ⴰⵔ ⵜⵜⵏⵓⵕⵥⵓⵎⵏⵜ ⵜⵉⴼⴰⵡⵜ ⵏ ⵓⵙⴽⴽⴰ ⴰⵙⵉⵎⵡⴰⵙ 22 ⵎⴰⵢⵢⵓ 2026 ⴳ ⵎⵕⵕⴰⴽⵛ, ⵜⵡⵓⵔⵉⵡⵉⵏ ⵏ ⵓⴳⵔⴰⵡ ⴰⴳⵔⴰⵖⵍⴰⵏ ⵡⵉⵙⵙ ⵎⵔⴰⵡ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵙⵍⴳⵏⵏ ⵏ ⵉⵙⵜⴰⵢⵏ, ⵏⵏⴰ ⵉⵜⵜⵓⵙⵏⵎⴰⵍⴰⵏ ⴳ ⵍⵎⵖⵔⵉⴱ ⵉ ⵜⵉⴽⴽⵍⵜ ⵜⴰⵎⵣⵡⴰⵔⵓⵜ ⵙ ⵜⵙⵏⵜⴰⵢⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⵉⴷⴷⴰ ⴰⴷ ⵉⵙⵉⵡⵍ ⵓⴳⵔⴰⵡ ⵏ ⴰⵙⴳⴳⵯⴰⵙ ⴰⴷ  ⵅⴼ "ⵉⵙⵜⴰⵢⵏ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵣⵎⵣ ⵏ ⵜⵙⵎⵓⵟⵟⵓⵏⵜ ⴷ ⵜⵖⵉⵙⵜ ⵜⴰⵙⵎⴳⵓⵔⵜ", ⵙ ⵓⵔⴰⵄⴰ ⵖⵔ ⵜⵎⵉⵔⵉⵏ ⵏ ⵉⵎⵔⵙⵉ ⴳ ⵉⵎⵏⴰⴹ ⵉⵙⴳⴰⵡⴰⵏⵏ ⴷ ⵉⴳⵔⴰⵖⵍⴰⵏⵏ, ⴷ ⵓⵙⵉⵔⵙⵍ ⵏ ⵍⵎⵖⵔⵉⴱ ⵉ ⵓⵙⵏⵎⴰⵍⴰ ⵏ ⵉⵙⵜⴰⵢⵏ ⵓⵣⵔⵉⴼⵏ ⴳ ⵡⴰⵢⵢⵓⵔ ⵏ ⵛⵓⵜⴰⵏⴱⵉⵔ ⴷ ⵉⴷⴷⴰⵏ, ⵙ ⵜⴷⵔⴰⵡⵜ ⵏ ⵉⵏⴱⴹⴰ ⵣⴳ ⵉⵡⴰⵏⴽⵏ  ⵉⵎⵢⴰⵏⴰⵡⵏ, ⴷ ⵉⵎⵓⵣⴰⵢⵏ ⴷ ⵉⵎⵓⵣⴰⵢⵉⵏ, ⴷ ⵉⵎⴰⵙⴰⵢⵏ ⴷ ⵉⴳⵏⵙⴰⵙⵏ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⴷ ⵜⵙⵇⵇⵉⵎⵉⵏ ⵏ ⵉⵙⵜⴰⵢⵏ ⴷ ⵜⵎⴰⴷⴷⴰⵙⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵜⵙⴳⴰⵡⴰⵏⵉⵏ, ⵔⵏⵓ ⴰⵙⵏ ⴰⵡⴷ ⵉⵎⵙⴷⴰⵡⵏ ⴷ ⵉⵎⵔⵣⵓⵜⵏ ⴷ ⵉⵎⴳⴳⴰⵢⵏ ⴳ ⵢⵉⴳⵔⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵙⵎⵓⵟⵟⵓⵏⵜ ⴷ ⵜⵖⵉⵙⵜ ⵜⴰⵙⵎⴳⵓⵔⵜ ⴷ ⵉⵙⵜⴰⵢⵏ.

"ⴷ ⵏⴽⴽⵯⵏⵉ ⴰⵔ ⵏⵙⵙⵓⵊⴰⴷ ⵉ ⵓⵖⴹⴰⴼ ⵏ ⵉⵙⵜⴰⵢⵏ ⵓⵣⵔⵉⴼⵏ ⴳ ⵍⵎⵖⵔⵉⴱ", ⴰⵔ ⵜⵜⵉⵏⵉ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵜⵎⵍⴷⴰ ⵏ ⵓⵙⵏⵎⴰⵍⴰ ⵏ ⵓⴳⵔⴰⵡ ⴰⴷ, "ⴰⵔ ⵏⵙⵙⵉⵜⵉⵎ ⴰⴷ ⵍⵓⵎⵎⴰ ⴳ ⵓⵙⴷⵓⵙ ⵏ ⵓⵎⵙⴳⴷⴰⵍ ⴰⴳⵜⵎⵏⵉⴷ ⵅⴼ ⵉⵙⵏⴼⵍⵏ ⵏⵏⴰ ⵉⵜⵜⵉⵙⵉⵏ ⵢⵉⴳⵔ ⵏ ⵉⵙⵜⴰⵢⵏ ⴷⴷⴰⵡ ⵏ ⵓⴱⵓⵖⵍⵓ ⵉⵖⴰⵡⵍⵏ ⵏ ⵜⴰⵜⵉⴽⵏⵓⵍⵓⵊⵉⵜⵉⵏ ⵜⵉⵎⵓⵟⵟⵓⵏⵉⵏ ⴷ ⵜⵖⵉⵙⵜ ⵜⴰⵙⵎⴳⵓⵔⵜ, ⴷ ⵉⵏⵉⴳ ⵏ ⵜⵏⵥⴰⵕ ⴷ ⵉⵎⵙⵓⵔⴰⵙ ⵉⵣⴷⵉⵏ ⵖⵔ ⴰⵔⴰⵢ ⵏ ⵉⵣⵔⴼⴰⵏ ⴷ ⵜⴷⵔⴼⵉⴼⵉⵏ, ⴷ ⵓⴹⴰⴽⴰⵍ ⵏ ⵜⵣⴷⴳⵉ ⵏ ⵜⵎⵀⴰⵍⵉⵏ ⵏ ⵉⵙⵜⴰⵢⵏ ⴷ ⵜⵙⵓⵙⵖⵜ ⵏⵏⵙⵏⵜ ⴳ ⵡⴰⵎⵎⴰⵙ ⴰⵎⵓⵟⵟⵓⵏ."

ⴰⵔ ⵉⵔⵣⵣⵓ ⵓⴳⵔⴰⵡ ⴰⴷ ⴰⵡⴷ ⵅⴼ ⵓⵎⵙⴳⴷⴰⵍ ⵏ ⵜⴱⵔⵉⴷⵉⵏ ⵏ ⵓⵙⵎⵙⴰⵙⴰ ⴰⴽⴷ ⵉⵏⴳⵔⴰⵡⵏ ⵓⵍⴳⵉⵏⵏ ⴷ ⵉⵙⵎⵔⵙⴰⵍⵏ ⴰⴽⴷ ⵉⵙⵏⴼⵍⵏ ⵉⵎⵓⵟⵟⵓⵏⵏ, ⴰⵢⵏⵏⴰ ⵉⵜⵜⴹⵎⴰⵏⵏ ⴰⴼⵔⴰⴳ ⵏ ⵉⵙⴼⴽⴰ ⵓⴷⵎⴰⵡⴰⵏⵏ, ⴷ ⵓⵙⴱⴷⴷⵉ ⵏ ⵜⴽⵏⴷⴰⵡⵜ ⵜⴰⵏⵖⵎⴰⵙⵜ ⴷ ⵉⵏⴰⵡⵏ ⵏ ⵓⴽⵙⴰⵏ, ⴷ ⵓⴹⴰⴽⴰⵍ ⵏ ⵓⵙⵎⵔⵙ ⴰⵎⵙⵜⴳⴳⴰⵔ ⵏ ⵜⵖⵉⵙⵜ ⵜⴰⵙⵎⴳⵓⵔⵜ ⴳ ⵜⵎⵀⴰⵍ ⵏ ⵉⵙⵜⴰⵢⵏ, ⴰⴽⴷ ⵓⵡⵇⵇⵔ ⵏ ⵜⵎⵙⵜⴰⵍ ⵜⵉⴳⵔⴰⵖⵍⴰⵏⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ.

ⴳ ⵡⴰⴽⵓⴷ ⵏⵏⴰ ⴳ ⵙⵙⵉⵡⵙⵏⵜ ⵜⴰⵜⵉⴽⵏⵓⵍⵓⵊⵉⵜⵉⵏ ⵜⵉⵎⵓⵟⵟⵓⵏⵉⵏ ⴳ ⵓⵙⵅⵉⵜⵔ ⵏ ⵜⴷⵔⴰⵡⵜ ⴷ ⵓⵙⴷⵓⵙ ⵏ ⵜⵎⵍⴷⴰⵡⵉⵏ ⵏ ⵓⴽⵛⵛⵓⵎ ⵖⵔ ⵉⵏⴰⵡ ⴰⵙⵔⵜⴰⵏ, ⴰⵔ ⵜⵔⵏⵏⵓ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, "ⵜⵙⵏⵄⵜ ⴳ ⵜⵉⵣⵉ ⴰⴷ ⵏⵉⵜ, ⵅⴼ ⵉⴷⵖⴰⵔⵏ ⵏ ⵉⵎⴷⵍⵉⴼⴰⵏ ⵜⴰⵚⴽⵉⵡⵜ ⵏⵏⴰ ⵉⵣⵎⵔⵏ ⴰⴷ ⵉⵙⵓⴷⵔⵓⵙ  ⵜⵎⵢⵉⵎⴰⵏⵜ ⴳ ⵉⵙⵜⴰⵢⵏ ⴷ ⵜⵎⵃⵉⵣⵡⴰⵔⵜ ⵜⴰⵙⵔⵜⴰⵏⵜ ⵜⴰⵏⵙⵙⵓⵎⵓⵜ ⴷ ⵓⵣⵔⴼ ⴳ ⵡⴰⵡⴰⴹ ⵖⵔ ⵓⵎⵍⵉ ⵏ ⵉⵙⵜⴰⵢⵏ..."

ⴷⴷⴰⵏⵜ ⴰⴷ ⵔⵣⵣⵓⵏⵜ ⵜⵡⵓⵔⵉⵡⵉⵏ ⵏ ⵓⴳⵔⴰⵡ ⵎⵏⵏⴰⵡ ⵏ ⵜⵉⵎⵔⵏⴰ ⵜⵉⴷⵙⵍⴰⵏⵉⵏ, ⵣⴳ ⵡⵉⵏⵏⴰ ⴱⴰⵀⵔⴰ ⵉⵜⵜⵢⴰⵙⵙⵏ, ⴰⵏⵣⴰⵜⵏ ⵏ ⵜⵖⵉⵙⵜ ⵜⴰⵎⴳⵓⵔⴰⵏⵜ ⴷ ⵜⴰⵜⵉⴽⵏⵓⵍⵓⵊⵉⵜⵉⵏ ⵜⵉⵎⵓⵟⵟⵓⵏⵉⵏ ⵅⴼ ⵜⵎⵀⴰⵍⵉⵏ ⵏ ⵉⵙⵜⴰⵢⵏ, ⴷ ⵓⵖⴹⴰⴼ ⵏ ⵉⵙⵜⴰⵢⵏ ⴳ ⵡⴰⵏⵜⵉⵔⵏⵉⵜ ⴰⴽⴷ ⵜⵏⵥⴰⵕ ⴷ ⵜⵎⵍⴷⴰⵡⵉⵏ ⵏⵏⵙ, ⴷ ⵉⵎⵏⵣⴰⵖⵏ ⵏ ⵉⵙⵜⴰⵢⵏ ⴷ ⵜⴱⵔⵉⴷⵉⵏ ⵏ ⵓⵙⵎⵉⴳⵍ ⴰⵣⵔⴼⴰⵏ ⴳ ⵓⵣⵎⵣ ⴰⵎⵓⵟⵟⵓⵏ. ⴷ ⵉⵎⵣⵉⵣⵣⵍⵏ ⵏ ⵉⵙⵜⴰⵢⵏ ⴳ ⵡⴰⵏⵜⵉⵔⵏⵉⵜ ⴷ ⵓⵎⵢⴰⵡⴰⴹ ⵉⵜⵜⵄⵡⵡⴰⵍⵏ ⵅⴼ ⵜⵉⵖⵉⵙⵜ ⵜⴰⵙⵎⴳⵓⵔⵜ, ⴷ ⵜⵙⵓⵎⴰⵔ ⵏ ⵜⵙⵓⵙⵖⵜ ⵜⴰⵎⵓⵟⵟⵓⵏⵜ, ⴷ ⵜⵏⴼⵔⵓⵜ ⵜⴰⵙⵉⴱⵉⵔⵉⵜ ⴷ ⵡⴰⵔⴰⵢ ⵏ ⵜⵓⴷⵔⵜ ⵜⵓⵙⵍⵉⴳⵜ ⴷ ⵉⵙⴼⴽⴰ ⵓⴷⵎⴰⵡⴰⵏⵏ ⴳ ⵓⵎⵏⴰⴹ ⵏ ⵉⵙⵜⴰⵢⵏ…

ⵎⴽⵍⵍⵉ ⵖⴰ ⵜⵙⴼⵙⵔ ⵜⵖⵉⵎⵉⵜⵉⵏ ⵏ ⵓⴳⵔⴰⵡ ⵜⵉⵔⵎⵉⵜⵉⵏ ⵏ ⵓⵙⵎⵣⴰⵣⴰⵍ ⴷ ⵜⵙⵏⵙⵉⵡⵉⵏ ⵉⴼⵓⵍⴽⵉⵏ ⵉⵣⴷⵉⵏ ⵙ ⵓⵙⵎⵔⵙ ⵏ ⵜⴰⵜⵉⴽⵏⵓⵍⵓⵊⵉⵜ ⴷ ⵜⵖⵉⵙⵜ ⵜⴰⵎⴳⵓⵔⴰⵏⵜ ⴳ ⵓⵙⵡⵓⴷⴷⵓ ⵏ ⵜⵎⵀⴰⵍⵉⵏ ⵏ ⵉⵙⵜⴰⵢⵏ, ⴷ ⴰⵡⴷ ⵜⵉⵍⴰⵍ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵙⵇⵇⵉⵎⵉⵏ ⵏ ⵉⵙⵜⴰⵢⵏ ⴷ ⵉⵎⴳⴳⴰⵢⵏ ⵉⵎⵓⵟⵟⵓⵏⵏ ⴳ ⵓⴹⴼⴼⵓⵕ ⵏ ⵉⵙⵏⴼⵍⵏ ⴰⴷ, ⴷ ⵓⴹⴰⴽⴰⵍ ⵏ ⵓⵡⵇⵇⵔ ⵏ ⵉⵣⵔⴼⴰⵏ ⴷ ⵜⴷⵔⴼⵉⴼⵉⵏ ⵜⵉⴷⵙⵍⴰⵏⵉⵏ.

ⴷ ⴰⵔ ⵖⴰ ⵉⵙⵙⵏ ⵓⴳⵔⴰⵡ ⴰⴷ ⵜⴰⴷⵔⴰⵡⵜ ⵏ ⵉⵎⴷⵔⴰⵡⵏ ⴷ ⵜⵎⴷⵔⴰⵡⵉⵏ ⵣⴳ ⵜⵎⵉⵔⵉⴽⵜ ⵜⴰⵍⴰⵜⵉⵏⵉⵜ ⴷ ⵓⵕⵓⴱⴱⴰ ⴷ ⵍⵎⵖⵔⵉⴱ, ⴰⵢⵏⵏⴰ ⵉⵜⵜⴰⵊⵊⴰⵏ ⴰⵙⵏⴼⵍ ⵏ ⵜⵎⵓⵙⵏⵉⵡⵉⵏ ⴷ ⵜⵉⵔⵎⵉⵜⵉⵏ ⵜⵉⴳⵔⴰⵖⵍⴰⵏⵉⵏ ⵅⴼ ⵉⵏⵎⵓⵇⵇⴰⵔⵏ ⵉⵜⵜⵉⵎⵖⵓⵔⵏ ⴳⵔ ⵜⴷⵉⵎⵓⵇⵕⴰⵟⵉⵜ ⴷ ⵉⵙⵜⴰⵢⵏ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴰⵜⵉⴽⵏⵓⵍⵓⵊⵉⵜⵉⵏ ⵜⵉⵎⵓⵟⵟⵓⵏⵉⵏ.