ⵙ ⵓⵎⵙⴰⵙⴰ ⴷ ⵉⴱⴹⵉⵢⵏ ⵏ ⵓⵎⴰⴳⵔⴰⴷ 161 ⵏ ⵓⴷⵓⵙⵜⵓⵔ, ⵉⴳⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵢⴰⵜ ⵜⵎⵔⵙⵍⵜ ⵜⴰⵏⴰⵎⵓⵔⵜ ⵜⴰⵏⵎⴰⴳⵓⵜⵜ ⴷ ⵜⵙⵉⵎⴰⵏⵜ, ⵜⴻⵜⵜⵡⴰⵙⵔⴰⵙ ⴳ ⵎⴰⵕⵚ 2011 (ⴳ ⵓⴷⵖⴰⵔ ⵏ ⵓⵙⵇⵇⵉⵎ ⴰⵎⵙⵏⵎⴰⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏⵏⵉ ⵉⵜⵜⵡⴰⵙⵔⴰⵙⵏ ⴳ 1990). ⵍⴰ ⵏⵏ ⵜⴻⵜⵜⵡⴰⵍⴰ ⴰⵣⵣⵔⴰⵢ ⵏ ⵜⵎⵙⴰⵔⵉⵏ ⴰⴽⴽⵯ ⵥⵍⵉⵏⵉⵏ ⵙ ⵓⵎⵣⴰⵖ ⴷ ⵡⴰⵔⴰⵢ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴷⵔⴼⵉⵏ, ⴷ ⵜⵏⴼⵔⵓⵜ ⵏ ⵓⵙⵎⵔⵙ ⵏⵏⵙⵏ ⵉⵙⵎⴷⵏ, ⴷ ⵜⵏⴽⵔⴰ ⵙⵔⵙⵏ ⴷ ⵓⴼⵔⴰⴳ ⵏ ⵓⴱⵓⵔⵣ ⴷ ⵉⵣⵔⴼⴰⵏ ⴷ ⵜⴷⵔⴼⵉⵏ ⵏ ⵜⵏⵎⵓⵔⵉⵢⵉⵏ ⴷ ⵉⵏⵎⵓⵔⴰⵏ, ⵓⴳⴳⵉⴷⵏ ⵓⵍⴰ ⵜⵉⴳⵔⵓⵎⵎⴰⵡⵉⵏ, ⵎⴰⵢⴰⵏⵏ ⴷⴷⵓ ⵏ ⵓⵎⴰⵍⵓ ⵏ ⵢⵉⵔⵉ ⵉⵙⵎⴷⵏ ⵏ ⵓⵣⵔⴰⴽ ⵏ ⵜⵙⴰⵖⵓⵍⵉⵏ ⵜⵉⵏⴰⵎⵓⵔⵉⵏ ⴷ ⵜⵖⵣⵓⵔⴰⵏⵉⵏ ⴳ ⵓⴱⴰⵔⴰⵣ ⴰⴷ.
ⴰⴼⴰⴷ ⴰⴷ ⵢⵉⵍⵉ ⵓⵙⵎⵀⵍ ⵏ ⵜⵓⵎⴰⵢⵜ ⵏ ⵓⴷⵓⵙⵜⵓⵔ ⵏ 2011 ⵏⵏⴰ ⴷ ⴷⴰⵔ ⴰⵣⴷⴰⵢ, ⴷ ⵙ ⵓⵣⵣⴳⵉⵔ ⵏ ⵜⵎⵔⵉⵙⵉⵏ ⵜⵉⴳⵔⴰⵖⵍⴰⵏⵉⵏ ⵏ ⵜⵎⴰⵣⵉⵔⵜ ⵏⵏⵖ ⵙ ⵓⵣⵣⴳⵉⵔ ⵏ ⵜⵎⵢⴰⵇⵇⴰⵏⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙⵍⴰⵡⴰⵏ, ⴰⴽⴽⵯ ⵎⴰⴷ ⵉⵣⴷⵉⵏ ⴷ ⵉⵎⴰⵙⵙⵏ ⵏ ⵓⵙⵎⴰⵎⵎⵉ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵜⵜⵓⵙⵖⵣⵏ, ⴳ ⵓⵙⴳⴳⵯⴰⵙ ⵏ 2018, ⵓⵙⵍⴳⵏ 76-15, ⵉⵣⴷⵉⵏ ⵙ ⵡⴰⵍⴰⵙ ⵏ ⵓⵙⵏⵎⴰⵍⴰ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⴰ ⵉⴱⴷⵔⵏ ⴰⵙⵓⵔⵙ ⴰⴷⵙⵜⴰⵔ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵍⵍⵉⵖ ⵜ ⵉⵙⵏⵓⵎⵎⵍ ⵙ ⵓⵏⴳⵎⴰⵎ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵔⵙⵏ, ⴷ ⵓⵍⴰ ⵉⵎⵏⵣⴰⵢⵏ ⵏ ⴱⴰⵔⵉⵙ ⵉⵏⴱⴹⵏ ⵜⴰⵡⵓⵔⵉ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⵏⵣⴰⵢⵏ ⵏ ⴱⵉⵍⴳⵔⴰⴷ ⵅⴼ ⵉⵎⵢⴰⵙⵙⴰⵜⵏ ⵏⴳⵔ ⵉⴱⵕⵍⴰⵎⴰⵏⵏ ⴷ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ.
ⴳ ⵓⵙⴰⵜⵉ ⴰⴷ, ⴷ ⴳ ⵓⵙⴰⵜⵉ ⵏ ⵓⵙⵉⵔⵉⵡ ⵏ ⵜⵙⵎⵉⴳⴰⵍ ⵏⵏⵙ ⵉⵣⴷⵉⵏ ⵙ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵜⵜⵡⴰⵙⵔⴰⵙ ⵖ ⴷⴰⵔ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴷ ⵉⵎⵉⵙ ⴰⵏⴰⵎⵓⵔ ⵏ ⵓⵙⵎⴰⵎⵎⵉ ⵉⵥⵍⵉⵏ ⵙ ⵡⴰⵣⵣⴰⵏⵏ ⵓⵏⴳⵉⵙⵏ ⵏ ⵜⵕⵥⵉⵢⵉⵏ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ ⴷ ⵉⵎⵉⵙ ⴰⵏⴰⵎⵓⵔ ⵉⵥⵍⵉⵏ ⵙ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⴷ 12 ⵏ ⵜⵙⵇⵇⵉⵎⵉⵏ ⵜⵉⵏⵎⵏⴰⴹⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵍⵍⵉ ⴰⵙ ⵉⵜⵜⴰⵡⵙⵏ ⴳ ⵜⵎⵙⴽⵔⵜ ⵏ ⵜⵙⵎⵉⴳⴰⵍ ⵏⵏⵙ ⴳ ⵓⵙⵡⵉⵔ ⴰⵏⵎⵏⴰⴹ.
ⵉⵏⵏⵖⵍⴼ ⵓⵙⵇⵇⵉⵎ ⵙ ⵓⵙⵎⵏⵉⴷ ⵏ ⵓⵙⵎⵉⴳⵍ ⴷ ⵓⵎⵛⴰⵡⴰⵕ ⴷ ⵜⵙⵓⵎⵔⵉⵏ ⵉ ⵜⵏⴱⴰⴹⵜ ⴷ ⵓⴱⵕⵍⴰⵎⴰⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⴷ ⵙ ⵜⵓⵚⴽⴰ ⵅⴼ ⵜⵓⵜⵜⵔⴰ ⵏⵉⵖ ⵙ ⵜⵙⵏⵜⴰⵢⵜ ⵏⵏⵙ, ⴰⵔ ⵉⵜⵜⵍⴰⵖⴰ ⵓⵙⵇⵇⵉⵎ ⵉⵎⵏⵉⴷⵏ ⵏⵏⵙ ⵙ ⵓⵙⵎⵏⵉⴷ ⵏ ⵉⵎⵏⴰⴷⵏ ⵏⵏⵙ ⴷ ⵜⵎⵙⵙⴽⵜⵉⵜⵉⵏ ⴷ ⵜⴰⵏⴰⴹⵉⵏ ⴷ ⵜⵖⵓⵔⵉⵡⵉⵏ ⵣⴷⵉⵏⵉⵏ ⵙ ⵉⵙⵍⴳⵏⵏ ⵏⵉⵖ ⵉⵙⵏⴼⴰⵕⵏ ⵏ ⵓⵙⵍⴳⵏ ⵏⵉⵖ ⴽⵔⴰⵢⴳⴰⵜ ⵜⵎⵙⵍⴰⵢⵜ ⵢⴰⵎⵓⵏ ⴳ ⵓⵙⴰⵜⵉ ⵏ ⵜⵡⵓⵔⵉⵡⵉⵏ ⵏⵏⵙ.
ⵓⵔ ⵉⴳⵉ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⴳⵔⴰⵡ ⵓⵏⴱⴰⵉⴹ ⵡⴰⵍⴰ ⵜⴰⵎⴰⴷⴷⴰⵙⵜ ⵜⴰⵔⵓⵏⴱⵉⴹⵜ. ⵎⴰⵛ ⵉⴳⴰ ⵜⵉⵎⵔⵙⵍⵜ ⵜⴰⵏⴰⵎⵓⵔⵜ ⵜⴰⵏⵎⴰⴳⵓⵜ ⴷ ⵜⵙⵉⵎⴰⵏⵜ, ⵉⵎⵙⴰⵙⴰⵏ ⴷ ⵉⵎⵏⵣⴰⵢⵏ ⵏ ⴱⴰⵔⵉⵣ ⵏⵏⴰ ⵉⵙⵏⵎⴰⵍⴰⵏ ⵜⴰⵡⵓⵔⵉ ⵏ ⵜⵎⵔⵙⴰⵍⵉⵏ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵏⵏⴰ ⵉⵙⵏⵎⴰⵍⴰⵏ ⵜⴰⵖⴰⵔⴰⵙⵜ ⵏ ⵜⵡⵓⵔⵉ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ, ⴷ ⵡⴰⴷⴷⴰⴷ ⵏⵏⵙⵏⵜ ⴰⵣⵔⴼⴰⵏ, ⴷ ⵓⵙⵜⴰⵢ ⵏ ⵉⴳⵎⴰⵎⵏ ⵏⵏⵙⵏⵜ ⵙ ⵓⵎⵙⴰⵙⴰ ⴰⴽⴷ ⵉⵎⵏⵣⴰⵢⵏ ⵏⵏⴰ ⵢⴰⴽⴽⴰⵏ ⴰⴽⴽⵯ ⵜⵉⵏⴼⵔⵓⵜⵉⵏ ⵉⵅⵚⵚⴰⵏ ⴰⴼⴰⴷ ⴰⴷ ⵢⵉⵍⵉ ⵓⵙⵎⴷⵢⴰ ⴰⵎⵢⴰⵏⴰⵡ ⵏ ⵜⴳⴳⴰⵍⵉⵏ ⵜⵉⵏⴰⵎⵓⵏⵉⵏ ⵉⵜⵜⵓⵙⵎⵓⵏⵏ ⴳ ⵓⵙⴷⵓⵙ ⴷ ⵓⵃⵟⵟⵓ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵉⵎⵙⴰⵙⴰⵏ ⴰⴽⴷ ⵉⵎⵏⵣⴰⵢⵏ ⵏ ⴱⵉⵍⴳⵕⴰⴷ ⵅⴼ ⵓⵎⵢⴰⵙⵙⴰ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⴱⵕⵍⴰⵎⴰⵏⵏ
ⵉⵜⵜⵓⵙⴽⴰⵔ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵎⴰⵕⵚ 2011 ⴰⴼⴰⴷ ⴰⴷ ⵉⵙⵏⴼⵍ ⴰⵙⵇⵇⵉⵎ ⴰⵎⵙⵎⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏⵏⴰ ⵉⵜⵜⵓⵙⴽⴰⵔⵏ ⴳ 1990. ⵉⴳⴰ ⵓⵙⵏⴼⵍ ⴰⴷ ⵜⴰⵎⵀⵍⵜ ⵏ ⵓⵎⵓⴽⵏ ⴰⵏⵖⴱⵓ ⵡⵉⵙ ⵙⵉⵏ ⵏⵏⵉ ⵉⵙⵙⵏ ⵓⵙⴰⵜⵉ ⵓⵍⴳⵉⵏ ⵏ ⵜⵎⵔⵙⴰⵍⵜ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵍⵎⵖⵔⵉⴱ ⴷⴼⴼⵉⵔ ⵜⴰⵎⵀⵍⵜ ⵏ ⵓⵙⵏⵎⴰⵍⴰ ⵏⵏⵉ ⵉⵙⵙⵏ ⵓⵙⵇⵇⵉⵎ ⴳ ⵓⵙⴳⴳⵯⴰⵙ ⵏ 2002 ⴰⴼⴰⴷ ⴰⴷ ⵉⵎⵙⴰⵙⴰ ⴷ "ⵉⵎⵏⵣⴰⵢⵏ ⵏ ⴱⴰⵔⵉⵣ" ⵏⵏⴰ ⵉⵙⵏⵎⴰⵍⴰⵏ ⵜⵉⵎⵔⵙⴰⵍⵉⵏ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⴳ ⴱⵕⴰⵢⵕ 2018, ⵜⴻⵜⵜⵓⴳⴰ ⵉ ⵓⵙⵇⵇⵉⵎ ⵢⴰⵜ ⵜⵎⵀⵍⵜ ⵏ ⵡⴰⵍⴰⵙ ⵏ ⵓⵙⵏⵎⴰⵍⴰ ⵙ ⵓⵙⵙⵓⴼⵖ ⵏ ⵓⵙⵍⴳⵏ ⵓⵟⵟⵓⵏ 76.15. ⵢⵓⵔⴰⵔ ⵓⵙⵇⵇⵉⵎ ⴰⵎⵙⵎⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⵉⵍⴰⵍⵜ ⵜⴰⴷⵙⵍⴰⵏⵜ ⴳ ⵓⵙⴷⴷⵉ ⵏ ⵓⵎⵓⵜⵜⵉ ⴰⵙⵔⵜⴰⵏ ⴳ ⵍⵎⵖⵔⵉⴱ ⵙ ⵜⵡⵓⵔⵉ ⵜⴰⴽⵙⵡⴰⵜ ⵏⵏⵉ ⵉⴳⴰ, ⵙⵍⴰⵡⴰⵏ ⴰⴽⴽⵯ ⵎⴰⴷ ⵉⵥⵍⵉⵏ ⵙ ⵓⵙⵎⵍ ⵏ ⵉⵣⵔⵉ ⵏ ⵜⵕⵥⵉⵢⵉⵏ ⵀⵔⵛⵏⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ (ⴰⵙⵓⵔⴼ ⵉ ⵉⵎⵖⵣⵓⵜⵏ ⵉⵙⵔⵜⴰⵏⵏ, ⴰⵙⵔⵓⵙ ⵏ ⵓⵏⴳⵎⴰⵎ ⴰⵙⵉⵎⴰⵏ ⵏ ⵜⵏⴼⵔⵉⵜ ⵉ ⵡⴰⵔⵔⴰⵣ ⵏ ⵓⵏⴳⵉⵙⵏ ⵏ ⵓⵏⵖⵓⴱⵓ ⵓⵛⵛⵉⵍ ⴷ ⵢⵉⵎⵉⵥ ⵓⵛⵛⵉⵍ ⴷ ⵓⵙⵔⵓⵙ ⵏ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ ...). ⵉⴷⴷⵓ ⴷ ⵓⵙⵔⵓⵙ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵎⵏⴰⴹ ⵏ ⵓⵙⵏⴼⵍ ⴰⴷⵙⵜⵔ ⴳ ⵜⴳⵍⴷⵉⵜ ⴳ 2011, ⵉⴳ ⵙ ⵎⴰ ⵢⴰ ⵏⵏ ⵢⴰⵏ ⵉⵎⵉⵙ ⴰⵅⴰⵜⴰⵔ ⵉⵜⵜⴰⵡⵙⵏ ⴳ ⵓⵙⵎⵓⵜⵜⴳ ⵏ ⵜⵓⵚⴽⴰ ⵏ ⵜⴷⵉⵎⵓⵇⵕⴰⵟⵉⵜ, ⵙⵍⴰⵡⴰⵏ ⴰⴽⴽⵯ ⵙ ⵜⴰⵎⵓⵏⵜ ⴰⴽⴷ ⵉⵎⵓⴽⵏⵏ ⵓⵣⵔⵉⴼⵏ ⴷ ⵉⵎⵔⵙⵍⵏ, ⴷ ⵓⵙⴷⵓⵙ ⵏ ⵓⵎⵏⴰⴷ ⴰⵏⵎⵏⴰⴹ ⵙ ⵓⵙⵔⵓⵙ ⵏ ⵜⵙⵇⵇⵉⵎⵉⵏ ⵜⵉⵏⵎⵏⴰⴹⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵍⵍⵉ ⵢⵓⵎⴰⵏ 12 ⵏ ⵜⵎⵏⴰⴹⵜ ⴳ ⵜⴳⵍⴷⵉⵜ, ⴷ ⵓⵍⴰ ⴰⵙⴷⵓⵙ ⵏ ⵜⵉⵍⴰⵍⵜ ⵏⵏⵙ ⵏ ⵓⴼⵔⴰⴳ ⵙ ⵓⵙⵔⵓⵙ ⵏ ⴽⵕⴰⴹ ⵉⵎⴰⵙⵙⵏ ⵉⵏⴰⵎⵓⵔⵏ.
ⴱⴹⴰⵏⵜ ⵜⵡⵓⵔⵉⵡⵉⵏ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⴽⵕⴰⴹ ⵉⵙⴳⵓⵎⵏ ⵉⵎⵇⵔⴰⵏⵏ: "ⴰⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ" ⴷ "ⵜⴰⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ" ⴷ "ⵡⴰⵔⴰⵢ ⵙⴳ ⵜⵕⵥⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ".
ⵙⴳ ⵜⵙⵎⵉⴳⴰⵍ ⵏ ⵓⵙⵇⵇⵉⵎ ⴳ ⵢⵉⴳⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ:
- ⴰⵎⴷⴰⵢ ⴷ ⵓⵎⴰⵜⵔ ⴷ ⵜⴹⴼⵕⵉ ⵏ ⵉⵙⵓⵔⵙⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⵡⵉⵔ ⴰⵏⴰⵎⵓⵔ ⴷ ⵓⵙⵡⵉⵔ ⴰⵏⵎⵏⴰⴹ ;
- ⵜⵉⵎⵙⴽⵔⵜ ⵏ ⵉⵔⵣⵣⵓⵜⵏ ⴷ ⵉⵙⴰⴳⴳⵯⵏ ⵉⵜⵜⵓⵙⵓⵖⵏ ⵉⵣⴷⵉⵏ ⴷ ⵜⵕⵥⵉⵢⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵉⴳⵉ ⵏ ⵜⴰⵏⴰⴹⵉⵏ ⴳ ⵍⵍⴰⵏ ⵉⵎⵙⴳⵔⴰ ⵏ ⵎⴰⴷ ⵉⵙⴽⵔ, ⴰⵔ ⵉⵜⵜⵡⴰⵍⴰ ⴰⵙⵡⴰⵍⴰ ⵏ ⵜⴰⵏⴰⴹⵉⵏ ⴰⴷ ⴷ ⵜⵖⵍⴰⴼ ⵏⵏⵙⵏⵜ ⵉ ⵉⵏⴳⵎⴰⵎⵏ ⵍⵍⵉ ⴳⴰⵏⵉⵏ ⵉⵎⵏⵜⴰⵢⵏ, ⵉⵙⵙⴰⵎⵓ ⴳⵉⵙⵏⵜ ⵉⵙⵖⵍⴰⴼ ⵏⵏⵙ ;
- ⴰⵔ ⵉⵙⵔⴰⵙ ⵓⵙⵇⵇⵉⵎ ⵉⵥⵕⵉ ⵏⵏⵙ ⵅⴼ ⵎⴰⵕⵕⴰ ⴰⴷⴷⴰⴷⵏ ⵏ ⵜⵕⵥⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵜⴱⵔⵉⴷⵜ ⵜⴰⵡⵓⵔⵎⴰⵏⵜ ⵏⵖ ⵙ ⵜⵏⵓⵔⵣⵉⵜ ⵏ ⵡⵉⵍⵍⵉ ⴳⴰⵏⵉⵏ ⵉⵎⵏⵜⴰⵢⵏ, ⵏⵉⵖ ⵙ ⵜⵙⵏⵓⵔⴰⵢⵜ ⵏⵏⵙⵏ. ⵉⵖⵔ ⵜⵉⵏⵓⵔⵣⵉⵏ, ⵉⵙⵎⴽⵍ ⵜⵏⵜ, ⵉⴹⴼⵕ ⴰⵣⴰⵣⵓ ⵏⵏⵙⵏⵜ, ⵉⵙⵙⵉⵡⴹ ⵉ ⵡⵉⵍⵍⵉ ⴳⴰⵏⵉⵏ ⵉⵎⵏⵜⴰⵢⵏ ⵜⵓⵖⵓⵍⵜ ⵏⵏⵙⵏⵜ ;
- ⴰⵔⵣⴰⴼ ⵙ ⵉⴷⵖⴰⵔⵏ ⵏ ⵡⴰⵎⵎⴰⵥ ⴷ ⵜⵎⵔⵙⴰⵍ ⵜⵉⵎⵖⵣⵓⵜⵉⵏ, ⴷ ⵓⵎⴰⵜⵔ ⵏ ⵡⴰⴷⴷⴰⴷⵏ ⵏ ⵉⵏⴰⵎⵓⵥⵏ ⴷ ⵓⵎⵓⴳⴳⵓ ⵏⵏⵙⵏ ⴷ ⵓⵍⴰ ⴰⵎⵎⴰⵙⵏ ⵏ ⵓⴼⵔⴰⴳ ⵏ ⵜⵎⵥⵉ ⴷ ⵡⴰⵍⴰⵙ ⵏ ⵓⵙⵉⴷⴼ, ⴷ ⵜⵎⵔⵙⴰⵍ ⵏ ⵉⵡⵉⵣ ⴰⵏⴰⵎⵓⵏ, ⴷ ⵜⵎⵔⵙⴰⵍ ⵜⵉⵙⴳⵏⴰⴼⵉⵏ ⵉⵥⵍⵉⵏ ⵙ ⵓⵙⵓⵊⵊⵉ ⵏ ⵜⵎⵓⴹⴰⵏ ⵜⵉⵎⵏⵍⵍⵉⵢⵉⵏ ⴷ ⵜⵓⴽⵍⵉⵙⵉⵏ, ⴷ ⵉⴷⵖⴰⵔⵏ ⵏ ⵜⵓⴳⴳⵓⵥⵜ ⵏ ⵉⴱⵕⵕⴰⵏⵉⵢⵏ ⵍⵍⴰⵏⵉⵏ ⴳ ⵓⵙⵓⵔⵙ ⴰⵔⵓⵍⴳⵉⵏ ;
- ⴰⴷⴰⴼ ⵙ ⵓⵎⵙⵜⵖⵢⴰ ⴽⵓⴷⵏⵏⴰ ⵜⵣⴷⵉ ⵜⵖⴰⵡⵙⴰ ⴷ ⴽⵔⴰ ⵏ ⵡⴰⵏⴰⵡ ⵙⴳ ⵡⴰⵏⴰⵡⵏ ⵏ ⵓⵎⵔⵡⵉ ⵏⵏⴰ ⵉⵣⵎⵔⵏ ⴰⴷ ⵢⴰⵡⴹ ⵜⵉⵕⵥⵉ ⵜⵓⴼⵔⵉⴷⵜ ⵏⵉⵖ ⵜⴰⵎⴳⵔⵓⵜ ⵏ ⴽⵔⴰ ⵏ ⵓⵣⵔⴼ ⵙⴳ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵉⴳⵉ ⵏ ⵇⴰⵃ ⵉⵎⴰⵙⵙⵏ ⵏ ⵜⵏⴳⵔⵜ ⴷ ⵓⵙⵙⵎⵙⴰⵙⴰ ⵏⵏⴰ ⵉⵏⵏⴰ ⵓⵙⴰⵏ ⴷ, ⵙ ⵓⵣⴷⴰⵢ ⴷ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵍⵍⵉ ⴳⴰⵏⵉⵏ ⵜⵉⵎⵏⵜⴰⵢⵉⵏ.
ⵙⴳ ⵜⵙⵎⵉⴳⴰⵍ ⵏ ⵓⵙⵇⵇⵉⵎ ⴳ ⵢⵉⴳⵔ ⵏ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ: - ⵜⵉⵖⵔⵉ ⵏ ⵜⴼⵙⵏⴰ ⵏ ⵜⵓⵎⵙⵉⵙⵜ ⵏ ⵉⴹⵕⵉⵚⵏ ⵓⵣⵔⵉⴼⵏ ⴷ ⵉⵎⵙⵙⵓⴷⵙⵏ ⵏⵏⴰ ⵙ ⵜⵍⵍⴰ ⵜⵡⵓⵔⵉ ⴷ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⵉⵣⴷⵉⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⵏⵏⴰ ⵜⵖⵜⵙ ⵜⴳⵍⴷⵉⵜ, ⵏⵉⵖ ⵡⵉⵏⵏⴰ ⴳ ⵜⴰⵎⵓ, ⴷ ⴳ ⵓⵙⵉⴷⴷ ⵏ ⵜⴰⵏⵏⴰⵢⵉⵏ ⵜⵉⵎⴳⴳⵓⵔⴰ ⴷ ⵜⵙⵎⵉⴳⴰⵍ ⵏⵏⴰ ⵙⵙⵉⴼⴹⵏ ⵉⵏⴳⵎⴰⵎⵏ ⵏ ⵜⵎⵜⵜⴰ ⵉⵎⵓⵏⵏ, ⵙⵍⴰⵡⴰⵏ ⴰⴽⴽⵯ ⵙⴳⵉⵙⵏⵜ ⵉⵎⴰⵙⵙⵏ ⵏ ⵜⵎⵢⴰⵇⵇⴰⵏⵉⵏ, ⴷ ⵜⵙⵎⵉⴳⴰⵍ ⵏⵏⴰ ⵜⵙⵢⵢⵉⵀ ⵜⴳⵍⴷⵉⵜ ⵏ ⵍⵎⵖⵔⵉⴱ ;
- ⴰⵙⵡⵓⵔⵉ ⵅⴼ ⵓⵙⵙⵔⵇⴱ ⵏ ⵓⴹⴼⴼⵓⵕ ⵏ ⵜⵖⵜⴰⵙⵜ ⵏ ⵜⴳⵍⴷⵉⵜ ⵏ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵜⵙⴳⴰⵡⴰⵏⵉⵏ ⵉⵣⴷⵉⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⵏⵉⵖ ⵜⵉⵏⵏⴰ ⴳ ⵜⴰⵎⵓ. ⵎⴽⴷⴰ ⵉⵜⵜⴰⵡⵙ, ⵙ ⵜⵓⵜⵜⵔⴰ ⵏ ⵜⵏⴱⴰⴹⵜ, ⴳ ⵓⵙⵎⵓⵜⵜⴳ ⵏ ⵜⵏⴰⴹⵉⵏ ⵏⵏⴰ ⵉⵙⵙⵉⵡⵉⴹ ⵉ ⵉⵏⴳⵎⴰⵎⵏ ⵏ ⵜⵎⵢⴰⵇⵇⴰⵏⵉⵏ ⴷ ⵜⵎⵔⵙⴰⵍ ⵜⵉⴳⵔⴰⵖⵍⴰⵏⵉⵏ ⴷ ⵜⵙⴳⴰⵡⴰⵏⵉⵏ ⵢⴰⴹⵏⵉⵏ ⵜⵜⵡⴰⵥⵍⴰⵢⵏⵉⵏ ⵙ ⵓⵎⵙⴰⵙⴰ ⴰⴽⴷ ⵜⵎⵔⵉⵙⵉⵏ ⵜⵉⴳⵔⴰⵖⵍⴰⵏⵉⵏ ⵏ ⵜⴳⵍⴷⵉⵜ ⴷ ⵉⵙⵖⵡⴰⵏ ⵏⵏⵙ ;
- ⴰⵙⵡⵓⵔⵉ ⵅⴼ ⵓⵙⵙⵔⵇⴱ ⵏ ⵎⴰⵕⵕⴰ ⵜⵣⵓⵏⴰ ⵜⵓⵏⴱⵉⴹⵉⵏ ⴷ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵏⵏⴰ ⴳⴰⵏⵉⵏ ⵜⵉⵎⵏⵜⴰⵢⵉⵏ ⵅⴼ ⵓⵣⵣⴳⵉⵔ ⵏ ⵜⴰⵏⵏⴰⵢⵉⵏ ⵜⵉⵎⴳⴳⵓⵔⴰ, ⴷ ⵜⵙⵎⵉⴳⴰⵍ ⵏⵏⴰ ⵙⵙⵉⴼⴹⵏ ⵉⵏⴳⵎⴰⵎⵏ ⵉⵣⴷⵉⵏ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⵙⵍⴰⵡⴰⵏ ⴰⴽⴽⵯ ⵙⴳⵉⵙⵏ ⵉⵏⴳⵎⴰⵎⵏ ⵏ ⵜⵎⵢⴰⵇⵇⴰⵏⵉⵏ ⵜⵜⵡⴰⴱⴷⴰⵔⵏⵉⵏ ⵢⴰⴷ ;
- ⴳ ⵓⵙⵓⵔⵙ ⴰⴳⵔⴰⵖⵍⴰⵏ, ⵢⵉⵡⵣ ⵓⵙⵇⵇⵉⵎ, ⴳ ⵓⵙⴰⵜⵉ ⵏ ⵜⵡⵓⵔⵉⵡⵉⵏ ⵏⵏⵙ, ⵅⴼ ⵓⵎⵢⴰⵡⴰⵙ ⴷ ⵜⵎⴷⵔⴰⵡⵜ ⴰⴽⴷ ⵓⵏⴰⴳⵔⴰⵡ ⵏ ⵜⵎⵜⵜⴰ ⵉⵎⵓⵏⵏ ⴷ ⵉⵏⴳⵎⴰⵎⵏ ⵏⵏⴰ ⴰⵙ ⵉⵏⴹⴼⵕⵏ, ⴷ ⵜⵎⴰⴷⴷⴰⵙⵉⵏ ⵜⵉⴳⵔⴰⵖⵍⴰⵏⵉⵏ ⵢⴰⴹⵏⵉⵏ ⴷ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵜⵉⴱⵕⵕⴰⵏⵉⵏ ⵉⵥⵍⵉⵏ ⵙ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵔⵙⵏ, ⴰⵔ ⵉⵙⵡⵓⵔⵉ ⵅⴼ ⵓⵙⴷⵓⵙ ⵏ ⵜⵉⵍⴰⵍⵜ ⵏ ⵜⴳⵍⴷⵉⵜ ⴳ ⵢⵉⴳⵔ ⴰⴷ ⴳ ⵓⵙⴰⵜⵉ ⴰⴳⵔⴰⵖⵍⴰⵏ ;
- ⴰⵔ ⵉⵜⵜⴳⴳⴰ ⵓⵙⵇⵇⵉⵎ ⵉⵏⵥⵉ ⴰⵙⵉⵎⴰⵏ ⴷ ⵓⵔⴰⵡⵙⴰⵏ ⵉ ⵉⵙⵜⴰⵢⵏ. ⵉⵜⵜⵓⵙⵎⴰⴳⵍ, ⴳ ⵓⵙⴰⵜⵉ ⵏ ⵉⴱⴹⵉⵢⵏ ⵏ ⵓⵙⵍⴳⵏ 30.11 ⵏⵏⴰ ⵉⵥⵍⵉⵏ ⵙ ⵜⴼⴰⴷⵉⵡⵉⵏ ⴷ ⵡⴰⵎⵎⴰⴽⵏ ⵏ ⵉⵏⵥⵉ ⴰⵙⵉⵎⴰⵏ ⴷ ⵓⵔⴰⵡⵙⴰⵏ ⵉ ⵡⴰⵙⵜⴰⵢⵏ, ⵙ ⵜⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵜⴰⵎⵥⵍⵉⵜ ⵏ ⵜⵙⵖⵣⵏⵜ ⵏ ⵉⵎⵏⵥⴰ ⵏ ⵉⵙⵜⴰⵢⵏ ⴷ ⵜⵎⵉⵔⵉⵜ ⵏⵏⵙ ;
- ⴰⵔ ⵉⵙⵙⵉⵡⵉⴹ ⵓⵙⵇⵇⵉⵎ ⵉ ⵓⵔⴰⵄⴰ ⵏ ⴱⴰⴱ ⵏ ⵡⴰⴷⴷⵓⵔ ⵏ ⵓⴳⵍⵍⵉⴷ ⵢⴰⵜ ⵜⴰⵏⴰⴹⵜ ⵜⴰⵙⴳⵯⵙⴰⵏⵜ ⵅⴼ ⵡⴰⴷⴷⴰⴷ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⴳⵍⴷⵉⵜ, ⵎⴽⴷⴰ ⴰⵙ ⵉⵙⵙⵉⵡⵉⴹ ⵖ ⵓⵣⵎⵣ ⵏ ⵓⵏⵎⵔⵉ, ⵜⴰⵏⴰⴹⵉⵏ ⵜⵉⵎⵥⵍⴰⵢⵉⵏ ⴷ ⵜⵙⴳⵓⵎⴰⵏⵉⵏ ⵅⴼ ⵇⴰⵃ ⵎⴰⴷ ⵉⵜⵜⴰⵡⵙⵏ ⴳ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵎⵣⴰⵖ ⴼⵍⵍⴰⵙⵏ ⵙ ⵜⴱⵔⵉⴷⵜ ⴷ ⵢⵓⵙⴰⵏ.
ⵉⴳⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵢⴰⵜ ⵜⵎⵔⵙⵍⵜ ⵜⴰⴷⵙⵜⴰⵔⵜ ⵜⴰⵙⵉⵎⴰⵏⵜ ⵉⵥⵍⵉⵏ ⵅⴼ ⵜⵏⴱⴰⴹⵉⵏ ⵜⵓⵣⵔⵉⴼⵜ ⴷ ⵜⵎⵣⵣⴳⴰⵔⵜ, ⵜⵎⵙⴰⵙⴰ ⴰⴽⴷ ⵉⵎⵏⵣⴰⵢⵏ ⵏ ⴱⴰⵔⵉⵣ ⵏ ⵜⵎⵔⵙⴰⵍⵉⵏ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵍⵍⵉ ⴷ ⵢⵓⵡⵉⵏ ⵎⴰⵙ ⵉⵅⵚⵚⴰ ⴰⴷ ⵉⵍⵉⵏⵜ ⵖⵓⵔ ⵜⵎⵔⵙⵍⵜ ⵜⴰⵏⴰⵎⵓⵔⵜ ⵜⵓⵚⴽⵉⵡⵉⵏ ⵜⵉⴷⵙⵍⴰⵏⵉⵏ ⵉⵅⵚⵚⴰⵏⵏ ⴰⴼⴰⴷ ⴰⴷ ⵜⵙⵡⵓⴷⴷⵓ ⵜⵉⵡⵓⵔⵉⵡⵉⵏ ⵏⵏⵙ, ⵙⵍⴰⵡⴰⵏ ⴰⴽⴽⵯ ⴰⵙⵙⵥⵕⴼ ⵢⵓⴷⴰⵏ, ⵜⴳ ⵜⴰⵙⵉⵎⴰⵏⵜ ⵙⴳ ⵜⵏⴱⴰⴹⵜ, ⴷ ⴰⴷ ⵓⵔ ⴼⵍⵍⴰⵙ ⵉⵍⵉⵏⵜ ⵜⵉⴹⴰⴼ ⵜⵉⵥⵕⴼⴰⵏⵉⵏ ⵍⵍⵉ ⵔⴰⴷ ⵉⵟⵟⴰⵚ ⵜⴰⵙⵉⵎⴰⵏⵜ ⵏⵏⵙ.
ⵓⵔ ⴰⵔ ⵜⵎⵎⴰⵍ ⵜⵙⵉⵎⴰⵏⵜ ⵏ ⵓⵙⵇⵇⵉⵎ ⵅⴼ ⵓⵏⴱⴰⴹ ⴰⵎⵣⵣⴳⴰⵔ (ⵜⴰⵏⴱⴰⴹⵜ) ⵎⴰⵙ ⵓⵔ ⵉⵍⵍⵉ ⵓⵎⵢⴰⵡⴰⵙ ⴰⵎⵉⵔⵉⵡ ⴳⵔ ⵉⵙⵎⵉⵍⵏ ⵙ ⵙⵉⵏ ⴳ ⵜⵓⴳⵜ ⵏ ⵉⵙⵡⵉⵔⵏ, ⵉⴷⴷⵖ:
- ⴷⴰ ⵉⵜⵜⴰⵡⵙ ⵓⵙⵇⵇⵉⵎ ⴳ ⵓⵙⵓⵊⴷ ⵏ ⵜⴰⵏⴰⴹⵉⵏ ⵏⵏⴰ ⵜⵜⴰⴽⴽⴰ ⵜⵏⴱⴰⴹⵜ ⵉ ⵉⵏⴳⵎⴰⵎⵏ ⵏ ⵜⵎⵢⴰⵇⵇⴰⵏⵉⵏ ⴷ ⵜⵎⵔⵙⴰⵍ ⵜⵉⴳⵔⴰⵖⵍⴰⵏⵉⵏ ⴷ ⵜⵙⴳⴰⵡⴰⵏⵉⵏ ⵢⴰⴹⵏⵉⵏ ⵜⵉⵎⵥⵍⴰⵢⵉⵏ, ⵙ ⵓⵎⵙⴰⵙⴰ ⴷ ⵜⵎⵔⵉⵙⵉⵏ ⴷ ⵉⵙⵓⵖⵏⵏ ⵉⴳⵔⴰⵖⵍⴰⵏⵏ ⵏ ⵜⴳⵍⴷⵉⵜ;
- ⴷⴰ ⵉⵙⵡⵓⵔⵉ ⵅⴼ ⵓⵙⵡⵓⴷⴷⵓ ⴷ ⵓⵙⵙⵔⵇⴱ ⵏ ⵉⵎⵢⴰⵙⵙⴰⵜⵏ ⵏ ⵓⵎⵢⴰⵡⴰⵙ ⴰⵎⵓⴼⴰⵢ, ⴷ ⵓⵎⵢⴰⵡⴰⵙ ⵉⵕⵡⴰⵏ ⴳ ⵢⵉⴳⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵔⵙⵏ ⴳⵔ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵏⵜⴰⵢⵏⵉⵏ, ⴷ ⵜⵎⵙⵎⵓⵏⵉⵏ ⵜⵉⵏⴰⵎⵓⵔⵉⵏ ⴷ ⵜⵎⴰⴷⴷⴰⵙⵉⵏ ⵜⴰⵔⵓⵏⴱⵉⴹⵉⵏ ⵜⵉⴳⵔⴰⵖⵍⴰⵏⵉⵏ ⵜⵉⵎⵥⵍⴰⵢⵉⵏ;
- ⴷⴰ ⵉⵜⵜⴳⴳⴰ ⴰⵔⵣⵣⵓ ⴷ ⵜⵖⵓⵔⵉ ⵏ ⵓⵙⵎⵙⴰⵙⴰ ⵏ ⵉⴹⵕⵉⵚⵏ ⵓⵍⴳⵉⵏⵏⴷ ⵉⵎⵙⵙⵓⴷⵙⵏ ⵏⵏⵉ ⵙ ⵜⵍⵍⴰ ⵜⵡⵓⵔⵉ ⴰⴽⴷ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⵉⵥⵍⵉⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵍⴳⵏ ⴰⴳⵔⴰⵖⵍⴰⵏ ⴰⵏⴼⴳⴰⵏ ⵏⵏⴰ ⵜⵙⵖⵣⵏ ⵜⴳⵍⴷⵉⵜ ⵏⵖ ⴳⵉⵙⵏ ⵜⴰⵎⵓ, ⴷ ⵓⵍⴰ ⴳ ⵜⵉⴼⴰⵡⵜ ⵏ ⵜⴰⵏⵏⴰⵢⵉⵏ ⵜⵉⵎⴳⴳⵓⵔⴰ ⴷ ⵉⵙⵖⵍⴰⴼ ⴷ ⵙⵙⴰⴼⵖⵏ ⵉⵏⴳⵎⴰⵎⵏ ⵏ ⵜⵎⵢⴰⵇⵇⴰⵏⵉⵏ ⵏ ⵜⵎⵜⵜⴰ ⵉⵥⵍⵉⵏ ⵙ ⵜⴰⵏⴰⴹⵉⵏ ⵏⵏⵉ ⴰⵙⵏ ⵜⵙⵎⵏⵉⴷ ⵜⵏⴱⴰⴹⵜ;
- ⴷⴰ ⵉⵙⵡⵓⵔⵉ ⵅⴼ ⵓⵙⵙⵔⵇⴱ ⴷ ⵓⵙⴷⴷⵉⴷ ⵉ ⵎⴰⵕⵕⴰ ⵢⵉⴳⵔⴰⵏ ⵓⵏⴱⵉⴹⵏ ⴷ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵉⵏⵜⴰⵢⵏ ⵙ ⵓⴹⴼⴼⵓⵕ ⵏ ⵏ ⵓⵣⵣⴳⵉⵔ ⵏ ⵜⴰⵏⵏⴰⵢⵉⵏ ⵜⵉⵎⴳⴳⵓⵔⴰ, ⴷ ⵉⵙⵖⵍⴰⴼ ⵏⵏⵉ ⴷ ⵙⵙⴰⴼⵖⵏ ⵉⵏⴳⵎⴰⵎⵏ ⵏ ⵜⵎⵢⴰⵇⵇⴰⵏⵉⵏ ⵉⵣⴷⵉⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴹⴰⵕⵜ ⵏ ⵓⵣⵣⵔⴰⵢ ⵏⵏⵙⵏ ⵅⴼ ⵜⴰⵏⴰⴹⵉⵏ;
- ⴰⵎⵓⵏ ⴳ ⵜⴳⵎⴰⵎⵜ ⵏ ⵓⵙⵇⵇⵉⵎ ⵜⴰⵎ (8) ⵏ ⵉⴳⵎⴰⵎⵏ ⵏⵏⴰ ⵉⵙⵎⵎⴰ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵙⴳ ⵉⵎⵓⵣⴰⵢⵏ ⵉⵎⵖⵔⵉⴱⵉⵢⵏ ⵙⴳ ⵢⵉⴳⵔⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵓⵍⴰ ⵙⴳ ⵉⵏⴳⵎⴰⵎⵏ ⵜⵉⵙⵎⴷⵢⴰⵜⵉⵏ ⵏ ⵉⵙⵍⵎⴰⴷⵏ ⵏ ⵓⵙⵙⵍⵎⴷ ⴰⵏⴰⴼⵍⵍⴰ, ⴷ ⵉⵏⵖⵎⴰⵙⵏ ⵉⵣⵣⵓⵍⴰⵏⵏ, ⴷ ⵉⵎⵙⴳⵏⴰⴼⵏ, ⴷ ⵉⵎⴰⵙⵜⴰⵏⵏ.
• ⵉⵙⴷⵖⵉ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⴰⵙⵙ ⵏ 10 ⵢⵓⵏⵢⵓ 2021, ⵙⵏⴰⵜ ⵏ ⵜⵎⵢⴰⵇⵇⴰⵏⵉⵏ ⵏ ⵓⵎⵙⴰⵙⴰ ⵉⵜⵜⵓⵙⴳⵎⴹⵏ ⵅⴼ ⵉⵎⵏⵣⴰⵢⵏ ⵏ ⴱⵉⵍⴳⵔⴰⴷ ⵉⵣⴷⵉⵏ ⴷ ⵓⵙⴷⵓⵙ ⵏ ⵜⵓⵇⵇⵏⴰ ⴳⵔ ⵜⵎⵔⵙⵍⵜ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⴱⵕⵍⴰⵎⴰⵏ.
• ⵉⵣⴷⵉ ⵓⵙⵇⵇⵉⵎ ⴰⵎⵢⴰⵙⵙⴰ ⵏ ⵓⵎⵢⴰⵡⴰⵙ ⴷ ⵓⵎⵢⴰⵡⴰⴹ ⴰⴽⴷ ⵉⵙⵇⵇⵉⵎⵏ ⵏ ⵓⴱⵕⵍⴰⵎⴰⵏ ⵙ ⵜⴹⴼⵕⵉ ⵏ ⵜⵡⵓⵔⵉⵡⵉ ⵏ ⵓⴱⵕⵍⴰⵎⴰⵏ ⴳ ⵢⵉⴳⵔ ⵏ ⵓⵎⴰⵜⵔ ⵏ ⵜⵡⵓⵔⵉⵡⵉ ⵏ ⵜⵏⴱⴰⴹⵜ ⵙⴳ ⵓⵎⵏⵉⴷ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵓⴹⴼⴼⵓⵕ ⵏ ⵜⵢⴰⴼⵓⵜⵉⵏ ⵏ ⵜⵡⵓⵔⵉⵡⵉ ⵜⵓⵣⵔⵉⴼⵜ ⵙ ⵓⴹⴼⴼⵓⵕ ⵏ ⵉⵙⵏⴼⴰⵕⵏ ⴷ ⵜⵙⵓⵎⵔⵉⵏ ⵏ ⵉⵙⵍⴳⵏⵏ ⵏⵏⵉ ⵉⵜⵜⵡⴰⵖⵔⴰⵏ ⴷ ⵡⵉⵏⵏⴰ ⵉⵜⵜⵓⵙⵖⵣⴰⵏⵏ;
• ⴰⵔ ⵉⵙⵎⵏⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴷⴰⵜ ⵏ ⴽⵓ ⴰⵙⵇⵇⵉⵎ ⵙⴳ ⵉⵙⵇⵇⵉⵎⵏ ⵏ ⵓⴱⵕⵍⴰⵎⴰⵏ, ⵢⴰⵏ ⵓⴼⵙⵔ ⴳ ⵉⵍⵍⴰ ⵓⵙⴳⵣⵍ ⵓⵚⴽⵉⵡ ⵏ ⵜⵓⵎⴰⵢⵜ ⵏ ⵜⴰⵏⴰⴹⵜ ⵜⴰⵙⴳⵯⵙⴰⵏⵜ ⵏ ⵓⵙⵇⵇⵉⵎ ⵅⴼ ⵡⴰⴷⴷⴰⴷ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵢⴰⴼⵓⵜⵉⵏ ⵏ ⵉⵎⵓⵙⵙⵓⵜⵏ ⵏⵏⵙ ⴷ ⵉⵎⵏⵉⴷⵏ ⵏ ⵜⵡⵓⵔⵉ ⵏⵏⵙ, ⴹⴰⵕⴰⵜ ⵎⴰⴷ ⵜⴻⵜⵜⵓⵙⵡⴰⵍⴰ ⵉ ⵉⵏⵙⵙⵉⵅⴼⵏ ⵏⵏⵙⵏ;
• ⴰⵔ ⵢⴰⴽⴽⴰ ⴰⵡⴷ ⵓⵙⵇⵇⵉⵎ, ⵙ ⵜⵙⵏⵜⴰⵢⵜ ⵏⵏⵙ ⵏⵖ ⵙ ⵓⵙⵓⵜⵔ ⵏ ⵢⴰⵏ ⵙⴳ ⵉⵙⵇⵇⵉⵎⵏ ⵏ ⵓⴱⵕⵍⴰⵎⴰⵏ, ⵅⴼ ⵉⵙⵏⴼⴰⵕⵏ ⴷ ⵜⵙⵓⵎⵔⵉⵏ ⵏ ⵉⵙⵍⴳⵏⵏ ⵉⵣⴷⵉⵏ ⴷ ⵉⵣⵔⴼⴰⵏ ⵏ ⵓⴼⴳⴰⵏ, ⵙⵍⴰⵡⴰⵏ ⴰⴽⴽⵯ ⴳ ⵢⵉⴳⵔ ⵏ ⵓⵙⵎⵙⴰⵙⴰ ⵏⵏⵙⵏ ⴷ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⵉⵣⴷⵉⵏ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⵏⵏⴰ ⵜⵙⵖⵥⵏ ⵜⴳⵍⴷⵉⵜ ⵏⵉⵖ ⵙⵔⵙⵏⵜ ⵜⴰⵎⵓ;
• ⴰⵎⵓⵏ ⴳ ⵜⴳⵎⴰⵎⵜ ⵏ ⵓⵙⵇⵇⵉⵎ ⵜⴰⵎ (8) ⵏ ⵉⴳⵎⴰⵎⵏ ⵏⵏⴰ ⵉⵜⵜⵡⴰⵙⵜⴰⵢⵏ ⵉⵏⵙⵙⵉⵅⴼⵏ ⵏ ⵉⵙⵇⵇⵉⵎⵏ ⵏ ⵓⴱⵕⵍⴰⵎⴰⵏⵙⴳ ⵙ ⵓⵙⵙⵓⵎⵓ, ⴰⵔ ⵙⵎⴷⵢⴰⵏ ⵜⵉⵎⵙⵎⵓⵏⵉⵏ ⵏⵏⴰ ⵉⵙⵡⵓⵔⵉⵏ ⴳ ⵢⵉⴳⵔⴰⵏ ⵏ ⵉⵣⵔⴼⴰⵏ ⵓⵖⵔⵉⵎⵏ, ⵉⵙⵔⵜⴰⵏⵏ, ⵉⴷⵎⵙⴰⵏⵏ, ⵉⵏⴰⵎⵓⵏⵏ, ⵉⴷⵍⵙⴰⵏⵏ ⴷ ⵉⵡⵏⴹⴰⵏⵏ, ⴷ ⵉⵣⵔⴼⴰⵏ ⵏ ⵜⵎⵖⴰⵔⵜ ⴷ ⵡⴰⵣⵣⴰⵏ ⴷ ⵡⵉⵏ ⵉⵄⵔⵔⵉⵎⵏ, ⴷ ⵡⵉⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ ⴷ ⵉⵣⵔⴼⴰⵏ ⵏ ⵉⵏⵙⵎⵓⵔⵏ.
- ⴷⴰ ⵉⵜⵜⴰⵏⵏⴰⵢ ⵓⵙⵇⵇⵉⵎ ⵎⴰⵙ ⵜⴳⴰ ⵜⵎⴷⵔⴰⵡⵜ ⴷ ⵡⴰⵎⵓⵏ ⵓⵖⵔⵉⵎ ⵜⴰⵎⴷⵔⴰⵡⵜ ⵜⴰⵙⵜⵔⴰⵜⵉⵊⵉⵜ ⵉⵣⴷⵉⵏ ⵙ ⵢⵉⴳⵔⴰⵏ ⴰⴽⴽⵯ ⵏ ⵜⵡⵓⵔⵉ ⵏⵏⵙ, ⵙⵍⴰⵡⴰⵏ ⴰⴽⴽⵯ ⴰⵎⵛⴰⵡⴰⵕ ⴷ ⵓⵣⴷⴰⵢ ;
- ⴰⴷ ⵉⴷⵔⵓ ⴳ ⵉⵖⴰⵡⴰⵙⵏ ⵏ ⵓⵙⵎⵓⵜⵜⴳ ⴷ ⵓⵙⵎⵓⵜⵜⴳ ⴰⵙⵓⵍⴰⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵍⴳⵏ ⴰⴳⵔⴰⵖⵍⴰⵏ ⴰⵏⴼⴳⴰⵏ ⵉⵚⴰⵃⴰⵏ ⵉ ⵜⵎⵙⵎⵓⵏⵉⵏ, ⴷ ⴰⴷ ⵜⵏⵜ ⵉⵏⵏⴰⵍ ⴳ ⵉⵖⴰⵡⴰⵙⵏ ⵏ ⵓⵙⴼⵔⴽ ⴷ ⵜⵏⴽⵔⴰ ⵍⵍⵉ ⵉⵙⵏⵎⴰⵍⴰ ;
- ⴰⴷ ⵉⴷⵔⵓ ⵓⵙⵇⵇⵉⵎ ⴳ ⵓⵙⴷⵔⴰⵡ ⵏ ⵜⵎⴰⴷⴷⴰⵙⵉⵏ ⵏ ⵡⴰⵎⵓⵏ ⵓⵖⵔⵉⵎ ⴳ ⵉⵎⴹⴰⴽⴰⵕⵏ ⵉⴳⴷⵓⴷⴰⵏⵏ ⵏⵏⴰ ⵉⵕⵥⵥⵎ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⵡⵉⵔ ⴰⵏⴰⵎⵓⵔ ⴷ ⵓⵙⵡⵉⵔ ⴰⵏⵎⵏⴰⴹ.
- ⴷⴰ ⵉⵜⵜⴳⴳⴰ ⵓⵙⵇⵇⵉⵎ ⴰⵔⵣⵣⵓ ⴷ ⵜⵖⵓⵔⵉ ⴷ ⵓⵙⵎⵙⴰⵙⴰ ⵏ ⵉⴹⵕⵉⵚⵏ ⵓⵣⵔⵉⴼⵏ ⴷ ⵉⵎⴰⴷⴷⴰⵙⵏ ⵏⵏⴰ ⵙ ⵜⵍⵍⴰ ⵜⵡⵓⵔⵉ ⵉⵣⴷⵉⵏ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⵉⵣⴷⵉⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵍⴳⵏ ⴰⴳⵔⴰⵖⵍⴰⵏ ⴰⵏⴼⴳⴰⵏ ⵏⵏⴰ ⵜⵙⵙⴳⵎⴹ ⵜⴳⵍⴷⵉⵜ ⵏⵖⴷ ⵜⴽⵛⵎ ⴳⵉⵙⵏⵜ, ⴷ ⴳ ⵓⵙⴰⵜⵉ ⵏ ⵜⴰⵏⵏⴰⵢⵉⵏ ⵜⵉⵎⴳⴳⵓⵔⴰ ⴷ ⵉⵙⵓⵎⵔⵏ ⵏ ⵉⵏⴳⵔⴰⵡⵏ ⵏ ⵜⵎⵢⴰⵇⵇⴰⵏⵉⵏ ⵏ ⵜⵎⵜⵜⴰ ⵉⵎⵓⵏⵏ ⵉⵥⵍⵉⵏ ⵙ ⵜⴰⵏⴰⴹⵉⵏ ⵏⵏⵉ ⴰⵙⵏ ⵜⵙⵡⴰⵍⴰ ⵜⵏⴱⴰⴹⵜ ;
- ⴰⵔ ⵉⵜⵜⴷⵔⵓ ⵓⵙⵇⵇⵉⵎ, ⴽⵓⴷⵏⵏⴰ ⵉⴳⴰ ⴰⵏⴱⵣⴰⵣ, ⴳ ⵓⵙⵎⵓⵜⵜⴳ ⵏ ⵜⴰⵏⴰⴹⵉⵏ ⵏⵏⴰ ⵜⵙⵎⵏⵉⴷ ⵜⵏⴱⴰⴹⵜ ⵉ ⵉⵏⴳⵔⴰⵡⵏ ⵏ ⵜⵎⵢⴰⵇⵇⴰⵏⵉⵏ ⴷ ⵜⵎⵔⵙⴰⵍ ⵜⵉⴳⵔⴰⵖⵍⴰⵏⵉⵏ ⴷ ⵜⵙⴳⴰⵡⴰⵏⵉⵏ ⵢⴰⴹⵏⵉⵏ ⵉⵥⵍⵉⵏ, ⵙ ⵓⵎⵙⴰⵙⴰ ⴷ ⵜⵎⵔⵉⵙⵉⵏ ⴷ ⵉⵙⵓⵖⵏⵏ ⵉⴳⵔⴰⵖⵍⴰⵏⵏ ⵏ ⵜⴳⵍⴷⵉⵜ ;
- ⴷⴰ ⵉⵙⵡⵓⵔⵉ ⵓⵙⵇⵇⵉⵎ ⵅⴼ ⵓⵙⵔⵇⴱ ⴷ ⵓⵙⴷⴷⵉⴷ ⵉ ⵎⴰⵕⵕⴰ ⵢⵉⴳⵔⴰⵏ ⵏ ⵜⵏⴱⴰⴹⵜ ⴷ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵉⵜⵜⵓⵙⵎⴳⴰⵍⵏ ⵏⵜⴰⵢⵏⵉⵏ ⵅⴼ ⵓⴹⴼⴼⵓⵕ ⵏ ⵜⵏⴰⴼⵓⵜⵉⵏ ⵜⵉⵎⴳⴳⵓⵔⴰ ⴷ ⵉⵙⵖⵍⴰⴼ ⵏⵏⴰ ⴷ ⵙⵙⴰⴼⵖⵏ ⵉⵏⴳⵔⴰⵡⵏ ⵏ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ.
ⵉⵜⵜⵡⴰⵙⵏⴰⵢ ⵓⵙⵇⵇⵉⵎ, ⵙ ⵜⵔⵏⴰⵡⵜ ⵅⴼ (ⵜ)ⵓⵏⵙⵙⵉⴼⵜ(ⵜ) ⴷ (ⵜ)ⵓⵏⴼⵍⵓⵙ(ⵜ) (ⵜ)ⴰⵎⴰⵜⴰⵢ(ⵜ), ⵙⴳ 39 ⵏ ⵉⴳⵎⴰⵎⵏ :
- ⵉⵏⵙⵙⵉⵅⴼⵏ ⵏ ⵜⵙⵇⵇⵉⵎⵉⵏ ⵜⵉⵏⵎⵏⴰⴹⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙⵏⴰⵜ ⴷ ⵎⵔⴰⵡⵜ (12).
- ⵜⵥⴰ (9) ⵏ ⵉⴳⵎⴰⵎⵏ ⵏⵏⴰ ⵉⵙⵎⵎⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ;
- ⵜⴰⵎ (8) ⵏ ⵉⴳⵎⴰⵎⵏ ⵏⵏⴰ ⵉⵙⵎⵎⴰ ⵓⵏⵙⵙⵉⵅⴼ ⵏ ⵜⵏⴱⴰⴹⵜ;
- ⵜⴰⵎ (8) ⵏ ⵉⴳⵎⴰⵎⵏ ⵏⵏⴰ ⵙⵎⵎⴰⵏ ⵉⵏⵙⵙⵉⵅⴼⵏ ⵏ ⵙⵉⵏ ⵏ ⵉⵙⵇⵇⵉⵎⵏ ⵏ ⵓⴱⵔⵍⴰⵎⴰⵏ ⵙ ⵜⵙⵓⵎⵓⵜ ;
- ⵙⵉⵏ (2) ⵉⴳⵎⴰⵎⵏ ⵏⵏⴰ ⵉⵙⵎⴷⵢⴰⵏ ⵜⴰⵎⵔⵙⴰⵍⵜ ⵏ ⵓⵎⴰⵣⵣⴰⵍ ⴷ ⵓⵙⵇⵇⵉⵎ ⵏ ⵉⵎⵖⵔⵉⴱⵉⵢⵏ ⵉⵣⴷⵖⵏ ⴳ ⴱⵕⵕⴰ;
ⴰⴳⵔⴰⵡ ⴰⵎⴰⵜⴰⵢ : ⵍⴰ ⵉⵜⵜⵡⴰⵍⴰ ⵜⴰⵖⵓⵔⵉ ⵏ ⵉⵙⵖⵏⵓⵜⵏ ⵏ ⵓⵎⵏⴰⴷ ⴷ ⵜⵙⵓⵎⴰⵔ ⴷ ⵉⵙⵖⵍⴰⴼ ⴷ ⵜⴰⵏⴰⴹⵉⵏ ⴷ ⵉⵖⴰⵡⴰⵙⵏ ⴷ ⵜⵣⵔⴰⵡⵉⵏ ⴷ ⵉⵔⵣⵣⵓⵜⵏ ⵏⵏⵉ ⵜⵜⴳⴳⴰⵏ ⵉⵏⴳⵎⴰⵎⵏ ⵏ ⵓⵙⵇⵇⵉⵎ, ⵉⵙⵖⵣⵏ ⵜⵏ ;
ⴰⵙⵉⵔⴰ ⵏ ⵓⵙⵇⵇⵉⵎ : ⵉⵜⵜⵡⴰⵙⵏⴰⵢ ⵓⵙⵉⵔⴰ ⵏ ⵓⵙⵇⵇⵉⵎ, ⵙ ⵜⵔⵏⴰⵡⵜ ⵅⴼ (ⵜ)ⵓⵏⵙⵙⵉⵅⴼ(ⵜ)ⵙⴳ (ⵜ)ⵓⵏⴼⵍⵓⵙ(ⵜ) (ⵜ)ⴰⵎⴰⵜⴰⵢ(ⵜ) ⴷ ⵉⵎⵣⴷⴰⵢⵏ ⵏ ⵉⵎⴰⵙⵙⵏ ⵉⵏⴰⵎⵓⵔⵏ, ⴷ ⵉⵏⵙⵙⵉⵅⴼⵏ ⵏ ⵜⵙⵇⵇⵉⵎⵏ ⵜⵉⵎⵖⵍⴰⵍⵉⵏ, ⴷ ⴽⵓⴷⵏⵏⴰ ⵉⴳⴰ ⴰⵏⴱⵣⴰⵣ, ⵉⵏⵙⵙⵉⵅⴼⵏ ⵏ ⵜⵙⵇⵇⵉⵎⵉⵏ ⵜⵉⵏⵎⵏⴰⴹⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏⵏⵉ ⴳⴰⵏⵉⵏ ⵉⵎⵏⵜⴰⵢⵏ. ⵍⴰ ⵉⵜⵜⵡⴰⵍⴰ ⴰⵙⵎⵓⵜⵜⴳ ⴷ ⵓⵣⵣⴳⵉⵔ ⵏ ⵜⵖⵜⴰⵙⵉⵏ ⵏⵏⵉ ⵉⵜⵜⴰⵙⵉ ⵓⴳⵔⴰⵡ ⴰⵎⴰⵜⴰⵢ ⴷ ⵓⵙⵎⵓⵜⵜⴳ ⵏ ⵓⵖⴰⵡⴰⵙ ⵏ ⵜⵡⵓⵔⵉ ⵏⵏⵙ ⴷ ⵓⵍⴰ ⴰⵣⴷⴰⵢ ⵏ ⵜⵡⵓⵔⵉ ⵏ ⵉⵏⴳⵎⴰⵎⵏ ⵏ ⵓⵙⵇⵇⵉⵎ ⴷ ⵉⵎⴰⵙⵙⵏ ⵏⵏⵙ ⵉⵏⴰⵎⵓⵔⵏ ⴷ ⵜⵙⵇⵇⵉⵎⵉⵏ ⵏⵏⵙ ⵜⵉⵏⵎⵏⴰⴹⵉⵏ ⵎⴽⴷⴰ ⵉⵙⴽⴰⵔ ⵜⵉⵙⵎⵉⴳⴰⵍ ⵏⵏⵙ ⵏⵏⵉ ⴰⵙ ⵉⵙⵙⵓⵖⵏ ⵓⴳⵔⴰⵡ ⴰⵎⴰⵜⴰⵢ ⴳ ⵓⵙⴰⵜⵉ ⵏ ⵜⵥⵍⴰⵢⵉⵏ ⵏⵏⵙ.
ⵜⵉⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ : ⵍⵍⴰⵏⵜ ⵖⵓⵔ ⵓⵙⵇⵇⵉⵎ ⵙⵎⵎⵓⵙⵜ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ :
1. ⵜⴰⵙⵇⵇⵉⵎⵜ ⵜⴰⵎⵖⵍⴰⵍⵜ ⵉⵜⵜⵓⵙⵎⴰⴳⵍⵏ ⵙ ⵓⵎⴷⴰⵢ ⵏ ⵜⵕⵥⵉⵢⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⴼⵔⴰⴳ ⵏⵏⵙⵏ
2. ⵜⴰⵙⵇⵇⵉⵎⵜ ⵜⴰⵎⵖⵍⴰⵍⵜ ⵉⵜⵜⵓⵙⵎⴰⴳⵍⵏ ⵙ ⵜⵏⴽⵔⴰ ⵙ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴷⵓⵙ ⵏ ⵜⵓⵙⴽⴰ ⵜⴰⵎⴰⴳⴷⵓⵜ
3. ⵜⴰⵙⵇⵇⵉⵎⵜ ⵜⴰⵎⵖⵍⴰⵍⵜ ⵉⵜⵜⵓⵙⵎⴰⴳⵍⵏ ⵙ ⵜⵎⵣⵣⴳⵏⵜ ⴷ ⵡⴰⵔⵙⵏⵓⵃⵢⵓ ⴷ ⵜⵙⵓⵜⵉⵏ ⵜⵉⵎⴰⵢⵏⵓⵜⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ
4. ⵜⴰⵙⵇⵇⵉⵎⵜ ⵜⴰⵎⵖⵍⴰⵍⵜ ⵉⵜⵜⵓⵙⵎⴰⴳⵍⵏ ⵙ ⵜⴳⵎⵉ ⵏ ⵉⵎⵢⴰⵙⵙⴰⵜⵏ ⵉⴳⵔⴰⵖⵍⴰⵏⵏ ⴷ ⵜⵎⴷⵔⴰⵡⵉⵏ ⴷ ⵓⵎⵢⴰⵡⴰⵙ
5. ⵜⴰⵙⵇⵇⵉⵎⵜ ⵜⴰⵎⵖⵍⴰⵍⵜ ⵉⵜⵜⵓⵙⵎⴰⴳⵍⵏ ⵙ ⵓⵙⵉⵜⴳ ⴷ ⵓⴹⴼⴼⵓⵕ ⵏ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵜⵓⵎⵙⵉⵙⵜ ⵏ ⵉⵣⵣⵔⴰⴼⵏ.
ⴰⵔ ⵜⵜⴳⴳⴰ ⴽⵓ ⵜⵙⵇⵇⵉⵎⵜ ⵜⴰⵎⵖⵍⴰⵍⵜ ⴳ ⵢⵉⴳⵔ ⵏ ⵜⵥⵍⴰⵢⵜ ⵏⵏⵙ ⵜⴰⵙⵎⵉⴳⵍⵜ ⵏ ⵉⴳⵉ ⵏ ⵜⵖⵓⵔⵉⵡⵉⵏ ⵏⵏⵙ ⴷ ⵜⵡⵓⵔⵉⵡⵉⵏ ⵏⵏⵉ ⴰⵙ ⵉⵙⵡⴰⵍⴰ ⵓⵙⵇⵇⵉⵎ, ⵙ ⵓⵎⵙⴰⵙⴰ ⴷ ⵉⴷⵉⵡⵍⵏ ⵏ ⵓⴳⵔⴰⵡ ⴰⵎⴰⵜⴰⵢ.
ⵙ ⵓⵎⵙⴰⵙⴰ ⴷ ⵜⵎⵜⵜⴰⵡⵉⵏ 6 ⴷ 8 ⵏ ⵓⵙⵍⴳⵏ 76.15, ⴰⵔ ⵉⵥⵕⵕⴰ ⵓⵙⵇⵇⵉⵎ ⴽⵓⵍⵍⵓ ⴰⴷⴷⴰⴷⵏ ⵏ ⵜⵕⵥⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵜⵙⵏⵜⴰⵢⵜ ⵏⵏⵙ ⵏⵖⴷ ⵙ ⵜⵓⵚⴽⴰ ⵅⴼ ⵜⵏⵓⵔⵣⵉⵜ ⵏ ⵡⵉⵏⵏⴰ ⴳⴰⵏⵉⵏ ⵉⵎⵏⵜⴰⵢⵏ. ⴰⵔ ⵉⵙⵙⵏⵖⵎⴰⵙ, ⴳ ⵓⵙⴰⵜⵉ ⵏ ⵓⴹⴼⴼⵓⵕ ⵏ ⵜⵓⵖⵓⵍⵜ ⵏ ⵜⵏⵓⵔⵣⵉⵏ ⵏⵏⵉ ⵜⵉⴷ ⵉⵕⴰⵃⵏ, ⵉⵙⵏⵏⴰⵔⴰⵣⵏ ⵉⵎⵏⵜⴰⵢⵏ ⵙ ⵓⵙⵡⴰⵍⴰ ⵏⵏⵙⵏ ⴷ ⵓⵙⵎⵎⵍ ⵏⵏⵙⵏ ⴷ ⵉⴳⵉ ⵏ ⵉⵙⵡⵓⴷⴷⵓⵜⵏ ⵉⵙⵓⵖⵏⵏ ⵉ ⵓⵎⵢⴰⵡⴰⵙ ⵏⵏⵙⵏ, ⴳ ⵉⵡⵜⵜⴰ ⵏ ⵜⵡⵓⵔⵉⵡⵉⵏ ⵏⵏⵙ.
ⵎⴽ ⵉⴼⴰⵡ ⵉ ⵓⵙⵇⵇⵉⵎ ⵎⴰⵙ ⵜⴰⵎⵓ ⵜⵓⵏⵔⵣⵉⵜ ⵏⵏⵉ ⵜ ⵉⴷ ⵉⵕⴰⵃⵏ ⴳ ⵜⵥⵍⴰⵢⵜ ⵏ ⵜⵎⵔⵙⵍⵜ ⵏ ⵓⵎⴰⵣⵣⴰⵍ, ⴷⴰ ⴰⵙ ⵉⵙⵡⴰⵍⴰ ⵜⴰⵏⵓⵔⵣⵉⵜ, ⵉⵙⵙⵉⵡⴹ ⴰⵏⵖⵎⵉⵙ ⵉ ⵉⵙⵏⵏⴰⵔⴰⵣⵏ ⵏⵜⴰⵢⵏⵉⵏ ⵙ ⵎⴰⵢⴰ ⵏⵏ.
ⴷⴰ ⵜⵜⵓⵙⵡⴰⵍⴰⵏⵜ ⵜⵏⵓⵔⵣⵉⵏ ⵙ ⵓⵙⵔⵉⴷ ⵉ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ, ⵏⵉⵖ ⵉ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ, ⵣⵖ ⴷⴰⵔ ⵓⴳⴳⵉⴷⵏ ⵉⵏⵉⵎⴰⵏⵏ ⵏⵉⵖ ⵉⵖⴰⵔⴰⵏⵏ, ⵙ ⵜⴼⵔⵉⵙⵜ ⵜⴰⵎⴷⴰⵏⵜ ⵏⵉⵖ ⵜⴰⵎⴳⵔⴰⵡⵜ, ⵣⵖ ⴷⴰⵔ ⵓⵙⵏⵏⴰⵔⴰⵣ ⵏⵉⵖ ⵡⴰⵏⵏ ⵜ ⵉⴳⵏⵙⴻⵙⵏ. ⵉⵣⵎⵔ ⵓⵙⵏⵏⴰⵔⴰⵣ ⴰⴷ ⵉⵙⵡⴰⵍⴰ ⵜⵉⵏⵓⵔⵣⵉⵏ ⵙ ⵜⴱⵔⵉⴷⵜ ⵏ ⵜⵙⴰⵡⴰⵢⵜ ⵜⵓⵏⵣⵉⵍⵜ ⵏⵉⵖ ⵜⴰⵏⴼⵔⵓⵜ ⵏⵉⵖ ⵜⴰⵍⵉⴽⵟⵕⵓⵏⵉⵜ ⵏⵉⵖ ⵜⵜ ⵉⵙⵔⵙ ⵙ ⵓⵙⵔⵉⴷ ⴳ ⵓⵙⵖⵉⵎ ⵏ ⵓⵙⵇⵇⵉⵎ ⵏⵉⵖ ⵜⴰⵙⵇⵇⵉⵎⵜ ⵜⴰⵏⵎⵏⴰⴹⵜ ⵏⵏⴰ ⵉⴳⴰⵏ ⵜⴰⵎⵏⵜⴰⵢⵜ.