ⵜⵙⵏⵎⴰⵍⴰ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵢⴰⵏ ⵓⴳⵔⴰⵡ ⴰⴽⴷ ⵓⵎⴰⵔⴰ ⴰⵎⴰⵜⴰⵢ ⵏ ⵓⵏⵎⴰⵍⵍⵓ ⴰⵏⴰⵎⵓⵔ ⵏ ⵓⵙⵙⵍⵎⴷ ⴰⵏⴰⴼⵍⵍⴰ ⵎⴰⵙⵙ ⵊⴰⵎⴰⵍ ⵚⵚⴱⴱⴰⵏⵉ ⴷ ⴽⵔⴰ ⵏ ⵉⴳⵎⴰⵎⵏ ⵙⴳ ⵓⵙⵉⵔⴰ ⴰⵎⵣⵣⴳⴰⵔ ⵏ ⵓⵏⵎⴰⵍⵍⵓ, ⴰⵙⵙ ⵏ ⵓⵙⵉⵎⵡⴰⵙ 4 ⴱⵕⴰⵢⵕ 2022 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴳ ⵕⵕⴱⴰⵟ, ⴳ ⵓⵙⴰⵜⵉ ⵏ ⵓⴹⴼⴼⵓⵕ ⵏ ⵜⵎⵔⵙⵍⵜ ⵉ ⵜⵎⵙⴰⵔⵉⵏ ⵏ ⵜⴷⴰⴱⴰⵔⵜ ⵜⴰⵡⵙⵢⴰⵏⵜ ⴷ ⵓⵏⵥⵣ ⴳ ⵓⴳⵏⵙⵓ ⵏ ⴽⵔⴰ ⵏ ⵜⵖⵉⵡⴰⵏⵉⵏ ⴷ ⵉⵙⵉⵏⴰⴳⵏ ⵉⵏⴰⴼⵍⵍⴰⵜⵏ ⴳ ⵍⵎⵖⵔⵉⴱ, ⵉⵜⵜⵡⴰⵙⵙⵏ ⵙ ⵓⵙⴷⴰⵡ ⵏ "ⵜⴰⵡⵙⵢⴰⵏⵜ ⵎⴳⴰⵍ ⵜⵏⵇⵇⴰⴹ" ⵜⵙⴷⴷⵉⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴳ ⵓⴳⵔⴰⵡ ⴰⴷ ⵅⴼ ⵡⴰⵜⵉⴳ ⵏ ⵓⵙⵔⵇⴱ ⵏ ⵓⵙⵙⵉⵡⴹ ⴷ ⵓⵚⵕⴰⴹ ⵉⴷⴷⵖ ⵉⴳⴰ ⵉⴳⵉ ⴰⵏⴰⵎⵓⵔ ⴷ ⵡⴰⵏⵏⴰⵍ ⵏ ⵜⵎⵣⴰⵖⵜ ⵏ ⵜⵙⴷⴰⵡⵉⵢⵉⵏ ⵙ ⵓⵙⵡⵓⵔⵉ ⵅⴼ ⵡⴰⴷⴷⴰⴷⵏ ⵙ ⴽⵉⴳⴰⵏ ⵏ ⵜⴰⵎⴰⴼⴰⵡⵜ. ⵎⴽⴷⴰ ⵜⵙⵙⵓⵜⵔ ⵎⴰⵙⵙⴰ ⴱⵓⵄⵢⵢⴰⵛ ⵙⴳ ⴰⴽⴽⵯ ⵉⵙⵍⵎⴰⴷⵏ ⵏ ⵜⵙⴷⴰⵡⵉⵜ ⴰⴷ ⵙⵡⵉⵏⴳⵎⵏ ⴳ ⵜⴱⵔⵉⴷⵉⵏ ⵏ ⵓⵙⵡⵓⴷⴷⵓ ⴰⵏⵉⵎⴰⵏ (Autorégulation) ⵏ ⵜⵓⵎⴰⵏⵜ ⴰⴷ ⴰⴼⴰⴷ ⴰⴷ ⵜⴻⵜⵜⵓⴼⵔⴰⴳ ⵜⵙⴷⴰⵡⵉⵜ, ⵏⵏⴰ ⵉⴳⴰⵏ ⴰⵎⵓⵍⵍⵉ ⴰⵙⵜⵕⴰⵜⵉⵊⵉ ⵏ ⵓⵙⵇⵇⵉⵎ ⴳ ⵢⵉⴳⵔ ⵏ ⵜⵏⴽⵔⴰ ⵙ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⵙⴳ ⵜⵙⴳⴰ ⵏⵏⵙ, ⵉⵙⵔⵙ ⵎⴰⵙⵙ ⵊⴰⵎⴰⵍ ⵚⵚⴱⴱⴰⵏⵉ, ⴰⵎⴰⵔⴰ ⴰⵎⴰⵜⴰⵢ ⵏ ⵓⵏⵎⴰⵍⵍⵓ ⴰⵏⴰⵎⵓⵔ ⵏ ⵓⵙⵙⵍⵎⴷ ⴰⵏⴰⴼⵍⵍⴰ, ⵉⵥⵕⵉ ⵏⵏⵙ ⵅⴼ ⵜⵓⵎⴰⵏⵜ ⴰⴷ, ⵉⵙⵉⵡⵍ ⵅⴼ ⴽⵔⴰ ⵏ ⵜⵎⵙⴽⵔⵉⵏ ⵜⵉⵎⵓⴼⴰⵢⵉⵏ ⵜⵉⴳⵔⴰⵖⵍⴰⵏⵉⵏ ⴳ ⵢⵉⴳⵔ ⴰⴷ, ⵉⵙⴷⴷⵉⴷ ⵅⴼ ⵡⴰⵜⵉⴳ ⵏ ⵓⵙⵡⵉⵏⴳⵎ ⴳ ⵉⵎⴰⵙⵙⵏ ⴷⵓⵙⵏⵉⵏ ⴳ ⵓⴼⵔⴰⴳ ⵏ ⵉⵎⵃⴹⴰⵕⵏ ⴷ ⵉⵙⵍⵎⴰⴷⵏ ⵃⵎⴰ ⴰⴷ ⵉⵜⵜⵡⴰⵃⴹⴰⵡ ⵓⴱⵓⵔⵣ ⵏ ⵜⵙⴷⴰⵡⵉⵜ. ⵉⴼⴼⵓⵖ ⵓⴳⵔⴰⵡ ⴰⴷ ⴰⵎⵣⵡⴰⵔⵓ ⵙ ⵓⵙⵓⵖⵏ ⵏ ⵓⵣⴷⴰⵢ ⵏ ⵓⵎⵙⴳⴷⴰⵍ ⵅⴼ ⵜⴱⵔⵉⴷⵉⵏ ⵉⵕⵡⴰⵏ ⵃⵎⴰ ⴰⴷ ⵜⴻⵜⵜⵓⵙⴱⴷⴷⵉ ⵜⴽⵕⴹⵉ ⵉⴱⴷⴷⵏ ⵅⴼ ⵡⴰⵏⴰⵡ ⴳ ⵓⴳⵏⵙⵓ ⵏ ⵉⵙⴰⵢⵔⴰⵔⵏ ⵏ ⵜⵙⴷⴰⵡⵉⵜ.