ⴳ ⵓⵙⴰⵜⵉ ⵏ ⵓⵣⴷⴰⵢ ⵏ ⵓⵙⵉⴷⵔ ⵏ ⵜⵡⵓⵔⵉⵡⵉⵏ ⵏ ⵡⴰⵙⵙ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵜⵡⵜⵎⵉⵏ (ⵎⴰⵕⵚ 2025), ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵙⵙ ⵏ ⵓⵙⵉⵏⴰⵙ 25 ⵎⴰⵕⵚ 2025, ⵢⴰⵜ ⵜⵙⴰⵡⵔⵜ ⵏ ⵓⵎⴹⴰⴽⴰⵕ ⴷ ⵓⵎⵢⴰⵖ ⴷⴷⴰⵡ ⵏ ⵜⵎⴰⵜⴰⵔⵜ: “ⵎⴰⵏ ⵜⵉⵍⴰⵍⵉⵏ ⵏ ⵜⵎⵙⵙⵏⵜⵉⵜⵉⵏ ⴳ ⵓⵙⴷⵓⵙ ⵏ ⵢⵉⵙⴽⵉⵍ ⴷ ⵓⵙⵉⴷⴼ: ⵜⵉⵙⵏⵜⴰⵢⵉⵏ ⴷ ⵉⵙⴰⴽⴰⵜⵏ ⵉⵡⵜⵎⴰⵏⵏ”, ⴳ ⵓⵙⵖⵉⵎ ⵏ ⵓⵙⵉⵏⴰⴳ ⵏ ⵕⵕⴱⴰⵟ - ⴷⵔⵉⵙ ⴱⵏⵣⴽⵔⵉ - ⵉ ⵉⵣⵔⴼⴰⵏ ⵏ ⵓⴼⴳⴰⵏ, ⵙⴳ ⵜⵙⵔⴰⴳⵜ ⵜⵉⵙⵙ ⵢⴰⵜ ⵏ ⵜⵣⴷⵡⵉⵜ (13:00).

ⵜⴽⵛⵎ ⵜⵙⵏⵜⴰⵢⵜ ⴰⴷ ⴳ ⵜⵓⴳⴳⴰⵣ ⵏ ⵓⵙⵇⵇⵉⵎ ⵉⵣⴷⵉⵏ ⵉ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵜⵡⵜⵎⵉⵏ ⴷ ⵜⵔⴱⴰⵜⵉⵏ, ⴷ ⵓⵙⴷⵓⵙ ⵏ ⵢⵉⵙⴽⵉⵍ ⵏⴳⵔ ⵜⴰⴳⴳⴰⵢⵉⵏ, ⴷ ⵓⵙⴱⴷⴷⵉ ⵏ ⴰⴽⴽⵯ ⵜⴰⵍⵖⵉⵡⵉⵏ ⵏ ⵓⵙⵏⵓⵃⵢⵓ ⵉⴱⴷⴷⵏ ⵅⴼ ⵡⴰⵏⴰⵡ ⴰⵏⴰⵎⵓⵏ, ⵖ ⵢⴰⵎⵓ ⴰⵡⴷ ⵓⴳⵯⵏⵙ ⵏ ⵓⴳⴰⴷⴰⵣ ⵏ ⵜⵡⵓⵔⵉ ⴷ ⵜⵎⵙⵙⵏⵜⵉⵜⵉⵏ ⵜⵉⵎⵖⵔⵉⴱⵉⵢⵉⵏ.

ⵙ ⵓⵣⵎⵣⵣⵓ ⴰⴷ, ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ: “ⵜⴰⵎⵙⵙⵏⵜⵉⵜ ⵓⵔ ⵜⴳⵉ ⵖⴰⵙ ⴰⵎⵙⴽⴰⵔ ⴰⴷⵎⵙⴰⵏ, ⵎⴰⵛⴰ ⵜⵥⴹⴰⵕ ⴰⵡⴷ ⴰⴷ ⵜⴳ ⵜⵉⵎⵙⵙⵉⵍⵉⵜ ⵏ ⵜⵣⵔⴼⵜ ⵜⴰⵏⴰⵎⵓⵏⵜ ⴷ ⵜⴷⴰⴱⵓⵜ ⵏ ⵓⵙⵣⵎⵔ ⵏ ⵜⵡⵜⵎⵉⵏ ⴷ ⵓⵙⴼⵙⵉ ⵏ ⵜⵡⵍⴰⴼⵉⵏ ⵜⵉⵎⴷⵢⴰⵜⵉⵏ ⵉⵣⴷⵉⵏ ⴷ ⵡⴰⵏⴰⵡ ⴰⵏⴰⵎⵓⵏ”, ⵜⵔⵏⴰ: ⵎⴰⵙ ⵉⵣⵎⵔ ⵓⵙⵖⵣⵏ ⵏ ⵜⵙⵔⵜⴰⵢ ⵜⵉⵎⵙⵓⵎⵓⵜⵉⵏ ⴷ ⵜⵉⵎⵙⵣⵎⵔⵉⵏ ⴳ ⵓⴳⵯⵏⵙⵓ ⵜⵎⵙⵙⵏⵜⵉⵜⵉⵏ ⵜⵉⵎⵖⵔⵉⴱⵉⵢⵉⵏ ⴰⴷ ⵉⵙⴷⵓⵙ ⵜⴰⵎⵢⴰⴳⴰⵏⵜ ⵏ ⵜⴷⵔⴰⵡⵜ ⵏ ⵜⵎⵖⴰⵔⵉⵏ ⴳ ⵓⴳⴰⴷⴰⵣ ⵏ ⵜⵡⵓⵔⵉ, ⵙ ⵜⵡⵉⵍⴰ ⵏⵏⴰ ⴰⵙⵏⵜ ⵉⵕⵥⵥⵎⵏ ⵎⵏⵉⴷ ⵏⵏⵙⵏⵜ ⵉⵣⵎⴰⵣ ⵉⵎⵉⵔⵉⵡⵏ ⵉ ⵜⴷⵔⴰⵡⵜ ⴳ ⵜⵏⴼⵍⵉⵜ ⴷ ⵜⵎⴳⵓⵔⵉ ⵏ ⵜⵖⵜⴰⵙⵜ".

ⵙ ⵓⵙⵎⴰⵜⴰ ⵏ ⵜⵙⵔⵜⴰⵢ ⵉⴱⴷⴷⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵓⵎⴰⵜⴰ, ⴷ ⵉⵣⵔⴼⴰⵏ ⵏ ⵜⵎⵖⴰⵔⵜ, ⵙ ⵓⵥⵍⴰⵢ, ⵜⵥⴹⴰⵕ ⵜⵎⵙⵙⵏⵜⵉⵜ ⴰⴷ ⵜⵓⵔⴰⵔ ⵢⴰⵜ ⵜⵉⵍⴰⵍⵜ ⵜⴰⵎⴰⵏⴰⵔⵜ ⴳ ⵓⵚⴽⵓ ⵏ ⵢⴰⵏ ⵡⴰⵎⵓⵏ ⴳ ⵜⵍⵍⴰ ⴽⵉⴳⴰⵏ ⵏ ⵜⵣⵔⴼⵜ ⴷ ⵓⵙⵓⵎⵓ, ⴰⴷ ⵜⵙⴷⴷⵉⴷ ⵜⵎⵙⵜⴳⴳⴰⵔⵜ ⵜⴰⵣⵔⴼⴰⵏⵜ.

ⵉⵙⵡⵉ ⵓⵏⵎⵓⵇⵇⴰⵔ ⴰⴷ ⴰⴷ ⵉⵙⴷⵓⵙ ⴰⵎⵙⴰⵡⴰⵍ ⴷ ⵓⵙⵎⵢⴰⵏⴰⵡ ⵏ ⵜⵡⵏⴳⵉⵎⵉⵏ ⵏⴳⵔ ⵉⵎⵙⴽⴰⵔⵏ ⵙⴳ ⵢⵉⴳⵔ ⴰⵎⴰⵜⴰⵢ ⴷ ⵓⵙⵍⵉⴳ ⴷ ⵡⴰⵎⵓⵏ ⴰⵖⵔⵎⴰⵏ ⴷ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ, ⵅⴼ ⵜⵎⵙⴰⵔⵉⵏ: ⵜⴰⵣⵣⵉⴳⵣⵜ ⵏ ⵜⵙⵔⵜⴰⵢ ⴷ ⵜⵙⵜⵔⴰⵜⵉⵊⵉⵢⵉⵏ ⵉ ⵜⵏⴽⵔⴰ ⵙ ⵢⵉⵙⴽⵉⵍ ⴳ ⵜⵎⵙⵙⵏⵜⵉⵜⵉⵏ, ⴰⵙⵙⵔⵇⴱ ⵏ ⵓⵙⵉⴷⴼ ⵏ ⵜⵎⵖⴰⵔⵉⵏ ⴳ ⵢⵉⴳⵔⴰⵏ ⵉⵎⵢⴰⵏⴰⵡⵏ, ⴷ ⵡⴰⵏⵏⴰⵍ ⵏ ⵜⵙⵏⵜⴰⵢ ⵜⵉⵡⵜⵎⴰⵏⵉⵏ.

ⵔⴰⴷ ⵉⵜⵜⵡⴰⵙⵙⴰⵏ ⵓⵏⵎⵓⵇⵇⴰⵔ ⵙ ⵢⴰⵜ ⵜⴳⵓⵔⵉ ⵏ ⵓⵕⵥⵥⵓⵎ ⵏ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⴷⴼⴼⵉⵔ ⵏⵏⵙ ⵜⵉⴳⵓⵔⵉⵡⵉⵏ ⵏ ⵉⵎⵓⵣⴰⵢⵏ ⴷ ⵉⵎⵥⵍⴰⵢⵏ ⵅⴼ "ⵜⵉⵍⴰⵍⵜ ⵏ ⵜⵎⵙⵙⵏⵜⵉⵜ ⴳ ⵓⵙⵉⴷⴼ ⴷ ⵢⵉⵙⴽⵉⵍ”, "ⴰⴷⴷⴰⴷ ⵏ ⵜⵙⵔⵜⴰⵢ ⵜⵉⵏⴰⵎⵓⵔⵉⵏ ⵏ ⵓⵙⴱⴷⴷⵉ ⵏ ⵓⵙⵏⵓⵃⵢⵓ ⴷ ⵓⵥⵍⵍⴻⵍ ⴳ ⵜⵎⵙⵙⵏⵜⵉⵜⵉⵏ”, ⴷ ⵓⵙⵎⵏⵉⴷ ⵏ ⵜⵉⵔⵎⵉⵜⵉⵏ ⵜⵉⵡⵜⵎⴰⵏⵉⵏ ⵎⵓⵔⵙⵏⵉⵏ ⴳ ⵢⵉⴳⵔ ⵏ ⵜⵎⵣⵡⴰⵔⵜ ⵏ ⵜⵡⵓⵔⵉⵡⵉⵏ, ⵉ ⵓⵙⵙⵓⴼⵖ ⵏ ⵉⵎⴷⵢⴰⵜⵏ ⵉⵖⵓⴷⴰⵏ ⵉⵙⵙⵔⵇⴰⴱⵏ ⵜⵉⵙⵏⵜⴰⵢ ⵜⵉⵡⵜⵎⴰⵏⵉⵏ ⴳ ⵓⵙⴰⵢⵔⴰⵔ ⴰⴷⵎⵙⴰⵏ.

ⴰⵙⵓⵖⵏ ⴰⵎⵖⵍⴰⵍ ⴷ ⵓⵙⵓⵍⴰⵏ

ⵉ ⵓⵙⵙⴽⵜⵉ, ⴷⴰ ⵉⵙⵔⴰⵙ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⵉⵎⵙⴰⵔⵉⵏ ⵏ ⵢⵉⵙⴽⵉⵍ ⴷ ⵉⵣⵔⴼⴰⵏ ⵏ ⵜⵎⵖⴰⵔⵉⵏ ⴷ ⵜⵔⴱⴰⵜⵉⵏ ⴳ ⵡⴰⵎⵎⴰⵙ ⵏ ⵉⵙⵉⵣⵡⵉⵔⵏ ⵏⵏⵙ ⵉⵙⵜⵔⴰⵜⵉⵊⵉⵢⵏ, ⴷ ⵓⵏⵄⴰⵕ ⵏⵏⵙ ⴰⵏⴰⵎⵓⵔ ⴷ ⵓⵎⵏⵥⴰⵡ ⴷ ⵓⵎⵜⵜⴰⵏ/ⴰⴳⵔⴰⵖⵍⴰⵏ.

ⵢⴰⵎⵓ ⵖ ⵎⴰⵢⴰ ⴷ ⵓⵙⵡⵓⵔⵉ ⵅⴼ ⵜⵎⵢⴰⴳⴰⵏⵜ ⵏ ⵓⵍⴽⴰⵎ ⵙ ⵢⵉⵙⴽⵉⵍ ⴷ ⵓⵙⵣⵎⵔ; ⴰⵙⴱⴷⴷⵉ ⵏ ⴰⴽⴽⵯ ⵜⴰⵍⵖⵉⵡⵉⵏ ⵏ ⵓⵙⵏⵓⵃⵢⵓ ⴷ ⵜⴽⵕⴹⵉ ⵉⴱⴷⴷⵏ ⵅⴼ ⵡⴰⵏⴰⵡ; ⴰⵙⴱⴷⴷⵉ ⵏ ⵓⵙⵢⵉⵡⵍ ⵏ ⵜⵔⴱⴰⵜⵉⵏ ⴷⴷⴰⵡ ⵏ 18 ⵏ ⵓⵙⴳⴳⵯⴰⵙ; ⴰⵏⵏⴰⵍ ⵏ ⵜⴷⵔⴰⵡⵜ ⵏ ⵜⵎⵖⴰⵔⵉⵏ ⴳ ⵜⵓⴷⵔⵜ ⵜⴰⵙⵔⵜⴰⵏⵜ ⴷ ⵜⴷⴰⵎⵙⴰⵏⵜ ⴷ ⵜⴷⵍⵙⴰⵏⵜ ⴷ ⵜⵎⴳⵓⵔⵉ ⵏ ⵜⵖⵜⴰⵙⵜ (…).

ⴳ ⵓⵎⵏⴰⴹ ⴰⴷ, ⵉⵙⵎⴰⵢⵏⵓ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⴰⵖⵓⵔⵉ ⵏⵏⵙ ⵉ ⴰⴽⴽⵯ ⵉⵎⴷⵔⴰⵡⵏ ⴷ ⵉⵎⵙⴽⴰⵔⵏ, ⴳ ⴰⵎⵓⵏⵜ ⴰⵡⴷ ⵜⵎⵙⵙⵏⵜⵉⵜⵉⵏ ⵜⵉⵎⵖⵔⵉⴱⵉⵢⵉⵏ, ⵙ ⵜⴷⵔⴰⵡⵜ ⵉⴳⴳⵓⵜⵏ ⴳ ⵜⵓⴳⴳⴰⵣ ⵜⵉⵏⴰⵎⵓⵔⵉⵏ ⵉⵡⴰⵜⵜⵙⵏ ⴰⴷ ⵚⴽⵓⵏⵜ ⵢⴰⵏ ⵡⴰⵎⵓⵏ ⴳ ⵜⵍⵍⴰ ⴽⵉⴳⴰⵏ ⵏ ⵜⵣⵔⴼⵜ ⴷ ⵓⵙⵓⵎⵓ ⴷ ⵢⵉⵙⴽⵉⵍ.