ⵜⵓⵎⵥ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⵙⵙⵉⵅⴼⵜ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ (GANHRI), ⵉⴹⵍⵍⵉ, ⴰⵙⵙ ⵏ ⵓⵢⵏⴰⵙ, ⵜⴰⵙⴰⵔⵓⵜ ⵏ ⵜⵖⵔⵎⵜ ⵏ ⵙⴰⵏ ⵙⴰⵍⴼⴰⴷⵓⵔ ⵙⴳ ⵓⴼⵓⵙ ⵏ ⵓⵏⴱⴷⴰⴷ ⵏ ⵜⴰⵎⴰⵥⵓⵏⵜ ⵜⴰⵙⴰⵍⴼⴰⴷⵓⵔⵉⵜ, ⴰⵢⴰ ⴳ ⵜⴰⵎⴰ ⵏ ⵢⴰⵜ ⵜⵉⵣⵉ ⵜⴰⵎⴰⴹⵍⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⵜⵜⵓⵙⵏⵎⴰⵍⴰⵏ ⵙⴳ 2 ⴰⵔ 4 ⵛⵓⵜⴰⵏⴱⵉⵔ.

ⵙ ⵓⵣⵎⵣⵣⵓ ⴰⴷ, ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵉⴳⴰ ⵓⵙⵎⵖⵔ ⴰⴷ ⴰⵙⵉⵜⴳ ⵉ ⵜⵡⵓⵔⵉ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⴷ ⵉⵏⵎⵣⴰⵖⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵎⴰⴹⴰⵍ, ⵜⵙⴷⴷⵉⴷ ⵎⴰⵙ ⵉⴳⴰ ⵓⴼⵔⴰⴳ ⵏ ⵡⴰⴷⴷⵓⵔ ⴰⵏⴼⴳⴰⵏ ⵜⴰⵎⵙⵜⴳⴳⴰⵔⵜ ⵜⴰⴳⵔⴰⵡⴰⵏⵜ ⵉⵙⵙⵓⵜⵓⵔⵏ ⴰⵙⵓⵖⵏ ⴰⵎⵖⵍⴰⵍ.

ⵅⴼ ⵉⴳⴳⵉ ⵏ ⵜⵏⵎⴰⵜⴰⵔⵜ ⵜⴰⵅⴰⵜⴰⵔⵜ ⵏ ⵜⵓⴽⴽⵉ ⵏ ⵜⵙⴰⵔⵓⵜ ⵏ ⵜⵖⵔⵎⵜ ⵉ ⵎⴰⵙⵙⴰ ⴱⵓⵄⵢⵢⴰⵛ, ⵜⵥⵍⵉ ⴰⵙ ⵜⵉⵣⵉ ⵢⴰⵏ ⵓⵙⵎⵖⵔ ⵉⵥⵍⵉⵏ ⴳ ⵓⵙⴼⵓⴳⵍⵓ ⵙ ⵓⵙⴰⴽⴰ ⵏⵏⵙ ⴰⵎ ⵜⴰⵎⵖⴰⵔⵜ ⵜⴰⵎⵖⵔⵉⴱⵉⵜ ⵜⴰⵏⵎⵣⴰⵖⵜ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵙⵜⴳⴳⴰⵔⵜ ⵜⴰⵏⴰⵎⵓⵔⵜ ⴷ ⵜⵎⵙⴽⴰⵔⵜ ⵜⴰⵙⴳⴰⵡⴰⵏⵜ ⴷ ⵜⴳⵔⴰⵖⵍⴰⵏⵜ ⴳ ⵢⵉⴳⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⴷ ⵜⴷⵔⴼⵉⵏ ⴷ ⵡⴰⵔⴰⵢ ⵙⴳ ⵜⵕⵥⵉⵢⵉⵏ. ⵎⴽⴷⴰ ⵜⵜⵓⴳⴰⵏⵜ ⴳ ⵓⵙⴼⵓⴳⵍⵓ ⵜⵉⴳⵟⵟⵓⵎⵉⵏ ⵏⵏⴰ ⴳ ⵙⵎⵏⵉⴷⵏ ⵉⵏⴱⴷⴰⴷⵏ ⵏ ⵜⵉⵣⵉ ⵜⴰⵎⴰⴹⵍⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⵙⴰⴽⴰ ⵏ ⵉⵙⵏⴼⵍⵏ ⵉⴷⵉⵎⵓⵇⵕⴰⵟⵉⵢⵏ ⴳ ⵍⵎⵖⵔⵉⴱ, ⵉⵙⵏⴰⵎⵏ ⵏⵏⵙ ⵓⵚⴽⵉⵡⵏ ⴷ ⵜⵎⵙⴽⵔⵉⵏ ⵏⵏⵙ ⵜⵉⵎⵓⴼⴰⵢⵉⵏ ⴳ ⵜⵉⵣⵉ ⵏ ⵜⵙⵉⵎⵔⴰⵡⵜ ⴷ ⵉⵎⵉⴽ.
 

ⴰⵙⵎⵖⵔ ⴰⴷ, ⵜⵏⵏⴰ ⵎⴰⵙⵙⴰ ⴱⵓⵄⵢⵢⴰⵛ, ⵉⴳⴰ ⴰⵙⵎⵖⵔ ⵉ ⵜⵎⵖⴰⵔⵜ… ⵉ ⵜⵎⵖⴰⵔⵜ ⵜⴰⵎⵖⵔⵉⴱⵉⵜ, ⵜⴰⴼⵔⵉⵇⵉⵜ, ⵜⴰⵏⵎⵣⴰⵖⵜ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ.… ⴰⵙⵎⵖⵔ ⵉ ⴰⴽⴽⵯ ⵜⵉⵏⵎⵣⴰⵖⵉⵏ ⴷ ⵉⵏⵎⵣⴰⵖⵏ ⵅⴼ ⵡⴰⴷⴷⵓⵔ ⴰⵏⴼⴳⴰⵏ, ⴰⴷ ⵜⵏⵏⴰ ⵜⵣⵔⴼⴰⵏⵜ ⵜⴰⵎⵖⵔⵉⴱⵉⵜ.

ⵉ ⵓⵙⵙⴽⵜⵉ, ⵜⵕⵥⵎ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⴰⴽⴷ ⵡⵓⴷⵎⴰⵡⵏ ⵉⵙⴳⴰⵡⴰⵏⵏ ⴷ ⵉⴳⵔⴰⵖⵍⴰⵏⵏ ⵜⵉⵡⵓⵔⵉⵡⵉⵏ ⵏ ⵜⵉⵣⵉ ⵏ ⵙⴰⵏ ⵙⴰⵍⴼⴰⴷⵓⵔ, ⵙ ⵜⵖⵓⵔⵉ ⵖⵔ ⵢⴰⵜ ⵜⴽⴰⵕⴹⴰ ⵏ ⵓⴱⵔⵉⴷ ⵜⴰⵎⴰⵣⴰⵔⵜ ⵉⴱⴷⴷⵏ ⵅⴼ ⵚⴹⵉⵚ ⵏ ⵉⵙⵉⵣⵡⵉⵔⵏ ⵉⴷⵙⵍⴰⵏⵏ: ⴰⴷⴷⵓⵔ ⴷ ⵡⴰⵔⴰⵢ ⵙⴳ ⵜⵕⵥⵉⵢⵉⵏ ⴷ ⵓⵙⵔⴼⵓⴼⵏ ⴳ ⵉⴷⵖⴰⵔⵏ ⵏ ⵜⴼⴰⵜⵉⵜ ⵙⴳ ⵜⴷⵔⴼⵉ; ⴰⴼⵔⴰⴳ ⵏ ⵉⵣⵔⴼⴰⵏ ⵏ ⵉⵎⵣⵡⴰⴳⵏ/ⵜⵉⵎⵣⵡⴰⴳⵉⵏ; ⵜⴰⵣⵔⴼⵜ ⵜⵓⵏⴳⵉⴳⵜ/ⵜⴰⵡⵏⴹⴰⵏⵜ ⴷ ⵜⵣⵔⴼⵜ ⵜⴰⵏⴰⵎⵓⵏⵜ; ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵉⵏⴰⴳⵔⴰⵡⵏ ⵏ ⵜⵖⵉⵙⵜ ⵜⵉⵎⵍⵥⵉⵜ ⴷ ⵓⵙⴰⵢⵔⴰⵔ ⴰⵎⵓⵟⵟⵓⵏ; ⴰⵙⵉⴷⴼ, ⴷ ⵓⵍⴰ ⵜⴰⴷⵔⴰⵡⵜ ⵜⴰⵙⵔⵜⴰⵏⵜ.