ⵉⴷⵔⵓ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵡⵓⵔⵉⵡⵉⵏ ⵏ ⵜⵙⵓⵜⵍⵜ ⵜⴰⵎⵣⵡⴰⵔⵓⵜ ⵏ ⵜⵉⵏⴰⵡⵜ ⵛⵛⵉⵏⵡⴰ-ⵉⴼⵔⵉⵇⵢⴰ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵜⵜⵓⵙⵏⵎⴰⵍⴰⵏ ⴳ ⵜⵎⴰⵥⵓⵏⵜ ⵜⵉⵜⵢⵓⴱⵉⵜ ⴰⴷⵉⵙ ⴰⴱⵉⴱⴰ, ⴰⵙⵙ ⵏ ⵓⵙⵉⵎⵡⴰⵙ 22 ⵖⵓⵛⵜ 2025. ⵜⵙⵙⵏ ⵜⴼⵓⴳⵍⴰ ⴰⴷ ⵜⴰⴷⵔⴰⵡⵜ ⵏ ⵎⴰⴷ ⵢⴰⵥⵏ ⵉ 200 ⵏ ⵉⵎⵙⴽⴰⵔⵏ (ⵜⵉⵎⵙⴽⴰⵔⵉⵏ) ⵙⴳ ⵉⴼⵔⵉⵇⵢⴰ ⴷ ⵛⵛⵉⵏⵡⴰ, ⵣⵡⵓⵔⵏ ⴰⵙⵏ ⵉⴳⵏⵙⴰⵙⵏ/ⵜⵉⴳⵏⵙⴰⵙⵉⵏ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ.

ⵙ ⵓⵣⵎⵣⵣⵓ ⴰⴷ, ⵉⵖⵔⴰ ⵓⵙⵇⵇⵉⵎ, ⵙ ⵢⵉⵍⵙ ⵏ ⵎⴰⵙⵙ ⵄⴱⴷⵕⵕⴰⴼⵉⵄ ⵃⵉⵎⴹⵉ, ⴰⵏⵎⵀⴰⵍ ⵏ ⵜⴹⴼⵕⵉ ⴷ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵔⵙⵍⵜ, ⵙ ⵓⵙⵜⴰⵢ ⵏ ⵡⴰⵏⴰⵡ ⵏ ⵓⵎⵢⴰⵡⴰⵙ ⵉⵡⴰⵜⵜⵙⵏ ⴰⴷ ⵉⵍⴽⵎ ⴰⵎⵢⴰⵙ ⵏⴳⵔ ⵓⵙⵎⵖⵉ ⴰⴷⵎⵙⴰⵏ ⴷ ⵓⵡⵇⵇⵔ ⴰⵎⵢⴰⴳⴰⵏ ⴷ ⵉⵙⵎⴷⵏ ⵏ ⵉⵣⵔⴼⴰⵏ ⴷ ⵜⴷⵔⴼⵉⵏ ⵜⵉⴷⵙⵍⴰⵏⵉⵏ, ⵉⵙⴷⴷⵉⴷ ⵅⴼ ⵓⵙⵖⵓⵏ ⵏ ⵓⵙⵔⴰⵙ ⵏ ⵡⴰⴷⴷⵓⵔ ⵏ ⵓⵏⵎⵓⵔⵉ ⴰⴼⵔⵉⵇⵉ ⴳ ⵜⵓⵥⵥⵓⵎⵜ ⵏ ⴽⵔⴰⵢⴳⴰⵜ ⵜⴳⵎⵉ ⵉⵜⵜⵓⵡⴰⵜⵜⵙⵏ.

ⵉⵙⵎⴰⵢⵏⵓ ⵓⵙⵇⵇⵉⵎ ⴰⵙⴷⴷⵉⴷ ⴳ ⵓⵏⵎⵓⵇⵇⴰⵔ ⴰⴷ ⵎⴰⵙ ⵓⵔ ⵉⵣⵎⵉⵔ ⴰⴷ ⵉⵜⵜⵡⴰⵍⴽⴰⵎ ⵓⵣⵔⴼ ⴳ ⵜⴳⵎⵉ ⴷ ⵓⵙⵎⵀⵍ ⵏⵏⵙ ⴱⵍⴰ ⵜⴰⴷⵔⴰⵡⵜ ⵉⵕⵡⴰⵏ ⵏ ⵉⵏⵎⵓⵔⴰⵏ ⵏ ⵉⵡⴰⵏⴽⵏ ⵉⴼⵔⵉⵇⵉⵢⵏ, ⵉⵙⴷⴷⵉⴷ ⴳ ⵓⵙⴰⵜⵉ ⴰⴷ ⵅⴼ ⵡⴰⵏⴰⵡ ⴰⵙⵓⵍⴰⵏ ⴷ ⵓⵖⵣⵓⵔⴰⵏ ⴷ ⵓⵎⵙⵓⵎⵓ ⵏⵏⴰ ⵉⵅⵚⵚⴰ ⴰⴷ ⵙⵔⵙ ⵜⵜⵡⴰⵙⵙⴰⵏ ⵜⴳⵎⵉ ⴰⴷ.

ⴳ ⵓⵙⴰⵜⵉ ⵉⵣⴷⵉⵏ, ⵉⵙⵙⴽⵜⵉ ⵓⵙⵇⵇⵉⵎ ⵜⴰⵎⵙⵜⴳⴳⴰⵔⵜ ⵏ ⵜⵎⵙⵙⵓⵔⵉⵏ ⴷ ⵜⵎⵙⵙⵏⵜⵉⵜⵉⵏ, ⵉⵙⴷⴷⵉⴷ ⵅⴼ ⵓⵙⵖⵓⵏ ⵏ ⵓⵙⵓⵖⵏ ⵏⵏⵙⵏⵜ ⴰⵎⴰⴳⴷⴰⵣ ⵙ ⵉⵎⵏⵣⴰⵢⵏ ⵉⵙⵓⵜⴰⵢⵏ ⵏ ⵜⵎⵜⵜⴰ ⵉⵎⵓⵏⵏ ⵉⵥⵍⵉⵏ ⵙ ⵜⵡⵓⵔⵉⵡⵉⵏ ⵜⵉⵎⵙⵖⵏⵣⵉⵜⵉⵏ (ⵜⴰⵎⵙⵙⵏⵜⵉⵜ) ⴷ ⵉⵣⵔⴼⴰⵏ ⵏ ⵓⴼⴳⴰⵏ, ⵃⵎⴰ ⴰⴷ ⴳⵏⵜ ⵜⵉⵍⴰⵍ ⵜⵉⴷⵎⵙⴰⵏⵉⵏ ⵜⴰⵎⵙⵙⵉⵍⵉⵜ ⵏ ⵓⵙⵎⵀⵍ ⵏ ⵉⵣⵔⴼⴰⵏ, ⵓⵔ ⴷ ⵜⵉⵎⵕⵥⵉⵜ ⵏⵏⵙⵏ.

ⴳ ⵓⵎⵙⴰⵡⴰⵍ ⵏⵏⵙ ⵅⴼ ⵜⴷⵔⴰⵡⵜ ⵜⴰⵛⵉⵏⵡⵉⵜ-ⵜⴰⴼⵔⵉⵇⵉⵜ, ⵉⵙⵙⴼⴰⵡ ⵎⴰⵙⵙ ⵃⵉⵎⴹⵉ ⵎⴰⵙ ⵉⵏⵏⴰⵍ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⵙⴽⴰⵔ ⵏ ⵓⵎⵢⴰⵡⴰⵙ ⵉⴱⴷⴷⵏ ⵅⴼ ⵜⵔⵙⴰⵍ ⴷⵓⵙⵏⵉⵏ ; ⵅⴼ ⵓⵣⵔⴼ ⴳ ⵜⴳⵎⵉ ⴷ ⵜⵣⵔⴼⵜ ⵜⴰⵏⴰⵎⵓⵏⵜ ⴷ ⵓⵡⴰⵜⵜⵙ ⴰⵙⵓⵍⴰⵏ ⵉ ⵓⵙⴱⴷⴷⵉ ⵏ ⵥⵥⵍⴹ.

ⵎⴽⴷⴰ ⵉⵙⵙⵉⴷⴷ ⵓⵙⵇⵇⵉⵎ ⵅⴼ ⵜⵉⵍⴰⵍⵜ ⵜⴰⵏⴰⵎⵎⴰⵙⵜ ⵏⵏⴰ ⵉⵅⵚⵚⴰ ⴰⴷ ⵜⵜⵓⵔⴰⵔⵏⵜ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵙⴷⴷⵉⴷ ⵅⴼ ⵓⵙⵖⵓⵏ ⵏ ⵓⵙⴷⵔⴰⵡ ⵏⵏⵙⵏⵜ ⵙ ⵜⵡⵉⵍⴰ ⵜⴰⵎⵏⵀⴰⵍⵜ ⴳ ⵜⴷⵔⴰⵡⵉⵏ ⵜⵉⵛⵉⵏⵡⵉⵢⵉⵏ-ⵜⵉⴼⵔⵉⵇⵉⵢⵉⵏ. ⵉⵙⵙⴼⴰⵡ ⵎⴰⵙ ⵣⵎⵔⵏⵜ ⵜⵎⵔⵙⴰⵍ ⴰⴷ ⴰⴷ ⴷⵔⵓⵏⵜ ⵙ ⵜⵡⵉⵍⴰ ⵉⵕⵡⴰⵏ ⴳ ⵓⵙⵖⵉⵎ ⵏ ⵓⴷⵔⵉⵣ ⴰⵏⴰⵎⵓⵏ ⴷ ⵓⵡⵏⴹⴰⵏ ⵏ ⵉⵙⵏⵜⴰⵢ ⴷ ⵡⴰⵏⵏⴰⵍ ⵏ ⵜⴷⵔⴰⵡⵜ ⵜⴰⵏⵎⵓⵔⵉⵜ ⴷ ⵓⵚⴽⵓ ⵏ ⵉⵙⵏⴹⴰⵡ ⵏ ⵓⵎⵢⴰⵡⴰⴹ ⵏⴳⵔ ⵜⵏⴱⴰⴹⵉⵏ ⴷ ⵜⵎⵙⵙⵏⵜⵉⵜⵉⵏ ⴷ ⵡⴰⵎⵓⵏ ⵓⵖⵔⵉⵎ ⵉ ⵓⵙⵔⵙ ⵏ ⵉⴼⵙⵙⴰⵢⵏ ⵏⵏⵉ ⴷⴰⵔ ⵜⵍⵍⴰ ⵜⵙⴼⵍⵙⴰⵏⵜ.

ⴳ ⵜⴳⵉⵔⴰ ⵏ ⵜⴳⵓⵔⵉ ⵏⵏⵙ, ⵉⵙⴷⴷⵉⴷ ⵓⵙⵇⵇⵉⵎ ⵎⴰⵙ ⵉⵅⵚⵚⴰ ⴰⴷ ⵉⵜⵜⵓⵙⴷⵓⵙ ⵓⵥⵍⴰⵢ ⵏⵏⴰ ⵉⵙⵙⵏ ⴰⵎⵢⴰⵡⴰⵙ ⴰⵛⵉⵏⵡⵉ-ⴰⴼⵔⵉⵇⵉ, ⵉⴱⴷⴷⵏ ⵅⴼ ⵓⵎⵓⵙⵙⵓ ⴰⵎⵣⵔⴰⵢ ⴷ ⵓⵡⵇⵇⵔ ⵉⵜⵜⵓⵎⵔⴰⵔⴰⵏ, ⵙ ⵓⵣⴷⴰⵢ ⵏⵏⵙ ⵙ ⵓⵙⴰⵜⵉ ⴰⵖⵣⵓⵔⴰⵏ ⵏ ⵓⵣⵔⴼ ⴳ ⵜⴳⵎⵉ. ⵉⵖⵔ ⴳ ⵓⵙⴰⵜⵉ ⴰⴷ ⵙ ⵓⵙⵙⴰⵔⵓ ⴳ ⵓⴷⴳⴰⵔ ⴰⵏⴼⴳⴰⵏ ⵙ ⵓⵙⵙⵍⵎⴷ ⴷ ⵜⴷⵓⵙⵉ ⴷ ⵓⵙⵏⴼⵍⵓⵍⵓ ⵏ ⵉⵣⵎⴰⵣ ⵏ ⵜⵡⵓⵔⵉ ⵉⵍⴰⵇⵏ ⴷ ⵜⵏⴼⵔⵓⵜ ⵏ ⵜⴷⵔⴰⵡⵜ ⵜⵎⵓⵔⵉ ⴷ ⵓⵙⵉⴷⴼ ⵏ ⵉⵙⵎⵉⵍⵏ ⴽⵓⴽⴹⵏⵉⵏ.