⵔⵏ ⵏ ⵉⵙⵍⴳⵏⵏ, ⵜⵙⵙⴽⵔⵥ ⵎⴰⵙ ⵓⵔ ⵜⵣⴷⵉ ⵜⵣⵔⴼⵜ ⵉⵕⵡⴰⵏ ⵖⴰⵙ ⵙ ⵓⵙⵓⵎⵓ ⵏ ⵓⵏⴳⵉⵙⵏ, ⵎⴰⵛⴰ ⵜⴱⴷⴷ ⴰⵡⴷ ⵅⴼ ⵜⵓⵚⴽⴰ ⵏ ⵓⵏⴰⴳⵔⴰⵡ ⵓⵍⴳⵉⵏ ⴷ ⵓⵏⵣⵔⴰⴼ ⵉⵙⴷⵓⵙⵏ ⵜⴰⵏⵢⵉⵎⴰⵏⵜ ⵏ ⵉⵏⴰⵎⵓⵔⵏ ⴳ ⵜⵏⴱⴹⴰⵢⵜ, ⵜⵙⵔⵙ ⵉⵎⵏⵣⴰⵢⵏ ⵏ ⵓⵡⴰⵏⴽ ⵏ ⵓⵙⵍⴳⵏ ⴷ ⵓⵡⵇⵇⵔ ⵏ ⵉⵣⵔⴼⴰⵏ ⴷ ⵜⴷⵔⴼⵉⵏ.
