ⴷⴼⴼⵉⵔ ⵏ ⵓⴱⵔⵉⴷ ⵏ ⵓⵣⵓⵣⴼ ⵏ ⵜⵉⴷⵜ ⴷ ⵓⵣⵣⴳⵉⵔ ⵏ ⵎⴰⵕⵕⴰ ⵉⵙⵖⵍⴰⴼ ⵏ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ, ⵉⵣⴷⵉⵏ ⴷ ⵓⵙⴳⴳⴷ ⵏ ⵉⵎⴰⵍⴰⴷⵏ ⵏ ⵓⵏⴳⵉⵙⵏ ⴷ ⵉⴷ ⴱⵓ ⵉⵣⵔⴼⴰⵏ, ⵙⵍⴰⵡⴰⵏ ⴰⴽⴽⵯ ⴰⵔⵔⴰⵣⵏ ⵉⵥⵕⴼⴰⵏⵏ ⵉⵜⵜⵡⴰⵖⵜⴰⵙⵏ ⴷ ⵓⵙⵉⴷⴼ ⴰⵏⴰⵎⵓⵏ ⴷ ⵓⵙⵎⵙⴰⵙⴰ ⴰⵎⵙⵙⵓⴳⵓⵔ ⴷ ⵓⵖⴰⵎⵓⵙ ⴰⴷⵓⵙⴰⵏ, ⵉⵕⵥⵎ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵙⵙ ⵏ ⵓⴽⵕⴰⵙ 4 ⵛⵓⵜⴰⵏⴱⵉⵔ 2024, ⵜⴰⵎⵀⵍⵜ ⵏ ⵉⴳⵉ ⵏ ⵉⵙⴼⵙⵉⵜⵏ ⵏ ⵜⵎⵓⵣⴰⵢⵜ ⵜⴰⵊⵉⵏⵉⵜ ⵃⵎⴰ ⴰⴷ ⵜⵜⵓⵙⴷⴷⵉⴷⵏⵜ ⵜⵎⴰⴳⵉⵜⵉⵏ ⵏ ⵉⵎⵜⵜⵉⵏⵏ ⴳ ⵓⵙⴽⵔⴼ ⴰⵔⵓⵍⴳⵉⵏ ⴰⵎⵣⵡⴰⵔ ⵏ ⵜⵣⵎⴰⵎⵎⴰⵔⵜ.

ⵔⴰⴷ ⵜⵣⴷⵉ ⵜⵎⵀⵍⵜ ⵏ ⵉⴳⵉ ⵏ ⵉⵙⴼⵙⵉⵜⵏ ⴳ ⵉⵎⴰⵍⴰⵙⵙ ⴰⴷ, ⴷⴼⴼⵉⵔ ⵎⴰⴷ ⵜⵜⵡⴰⴱⴹⴰⵡⵏⵜ ⵜⵡⵊⵉⵡⵉⵏ ⵅⴼ ⵜⵔⵓⴱⴱⴰ, ⵏⵏⵉ ⴳ ⵜⵍⵍⴰ ⴰⵡⴷ ⵢⵜⴰ ⵜⵔⴰⴱⴱⵓⵜ ⵏ ⵓⴳⴳⵉⴷⵏ ⵎⵇⵇⵓⵔⵏⵉⵏ ⵍⵍⵉ ⵔⴰⴷ ⵉⵙⴽⵔ ⵉⵙⴼⵙⵉⵜⵏ ⴳ ⵜⴰⴷⴷⵔⵡⵉⵏ ⵏⵏⵙⵏ, ⴷⴷⵓ ⵏ ⵓⵜⵓⵢ ⵏ ⵜⵏⵙⵙⵉⵅⴼⵜ ⵏ ⵜⵎⵓⵔⴰⵢⵜ ⵜⴰⵎⴰⵜⴰⵢⵜ. ⵜⴰⵎⵀⵍⵜ ⴰⴷ, ⵏⵏⴰ ⴳ ⴰⵎⵓⵏⵜ ⵜⵡⵊⵉⵡⵉⵏ ⵏ ⵉⵎⵜⵜⵉⵏⵏ, ⴷⴼⴼⵉⵔ ⵎⴰⴷ ⴷⴰ ⵜⵙⵙⵓⵔⵓⴼ ⵜⵣⵣⵉⴳⵣⵜ ⵜⴰⵜⵉⴽⵏⵓⵍⵓⵊⵉⵜ ⵙ ⵓⵙⵙⵓⴼⵖ ⵏ ⵓⵙⵎⴻⵎ ⴰⵎⵖⵢⴰⵢ (ADN) ⵙⴳ ⵜⵓⵙⵙⵉⴼⵉⵏ ⵏ ⵉⵅⵚⴰⵏ ⵉⵀⵔⵛⵏ ⴰⴼⴰⴷ ⴰⴷ ⵜⴻⵜⵜⵡⴰⵙⵙⴰⵏⵏⵜ ⵜⵎⴰⴳⵉⵜⵉⵏ ⵏ ⵉⴷ ⴱⴰⴱ ⵏⵏⵙⵏⵜ.

ⴰⵔ ⵉⵜⵜⴰⵍⵖ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⴰⴷⵔⴰⵡⵜ ⵜⴰⵅⴰⵜⴰⵔⵜ ⵏ ⵜⵡⵊⵉⵡⵉⵏ ⵏ ⵉⵎⵜⵜⵉⵏⵏ ⴳ ⵜⵎⵀⵍⵜ ⴰⴷ, ⴷⴼⴼⵉⵔ ⵏ ⵓⵎⵙⴰⵙⴰ ⴰⵏⵉⵎⴰⵏ, ⴰⴷⵔⴼⵉ ⴷ ⵓⵎⴰⴼⴰⵡ, ⵙ ⵓⵎⵙⴰⵙⴰ ⴷ ⵉⵍⵓⴳⵏⵏ ⵉⴳⵔⴰⵖⵍⴰⵏⵏ ⴷ ⵉⵏⴰⵎⵓⵔⵏⵏ (ⵙⵍⴰⵡⴰⵏ ⴰⴽⴽⵯ ⴰⵙⵍⴳⵏ ⵉⵥⵍⵉⵏ ⵙ ⵓⴼⵔⴰⴳ ⵏ ⵜⵎⵓⵛⴰ ⵜⵉⵏⵉⵎⴰⵏⵉⵏ), ⴷ ⵓⵙⴰⴷⵎⵔ ⵏⵏⵙⵏ ⵉ ⵜⵖⵓⵔⵉ ⵏ ⵓⵙⵇⵇⵉⵎ. ⵎⴽⴷⴰ ⵉⵜⵜⴰⵍⵖ ⵓⵍⴰ ⵜⴰⵎⵓⵣⴰⵢⵜ ⴷ ⵜⵙⵓⴳⵔⵜ ⵉⵜⵜⵡⴰⵙⵙⵏ ⴳ ⵓⵙⵡⵉⵔ ⴰⴳⵔⴰⵖⵍⴰⵏ ⵏ ⵓⵙⴰⵔⵎ ⴰⵊⵉⵏⵉ ⴰⵏⴰⵎⵓⵔ ⵏ ⵍⴱⵓⵍⵉⵙ ⴰⵎⴰⵙⵙⴰⵏ - ⵜⴰⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ -  ⴷ ⵉⵙⵙⵓⵜⴳ ⵜⴰⴷⵔⴰⵡⵜ ⵏⵏⵙ ⴷ ⵓⴹⴼⴼⵓⵕ ⵏⵏⵙ, ⵙ ⵓⵙⵏⵜⵉ ⵙⴳ ⵜⵡⵓⵔⵉⵡⵉⵏ ⵏⵏⵙ ⴷ ⵜⵙⵎⵉⴳⴰⵍ ⵏⵏⵙ, ⴳ ⵓⴹⴼⴼⵓⵕ ⵏ ⵓⵙⵎⵀⵍ ⵏ ⵉⵙⵖⵍⴰⴼ ⵏ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ, ⵍⵍⵉ ⵎⵉ ⵏⵙⴼⵓⴳⵍⵓ ⴰⵙⴳⴳⵯⴰⵙ ⴰⴷ ⴰⵙⴽⵜⵉ ⵡⵉⵙⵙ 20 ⵅⴼ ⵓⵙⵔⵓⵙ ⵏⵏⵙ.

ⵉⵇⵇⴰⵏⴷ ⴰⴷ ⵏⵙⵙⴽⵜⵉ ⵎⴰⵙ ⵉⴽⴽⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵢⵓⵎⵥ  ⴳ ⵢⵓⵍⵢⵓⵣ 2023 ⵜⵉⵢⴰⴼⵓⵜⵉⵏ ⵜⵓⵎⵏⵉⴳⵉⵏ ⵙⴳ ⵓⵙⴰⵔⵎ ⴰⵊⵉⵏⵉ ⴰⴳⵔⴰⵖⵍⴰⵏ ⴳ ⵜⵎⴷⵉⵏⵜ ⵏ ⵏⴰⵏⵜ ⵜⴰⴼⵕⴰⵏⵚⵉⵚⵜ ⴷⴼⴼⵉⵔ ⵍⵍⵉⵖ ⵜⵜⵓⵙⵏⵎⴰⵍⴰⵏⵜ ⵜⵜⵓⵙⵙⵉⴼⵉⵏ ⵏ ⵉⵅⵚⴰⵏ ⵏ ⵉⵔⵔⵎⵉⵎⵏ ⵓⵔⴷⴰⵢⵏ ⵏ ⵓⵏⴳⵉⵙⵏ ⴽⴽⴰⵏ ⵜⵜⵡⴰⴼⴽⴰⵏ ⴰⵙ ⵉ ⵓⵙⴰⵔⵎ, ⴷⴼⴼⵉⵔ ⵍⵍⵉⵖ ⵓⵔ ⵉⵜⵜⵡⴰⵣⵎⴰⵔ, ⴳ ⵢⴰⵜ ⵜⵉⴽⵍⵉⵜ ⵉⵣⵔⵉⵏ, ⴰⴷ ⵉⵜⵜⵓⵙⵙⵓⴼⵖ ⵓⵙⵎⴻⵎ ⴰⵖⵢⴰⵖ ⴷ ⵉⴳⵉ ⵏ ⵉⵙⴼⵙⵉⵜⵏ ⵃⵎⴰ ⴰⴷ ⵜⵜⵡⴰⵙⵙⴰⵏⵏⵜ ⵜⵎⴰⴳⵉⵜⵉⵏ ⵏ ⵉⴷ ⴱⴰⴱ ⵏⵏⵙⵏ, ⵉⴷⴷⵖ ⵉⵅⵛⵏ ⵡⴰⴷⴷⴰⴷ ⵏⵏⵙⵏⵜ.

ⵉⴽⴽⴰ ⵓⵙⵇⵇⵉⵎ ⴳ ⵜⴰⵏⴰⴹⵜ ⵏⵏⵙ ⵜⴰⵙⴳⴳⵯⴰⵙⴰⵏⵜ ⵅⴼ ⵡⴰⴷⴷⴰⴷ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵍⵎⵖⵔⵉⴱ ⴳ ⵓⵙⴳⴳⵯⴰⵙ ⵏ 2022 ⵉⵙⵉⵙⴼⵉⵡ ⵎⴰⵙ ⴷ ⴷⴼⴼⵉⵔ ⵏ ⵉⵏⵏⵉⵢ ⵏ ⵜⵣⵣⵉⴳⵣⵜ ⵜⴰⵜⵉⴽⵏⵓⵍⵓⵊⵉ ⵍⵍⵉ ⵉⵙⵙⵓⵔⵓⴼⵏ ⵙ ⵓⵙⵙⵓⴼⵖ ⵏ ⵓⵙⵎⴻⵎ ⴰⵎⵖⵢⴰⵢ (ADN) ⵙⴳ ⵜⵓⵙⵙⵉⴼⵉⵏ ⵏ ⵉⵅⵚⴰⵏ ⵉⵅⵛⵏⵏ, ⵎⴰⵙ ⵉⵙⴽⵔ ⵢⴰⵏ ⵓⴳⵔⴰⵡ ⵙ ⵜⵙⵏⵜⴰⵢⵜ ⵏ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵍⵍⴰⵏ ⵉⴳⵏⵙⴰⵙⵏ ⵏ ⵜⵙⵇⵇⵉⵎⵜ ⵏ ⵓⴹⴼⴼⴰⵕ ⵏ ⵓⵙⵎⵀⵍ ⵏ ⵉⵙⵖⵍⴰⴼ ⵏ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ, ⴷ ⵜⵏⵙⵙⵉⵅⴼⵜ ⵏ ⵜⵎⵓⵔⴰⵢⵜ ⵜⴰⵎⴰⵜⴰⵢⵜ, ⴷ ⵉⵎⵓⵣⴰⵢⵏ ⵙⴳ ⵓⵙⴰⵔⵎ ⴰⵊⵉⵏⵉ ⴰⵏⴰⵎⵓⵔ ⵏ ⵍⴱⵓⵍⵉⵙ ⴷ ⵜⵏⴰⴼⵓⵜ ⵏ ⵜⵙⵏⵉⵊⵊⵉⵜ ⵜⵓⵍⴳⵉⵏⵜ ⴳ ⵓⵙⴳⵏⴰⴼ ⴰⵎⵙⴷⴰⵡ ⴳ ⵜⴳⵎⵎⵉ ⵜⵓⵎⵍⵉⵍⵜ, ⵉⴽⴽⴰ ⵉⴳⴰ ⴳ ⵢⵓⵏⵢⵓ 2022 ⵢⴰⵏ ⵓⵔⵣⴰⴼ ⵏ ⵜⵡⵓⵔⵉ ⵉ ⵓⵙⴰⵔⵎ ⴰⵊⵉⵏⵉ ⴰⴳⵔⴰⵖⵍⴰⵏ ⴳ ⵏⴰⵏⵜ-ⴼⵕⴰⵏⵚⴰ ⵃⵎⴰ ⴰⴷ ⵜⴻⵜⵜⵓⴳⴰ ⵜⵎⵀⵍⵜ ⵃⵎⴰ ⴰⴷ ⵉⵜⵜⵓⵙⵙⵓⴼⵖ ⵓⵙⵎⴻⵎ ⴰⵎⵖⵢⴰⵢ ⵉ ⵙⵏⴰⵜ ⵜⵓⵙⵙⵉⴼⵉⵏ ⵙⴳ ⵎⴰⵕⵕⴰ ⵜⵓⵙⵙⵉⴼⵉⵏ ⵙⵓⵍⵏⵉⵏ ⵖ ⴷⴰⵔ ⵓⵙⴰⵔⵎ ⴰⴳⵔⴰⵖⵍⴰⵏ. ⵉⴽⴽⴰ ⵓⵙⵇⵇⵉⵎ ⵉⵍⴰⵖⴰ ⴳ ⵜⴰⵏⴰⴹⵜ ⵏⵏⵙ ⵜⴰⵙⴳⵯⵙⴰⵏⵜ ⵜⴰⵎⴳⴳⴰⵔⵓⵜ ⵎⴰⵙ ⵢⵓⵎⵥ ⴳ ⵢⵓⵍⵢⵓⵣ 2023 ⵜⵉⵢⴰⴼⵓⵜⵉⵏ ⵜⵉⵎⵣⵡⵓⵔⴰ ⵜⵓⵎⵏⵉⴳⵉⵏ ⵏ ⵓⵙⴼⵙⵉ ⵏ ⵜⵓⵙⵙⵉⴼⵉⵏ, ⵎⴰⵢⴰ ⴰⴷ ⵢⵓⴷⵊⴰⵏ ⵜⴰⵙⵓⵍⴰⵏⵜ ⵏ ⵓⵙⵙⵓⴼⵖ ⵏ ⵓⵙⵎⴻⵎ ⴰⵎⵖⵢⴰⵢ ⵙⴳ ⵜⵓⵙⵙⵉⴼⵉⵏ ⵢⴰⴹⵏⵉⵏ ⵙⵓⵍⵏⵉⵏ ⵎⵎⵔⵡⴰⵙⵏⵉⵏ.

ⵉⵇⵇⴰⵏⴷ ⴰⴷ ⵏⵙⵙⴽⵜⵉ ⵎⴰⵙ ⵜⴳⵓⵍⴰ ⵜⴰⴳⴰⵔⵜ ⵏ ⵉⵙⴷⴰⵡⵏ ⵏ ⵓⵏⴳⵉⵙⵏ ⵏ ⵓⵙⴽⵔⴼ ⴰⵔⵓⵍⴳⵉⵏ ⴰⵎⵣⵡⴰⵔ ⵜⴰⵣⵎⴰⵎⵎⴰⵔⵜ ⵙⵎⵎⵓⵎⵔⴰⵡ ⴷ ⵜⴰⵎ (58) ⵏ ⵓⵙⴷⴰⵡ, ⵉⵖⵔⴰⵜⵏ ⵓⵏⴳⵎⴰⵎ ⴰⵙⵉⵎⴰⵏ ⵏ ⵜⵏⴼⵔⵉⵜ ⵉ ⵡⴰⵔⵔⴰⵣ, ⵉⵍⵎⵎⴰ ⴰⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ, ⵏⵏⵉ ⴰⵙⵏ ⴷ ⵉⵙⵙⴰⴼⵖⵏ ⵜⵉⵖⵜⴰⵙⵉⵏ ⵏ ⵓⵏⴱⴹ ⵙ ⵡⴰⵔⵔⴰⵣ ⵏⵏⵙⵏ, ⵉⵍⴽⵎ ⵡⴰⵜⵉⴳ ⴰⵥⵕⴼⴰⵏ ⴰⵎⴰⵜⴰⵢ ⵏ ⵓⵙⴳⴳⴷ ⵏ ⵓⵎⴰⵍⴰⴷ 164 ⵎⵍⵢⵓⵏ ⵏ ⴷⴷⵔⵀⵎ, ⴷ ⵓⵍⴰ ⴰⵖⴰⵎⵓⵙ ⴰⴷⵓⵙⴰⵏ ⴷ ⵜⵏⴼⵔⵓⵜ ⵜⴰⵎⵙⵏⵉⵊⵊⵉⵜ ⵏⵏⴰ ⵉⴹⴼⵕ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ.

ⵔⴰⴷ ⵉⵙⵙⵍⴽⵎ ⵓⵙⵇⵇⵉⵎ ⵉ ⵜⵡⵊⵉⵡⵉⵏ ⵏ ⵉⵎⵜⵜⵉⵏⵏ ⵜⵉⵢⴰⴼⵓⵜⵉⵏ ⵏ ⵉⵙⴼⵙⵉⵜⵏ ⵏ ⵓⵙⵎⴻⵎ ⴰⵎⵖⵢⴰⵢ ⴽⵓⴷⵏⵏⴰ ⵜ ⵉⴷ ⴳⵓⵍⴰⵏⵜ, ⴷ ⵔⴰⴷ ⵉⵣⴷⵉ ⵜⴰⴳⴳⴰⵥⵜ ⵏⵏⵙ ⵅⴼ ⵡⴰⵏⵏⴰⵍ ⵏ ⵇⴰⵃ ⵓⵏⴳⵉⵙⵏ ⴷ ⵉⴷ ⴱⵓ ⵉⵣⵔⴼⴰⵏ ⴷ ⵜⵡⵊⵉⵡⵉⵏ ⵏⵏⵙⵏ.