ⴳ ⵓⴷⵔⴰⵡ ⵏⵏⵙ ⴳ ⵓⵙⴳⵔⴰⵡ ⴰⵙⴳⴰⵡⴰⵏ ⴳ ⵜⵎⴰⵥⵓⵏⵜ ⵜⴰⵍⵓⴱⵏⴰⵏⵉⵜ ⴱⴰⵢⵔⵓⵜ, ⵓⵙⵙⴰⵏ ⵏ 10 ⴷ 11 ⵢⵓⵍⵢⵓⵣ 2025, ⵅⴼ "ⵓⵙⵓⵎⵓ ⴷ ⵡⴰⵍⴰⵙ ⵏ ⵓⵙⵖⵔⵜ ⵉ ⵓⵏⴳⵉⵙⵏ ⵏ ⵓⵙⵔⴼⵓⴼⵏ ⴳ ⵜⵎⵏⴰⴹⵜ ⵏ ⵓⴳⵎⵎⵓⴹ ⴰⵏⴰⵎⵎⴰⵙ ⴷ ⵉⴼⵔⵉⵇⵢⴰ ⵏ ⵉⵥⵥⵍⵎⴹ", ⵜⵙⵎⵏⵉⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⴼⵔⴷⵉⵙⵏ ⵙⴳ ⵜⵉⵔⵎⵉⵜ ⵏ ⵍⵎⵖⵔⵉⴱ ⴳ ⵢⵉⴳⵔ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ, ⴷ ⵎⴰⵙ ⵉⵜⵜⵡⴰⵥⵍⴰⵢ ⵓⵙⵔⵙ ⴷ ⵓⵙⴰⴽⴰ ⵏ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ.

ⴳ ⵓⵎⵙⴰⵡⴰⵍ ⵏⵏⵙ, ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵉⴳⴰ ⵓⵙⵔⵙ ⵏ ⵓⵏⴳⵎⴰⵎ ⴰⵙⴳⴳⵯⴰⵙ ⵏ 2004 ⵜⴰⵢⴰⴼⵓⵜ ⵏ ⵓⵎⵓⵔⵙ ⵏ ⵜⵖⵏⵙⴰ ⴷ ⵓⵏⵄⴰⵕ ⵓⵖⵔⵉⵎ ⵉⵙⵙⵏⵜⵉⵏ ⴳ ⵜⵣⵡⵉⵔⵉ ⵏ ⵉⵙⴳⴳⵯⴰⵙⵏ ⵉⵜⵥⴰⵎⵔⴰⵡⵏ ⵏ ⵜⴰⵙⵓⵜ ⵉⵣⵔⵉⵏ, ⵏⵏⵉ ⵉⴳⴰⵏ ⵜⴰⵔⵙⵍⵜ ⵉ ⵓⵙⵔⵙ ⵏ ⵓⵎⵓⵜⵜⵉ ⴰⴷⵉⵎⵓⵇⵕⴰⵟⵉ, ⴷ ⵓⵙⴷⵓⵙ ⵏ ⵓⵡⴰⵏⴽ ⵏ ⵓⵙⵍⴳⵏ, ⴷ ⵓⴱⵓⵢ ⴷ ⵜⴰⵍⵖⵉⵡⵉⵏ ⵏ ⵓⵙⵡⵓⴷⴷⵓ ⵏ ⵉⵣⵔⵉ ⵏⵏⴰ ⵉⵙⵙⴼⵓⵖⵏ ⵖⵔ ⵜⵕⵥⵉⵢⵉⵏ ⵀⵔⵛⵏⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ.

ⵜⵙⵙⴼⴰⵡ ⵜⵣⵔⴼⴰⵏⵜ ⵜⴰⵎⵖⵔⵉⴱⵉⵜ ⵎⴰⵙ ⵉⵙⵙⵜⵉ ⵍⵎⵖⵔⵉⴱ, ⵙ ⵜⵉⵔⴰⵜ ⵜⴰⵏⴰⵎⵓⵔⵜ ⵜⴰⵍⴻⵍⵍⵉⵜ, ⴰⴷ ⵉⵙⵙⴼⵍⴷ ⵉ ⵜⵎⴽⵜⵉⵜ ⵏⵏⵙ ⵜⴰⴳⵔⴰⵡⴰⵏⵜ, ⵓⵔ ⴷ ⵖⴰⵙ ⵉ ⵓⵏⵜⴰⵎ, ⵎⴰⵛⴰ ⵙ ⵓⴼⵔⴰⴽ ⵙ ⵡⴰⵕⵕⴰⵥ ⴰⴼⵔⴽⴰⵏ ⵏ ⵉⵣⵔⵉ ⴷ ⵓⵙⵙⴰⵔⵓ ⵏⵏⵙ ⴳ ⵡⵓⵏⵓⵖ ⵏ ⵜⴼⵔⴰⵙ ⵏ ⵢⵉⵎⴰⵍ ⵉⴱⴷⴷⵏ ⵅⴼ ⵓⵎⵙⴼⵔⵓ ⴷ ⵡⴰⴷⴷⵓⵔ ⴷ ⵜⵣⵔⴼⵜ.

ⵜⵉⵔⵎⵉⵜ ⵜⴰⵎⵖⵔⵉⴱⵉⵜ, ⵎⴽⴷⴰ ⵜⵙⵙⴼⴰⵡ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵜⴱⴷⴷ ⵅⴼ ⵓⵎⵙⴰⵡⴰⵍ ⴰⵎⵓⵏⴰⵏ ⴷ ⵜⴷⵔⴰⵡⵜ ⵜⴰⵙⵔⵜⴰⵏⵜ, ⴱⵍⴰ ⴰⴼⵔⵔⵜⵍ ⵙⴳ ⵜⵎⵙⵜⴳⴳⴰⵔⵜ ⵏⵖ ⴰⵔ ⵜⵓⵙⵏⵜ ⵏ ⵜⵕⵥⵉⵢⵉⵏ, ⵎⴰⵛⴰ ⵙ ⵓⵙⵏⴼⵍ ⵏ ⵉⵙⵏⵜⵔⵏ ⵏ ⵉⵣⵔⵉ ⵖⵔ ⵜⵖⵓⵔⵉⵡⵉⵏ ⵉⵙⵔⴰⵙⵏ ⵉ ⵜⴷⵔⴰⵡⵜ ⵜⴰⵎⵓⵏⴰⵏⵜ ⵜⴰⵎⵉⵔⵉⵡⵜ.

ⴳ ⵓⵙⴰⵜⵉ ⴰⴷ, ⵉⴼⴰⵡ ⵎⴰⵙ ⵜⴳⴰ ⵜⵉⵔⵎⵉⵜ ⴰⴷ ⵜⴰⵙⵏⵜⴰⵢⵜ ⵜⵓⵏⴱⵉⴹⵜ ⵉ ⵓⵎⵏⴰⵍⴰ ⵏ ⵉⵣⵔⵉ ⵙ ⵓⵣⵓⵣⵣⴼ ⵏ ⵜⵉⴷⵜ, ⴷ ⵡⴰⵙⵙⴰⵢ ⵏ ⵓⵡⴰⵏⴽ ⵉ ⵜⵎⵙⵜⴳⴳⴰⵔⵜ ⵏⵏⵙ, ⴷ ⵡⴰⵔⵔⴰⵣ ⵏ ⵓⵏⴳⵉⵙⵏ ⴷ ⵓⵙⴳⴳⴷ ⵏ ⵓⵎⴰⵍⴰⴷ, ⴰⵢⴰ ⴳ ⵓⵎⵏⴰⴹ ⴰⵙⵔⵜⴰⵏ ⵓⵔ ⵉⵜⵜⵓⵕⵛⴰⵎⵏ ⵙ ⵉⵎⵏⵖⵉ ⴰⵎⴰⵍⴰⴼ, ⵎⴰⵛⴰ ⵙ ⵜⵖⵜⴰⵙⵜ ⵜⴰⴳⵯⵏⵙⴰⵏⵜ ⵜⴰⵎⵅⴰⵙⵜ ⴷ ⵜⵓⵏⴱⵉⴹⵜ ⵉ ⵓⵙⵎⴰⵢⵏⵓ ⵏ ⵓⵙⴽⴰⵔ ⵏ ⵜⴼⵍⵙⵜ ⴷ ⵓⵙⵔⵙ ⵏ ⵜⵔⵙⴰⵍ ⵏ ⵓⴼⵔⴰⴳ ⵏ ⵡⴰⴷⴷⵓⵔ ⵏⵏⵉ ⵉⴳⴰⵏ ⴰⵎⴰⵏⴰⵔ ⵏ ⵓⵙⵏⴰⵎ.

ⵜⵙⵙⴽⵜⵉ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵓⵔ ⵜⴼⵜⵉ ⵜⵉⵔⵎⵉⵜ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ ⴳ ⵍⵎⵖⵔⵉⴱ ⵖⵔ ⵉⵣⵓⵔⵜⵏ ⵢⵓⵊⴷⵏ, ⵎⴰⵛⴰ ⵜⵙⵔⵙ ⵉⵙⴰⴽⴰⵜⵏ ⵉⴱⴷⴷⵏ ⵅⴼ ⵜⵥⵍⴰⵢⵜ ⵏ ⵓⵎⵏⴰⴹ ⴰⵏⴰⵎⵓⵔ, ⴷ ⵓⵙⵍⵍⵡⵉ ⵏ ⵉⴼⵙⵙⴰⵢⵏ ⴷ ⵢⵓⵙⴰⵏ, ⴳ ⵓⵎⵙⴰⵙⴰ ⵏⴳⵔ ⵓⵡⴰⵏⴽ ⴷ ⵡⴰⵎⵓⵏ, ⵎⴰⵢⴰ ⴰⴷ ⵉⵙⵎⵓⵜⵜⴳⵏ ⵉ ⵓⵙⵎⵀⵍ ⵏ ⵉⵎⴰⵙⵙⵏ ⵏ ⵓⵙⵓⵎⵓ ⴷ ⵜⵓⵙⵏⵜ ⴷ ⵓⵙⵏⴰⵎ ⴷ ⵜⵏⴼⵔⵓⵜ ⵏ ⵡⴰⵔⴰⵍⴰⵙ, ⵙ ⵜⵡⵉⵍⴰ ⵉⵎⵙⴰⵙⴰⵏ.

ⵎⴽⴷⴰ ⵜⵙⵙⴼⴰⵡ ⵎⴰⵙ ⵢⵓⵎⴰ ⵓⵙⴰⴽⴰ ⴰⴷ ⴰⵚⴽⵓ ⵓⵏⵖⵉⴷ ⵏ ⵜⵙⵓⵜⵍⵉⵏ ⵏ ⵜⵉⴷⵜ ⴷ ⵓⵙⴳⴳⴷ ⵏ ⵓⵎⴰⵍⴰⴷ ⴷ ⵓⵙⵏⴰⵎ, ⵙ ⵎⴰⴷ ⵉⴷⵔⵓⵏ ⴳ ⵓⵙⵔⵙ ⵏ ⵜⵖⵓⵏⵉ ⵜⴰⵏⴰⵎⵓⵏⵜ ⵜⴰⵎⴰⵢⵏⵓⵜ, ⵉⵏⴼⵔⵓⵏ ⴰⴼⵔⴰⴳ ⵏ ⵡⴰⴷⴷⵓⵔ ⴰⵏⴼⴳⴰⵏ, ⵉⵙⵏⴼⵍ ⴰⵏⵏⵓⵎⵙ ⵙⴳ ⵓⵙⵎⴽⵍ ⵏ ⵉⵣⵔⵉ ⵏ ⵜⵕⵥⵉⵢⵉⵏ ⵖⵔ ⵜⵎⵥⵍⴰ ⵏ ⵡⴰⵔⴰⵢ ⴰⵎⵙⵉⵣⵡⵔ, ⵙ ⵜⵎⴳⴳⵉⵜⵉⵏ ⵜⵉⴷⵙⵜⴰⵔⵉⵏ ⴷ ⵜⵎⵔⵙⴰⵍⵉⵏ ⴷ ⵜⵣⵣⵔⴰⴼⵉⵏ ⵜⵉⴽⵎⴰⵎⵉⵏ.

ⴳ ⵓⵙⴰⵜⵉ ⵏ ⵜⵣⵣⵉⴳⵣⵉⵏ ⵜⵉⵣⵣⵔⴰⴼⵉⵏ ⴷ ⵜⵎⵔⵙⴰⵍⵉⵏ, ⵜⵙⴷⴷⵉⴷ ⴱⵓⵄⵢⵢⴰⵛ ⵎⴰⵙ ⵉⵖⵜⵙ ⵍⵎⵖⵔⵉⴱ ⵉⴹⵕⵉⵚⵏ ⵉⵙⵙⴱⴽⴽⵉⴹⵏ ⴰⵙⵔⴼⵓⴼⵏ ⵙ ⵜⵡⵉⵍⴰ ⵜⴰⵙⴼⴼⴰⵏⵥⴰⵢⵜ, ⵉⵏⴼⵔⵓⵏ ⵡⴰⵔⴰⴼⵍⵍⵜ ⵙⴳ ⵜⵎⵔⵔⵓⵜ, ⵎⴽⴷⴰ ⵉⵜⵜⵓⵙⵔⵙ ⵉⵎⵉⵙ ⴰⵏⴰⵎⵓⵔ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ (ⵏⵏⴰ ⵉⵙⴷⵍ ⵓⵙⵇⵇⵉⵎ), ⵙ ⵓⵎⵙⴰⵙⴰ ⴷ ⵉⵙⵖⵍⴰⴼ ⵏⵏⴰ ⴷ ⵉⵙⵙⵓⴼⵖ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ, ⴷ ⴰⴽⴷ ⵉⵙⵓⵖⵏⵏ ⵉⴳⵔⴰⵖⵍⴰⵏⵏ ⵏ ⵜⴳⵍⴷⵉⵜ, ⵙⵍⴰⵡⴰⵏ ⴰⴽⴽⵯ ⴰⴱⵔⵓⵜⵓⴽⵓⵍ ⴰⵔⵓⵛⵛⵉⵍ ⵏ ⵜⵎⵢⴰⵇⵇⴰⵏⵜ ⵏ ⵓⵙⴱⴷⴷⵉ ⵏ ⵓⵙⵔⴼⵓⴼⵏ.

ⵜⵙⵎⴷ ⵎⴰⵙⵙⴰ ⴱⵓⵄⵢⵢⴰⵛ ⵙ ⵓⵙⴷⴷⵉⴷ ⵎⴰⵙ ⵜⴱⴷⴷ ⵜⵉⵔⵎⵉⵜ ⵏ ⵍⵎⵖⵔⵉⴱ ⴳ ⵜⵣⵔⴼⵜ ⵜⴰⵏⵎⵓⵜⵜⵉⵜ ⵅⴼ ⵉⵎⵏⵣⴰⵢⵏ ⵏ ⵓⵙⵓⵎⵓ, ⵜⵉⵏⵉ ⵎⴰⵙ ⵓⵔ ⴷ ⴰⵣⵓⵣⵣⴼ ⵏ ⵜⵉⴷⵜ ⴷ ⵡⴰⵔⵔⴰⵣ ⴽⴰ ⴷ ⵉⴳⴰⵏ ⴰⵡⵜⵜⴰⵙ, ⵎⴰⵛⴰ ⴰⴳⵣⵣⵓⵎ ⵙⴳ ⵓⵙⴰⴽⴰ ⴰⵖⵣⵓⵔⴰⵏ ⵉⵡⴰⵜⵜⵙ ⴰⵙⴷⵓⵙ ⵏ ⵓⵡⴰⵏⴽ ⵏ ⵜⵎⵔⵙⴰⵍ ⴷ ⵓⵡⴰⵏⴽ ⵏ ⵓⵣⵔⴼ ⴷ ⵓⵙⵍⴳⵏ.