ⵉⴳⴰ ⵓⵣⵔⴼ ⵏ ⵡⴰⴷⴰⴼ ⵙ ⵜⵣⵔⴼⵜ ⴰⵣⵔⴼ ⴰⴷⵙⵜⴰⵔ, ⵉⵖⵜⵙ ⵜ ⵓⴷⵓⵙⵜⵓⵔ ⵏ 2011 ⴳ ⵓⵎⴰⴳⵔⴰⴷ 118 “ⵉⴳⴰ ⵓⵣⵔⴼ ⴳ ⵓⵎⵚⴰⵕⴰⴹ ⴰⵏⴼⵔⵓ ⵉ ⴽⵓ ⵓⴳⴳⵉⴷ ⵃⵎⴰ ⴰⴷ ⵉⴼⵔⴳ ⵉⵣⵔⴼⴰⵏ ⵏⵏⵙ ⴷ ⵜⵏⴰⴼⵓⵜⵉⵏ ⵏⵏⵙ ⵍⵍⵉ ⵉⵃⵟⵟⵓ ⵓⵙⵍⴳⵏ", ⵉⴳ ⴰⵣⵔⴼ ⵏⵏⴰ ⵢⵓⵎⴰⵏ ⵜⵓⵎⴰⵢⵜ ⵜⴰⵣⵔⴼⴰⵏⵜ ⵉⵙⵎⵓⵇⵇⵓⵍⵏ ⴳ ⵉⵏⵎⵓⵔⴰⵏ ⵙ ⵉⵙⵉⴽⵍ ⵉ ⵓⴹⴰⴽⴰⵍ ⵏ ⵡⴰⵢⴷⴰⵜⵏ ⴷ ⵉⵣⵔⴼⴰⵏ ⵏⵏⵙⵏ ⵍⵍⵉⵖ ⵡⴰⵍⴰⵏ ⵉ ⵓⵡⴰⵏⴽ ⵉⵏⴱⴹ ⵓⵙⵍⴳⵏ ⵙ ⵓⵎⴳⵉⵏ ⵏ ⵓⵙⵉⵏⵔⴰⵏ ⵏ ⵓⵣⵔⴼ ⴷ ⵓⵣⵓⵛⵛⵍ, ⴰⵢⵍⵍⵉ ⵉⵜⵜⴰⵊⵊⴰⵏ ⴰⵙⵉⴷⴼ ⵙ ⵜⵣⵔⴼⵜ ⴰⴷ ⵉⴳ ⵜⴰⵖⴰⵡⵙⴰ ⵜⴰⵏⴼⵔⵓⵜ ⵜⵉⵣⵉ ⵏⵏⴰ ⵍⵍⴰⵏⵜ ⵜⴼⴰⴷⵉⵡⵉⵏ ⵜⵉⵏⴱⵣⴰⵣⵉⵏ ⵉ ⵓⴼⵊⵊⵉⵊ ⵙ ⵓⵣⵔⴼ ⴰⴷ.
ⴷⴰ ⴷ ⵉⵜⵜⴰⴳⵯⵎ ⵓⵣⵔⴼ ⵏ ⵡⴰⴷⴰⴼ ⵙ ⵜⵣⵔⴼⵜ ⵜⵉⵔⵙⴰⵍ ⵏⵏⵙ ⵙⴳ ⵓⵏⴰⴳⵔⴰⵡ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵎⴽⵍⵍⵉ ⵙ ⵜⵜⵢⴰⵡⵙⵙⴰⵏⵏ ⴳ ⵓⵙⵡⵉⵔ ⴰⴳⵔⴰⵖⵍⴰⵏ. ⵜⵍⴰ ⵜⵏⴱⴹⴰⵢⵜ ⴰⵜⵉⴳ ⴰⵏⴰⴼⵍⵍⴰ ⵙ ⵎⴰⴷ ⵉⵥⵍⵉⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ. ⵉⴳ ⵏⵜⵜⴰ ⵏⵉⵜ ⴰⵣⵔⴼ ⵙⴳ ⵉⵣⵔⴼⴰⵏ ⵏ ⵓⴼⴳⴰⵏ ⵎⴽⵍⵍⵉ ⵉⵜⵜⵢⴰⵔⴰ ⴳ ⵉⵎⵉⵔⵓⵜⵏ ⵉⴳⵔⴰⵖⵍⴰⵏⵏ ⵉⵏⵙⵙⵉⵅⴼ ⵜⵏ ⵓⵍⵖⵓ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵜⵜⵉⵡⵉⵏ ⵏⵏⵙ 8 (ⴽⵓ ⵓⴳⴳⵉⴷ ⵉⵍⵍⴰ ⵖⵓⵔⵙ ⵓⵣⵔⴼ ⴰⴷ ⵉⴼⵜⵓ ⵙ ⵜⵙⵏⴱⴹⴰⵢⵉⵏ…) ⴷ 7 ( ⴰⴽⵙⵓⵍⵏ ⴰⴽⴽⵯ ⵎⵉⴷⴷⵏ ⵎⵏⵉⴷ ⵏ ⵓⵙⵍⴳⵏ, ⵉⴽⵙⵉⵍⵏ ⴳ ⵓⵣⵔⴼ ⵏ ⵓⴼⵊⵊⵉⵊ ⵙ ⵓⴼⵔⴰⴳ ⵏ ⵓⵙⵍⴳⵏ ⴱⵍⴰ ⴰⵙⵏⵓⵃⵢⵓ) ⵉⴳ ⵏⵉⵜ ⵙⵓⵍ ⴰⵎⴹⴰⴽⴰⵍ ⴰⴷⵙⵍⴰⵏ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵢⴰⴹⵏⵉⵏ ⵙⴳ ⵜⵉⵕⵥⵉ.
ⴳ ⵓⵎⵏⴰⴹ ⴰⴷ ⵏⵉⵜ, ⴷⴰ ⵢⴰⵇⵇⵔⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⴰⵏⴰⴹⵉⵏ ⵏⵏⵙ ⵙ ⵜⵓⵎⵙⵉⵙⵜ ⵏ ⵉⵣⵣⵔⴰⴼⵏ ⵉⵏⴰⵎⵓⵔⵏ, ⴳ ⵜⵙⴳⴰ ⵏⵏⵙⵏ ⵉⵣⴷⵉⵏ ⵙ ⵓⵣⵔⴼ ⴳ ⵡⴰⴷⴰⴼ ⵙ ⵜⵣⵔⴼⵜ ⴷ ⴳ ⵓⵎⵚⵉⵕⵉⴹ ⵓⵖⴷⵉⵎ, ⴰⴽⴷ ⵉⵣⵔⴼⴰⵏ ⴷ ⵜⵏⴼⵔⵓⵜⵉⵏ ⵏⵏⴰ ⴷ ⵢⵉⵡⵉ ⵓⴷⵓⵙⵜⵓⵔ ⴰⵎⴰⵢⵏⵓ ⴷ ⵓⵍⴰ ⵉⵎⵉⵔⵓⵜⵏ ⵉⴳⵔⴰⵖⵍⴰⵏⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⵣⴷⵉⵏ ⴷ ⵓⵙⵏⵜⵍ, ⵙ ⵜⵡⵉⵍⴰ ⵜⵓⵙⵔⵉⴷⵜ ⵏⵉⵖ ⵜⴰⵔⵓⵙⵔⵉⴷⵜ, ⴷ ⵜⵖⵓⵔⵉ ⵉ ⵜⵏⴱⴹⴰⵢⵜ ⵙ ⵜⵎⴰⴳⵍⴰⵢⵜ ⵉ ⵓⵙⴷⵓⵙ ⵏ ⵜⵙⵏⵙⵉ ⵏ ⵉⵏⴰⵡⴰⵢⵏ ⵉⴳⵔⴰⵖⵍⴰⵏⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⴰ ⵉⵙⵖⵣⵏ ⵍⵎⵖⵔⵉⴱ, ⴷ ⵓⵙⵎⵀⵍ ⵏ ⵓⵎⵏⵣⴰⵢ ⵏ ⵜⴰⵜⵜⵓⵢⵜ ⵏ ⵉⵏⴰⵡⴰⵢⵏ ⴰⴷ ⵅⴼ ⵉⵙⵍⴳⵏⵏ ⵉⵏⴰⵎⵓⵔⵏ ⵙ ⵓⵙⵎⵀⵍ ⵏ ⴰⵢⵍⵍⵉ ⴷ ⵢⵓⵛⴽⴰⵏ ⴳ ⵜⵣⵡⵓⵔⵜ ⵏ ⵓⴷⵓⵙⵜⵓⵔ.;
ⵎⴽⵍⵍⵉ ⵉⵙⴽⵔ ⵓⵙⵇⵇⵉⵎ ⵢⴰⵜ ⵜⵣⵔⴰⵡⵜ ⵅⴼ ⵓⵙⵉⴷⴼ ⵏ ⵉⴱⵕⵕⴰⵏⵉⵢⵏ ⵙ ⵜⵣⵔⴼⵜ ⴳ ⵍⵎⵖⵔⵉⴱ, ⵏⵏⵉ ⵉⵙⵡⵓⵜⵜⵙⵏ ⴰⴽⴰⵣ ⴷ ⵓⵏⵜⴰⵎ ⵏ ⵓⵙⵓⵔⵙ ⵏ ⵉⴱⵕⵕⴰⵏⵉⵢⵏ ⴳ ⵍⵎⵖⵔⵉⴱ ⵙ ⵜⵣⴷⴰⵢⵜ ⵏⵏⵙ ⴷ ⵓⵣⵔⴼ ⵏ ⵡⴰⴷⴰⴼ ⵙ ⵜⵣⵔⴼⵜ ⴷ ⵓⵙⵎⵏⵉⴷ ⵏ ⵜⵙⵓⵎⴰⵔ ⵉⵣⵎⵔⵏ ⴰⴷ ⵙⵖⵓⴷⵓⵏⵜ ⴰⵣⵔⴼ ⴳ ⵡⴰⴷⴰⴼ ⵏ ⵓⵙⵎⵉⵍ ⴰⴷ ⵙ ⵜⵣⵔⴼⵜ, ⵙ ⵓⵎⵙⴰⵙⴰ ⴷ ⵜⵏⵜⴰⵎⵜ ⵜⴰⴷⵙⵜⴰⵔⵜ ⴷ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⵉⵣⴷⵉⵏ ⴷ ⵓⵙⵏⵜⵍ.
ⴳ ⵎⴰⴷ ⵉⵥⵍⵉⵏ ⵙ ⵉⵣⵔⴼⴰⵏ ⵏ ⵓⴳⴳⵉⴷⵏ ⵉⵜⵜⵓⴼⴰⵜⵉⵢⵏ ⵙⴳ ⵜⴷⵔⴼⵉ ⵏⵏⵙⵏ, ⴷⴰ ⵙⵙⵓⵊⴰⴷⵏⵜ “ⵉⵍⵓⴳⵏⵏ ⵏ ⵎⴰⵏⴹⵉⵍⵍⴰ” ⵉⵎⵏⵣⴰⵢⵏ ⵉⵏⵉⵍⴰⵏⵏ ⴼⵔⵓⵔⵉⵏⵉⵏ ⵉ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⵙⵎⵉⵍ ⴰⴷ, ⵡⵉⴷ ⵜⵜⵢⴰⵎⴰⵥⵏⵉⵏ ⴳ ⵓⵙⴰⵜⵉ ⵏ ⵉⵎⵉⵥ ⴰⵙⵙⵓⵍⴰⵏ ⵏⵉⵖ ⵉⵎⵖⵣⵓⵜⵏ ⵜⵜⵡⴰⵏⴱⴰⴹⵏⵉⵏ.
ⵏⵏⴰⵍⵏ ⵉⵍⵓⴳⵏⵏ ⵅⴼ ⵓⵙⵓⵖⵏ ⵙ ⵓⵎⵓⴳⴳⵓ ⵏ ⵉⵎⵖⵣⵓⵜⵏ ⴰⴽⴽⵯ ⵙ ⵓⵣⵔⴰⴽ ⵏ ⵡⴰⴷⴷⵓⵔ ⵏⵏⵙ ⴰⵕⵚⵍⵉ ⴷ ⵜⵉⵏⴷⵉ ⵏⵏⵙⵏ ⴰⵎ ⴰⴼⴳⴰⵏ, ⴷ ⵓⵙⴳⴷⵍ ⵏ ⵓⵙⵔⴼⵓⴼⵏ ⴷ ⵡⴰⵏⴰⵡⵏ ⵢⴰⴹⵏ ⵏ ⵓⴷⵔⵡⵙ, ⵎⴽⵍⵍⵉ ⴰⴽⴽⴰⵏ ⵓⵎⵍⴰⵏ ⴼⵔⵓⵏⵉⵏⵉⵏ ⵅⴼ ⵜⴳⵔⵓⵎⵎⴰ ⵜⴰⴱⴰⵔⴰⵡⵜ ⵏ ⵜⵎⵙⴰⵔⵉⵏ ⵉⵍⵍⴰⵏ ⴳⵔ ⵉⵙⵡⵓⴷⴷⵓⵜⵏ ⵏ ⵓⵙⵎⵓⴳⵏ ⵙ ⵜⵏⵓⴼⴰ ⵜⵉⵎⵙⵏⵉⵊⵊⵉⵜⵉⵏ, ⵙ ⵜⵉⴹⴰⴼ, ⵜⵙⴳⵯⴷⵍ ⴰⵙⵡⵓⵜⵜⵓ ⵏ ⵡⵓⵜⵛⵉ ⴷ ⵡⴰⵎⴰⵏ ⵏ ⵓⵎⵖⵣⵓ, ⴷ ⵓⵙⵎⵔⵙ ⵏ ⵉⵎⴰⵙⵙⵏ ⵏ ⵓⵏⴱⴰⴹ ⴰⵏⵉⵎⴰⵏ ⵉⵜⵜⵎⵔⵎⴰⴷⵏ ⵏⵉⵖ ⵉⵙⴽⴰⵔⵏ ⴰⵏⴳⴰⵥ ⵖ ⵡⴰⵏⴰⵡ ⵏⵏⵙ, ⵣⵓⵏ ⴷ ⵉⵙⴽⵔⴰⴼ ⴷ ⵡⵓⵣⵣⴰⵍ.
ⴳ ⵓⵙⴰⵜⵉ ⵏ ⵜⵙⵎⵉⴳⴰⵍ ⵏⵏⵉ ⵙ ⵉⵏⵏⵖⵍⴼ ⵓⵙⵇⵇⵉⵎ ⵣⴷⵉⵏⵉⵏ ⵙ ⵜⵉⴹⴰⴼ ⵏ ⵉⵙⵓⵔⵙⵏ ⴳ ⵜⵎⵔⵙⴰⵍ ⵜⵉⵎⵖⵣⵓⵜⵉⵏ ⴷ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵉⵏⴽⵔⴰⴼⵏ, ⴷⴰ ⵉⵜⵜⵉⵡⵣ ⵓⵙⵇⵇⵉⵎ ⵅⴼ ⵓⴼⵔⴰⴳ ⵏ ⵓⵙⵎⵉⵍ ⴰⴷ ⵙ ⵉⵔⵣⴰⴼⵏ ⵏⵏⴰ ⵉⵙⴽⴰⵔ, ⴷ ⵓⵙⵎⴽⵍ ⵏ ⵜⵏⵓⵔⵣⵉⵏ ⵏⵏⴰ ⵜ ⵉⴷ ⵉⵍⴽⴽⵎⵏ ⵙⴳ ⴷⴰⵔ ⵉⵎⵖⵣⵓⵜⵏ ⵏⵉⵖ ⵜⵉⵡⵊⵉⵡⵉⵏ ⵏⵏⵙⵏ.
ⴷⴰ ⵢⴰⵇⵇⵔⴰ ⵓⵙⵇⵇⵉⵎ ⴳ ⵜⴰⵏⴰⴹⵉⵏ ⵏⵏⵙ ⵙ ⵉⴳⵉ ⵏ ⵉⵙⵡⵓⴷⴷⵓⵜⵏ ⵉⵎⵖⴰⵡⴰⵍⵏ ⵉ ⵓⵙⵉⴷⵔⵓⵙ ⵙⴳ ⵓⵛⵓⵛⴹ ⴰⴳⵯⵏⵙ ⵏ ⵜⵎⵔⵙⴰⵍ ⵜⵉⵎⵖⵣⵓⵜⵉⵏ, ⵉⴷⴷⵖ ⵖⵓⵔⵙ ⵉⵍⵍⴰ ⵉⴹⵉⵚ ⵓⵣⴷⵉⵔ ⵅⴼ ⵓⴼⵊⵊⵉⵊ ⵏ ⵉⵎⵣⴷⴰⵖⵏ ⵉⵎⵖⵣⵓⵜⵏ ⵙ ⵉⵣⵔⴼⴰⵏ ⵏⵏⵙ, ⵙ ⵜⵖⴰⵔⴰⵙⵜ ⵏ ⵓⵙⵖⵓⴷⵓ ⵏ ⵢⵉⵎⵉⵥ ⴰⵖⴹⴰⴼⴰⵏ ⴷ ⵓⵣⵣⵔⴰⵢ ⵅⴼ ⵜⴱⵔⵉⴷⵜ ⵏ ⵓⵙⴰⵔⵓⴼ ⴷ ⵜⴰⵣⵣⴰⵣⵜ ⵙ ⵜⵙⵖⵣⵏⵜ ⵏ ⵜⵎⵔⵔⵓⵜⵉⵏ ⵜⵉⵎⴽⴽⵉⵙⵉⵜⵉⵏ ; ⵉⴳⵉ ⵏ ⵉⵙⵡⵓⴷⴷⵓⵜⵏ ⵥⵍⵉⵏⵉⵏ ⵙ ⵓⴼⵔⴰⴳ ⵏ ⵉⵙⵎⵉⵍⵏ ⴽⵓⴽⴹⵏⵉⵏ ⴰⴳⵯⵏⵙ ⵏ ⵜⵎⵔⵙⴰⵍ ⵜⵉⵎⵖⵣⵓⵜⵉⵏ (ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⴷ ⵉⴷ ⴱⵓ ⵜⵎⵓⴹⴰⵏ ⵜⵉⵎⵉⵣⵉⵜⵉⵏ ⴷ ⵜⵎⵓⴹⴰⵏ ⵜⵉⵎⵏⵍⵍⵉⵜⵉⵏ ⴷ ⵜⵏⵢⵉⵎⴰⵏⵉⵏ …).
ⵎⴽⵍⵍⵉ ⵉⵙⵙⵉⵜⵉⴳ ⵓⵙⵇⵇⵉⵎ ⴰⵙⵖⵣⵏ ⵏ ⵓⵙⵇⵇⵉⵎ ⵓⵏⴱⵉⴹ ⵜⴰⵙⵏⵜⴰⵢⵜ ⵏⵏⴰ ⵉⵙⵡⵓⵜⵜⵙⵏ ⴰⵙⴷⵓⵙ ⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⵜⵜⵡⴰⵙⵔⵙⵏⵉⵏ ⴳ ⵢⵉⵎⵉⵥ ⴰⵙⵙⵓⵍⴰⵏ ⴷ ⵓⵎⵥⵉⵢⵏ ⵜⵜⵡⴰⵃⴹⴰⵏⵉⵏ, ⵉⵏⵏⵖⵍⴼⵏ ⵙⵉⵔⵙⵏ, ⵙ ⵢⴰⵏ ⵓⵏⴳⵔⴰⵡ ⴰⵎⴰⴷⴷⵓⵔ ⵏ ⵓⴳⴳⵉⴷⵏ ⵍⵍⴰⵏⵉⵏ ⴳ ⵢⵉⵎⵉⵥ ⴰⵙⵙⵓⵍⴰⵏ ⴷ ⵜⵎⴰⵎⴽⵉⵏ ⵏ ⵓⵙⵎⵏⵉⴷ ⵏ ⵜⵉⵔⴰⵎ ⵜⵉⵎⴰⴷⴷⵓⵔⵉⵏ. ⵢⵓⵛⴽⴰ ⴷ ⵓⵙⵖⵣⵏ ⴰⴷ ⵙ ⵓⵙⵎⵀⵍ ⵏ ⵉⵙⵖⵍⴰⴼ ⵏⵏⵉ ⴷ ⵉⵙⵙⴰⴼⵖ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ.
