ⵣⴳ ⵊⴰⵊ ⵏ ⵓⵙⵇⵇⵉⵎ ⵏ ⵓⵎⴰⵜⴰ ⴰⴱⵔⵉⵟⴰⵏⵉ, ⵜⵙⵙⵎⵏⵉⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵢⴰⵜ ⵜⵎⵢⴰⴷⴰⵙⵜ ⵜⴰⵣⵔⴼⴰⵏⵜ ⵉ ⵓⵙⵕⵚⵓ ⵏ ⵢⴰⵏ ⵓⵙⴰⵜⵉ ⴰⴳⵔⴰⵖⵍⴰⵏ  ⵉⵍⴰⵏ ⴰⵡⵜⵜⴰⵙ ⵉⵖⵜⵜⵍⵏ ⴰⵙⵎⵔⵙ ⵉⵅⵛⵏ ⵏ ⵉⵙⴳⴷⴰⵏ, ⴱⵍⴰ ⴰⵡⴰⴹ ⵏ ⵜⴷⵔⴼⵉ  ⵏ ⵜⴰⵖⴰⵍⵜ ⴷ ⵓⵣⵔⴼ ⴳ ⵜⵙⵏⵙⵉ ⵏ ⵉⵙⴳⴷⴰⵏ.

ⴳ ⵢⴰⵏ ⵓⵏⵄⴰⵕ ⴰⴳⵔⴰⵖⵍⴰⵏ ⴰⵢⵓⴳⴰⵏ, ⵏⵏⴰ ⵉⵙⵎⵓⵏⵏ ⴳⵔ ⵓⵙⴷⵓⵙ ⵏ ⵜⵙⵏⵙⵉ ⵏ ⵜⴷⵔⴼⵉⵏ ⵜⵉⵙⴳⴷⴰⵏⵉⵏ ⴷ ⵡⴰⵔⴰⵢ ⵏ ⵓⵙⴳⴷ ⴷ ⵜⵏⵓⵎⴰ ⵏⵏⵙ ⵣⴳ ⵓⵙⵖⵍⵍⴰ ⴰⵙⵔⵜⴰⵏ, ⵜⵙⴷⴷⵉⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙ  ⵉⵅⵚⵚⴰ ⴽⵓ ⵜⴰⵙⵏⵜⴰⵢⵜ ⵜⴰⴳⵔⴰⵖⵍⴰⵏⵜ ⴳ ⵓⵎⵏⵉⴷ ⴰⴷ, ⴰⴷ ⵓⵔ ⵜⵜⵏⴰⴷⴰ ⵅⴼ ⵓⵙⵏⵎⴰⵍⴰ ⴰⵙⴳⴷⴰⵏ ⵙ ⵢⵉⵅⴼ ⵏⵏⵙ, ⵎⴰⵛⴰ ⴰⴷ ⵜⴰⵔⵉ ⵉⴳⵎⴰⵎⵏ ⴷ ⵉⵙⴳⴷⴰⵏ ⵣⴳ ⵓⵙⵙⵎⵔⵙ ⴰⵙⵔⵜⴰⵏ ⵏⵖⴷ ⴰⵙⵏⵓⵃⵢⵓ .

ⵜⵙⵙⵓⵎⵔ ⵎⴰⵙⵙⴰ ⴱⵓⵄⵢⵢⴰⵛ ⴳ ⵓⵎⵏⴰⴹ ⴰⴷ ⵢⴰⵏ ⵓⵙⴷⴷⵉ ⵏ ⵜⵔⵙⴰⵍ ⵜⵉⴷⵙⵍⴰⵏⵉⵏ, ⴳ ⵜⵣⵡⵉⵔⵉ ⵏⵏⵙⵏⵜ ⴰⵛⵛⵉⵍ  ⵏ ⵓⵙⵔⵓⵙ ⵏ ⵢⴰⵏ ⵓⵙⵏⵎⵍ ⵓⵏⵖⵉⴷ ⵉ ⵓⵔⵎⵎⵓⵙ ⵏ “ ⴰⵙⵓⴳⵜ ⵏ ⵓⵙⵎⵔⵙ ⵏ ⵓⵙⴳⴷ”, ⴰⵢⵏⵏⴰ  ⵉⵙⵏⵓⵃⵢⵓⵏ ⵙ ⵡⴰⴼⴰⵡ ⴳⵔ ⵜⵙⵏⵙⵉ ⵜⴰⵙⴳⴷⴰⵏⵜ ⵜⵓⵣⵔⵉⴼⵜ ⴷ ⵓⵙⵙⵎⵔⵙ ⵏⵏⵙ ⵉ ⵉⵡⵜⵜⴰⵙⵏ ⵏ ⵜⵖⵍⵍⴰⴱⵉⵜ ⵏⵖⴷ ⴰⵙⵉⵎⵎⵕ ⵅⴼ ⵜⴽⵕⴹⵉ, ⴰⵔ ⵜⵙⴷⴷⵉⴷ ⵎⴰⵙ ⵓⵔ  ⴷⴰ ⵜⴱⴷⴷⴰ ⵜⴷⵔⴼⵉ ⵏ ⵓⵙⴳⴷ ⵖⴰⵙ ⵅⴼ ⵜⴷⵔⴼⵉ ⵏⵜⴰⵖⴰⵍⵜ, ⵎⴰⵛⴰ ⴷⴰ ⵜⵜⴰⵡⴹ ⴰⵡⴷ ⴰⵔⴰⵢ  ⵣⴳ ⵓⴱⵣⵣⴻⵣ ⴷ ⵓⴽⵏⴰⴷ ⵏⵏⴰ ⵉⵜⵜⵓⴳⴰⵏ  ⵙ ⵢⵉⵙⵎ ⵏ ⵓⵙⴳⴷ."

ⵜⵖⵔⴰ ⵎⴰⵙⵙⴰ ⴱⵓⵄⵢⵢⴰⵛ ⵖⵔ ⴰⴳⴷⴷⵓⵍ ⵏ ⵓⵙⵎⵔⵙ ⵏ ⵓⵙⴳⴷ ⴰⵎ ⵜⵙⵄⴹⴰⵕ ⵉ ⵜⴽⵕⴹⵉ ⵏⵖ ⴰⵙⵉⴳⴳⵯⵊ  ⵏⵖ ⴰⵙⵍⴽⵉ ⵏ ⵉⵣⵔⴼⴰⵏ ⵉⴷⵙⵍⴰⵏⵏ, ⴰⵔ ⵜⵙⴷⴷⵉⴷ ⴰⵡⴷ ⵅⴼ ⵜⵎⵙⵜⴳⴳⴰⵔⵜ ⵏ ⵉⵡⴰⵏⴽⵏ ⴳ ⵓⴹⴰⴽⴰⵍ ⵏ ⵓⴹⴼⴼⵓⵕ ⵉ ⵉⵎⵏⵣⴰⵢⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵉⴳⵓⵍⴷⴰ ⵏ ⵓⵙⵍⴳⵏ.
ⴳ ⵢⴰⵏ ⵓⵎⵏⵉⴷ ⵉⵙⵓⴳⴳⵓⵔⵏ ⵖⵔ ⵉⵎⴰⵍ, ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ ⵅⴼ ⵜⵎⵖⵔⵜ ⵏ ⵓⵙⵙⴰⵔⵓ ⴳ ⵓⵙⴳⵎⵉ ⴷ ⵓⵙⵓⵜⵉ ⴰⵎⵔⵙⴰⵍ, ⴰⴽⴷ ⴰⵙⴷⵓⵙ ⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ ⵉ ⵓⵎⵏⴰⵍⴰ ⵏ ⵜⵟⵟⵓⵔⴼⴰ ⵜⴰⵙⴳⴷⴰⵏⵜ ⵉⵣⴳⵔⵏ ⵉⵡⵓⵜⵜⴰ.

ⵜⵙⵎⴷ ⵎⴰⵙⵙⴰ ⴱⵓⵄⵢⵢⴰⵛ ⵜⵉⴳⵓⵔⵉⵡⵉⵏ ⵏⵏⵙ ⵏ ⵓⵕⵥⵥⵓⵎ, “ⵜⴰⵏⵥⵕⵔⵜ ⵏ ⵡⴰⵙⵙ ⴰⴷ, ⵓⵔ ⴷⴰ ⵉⵜⵜⴱⴷⴰⴷ ⵖⴰⵙ ⵅⴼ ⵓⵙⵕⵚⵚⴰ ⵏ ⵜⵎⵙⵜⴰⵍ ⵜⵓⵍⴳⴰⵏⵉⵏ ⵜⵉⵎⴰⵢⵏⵓⵜⵉⵏ, ⵎⴰⵛⴰ ⴳ ⵜⵓⵚⴽⴰ ⵏ ⵢⴰⵏ ⵓⵔⵎⴰⵙ ⴰⵎⴳⵔⵓ ⵉ ⵓⵙⵖⵓⵏ  ⴳⵔ ⵓⵙⴳⴷ ⴷ ⵜⵏⴱⴰⴹⵜ ⴷ ⵜⵎⵙⵜⴳⴳⴰⵔⵜ, ⵙ ⵎⴰⴷ ⵉⵜⵜⴹⵎⴰⵏ ⴰⴷ ⵇⵇⵉⵎⵏ ⵉⵙⴳⴷⴰⵏ  ⴰⴷ ⴳⵉⵏ ⵢⴰⵏ ⵓⵎⵙⴽⴰⵔⵏ ⵓⵔⴳⴳⵉⴳ ⴷ ⵓⴼⵔⴰ ⴳ ⵢⴰⵏ ⵓⵎⴰⴹⴰⵍ ⵉⵜⵜⵙⵙⵏ ⵉⵎⵏⵣⴰⵖⵏ ⴷ ⵉⵙⵏⴼⵍⵏ ⵓⴷⵔⵉⴼⵏ.