ⵜⵙⵉⵙⴼⵉⵡ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵎⴰⵙ ⵢⵉⵡⵣ ⵓⵙⵇⵇⵉⵎ ⴳ ⵜⵉⵣⵉ ⵏ 30 ⵏ ⵉⵙⴳⴳⵯⴰⵙⵏ ⵅⴼ ⵉⴳⵉ ⵙⴳ ⵓⵙⵇⵙⵉ ⵏ ⵓⵙⵎⵙⴰⵙⴰ ⴰⵙⴰⴷⴼ ⵉ ⵓⵙⵎⵀⵍ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⴼⵔⴰⴳ ⵏ ⵉⵙⵎⵉⵍⵏ ⴽⵓⴽⴹⵏⵉⵏ, ⵜⵔⵏⵓ ⵎⴰⵙ ⴰⵖ ⴷ ⵉⵇⵇⴰⵏ ⵅⴼ ⵜⵙⵓⵍⴰⵏⵜ ⵏⵏⵙ, ⴰⴷ ⵏⴱⴷⴷ ⴽⵉⴳⴰⵏ ⵅⴼ ⵢⴰⵏ ⵙⴳ ⵉⵎⵓⴽⵔⵉⵙⵏ ⵏⵏⴰ ⵉⵜⵜⵟⵟⴰⵚⵏ ⵉⵣⵔⴼⴰⵏ ⵓⵖⵔⵉⵎⵏ ⴷ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⵉ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ, ⵏⵜⵜⴰⵏ ⴷ ⵓⵎⵓⴽⵔⵉⵏ ⵏ ⵓⴼⵓⴽⵙ ⵓⵍⴳⵉⵏ". ⵜⵙⵙⴽⵜⵉ ⵎⴰⵙⵙⴰ ⴱⵓⵄⵢⵢⴰⵛ ⴳ ⵜⴳⵓⵔⵉ ⵏⵏⵙ ⴳ ⵓⵕⵥⵥⵓⵎ ⵏ ⵜⵉⵏⴰⵡⵜ ⵜⴰⵏⴰⵎⵓⵔⵜ ⵏⵏⵉ ⵉⵙⵏⵎⴰⵍⴰ ⵓⵙⵇⵇⵉⵎ ⴰⵙⵙ ⵏ 19 ⴷⵓⵊⴰⵏⴱⵉⵔ 2022 ⵙ ⵜⵎⴷⵔⴰⵡⵜ ⴰⴽⴷ ⵜⵎⴰⵡⴰⵙⵜ ⵏ ⵜⴱⴷⴰⴷⵜ ⴷ ⵓⵙⵉⴷⴼ ⴰⵏⴰⵎⵓⵏ ⴷ ⵜⵡⵊⴰ ⵅⴼ ⵉⵎⵔⵙⵉ "ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⴷ ⵓⵙⴰⵜⵉ ⵏ ⵓⴼⵓⴽⵙ ⵓⵍⴳⵉⵏ, ⵙ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⵏⵏⵉ ⵉⵙⵏⵎⴰⵍⴰ ⵓⵙⵇⵇⵉⵎ ⵅⴼ ⵉⵎⵔⵙⵉ ⴰⴷ ⴳ ⴷⵓⵊⴰⵏⴱⵉⵔ 2020 ⵙ ⵜⵎⴷⵔⴰⵡⵜ ⴰⴽⴷ ⵉⵎⴰⵙⵙⵏ ⵉⴳⵔⴰⵖⵍⴰⵏⵏ ⴷ ⵉⴼⵔⵉⵇⵉⵢⵏ ⴳⴰⵏⵉⵏ ⵉⵎⵏⵜⴰⵢⵏ, ⴷ ⵏⵏⵉ ⵉⵙⵖⵍⴼⵏ ⵙ ⵓⵏⵖⴱⵓ ⵏ ⵓⵎⴹⴰⴽⴰⵕ ⴷ ⵉⵎⵛⴰⵡⴰⵕⵏ ⴷ ⵓⵏⵖⴰⵍ ⵏ ⵉⵙⴰⵢⵔⴰⵔⵏ ⵏⵏⵙ ⵃⵎⴰ ⴰⴷ ⴳⵉⵙ ⴰⵎⵓⵏ ⵉⵎⴳⴳⴰⵢⵏ ⵏⵜⴰⵢⵏⵉⵏ. ⵜⵙⵙⴽⵜⵉ ⵙ ⵜⵎⵍⴷⴰ ⴰⴷ ⵙ ⵜⵖⵓⵔⵉ ⵏ ⵓⵙⵇⵇⵉⵎ ⵙ "ⵓⵙⵓⵖⵏ ⵏ ⵉⴳⵉ ⵏ ⵜⵎⵢⴰⴷⴰⵙⵜ ⵏ ⵜⴰⵎⵓⵏⵜ ⴳ ⵡⴰⵏⵙⴰ ⵏ ⵜⵖⵍⵉⴼⵜ ⴷ ⵜⵡⵓⵔⵉ ⵅⴼ ⵓⵙⵎⵀⵍ ⵏⵏⵙ ⵙ ⵓⵣⵣⵔⴰⵢ ⵅⴼ ⵉⵙⵍⴳⵏⵏ, ⴰⵎ ⴰⵙⵍⴳⵏ ⵏ ⵜⵡⵊⴰ ⴷ ⵓⵙⵍⴳⵏ ⴰⵏⵙⴱⴰⴱ ⴷ ⵓⵙⵍⴳⵏ ⵏ ⵜⵎⵔⵉⵙⵉⵏ ⴷ ⵜⵎⵖⵓⵏⵉⵏ ⴷ ⵓⵙⵍⴳⵏ ⴰⵏⴱⴽⴰⴹ". ⴳ ⵓⵙⴰⵜⵉ ⵏ ⵜⴷⵉⵏⴰⵎⵉⵜ ⵏ ⵖⵉⵍⴰⴷ ⵏ ⵓⵣⵣⵔⴰⵢ ⵅⴼ ⵓⵙⵍⴳⵏ ⵏ ⵜⵡⵊⴰ, ⵜⴱⵔⵔⵃ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵎⴰⵙ "ⴹⴰⵕⴰⵜ 18 ⵏ ⵉⵙⴳⴳⵯⴰⵙⵏ ⵏ ⵜⵙⵏⵙⵉ ⴷ ⵓⵙⵓⵜⴳ ⴷ ⵉⵎⵣⵉⵣⵣⵍⵏ ⴷ ⵜⵡⵓⵔⵉ ⵖ ⵓⴱⴰⵔⴰⵣ, "ⵔⴰⴷ ⵉⵙⵖⵍⴼ ⵓⵙⵇⵇⵉⵎ ⴰⵙⵙⵉⴷⴼ ⵏ ⵉⵙⵏⴼⵍⵏ ⵏ ⵜⵓⵙⵙⵔⴰ ⵏ ⵇⴰⵃ ⵉⴹⵕⵉⵚⵏ ⵉⵎⵙⵏⵓⵃⵢⵓⵜⵏ ⴳ ⵢⴰⵎⵓ ⴰⵡⴷ ⵓⵙⵏⵓⵃⵢⵓ ⵏⵏⵉ ⵉⵜⵜⵟⵟⴰⵚⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ". ⵜⵙⵙⵎⵜⵔ ⵎⴰⵙ ⴰⵎⵓⵏⵜ ⵜⵎⵜⵜⴰⵡⵉⵏ 23 ⴷ 198 ⵏ ⵓⵙⵍⴳⵏ ⵏ ⵜⵡⵊⴰ ⴳ ⵜⵣⵡⵉⵔⵉ ⵏ ⵉⵣⴰⴽⴰⵏ ⵓⵣⵔⵉⴼⵏ ⵏⵏⵉ ⵓⵔ ⵉⵜⵜⴰⴷⵊⴰⵏ ⵓⴳⴳⵉⴷ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⴰⴷ ⵉⴼⵊⵊⵉⵊ ⵙ ⵉⵣⵔⴼⴰⵏ ⵏⵏⵙ ⵙ ⵜⵡⵉⵍⴰ ⵉⵙⵎⴷⵏ ⵉⴷⴷⵖ ⵓⵔ ⴰⵙ ⵜⵜⵓⴳⴰ ⵜⵓⵙⵏⵜ ⵉ ⵓⵏⵣⴳⴳⵉ ⵓⵍⴳⵉⵏ ⵉ ⵎⴰⴷ ⵉⵜⵜⴳⴳⴰ ⵏ ⵜⵎⵙⴽⵔⵉⵏ ⴷ ⵜⵡⵓⵔⵉⵡⵉⵏ ⴷ ⵜⵙⵉⵎⴰⵏⵜ ⵖ ⵉⴳⵉ ⵏ ⵜⵖⵜⴰⵙⵉⵏ ⵙ ⵓⵎⵙⴰⵙⴰ ⴷ ⵜⵉⵔⴰⵜ ⵏⵏⵙ ⵜⴰⵎⵛⵉⵅⵜ ⵉⴼⴰⵡⵏ. ⵙⴳ ⵜⵙⴳⴰ ⵏⵏⵙ, ⵜⵙⴷⴷⵉⴷ ⵜⵎⴰⵡⵙⴰⵙⵜ ⵏ ⵜⴱⴷⴰⴷⵜ ⴷ ⵓⵙⵉⴷⴼ ⴰⵏⴰⵎⵓⵏ ⴷ ⵜⵡⵊⴰ, ⵎⴰⵙⵙⴰ ⵄⴰⵡⴰⴹⵉⴼ ⵃⵢⵢⴰⵕ, "ⵎⴰⵙ ⵉⴳⴰ ⵢⵉⴳⵔ ⵏ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵉⵙⵎⵉⵍⵏ ⴽⵓⴽⴹⵉⵏ ⵙ ⵓⵎⴰⵜⴰ, ⴷ ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⵙ ⵓⵥⵍⴰⵢ, ⵉⵙⵖⴰⵡⵙⴰ ⵙ ⵓⵙⴳⵓⴷⵉⵢ ⵏ ⵜⵓⴳⴳⴰⵣ ⴷ ⵓⵙⵎⵙⵉ ⵏ ⵜⵎⴷⵔⴰⵡⵜ ⴰⴽⴷ ⵉⵎⴳⴳⴰⵢⵏ ⵉⴷⵙⵍⴰⵏⵏ ⴰⵎⵓⵏⵉⵏ ⴳ ⵢⵉⴳⵔ ⵏ ⵓⵙⴷⵓⵙ ⴷ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵃⵎⴰ ⴰⴷ ⵜⴱⵓⵖⵍⵓ ⵜⵣⵉⴳⵣⵜ ⵙ ⵜⵖⴷⵎⵜ ⵜⴰⵏⴰⵎⵓⵏⵜ ⴷ ⵜⵏⵊⵎⵓⵜ ⵉⵜⵜⵓⵙⵙⵓⵜⵔⵏ",ⵜⵙⵉⵙⴼⵉⵡ ⴳ ⵓⵎⵏⴰⴹ ⴰⴷ, ⴰⴷⴷⵓⵔ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⴷⵉⵏⴰⵎⵉⵜ ⴰⴷ, "ⵉⴷⴷⵖ ⵉⴳⴰ ⴰⵎⴳⴳⴰⵢ ⴰⵎⵣⵡⴰⵔ ⴳ ⵓⴱⵔⵉⴷ ⵏ ⵓⵙⴷⵓⵙ ⵏ ⵓⵏⴰⴳⵔⴰⵡ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⴼⵔⴰⴳ ⵏⵏⵙⵏ ⴷ ⵜⵏⴽⵔⴰ ⵙⵉⵔⵙⵏ, ⴷ ⵅⴼ ⵜⵉⴽⴽⵉⵜⵉⵏ ⴷ ⵜⵥⵍⴰⵢⵉⵏ ⵜⵉⴽⵙⵡⴰⵜⵉⵏ ⵏⵏⵉ ⴰⵙ ⵉⵜⵜⵡⴰⴼⴽⴰⵏ ⴳ ⴽⵓ ⵎⴰⴷ ⵉⵣⴷⵉⵏ ⵙ ⵓⵙⵓⵔⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ...".

ⵉ ⵓⵙⴽⵜⵉ, ⵜⴳⴰ ⵜⵉⵏⴰⵡⵜ ⴰⴷ, ⵏⵏⵉ ⴳ ⴷⵔⵓⵏⵜ ⴳ ⵜⵡⵓⵔⵉⵡⵉⵏ ⵏⵏⵙ ⵜⵣⵓⵏⴰ ⵜⵉⵎⴰⵡⵙⴰⵙⵉⵏ ⴷ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ ⴷ ⵜⵎⴰⴷⴷⴰⵙⵉⵏ ⵏ ⵡⴰⵎⵓⵏ ⵓⵖⵔⵉⵎ ⴷ ⵉⵎⵓⵣⴰⵢⵏ, ⴰⵣⵎⵣ ⵉ ⵓⵎⴷⵉⵡⵍ ⵅⴼ ⵜⵎⴰⵎⴽⵉⵏ ⵏ ⵓⵙⴱⵓⵖⵍⵓ ⵏ ⵓⵣⵣⵔⴰⴼ ⴰⵏⴰⵎⵓⵔ, ⵍⵓⵎⵎⵏ ⴳ ⵓⵙⴰⵜⵉ ⵏ ⵜⴰⵎⵓⵏⵜ ⴰⴽⴷ ⵓⵙⴰⵡⵔ ⵏ ⵓⴼⵔⴰⴳ ⴰⵏⴰⵎⵓⵏ, ⴷ ⵓⵙⵖⵓⴷⵓ ⵏ ⵜⵓⵎⴰⵢⵉⵏ ⵏ ⵓⵙⵍⴳⵏ ⵏ ⵜⵡⵊⴰ ⴷ ⵓⵙⵖⵓⵙ ⵏⵏⵙ ⵙⴳ ⵉⵔⵎⴰⵏ ⴷ ⵉⵔⵎⵎⵓⵙⵏ ⵏⵏⵉ ⵉⵙⴷⵓⵙⵏ ⴰⵙⵏⵓⵃⵢⵓ ⵅⴼ ⵓⵎⵎⵓⵄⴹⵕ, ⴷ ⵓⴳⴳⴰⵔ. ⴳ ⵜⴰⵎⴰ ⵏ ⵜⵉⵏⴰⵡⵜ ⴰⴷ ⵜⴰⵏⴰⵎⵓⵔⵜ, ⵜⴻⵜⵜⵓⵙⵙⴳⵎⴹ ⵜⵎⵢⴰⵇⵇⴰⵏⵜ ⵏ ⵜⵎⴷⵔⴰⵡⵜ ⵉⵏⴳⵔ ⵓⵙⵇⵇⵉⵎ ⴷ ⵜⵎⴰⵡⴰⵙⵜ ⵜⴰⵏⵖⵍⵉⴼⵜ ⵅⴼ ⵢⵉⴳⵔⴰⵏ ⵏ ⵓⴼⵔⴰⴳ ⵓⵍⴳⵉⵏ ⴷ ⵓⵙⴼⵔⴽ ⴷ ⵓⵙⵎⵓⵜⵜⴳ ⴷ ⵡⴰⵏⵏⴰⵍ ⴷ ⵓⴼⵔⴰⴳ ⵏ ⵉⵙⵎⵉⵍⵏ ⴽⵓⴽⴹⵏⵉⵏ, ⴰⵎ ⴰⴼⵔⴰⴳ ⵏ ⵉⵣⵔⴼⴰⵏ ⵏ ⵜⵡⵜⵎⵉⵏ ⴷ ⵜⵔⴱⴰⵜⵉⵏ ⴷ ⵓⵙⴷⵓⵙ ⵏ ⵜⵣⵎⵎⴰⵔ ⵏ ⵉⵎⵙⵜⴳⴳⴰⵔⵏ ⵏ ⵓⴳⵊⴷⵉ ⴰⵏⴰⵎⵓⵏ ⴳ ⵢⵉⴳⵔⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵎⵢⴰⵡⴰⵙ ⵉⵏⴳⵔ ⵉⵎⵉⵙ ⵓⵏⴱⵉⴹ ⴷ ⵉⵎⵉⵙ ⴰⵏⴰⵎⵓⵔ ⵉⵥⵍⵉⵏ ⵙ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ, ⴷ ⵓⴳⴳⴰⵔ.