ⵜⵙⵏⵎⴰⵍⴰ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵏⴰⴹⵜ ⵏ ⵟⴰⵏⵊⴰ-ⵜⵉⵟⵡⴰⵏ-ⵍⵃⵓⵙⵉⵎⴰ, ⵙ ⵜⵎⴷⵔⴰⵡⵜ ⴰⴽⴷ ⵓⵙⵉⵏⴰⴳ ⴰⵏⴰⴼⵍⵍⴰ ⵏ ⵓⵙⵏⵖⵎⵙ ⴷ ⵓⵎⵢⴰⵡⴰⴹ ⴷ ⵓⵏⵎⴰⵍⵍⵓ ⴰⵏⴰⵎⵓⵔ ⵏ ⵜⵏⵖⵎⴰⵙⵜ ⵜⴰⵎⵖⵔⵉⴱⵉⵜ ⴷ ⵜⴰⴷⴷⴰⵔⵜ ⵏ ⵜⵏⵖⵎⴰⵙⵜ, ⵜⴰⵙⵓⵜⵍⵜ ⵏ ⵓⵙⵎⵓⵜⵜⴳ ⵉ ⵜⵏⵖⵎⴰⵙⵉⵏ ⴷ ⵉⵏⵖⵎⴰⵙⵏ ⵅⴼ ⵉⵎⵔⵙⵉ "ⴰⵙⵎⵀⵍ ⵏ ⵜⵎⵢⴰⴷⴰⵙⵜ ⵜⴰⵣⵔⴼⴰⵏⵜ ⴳ ⵓⵙⵎⴽⵍ ⴰⵏⵖⵎⴰⵙ, ⴰⵙⵙ ⵏ ⵓⴽⵡⴰⵙ 29 ⵛⵓⵜⴰⵏⴱⵉⵔ 2022 ⴳ ⵓⵙⵖⵉⵎ ⵏ "ⵜⴰⴷⴷⴰⵔⵜ ⵏ ⵜⵏⵖⵎⴰⵙⵜ" ⴳ ⵟⴰⵏⵊⴰ.

ⵙ ⵜⵎⵍⴷⴰ ⵏ ⵓⵕⵥⵥⵓⵎ ⵏ ⵜⵡⵓⵔⵉⵡⵉⵏ ⵏ ⵜⵙⵓⵜⵍⵜ ⴰⴷ, ⵜⵙⴷⴷⵉⴷ ⵜⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ, ⵎⴰⵙⵙⴰ ⵙⴰⵍⵎⴰ ⵟⵟⵓⴷ, ⵅⴼ ⵡⴰⴷⴷⵓⵔ ⵏ ⵓⵏⵏⵓⵕⵥⵎ ⵏ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵅⴼ ⵉⵏⵖⵎⴰⵙⵏ ⴷ ⵜⵏⵖⵎⴰⵙⵉⵏ ⴷ ⵓⵎⵢⴰⵡⴰⴹ ⴷⵉⴷⵙⵏ ⵉⴷⴷⵖ ⴳⴰⵏ ⵉⵎⴳⴳⴰⵢⵏ ⵉⴷⵙⵍⴰⵏⵏ ⴳ ⵜⴰⵎⵓⵏⵜ ⴰⴽⴷ ⵜⵎⵙⴰⵔⵉⵏ ⵜⵉⵣⵔⴼⴰⵏⵉⵏ ⴷ ⵓⵙⵔⵙ ⵏ ⵉⵥⵕⵉ ⴼⵍⵍⴰⵙⵏⵜ ⴷ ⵜⴷⵔⴰⵡⵜ ⴳ ⵓⴼⵙⵔ ⵏ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵙⵉⵙⴼⵉⵡ ⴳ ⵓⵎⵏⴰⴹ ⴰⴷ ⵏⵉⵜ ⵎⴰⵙ ⴷⴰ ⵜⴻⵜⵜⴱⵓⵖⵍⵓ ⵜⵓⵜⵍⴰⵢⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵜⵙⵓⵍⴰⵏⵜ, ⴷ ⵎⴰⵙ ⴷ ⵉⵇⵇⴰⵏ ⴰⴷ ⵜⵜ ⵏⵎⵢⴰⵔ, ⵏⵙⵖⵣⵏ ⵉⵔⵎⵎⵓⵙⵏ ⴱⴷⴷⵏⵉⵏ ⵅⴼ ⵡⴰⵔ ⴰⵙⵏⵓⵃⵢⵓ ⴷ ⵜⵎⵢⴰⴷⴰⵙⵜ ⵏ ⵡⴰⵏⴰⵡ. ⵉⴷⴷⵖ ⵉⵍⴰ ⵓⵏⵖⵎⵙ ⴰⴷⴷⵓⵔ ⴰⵎⵇⵇⵔⴰⵏ, ⵜⵙⴷⴷⵉⴷ ⵎⴰⵙⵙⴰ ⵙⴰⵍⵎⴰ ⵟⵟⵓⴹ ⵅⴼ ⵓⵙⵖⵓⵏ ⵏ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵙ ⵓⵣⵣⵉⴳⵣ ⵏ ⵉⵙⵎⵓⵜⵜⴳⵏ ⴳ ⵜⵙⵓⵜⴰⵍ ⵜⵉⵏⴹⴼⴰⵕⵉⵏ ⵉ ⵉⵏⵖⵎⴰⵙⵏ ⵉ ⵓⵙⴷⵓⵙ ⵏ ⵜⴷⵔⴰⵡⵉⵏ ⵏⵏⵙⵏ ⴳ ⵓⴼⵙⴰⵔ ⵏ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ.

ⵙⴳ ⵜⵙⴳⴰ ⵏⵏⵙ, ⵉⵏⵏⴰ ⵓⵏⵙⵙⵉⵅⴼ ⵏ ⵓⵏⵎⴰⵍⵍⵓ ⴰⵏⴰⵎⵓⵔ ⵏ ⵜⵏⵖⵎⴰⵙⵜ ⵜⴰⵎⵖⵔⵉⴱⵉⵜ, ⵎⴰⵙⵙ ⵄⴱⴷ ⵍⵍⴰⵀ ⵍⴱⴰⵇⵇⴰⵍⵉ, ⵎⴰⵙ ⵉⴷⵓⵙ ⵓⵎⵢⴰⵙⵙⴰ ⵉⵏⴳⵔ ⵓⵏⵖⵎⵙ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⵉⴷⴷⵖ ⵜⴳⴰ ⵜⴷⵔⴼⵉ ⵏ ⵜⵏⵖⵎⴰⵙⵜ ⴷ ⵓⵣⵔⴼ ⴳ ⵓⵡⵏⵏⵉ ⴷ ⵜⵥⵕⵉⴳⵜ ⴳ ⵜⵓⵥⵥⵓⵎⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵢⵉⵏⵉ ⵎⴰⵙ ⵉⴳⴰ ⵓⵏⵖⵎⵙ ⴰⵙⵏⵎⴰⴷⴷⵓ ⵏ ⵜⵏⴽⵔⴰ ⵙ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵍⵓⵎⵎⵏ ⴳ ⵜⵉⵣⵉ ⵏ ⵉⵏⴰⵥⴰⵕⵏ ⵏ ⵖⵉⵍⴰⴷ ⵏⵏⴰ ⵜⵣⵓⵛⵛⵍ ⵜⴰⵜⵉⴽⵏⵓⵍⵓⵊⵉⵜ ⵜⴰⵜⵔⴰⵔⵜ.

ⵉⵙⵙⴽⵕⵥ ⵎⴰⵙⵙ ⵍⴱⵇⵇⴰⵍⵉ ⵅⴼ ⵓⵙⵖⵓⵏ ⵏ ⵓⵙⵖⵔⵜ ⵏ ⵉⵏⵖⵎⴰⵙⵏ ⵉ ⵓⵙⵎⴽⵍ ⴰⵏⵖⵎⴰⵙ ⵉ ⵜⵎⵙⴰⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵢⴰ ⵏⵏ ⵉⵙⵖⴰⵡⵙⴰ ⵙ ⵓⵙⵎⵓⵜⵜⴳ ⴷ ⵡⴰⵎⵎⴰⵥ ⵏ ⵜⵓⵙⵙⵏⴰ ⵜⴰⵣⵔⴼⴰⵏⵜ ⴷ ⵓⵙⴰⴹⵓⴼ ⵏ ⵜⵓⵜⵍⴰⵢⵜ ⴷ ⵜⵣⵎⵔⵜ ⵏ ⵓⵣⵖⴰⵏ ⴷ ⵓⴼⵔⴰⵏ ⴰⴼⴰⴷ ⴰⴷ ⵜⴻⵜⵜⵓⴼⴰⵔⵙ ⵢⴰⵜ ⵜⵎⵜⵜⴰ ⵜⴰⵏⵖⵎⴰⵙⵜ ⵉⵖⵓⴷⴰⵏ ⴷ ⵉⵎⵙⴰⵙⴰⵏ ⴰⴽⴷ ⵉⵏⴰⵡⴰⵢⵏ ⵉⵣⵣⵓⵍⴰⵏⵏ ⴷ ⵉⵖⴰⵔⴰⵏⵏ ⵏⵏⴰ ⵙ ⵜⵍⵍⴰ ⵜⵡⵓⵔⵉ. ⵙⴳ ⵜⵙⴳⴰ ⵏⵏⵙ, ⵉⵙⵙⴽⵜⵉ ⵎⴰⵙⵙ ⵄⴱⴷ ⵍⵍⴰⵟⵉⴼ ⴱⵏ ⵚⴼⵉⵢⴰ , ⴰⵏⵎⵀⴰⵍ ⵏ ⵓⵙⵉⵏⴰⴳ ⴰⵏⴰⴼⵍⵍⴰ ⵉ ⵓⵏⵖⵎⵙ ⴷ ⵓⵎⵢⴰⵡⴰⴹ ⴳ ⵕⵕⴱⴰⵟ, ⵙ ⵉⵣⵔⴼⴰⵏ ⵉⴷⵙⵍⴰⵏⵏ ⴷ ⴷⴷⴰⵏⵉⵏ ⴳ ⵓⵍⵖⵓ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⵏⵣⴰⵢⵏ ⵉⵖⵣⵓⵔⴰⵏⵏ ⴷ ⵉⵙⴽⵉⵍ ⴷ ⵡⴰⵔ ⴰⵙⵏⵓⵃⵢⵓ ⴷ ⵜⴷⵔⴰⵡⵜ.

ⵉⵙⴷⵓⵙ ⵓⵙⵍⵎⴰⴷ ⴰⵎⵔⵣⵓ ⵜⴰⴳⵓⵔⵉ ⵏⵏⵙ ⵙ ⵜⵓⴽⴽⵉ ⵏ ⵉⵎⴷⵢⴰⵜⵏ ⵅⴼ ⵜⵎⴰⵎⴽⵜ ⵏ ⵓⵙⵎⴽⵍ ⵏ ⵜⵎⵜⵜⴰ ⵜⴰⵏⵖⵎⴰⵙⵜ ⵉⵙⴰⵡⴰⵍⵏ ⵅⴼ ⵜⴼⵓⵍⵜ ⵏ ⵜⵎⵙⵡⵓⵔⵉⵢⵉⵏ ⵏ ⵜⴰⴷⴷⵔⵡⵉⵏ ⴷ ⵜⴼⵓⵍⵜ ⵏ ⵓⵎⵥⵉⵢⵏⴳ ⵓⵙⵓⵔⵙ ⵏ ⵓⵙⵓⴽ, ⵉⵙⵉⵡⵍ ⵅⴼ ⴽⵔⴰ ⵏ ⵉⵣⵔⴼⴰⵏ ⵜⵜⵡⴰⵕⵥⴰⵏⵉⵏ ⵉ ⵜⴼⵓⵍⵉⵏ ⴰⴷ, ⵉⵙⵙⵎⵜⵔ ⵎⴰⵙ ⵉⵙⵖⴰⵡⵙⴰ ⵓⵙⵉⵡⵍ ⵅⴼ ⵓⵙⵓⵔⵙ ⵏⵏⵙⵏ ⵜⵉⵍⵉⵜ ⵏ ⵜⵉⵏⴷⵉⵜⵉⵏ ⵜⵉⵖⴰⵔⴰⵏⵉⵏ ⴷ ⵓⵙⵙⵉⵏⴼ ⵏ ⵜⵡⵍⴰⴼⵉⵏ ⵜⵉⵎⴷⵢⴰⵜⵉⵏ ⵉⵣⵣⵓⴳⵣⵏ ⴰⴱⵓⵔⵣ ⵏ ⵓⴼⴳⴰⵏ ⴷ ⵓⵙⵖⵓⵏ ⵙ ⵜⵣⵣⵓⵍⴰⵏⵜ ⴷ ⵓⴼⵔⴰⴳ ⵏ ⵓⵙⴳⵓⵎ ⵏ ⵓⵏⵖⵎⵉⵙ ⴷ ⵜⵙⵖⵣⵏⵜ ⵏ ⵜⵎⵢⴰⴷⴰⵙⵜ ⵜⴰⵎⵢⴰⵙⵜ ⴷ ⵓⵙⴽⴰⵔ ⵙ ⵜⵎⵢⴰⴷⴰⵙⵜ ⵏ ⵡⴰⵏⴰⵡ. ⵙⵎⴷⵏⵜ ⵜⵡⵓⵔⵉⵡⵉⵏ ⵏ ⵜⵙⵓⵜⵍⵜ ⴰⴷ ⵙ ⵓⴱⵟⵟⵓ ⵏ ⵉⵙⵍⴽⵉⵏⵏ ⵏ ⵜⴷⵔⴰⵡⵜ ⵅⴼ 30 ⵏ ⵓⵏⵖⵎⴰⵙ ⴷ ⵜⵏⵖⵎⴰⵙⵜ ⵙⵡⵓⵔⵉⵏⵉⵏ ⴳ ⵢⵉⴳⵔ ⵏ ⵓⵏⵖⵎⵙ ⴰⵎⵉⵔⴰⵢ ⴷ ⵓⵙⵍⵉⵥⵕ ⴷ ⵓⵍⵉⴽⵜⵕⵓⵏⵉ ⴳ ⵜⵎⵏⴰⴹⵜ ⵏ ⵟⴰⵏⵊⴰ-ⵜⵉⵟⵡⴰⵏ-ⵍⵃⵓⵙⵉⵎⴰ.

ⵉⴼⵓⴽ ⴰⴷ ⵏⵙⵙⴽⵜⵉ ⵎⴰⵙ ⴷ ⵉⴷⴷⴰ ⵓⵙⵏⵎⴰⵍⴰ ⵏ ⵓⵙⵎⵓⵜⵜⴳ ⴰⴷ ⴳ ⵓⵙⵎⵀⵍ ⵏ ⵜⵥⵍⴰⵢⵉⵏ ⵏ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵏⴰⴹⵜ ⵏ ⵟⴰⵏⵊⴰ-ⵜⵉⵟⵡⴰⵏ-ⵍⵃⵓⵙⵉⵎⴰ ⴷ ⴳ ⵓⵣⵣⵓⴳⵣ ⵏ ⵓⵖⴰⵡⴰⵙ ⵏ ⵜⵡⵓⵔⵉ ⵏⵏⵙ ⴰⵙⴳⵯⵙⴰⵏ 2021-2022 ⴳ ⵢⵉⴳⵔ ⵏ ⵜⵏⴽⵔⴰ ⵙ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏⵏⴰ ⵉⴳⴰⵏ ⵙⴳ ⵉⵙⵓⵖⴰⴷ ⵏⵏⵙ ⴰⵙⴷⵓⵙ ⵏ ⵜⵣⵎⵎⴰⵔ ⵏ ⵉⵏⵖⵎⴰⵙⵏ ⴷ ⵜⵏⵖⵎⴰⵙⵉⵏ ⴳ ⵓⵙⵎⴽⵍ ⴰⵏⵖⵎⴰⵙ ⵉ ⵜⵎⵓⴽⵔⵉⵙⵉⵏ ⵜⵉⵣⵔⴼⴰⵏⵉⵏ ⵏ ⵖⵉⵍⴰⴷ ⴷ ⵓⵎⴷⴰⵢ ⴷ ⵓⵙⴱⴷⴷⵉ ⵏ ⵜⵕⵥⵉⵢⵉⵏ ⵙ ⵉⵏⵏⵉⵢ ⴰⵣⵔⴼⴰⵏ.