ⵉⴳⴰ ⵓⵣⵔⴼ ⴳ ⵜⴷⵔⴼⵉ ⵏ ⵓⵎⵏⴰⴷ ⴷ ⵓⵡⵏⵏⵉ ⵢⴰⵜ ⵜⵔⵙⵍⵜ ⵙⴳ ⵜⵔⵙⴰⵍ ⵜⵉⴷⵙⵍⴰⵏⵉⵏ ⵏ ⵡⴰⵎⵓⵏ ⴰⴷⵉⵎⵓⵇⵕⴰⵟⵉ ⴷ ⵢⴰⵜ ⵙⴳ ⵜⴼⴰⴷⵉⵡⵉⵏ ⵏ ⵜⵣⵣⵉⴳⵣⵜ ⵏⵏⵙ ⴷ ⵓⴱⵓⵖⵍⵓ ⵏⵏⵙ, ⵉⴳ ⵜⴰⴼⴰⴷⴰ ⵏⵏⵉ ⴷ ⵉⵇⵇⴰⵏ ⵃⵎⴰ ⴰⴷ ⵏⵍⴽⵎ ⴰⵙⵎⴰⴷ ⵏ ⵓⴳⴳⵉⴷⵏ ⴷ ⵓⴼⵔⴷⵉⵙ ⴰⴷⵙⵍⴰⵏ ⵙⴳ ⵉⴼⵔⴷⵉⵙⵏ ⵏ ⴽⵓ ⴰⵎⵓⵏ, ⵉⴳ ⵜⴰⵙⵉⵍⴰ ⵜⴰⴷⵙⵍⴰⵏⵜ ⵏⵏⵉ ⵅⴼ ⵉⵜⵜⵏⴰⵍ ⵓⴼⵊⵊⵉⵊ ⵉⵙⵎⴷⵏ ⵙ ⵜⴳⵔⵓⵎⵎⴰ ⵜⴰⵎⵇⵇⵔⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵢⴰⴹⵏ.
“ⵓⵔ ⵉⵙⵎⵓⵏ ⵓⵏⴰⴳⵔⴰⵡ ⵏ ⵜⴷⵔⴼⵉ ⴰⴷ ⵖⴰⵙ ⵜⵉⵡⵏⴳⵉⵎⵉⵏ ⵏⵏⴰ ⵉⵜⵜⵢⴰⵎⴰⵥⵏ ⵙ ⵜⵡⵉⵍⴰ ⵜⵓⵎⵏⵉⴳⵜ ⵏⵉⵖ ⵜⵉⴷ ⵏⵏⴰ ⴷⴰⵔ ⴳ ⵓⵔ ⵜⵍⵍⵉ ⵜⴰⴷⵓⵜ ⵏⵉⵖ ⵜⴰⵔⴰⵡⵙⴰⵏⵜ, ⵎⴰⵛ ⴰⵡⴷ ⵜⵉⵡⵏⴳⵉⵎⵉⵏ ⵏⵏⴰ ⵉⵙⵙⴼⵇⴰⵄⵏ ⵏⵉⵖ ⵉⴽⴽⴰⵜⵏ ⵏⵉⵖ ⵉⵣⵣⵉⵡⵉⵣⵏ.
ⵙ ⵓⵎⵣⴰⵔⴰⵢ ⴷ ⵓⵣⵔⴼ ⴳ ⵜⴷⵔⴼⵉ ⵏ ⵓⵎⵏⴰⴷ ⴷⴰ ⵎⵉ ⵓⵔ ⵉⵣⵔⵉ ⵓⵍⵇⵇⵏ ⵏⵏⵙ ⵉ ⴽⵔⴰ ⵏ ⵓⵙⵍⵉⴷ ⵏⵉⵖ ⴰⴽⵔⴰⴼ, ⵜⴰⴷⵔⴼⵉ ⵏ ⵓⵡⵏⵏⵉ ⵖⵓⵔⵙ ⵉⵍⵓⴳⵏⵏ ⴷ ⵓⵙⵍⵉⴷⵏ ⵉⵖⵉⵢⵏ ⴰⴷ ⴽⵔⴼⵏ ⵜⵉⵎⵙⴽⵔⵜ ⵏⵏⵙ, ⵃⵎⴰ ⴰⴷ ⵢⵉⵍⵉ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵡⵉⵢⵢⴰⴹ ⵏⵉⵖ ⴰⵙⵓⵎⵍ ⵏⵏⵙⵏ ⵏⵉⵖ ⴰⴼⵔⴰⴳ ⵏ ⵜⵏⴼⵔⵓⵜ ⵜⴰⵎⵖⴰⵍⴰⵛⵜ ⵏⵉⵖ ⴰⵏⴳⵔⴰⵡ ⴰⵎⴰⵜⴰⵢ ⵏⵉⵖ ⵜⴰⴷⵓⵙⵉ ⵜⴰⵎⴰⵜⴰⵢⵜ ⵏⵉⵖ ⵜⵉⵙⵓⵏⴰⴳ ⵜⵉⵎⴰⵜⴰⵢⵉⵏ, ⴷ ⵓⵣⵓⵛⵛⵍ ⵏ ⵓⵙⴳⴷ, ⴳ ⵡⴰⴷⴷⴰⴷⵏ ⴰⵎ ⵡⵉⴷ, ⵉ ⵓⵎⵏⵣⴰⵢ ⵏ ⵜⵍⵍⵓⴳⵏⴰ ⴷ ⵓⵎⵏⵣⴰⵢ ⵏ ⵓⵡⵜⵜⴰⵙ ⵓⵍⴳⵉⵏ ⴷ ⵓⵎⵏⵣⴰⵢ ⵏ ⵓⵙⵓⵖⵏ ⴷ ⵓⵎⵙⴰⵙⴰ, ⵎⴽⵍⵍⵉ ⵉⴳⴰ ⵓⵣⵔⴼ ⴳ ⵜⴷⵔⴼⵉ ⵏ ⵓⵎⵏⴰⴷ ⴷ ⵓⵡⵏⵏⵉ ⴰⵣⵔⴼ ⴰⴷⵙⵍⴰⵏ ⵉⵜⵜⵓⵏⴼⵔⵓⵏ ⵙ ⵜⵡⵉⵍⴰⵜⵉⵏ ⵏⵏⵙ ⴰⴽⴽⵯ ⴳ ⵓⴷⵓⵙⵜⵓⵔ ⴰⵎⵖⵔⵉⴱⵉ.
ⴳ ⵜⵙⵜⵕⴰⵜⵉⵊⵉⵜ ⵏⵏⵙ ⵉⴱⴷⴷⵏ ⵅⴼ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ, ⵉⴹⴼⵕ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⵓⴳⴳⴰⵣ ⵏ ⵡⴰⵏⵏⴰⵍ ⴷ ⵓⵙⴷⵓⵙ ⵏ ⵓⵎⵢⴰⵏⴰⵡ ⵏ ⵡⴰⵏⴰⵡⵏ ⵏ ⵜⵎⵙⴽⵔⵜ ⵏ ⵜⴷⵔⴼⵉ ⵏ ⵓⵎⵏⴰⴷ ⴷ ⵓⵡⵏⵏⵉ, ⵉⵙⵡⵏⵏⵉ ⵅⴼ ⵓⵏⵣⴳⵓⵎ ⵏⵏⵙ ⵙ ⵓⴹⴼⴼⵓⵕ ⵏ ⵓⴳⴳⵉⴷⵏ ⴷ ⵓⵙⵙⵀⵔⵛ ⵏ ⴽⵔⴰ ⴳⵉⵙⵏ ⵙ ⵜⵎⵔⵔⵓⵜⵉⵏ ⵜⵜⴽⵙⵏⵉⵏ ⵜⴰⴷⵔⴼⵉ ⵅⴼ ⵓⵣⵓⵣⵣⵔ ⵏ ⵜⵓⵎⴰⵢⵜ ⴳ ⵓⵙⴰⵢⵔⴰⵔ ⴰⵎⵓⵟⵟⵓⵏ ⴷ ⵜⴷⴰⴱⵓⵜⵉⵏ ⵏ ⵓⵎⵢⴰⵡⴰⴹ ⴰⵏⴰⵎⵓⵏ.
ⴳ ⵓⵎⵏⵉⴷ ⴰⴷ , ⴷⴰ ⵉⵙⵎⴰⵏⴰⵔ ⵓⵙⵇⵇⵉⵎ ⴰⵙⵙⴰⵔ ⵏⵏⵙ ⵉⵜⵜⵓⵔⵏⵓⵏ ⵙ ⵓⴹⴰⴽⴰⵍ ⵏ ⵜⴷⵔⴼⵉ ⵏ ⵓⵡⵏⵏⵉ ⴳ ⵓⵎⴰⵍⵓ ⵏ ⵜⵏⵥⴰⵕ ⵜⵉⵎⴰⵢⵏⵓⵜⵉⵏ, ⵏⵏⴰ ⴷ ⵉⵜⵜⴰⵛⴽⴰⵏ ⵉⴷⴷⵖ ⵜⵍⵍⴰ ⵜⵙⵓⵍⴰⵏⵜ ⵏ ⵡⵓⴳⵓⵣ ⵙⴳ ⵓⵙⴰⵢⵔⴰⵔ ⴰⴳⴷⵓⴷⴰⵏ ⴰⵏⵉⵍⴰⵡ ⵙ ⵓⵙⴰⵢⵔⴰⵔ ⴰⴳⴷⵓⴷⴰⵏ ⴰⵎⵔⴷⵓ, ⵏⵏⴰ ⵉⴷⵡⵍⵏ ⴷ ⴰⵎⵙⴷⵍ ⴰⴷⵙⵍⴰⵏ ⵉ ⵜⵎⵙⴽⵔⵜ ⵏ ⵜⴷⵔⴼⵉ  ⵏ ⵓⵡⵏⵏⵉ. ⴰⵢⵍⵍⵉ ⵉⵎⵎⴰⵍⵏ ⵜⵉⵏⴷⵉ ⵏ ⵓⵙⵓⵊⴷ ⵏ ⵜⵏⴼⵔⵓⵜⵉⵏ ⵉⵜⵜⵓⵙⵓⵖⵏⵏ ⵉ ⵜⵎⵙⴽⵔⵜ ⵏ ⵓⵣⵔⴼ ⴰⴷ ⴳ ⵓⵎⴰⵍⵓ ⵏ ⵜⵣⵣⵉⴳⵣⵉⵏ ⵜⵉⵜⵉⴽⵏⵓⵍⵓⵊⵉⵢⵉⵏ ⴷ ⴰⵔ ⵉⵜⵜⵙⴷⴷⵉⴷ ⵅⴼ ⵓⵙⵓⵖⵏ ⵏ ⵜⵏⴰⵎⵉⵜ ⴷ ⵜⵏⵥⴰⵕ ⴰⴷ ⴷ ⵓⵃⵟⵟⵓ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⴰⵢⵔⴰⵔ ⴰⵎⵓⵟⵟⵓⵏ.
ⴳ ⵓⵎⵏⵉⴷ ⴰⴷ, ⵉⵖⵔⴰ ⵓⵙⵇⵇⵉⵎ ⴳ ⵓⵎⵏⴰⴷ ⵏⵏⴰ ⴷ ⵉⵙⵙⴼⴰⵖ ⴰⵙⴳⴳⵯⴰⵙ ⵏ 2022 ⵙ ⵎⴰⴷ ⵉⵥⵍⵉⵏ ⵙ ⵓⵙⵖⵏⵓ ⵏ ⵓⵙⵍⴳⵏ ⵓⵟⵟⵓⵏ 71.17 ⵏⵏⴰ ⵉⵙⵏⴼⵍⵏ ⵉⵙⵎⴷ ⴰⵙⵍⴳⵏ ⵓⵟⵟⵓⵏ 88.13 ⵉⵣⴷⵉⵏ ⵙ ⵜⵏⵖⵎⴰⵙⵜ ⴷ ⵜⵥⵕⵉⴳⵜ, ⴰⵙⵡⵓⵔⵉ ⵙ “ⵓⵙⵍⴳⵏ ⵏ ⵜⴷⵔⴼⵉ ⵏ ⵓⵙⵎⵔⵙ ⵏ ⵓⵎⵍⴰⵏ” ⴳ ⵓⴷⵖⴰⵔ ⵏ ⵓⵎⴳⴳⴰⵔⵓ ⴰⴷ ⵉⴷⴷⵖ ⵉⴳⴰ ⴰⵙⴰⴷⴼ ⴰⴷⵙⵍⴰⵏ ⵏ ⵓⵙⵎⴽⵍ ⵏ ⵜⵓⴳⵜ ⵏ ⵜⵎⵓⴽⵔⵉⵙⵉⵏ ⵏⵏⴰ ⴷ ⴼⵍⵏ ⵡⴰⵏⴰⵡⵏ ⵉⵎⴰⵢⵏⵓⵜⵏ ⵏ ⵜⵎⵙⴽⵔⵜ ⵏ ⵜⴷⵔⴼⵉ ⵏ ⵓⵡⵏⵏⵉ ⴳ ⵓⵎⴰⴹⴰⵍ ⴰⵎⵔⴷⵓ. ⵉⵣⵎⵔ ⴰⴷ ⵉⴳ ⵓⵙⵍⴳⵏ ⴰⴷ ⴰⵎⵔⵏⵓ ⴰⵎⴰⵢⵏⵓ ⵏ ⵜⴷⵔⴼⵉ ⵏ ⵜⵏⵖⵎⴰⵙⵜ ⴷ ⵜⵥⵕⵉⴳⵜ, ⵎⴽⵍⵍⵉ ⵙ ⵔⴰⴷ ⵢⴰⵡⵙ ⴳ ⵓⵙⵉⵔⵉⵡ ⵏ ⵢⵉⴳⵔ ⵏ ⵜⵎⵙⴽⵔⵜ ⵏ ⵜⴷⵔⴼⵉⵏ, ⵙⵍⴰⵡⴰⵏ ⴰⴽⴽⵯ ⴳ ⵓⵙⵙⵉⴷⴷ ⵏ ⵜⵣⵣⵉⴳⵣⵜ ⵏ ⵉⵡⵏⵏⵉⵜⵏ ⵉⴳⴷⵓⴷⴰⵏⵏ ⴰⴳⵯⵏⵙ ⵏ ⵜⴷⴰⴱⵓⵜⵉⵏ ⵏ ⵓⵎⵢⴰⵡⴰⴹ ⴰⵏⴰⵎⵓⵏ.
ⵉⴷⴷⵖ ⵍⴰⵏ ⵓⵎⵍⴰⵏ ⵜⴰⵎⵍⴰⵍⵜ ⵜⴰⵎⴰⴷⴷⴰⵔⵜ ⴳ ⵜⵏⴼⵔⵓⵜ ⵏ ⵓⵣⵣⵔⴰⵢ ⴰⴼⴰⵔⴰⵏ ⵏ ⵉⵎⴰⵙⵙⵏ ⵏ ⵓⵏⴳⵔⴰⵡ ⴰⴷⵉⵎⵓⵇⵕⴰⵟⵉ ⴷ ⵡⴰⵏⵏⴰⵍ ⵏ ⵉⵎⴰⵙⵙⵏ ⵏ ⵓⵙⴱⴷⴷⵉ ⵏ ⵓⵙⴳⵓⴼⵙⵓ ⴷ ⵓⵙⴷⵓⵙ ⵏ ⵜⵓⴳⵜ ⵏ ⵡⵓⴷⵎⴰⵡⵏ ⵏ ⵜⴷⵔⴰⵡⵜ ⵜⴰⵏⵎⵓⵔⵉⵜ ⴷ ⵓⵙⵖⵓⴷⵓ ⵏ ⵓⵏⴱⴰⴹ ⵏ ⵜⵎⵔⵙⴰⵍ ⴷ ⵓⵙⵎⵀⵍ ⵏ ⵉⵎⴰⵙⵙⵏ ⵏ ⵓⵙⵇⵙⵉ, ⴷⴰ ⵉⵜⵜⴰⵏⵏⴰⵢ ⵓⵙⵇⵇⵉⵎ ⵎⴰⵙ ⵜⴳⴰ ⵜⴰⵖⵜⵙⵜ ⵏ “ⵓⵙⵍⴳⵏ ⵏ ⵜⴷⵔⴼⵉ ⵏ ⵓⵙⵎⵔⵙ ⵏ ⵓⵎⵍⴰⵏ” ⴰⵙⴳⴳⴷ ⵓⵚⴽⵉⵡ ⴷ ⵜⵔⵙⵍⵜ ⵜⴰⴷⵙⵍⴰⵏⵜ ⵙⴳ ⵜⵔⵙⴰⵍ ⵏ ⵜⴳⵎⵉ ⴳ ⵉⵎⵏⴰⴷⵏ ⵏⵏⵙ ⴰⴽⴽⵯ ⴷ ⵢⴰⵜ ⵙⴳ ⵜⴼⴰⴷⵉⵡⵉⵏ ⵏ ⵜⵓⵚⴽⴰ ⵏ ⵜⴼⵍⵙⵜ ⵜⴰⵎⵢⴰⵖⵜ ⴳⵔ ⵓⵡⴰⵏⴽ ⴷ ⵡⴰⵎⵓⵏ.
ⵉⵖ ⴷⴰ ⵉⵙⵙⴼⵔⴰ ⵓⵙⵇⵇⵉⵎ ⴰⵏⵣⴳⵓⵎ ⵏⵏⵙ ⵙ ⵉⵎⵉⵣⵉⵜⵏ ⵏ ⵓⵙⵏⴼⵍ ⵏ ⵡⴰⵏⴰⵡⵏ ⴰⴷ ⵉⵎⴰⵢⵏⵓⵜⵏ ⵏ ⵜⵎⵙⴽⵔⵜ ⵏ ⵜⴷⵔⴼⵉ ⵏ ⵓⵡⵏⵏⵉ ⵙ ⵓⵙⴰⴱⵍⴻⵍ ⵏ ⵉⵏⵖⵎⵉⵙⵏ ⵉⵔⵎⵉⴷⵉⵜⵏ, ⴰⵔ ⵢⴰⵇⵇⵔⴰ ⵙ ⵜⵡⵓⵔⵉ ⵅⴼ ⵓⵕⵥⵥⵓⵎ ⵏ ⵓⵙⴰⴳⴳⵯ ⵅⴼ ⵇⴰⵃ ⵉⴱⵔⵔⵉⵡⵏ ⵉⵣⴷⵉⵏ ⵙ ⵓⵙⵡⵓⴷⴷⵓ ⵏ ⵓⵙⴽⴽⵉⵏ ⴰⵎⴰⵜⴰⵢ, ⵏⵏⴰ ⵅⴼ ⵉⵜⵜⵉⵍⵉ ⵓⵙⵉⵡⵍ ⴳ ⵓⵎⴰⴹⴰⵍ ⴰⵎⵔⴷⵓ, ⴷ ⵓⵣⵓⵣⵣⵔ ⵏ ⵜⵢⴰⴼⵓⵜⵉⵏ ⵏ ⵉⵙⴰⴳⴳⵯⵏ, ⴰⵢⵍⵍⵉ ⵉⵣⵎⵔⵏ ⴰⴷ ⵢⴰⵡⵙ ⴳ ⵓⵙⴱⵓⵖⵍⵓ ⵏ ⵜⵎⵙⴽⵔⵜ ⵏ ⵜⴷⵔⴼⵉ ⵏ ⵓⵡⵏⵏⵉ ⴷ ⵓⵙⴷⵓⵙ ⵏ ⵜⴼⵍⵙⵜ ⴳ ⵜⵎⵔⵙⴰⵍ ⴷ ⵓⵙⴱⴷⴷⵉ ⵏ ⵉⵏⵖⵎⵉⵙⵏ ⵉⵔⵎⵉⴷⵉⵜⵏ.
ⴳ ⵓⵙⴰⵜⵉ ⴰⴷ, ⴰⵔ ⵉⵜⵜⴰⵏⵏⴰⵢ ⵓⵙⵇⵇⵉⵎ ⵎⴰⵙ ⴷⴰ ⵉⵜⵜⵙⴷⴷⵉⴷ ⵓⵙⵎⴽⵍ ⵏ ⵜⵎⵓⴽⵔⵉⵙⵉⵏ ⵏⵏⴰ ⵜⵙⵔⵓⵙ ⵜⵎⵍⴰⵍⵜ ⵉⵜⵜⵉⵎⵖⵓⵔⵏ ⵏ ⵉⵎⴰⵙⵙⵏ ⵏ ⵓⵎⵢⴰⵡⴰⴹ ⴰⵏⴰⵎⵓⵏ, ⴳⴰⵏⵉⵏ ⵉⵙⵓⵔⴰ ⵏ ⵜⵎⵙⴽⵔⵜ ⵏ ⵓⵣⵔⴼ ⴳ ⵜⴷⵔⴼⵉ ⵏ ⵓⵡⵏⵏⵉ, ⴰⵙⵓⵖⵏ ⵏ ⵓⵎⵓⵜⵜⵉ ⵙⴳ ⵡⵓⵜⵓⵢ ⵏ ⵓⵎⴹⴰⴽⴰⵕ ⴰⴳⴷⵓⴷⴰⵏ ⵙ ⵓⵔⵎⵎⵓⵙ ⵏ ⵜⴷⵔⴼⵉ ⵏ ⵜⵏⵖⵎⴰⵙⵜ « press freedom » ⵙ ⵓⵔⵎⵎⵓⵙ ⵏ ⵜⴷⵔⴼⵉ ⵏ ⵓⵙⵏⵖⵎⵙ « Media  freedom » ⵙ ⵓⵢⴰ ⵏⵏ ⴷⴰ ⵉⵜⵜⵙⴷⴷⵉⴷ ⵅⴼ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵅⴼ ⵜⵥⵓⵥⵜ, ⴳ ⵜⵉⵣⵉ ⵏ ⵓⵙⵡⵓⴷⴷⵓ ⵏⵏⵙ ⵉ ⵜⵎⵓⴽⵔⵉⵙⵉⵏ ⵉⵣⴷⵉⵏ ⵙ ⴽⵔⴰ ⵏ ⵡⴰⵏⴰⵡⵏ ⵉⵎⴰⵢⵏⵓⵜⵏ ⵏ ⵜⵎⵙⴽⵔⵜ ⵏ ⵜⴷⵔⴼⵉ ⵏ ⵓⵡⵏⵏⵉ, ⵙ ⵓⵙⵎⴰⵏⴰⵔ ⵙ ⵜⵎⵙⴽⵔⵉⵏ ⵜⵉⵎⵓⴼⴰⵢⵉⵏ, ⴷ ⵜⵎⴰⴳⵍⴰⵢⵉⵏ ⴱⵓⵖⵍⴰⵏⵉⵏ ⵏⵏⴰ ⴷ ⵉⴼⴼⵖⵏ ⴳ ⴽⵔⴰ ⵏ ⵜⵉⵔⵉⵎⵉⵜⵉⵏ ⵜⵉⵎⵣⴰⵣⴰⵍⵉⵏ, ⵙⵍⴰⵡⴰⵏ ⴰⴽⴽⵯ ⵎⴰⴷ ⵉⵣⴷⵉⵏ ⵙ ⵓⵙⵓⵖⵏ ⵏ ⵓⵏⵎⵓⴳⴳⵓ ⴰⴽⴷ ⵜⴷⵔⴼⵉ ⵏ ⵓⵡⵏⵏⵉ, ⴳ ⵜⵍⵍⴰ ⴰⵡⴷ ⵜⴷⵔⴼⵉ ⵏ ⵜⵏⵖⵎⴰⵙⵜ, ⵎⴰⵙ ⵓⵔ ⵜⵙⵎⵓⵏ ⵖⴰⵙ “ⵜⵉⵡⵏⴳⵉⵎⵉⵏ” ⵏⵏⴰ ⵉⵜⵜⵢⴰⵙⴰⵢⵏ ⵙ ⵜⵡⵉⵍⴰ ⵜⵓⵎⵏⵉⴳⵜ, ⵏⵉⵖ ⵜⴰⴷ ⵓⵔ ⵉⴳⵉⵏ ⵜⴰⴽⵎⵎⴰⵡⵜ ⵏⵉⵖ ⴰⵔⴰⵡⵙⴰⵏ, ⵎⴰⵛⴰ ⴷⵉⴳⵙ ⴰⵡⴷ ⵜⵉⵡⵏⴳⵉⵎⵉⵏ ⵏⵏⴰ ⵉⵙⵙⴼⵇⴰⵄⵏ, ⵏⵉⵖ ⵉⴽⴽⴰⵜⵏ, ⵏⵉⵖ ⵉⵣⵣⵉⵡⵉⵣⵏ. ⵜⴷⴷⴰ ⴳ ⵓⵎⵏⵉⴷ ⴰⴷ ⵜⴰⵏⴰⴹⵜ ⵏ ⵓⵎⵏⵇⵇⵉⵙ ⴰⵎⵥⵍⴰⵢ ⵉⵥⵍⵉⵏ ⵙ ⵓⴷⵙⵓⵙ ⴷ ⵓⴼⵔⴰⴳ ⵏ ⵓⵣⵔⴼ ⴳ ⵜⴷⵔⴼⵉ ⵏ ⵓⵎⵏⴰⴷ ⴷ ⵓⵡⵏⵏⵉ, ⴰⵢⵍⵍⵉ ⵙ ⵉⵙⵎⵉⴳⵍ  ⵓⵙⵇⵇⵉⵎ ⴳ ⵓⵎⵏⴰⴷ ⴰⵎⵙⵎⵍⴰⵏ ⵅⴼ ⵓⵙⵖⵏⵓ ⵏ ⵓⵙⵍⴳⵏ ⵉⵣⴷⵉⵏ ⵙ ⵜⵏⵖⵎⴰⵙⵜ ⴷ ⵜⵥⵕⵉⴳⵜ.
ⵉⵙⵡⵓⵜⵜⵙ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⴰⵜⵉ ⴰⴷ, ⴰⴷ ⵉⵙⴷⴷⵉⴷ ⵅⴼ ⵜⵏⴼⵔⵓⵜⵉⵏ ⵏ ⵓⴼⵔⴰⴳ ⵏ ⵜⴷⵔⴼⵉ ⵏ ⵜⵏⵖⵎⴰⵙⵜ ⴷ ⵜⵥⵕⵉⴳⵜ, ⵜⵉⵏ ⵜⵏⴼⵓⵍⵜ ⵏⵉⵖ ⵜⴰⵍⵉⴽⵟⵕⵓⵏⵉⵜ, ⴷ ⴳ ⵜⴷⴰⴱⵓⵜⵉⵏ ⵏ ⵓⵎⵢⴰⵡⴰⴹ ⴰⵏⴰⵎⵓⵏ, ⵎⴽⵍⵍⵉ ⵉⵜⵜⵙⴷⴷⵉⴷ ⵅⴼ ⵜⵏⴱⴰⴹⵉⵏ ⵜⵉⵏⵣⵔⴰⴼⵉⵏ ⴰⴷ ⴰⵎⵥⵏⵜ ⴳ ⵉⵎⵏⵣⴰⵢⵏ ⵏ ⵓⵙⵓⵖⵏ ⴷ ⵓⵎⵙⴰⵙⴰ ⵙ ⴰⵢⵍⵍⵉ ⵔⴰⴷ ⵓⵔ ⵉⴳⴳⵔ ⵉ ⵓⵣⵔⴼ ⵏ ⵜⴷⵔⴼⵉ ⵏ ⵓⵡⵏⵏⵉ ⴷ ⵜⵏⵖⵎⴰⵙⵜ ⴷ ⵓⵎⵏⴰⴷ, ⴷ ⴰⴷ ⵜⴰⵏⴼ ⵉ ⴽⵓ ⵜⴰⵎⵔⵔⵓⵜ ⵉⵜⵜⴽⴽⵙⵏ ⵜⴰⴷⵔⴼⵉ, ⴷ ⵓⵍⴰ ⵜⵓⵜⵜⵔⴰ ⵏ ⵉⵍⵉⵢ ⵏ ⵜⵉⵏⴷⵉ ⵏ ⵡⴰⵏⵏⴰⵍ ⴰⴳⴷⵓⴷⴰⵏ ⵓⵙⵔⵉⴷ ⴷ ⵡⴰⵔⵓⵙⵔⵉⴷ ⵉⵜⵜⵡⴰⵥⵍⴰⵢⵏ ⵉ ⵢⵉⴳⵔ ⵏ ⵜⵏⵖⵎⴰⵙⵜ, ⵙ ⵎⴰⴷ ⵉⵜⵜⵏⴼⵔⵓⵏ ⴰⵙⵉⵔⵉⵡ ⵏ ⵜⵥⵕⵉⴳⵜ ⴷ ⵓⵙⴷⵓⵙ ⵏ ⵜⵏⵎⴰⴳⵓⵜ ⴷ ⵓⵎⵢⴰⵏⴰⵡ, ⴷ ⵡⴰⵏⵏⴰⵍ ⵏ ⵓⵙⴷⵖⵉ ⵏ ⵜⵎⵙⵙⵓⵔⵉⵏ ⵜⵉⵏⵖⵎⴰⵙⵉⵏ ⴷ ⵓⵙⵖⵔⵜ ⵏⵏⵙⵏⵜ ⴷ ⵓⴹⴰⴽⴰⵍ ⵏ ⵜⵙⵓⵍⴰⵏⵜ ⵏⵏⵙⵏⵜ.
ⵜⴰⴷⵔⴼⵉ ⵏ ⵜⵙⴽⴰⵏⵜ
ⴷⴰ ⵉⵜⵜⴰⴼⴰ ⵓⵣⵔⴼ ⴳ ⵓⴳⵔⴰⵡ ⴰⵏⴳⵔⴰⵢ ⴰⵙⴰⵜⵓⵔ ⵏⵏⵙ ⴳ ⵜⵏⵜⴰⵎⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵓⴷⵓⵙⵜⵓⵔ ⴷ ⵉⵙⴱⴷⴰⴷⵏ ⵓⵍⴳⵉⵏⵏ ⵏⵏⵉ ⴷⴰⵔ ⴰⵣⴷⴰⵢ, ⵙⵍⴰⵡⴰⵏ ⴰⴽⴽⵯ ⵜⵉⴷ ⵉⵣⴷⵉⵏ ⵙ ⵉⴳⵔⴰⵡⵏ ⵉⴳⴷⵓⴷⴰⵏⵏ. ⵜⵙⵙⵏ ⵜⵙⴽⴰⵏⵜ ⴳ ⵍⵎⵖⵔⵉⴱ ⵜⴰⵣⵣⵉⴳⵣⵜ ⵉⵅⴰⵜⵔⵏ ⴳ ⵜⵎⵙⴽⵔⵜ ⴳ ⵜⵎⵔⴰⵡⵉⵏ ⴰⴷ ⴳⴳⵯⵔⴰⵏⵉⵏ, ⵉⴳ ⵓⵏⵖⴰⵍ ⵏ ⵓⵙⵎⵔⵙ ⵏ ⵉⵥⴹⵡⴰⵏ ⵏ ⵓⵎⵢⴰⵡⴰⴹ ⴰⵏⴰⵎⵓⵏ ⴰⵏⵣⴰⵍ ⵏⵏⵙ ⴷ ⵓⵙⵎⵓⵙⵙⵓ ⵉ ⵉⵙⵎⵉⵍⵏ ⴳⴳⵓⵜⵏⵉⵏ. ⴷⵡⵍⵏ ⵉⵎⴰⵙⵙⵏ ⴰⴷ ⵉⵎⴰⵢⵏⵓⵜⵏ ⴳⴰⵏ ⵢⴰⵏ ⵓⵙⴰⵢⵔⴰⵔ ⴰⵎⵔⴷⵓ ⵏ ⵜⵎⵙⴽⵔⵜ ⵏ ⵓⵣⵔⴼ ⴳ ⵓⵡⵏⵏⵉ ⴷ ⵜⵔⵡⴰⴽⵜ, ⴰⵛⴽⵓ ⴷⵡⵍⵏ ⴷⴰ ⵜⵜⵎⵣⴰⵔⴰⵢⵏ ⴳ ⵜⵥⵍⴰⵢⵉⵏ ⵏⵏⵙⵏ ⵅⴼ ⵜⵉⵍⵍⵉ ⵜⵙⵙⵏ ⵜⵎⴰⵣⵉⵔⵜ ⵏⵏⵖ ⴳ ⵜⵎⵔⴰⵡⵉⵏ ⵣⵔⵉⵏⵉⵏ ⵉ ⵓⵣⵓⵣⵣⵔ ⵏⵏⵙⵏ, ⴳ ⵎⴰⴷ ⵉⵥⵍⵉⵏ ⵙ ⵜⵡⵉⵍⴰ ⵏⵏⵙⵏ ⵏⵉⵖ ⴰⵙⴰⵜⵉ ⵏⵏⵙⵏ ⴰⴽⵓⴷⴰⵏ ⴷ ⵓⴷⵖⴰⵔⴰⵏ.
ⵜⴳⴰ ⵜⵎⵙⵍⴰⵢⵜ ⵏ ⵓⵙⵏⴼⵍ ⵏ ⵉⴳⵉ ⴰⵔⵡⴰⴽⴰⵏ ⵉⵏⵏⵓⵎⵙⵏ ⴷ ⵉⵜⵜⵓⵙⴰⵜⵉⵢⵏ ⵙ ⵓⵙⵍⴳⵏ ⵖⵔ ⵉⴳⵉ ⴰⵔⵡⴰⴽⴰⵏ ⵉⵜⵜⵓⴼⵙⴰⵔⵏ ⴳ ⵓⵙⵡⵉⵔ ⵏ ⵉⴷⵖⴰⵔⵏ ⴰⴽⴽⵯ ⵏ ⵡⴰⴽⴰⵍ ⴰⵏⴰⵎⵓⵔ ⵙ ⵓⵎⵣⴰⵔⴰⵢ ⵏ ⵉⵙⵏⵜⴰⵍ ⵏⵏⵙ ⴷ ⵉⵙⵓⵜⵔⵏ ⵏⵏⵙ, ⵉⴳⴰ ⵓⵖⵓⵍ ⵏ ⵓⴼⵔⴰⴽ ⵉⵜⵜⵓⵔⵏⵓⵏ ⵏ ⵉⵏⵎⵓⵔⴰⵏ ⵙ ⵉⵣⵔⴼⴰⵏ ⵏⵏⵙⵏ, ⴰⵢⵍⵍⵉ ⵉⵙⴽⴰⵔⵏ ⵢⴰⵏ ⵓⵎⵢⴰⵙ ⴷ ⵉⵇⵇⴰⵏ ⴳ ⵡⴰⵎⵓⵏ ⴰⴷⵉⵎⵓⵇⵕⴰⵟⵉ, ⴳⵔ ⵜⵎⵙⴽⵔⵜ ⵏ ⵓⵣⵔⴼ ⴳ ⵜⵙⴽⴰⵏⵜ ⵏ ⵓⴼⵔⴰ ⴰⵎ ⵢⴰⵏ ⴳ ⵓⴷⵎⴰⵡⵏ ⵏ ⵓⵣⵔⴼ ⴳ ⵓⵡⵏⵏⵉ ⴷ ⵉⵙⴱⴷⴰⴷⵏ ⵏ ⵓⴼⵔⴰⴳ ⵏ ⵓⵏⴳⵔⴰⵡ ⴰⵎⴰⵜⴰⵢ.
ⴰⵔ ⵉⵜⵜⴹⵓⴼ ⵓⵙⵇⵇⵉⵎ ⴷ ⵜⵙⵇⵇⵉⵎⵉⵏ ⵏⵏⵙ ⵜⵉⵏⵎⵏⴰⴹⵉⵏ ⵜⵉⵙⴽⴰⵏⵉⵏ ⴷ ⵉⴳⵔⴰⵡⵏ ⵉⵏⴳⵔⴰⵢⵏ ⴳ ⵜⵙⴳⴳⵯⵉⵏ ⴰⴽⴽⵯ ⵏ ⵍⵎⵖⵔⵉⴱ, ⴰⵔ ⵜⵜⵎⵢⴰⵏⴰⵡⵏⵜ ⴳⵔ ⵎⴰⴷ ⵉⴳⴰⵏ ⴰⵙⴳⵓⵎⴰⵏ ⴰⵎ ⴰⵙⵓⵜⵔ ⵏ ⵓⴼⵊⵊⵉⵊ ⵏ ⵉⵣⵔⴼⴰⵏ, ⵣⵓⵏ ⴷ ⴰⵣⵔⴼ ⴳ ⵜⴷⵓⵙⵉ ⴷ ⵜⵡⵓⵔⵉ ⴷ ⵜⵣⴷⴷⵓⵖⵜ ⴷ ⵓⵙⵍⵎⴷ ⴷ ⵡⴰⵎⴰⵏ ⵏ ⵜⵉⵙⵙⵉ, ⵏⵉⵖ ⵜⴰⵔⵡⴰⴽⵜ ⵅⴼ ⵉⵍⵉⵢ ⵏ ⵡⴰⵜⵉⴳⵏ ⵏ ⵜⵎⵜⵜⵉⵡⵉⵏ ⵜⵉⵙⵙⵓⵎⵔⴰ, ⵏⵉⵖ ⵜⴰⵔⵡⴰⴽⵜ ⵏ ⴽⵔⴰ ⵏ ⵜⴳⵔⴰⵡⵉⵏ ⵜⵉⵣⵣⵓⵍⴰⵏⵉⵏ, ⴰⵎ ⵜⴰⵔⵡⴰⴽⵜ ⵏ ⵉⵎⵙⵜⴰⵏⵏ ⵅⴼ ⵓⵙⵖⵏⵓ ⵏ ⵓⵙⵍⴳⵏ ⵏ ⵓⵥⵕⴼ ⴷ ⵜⵔⵡⴰⴽⵉⵏ ⵏ ⵉⵙⵍⵎⴰⴷⵏ ⵉⵎⴰⵖⵓⵏⵏ ⴷ ⵜⵔⵡⴰⴽⵉⵏ ⵏ ⵉⵎⵃⵔⴰⵢⵏ ⵅⴼ ⵉⵍⵉⵢ ⵏ ⵡⴰⵜⵉⴳⵏ ⵏ ⵉⵎⴰⵇⵇⴰⴷⵏ ⴷ ⵜⵔⵡⴰⴽⵜ ⵏ ⵉⵎⴽⵔⴰⵣⵏ, ⵏⵉⵖ ⴰⵙⵓⵜⵔ ⵏ ⵓⵕⵥⵥⵓⵎ ⵉ ⴽⵔⴰ ⵓⵙⵎⵉⵍ ⵏ ⵉⵏⴽⵔⵓⴼⵏ, ⴷ ⵓⴳⴳⴰⵔ. ⵙⵏⵎⵉⵍⵉⵏ ⵜⵎⵙⵎⵓⵏⵉⵏ ⵏⵉⵖ ⵉⵏⵎⵓⵍⵍⴰ ⵏⵉⵖ ⵜⵉⴳⵔⴰⵡⵉⵏ ⵜⵉⵣⵣⵓⵍⴰⵏⵉⵏ ⵏⵉⵖ ⵉⵎⵣⵔⴰⵡⵏ ⵏⵉⵖ ⵜⵉⵎⵖⴰⵔⵉⵏ ⵜⵉⵥⵓⵕⴰⵏⵉⵏ ⵜⵉⵙⴽⴰⵏⵉⵏ ⴰⴷ. ⴳ ⵓⵎⵏⵉⴷ ⴰⴷ, ⴷⴰ ⵏⵏ ⴽⵛⵛⵎⵏⵜ ⵜⵙⵇⵇⵉⵎⵉⵏ ⵜⵉⵏⵎⵏⴰⴹⵉⵏ ⴳ ⴽⵔⴰ ⵏ ⵡⴰⴷⴷⴰⴷⵏ ⴳ ⵓⵙⴰⵜⵉ ⵏ ⵜⵏⴳⵔⵜ ⴷ ⵓⴽⴽⵛⵛⵓⵎ ⴰⵙⵉⵣⵡⵔ ⴱⵍⴰ ⵜⵍⵍⴰ ⵛⴰ ⵏ ⵜⵕⵥⵉ.
ⴳ ⵜⵉⵣⵉ ⵍⵍⵉ ⵖ ⴷⴰ ⵉⵙⴽⴰⵔ ⵓⵙⵇⵇⵉⵎ ⵙ ⵜⵣⵣⵉⴳⵣⵜ ⵉⵅⴰⵜⵔⵏ ⴳ ⵓⵙⵡⵉⵔ ⵏ ⵜⵎⵙⴽⵔⵜ ⵏ ⵓⵣⵔⴼ ⵏ ⵜⵙⴽⴰⵏⵜ ⵜⴰⵏⴳⵔⴰⵢⵜ, ⴷⴰ ⵉⵜⵜⵣⵎⵎⵉⵎ ⵎⴰⵙ ⴷⴰ ⵣⵔⵔⵉⵏ ⵜⵓⴳⵜ ⵏ ⵉⵎⵓⵙⵙⵓⵜⵏ ⵉⵏⵔⴽⴰⵡⵏ ⵉⵏⴳⵔⴰⵢⵏ ⴳ ⵜⵎⵙⵓⵜⴰⵍ ⵜⵓⵏⵣⵉⵍⵉⵏ ⵉⵏⴳⵔⴰⵢⵏ, ⴰⵔ ⴱⴰⵀⵔⴰ ⵏⵏ ⴽⵛⵛⵎⵏⵜ ⵜⴳⴳⴰⵍⵉⵏ ⵜⵉⴳⴷⵓⴷⴰⵏⵉⵏ ⴰⴷ ⴱⴹⵓⵏⵜ ⵉⵎⵙⴽⴰⵏⵏ, ⵏⵉⵖ ⴰⴷ ⴼⵔⴳⵏⵜ ⵜⴰⵡⴰⴷⴰ ⵎⴰⵛ ⴰⵔ ⵉⵜⵜⵣⵎⵎⵉⵎ ⵓⵙⵇⵇⵉⵎ ⴽⵔⴰ ⵏ ⵡⴰⴷⴷⴰⴷⵏ ⴳ ⵉⵜⵜⵡⴰⵙⵙⴰⵏⵏ ⵙ ⵓⵣⵔⴰⵢ ⵏ ⵉⵡⵜⵜⴰ, ⵎⴽⵍⵍⵉ ⵉⵣⵎⵎⵉⵎ ⵓⵙⵇⵇⵉⵎ ⵎⴰⵙ ⴷⴰ ⵜⵜⵡⴰⵙⴽⴰⵔⵏⵜ ⵜⵓⴳⵜ ⵏ ⵜⵙⴽⴰⵏⵉⵏ ⴱⵍⴰ ⴰⵙⵓⵔⴳ.
ⵜⴰⴷⵔⴼⵉ ⵏ ⵓⵙⵔⵓⵙ ⵏ ⵜⵎⵙⵎⵓⵏⵉⵏ.
ⴷⴰ ⵉⵜⵜⵏⴼⵔⵓ ⵓⵍⵖⵓ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ (ⵜⴰⵎⵜⵜⴰ 20) ⴷ ⵓⵎⵉⵔⵓ ⴰⴳⵔⴰⵖⵍⴰⵏ ⵏ ⵉⵣⵔⴼⴰⵏ ⵓⵖⵔⵉⵎⵏ ⴷ ⵉⵙⵔⵜⴰⵏⵏ (ⵜⴰⵎⵜⵜⴰ 22) ⵜⴰⴷⵔⴼⵉ ⵏ ⵓⵙⵔⵓⵙ ⵏ ⵜⵎⵙⵎⵓⵏⵉⵏ, ⴰⵎⵏⴰⴷ ⵏⵏⴰ ⵉⵙⵣⴳⴰ ⵓⴷⵓⵙⵜⵓⵔ ⵏ 2011 ⴳ ⵜⵣⵡⴰⵔⵜ ⵏⵏⵙ ⴷ ⵜⵓⴳⵜ ⵏ ⵉⵎⴰⴳⵔⴰⴷⵏ ⵏⵏⵙ ⵏⵏⴰ ⵉⵖⵜⵙⵏ ⵜⴰⴳⵔⵓⵎⵎⴰ ⵏ ⵜⵏⴼⵔⵓⵜⵉⵏ ⴷ ⵉⵎⴰⵙⵙⵏ ⵉⵣⴷⵉⵏ ⵙ ⵜⴷⵔⴼⵉⵏ ⵜⵉⵎⵙⵎⵓⵏⵉⵏ. ⵜⴻⵜⵜⵓⵙⵙⵓⵜⵉ ⵜⵡⵓⵔⵉ ⵜⴰⵎⵙⵎⵓⵏⵜ ⴳ ⵍⵎⵖⵔⵉⴱ ⵙ ⵜⴳⵔⵓⵎⵎⴰ ⵏ ⵉⵣⵣⵔⴰⴼⵏ, ⵙⵍⴰⵡⴰⵏ ⴰⴽⴽⵯ ⴰⴹⴰⵀⵉⵕ ⴰⵎⴰⵖⵓⴷ ⵓⵟⵟⵓⵏ 1-58-376 ⴷ ⵉⴼⴼⵖⵏ ⴳ 15 ⵏⵓⵡⴰⵏⴱⵉⵔ 1958 ⵏⵏⴰ ⵉⵙⵏⵎⴰⵍⴰⵏ ⴰⵣⵔⴼ ⵏ ⵓⵙⵔⵓⵙ ⵏ ⵜⵎⵙⵎⵓⵏⵉⵏ.
ⵎⵇⵇⴰⵔ ⴷⴰ ⵢⴰⴽⴽⴰ ⵓⵙⵍⴳⵏ ⴰⴷ ⴽⵉⴳⴰⵏ ⵏ ⵜⵏⴼⵔⵓⵜⵉⵏ ⵏⵏⴰ ⵉⵙⵣⵎⵔⵏ ⴰⵎⵓⵏ ⵓⵖⵔⵉⵎ ⴰⴷ ⵢⵓⵔⴰⵔ ⵜⴰⵎⵍⴰⵍⵜ ⵏⵏⵙ, ⵍⵍⵉⵖ ⵉⴳⴰ ⴰⵎⴳⴳⴰⵢ ⴷ ⵓⵎⴷⵔⴰⵡ ⴳ ⵜⵎⵙⴽⵔⵜ ⵏ ⵜⴷⵉⵎⵓⵇⵕⴰⵟⵉⵜ ⴷ ⵓⵎⵙⴽⴰⵔ ⴳ ⵓⵙⴰⴽⴰ ⵏ ⵜⴳⵎⵉ, ⵜⵙⵓⵍ ⵜⴷⵔⴼⵉ ⵏ ⵜⵎⵙⵎⵓⵏⵉⵏ ⴷⴰ ⵜⵜⵎⵏⴰⵍⴰ ⴽⵔⴰ ⵏ ⵜⵏⵥⴰⵕ ⵏⵏⵉ ⵉⵜⵜⴹⵉⵚⵏ ⵅⴼ ⵜⵕⵡⵉ ⵏ ⵜⵡⵓⵔⵉ ⵜⴰⵎⵙⵎⵓⵏⵜ, ⵜⵙⵢⴰⴼⴰ ⵙ ⴽⵉⴳⴰⵏ ⵏ ⵜⴰⵙⵙⴰⵏⵉⵏ ⵉⵏⴳⵔ ⵉⵎⴳⴳⴰⵢⵏ ⵉⵎⵙⵎⵓⵏⵏ, ⴷ ⵜⵏⴱⴰⴹⵉⵏ ⵜⵉⴷⵖⵔⴰⵏⵉⵏ ⵜⵉⵎⵙⵙⵓⴳⴰⵔ. ⵢⵉⵍⵉ ⵎⴰⵢⴰ ⵏⵏ ⵉⴷⴷⵖ ⵉⵍⵍⴰ ⵓⵔⵜⴰⵢ ⴷ ⵓⴼⴰⵙⵔ ⵏ ⵉⴹⵕⵉⵚⵏ ⵓⵍⴳⵉⵏⵏ ⵉⵙⵙⵓⵜⵉⵏ ⵉ ⵓⵙⵔⵓⵙ ⵏ ⵜⵎⵙⵎⵓⵏⵉⵏ, ⴷ ⵡⴰⵔ ⴰⵎⵙⴰⵙⴰ ⵏⵏⵙⵏ ⴷ ⵜⵉⵍⴰⵡⵜ ⵏ ⵜⵎⵙⴽⵔⵜ ⵜⴰⵎⵙⵎⵓⵏⵜ ⴷ ⵡⴰⵏⴰⵡⵏ ⵉⵎⴰⵢⵏⵓⵜⵏ ⵏ ⵓⵡⵏⵏⵉ ⴰⴳⴷⵓⴷⴰⵏ ⵙⴳ ⵜⵙⴳⴰ ⵢⴰⴹⵏ.
ⵓⵟⵟⵓⵏⵏ ⵉⵏⴰⵎⴽⴰⵏⵏ
ⵜⴰⴷⵔⴼⵉ ⵏ ⵜⵙⴽⴰⵏⵜ ⵜⴰⵏⴳⵔⴰⵢⵜ
ⵓⵟⵟⵓⵏ ⵏ ⵉⴳⵔⴰⵡⵏ ⴷ ⵜⵙⴽⴰⵏⵉⵏ ⴳ ⵓⵙⴳⴳⵯⴰⵙ ⵏ 2021 ⵢⵉⵡⴹ ⵎⴰⴷ ⵉⴳⴰⵏ 13471  ⵏ ⵓⴳⵔⴰⵡ, ⴷⵔⵓⵏ ⴳⵉⵙⵏ 669416  ⵏ ⵡⵓⴳⴳⵉⴷⵏ.
ⵓⵟⵟⵓⵏ ⵏ ⵉⴳⵔⴰⵡⵏ ⴷ ⵜⵎⵙⴽⴰⵏⵉⵏ ⴳ ⵓⵙⴳⴳⵯⴰⵙ ⵏ 2022 ⵢⵉⵡⴹ ⵎⴰⴷ ⵉⴳⴰⵏ 11874 ⵏ ⵓⴳⵔⴰⵡ, ⴷⵔⵓⵏ ⴳⵉⵙⵏ 450487  ⵏ ⵡⵓⴳⴳⵉⴷⵏ.
ⵜⵉⴹⴰⴼ ⵏ ⵓⵙⵇⵇⵉⵎ ⴷ ⵜⵙⵇⵇⵉⵎⵉⵏ ⵏⵏⵙ ⴳ ⵓⵙⴳⴳⵯⴰⵙ ⵏ 2022 ⵎⴰⴷ ⵉⴳⴰⵏ 538 ⵏ ⵜⵔⴽⴰⵡⵜ ⴷ ⵓⴳⵔⴰⵡ ⴰⵏⴳⵔⴰⵢ ⴳ ⵜⵙⴳⴳⵯⵉⵏ ⴰⴽⴽⵯ ⵏ ⵍⵎⵖⵔⵉⴱ.

ⵜⴰⴷⵔⴼⵉ ⵏ ⵓⵙⵔⵓⵙ ⵏ ⵜⵎⵙⵎⵓⵏⵉⵏ

• ⵓⵟⵟⵓⵏ ⴰⵎⵙⵎⵓⵏ ⵏ ⵜⵎⵙⵎⵓⵏⵉⵏ ⵉⵜⵜⵡⴰⵙⵔⴰⵙⵏ ⵙ ⵜⵡⵉⵍⴰ ⵜⵓⵍⴳⵉⵏⵜ ⴳ ⵓⵙⵡⵉⵔ ⴰⵏⴰⵎⵓⵔ ⴰⵔ ⴰⵙⴳⴳⵯⴰⵙ ⵏ 2022: 259  ⵏ ⵢⵉⴼⴹ ⵏ ⵜⵎⵙⵎⵓⵏⵜ.
• ⵓⵟⵟⵓⵏ ⵏ ⵜⵎⵙⵎⵓⵏⵉⵏ ⵏⵏⵉ ⵉⵜⵜⵡⴰⵙⵔⴰⵙⵏ ⴳ ⵓⵙⵡⵉⵔ ⴰⵏⴰⵎⵓⵔ ⴳ ⵓⵙⴳⴳⵯⴰⵙ ⵏ 2022: ⵎⴰⴷ ⵉⴳⴰⵏ 10422 ⵏ ⵜⵎⵙⵎⵓⵏⵜ.
• ⵓⵟⵟⵓⵏ ⵏ ⵜⵎⵙⵎⵓⵏⵉⵏ ⵏⵏⵉ ⵉⵙⵎⴰⵢⵏⵓⵏ ⵉⵙⵉⵔⴰ ⵏⵏⵙⵏⵜ ⴳ ⵓⵙⵡⵉⵔ ⴰⵏⴰⵎⵓⵔ ⴳ ⵓⵙⴳⴳⵯⴰⵙ ⵏ 2022: ⵎⴰⴷ ⵉⴳⴰⵏ 22813  ⵏ ⵜⵎⵙⵎⵓⵏⵜ.