"ⴰⵙⴼⵓⴳⵍⵓ ⴰⴷ ⴷ ⵓⵡⵏⵏⵉ ⴷ ⵜⵓⵙⵏⵜ ⵉⴼⴰⵡⵏ ⵙ ⵜⴷⵔⴰⵡⵜ ⵏ ⵜⵎⵖⴰⵔⵉⵏ ⵜⵉⵎⵖⵔⵉⴱⵉⵢⵉⵏ ⴳ ⵓⴱⵔⵉⴷ ⵏ ⵉⵙⵏⴼⵍⵏ ⵉⵏⴰⵎⵓⵏⵏ ⵍⵍⵉ ⵜⵙⵙⵏ ⵜⵎⴰⵣⵉⵔⵜ ⵏⵏⵖ ⴳ ⵙⵏⴰⵜ ⵜⵎⵔⴰⵡⵉⵏ ⵏ ⵉⵙⴳⴳⵯⴰⵙⵏ ⵉⵣⵔⵉⵏ ⴷ ⵓⵙⴷⴷⵉⴷ ⵏ ⵜⵉⵍⴰⵍⵜ ⵏⵏⵙⵏⵜ ⵜⴰⵎⵣⵡⴰⵔⵜ ⴳ ⵓⵙⴱⴷⴷⵉ ⵜⵕⵥⵉⵢⵉⵏ".

ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵉⴼⴰⵡⵜ ⵏ ⵓⵙⵉⵎⵡⴰⵙ 8 ⵎⴰⵕⵚ 2024, ⴳ ⵓⵙⵖⵉⵎ ⵏⵏⵙ ⴳ ⵕⵕⴱⴰⵟ, ⵢⴰⵏ ⵓⵏⵎⵓⵇⵇⴰⵔ ⵅⴼ ⵜⵎⴷⵔⴰⵡⵉⵏ ⵏ ⵜⵎⵖⴰⵔⵜ ⵜⵉⵎⵖⵔⵉⴱⵉⵜ ⴳ ⵓⵙⴰⴽⴰ ⵏ ⵜⵉⴷⵜ ⴷ ⵓⵙⵓⵎⵓ ⴷ ⵓⵎⵙⴼⵔⵓ, ⵙ ⵓⵣⵎⵎⵣⵓ ⵏ ⵡⴰⵙⵙ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵜⵎⵖⴰⵔⵜ ⴷ ⵓⴽⵜⵜⵓⵢ ⵡⵉⵙⵙ 20 ⵏ ⵓⵙⵔⵙ ⵏ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ, ⵙ ⵜⵉⵍⵉⵜ ⵏ ⵓⵏⴳⵉⵙⵏ ⵉⵣⵔⵉⵏ ⴷ ⵜⵡⵊⵉⵡⵉⵏ ⵏ ⵉⴷ ⴱⵓ ⵉⵣⵔⴼⴰⵏ ⴷ ⵜⵎⴹⴼⴰⵕⵉⵏ ⵏ ⵜⵡⵓⵔⵉⵡⵉⵏ ⵏ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ.

ⴳ ⵜⴳⵓⵔⵉ ⵏⵏⵙ ⵙ ⵜⵎⵍⴷⴰ ⴰⴷ, ⵜⵓⵍⵍⵖ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⴷⵔⴰⵡⵜ ⵏ ⵜⵎⵔⵙⴰⵍ ⵏ ⵜⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⴷ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴷ ⵜⵊⵉⴹⵕⵎⵜ ⵜⴰⴳⵍⴷⴰⵏⵜ ⴷ ⵓⵎⵢⴰⵖ ⵏⵏⵙⵏ ⵉⵣⴷⵉⵏ ⴷ ⵉⴷⵓⵙⵏ ⴰⴽⴷ ⵓⴱⵔⵉⴷ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ ⴳ ⵍⵎⵖⵔⵉⴱ. ⵜⵉⵏⵉ ⵎⴰⵙ ⵉⴳⴰ ⵓⵙⵜⴰⵢ ⵏ ⵓⵙⴳⵓⵎ "ⵜⵉⴷⵔⴰⵡⵉⵏ ⵏ ⵜⵎⵖⴰⵔⵜ ⵜⴰⵎⵖⵔⵉⴱⵉⵜ ⴳ ⵓⵙⴰⴽⴰ ⵏ ⵜⵉⴷⵜ ⴷ ⵓⵙⵓⵎⵓ ⴷ ⵓⵎⵙⴼⵔⵓ" ⴳ ⵓⵙⴼⵓⴳⵍⵓ ⵙ ⵡⴰⵙⵙ ⴰⵎⴰⴹⵍⴰⵏ ⵏ ⵜⵎⵖⴰⵔⵜ ⵏ ⵓⵙⴳⴳⵯⴰⵙ ⴰⴷ "ⴰⵡⵏⵏⵉ ⴷ ⵜⵓⵙⵏⵜ ⵉⴼⴰⵡⵏ ⵙ ⵜⴷⵔⴰⵡⵜ ⵏ ⵜⵎⵖⴰⵔⵉⵏ ⵜⵉⵎⵖⵔⵉⴱⵉⵢⵉⵏ ⴳ ⵓⴱⵔⵉⴷ ⵏ ⵉⵙⵏⴼⵍⵏ ⵉⵏⴰⵎⵓⵏⵏ ⵍⵍⵉ ⵜⵙⵙⵏ ⵜⵎⴰⵣⵉⵔⵜ ⵏⵏⵖ ⴳ ⵙⵏⴰⵜ ⵜⵎⵔⴰⵡⵉⵏ ⵏ ⵉⵙⴳⴳⵯⴰⵙⵏ ⵉⵣⵔⵉⵏ ⴷ ⵓⵙⴷⴷⵉⴷ ⵏ ⵜⵉⵍⴰⵍⵜ ⵏⵏⵙⵏⵜ ⵜⴰⵎⵣⵡⴰⵔⵜ ⴳ ⵓⵙⴱⴷⴷⵉ ⵜⵕⵥⵉⵢⵉⵏ".

ⵜⵙⵉⵙⴼⵉⵡ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵙⵎⵖⵔ ⵏⵏⵙ ⵉ ⵜⵎⵍⴰⵍⵉⵏ ⵜⵉⵎⵣⵡⴰⵔⵉⵏ ⵏ ⵜⵡⵜⵎⵉⵏ ⴰⴷ ⴳ ⵓⵙⴷⵓⵙ ⵏ ⵓⵎⵓⵙⵙⵓ ⵏ ⵜⵡⵜⵎⵉⵏ ⴷ ⵓⵎⵓⵙⵙⵓ ⴰⵣⵔⴼⴰⵏ ⴳ ⵍⵎⵖⵔⵉⴱ ⵙ ⵉⵙⵓⵜⴰⵢ ⵉⵎⵙⴽⵔⵏⵏ ⴷ ⵉⵏⵣⵎⴰⵔⵏ ⴳ ⵓⵙⵡⵉⵔ ⵏ ⵜⵡⵏⴳⵉⵎⵜ ⴷ ⵜⵎⵙⴽⵔⵜ. ⵉⵙⵓⵜⴰⵢ ⵏⵏⵉ ⵎⵉ ⵉⵃⴹⴰ ⵓⵎⵣⵔⵓⵢ ⵜⵉⴷⵔⴰⵡⵉⵏ ⵏⵏⵙⵏⵜ ⵜⵉⵎⵥⵍⴰⵢⵉⵏ ⴳ ⵓⵃⵟⵟⵓ ⵏ ⵜⵎⴽⵜⵉⵜ ⵏ ⵉⵙⴳⴳⵯⴰⵙⵏ ⵏ ⵍⵇⵕⴹⴰⵚ ⵙⴳ ⵣⵣⵀⵓ ⵙ ⵜⵓⴳⴳⴰ ⴷ ⵡⴰⵍⵍⴰⵙ, ⵃⵎⴰ ⴰⴷ ⵢⵉⵍⵉ ⵓⵙⵓⵎⵓ ⴷ ⵜⵣⵔⴼⵜ ⴷ ⵜⴷⵔⴰⵡⵜ ⵏⵏⵙⵏⵜ ⴳ ⵉⵙⵏⴼⵍⵏ ⵓⵙⴽⵉⵡⵏ ⴳ ⵜⵎⴰⵣⵉⵔⵜ ⵏⵏⵖ.

ⴳ ⵓⵎⵏⴰⴹ ⴰⴷ, ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ "ⵜⴽⴽⴰ ⴷ ⵜⵙⵓⵍ ⵏⵉⵜ ⵜⵎⵖⴰⵔⵜ ⵜⴰⵎⵖⵔⵉⴱⵉⵜ ⵜⴳⴰ ⵜⴰⵎⴳⴳⴰⵢⵜ ⵜⴰⵙⴳⵓⵎⴰⵏⵜ ⴳ ⵓⵎⵏⴰⴹ ⵏ ⵜⴳⵎⵉ ⵜⴰⵏⴰⵎⵓⵏⵜ ⴷ ⵜⵡⵏⴳⵉⵎⵜ ⴷ ⵜⵏⵔⵎⵎⵓⵙⵜ ⵏⵏⴰ ⵉⴳⴰⵏ ⴰⴳⵔ ⵏ ⵓⴱⵔⵉⴷ ⴰⵏⴰⵎⵓⵔ ⵏ ⵓⵡⴰⴹ ⵖⵔ ⵉⵙⴽⵉⵍ ⴷ ⵜⵙⵓⵎⵓⵜ. ⴰⴱⵔⵉⴷ ⵏⵏⵉ ⵔⴰⴷ ⵉⵣⴷⵉ ⴰⴼⴰⴷ ⴰⴷ ⵜⵜⵓⵙⵏⴼⵍⵏ ⵉⵔⵎⵎⵓⵙⵏ ⴷ ⵜⵡⵏⴳⵉⵎⵉⵏ ⵏⵏⴰ ⵓⵔ ⵉⵎⵣⴰⵔⴰⵢⵏ ⵅⴼ ⵜⵉⵏⴷⵉⵜⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵟⵟⴰⵚⵏⵜ ⴰⴷⴷⵓⵔ ⵏ ⵜⵎⵖⴰⵔⵜ". ⵜⵙⴷⴷⵉⴷ ⴳ ⵓⵣⵎⵎⵣⵓ ⴷⴷⵖ ⵜⴰⴼⵍⵙⵜ ⵏⵏⵙ ⵎⴰⵙ ⴷ "ⵙ ⵜⵣⵎⵎⴰⵔ ⵏⵏⵖ ⴷ ⵜⵉⵔⴰⵜ ⵏⵏⵖ ⴷ ⵓⵏⴰⵔⵓⵣ ⵏⵏⵖ, ⵔⴰⴷ ⵏⵎⵓⵔⵙ ⴳ ⵓⵙⴱⴷⴷⵉ ⵏ ⴽⵓⵍⵍⵓ ⵜⵉⵎⵓⴽⵔⵉⵙⵉⵏ ⵍⵍⵉ ⵉⵙⵡⵓⵜⵜⵙⵏ ⴰⵙⴽⵓⴽⴹ ⵏ ⵜⵎⵖⴰⵔⵜ".

ⵜⵙⵎⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵜⴰⴳⵓⵔⵉ ⵏⵏⵙ ⵙ ⵓⵙⴷⴷⵉⴷ ⵎⴰⵙ ⵜⵙⵖⴰⵡⵙⴰ " ⴽⵓ ⵜⴰⵎⵢⴰⴷⴰⵙⵜ ⵏ ⵓⵙⴳⵓⵎ ⵏ ⵉⵙⴽⵉⵍ ⴷ ⵜⵙⵓⵎⵓⵜ ⵙ ⵓⵔⵎⴰⵙ ⵏ ⵡⵓⴷⵎⴰⵡⵏ ⵏ ⵓⵎⵢⴰⵖ ⵉⵏⴳⵔ ⵜⵙⴳⴳⵯⵉⵏ ⵏ ⵉⵏⴳⵎⵓⵜⵏ ⴷ ⵓⵙⵙⴷⵔⵓ ⵏ ⵜⵖⵔⵉ ⵏ ⵜⵉⵍⴰⵡⵜ ⵏ ⵡⴰⵎⵓⵏ ⴰⵎⵖⵔⴰⴱⵉ ⴰⴼⴰⴷ ⴰⴷ ⵜⵜⵓⵙⵎⴰⵢⵏⵓⵏⵜ ⵜⵎⵔⴰⵔⵓⵜⵉⵏ ⵏ ⵜⵏⴼⵔⵓⵜ ⵏ ⵓⵙⴷⵓⵙ ⵏ ⵉⴼⵔⴷⵉⵙⵏ ⵏⵏⵙ ". ⵜⵉⵏⵉ ⵎⴰⵙ ⵉⴳⴰ ⵓⴱⵔⵉⴷ ⵏ ⵉⵙⴽⵉⵍ ⴳ ⵍⵎⵖⵔⵉⴱ ⴰⴱⵔⵉⴷ ⵉⵙⵙⵏⵜⵉⵏ ⴳ ⵓⵙⵡⵉⵔ ⴰⵏⴰⵎⵓⵔ ⵉⵙⵙⵉⵔ ⴷ ⵎⴰⴷ ⵉⴳⴰⵏ ⴰⵖⵣⵓⵔⴰⵏ, ⴷ ⵔⴰⴷ ⵉⵣⴷⵉ ⴰⴼⴰⴷ ⴰⴷ ⵜⵜⵓⵙⵏⴼⵍⵏ ⵏ ⵡⴰⵏⵏⵍⵉⵜⵏ ⵉⵜⵜⵓⵎⵏⴰⵍⴰ ⴽⵔⴰⵢⴳⴰⵜ ⵓⵙⴽⴽⵉⵏ ⵍⵍⵉ ⵉⵥⴹⴰⵕⵏ ⴰⴷ ⵉⵕⵥⵥ ⵉⵣⵔⴼⴰⵏ ⵏ ⵜⵎⵖⴰⵔⵜ ⵏⵖⴷⴷ ⴰⴷ ⵉⵙⴽⵓⴽⴹ ⵜⵉⵎⵍⴰⵍⵉⵏ ⵏⵏⵙ.

ⴳ ⵜⵙⴳⴰ ⵏⵏⵙ, ⵜⴼⴽⴰ ⵎⴰⵙⵙⴰ ⴼⴰⵟⵉⵏⴰ ⵍⴱⴱⵉⵀ, ⵜⴰⵎⴰⵔⴰⵜ ⴷ ⵜⵎⴳⴳⴰⵢⵜ ⵜⴰⵣⵔⴼⴰⵏⵜ ⴷ ⵜⵏⴰⵎⵓⵥⵜ ⵉⵣⵔⵉⵏ,  ⵜⵓⴳⴳⴰ ⵏ ⵜⵉⵔⵎⵉⵜ ⵏⵏⵙ ⵅⴼ ⵙ ⵜⴰⵍⵖⴰ ⵜⴰⵡⵜⵎⴰⵏⵜ ⴷ ⵜⵉⵍⴰⵍⵜ ⵏ ⵜⵉⵔⵔⴰ ⵜⴰⵙⴽⵍⴰⵏⵜ ⴳ ⵓⵙⵏⵜⵎ ⵏ ⵓⵎⵣⵔⵓⵢ, ⴰⵎⵣⵔⵓⵢ ⵏ ⵜⵡⵜⵎⵉⵏ ⵜⵉⵎⵖⵏⴰⵙⵉⵏ ⴷ ⵜⴰⵡⵊⵉⵡⵉⵏ ⵏ ⵉⵏⴰⵎⵓⵥⵏ… ⵃⵎⴰ ⴰⴷ ⵥⴹⴰⵕⵏⵜ ⵜⵙⵓⵜⵉⵏ ⵜⵉⵎⴰⵢⵏⵓⵜⵉⵏ ⴰⴷ ⴰⴽⵯⵣⵏⵜ ⴰⵙⵙⵔⵇⴱ ⵏ ⵜⵎⵎⴰⵜⵉⵏ ⴷ ⵜⴰⵢⵜⵎⴰⵜⵉⵏ ⴷ ⵜⵎⵖⴰⵔⵉⵏ ⴷ ⵜⴷⵔⴰⵡⵜ ⵏⵏⵙⵏⵜ ⴳ ⵓⵙⴷⴷⵉ ⵏ ⵓⵙⵏⴼⵍ... ".

ⵉⵙⵙⵏ ⵓⵏⵎⵓⵇⵇⴰⵔ ⴰⴷ ⵜⵉⵙⴷⴷⴰⵔⵉⵏ ⵜⵉⵏⴰⵥⵓⵕⵉⵏ ⵏⵏⵉ ⵜⵙⵏⴼⵍⵓⵍ ⵢⴰⵜ ⵜⵔⴰⴱⴱⵓⵜ ⵏ ⵜⵄⵔⵔⵉⵎⵉⵏ, ⴳⵔ ⵍⴽⵓⵕⴰⵍ ⵏ ⵜⵄⵔⵔⵉⵎⵉⵏ ⵏ ⵓⵙⴰⵢⵔⴰⵔ ⵏ ⵓⵙⵏⴼⵍⵓⵍ ⴳ ⵜⴳⵎⵎⵉ ⵜⵓⵎⵍⵉⵍⵜ, ⴷ ⵓⵙⵎⵏⵉⴷ ⵏ ⵜⴼⵉⵍⵉⵏ ⵏ ⵡⵓⵏⵓⵖ ⵏ ⵜⵄⵔⵔⵉⵎⵉⵏ ⴳ ⵓⵙⵓⵔⵙⵏ ⵓⵎⵎⵓⵄⴹⵕ, ⴷ ⵓⴼⵙⴰⵔ ⵏ ⵢⴰⵏ ⵓⵙⴰⵔⵓ ⵉⵙⵙⵏⵜⴰⵎⵏ ⵜⵉⵙⵏⵜⴰⵢⵉⵏ ⵏ ⵓⵙⵇⵇⵉⵎ ⴳ ⵢⵉⴳⵔ ⵏ ⵓⵏⵄⴰⵕ ⵅⴼ ⵉⵣⵔⴼⴰⵏ ⵏ ⵜⵎⵖⴰⵔⵜ.

ⵉⵙⵎⴷ ⵓⵏⵎⵓⵇⵇⴰⵔ ⴰⴷ ⵙ ⵓⵙⵎⵖⵔ ⵏ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵉ ⵎⴰⵙⵙⴰ ⵎⴱⴰⵕⴽⴰ ⴱⵍⵄⴰⵕⴱⵉ, ⴰⵙⴰⵜⵉ ⴳ ⵓⵙⵇⵇⵉⵎ, ⵅⴼ ⵡⴰⵏⵏⴰⵍ ⵏⵏⵙ ⵉ ⵓⵏⴳⵉⵙⵏ ⴷ ⵉⴷ ⴱⵓ ⵉⵣⵔⴼⴰⵏ ⴳ ⵢⵉⴳⵔ ⵏ ⵓⵖⴰⵎⵓⵙ ⴰⴷⵓⵙⴰⵏ. "ⴰⵙⵙ ⴰⴷ, ⴷⴰ ⵏⵙⵙⵎⵖⴰⵔ ⵎⴰⵙⵙⴰ ⵎⴱⴰⵕⴽⴰ ⴱⵍⵄⴰⵕⴱⵉ, ⵍⵍⵉ ⵉⴼⴽⴰⵏ ⵜⵓⴷⵔⵣⵔⵉ ⵜⴰⵣⵣⵓⵍⴰⵏⵜ ⵉ ⵓⵙⵡⵓⵔⵉ ⵉⴷⵓⵙⵏ ⵉ ⵓⵏⴳⵉⵙⵏ ⵏ ⵜⵕⵥⵉⵢⵉⵏ ⴷ ⵉⴷ ⴱⵓ ⵉⵣⵔⴼⴰⵏ ⴳ ⵓⵙⴰⵜⵉ ⵏ ⵜⵡⵓⵔⵉⵡⵉⵏ ⵏ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ, ⵜⴹⴼⵕ ⵙ ⴽⵉⴳⴰⵏ ⵏ ⵜⵎⴰⴳⵍⴰⵢⵜ ⴷ ⵓⵙⵓⵖⵏ ⵜⵉⵎⵙⴰⵔⵉⵏ ⵍⵍⵉ ⵅⴼ ⵉⵙⵡⵓⵔⵉ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ " ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ.