"ⵓⵔ ⵏⵖⵉ ⵙ ⵜⵉⴷⵜ ⴰⴷ ⵙⵙⴹⵕⵉ ⵉⵡⵜⵜⴰⵙⵏ ⵏ ⵜⴳⵎⵉ ⵜⴰⵙⵓⵍⴰⵏⵜ, ⵓⵍⴰ ⵏⵖⵉ ⴰⴷ ⵏⵎⵓⵔⵙ ⴳ ⵓⵎⵏⴰⵍⴰ ⵏ ⵜⵏⴰⵥⴰⵕ ⵜⵉⵡⵏⴹⴰⵏⵉⵏ ⴷ ⵓⵏⴳⵉⴳⵜ ⵙ ⵜⵕⵡⵉ, ⵎⵛ ⵉⵙⵓⵍ ⵓⵏⵅⵅⵍ ⵏ ⵜⵎⵢⴰⴳⴰⵏⵜ  ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵉⵣⴰⵣⵓⵜⵏ ⵏ ⵜⴳⵎⵉ ⴷ ⵜⵙⵔⵜⴰⵢ ⵜⵉⵏⴳⵎⴰ", ⵎⴽⴰ ⴰⵙ ⵜⵙⵙⵏⵜⵉ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴼⵔⴳⴰⵏⵜ ⵜⴰⵎⴰⴹⵍⴰⵏⵜ (GANHRI) ⵜⴰⴱⵔⴰⵜ ⵏⵏⵙ ⴳ ⵓⵙⵖⵉⵎ ⵏ ⵜⵎⵜⵜⴰ ⵉⵎⵓⵏⵏ ⴳ ⵏⵢⵓⵢⵓⵕⴽ ⴳ ⵢⴰⵏ ⵓⵏⵎⵓⵇⵇⴰⵔ ⴰⴳⵔⴰⵖⵍⴰⵏ ⴰⵎⴰⴷⴷⵓⴷ ⵏ ⵓⵙⵇⵇⵉⵎ ⴰⴷⴰⵎⵙⴰⵏ ⴷ ⵓⵏⴰⵎⵓⵏ ⵏ ⵜⵎⵜⵜⴰ ⵉⵎⵓⵏⵏ (ECOSOC), ⵏⵏⴰ ⵉⵜⵜⵓⴳⴰⵏ ⵜⴰⴷⴳⴳⵯⴰⵜ ⵏ ⵉⴹⴳⴰⵎ ⴰⵙⵉⵏⴰⵙ 2 ⵢⵓⵏⵢⵓ 2026 ⴷⴷⴰⵡ ⵜⵎⴰⵜⴰⵔⵜ: "ⵣⴳ ⵓⵙⵏⴼⵍⵓⵍ ⵖⵔ ⵉⴹⵉⵚ: ⵜⵉⵎⵢⴰⴷⴰⵙⵉⵏ ⵉⴱⴷⴷⴰⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⵉ ⵢⴰⵏ ⵓⵣⵣⴳⵉⵔ ⴰⵏⵉⵍⴰⵡ ⴷ ⵓⵏⵎⵓⵙⵙⵓ ⵉ ⵉⵡⵜⵜⴰⵙⵏ ⵏ ⵜⴳⵎⵉ ⵜⴰⵙⵓⵍⴰⵏⵜ".

ⴳ ⵓⵎⵏⴰⴹ ⴰⴷ, ⵜⵙⵎⴰⵢⵏⵓ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⵜⵉⵖⵔⵉ ⵏⵏⵙ ⴰⴼⴰⴷ ⴰⴷ ⵉⵍⵉⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵡⵓⵍ ⵏ ⵜⵙⵔⵜⴰⵢ ⵜⵉⵏⴳⵎⴰ ⴷ ⵜⵡⵏⴹⴰⵏⵉⵏ, ⴰⵔ ⵜⵙⴷⴷⵉⴷ ⵎⴰⵙ ⵓⵔ ⵉⵍⵍⵉ ⵓⵙⵎⵓⵔⵙ ⵏ ⵉⵡⵜⵜⴰⵙⵏ ⵏ ⵜⴳⵎⵉ ⵜⴰⵙⵓⵍⴰⵏⵜ ⵙ ⵜⵎⵢⴰⴷⴰⵙⵉⵏ ⵉⴱⵟⵟⵓⵏ ⴳⵔ ⵜⴳⵎⵉ ⴷ ⵉⵣⵔⴼⴰⵏ ⴷ ⵜⵡⵓⵔⵉ ⵏ ⵓⵏⴳⵉⴳⵜ ⴷ ⵓⴼⵔⴰⴳ ⵏ ⵜⵡⵏⵏⴰⴹⵜ.

ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳⴰⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵣⵔⴼⵜ ⵜⴰⵡⵏⴹⴰⵏⵜ ⴷ ⵜⴳⵎⵉ ⵜⴰⵙⵓⵍⴰⵏⵜ, ⵜⵉⵙⵓⵎⴰⵔ ⴷ ⵓⵣⵡⵉⵔⵏ ⵉⵎⵢⴰⵎⴰⵥⵏ ⵏⵏⴰ ⵓⵔ ⵉⵣⵎⵉⵔⵏ ⴰⴷ ⵎⴱⴹⴰⵏⵜ ⴳⵔⴰⵙⵏⵜ, ⴷⴰⵜ ⵎⴰ ⵜⵔⵏⵓ ⵎⴰⵙ ⴰⵔ ⵜⵜⵓⵙⵎⴰⵜⴰⵔⵏⵜ ⵜⵏⴰⵥⴰⵕ ⵜⵉⵎⴳⵔⴰ ⵏⵏⴰ ⴷⴰ ⵉⵜⵜⵎⵏⴰⵍⴰⵏ ⴰⵎⴰⴹⴰⵍ ⴰⵙⵙ ⴰⴷ, ⴷⴷⴰⵡ ⵏ ⵢⴰⵏ ⵓⵙⵏⴼⵍ ⴰⵎⵓⵟⵟⵓⵏ ⴷ ⵓⵜⵉⴽⵏⵓⵍⵓⵊⵉ ⴰⵅⴰⵜⴰⵔ,ⴳ ⵜⵣⵎⵔⵜ ⵏⵏⵖ ⴰⴷ "ⵏⴳ ⵣⴳ ⴰⵙⵏⴼⵍⵓⵍ ⵢⴰⵏ ⵉⵎⵉⵙⵙ ⴰⵏⵉⵍⴰⵡ ⵉⵙⴷⵓⵙⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⴼⵔⴰⴳ ⵏ ⵉⵙⵎⵉⵍⵏ  ⵏ ⵉⵎⴷⵍⵉⴼⴰⵏ, ⴷ ⴰⵔ ⵉⵜⵜⵏⵀⴰⵕ ⵣⴳ ⵡⵓⴷⵎⴰⵡⵏ ⵏ ⵡⴰⵔ ⵉⵙⴽⵉⵍ, ⴷ ⵓⵙⵏⵓⵃⵢⵓ, ⵙ ⵢⴰⵜ ⵜⵎⴰⵎⴽⵜ ⵉⵙⴷⵓⵙⵏ ⵜⴰⵣⵔⴼⵜ,ⵣⵉ  ⴳⵉⵙⵏⵜ ⵜⴰⵣⵔⴼⵜ ⵜⴰⵡⵏⴹⴰⵏⵜ ⴷ  ⵜⵉⵏ ⵓⵏⴳⵉⴳⵜ."
 

ⵜⴷⴷⴰ ⴷ ⵜⴳⵓⵔⵉ ⵏ ⵎⴰⵙⵙⴰ ⴱⵓⵄⵢⵢⴰⵛ ⴳ ⵢⴰⵏ ⵓⵏⵎⵓⵇⵇⴰⵔ ⵏⵏⴰ ⵉⵙⵙⵓⵜⵉ ⵓⵥⵟⵟⴰ ⵏ ⵜⵎⵜⵜⴰ ⵜⴰⵎⴳⵔⵓⵜ ⵉⵥⵍⵉⵏ ⵖⵔ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵎⵏⵣⴰⵢ ⵏ ⵡⴰⵔ ⴰⵊⵊ ⵏ ⴰⵡⴷ ⵢⴰⵏ ⴳ ⵜⵖⵕⴷⵉⵏ ⴷ ⵜⴳⵎⵉ ⵜⴰⵙⵓⵍⴰⵏⵜ, ⴳ ⵓⵙⴰⵜⵉ ⵏ ⵡⴰⵏⵏⴰⵍ ⵏ ⵓⵣⵣⴳⵉⵔ ⵏ ⵉⴽⵛⵛⵓⵎⵏ ⵉⵙⵜⵔⴰⵜⵉⵊⵉⵢⵏ ⵏⵏⴰ ⵉⵍⵍⴰⵏ ⴳ ⵜⵖⵓⵔⵉ ⵏ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⵎⵜⵜⴰ ⵉⵎⵓⵏⵏ ⵖⵔ ⵜⵡⵓⵔⵉ ⴰⴼⴰⴷ ⴰⴷ ⵜⵜⵓⵙⴷⵓⵙ ⵜⴳⵎⵉ ⵜⴰⵙⵓⵍⴰⵏⵜ, ⴳ ⵜⴷⵔⴰⵡⵜ ⵏⵏⵙ ⴳ ⵜⵖⵊⴷⵉⵎⵜ ⵏ ⵓⵕⵥⵥⵓⵎ  ⵎⵎ ⵓⵙⵡⵉⵔ ⴰⵎⴰⵜⴰⵢ ⵏ ⵓⵖⴰⵡⴰⵙ ⴰⵙⴳⴳⵯⴰⵙⴰⵏ ⵏ ⵜⵎⵜⵜⴰ ⵉⵎⵓⵏⵏ ⵉ ⵜⴳⵎⵉ (UNDP).

ⴳ ⵢⴰⵜ ⵓⵎⵔⴰⵔⴰ  ⴰⴽⴷ ⵜⵎⴷⵔⴰⵡⵉⵏ ⴷ ⵉⵎⴷⵔⴰⵡⵏ ⵅⴼ ⵜⵉⵍⴰⵍ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵉⵎⵏⴰⴹⵏ ⵉⵎⵓⵟⵟⵓⵏⵏ ⴷ ⵜⵉⴽⵏⵓⵍⵓⵊⵉⵢⵏ, ⵜⵙⴷⴷⵉⴷ ⵜⵏⵙⵙⵉⵅⴼⵜ ⵏ ⵜⴼⵔⴳⴰⵏⵜ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵢⴰⵜ ⵜⴰⵏⵏⴰⵢⵜ ⵏⵏⴰ ⵙ ⵏⵓⵎⵏ ⵎⴰⵙ ⵓⵔ ⴷⴰ ⵉⵜⵜⵓⵙⵖⴰⵍ ⵓⵙⵏⴼⵍⵓⵍ ⴰⵏⵉⵍⴰⵡ ⵖⴰⵙ ⵙ ⵓⴱⵓⵖⵍⵓ ⴰⵜⵉⴽⵏⵓⵍⵓⵊⵉ, ⵎⴰⵛⴰ ⵙ ⵜⵣⵎⵔⵜ ⵏⵏⵙ ⴰⴷ ⵉⴳ ⵢⴰⵏ ⵢⵉⴹⵉⵚ ⵓⵎⵏⵉⴳ ⴳ ⵜⵓⴷⵔⵜ ⵏ ⵉⵡⴷⴰⵏ ⴷ ⵓⵙⴷⵓⵙ ⵏ ⵉⵙⴽⵉⵍ ⴷ ⵜⵣⵔⴼⵜ ⴷ ⵉⵣⵔⴼⴰⵏ ⵏ ⵓⴼⴳⴰⵏ.

ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⴰⵔ ⵜⵜⵓⵙⴷⵓⵙ ⵜⵖⴰⵍⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵓⵢⵏⵏⴰ ⵉⵣⴷⵉⵏ ⵖⵔ ⵜⵡⵏⵏⴰⴹⵜ ⴷ ⵓⵏⴳⵉⴳⵜ ⴳ ⵉⵙⴳⴳⵯⴰⵙⵏ ⵏ ⵜⵡⵓⵔⵉ ⵏ ⵓⴱⴰⵔⴰⵣ ⴷ ⵓⵏⵄⴰⵕ ⴰⴳⵔⴰⵖⵍⴰⵏ, ⴰⵔ ⵜⵜⵓⵙⵎⴰⵜⴰⵔ ⴳ ⵎⴰⵙ "ⵓⵔ ⵜⵖⵉ ⵜⴳⵎⵉ ⵜⴰⵙⵓⵍⴰⵏⵜ ⴰⴷ ⵜⵉⵍⵉ ⴱⵍⴰ ⴰⵡⵇⵇⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ", ⴰⵛⴽⵓ ⵜⵉⵏⴰⵥⴰⵕ ⵜⵉⵡⵏⴹⴰⵏⵉⵏ ⴷ ⵓⵏⴳⵉⴳⵜ ⵏⵏⴰ ⵉⵜⵜⵎⵏⴰⵍⴰⵏ ⴰⵎⴰⴹⴰⵍ ⴰⵙⵙ ⴰⴷ, ⴰⵔ ⵉⵜⵜⵙⵎⴰⵜⴰⵔ ⴰⵙⵙⴰⵔ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴳⴰⵏⵉⵏ ⵜⵉⵏⵎⴷⵓⵜⵉⵏ , ⴰⵔ ⵜⵜⵙⵔⵓⵙ ⴰⴼⴳⴰⵏ ⴷ ⵡⴰⴷⴷⵓⵔ ⵏⵏⵙ ⴰⵎⵎⴰⵙⵏ ⵉⵣⴰⵣⵓⵜⵏ ⵏ ⵜⴳⵎⵉ.

ⴳ ⵓⵎⵏⴰⴹ ⴰⴷ, ⵜⵙⵎⴽⵜⵉ ⴷ ⵎⴰⵙⵙⴰ ⴱⵓⵄⵢⵢⴰⵛ ⴰⵣⴰⵣⵓ ⵏⵏⴰ ⴽⴽⴰⵏⵜ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵣⴳ ⵜⵙⵖⵣⵏⵜ ⵏ ⵜⵎⵙⵙⴽⵜⵉⵜ ⵏ 2030, ⵜⵙⵎⴰⵜⵔ ⴰⵡⴷ ⵎⴰⵙ ⴷ ⵜⵉⵎⵔⵙⴰⵍ ⴰⴷ ⵙⵅⴰⵜⵔⵏⵜ ⵉⴳⵔⴰⵏ ⵏ ⵓⴽⵛⵛⵓⵎ ⵏⵏⵙⵏⵜ ⵉⵡⴹⵏⵜ ⵖⵔ ⵜⵙⵓⵎⴰⵔ ⵜⵉⵡⵏⴹⴰⵏⵉⵏ ⴷ ⵓⵏⴳⵉⴳⵜ ⴹⴰⵕⵜ ⵎⴰ ⵜⴽⴽⴰ ⴰⵔ ⵙⴷⵉⴽⵉⵏⴻⵏⵜ ⵅⴼ ⵓⴼⵔⴰⴳ ⵏ ⵉⵣⵔⴼⴰⵏ ⴷ ⵜⴷⵔⴼⵉⵏ ⵜⵉⴷⵙⵍⴰⵏⵉⵏ. ⵉⵙⵙⵓⵜⵔ ⵓⵙⵏⴼⵍ ⴰⴷ ⴰⵎⵄⴰⵏ ⵏ ⵜⵙⵓⴳⴰⵔ ⵜⵉⵎⴰⵢⵏⵓⵜⵉⵏ ⴷ ⵓⵙⴱⵓⵖⵍⵓ ⵏ ⵉⵎⴰⵙⵙⵏ ⵉⵙⵏⴼⵍⵓⵍⵏ ⴷ ⵓⵙⴷⵓⵙ ⵏ ⵓⵎⵢⴰⵡⴰⵙ ⴳⵔ ⵎⵏⵏⴰⵡ ⵏ ⵉⵎⵙⴽⴰⵔⵏ ⴳ ⵓⵙⵡⵉⵔ ⴰⵏⴰⵎⵓⵔ ⴷ ⵓⴳⵔⴰⵖⵍⴰⵏ, ⴰⵔ ⵜⵜⴰⵏⵏⴰⵢ ⵎⴰⵙ ⵉⴳⴰ ⵓⴼⵔⴰⴳ ⵏ ⵉⵏⵎⵣⴰⵖⵏ ⵅⴼ ⵜⵡⵏⵏⴰⴹⵜ ⵢⴰⵏ ⵓⵙⵎⵉⵍ ⵓⵔ ⵉⴱⵟⵟⵓⵏ ⵣⴳ ⵜⵎⴰⴳⵍⴰⵢⵉⵏ ⵉⵔⵣⵣⵓⵏ ⴰⴷ ⵙⴷⵓⵙⵏⵜ ⵜⴰⵣⵔⴼⵜ ⵜⴰⵡⵏⴹⴰⵏⵜ ⴷ ⵓⴹⴰⴽⴰⵍ ⵏ ⵜⴷⵔⴰⵡⵜ ⵏ ⵡⴰⵎⵓⵏⵏ ⴳ ⵜⵉⴽⴽⵉ ⵏ ⵓⵖⵜⴰⵙ.
 

ⴳ ⵢⴰⵜ ⵜⴱⵔⴰⵜ ⵉⵜⵜⵓⵙⵙⵉⴼⴹⵏ ⵉ ⵓⵎⵥⴹⴰⵡ ⵏ ⵓⵖⵜⴰⵙ ⵏ ⵜⵎⵜⵜⴰ ⴷ ⵓⴳⵔⴰⵖⵍⴰⵏ ⴷ ⵉⵎⵙⴽⴰⵔⵏ ⴳ ⵢⵉⴳⵔ ⵏ ⵜⵉⵏⵏⵓⴱⴹⴰ ⵏ ⵉⵙⴰⵢⵔⴰⵔⵏ ⵉⵎⵓⵟⵟⵓⵏⵏ ⴷ ⵜⵖⵉⵙⵜ ⵜⴰⵙⵎⴳⵓⵔⵜ, ⵜⵙⴷⴷⵉⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⵅⴼ ⵓⵙⵅⵉⵜⵔ ⵏ ⵓⵔⵎⵎⵓⵙ ⵏ ⵓⵙⵏⴼⵍⵓⵍ, ⴰⵔ ⵜⵙⵙⴳⵔⵓ ⵎⴰⵙ ⵓⵔ ⵜⵜⴱⴷⴰⴷⵏ ⵓⵙⵏⴼⵍⵓⵍ ⵖⴰⵙ ⵅⴼ ⵜⵉⴽⵏⵓⵍⵓⵊⵉⵜ ⵏⵖⴷ ⵉⴼⵙⵙⴰⵢⵏ ⵉⵎⵓⵟⵟⵓⵏⵏ, ⵎⴰⵛⴰ ⴰⵔ ⵉⵜⵜⴰⵡⴹ ⴰⵡⴷ ⵖⵔ ⴰⵙⵏⴼⵍⵓⵍ ⵏ ⵜⴰⵍⵖⵉⵡⵉⵏ ⵜⵉⵎⴰⵢⵏⵓⵜⵉⵏ ⵏ ⵜⵏⵏⵉⴱⴹⴰ, ⴷ ⵉⵎⴰⵙⵙⵏ ⴳ ⵉⵍⵍⴰ ⵉⴳⴰⵔ ⵏ ⵜⵕⵡⵉ  ⵉ ⵜⴷⵔⴰⵡⵜ ⵜⵎⵓⵔⵉ, ⴷ ⵜⵎⴰⵎⴽⵉⵏ ⵉⵜⵜⵓⵙⴱⵓⵖⵍⴰⵏ ⵉ ⵓⴹⴼⴼⵓⵕ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵓⵙⵓⵜⴳ ⵏ ⵢⵉⴹⵉⵚ ⵏⵏⵙⵏⵜ ⵅⴼ ⵉⵣⵔⴼⴰⵏ ⴷ ⵜⴷⵔⴼⵉⵏ.

ⴰⵔ ⵜⵜⴰⵏⵏⴰⵢ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵎⴰⵙ ⵍⵍⴰⵏⵜ ⵙⵏⴰⵜ ⵜⵏⴰⵥⴰⵕ ⵜⵉⴷⵙⵍⴰⵏⵉⵏ ⵏⵏⴰ ⵉⴳⴰⵏ ⴰⵏⵙⴰ ⵉ ⵉⵅⴼⴰⵡⵏ ⵏⵏⵙⵏⵜ ⴰⵙⵙ ⴰⴷ: ⵜⴰⵎⵣⵡⴰⵔⵓⵜ ⴳⵉⵙⵏ ⴰⴹⴰⴽⴰⵍ ⵏ ⵓⴼⵍⴰⵥ ⵏ ⴽⵓⵢⴰⵏ ⴰⴷ ⵉⵙⴱⵖⵔ ⵙ ⵢⴰⵜ ⵜⵎⴰⵎⴽⵜ ⵜⴰⵏⵙⵙⵓⵎⵓⵜ ⵣⴳ ⵓⵙⵏⴼⵍⵓⵍ ⴷ ⵜⵎⵍⴷⴰⵡⵉⵏ ⵏⵏⴰ ⵉⵜⵜⴰⴽⴽⴰ, ⵜⵉⵙⵙ ⵙⵏⴰⵜ  ⵉⴳⴰ ⵜ ⵓⵙⴷⴷⵉⴷ ⵎⴰⵙ ⴰⵔ ⵉⵙⵙⵉⵡⵉⵙ ⵓⵙⵏⴼⵍⵓⵍ ⴰⵏⵉⵍⴰⵡ ⴳ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵓⴼⵔⴰⴳ ⵣⴳ ⵓⵙⵕⵚⵚⵓ ⵏ ⵉⵎⵣⴰⵔⴰⵢⵏ  ⵏⵖⴷ  ⴰⵙⵅⵉⵜⵔ ⵏ ⵉⵎⴷⵍⵉⴼⴰⵏ .

ⵜⵙⵙⵓⵜⴳ  ⵜⵎⵙⵜⴳⴳⴰⵔⵜ ⵜⴰⵣⵔⴼⴰⵏⵜ ⵜⴰⵎⵖⵔⵉⴱⵉⵜ ⴰⵙⴱⵓⵖⵍⵓ ⵏ ⵓⴼⵔⴰⴽ ⴰⴳⵔⴰⵖⵍⴰⵏ ⵎⴰⵙ ⵎⵢⴰⵎⴰⵥⵏⵜ ⵜⵙⵓⵎⴰⵔ ⴷ ⵉⵣⵡⵉⵔⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵡⵏⵏⴰⴹⵜ ⴷ ⵜⴳⵎⵉ ⵜⴰⵙⵓⵍⴰⵏⵜ ⴷ ⵓⵙⵏⴼⵍⵓⵍ, ⴷ ⵎⴰⵙ ⴷⴰ ⵉⵙⵙⵓⵜⵓⵔ ⵓⵎⵏⴰⵍⴰ ⵏ ⵜⵏⴰⵥⴰⵕ ⵜⵉⵎⴰⴹⵍⴰⵏⵉⵏ ⵜⵓⴷⴷⵔⵉⴼⵉⵏ ⵉ ⵓⵙⴷⵓⵙ ⵏ ⵉⴷⵔⴰⵡⵏ ⴷ ⵓⵎⵔⴰⵔⴰ ⵏ ⵜⵉⵔⵎⵉⵜⵉⵏ ⴷ ⵜⵓⵚⴽⴰ ⵏ ⵉⵙⴰⴷⵎⵔⵏ  ⵉⵎⴳⵔⵓⵜⵏ ⵉⵣⵔⵔⵉⵏ ⵉⵡⵓⵜⵜⴰ ⵉⵏⴰⵎⵓⵔⵏ.

ⵣⴳ "ⵜⵎⴰⵥⵓⵏⵜ"  ⵉⵖⵜⴰⵙⵏ ⵏ ⵜⵎⵜⵜⴰ ⵉⵣⴷⵉⵏ ⴷ ⵜⴳⵎⵉ ⴷ ⵜⵏⴼⵔⵓⵜ, ⴰⵔ ⵜⵜⵍⵓⵎⵎⴰ ⴰⵎⵉⵏⴰ ⴱⵓⵄⵢⵢⴰⵛ ⵜⴰⵏⴰⵔⴰ ⵏ ⵓⵏⵄⴰⵕ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵢⴰⵜ ⵜⵎⵢⴰⴷⴰⵙⵜ ⵉⵜⵜⴳⴳⴰⵏ ⵣⴳ ⵉⵣⵔⴼⴰⵏ ⵏ ⵓⴼⴳⴰⵏ ⵢⴰⵜ ⵜⵔⵙⵍⵜ ⵜⴰⴷⵙⵍⴰⵏⵜ ⵉ ⵜⵡⵓⵔⵉ ⵜⴰⴳⵔⴰⵖⵍⴰⵏⵜ ⵜⴰⴳⵜⵉⵔⴰⵏⵜ ⴷ ⵢⴰⵏ ⵜⵔⵙⵍⵜ ⵉ ⵜⴳⵎⵉ ⵜⴰⵙⵓⵍⴰⵏⵜ. , ⵜⵙⵎⴷ ⵎⴰⵙⵙⴰ ⴱⵓⵄⵢⵢⴰⵛ ⴳ ⵜⴳⵉⵔⴰ, “ⴰⵙⵎⵓⵔⵙ ⵏ ⵜⵙⵔⵜⴰⵢ ⵜⵉⵏⴳⵎⴰ, ⵓⵔ ⵉⵜⵜⵓⵙⵖⴰⵍ ⵖⴰⵙ ⵙ ⵓⴱⵓⵖⵍⵓ ⴰⵜⵉⵇⵏⵉ, ⵎⴰⵛⴰ ⵙ ⵜⵣⵎⵔⵜ ⵏ ⵜⵙⵔⵜⴰⵢ ⴰⴷ ⵅⴼ ⵓⴼⵔⴰⴳ ⵏ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵓⵙⵏⵢⴰⵎⴰ ⵉⵎⵣⴰⵔⴰⵢⵏ, ⴷ ⵓⵙⵔⵙ ⵏ ⵜⵣⵔⴼⵜ ⵜⴰⵡⵏⴹⴰⵏⵜ ⴷ ⵜⵏⴰⵎⵓⵏⵜ: "ⵓⵔ ⵜⵍⵍⵉ ⵜⴳⵎⵉ ⵜⴰⵙⵓⵍⴰⵏⵜ ⵓⵍⴰ ⵜⴰⵣⵔⴼⵜ ⵜⴰⵡⵏⴹⴰⵏⵜ ⵓⵍⴰ ⴰⵙⵏⴼⵍⵓⵍ ⵉⵛⵏⴰⵏ ⴷ ⵓⵎⵙⵜⴳⴳⴰⵔ ⴱⵍⴰ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ."