ⵉⵏⵔⵣⴰⴼ ⵏⵏⵖ ⵉⵄⵣⵣⴰⵏ;
ⴰⵙⴳⴳⵯⴰⵙ ⴰⴷ, ⵏⵏⵉ ⵙⵙⵏⵜⵉⵖ ⵙ ⵜⴼⵔⵉⵙⵜ ⵉⵏⵓ ⴷ ⵜⵏⵙⵙⵉⵅⴼⵜ ⵜⴰⵎⴰⵢⵏⵓⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⴽⵜⵓⵔⵏ ⵙ ⵜⵏⵥⴰⵕ, ⵍⵍⴰⵏⵉⵏ ⴷ ⵜⵉⴷ ⴷ ⵢⵓⴳⴳⴰⵏ, ⵜⴳ ⴰⵡⴷ ⵜⴰⵎⵍⴷⴰ ⵏ ⵓⵙⵎⴰⵢⵏⵓ ⵏ ⵜⵎⵔⵉⵙⵜ ⵏ ⵜⵎⴰⵣⵉⵔⵜ ⵏⵏⵖ ⴳ ⵢⵉⴳⵔ ⵏ ⵓⵙⴷⵓⵙ ⵏ ⵡⴰⵔⴰⵢ ⴷ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵔⵙⵏ ⴷ ⵓⵙⴷⵓⵙ ⵏ ⵓⵎⵄⵉⵏⵏ ⵏⵏⵖ ⴷ ⵓⵙⵙⵉⵔⵉⵡ ⵏ ⵓⵙⴰⵜⵉ ⵏⵏⵙ ⴰⴼⴰⴷ ⴰⴷ ⵙⵉⵔⵙⵏ ⴱⵖⵔⵏ ⵉⵙⵎⵉⵍⵏ ⴽⵓⴽⴹⵏⵉⵏ ⴳ ⵡⴰⵎⵓⵏ, ⵏⵏⵉ ⴱⴷⴷⴰ ⵉⵜⵜⵓⵙⵙⵓⴽⵉⵏ ⵅⴼ ⵉⵙⵉⵣⵡⵔⵏ ⵏ ⵜⵙⵔⵜⴰⵢ ⵏⵏⵖ ⵜⵉⴳⴷⵓⴷⴰⵏⵉⵏ.
ⵜⵉⵔⴰⵜ ⵏⵏⵖ ⴰⴷ ⵏⵚⴽⵓ ⵍⵎⵖⵔⵉⴱ, ⴰⵡⴰⵏⴽ ⵏ ⵓⵙⵍⴳⵏ, ⴷ ⵜⵖⴰⵡⵙⴰ ⵉⵕⵚⴰⵏ ⵙ ⵓⵙⵓⵖⵏ, ⵏⵏⵉ ⵓⵔ ⵉⵜⵜⵛⵛⴹⵏ, ⵜⴳ ⴰⵡⴷ ⵜⴰⵏⵉⵍⴰⵡⵜ ⴳ ⵢⴰⵜ ⵜⵉⵣⵉ.
ⵜⵕⵚⴰ ⵖ ⵓⵙⵜⴰⵢ ⵏⵏⵙ ⴷ ⵓⵔⵣⴰⴽ ⵏ ⵉⴱⴹⵉ ⵏ ⵓⵙⵍⴳⵏ ⴷ ⵉⵎⵏⵣⴰⵢⵏ ⴷ ⵜⵉⵏⴷⵉⵜⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴽⴷⴰ ⵉⵜⵜⵢⴰⵔⴰⵏ ⵖ ⵓⴷⵓⵙⵜⵓⵔ, ⵏⵏⵉ ⵉⴳⴰⵏ ⵜⴰⵎⵖⵓⵏⵜ ⵏ ⵜⵉⴷⵜ ⵉⵏⴳⵔ ⵜⵏⵎⵓⵔⵉⵢⵉⵏ ⴷ ⵉⵏⵎⵓⵔⴰⵏ ⵉⵎⵖⵔⵉⴱⵉⵢⵏ, ⴷ ⵎⴽⵍⵍⵉ ⵉⵜⵜⵢⴰⵔⴰⵏ ⵖ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⵏⵏⵉ ⵜⵙⵖⵣⵏ ⵜⴳⵍⴷⵉⵜ.
ⴷ ⵜⴰⵏⵉⵍⴰⵡⵜ, ⵍⵍⵉⵖ ⵜⵙⵓⵍ ⵜⴷⵉⵎⵓⵇⵕⴰⵟⵉⵜ ⵏ ⵜⵉⴷⵜ ⵜⴳⴰ ⴷⴰⵜ ⵇⴰⵃ ⵜⴳⴰ ⵜⴰⴷⵉⵎⵓⵇⵕⴰⵟⵉⵜ ⵜⴰⵎⵔⵙⴰⵍⵜ ⵖ ⵜⴳⴰ ⵜⴷⵔⴰⵡⵜ ⵏ ⵉⵏⵎⵓⵔⴰⵏ ⴳ ⵜⵎⵔⵙⴰⵍ ⴰⵎⵏⴰⵔ ⵏ ⵓⵏⴱⴰⴹ ⴰⵎⴷⵏⴰⵏ. ⵜⴳⴰ ⵜⵥⵍⴰⵢⵜ ⵜⴰⵎⵉⵔⵉⵡⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⵉ ⴰⵙ ⵉⴼⴽⴰ ⵓⵙⵍⴳⵏ ⵏⵏⵉ ⵜ ⵉⵙⵏⵎⴰⵍⴰⵏ, ⵜⴰⵎⴰⵜⴰⵔⵜ ⵏ ⵜⵉⵔⴰⵜ ⵏ ⵜⵎⴰⵣⵉⵔⵜ ⵏⵏⵖ ⴳ ⵓⵙⵕⵚⵚⴰ ⵏ ⵉⵎⵏⵣⴰⵢⵏ ⵏ ⵜⵣⵔⴼⵜ ⴷ ⵡⴰⴷⴷⵓⵔ ⴷ ⵜⴷⵔⴼⵉⵏ, ⵏⵏⵉ ⵉⴳⴰⵏ ⵉⵎⵏⵣⴰⵢⵏ ⵉⴷⵙⵍⴰⵏⵏ ⴳ ⵡⴰⵎⵓⵏ ⵏⵏⵖ ⵏⵏⴰ ⵖ ⵉⴳⴰ ⵓⵎⵙⵓⵔⵓⴼ ⴷ ⵓⵎⵢⴰⵏⴰⵡ ⴷ ⵓⵏⵏⵓⵕⵥⵎ ⵅⴼ ⵡⴰⵢⵢⴰⴹ ⴰⵙⴰⴼⵓ ⵏⵏⵉ ⴱⴷⴷⴰ ⵉⵙⵙⵉⴷⴷⵏ ⴰⵎⵣⵔⵓⵢ ⵏⵏⵙ ⴷ ⵜⵉⵍⴰⵡⵜ ⵏⵏⵙ.
ⵙⴷⴷⵉⴷⵏ ⵉⵙⵡⴰⵍⴰⵜⵏ ⴼⴰⵡⵏⵉⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⵅⴼ ⵜⵉⵏⴷⵉ ⵏ ⵓⵙⵔⵓⵙ ⵏ ⵉⵎⴰⵙⵙⵏ ⵉⵙⵉⵎⴰⵏⵏ ⴳ ⵢⵉⴳⵔ ⵏ ⵡⴰⵔⴰⵢ ⴷ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵔⵙⵏ, ⵉⵣⴷⵉ ⵓⵙⴽⴽⵉⵏ ⵙ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ, ⵉⵎⵉⵙ ⴰⵏⴰⵎⵓⵔ ⵏ ⵓⵙⵎⴰⵎⵎⵉ ⵉⵥⵍⵉⵏ ⵙ ⵡⴰⵣⵣⴰⵏⵏ ⵓⵏⴳⵉⵙⵏ ⵏ ⵜⵕⵥⵉⵢⵉⵏ ⵏ ⵉⵣⵔⴼⴰⵏ ⵏ ⵡⴰⵣⵣⴰⵏ, ⴷ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⴼⵔⴰⴳ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ.
ⵜⴳⴰ ⵜⵙⵉⵎⴰⵏⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⴹⴰⴽⴰⵍ ⴰⴷⵙⵍⴰⵏ ⵉ ⵜⵕⵡⵉ ⵏ ⵜⵡⵓⵔⵉ ⵏⵏⵙ, ⴷ ⵜⴼⴰⴷⴰ ⵏ ⵓⵣⵓⵛⵛⵍ ⵉ ⵜⵎⴷⵔⴰⵡⵜ ⵉⵣⴷⴷⵉⴳⵏ ⴷ ⵉⵕⵡⴰⵏ ⴰⴽⴷ ⵜⵎⵔⵙⴰⵍ ⵏ ⵜⴳⵍⴷⵉⵜ, ⵉⵖ ⴳⴰⵏⵜ ⴰⴱⵕⵍⴰⵎⴰⵏ, ⵜⴰⵏⴱⴰⴹⵜ ⴷ ⵜⵏⴱⴰⴹⵜ ⵜⴰⵏⵣⵔⴰⴼⵜ, ⴷ ⵓⵍⴰ ⴰⵎⵓⵏ ⵓⵖⵔⵉⵎ, ⵏⵏⵉ ⵉⵖⵜⵙ ⵓⴷⵓⵙⵜⵓⵔ ⵏⵏⵖ ⴷ ⴰⵎⴳⴳⴰⵢ ⵏⵏⵉ ⴷ ⵉⵇⵇⴰⵏ ⴳ ⵓⵏⴳⵔⴰⵡ ⵏⵏⵖ ⴰⵙⵔⵜⴰⵏ, ⴷ ⵜⵙⴷⴰⵡⵉⵜ ⵏⵏⵉ ⵉⵜⵜⵓⵔⴰⵔⵏ ⵜⴰⵎⵍⴰⵍⵜ ⵜⴰⵅⴰⵜⴰⵔⵜ ⴳ ⵓⵙⴱⵖⵔ ⵏ ⵓⵎⴹⴰⴽⴰⵕ ⴷ ⵓⵙⵏⴼⵍⵓⵍ ⴷ ⵓⵎⵔⴰⵔⴰ ⵏ ⵜⵡⵏⴳⵉⵎⵉⵏ, ⴱⵍⴰ ⴰⴷ ⵏⵜⵜⵓ ⴰⵎⵢⴰⵖ ⵏⵏⵖ ⴰⴽⴷ ⵜⵎⴰⴷⴷⴰⵙⵉⵏ ⵏⵏⵉ ⴷ ⵏⵛⵛⴰⵔ ⵉⵎⵏⵣⴰⵢⵏ ⴷ ⵉⵏⴰⵡⴰⵢⵏ ⵉⴳⵔⴰⵖⵍⴰⵏⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⴽⵙⵓⵍⵏⵉⵏ.
ⵉⴳⴰ ⵡⴰⵕⵕⴰⵥ ⵏ ⵜⵉⵏⴷⵉⵜⵉⵏ ⵜⵉⵖⵣⵓⵔⴰⵏⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⵣⵓⵣⵣⵔ ⵏⵏⵙⵏⵜ  ⵜⵎⵙⵜⴳⴳⴰⵔⵜ ⵜⵓⴼⵔⵉⴷⵜ ⴷ ⵜⵎⴳⵔⵓⵜ, ⵏⵏⵉ ⴷ ⵉⴼⴼⵖⵏ ⵙⴳ ⵜⴷⵔⴼⵉⵏ ⵏ ⴽⵓ ⵓⴼⵔⵉⴷ. ⵙ ⵎⴰⵏ ⴰⵢⴰ, ⵉⵍⵍⴰ ⵅⴼ ⴽⵓ ⵢⴰⵏ ⴰⴷ ⵉⴷⵔⵓ, ⵉⵍⵜⵖ ⴳ ⵓⵙⴰⴽⴰ ⴰⴷ ⵏⵏⵉ ⵉⴳⴰⵏ ⴰⴱⵔⵉⴷ ⵉⵕⵡⴰⵏ ⵉ ⵓⵣⵣⵉⴳⵣ ⴳ ⵓⵖⴰⵔⴰⵙ ⵏ ⵓⵎⵣⴰⵖ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⴰⵣⵉⵔⵜ ⵏⵏⵖ.
ⴰⵎⵉⵏⴰ ⴱⵓⵄⵢⵢⴰⵛ
ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ