ⵜⵙⵙⵏⴽⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵙ ⵜⵎⵍⴷⴰ ⵏ ⵓⵕⵥⵥⵓⵎ ⵏ ⵓⵙⴳⵔⴰⵡ ⴰⵏⴰⵎⵓⵔ ⵡⵉⵙ ⴽⵕⴰⴹ ⴷ ⵎⵔⴰⵡ ⵏ ⵓⵎⵎⵓⵄⴹⵕ, ⵢⴰⵜ ⵜⴽⵛⵛⵓⵎⵜ ⵢⵓⵙⵉⵏ ⵙ ⵓⵣⵡⵍ "ⴰⵙⴰⵜⵉ ⴰⵍⵓⴳⴰⵏ ⴰⴳⵔⴰⵖⵍⴰⵏ ⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⴷ ⵉⴹⵕⵉⵚⵏ ⵓⵍⴳⵉⵏⵏ ⵉⵏⴰⵎⵓⵔⵏ: ⴰⵙⴼⵙⵉ ⵏ ⵉⵎⵣⴰⵔⴰⵢⵏ ⴷ ⵉⵣⵎⴰⵣ ⵍⵍⴰⵏⵉⵏ", ⴰⵙⵙ ⵏ ⵓⵙⵉⵏⴰⵙ 29 ⵎⴰⵕⵚ 2022 ⴳ ⵡⴰⵎⵎⴰⵙ ⴰⵏⴰⵎⵓⵔ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⵏ ⵉⵎⵄⴹⴰⵕ. ⵉⵙⵡⵓⵜⵜⵙ ⵓⵙⴳⴰⵔⵡ, ⵏⵏⴰ ⵉⵙⵏⵎⴰⵍⴰ ⵡⴰⵎⵎⴰⵙ ⴰⵏⴰⵎⵓⵔ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⵏ ⵉⵎⵄⴹⴰⵕ, ⴷⴷⴰⵡ ⵉⵡⵉⵣ ⵢⴰⵜⵜⵓⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ, ⵙ ⵜⵎⴷⵔⴰⵡⵜ ⴰⴽⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵅⴼ ⵉⵎⵔⵙⵉ: "ⴰⵎⵎⵓⵄⴹⵕ ⴳ ⵍⵎⵖⵔⵉⴱ: ⵉⴹⵕⵉⵚⵏ ⵓⵍⴳⵉⵏⵏ ⴷ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ", ⴰⵙⵎⵓⵙⵙⵓ ⵏ ⵉⵎⴳⴳⴰⵢⵏ ⴳ ⵢⵉⴳⵔ ⵅⴼ ⵜⵓⴳⵜ ⵏ ⵜⵎⵙⴰⵔⵉⵏ ⵣⴷⵉⵏⵉⵏ ⵙ ⵉⴹⵕⵉⵚⵏ ⵓⵍⴳⵉⵏⵏ ⵉⵏⴰⵎⵓⵔⵏ ⴳ ⵢⵉⴳⵔ ⵏ ⵓⵎⵎⵓⵄⴹⵕ ⴷ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ. ⵜⵙⵙⴼⴰⵡ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵎⴰⵙ ⴷ ⵎⵇⵇⴰⵔ ⵉⵙⵖⵣⵏ ⵓⵏⴰⴳⵔⴰⵡ ⴰⴳⵔⴰⵖⵍⴰⵏ ⵜⴰⴳⵔⵓⵎⵎⴰ ⵏ ⵜⵎⵢⴰⵇⵇⴰⵏⵉⵏ ⵣⴷⵉⵏⵉⵏ ⵙ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵙⵖⴰⵡⵙⴰ ⵓⵙⵏⵜⵔ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⵙⴳ ⵓⵙⵏⵓⵃⵢⵓ ⴷ ⵓⵙⵙⵉⵏⴼ ⵙ "ⴰⵙⵎⵓⵙⵙⵓ ⴰⵖⵣⵓⵔⴰⵏ ⵅⴼ ⵢⵉⴼⵉ ⵏ ⵉⴼⵙⵙⴰⵢⵏ ⴷ ⵜⵎⵢⴰⴷⴰⵙⵉⵏ ⵣⵎⵔⵏⵉⵏ ⴰⴷ ⵙⴱⵉⴷⴷⵏⵜ ⴰⵙⵙⵉⵏⴼ ⴰⵏⴰⵎⵓⵏ", ⵜⴼⴰⵙⵔ ⵎⴰⵙ ⵜⴳⴰ ⵜⵙⵖⵣⵏⵜ ⵏ ⵜⵎⵢⴰⵇⵇⴰⵏⵜ ⵜⴰⴳⵔⴰⵖⵍⴰⵏⵜ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⵉⴷ ⴱⵓ ⵓⵎⵎⵓⵄⴹⵕ ⵜⵉⵣⵡⵉⵔⵉ ⵏ ⵓⵣⵣⵉⴳⵣ ⵏ ⵓⵙⵎⵓⵙⵙⵓ ⵏ ⵓⵙⵎⵀⵍ ⵏ ⵉⵙⴱⴷⴰⴷⵏ ⵏⵏⵙ, ⴷ ⵓⵏⵖⴰⵍ ⵏ ⵉⴳⵔⴰⵏ ⵏ ⵓⵙⵡⵓⵔⵉ, ⵜⵙⴷⴷⵉⴷ ⵎⴰⵙ ⴰⵖⵓⵍⵏⵜ ⴳⴰⵏⵜ ⵜⵎⵙⴰⵔⵉⵏ ⴰⴷ ⴰⵙⵖⴰⵍ ⵏ ⵓⴱⵓⵖⵍⵓ ⵏ ⵡⴰⵎⵓⵏⵏ ⴷ ⵓⵏⵏⵓⵕⵥⵎ ⵏⵏⵙⵏ. ⴳ ⵓⵎⵏⴰⴹ ⴰⴷ, ⵜⵔⵏⴰ ⵎⴰⵙ ⵢⵓⵡⵣ ⵓⵙⵇⵇⵉⵎ ⴳ ⵓⵣⴰⵣⵓ ⴰⵎⵣⵔⴰⵢ ⵏ ⵜⵣⵉⴳⵣⵜ ⵏ ⵉⵎⵙⴷⴷⵉ ⵏ ⵜⵖⵜⴰⵙⵜ ⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⵉⴷ ⴱⵓ ⵓⵎⵎⵓⵄⴹⵕ ⵅⴼ ⵡⵓⵔⴰⵔ ⵏ ⵜⵉⵍⴰⵍⵜ ⵏⵏⵙ ⵉⵙⵎⴷⵏ ⴷ ⵓⵎⴷⴰⵢ ⵏ ⵡⴰⴷⴷⴰⴷ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⴹⴼⴼⵓⵕ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴳ ⵢⵉⴳⵔ ⴷ ⵓⵎⴰⵜⵔ ⵏ ⵜⵙⴽⵯⴼⵍⵜ ⵏ ⵜⵓⵎⵙⵉⵙⵜ ⵏ ⵉⵣⵣⵔⴰⴼⵏ ⵉⵏⴰⵎⵓⵔⵏ ⴰⴽⴷ ⵜⵎⵔⵉⵙⵉⵏ ⵜⵉⴳⵔⴰⵖⵍⴰⵏⵉⵏ ⵏ ⵍⵎⵖⵔⵉⴱ ⴳ ⵢⵉⴳⵔ ⴰⴷ, ⴰⵢⵍⵍⵉ ⵉⵜⵜⵓⵙⴷⵓⵙⵏ ⵙ ⵓⵙⵔⵓⵙ ⵏ ⵉⵎⵉⵙ ⴰⵏⴰⵎⵓⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⴳ ⵛⵓⵜⴰⵏⴱⵉⵔ 2019. ⴳ ⵎⴰⴷ ⵉⵥⵍⵉⵏ ⵙ ⵜⵎⵢⴰⴳⴰⵏⵜ ⵏ ⵓⵙⵉⴷⴼ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⵙ ⵉⵣⵔⴼⴰⵏ ⵏⵏⵙⵏ ⵓⵖⵔⵉⵎⵏ ⴷ ⵉⵙⵔⵜⴰⵏⵏ ⴷ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⴷⵍⵙⴰⵏⵏ, ⵜⵙⵙⴼⴰⵡ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵉⵣⵎⵎⴻⵎ ⵓⵙⵇⵇⵉⵎ ⵉⵍⵉⵢ ⴳ ⵓⵙⵡⵉⵔ ⵏ ⵉⴹⵕⵉⵚⵏ ⵓⵍⴳⵉⵏⵏ ⵏ ⵓⴼⵊⵊⵉⵊ ⵙ ⵉⵣⵔⴼⴰⵏ ⴰⴷ, ⵎⴰⵙ ⵉⵣⵎⵎⴻⵎ ⴰⵡⴷ ⵉⵏⴰⵥⴰⵕⵏ ⵅⴼ ⵡⴰⵎⵎⴰⴽⵏ ⵏ ⵓⵙⵎⵀⵍ ⵏⵏⵙⵏ (ⴰⵎ ⴰⵣⵔⴼ ⴳ ⵓⵙⵍⵎⴷ, ⴰⵣⵔⴼ ⴳ ⵜⴷⵓⵙⵉ, ⴰⵣⵔⴼ ⴳ ⵜⵡⵓⵔⵉ...). ⵎⴽⴷⴰ ⵉⵣⵎⵎⴻⵎ ⵓⵙⵇⵇⵉⵎ ⵡⴰⵔ ⵜⵓⵎⵙⵉⵙⵜ ⵏ ⵜⴰⵣⵎⵔⵜ ⵜⵓⵍⴳⵉⵏⵜ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⴳ ⵍⵎⵖⵔⵉⴱ ⴰⴽⴷ ⵜⵎⵢⴰⵇⵇⴰⵏⵜ ⵜⴰⴳⵔⴰⵖⵍⴰⵏⵜ, ⴷ ⵓⵎⴰⵟⵍ ⵏⵏⴰ ⵉⵍⵍⴰⵏ ⴳ ⵓⴼⵓⵖ ⵏ ⵜⵓⴳⵜ ⵏ ⵉⴹⵕⵉⵚⵏ ⵉⵎⵙⵙⵓⴷⵙⵏ ⵣⴷⵉⵏⵉⵏ ⵙ ⵓⵙⵍⴳⵏ ⵏ ⵓⵙⴰⵜⵉ ⵣⴷⵉⵏⵉⵏ ⵙ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ. ⵜⵖⵔ ⵎⴰⵙⵙⴰ ⴱⵓⵄⵢⵢⴰⵛ ⵙ ⵜⵎⵍⴷⴰ ⴰⴷ ⵙ ⵓⵣⵣⵔⴰⵢ ⵅⴼ ⵉⵙⵍⴳⵏⵏ ⴷ ⵉⵣⵣⵔⴰⴼⵏ ⵉⵏⴰⵎⵓⵔⵏ ⵣⴷⵉⵏⵉⵏ ⵙ ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ, ⵃⵎⴰ ⴰⴷ ⵜⵜⵓⵙⴷⵓⵙⵏⵜ ⵜⵏⴼⵔⵓⵜⵉⵏ ⵜⵓⵍⴳⵉⵏⵉⵏ ⴷ ⵜⵏⵣⵔⴰⴼⵉⵏ ⵣⵎⵔⵏⵉⵏ ⴰⴷ ⵜⵏ ⴼⵔⴳⵏⵜ, ⵙⵙⵓⴳⵔⵏⵜ ⴰⴼⵊⵊⵉⵊ ⵏⵏⵙⵏ ⵙⵔⵙⵏ ⵙ ⵜⴷⴰⵙⵉⵍⵜ ⵅⴼ ⵉⵙⴽⵉⵍ ⴷ ⵡⴰⵔ ⴰⵙⵏⵓⵃⵢⵓ. ⵙⴳ ⵜⵙⴳⴰ ⵏⵏⵙ, ⵉⵙⴷⴷⵉⴷ ⵎⴰⵙⵙ ⵅⴰⵍⵉⴷ ⴱⵏⵃⵙⵏ, ⴰⵏⵎⵀⴰⵍ ⵏ ⵡⴰⵎⵎⴰⵙ ⴰⵏⴰⵎⵓⵔ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⵏ ⵉⵎⵄⴹⴰⵕ, ⵎⴰⵙ ⴷ ⵎⵇⵇⴰⵔ ⵜⵜⵓⴳⴰⵏⵜ ⵜⵓⴳⴳⴰⵙ, ⵉⵍⵉⵏ ⴷⴰⵔ ⵍⵎⵖⵔⵉⴱ ⴽⵉⴳⴰⵏ ⵏ ⵉⴹⵕⵉⵚⵏ ⵓⵍⴳⵉⵏⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ "ⵜⵙⵓⵍ ⵜⵣⵎⵔⵜ ⵏ ⵓⵙⵉⴷⴼ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⵖⵔ ⵜⵏⵓⴼⴰ ⴷ ⵉⵣⵔⴼⴰⵏ ⵉⴷⵙⵍⴰⵏⵏ ⵜⵙⵙⵏ ⴽⵉⴳⴰⵏ ⵏ ⵉⵣⴰⴽⴰⵏ ⴷ ⵜⴱⴱⴰⵢⴹⴰⵕⵉⵏ, ⴷ ⵓⵖⵓⵍⵏ ⴳ ⴽⵔⴰ ⵏ ⵜⵉⴽⴽⴰⵍ, ⵏ ⵎⴰⴷ ⵉⵜⵜⵡⴰⵍⴽⴰⵎⵏ ⵙⴳ ⵉⵙⵓⵖⴰⴷ ⵏ ⵓⵙⵙⵉⴷⴼ ⴳ ⵜⵏⴰⴱⴱⴰⵢⵜ ⵏ ⵉⵎⴰⵙⵙⵏ ⵏ ⵓⴼⵔⴰⴳ ⴷ ⵜⵏⴼⵔⵓⵜⵉⵏ ⵏ ⵓⵙⵎⵀⵍ". ⵔⴰⴷ ⵙⵡⵓⵔⵉⵏ ⵉⵎⴷⵔⴰⵡⵏ ⴳ ⵓⵙⴳⵔⴰⵡ ⴰⴷ ⵅⴼ ⵓⵎⴹⴰⴽⴰⵕ ⵏ ⵜⵙⴳⴳⵯⵉⵏ ⵜⵉⵣⵔⴼⴰⵏⵉⵏ ⴷ ⵜⵓⵍⴳⵉⵏⵉⵏ ⵣⵎⵔⵏⵉⵏ ⴰⴷ ⵙⴷⵓⵙⵏⵜ ⴰⵙⵉⴷⴼ ⵙ ⵜⵏⵓⴼⴰ ⵜⵉⵎⵙⵏⵉⵊⵊⵉⵜⵉⵏ ⴷ ⵜⵏⴰⵎⵓⵏⵉⵏ ⴷ ⵜⵏⵢⵉⵎⴰⵏⵉⵏ ⵜⵉⵙⴳⵎⴰⵏⵉⵏ ⴷ ⵓⵙⵉⴷⴼ ⵙ ⵓⵙⵍⵎⴷ ⴰⵎⴰⵜⵓ ⴷ ⵜⵡⵓⵔⵉ ⵉ ⵓⴳⴳⵉⴷⵏ ⵉⴷ ⴱⵓ ⵓⵎⵎⵓⵄⴹⵕ, ⵎⴽⴷⴰ ⵔⴰⴷ ⵉⵙⵡⵓⵔⵉ ⵅⴼ ⵓⵙⵙⵉⵍⵉⵢ ⵏ ⵉⵙⵖⵍⴰⴼ ⴷ ⵜⵙⵓⵎⴰⵔ ⵉ ⵜⵓⴳⵜ ⵏ ⵉⵎⴳⴳⴰⵢⵏ ⵅⴼ ⵉⵎⵔⵙⵉ, ⵎⴰⵢⴰ ⵏⵏ ⵙ ⵓⵙⵏⵎⴰⵍⴰ ⵏ ⵜⵉⵏⴰⵡⵉⵏ ⴷ ⵜⵙⵓⵡⴰⵔ ⵏ ⵜⵡⵓⵔⵉ ⵜⵉⵙⴳⵓⵎⴰⵏⵉⵏ ⵉⵙⵡⵓⵜⵜⵙⵏ ⴰⵎⵔⴰⵔⴰ ⵏ ⵜⵉⵔⵎⵉⵜⵉⵏ ⵎⵓⵔⵙⵏⵉⵏ ⴳ ⵓⵙⵡⵉⵔ ⴰⵏⴰⵎⵓⵔ ⴷ ⵓⴳⵔⴰⵖⵍⴰⵏ. ⵉⴼⵓⴽ ⴰⴷ ⵏⵙⵙⴽⵜⵉ ⵎⴰⵙ ⴷ ⵉⴷⴷⴰ ⵓⵙⴳⵔⴰⵡ ⴰⴷ, ⵉⵜⵜⵓⵙⵏⵎⴰⵍⴰⵏ ⵙⴳ 28 ⴰⵔ 31 ⵎⴰⵕⵚ 2022, ⵙ ⵓⵙⵓⵍⴼ ⵏ ⵓⵙⴼⵓⴳⵍⵓ ⵏ ⵡⴰⵙⵙ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ, ⵉⵜⵜⵡⴰⵙⵙⵏ ⵙ ⵜⴷⵔⴰⵡⵜ ⵏ ⵜⵓⴳⵜ ⵏ ⵜⵣⵓⵏⴰ ⵜⵓⵏⴱⵉⴹⵉⵏ, ⵜⵉⵎⵔⵙⴰⵍ ⵜⵉⵎⵙⴷⴰⵡⵉⵏ ⵜⵉⵏⴰⵎⵓⵔⵉⵏ ⴷ ⵜⴳⵔⴰⵖⵍⴰⵏⵉⵏ, ⴰⵎⵓⵏ ⵓⵖⵔⵉⵎ ⴷ ⵜⴳⵔⴰⵡⵉⵏ ⵜⵉⵎⵓⵔⴰⵏⵉⵏ ⴷ ⵜⵎⴰⴷⴷⴰⵙⵉⵏ ⵜⵉⴳⵔⴰⵖⵍⴰⵏⵉⵏ.