ⴳ ⵓⵙⴰⵜⵉ ⵏ ⵓⵙⵎⴰⴷ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⴱⵔⵉⴷ ⵏ ⵓⵣⵣⴳⵉⵔ ⵏ ⵉⵙⵖⵍⴰⴼ ⵏ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ, ⵣⴷⵉⵏⵉⵏ ⵙ ⵓⵃⵟⵟⵓ ⵏ ⵜⵎⴽⵜⵉⵜ ⴷ ⵓⵎⵣⵔⵓⵢ, ⵉⵙⴽⵔ ⵢⴰⵏ ⵓⴽⴰⴱⴰⵕ ⵏ ⵓⵙⵇⵇⵉⵎ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⴰⵙⵙ ⵏ ⵓⵚⵉⴹⵢⴰⵙ 18 ⴷⵓⵊⴰⵏⴱⵉⵔ 2021, ⵢⴰⵏ ⵓⵔⵣⴰⴼ ⵏ ⵜⵏⵎⴰⵜⴰⵔⵜ ⵉ ⵜⵡⵓⵔⵉⵡⵉⵏ ⵏ ⵓⵙⵎⴰⵢⵏⵓ ⴷ ⵓⵙⵎⵙⴰⵙⴰ ⵏ ⵓⵙⴰⵢⵔⴰⵔ ⵏ ⵜⵣⵎⴰⵎⵎⴰⵔⵜ ⴳ ⵜⵙⴳⴰ ⵏ ⵎⵉⴷⵍⵜ.
ⵉⴳⴰ ⵓⵔⵣⴰⴼ ⴰⴷ ⵜⴰⵎⵍⴷⴰ ⵏ ⵉⴱⴷⴷⵉ ⵅⴼ ⵓⵣⵣⵉⴳⵣ ⵏ ⵜⵡⵓⵔⵉⵡⵉⵏ ⵏ ⵜⵙⴰⵡⵔⵜ ⴰⴷ, ⵉⴷⴷⵖ ⴳⵉⵙ ⵍⵍⴰⵏ ⵜⵓⴳⵜ ⵏ ⵉⴷⵖⴰⵔⵏ ⵉⵜⵜⵓⵙⵔⵓⵙⵏ ⴷ ⵡⴰⵍⵍⴰⵙ ⵏ ⵓⵙⵎⴰⵢⵏⵓ ⵏ ⴽⵔⴰ ⴳⵉⵙⵏ, ⴷ ⵓⵙⵡⵓⵔⵉ ⵅⴼ ⵜⵏⴽⵔⴰ ⵙ ⵜⵡⵓⵔⵉ ⵜⴰⵏⴰⵎⵓⵏⵜ ⴷ ⵜⴷⵍⵙⴰⵏⵜ ⴷ ⵜⴷⵎⵙⴰⵏⵜ ⵏ ⵓⵙⴰⵢⵔⴰⵔ ⴰⴷ.
ⴳ ⵓⵔⵣⴰⴼ ⴰⴷ, ⵜⵓⵍⵖ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵣⵣⵉⴳⵣ ⴰⵎⵇⵇⵔⴰⵏ ⵏⵏⴰ ⵉⵙⵙⵏ ⵓⵙⵖⵏⵓ ⴰⴷ, ⵜⵓⵍⵖ ⵜⴰⴷⵔⴰⵡⵜ ⵜⴰⵎⵇⵇⵔⴰⵏⵜ ⵏ ⵇⴰⵃ ⵉⵎⴽⵛⴰⵎⵏ ⴷ ⵓⵙⵓⵖⵏ ⵏⵏⵙⵏ ⵏⵏⴰ ⵉⴱⴷⴷⵏ ⵅⴼ ⵉⵎⴰⵏ ⵏ ⵜⵏⵎⵓⵔⵉ ⵢⴰⵜⵜⵓⵢⵏ, ⵉⴷⴷⵖ ⵉⵎⵎⵓⵜⵜⵉ ⵓⵙⵖⴰⵍ ⵏ ⵓⵣⵣⵉⴳⵣ ⵏ ⵜⵡⵓⵔⵉⵡⵉⵏ ⵙⴳ 25 ⴳ ⵜⵎⵉⴹⵉ ⴳ ⵓⵔⵣⴰⴼ ⵏⵏⵙ ⴰⵎⴳⴳⴰⵔⵓ ⵉ ⵡⴰⵏⵙⴰ, ⴳ ⵓⴽⵟⵓⴱⵕ 2020, ⵙ 95 ⴳ ⵜⵎⵉⴹⵉ ⵖⵉⵍⴰⴷ, ⵜⵙⴷⴷⵉⴷ “ ⵏⵍⵍⴰ ⴳ ⵓⵣⵎⵣ ⴰⵎⴳⴳⴰⵔⵓ ⵏ ⵓⵙⵎⴰⴷ ⵏ ⵜⵡⵓⵔⵉⵡⵉⵏ ⵏ ⵓⵙⴰⵢⵔⴰⵔ ⵏ ⵓⵖⵣⵓ ⵏ ⵜⵣⵎⴰⵎⵎⴰⵔⵜ ⴰⴼⴰⴷ ⴰⴷ ⵉⵏⵏⵓⵕⵥⵎ ⵅⴼ ⵓⴳⴷⵓⴷ ⴳ ⵓⵙⵡⵉⵔ ⴰⵏⴰⵎⵓⵔ ⴷ ⵓⵙⵡⵉⵔ ⴰⴳⵔⴰⵖⵍⴰⵏ, ⵔⴰⴷ ⵉⵜⵜⵓⵙⵏⴼⵍ ⵙ ⵓⵙⴰⵢⵔⴰⵔ ⵏ ⵡⴰⵍⵍⴰⵙ ⵏ ⵜⵓⴷⵓⵔⵜ ⴷ ⵓⵙⴰⵢⵔⴰⵔ ⵏ ⵡⴰⵎⵓⵏ ⴰⵎⵖⵔⵉⴱⵉ ⵉⵎⵓⵔⵙⵏ ⴳ ⵓⵙⵡⵓⴷⴷⵓ ⵏ ⵜⵎⴽⵜⵉⵜ ⵏⵏⵙ ⵉⵀⵔⵛⵏ ⴷ ⵓⵚⴽⵓ ⵏ ⵜⵎⴽⵜⵉⵜ ⵏⵏⵙ ⵜⴰⵎⴰⵢⵏⵓⵜ ⵉⵏⵏⵓⵕⵥⵎⵏ ⵅⴼ ⵇⴰⵃ”.
ⴳ ⵓⵎⵏⴰⴹ ⴰⴷ, ⵜⵏⵏⴰ ⵎⴰⵙⵙⴰ ⴱⵓⵄⵢⵢⴰⵛ ⴳ ⵜⵙⵎⵓⵏⵉ ⵏ ⵜⵙⵇⵇⵉⵎⵜ ⵏ ⵓⴹⴼⴼⵓⵕ ⵏ ⵓⵙⵎⵙⴰⵙⴰ ⵏ ⵓⵙⴰⵢⵔⴰⵔ ⵏ ⵜⵣⵎⴰⵎⵎⴰⵔⵜ, ⵎⴰⵙ ⵉⴳⴰ ⵓⵙⵖⵏⵓ ⴰⴷ ⵢⴰⵜ ⵜⵉⵔⵎⵉⵜ ⵜⴰⵎⵥⵍⵉⵜ ⵜⵓⵙⵍⵉⴷⵜ ⵏⵏⴰ ⵔⴰⴷ ⵉⵙⵏⴼⵍ ⴰⵙⴰⵢⵔⴰⵔ ⵏ ⵜⵣⵎⴰⵎⵎⴰⵔⵜ ⵙ ⵓⵙⴰⵢⵔⴰⵔ ⵏ ⵜⵓⵎⵔⵜ ⴷ ⵜⵓⴷⵔⵜ ⵙ ⵜⵉⴷⵉⵏⴰⵎⵉⵜ ⵜⴰⵏⴰⵎⵓⵏⵜ ⴷ ⵜⴷⵍⵙⴰⵏⵜ ⴷ ⵜⴷⵎⵙⴰⵏⵜ ⴷ ⵜⵡⵏⴹⴰⵏⵜ, ⴰⴼⴰⴷ ⴰⴷ ⵉⴳ ⴰⵙⴰⵢⵔⴰⵔ ⴰⵎⵣⵡⴰⵔⵓ ⵉⵜⵜⵓⴳⴰⵏ ⴳ ⵓⴱⵔⵉⴷ ⵏ ⵓⵎⵙⴼⵔⵓ ⴷ ⵓⵃⵟⵟⵓ ⵏ ⵜⵎⴽⵜⵉⵜ, ⵜⵙⴷⴷⵉⴷ ⵎⴰⵙ ⵉⵔⴰ ⵓⵙⵇⵇⵉⵎ ⴰⴷ ⵉⵙⵡⵓⵔⵉ ⴰⴽⴷ ⵜⵓⴳⵜ ⵏ ⵉⵎⴷⵔⴰⵡⵏ ⴰⴼⴰⴷ ⴰⴷ ⵉⵙⴱⵓⵖⵍⵓ ⵉⴳⵉ ⴰⴷ ⴰⵎⵇⵇⵔⴰⵏ ⵙ ⵓⵙⵙⴷⵔⵓ ⵏ ⵉⵎⵣⴷⴰⵖⵏ ⵉⴷⵖⵔⴰⵏⵏ, ⵜⵉⵡⵜⵎⵉⵏ ⴷ ⵉⵄⵔⵔⵉⵎⵏ, ⴳ ⵜⵏⴽⵔⴰ ⵙ ⵜⵡⵓⵔⵉ ⵜⴰⵏⴰⵎⵓⵏⵜ ⴷ ⵜⴷⵍⵙⴰⵏⵜ ⵏ ⵓⵙⴰⵢⵔⴰⵔ ⵏ ⵜⵣⵎⴰⵎⵎⴰⵔⵜ, ⵉⴷⴷⵖ ⴳⴰⵏ ⴰⵙⵉⵣⵡⵔ ⴳ ⵓⵎⵓⵔⵙ ⵏ ⵓⵙⵖⵏⵓ ⴰⴷ, ⵎⴽⴷⴰ ⵜⴱⵔⵔⵃ ⵎⴰⵙ ⵔⴰⴷ ⵉⴱⴷⴷ ⵓⵙⵇⵇⵉⵎ ⵅⴼ ⵓⵏⵜⴰⵎ ⵏ ⵜⵉⵔⵎⵉⵜ ⴰⴷ ⵜⴰⵎⵣⵡⴰⵔⵜ ⴷ ⵜⵎⴷⵢⴰⵜ ⴷ ⵓⴱⵔⵉⴷ ⴰⴷ ⵓⵙⵍⵉⴷ ⴳ ⵓⵎⵙⴰⴳⴰⵔ ⵏ ⵜⵡⵓⵔⵉ ⵏ ⵜⵓⴳⵜ ⵏ ⵜⵣⵓⵏⴰ ⵜⵉⵎⴰⵡⵙⴰⵙⵉⵏ ⴷ ⵜⵎⵙⵙⵓⴳⵓⵔⵉⵏ ⵜⵉⴷⵖⵔⴰⵏⵉⵏ ⴷ ⵜⵓⴳⵜ ⵏ ⵉⵎⴽⵛⴰⵎⵏ ⴳ ⵓⵙⵖⵏⵓ ⴰⴷ, ⵜⵉⵏⵉ ⵎⴰⵙ ⵔⴰⴷ ⵜⵓⵊⴷ ⵜⵏⵜⴰⵎⵜ ⴰⴷ ⴳ ⵓⵣⵎⵣ ⵏ ⵓⵕⵥⵥⵓⵎ ⵏ ⵓⵙⴰⵢⵔⴰⵔ ⴰⴷ ⵜⵉⵣⵡⵉⵔⵉ ⵏ ⵓⵙⴳⴳⵯⴰⵙ 2022.
ⴳ ⵓⵎⵏⴰⴹ ⵏⵉⵜ ⵏ ⵓⵙⴷⴷⵉⴷ ⵅⴼ ⵡⴰⵜⵉⴳ ⵏ ⵜⵎⵏⴰⴹⵜ ⴰⴷ ⴳ ⵓⴱⵔⵉⴷ ⵏ ⵜⵣⵔⴼⵜ ⵜⴰⵏⵎⴰⵜⵜⴰⵢⵜ ⴳ ⵜⵎⴰⵣⵉⵔⵜ ⵏⵏⵖ, ⵉⵙⵏⵎⴰⵍⴰ “ ⵓⴼⵔⴷⵉⵙ ⵏ ⵓⵃⵟⵟⵓ ⵏⵜⵎⴽⵜⵉⵜ ⴷ ⵜⵏⴽⵔⴰ ⵙ ⵓⵎⵣⵔⵓⵢ ⴰⵎⵖⵔⵉⴱⵉ ⵙ ⵜⵓⴳⵜ ⵉⵎⵓⵖⵍⵏ ⵏⵏⵙ”, ⵏⵏⴰ ⵢⴰⴷ ⵉⵜⵜⵓⵙⵔⵙⵏ ⴳ ⵕⵕⴱⴰⵟ ⴳ 25 ⵎⴰⵢⵢⵓ 2021, ⵜⴰⵙⵎⵓⵏⵉ ⵏⵏⵙ ⵜⴰⵎⵣⵡⴰⵔⵓⵜ ⴱⵕⵕⴰ ⵏ ⵓⵙⵖⵉⵎ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⴰ ⴳ ⵜⵏⵏⴰ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵉⴳⴰ ⵓⵙⵏⵎⴰⵍⴰ ⵏ ⵜⵙⵎⵓⵏⵉ ⴰⴷ ⴳ ⵜⵖⵔⵎⵜ ⵏ ⵎⵉⴷⵍⵜ ⴰⵙⵙ ⵏ 18 ⴷⵓⵊⴰⵏⴱⵉⵔ 2021, ⵢⴰⵜ ⵜⵎⴰⵜⴰⵔⵜ ⵉⴷⵓⵙⵏ ⴳ ⵓⵙⵡⵉⵔ ⴰⵙⵔⵜⴰⵏ ⴷ ⵓⵣⵔⴼⴰⵏ ⵃⵎⴰ ⴰⴷ ⵜⵉⵍⵉ ⵜⵏⴽⵔⴰ ⵙ ⵜⵙⴳⴰ ⴳ ⵓⵎⵏⵉⴷ ⵏ ⵓⵏⵏⵓⵕⵥⵎ ⵏⵏⵙ ⵉⵎⴰⵍ. ⵎⴽⴷⴰ ⴳⴰⵏ ⵉⵏⴳⵎⴰⵎⵏ ⵏ ⵓⵙⴰⵢⵔⴰⵔ ⵢⴰⵏⵓⵔⵣⴰⴼ ⵉ ⵉⴷⵖⴰⵔⵏ ⵏⵏⵙ.
ⵉⴼⵓⴽ ⴰⴷ ⵏⵉⵏⵉ ⵎⴰⵙ ⵉⴱⵔⵔⵃ ⵓⵙⵇⵇⵉⵎ, ⵉⴷⴷⵖ ⵜⵟⵟⴰⴼ ⵜⵙⴰⵡⵔⵜ ⴰⴷ ⴰⵜⵉⴳ ⴷ ⵜⵎⴰⵜⴰⵔⵜ ⵎⵇⵇⵓⵔⵏ ⴳ ⵜⵣⵔⴼⵜ ⵜⴰⵏⵎⴰⵜⵜⴰⵢⵜ ⴳ ⵍⵎⵖⵔⵉⴱ, ⴳ 8 ⴽⵟⵓⴱⵕ 2020 ⴳ ⵕⵕⴰⵛⵉⴷⵉⵢⴰ, ⵙ ⴽⵔⴰ ⵏ ⵉⴼⵔⴷⵉⵙⵏ ⵏ ⵜⵙⵜⵕⴰⵜⵉⵊⵉⵜ ⵏ ⵓⵙⵇⵇⵉⵎ ⵙ ⵜⵎⵍⴷⴰ ⵏ ⵓⵙⵏⵎⵍ ⵏ ⵉⵏⴳⵎⴰⵎⵏ ⵉⵎⴰⵢⵏⵓⵜⵏ ⵏ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵏⴰⴹⵜ ⵏ ⴷⵔⴰ ⵜⴰⴼⵉⵍⴰⵍⵜ, ⵙ ⵓⵙⴷⴷⵉⴷ ⵅⴼ ⵜⵎⴰⵜⴰⵔⵜ ⵜⴰⵏⵎⵣⵔⴰⵢⵜ ⴷ ⵜⵣⵔⴼⴰⵏⵜ ⵏ ⵜⵎⵏⴰⴹⵜ ⴰⴷ ⵖ ⵓⵔ ⵉⵍⵉ ⵓⵎⵙⵓⵔⵓⴼ ⴰⵏⴰⵡ.
ⵜⴽⴽⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵜⵙⴷⴷⵉⴷ ⵙ ⵜⵎⵍⴷⴰ ⴰⴷ ⵎⴰⵙ ⵉⴼⴰⵡ ⵓⵡⵜⵜⴰⵙ ⵏ ⵜⵙⵜⵕⵜⵉⵊⵉⵜ ⴳ “ⵉⴳⵉ ⴰⵣⵔⴼⴰⵏ ⵉⴷⴷⵖ ⴷⴰⵔⵏⵖ ⵜⵍⵍⴰ ⵜⵎⵙⵜⴳⴳⴰⵔⵜ ⵏ ⵓⵎⵣⴰⵖ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⵙⵏⵜⴰⵢⵏ ⵏ ⵓⵕⵥⵥⵓⵎ ⵏ ⵓⴱⵔⵉⴷ ⵏ ⵜⵣⵔⴼⵜ ⵜⴰⵏⵎⴰⵜⵜⴰⵢⵜ ⵓⴳⴳⴰⵔ ⵏ 20 ⵏ ⵉⵙⴳⴳⵯⴰⵙⵏ ⴰⵢⴰ, ⴷ ⵓⵍⴰ ⵜⴰⵎⵙⵜⴳⴳⴰⵔⵜ ⵏ ⵓⵙⵎⴰⴷ ⵏⵏⵙ ⵅⴼ ⵜⴷⴰⵙⵉⵍⵜ ⵏ ⵉⴳⵉ ⴰⵣⵔⴼⴰⵏ ⵓⵔ ⴷ ⵙ ⵜⵙⵖⵣⵏⵜ ⵏ ⵜⴰⴷⵢⵓⵍⵓⵊⵉⵜ ⴷ ⴽⵔⴰ ⵏ ⵓⵏⴳⵉⵎ ⴰⵙⵔⵜⴰⵏ ⵉⵜⵜⵡⴰⵥⵍⴰⵢⵏ”, ⵜⵔⵏⵓ ⵎⴰⵙ ⵉⴱⴷⴷ ⵓⵡⵜⵜⴰⵙ ⵏ ⵓⵙⵇⵇⵉⵎ ⵅⴼ ⵓⵙⵏⴼⵍ ⵏ ⵡⴰⵎⵎⴰⵙⵏ ⴰⵔⵓⵍⴳⵉⵏⵏ ⵏ ⵡⴰⵎⵎⴰⵥ ⴷ ⵓⵏⵖⵓⴱⵓ ⵓⵛⵛⵉⵍ ⵙ ⵡⴰⵎⵎⴰⵙⵏ ⴷ ⵉⵙⴰⵢⵔⴰⵔⵏ ⵉⴷⵍⵙⴰⵏⵏ ⴷ ⵉⵏⴰⵎⵓⵏⵏ ⴷ ⵡⴰⵎⵎⴰⵙⵏ ⵏ ⵓⵃⵟⵟⵓ ⵏ ⵜⵎⴽⵜⵉⵜ, ⴰⵙⵏⴼⵍ ⵙⴳ ⵡⴰⵎⵎⴰⵙⵏ ⵏ ⵓⵏⵖⵓⴱⵓ ⴷ ⵡⴰⵎⵎⴰⵥ ⵙ ⵡⴰⵎⵎⴰⵙⵏ ⵏ ⵜⵓⴷⵔⵜ, ⴰⴼⴰⴷ ⴰⴷ ⵓⵔ ⵉⵜⵜⵡⴰⵍⵙ ⴰⵢⵍⵍⵉ ⵉⵊⵕⴰⵏ.
