ⵅⴼ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ


ⵉⴳⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵢⴰⵜ ⵜⵎⵔⵙⵍⵜ ⵜⴰⵏⴰⵎⵓⵔⵜ ⵜⴰⵏⵎⴰⴳⵓⵜⵜ ⴷ ⵜⵙⵉⵎⴰⵏⵜ, ⵜⴻⵜⵜⵡⴰⵙⵔⴰⵙ ⴳ ⵎⴰⵕⵚ 2011 (ⴳ ⵓⴷⵖⴰⵔ ⵏ ⵓⵙⵇⵇⵉⵎ ⴰⵎⵙⵏⵎⴰⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏⵏⵉ ⵉⵜⵜⵡⴰⵙⵔⴰⵙⵏ ⴳ 1990).
ⵍⴰ ⵏⵏ ⵜⴻⵜⵜⵡⴰⵍⴰ ⴰⵣⵣⵔⴰⵢ ⵏ ⵜⵎⵙⴰⵔⵉⵏ ⴰⴽⴽⵯ ⵥⵍⵉⵏⵉⵏ ⵙ ⵓⵎⵣⴰⵖ ⴷ ⵡⴰⵔⴰⵢ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴷⵔⴼⵉⵏ, ⴷ ⵜⵏⴼⵔⵓⵜ ⵏ ⵓⵙⵎⵔⵙ ⵏⵏⵙⵏ ⵉⵙⵎⴷⵏ, ⴷ ⵜⵏⴽⵔⴰ ⵙⵔⵙⵏ ⴷ ⵓⴼⵔⴰⴳ ⵏ ⵓⴱⵓⵔⵣ ⴷ ⵉⵣⵔⴼⴰⵏ ⴷ ⵜⴷⵔⴼⵉⵏ ⵏ ⵜⵏⵎⵓⵔⵉⵢⵉⵏ ⴷ ⵉⵏⵎⵓⵔⴰⵏ, ⵓⴳⴳⵉⴷⵏ ⵓⵍⴰ ⵜⵉⴳⵔⵓⵎⵎⴰⵡⵉⵏ, ⵎⴰⵢⴰⵏⵏ ⴷⴷⵓ ⵏ ⵓⵎⴰⵍⵓ ⵏ ⵢⵉⵔⵉ ⵉⵙⵎⴷⵏ ⵏ ⵓⵣⵔⴰⴽ ⵏ ⵜⵙⴰⵖⵓⵍⵉⵏ ⵜⵉⵏⴰⵎⵓⵔⵉⵏ ⴷ ⵜⵖⵣⵓⵔⴰⵏⵉⵏ ⴳ ⵓⴱⴰⵔⴰⵣ ⴰⴷ.
ⴰⴼⴰⴷ ⴰⴷ ⵢⵉⵍⵉ ⵓⵙⵎⵀⵍ ⵏ ⵜⵓⵎⴰⵢⵜ ⵏ ⵓⴷⵓⵙⵜⵓⵔ ⵏ 2011 ⵏⵏⴰ ⴷ ⴷⴰⵔ ⴰⵣⴷⴰⵢ, ⴷ ⵙ ⵓⵣⵣⴳⵉⵔ ⵏ ⵜⵎⵔⵉⵙⵉⵏ ⵜⵉⴳⵔⴰⵖⵍⴰⵏⵉⵏ ⵏ ⵜⵎⴰⵣⵉⵔⵜ ⵏⵏⵖ ⵙ ⵓⵣⵣⴳⵉⵔ ⵏ ⵜⵎⵢⴰⵇⵇⴰⵏⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙⵍⴰⵡⴰⵏ, ⴰⴽⴽⵯ ⵎⴰⴷ ⵉⵣⴷⵉⵏ ⴷ  ⵉⵎⴰⵙⵙⵏ ⵏ ⵓⵙⵎⴰⵎⵎⵉ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵜⵜⵓⵙⵖⵣⵏ, ⴳ ⵓⵙⴳⴳⵯⴰⵙ ⵏ 2018, ⵓⵙⵍⴳⵏ 76-15, ⵉⵣⴷⵉⵏ ⵙ ⵡⴰⵍⴰⵙ ⵏ ⵓⵙⵏⵎⴰⵍⴰ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⴰ ⵉⴱⴷⵔⵏ ⴰⵙⵓⵔⵙ ⴰⴷⵙⵜⴰⵔ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵍⵍⵉⵖ ⵜ ⵉⵙⵏⵓⵎⵎⵍ ⵙ ⵓⵏⴳⵎⴰⵎ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵔⵙⵏ, ⴷ ⵓⵍⴰ ⵉⵎⵏⵣⴰⵢⵏ ⵏ ⴱⴰⵔⵉⵙ ⵉⵏⴱⴹⵏ ⵜⴰⵡⵓⵔⵉ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⵏⵣⴰⵢⵏ ⵏ ⴱⵉⵍⴳⵔⴰⴷ ⵅⴼ ⵉⵎⵢⴰⵙⵙⴰⵜⵏ ⵏⴳⵔ ⵉⴱⵕⵍⴰⵎⴰⵏⵏ ⴷ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ.
ⴳ ⵓⵙⴰⵜⵉ ⴰⴷ, ⴷ ⴳ ⵓⵙⴰⵜⵉ ⵏ ⵓⵙⵉⵔⵉⵡ ⵏ ⵜⵙⵎⵉⴳⴰⵍ ⵏⵏⵙ ⵉⵣⴷⵉⵏ ⵙ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵜⵜⵡⴰⵙⵔⴰⵙ ⵖ ⴷⴰⵔ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴷ ⵉⵎⵉⵙ ⴰⵏⴰⵎⵓⵔ ⵏ ⵓⵙⵎⴰⵎⵎⵉ ⵉⵥⵍⵉⵏ ⵙ ⵡⴰⵣⵣⴰⵏⵏ ⵓⵏⴳⵉⵙⵏ ⵏ ⵜⵕⵥⵉⵢⵉⵏ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⴷ ⵉⵎⵉⵙ ⴰⵏⴰⵎⵓⵔ ⵉⵥⵍⵉⵏ ⵙ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⴷ 12 ⵏ ⵜⵙⵇⵇⵉⵎⵉⵏ ⵜⵉⵏⵎⵏⴰⴹⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵍⵍⵉ ⴰⵙ ⵉⵜⵜⴰⵡⵙⵏ ⴳ ⵜⵎⵙⴽⵔⵜ ⵏ ⵜⵙⵎⵉⴳⴰⵍ ⵏⵏⵙ ⴳ ⵓⵙⵡⵉⵔ ⴰⵏⵎⵏⴰⴹ.
ⵉⵏⵏⵖⵍⴼ ⵓⵙⵇⵇⵉⵎ ⵙ ⵓⵙⵎⵏⵉⴷ ⵏ ⵓⵙⵎⵉⴳⵍ ⴷ ⵓⵎⵛⴰⵡⴰⵕ ⴷ ⵜⵙⵓⵎⵔⵉⵏ ⵉ ⵜⵏⴱⴰⴹⵜ ⴷ ⵓⴱⵕⵍⴰⵎⴰⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⴷ ⵙ ⵜⵓⵚⴽⴰ ⵅⴼ ⵜⵓⵜⵜⵔⴰ ⵏⵉⵖ ⵙ ⵜⵙⵏⵜⴰⵢⵜ ⵏⵏⵙ, ⴰⵔ ⵉⵜⵜⵍⴰⵖⴰ  ⵓⵙⵇⵇⵉⵎ ⵉⵎⵏⵉⴷⵏ ⵏⵏⵙ ⵙ ⵓⵙⵎⵏⵉⴷ ⵏ ⵉⵎⵏⴰⴷⵏ ⵏⵏⵙ ⴷ ⵜⵎⵙⵙⴽⵜⵉⵜⵉⵏ ⴷ ⵜⴰⵏⴰⴹⵉⵏ ⴷ ⵜⵖⵓⵔⵉⵡⵉⵏ ⵣⴷⵉⵏⵉⵏ ⵙ ⵉⵙⵍⴳⵏⵏ ⵏⵉⵖ ⵉⵙⵏⴼⴰⵕⵏ ⵏ ⵓⵙⵍⴳⵏ ⵏⵉⵖ ⴽⵔⴰⵢⴳⴰⵜ ⵜⵎⵙⵍⴰⵢⵜ ⵢⴰⵎⵓⵏ ⴳ ⵓⵙⴰⵜⵉ ⵏ ⵜⵡⵓⵔⵉⵡⵉⵏ ⵏⵏⵙ.
 

ⴰⴳⴰⵎ ⵏ ⵓⵙⵍⴳⵏ ⵉⵣⴷⵉⵏ ⵙ ⵡⴰⵍⴰⵙ ⵏ ⵓⵙⵏⵎⴰⵍⴰ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ.

ⵉⵙⵔⵙ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵉⵙⵉⵣⵡⵉⵔⵏ ⵏⵏⵙ, ⴰⵎⵓⵏⵜ ⴳ ⵜⵡⵓⵔⵉⵡⵉⵏ ⵏⵏⵙ ⴳ ⵢⵉⴳⵔ ⴰⴷ :

  • ⴰⵎⴷⴰⵢ ⴷ ⵓⵎⴰⵜⵔ ⴷ ⵜⴹⴼⵕⵉ ⵏ ⵉⵙⵓⵔⵙⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⵡⵉⵔ ⴰⵏⴰⵎⵓⵔ ⴷ ⵓⵙⵡⵉⵔ ⴰⵏⵎⵏⴰⴹ ; 
  • ⵜⵉⵎⵙⴽⵔⵜ ⵏ ⵉⵔⵣⵣⵓⵜⵏ ⴷ ⵉⵙⴰⴳⴳⵯⵏ ⵉⵜⵜⵓⵙⵓⵖⵏ ⵉⵣⴷⵉⵏ ⴷ ⵜⵕⵥⵉⵢⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵉⴳⵉ ⵏ ⵜⴰⵏⴰⴹⵉⵏ ⴳ ⵍⵍⴰⵏ ⵉⵎⵙⴳⵔⴰ ⵏ ⵎⴰⴷ ⵉⵙⴽⵔ, ⴰⵔ ⵉⵜⵜⵡⴰⵍⴰ ⴰⵙⵡⴰⵍⴰ ⵏ ⵜⴰⵏⴰⴹⵉⵏ ⴰⴷ ⴷ ⵜⵖⵍⴰⴼ ⵏⵏⵙⵏⵜ ⵉ ⵉⵏⴳⵎⴰⵎⵏ ⵍⵍⵉ ⴳⴰⵏⵉⵏ ⵉⵎⵏⵜⴰⵢⵏ, ⵉⵙⵙⴰⵎⵓ ⴳⵉⵙⵏⵜ ⵉⵙⵖⵍⴰⴼ ⵏⵏⵙ. 
  • ⴰⵔ ⵉⵙⵔⴰⵙ ⵓⵙⵇⵇⵉⵎ ⵉⵥⵕⵉ ⵏⵏⵙ ⵅⴼ ⵎⴰⵕⵕⴰ ⴰⴷⴷⴰⴷⵏ ⵏ ⵜⵕⵥⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵜⴱⵔⵉⴷⵜ ⵜⴰⵡⵓⵔⵎⴰⵏⵜ ⵏⵖ ⵙ ⵜⵏⵓⵔⵣⵉⵜ ⵏ ⵡⵉⵍⵍⵉ ⴳⴰⵏⵉⵏ ⵉⵎⵏⵜⴰⵢⵏ, ⵏⵉⵖ ⵙ ⵜⵙⵏⵓⵔⴰⵢⵜ ⵏⵏⵙⵏ. ⵉⵖⵔ ⵜⵉⵏⵓⵔⵣⵉⵏ, ⵉⵙⵎⴽⵍ ⵜⵏⵜ, ⵉⴹⴼⵕ ⴰⵣⴰⵣⵓ ⵏⵏⵙⵏⵜ, ⵉⵙⵙⵉⵡⴹ ⵉ ⵡⵉⵍⵍⵉ ⴳⴰⵏⵉⵏ ⵉⵎⵏⵜⴰⵢⵏ ⵜⵓⵖⵓⵍⵜ ⵏⵏⵙⵏⵜ.
  • ⴰⵔⵣⴰⴼ ⵙ ⵉⴷⵖⴰⵔⵏ ⵏ ⵡⴰⵎⵎⴰⵥ ⴷ ⵜⵎⵔⵙⴰⵍ ⵜⵉⵎⵖⵣⵓⵜⵉⵏ, ⴷ ⵓⵎⴰⵜⵔ ⵏ ⵡⴰⴷⴷⴰⴷⵏ ⵏ ⵉⵏⴰⵎⵓⵥⵏ ⴷ ⵓⵎⵓⴳⴳⵓ ⵏⵏⵙⵏ ⴷ ⵓⵍⴰ ⴰⵎⵎⴰⵙⵏ ⵏ ⵓⴼⵔⴰⴳ ⵏ ⵜⵎⵥⵉ ⴷ ⵡⴰⵍⴰⵙ ⵏ ⵓⵙⵉⴷⴼ, ⴷ ⵜⵎⵔⵙⴰⵍ ⵏ ⵉⵡⵉⵣ ⴰⵏⴰⵎⵓⵏ, ⴷ ⵜⵎⵔⵙⴰⵍ ⵜⵉⵙⴳⵏⴰⴼⵉⵏ ⵉⵥⵍⵉⵏ ⵙ ⵓⵙⵓⵊⵊⵉ ⵏ ⵜⵎⵓⴹⴰⵏ ⵜⵉⵎⵏⵍⵍⵉⵢⵉⵏ ⴷ ⵜⵓⴽⵍⵉⵙⵉⵏ, ⴷ ⵉⴷⵖⴰⵔⵏ ⵏ ⵜⵓⴳⴳⵓⵥⵜ ⵏ ⵉⴱⵕⵕⴰⵏⵉⵢⵏ ⵍⵍⴰⵏⵉⵏ ⴳ ⵓⵙⵓⵔⵙ ⴰⵔⵓⵍⴳⵉⵏ.    
  • ⴰⴷⴰⴼ ⵙ ⵓⵎⵙⵜⵖⵢⴰ ⴽⵓⴷⵏⵏⴰ ⵜⵣⴷⵉ ⵜⵖⴰⵡⵙⴰ ⴷ ⴽⵔⴰ ⵏ ⵡⴰⵏⴰⵡ ⵙⴳ ⵡⴰⵏⴰⵡⵏ ⵏ ⵓⵎⵔⵡⵉ ⵏⵏⴰ ⵉⵣⵎⵔⵏ ⴰⴷ ⵢⴰⵡⴹ ⵜⵉⵕⵥⵉ ⵜⵓⴼⵔⵉⴷⵜ ⵏⵉⵖ ⵜⴰⵎⴳⵔⵓⵜ ⵏ ⴽⵔⴰ ⵏ ⵓⵣⵔⴼ ⵙⴳ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵉⴳⵉ ⵏ ⵇⴰⵃ ⵉⵎⴰⵙⵙⵏ ⵏ ⵜⵏⴳⵔⵜ ⴷ ⵓⵙⵙⵎⵙⴰⵙⴰ ⵏⵏⴰ ⵉⵏⵏⴰ ⵓⵙⴰⵏ ⴷ, ⵙ ⵓⵣⴷⴰⵢ ⴷ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵍⵍⵉ ⴳⴰⵏⵉⵏ ⵜⵉⵎⵏⵜⴰⵢⵉⵏ.
     

ⵜⴰⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ


ⵉⵏⵏⵖⵍⴼ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⴰⵜⵉ ⵏ ⵜⵡⵓⵔⵉⵡⵉⵏ ⵏⵏⵙ ⵉⵣⴷⵉⵏ ⵙ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ :

  • ⵜⵉⵖⵔⵉ ⵏ ⵜⴼⵙⵏⴰ ⵏ ⵜⵓⵎⵙⵉⵙⵜ ⵏ ⵉⴹⵕⵉⵚⵏ ⵓⵣⵔⵉⴼⵏ ⴷ ⵉⵎⵙⵙⵓⴷⵙⵏ ⵏⵏⴰ ⵙ ⵜⵍⵍⴰ ⵜⵡⵓⵔⵉ ⴷ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⵉⵣⴷⵉⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⵏⵏⴰ ⵜⵖⵜⵙ ⵜⴳⵍⴷⵉⵜ, ⵏⵉⵖ ⵡⵉⵏⵏⴰ ⴳ ⵜⴰⵎⵓ, ⴷ ⴳ ⵓⵙⵉⴷⴷ ⵏ ⵜⴰⵏⵏⴰⵢⵉⵏ ⵜⵉⵎⴳⴳⵓⵔⴰ ⴷ ⵜⵙⵎⵉⴳⴰⵍ ⵏⵏⴰ ⵙⵙⵉⴼⴹⵏ ⵉⵏⴳⵎⴰⵎⵏ ⵏ ⵜⵎⵜⵜⴰ ⵉⵎⵓⵏⵏ, ⵙⵍⴰⵡⴰⵏ ⴰⴽⴽⵯ ⵙⴳⵉⵙⵏⵜ ⵉⵎⴰⵙⵙⵏ ⵏ ⵜⵎⵢⴰⵇⵇⴰⵏⵉⵏ, ⴷ ⵜⵙⵎⵉⴳⴰⵍ ⵏⵏⴰ ⵜⵙⵢⵢⵉⵀ ⵜⴳⵍⴷⵉⵜ ⵏ ⵍⵎⵖⵔⵉⴱ.
  • ⴰⵙⵡⵓⵔⵉ ⵅⴼ ⵓⵙⵙⵔⵇⴱ ⵏ ⵓⴹⴼⴼⵓⵕ ⵏ ⵜⵖⵜⴰⵙⵜ ⵏ ⵜⴳⵍⴷⵉⵜ ⵏ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵜⵙⴳⴰⵡⴰⵏⵉⵏ ⵉⵣⴷⵉⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⵏⵉⵖ ⵜⵉⵏⵏⴰ ⴳ ⵜⴰⵎⵓ. ⵎⴽⴷⴰ ⵉⵜⵜⴰⵡⵙ, ⵙ ⵜⵓⵜⵜⵔⴰ ⵏ ⵜⵏⴱⴰⴹⵜ, ⴳ ⵓⵙⵎⵓⵜⵜⴳ ⵏ ⵜⵏⴰⴹⵉⵏ ⵏⵏⴰ ⵉⵙⵙⵉⵡⵉⴹ ⵉ ⵉⵏⴳⵎⴰⵎⵏ ⵏ ⵜⵎⵢⴰⵇⵇⴰⵏⵉⵏ ⴷ ⵜⵎⵔⵙⴰⵍ ⵜⵉⴳⵔⴰⵖⵍⴰⵏⵉⵏ ⴷ ⵜⵙⴳⴰⵡⴰⵏⵉⵏ ⵢⴰⴹⵏⵉⵏ ⵜⵜⵡⴰⵥⵍⴰⵢⵏⵉⵏ ⵙ ⵓⵎⵙⴰⵙⴰ ⴰⴽⴷ ⵜⵎⵔⵉⵙⵉⵏ ⵜⵉⴳⵔⴰⵖⵍⴰⵏⵉⵏ ⵏ ⵜⴳⵍⴷⵉⵜ ⴷ ⵉⵙⵖⵡⴰⵏ ⵏⵏⵙ.
  • ⴰⵙⵡⵓⵔⵉ ⵅⴼ ⵓⵙⵙⵔⵇⴱ ⵏ ⵎⴰⵕⵕⴰ ⵜⵣⵓⵏⴰ ⵜⵓⵏⴱⵉⴹⵉⵏ ⴷ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵏⵏⴰ ⴳⴰⵏⵉⵏ ⵜⵉⵎⵏⵜⴰⵢⵉⵏ ⵅⴼ ⵓⵣⵣⴳⵉⵔ ⵏ ⵜⴰⵏⵏⴰⵢⵉⵏ ⵜⵉⵎⴳⴳⵓⵔⴰ, ⴷ ⵜⵙⵎⵉⴳⴰⵍ ⵏⵏⴰ ⵙⵙⵉⴼⴹⵏ ⵉⵏⴳⵎⴰⵎⵏ ⵉⵣⴷⵉⵏ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⵙⵍⴰⵡⴰⵏ ⴰⴽⴽⵯ ⵙⴳⵉⵙⵏ ⵉⵏⴳⵎⴰⵎⵏ ⵏ ⵜⵎⵢⴰⵇⵇⴰⵏⵉⵏ ⵜⵜⵡⴰⴱⴷⴰⵔⵏⵉⵏ ⵢⴰⴷ.
  • ⴳ ⵓⵙⵓⵔⵙ ⴰⴳⵔⴰⵖⵍⴰⵏ, ⵢⵉⵡⵣ ⵓⵙⵇⵇⵉⵎ, ⴳ ⵓⵙⴰⵜⵉ ⵏ ⵜⵡⵓⵔⵉⵡⵉⵏ ⵏⵏⵙ, ⵅⴼ ⵓⵎⵢⴰⵡⴰⵙ ⴷ ⵜⵎⴷⵔⴰⵡⵜ ⴰⴽⴷ ⵓⵏⴰⴳⵔⴰⵡ ⵏ ⵜⵎⵜⵜⴰ ⵉⵎⵓⵏⵏ ⴷ ⵉⵏⴳⵎⴰⵎⵏ ⵏⵏⴰ ⴰⵙ ⵉⵏⴹⴼⵕⵏ, ⴷ ⵜⵎⴰⴷⴷⴰⵙⵉⵏ ⵜⵉⴳⵔⴰⵖⵍⴰⵏⵉⵏ ⵢⴰⴹⵏⵉⵏ ⴷ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵜⵉⴱⵕⵕⴰⵏⵉⵏ ⵉⵥⵍⵉⵏ ⵙ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵔⵙⵏ, ⴰⵔ ⵉⵙⵡⵓⵔⵉ ⵅⴼ ⵓⵙⴷⵓⵙ ⵏ ⵜⵉⵍⴰⵍⵜ ⵏ ⵜⴳⵍⴷⵉⵜ ⴳ ⵢⵉⴳⵔ ⴰⴷ ⴳ ⵓⵙⴰⵜⵉ ⴰⴳⵔⴰⵖⵍⴰⵏ.
  • ⴰⵔ ⵉⵜⵜⴳⴳⴰ ⵓⵙⵇⵇⵉⵎ ⵉⵏⵥⵉ ⴰⵙⵉⵎⴰⵏ ⴷ ⵓⵔⴰⵡⵙⴰⵏ ⵉ ⵉⵙⵜⴰⵢⵏ. ⵉⵜⵜⵓⵙⵎⴰⴳⵍ, ⴳ ⵓⵙⴰⵜⵉ ⵏ ⵉⴱⴹⵉⵢⵏ ⵏ ⵓⵙⵍⴳⵏ 30.11 ⵏⵏⴰ ⵉⵥⵍⵉⵏ ⵙ ⵜⴼⴰⴷⵉⵡⵉⵏ ⴷ ⵡⴰⵎⵎⴰⴽⵏ ⵏ ⵉⵏⵥⵉ ⴰⵙⵉⵎⴰⵏ ⴷ ⵓⵔⴰⵡⵙⴰⵏ ⵉ ⵡⴰⵙⵜⴰⵢⵏ, ⵙ ⵜⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵜⴰⵎⵥⵍⵉⵜ ⵏ ⵜⵙⵖⵣⵏⵜ ⵏ ⵉⵎⵏⵥⴰ ⵏ ⵉⵙⵜⴰⵢⵏ ⴷ ⵜⵎⵉⵔⵉⵜ ⵏⵏⵙ.   
  •  ⴰⵔ ⵉⵙⵙⵉⵡⵉⴹ ⵓⵙⵇⵇⵉⵎ ⵉ ⵓⵔⴰⵄⴰ ⵏ ⴱⴰⴱ ⵏ ⵡⴰⴷⴷⵓⵔ ⵏ ⵓⴳⵍⵍⵉⴷ ⵢⴰⵜ ⵜⴰⵏⴰⴹⵜ ⵜⴰⵙⴳⵯⵙⴰⵏⵜ ⵅⴼ ⵡⴰⴷⴷⴰⴷ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⴳⵍⴷⵉⵜ, ⵎⴽⴷⴰ ⴰⵙ ⵉⵙⵙⵉⵡⵉⴹ ⵖ ⵓⵣⵎⵣ ⵏ ⵓⵏⵎⵔⵉ, ⵜⴰⵏⴰⴹⵉⵏ ⵜⵉⵎⵥⵍⴰⵢⵉⵏ ⴷ ⵜⵙⴳⵓⵎⴰⵏⵉⵏ ⵅⴼ ⵇⴰⵃ ⵎⴰⴷ ⵉⵜⵜⴰⵡⵙⵏ ⴳ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵎⵣⴰⵖ ⴼⵍⵍⴰⵙⵏ ⵙ ⵜⴱⵔⵉⴷⵜ ⴷ ⵢⵓⵙⴰⵏ.  
     

ⴰⵔⴰⵢ ⵙⴳ ⵜⵕⵥⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ

  • ⵜⴻⵜⵜⵡⴰⵙⵙⵕⵚⵚⴰ ⵖ ⴷⴰⵔ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⴷⴷⵖ ⵉⵙⵎⵏⴰⵔ ⴱⴷⴷⴰ ⵙ ⵜⵏⵜⵜⴰⵎⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵜⵙⴰⵖⵓⵍⵉⵏ ⵜⵉⴷⵙⵜⴰⵔⵉⵏ ⵏⵏⵉ ⴷⴰⵔ ⴰⵣⴷⴰⵢ ⵙ ⵓⵙⵏⵜⵍ, ⵜⵓⵍⵍⵣⴰ ⵙ ⵡⴰⵙⵙⴰⵔ ⵙ ⵓⵙⴷⵓⵙ ⵏ ⵓⴼⵔⴰⴽ ⴰⵎⵣⵡⴰⵔ ⴰⵣⵔⴼⴰⵏ ⴷ ⵓⵏⵏⵓⵕⵥⵎ ⵅⴼ ⵇⴰⵃ ⵉⵎⴳⴳⴰⵢⵏ ⵉ ⵓⵙⴷⵓⵙ ⵏ ⵓⵔⵎⴰⵙ ⵉⵛⵛⴰⵔⵏ ⴷ ⵓⵎⵙⵜⴳⴳⴰⵔ ⵏ ⵉⵏⴰⵡⴰⵢⵏ ⵏⵏⵉ ⴷⴰⵔ ⴰⵣⴷⴰⵢ ⴷ ⵜⵏⴽⵔⴰ ⵙ ⵜⵎⵙⴽⵔⵉⵏ ⵜⵉⵎⵓⴼⴰⵢⵉⵏ ⵙ ⵎⴰⴷ ⵉⵕⵥⵥⵎⵏ ⵉⵎⵏⵉⴷⵏ ⵉⵎⴰⵢⵏⵓⵜⵏ ⵏ ⵓⵏⴱⴰⴹ ⵉⵖⵓⴷⴰⵏ, ⵉⵖ ⴳⴰⵏ ⴰⵡⴷ ⵜⴰⵏⴼⵔⵓⵜ.
  • ⵉⵙⵙⵏⵜⵉ ⵓⵙⵇⵇⵉⵎ ⵙⴳ ⵜⵣⵡⵉⵔⵉ ⵏ ⵜⵥⵍⴰⵢⵜ ⵏⵏⵙ ⵙⴳ ⵓⵙⴳⴳⵯⴰⵙ 2019, ⴰⵕⵥⵥⵓⵎ ⵏ ⵜⴷⵉⵏⴰⵎⵉⵜ ⵉⵜⵜⵓⵚⴽⴰⵏ ⵅⴼ ⵡⴰⵔⴰⵢ ⴷ ⵓⴼⵔⴰⴳ ⴷ ⵜⵏⴽⵔⴰ, ⴷ ⵢⵉⵡⵉⵣ ⵅⴼ ⴰⴷ ⵓⵙⵎⵓⵜⵜⴳ ⵏⵏⵙ ⵃⵎⴰ ⴰⴷ ⵜⵣⵎⵔ ⴰⴷ ⵜⵏⵎ ⴰⴽⴷ ⵜⵏⵥⴰⵕ ⴷ ⵓⴳⴳⴰⵏⵉⵏ, ⵉⴷⴷⵖ ⵖⵓⵔ ⴰⴼⵔⴰⴽ ⵉⵙⵎⴷⵏ ⵎⴰⵙ ⴷ ⴽⵔⴰⵢⴳⴰⵜ ⵜⴰⴷⵉⵏⴰⵎⵉⵜ, ⵎⵇⵇⴰⵔ ⵜⴼⴰⵡ ⵉⵙ ⵏⵉⵜ ⵜⵕⵡⴰ, ⵓⵔ ⵜⵣⵎⵔ ⴰⴷ ⵜⴰⵏⴼ ⵉ ⵓⵙⵖⵓⴷⵓ ⴷ ⵓⴼⵔⴰⴳ ⵎⴳⴰⵍ ⴽⵓ ⵎⴰ ⵔⴰⴷ ⵉⵜⵜⵙⴷⴷⵉⴷ ⵜⴰⵎⵢⴰⴳⴰⵏⵜ ⵏⵏⵙ.
  • ⵉⴳ ⵓⵙⵔⵓⵙ ⵏ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴳ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵢⴰⵜ ⵜⴷⴰⵙⵉⵍⵜ ⵜⴰⴷⵙⵍⴰⵏⵜ ⴳ ⵜⵓⴳⴳⴰⵣ ⵏ ⵓⵙⴷⵓⵙ ⵏ ⵜⵏⴼⵔⵓⵜⵉⵏ ⵏ ⵓⵔⵣⴰⴽ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵎⵀⵍ ⵏ ⵜⴽⴰⵕⴹⴰ ⵏ ⵓⴱⵔⵉⴷ ⵜⴰⵣⵔⴼⴰⵏⵜ ⵏⵏⵉ ⵉⵙⵙⵕⵚⴰ ⵓⴷⵓⵙⵜⵓⵔ ⵏ 2011, ⵉⴷⴷⵓ ⴷ ⵓⵙⵔⵓⵙ ⵏⵏⵙ ⵙ ⵓⵎⵙⴰⵙⴰ ⴰⴽⴷ ⵉⵥⵕⵉ, ⵉⴳⴰⵏ ⵜⴰⵢⴰⴼⵓⵜ ⵏ ⵉⵎⴹⴰⴽⴰⵕⵏ ⵉⵎⵏⴰⵡⴰⵢⵏ, ⵏⵔⴰ ⵙⴳⵉⵙ ⴰⴷ ⵏⵙⵙⵕⵚⴰ ⵜⵉⵔⵙⴰⵍ ⵉⴷⵓⵙⵏ ⵉ ⵢⵉⵎⵉⵙ ⵉⵕⵡⴰⵏ ⵉⵙⵉⵣⵡⵔⵏ ⵉⵜⵜⵡⴰⵥⵍⴰⵢⵏ ⵙ ⵉⴼⵙⵙⴰⵢⵏ ⵉⴽⵎⴰⵎⵏ ⴷ ⵜⵕⵡⵉ ⴷ ⵓⵎⵢⴰⵡⴰⵙ. 
  • ⵉⴼⴽⴰ ⵓⵙⵇⵇⵉⵎ ⵜⴰⵡⵉⵜ ⵉⵥⵍⵉⵏ ⵉ ⵓⵙⴷⴷⵉ ⵏ ⵓⵙⵔⵓⵙ ⵏ ⵓⵏⴰⴳⵔⴰⵡ ⵉⵙⵎⵓⵏⵏ ⵉⵏⴳⵔ ⵜⵉⴹⴰⴼ ⴷ ⵓⵏⵜⴰⵎ ⴷ ⵓⵙⴰⴳⴳⵯ ⴷ ⵓⵙⴰⴷⵎⵔ ⵙ ⵜⴰⵣⵣⴰⵣⵜ ⴷ ⵓⵣⵓⵣⵣⵔ ⵏ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵢⵉⵡⵉⵣ ⵅⴼ ⵓⵎⵢⴰⵖ ⴰⴽⴷ ⵉⵎⴰⵙⵙⵏ ⵏ ⵓⵏⴰⴳⵔⴰⵡ ⴰⴳⵔⴰⵖⵍⴰ, ⵖ ⵜⵍⵍⴰ ⴰⵡⴷ ⵜⵙⵇⵇⵉⵎⵜ ⵜⴰⵢⵢⴰⵡⵜ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ.
  • ⵙ ⵓⵙⵔⵓⵙ ⵅⴼ ⵉⵙⴳⵓⴷⵉⵢⵏ ⵏⵏⵉ ⵉⵜⵜⵓⵣⵎⵎⴰⵎⵏ, ⵉⵙⵡⵓⵔⵉ ⵓⵙⵇⵇⵉⵎ ⵅⴼ ⵅⴼ ⵜⴰⵡⵏⴰ ⵅⴼ ⵜⵙⵏⵜⴰⵢⵉⵏ ⵉⵏⴼⵔⵓⵏ ⴰⵙⵎⴰⴷ ⵉⵏⴳⵔ ⵡⴰⵔⴰⵢ ⵙⴳ ⵜⵕⵥⵉⵢⵉⵏ ⴷ ⵓⵙⴷⵓⵙ ⵏ ⵜⵎⵙⴽⵔⵜ ⵜⴰⵎⵙⵜⴳⴳⴰⵔⵜ, ⵉⵖ ⵉⵣⴷⵉ ⵓⵙⴽⴽⵉⵏ ⵙ ⵉⵏⵎⵓⵔⴰⵏ ⵡⴰⵍⴰ ⵜⵉⵏⴱⴰⴹⵉⵏ, ⵙ ⵜⵔⵏⴰⵡⵜ ⵏ ⵓⵙⴷⵓⵙ ⵏ ⵜⵎⵓⵣⴰⵢⵜ ⴷ ⵓⵎⵢⴰⵡⴰⵙ ⴰⴽⴷ ⵇⴰⵃ ⵉⴷ ⴱⴰⴱ ⵏ ⵜⵏⵓⴼⴰ.