ⵙⵙⵏⵜⵉⵏⵜ ⵜⵡⵓⵔⵉⵡⵉⵏ ⵏ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⵎⵉ ⵢⴰⵜⵜⵓⵢ ⵓⵙⵡⵉⵔ ⵅⴼ "ⵜⵉⵔⵎⵉⵜ ⵜⴰⵎⵖⵔⴰⴱⵉⵜ ⴳ ⵢⵉⴳⵔ ⵏ ⵜⵣⵔⴼⵜ ⵜⴰⵏⵎⵓⵜⵜⵉⵜ", ⵍⵍⵉ ⵉⵙⵏⵎⴰⵍⴰ, ⵙ ⵢⵉⵡⵉⵣ ⵢⴰⵜⵜⵓⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ, ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⴱⵕⵍⴰⵎⴰⵏ ⵙ ⵜⵎⵚⵕⴰⵢ ⵏⵏⵙ ⵙ ⵙⵏⴰⵜ (ⴰⵙⵇⵇⵉⵎ ⵏ ⵉⵎⵓⵔⴰ ⴷ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ), ⴰⵙⵙ ⵏ 6 ⴷ 7 ⴷⵓⵊⴰⵏⴱⵉⵔ 2024, ⴳ ⵓⵎⵏⴰⴹ ⵏ ⵓⵙⴼⵓⴳⵍⵓ ⵙ ⵓⴽⵜⵜⵓⵢ ⵡⵉⵙ ⵙⵉⵎⵔⴰⵡ ⵏ ⵓⵙⵔⵓⵙ ⵏ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ.

ⵜⵙⵙⵏ ⵜⵖⵉⵎⵉⵜ ⵏ ⵓⵕⵥⵥⵓⵎ ⵙ ⵜⵖⵓⵔⵉ ⵏ ⵜⴱⵔⴰⵜ ⵜⴰⴳⵍⴷⴰⵏⵜ ⵢⴰⵜⵜⵓⵢⵏ ⵍⵍⵉ ⵢⵓⵣⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⵉ ⵜⵎⴷⵔⴰⵡⵉⵏ ⴷ ⵉⵎⴷⵔⴰⵡⵏ ⴳ ⵓⵎⵓⵙⵙⵓ ⴰⴷ ⴰⴳⵔⴰⵖⵍⴰⵏ, ⵍⵍⵉ ⵜⵙⵎⵏⵉⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ.

ⵉⵙⵎⴰⵢⵏⵓ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⴳ ⵜⴱⵔⴰⵜ ⵏⵏⵙ ⵢⴰⵜⵜⵓⵢⵏ ⴰⵙⴷⴷⵉⴷ ⵏⵏⵙ ⵎⴰⵙ ⵉⴳⴰ ⵓⵙⵔⵙ ⵏ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ ⵜⴰⵖⵜⴰⵙⵜ ⵜⵓⵏⴱⵉⴹⵜ ⴳ ⵓⴱⵔⵉⴷ ⴰⵎⵅⴰⵙ ⵏ ⵓⵙⵡⵓⴷⴷⵓ ⵏ ⵓⵙⴽⴽⵉⵏ ⴰⴳⴷⵓⴷⴰⵏ, ⵉⴱⵉⴷⴷⵏ ⵅⴼ ⵢⴰⵏ ⵓⵔⵎⵎⵓⵙ ⴰⵎⴰⵢⵏⵓ ⵏ ⵜⴰⵏⴱⴰⴹⵜ ⴷ ⵜⵎⵙⵜⴳⴳⴰⵔⵜ ⵏ ⵜⵎⵔⵙⴰⵍ ⴷ ⵓⵙⵉⴹⵏ ⵏⵏⵙⵏⵜ ⴰⴼⴰⴷ ⴰⴷ ⵉⵜⵜⵓⵏⴼⵔⵓ ⵡⴰⴷⴷⵓⵔ ⵏ ⵉⵎⵖⵔⴰⴱⵉⵢⵏ ⴰⴽⴽⵯ. ⴳ ⵓⵎⵏⴰⴹ ⴰⵏⵏ, ⵉⵙⵉⵙⴼⵉⵡ ⴱⴰⴱ ⵏ ⵡⴰⴷⴷⵓⵔ ⵎⴰⵙ ⵉⵜⵜⵓⵣⵎⵔ ⵙ ⵉⵙⵖⵍⴰⴼ ⵏ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ ⴰⴷ ⵉⵜⵜⵓⵙⵔⴰⵙ ⵢⴰⵏ ⵓⵙⴰⵜⵉ ⵉⵏⵎⴰⵍⴰⵏ ⵏ ⵉⵎⵓⴽⵏⵏ ⵉⵎⵓⵏⴰⵏⵏ ⵉⵎⵉⵔⵉⵡⵏ, ⴳ ⴰⵎⵓⵏ ⵉⴷⵙⵜⴰⵔⵏ ⴷ ⵓⵣⵔⵉⴼⵏ, ⴷ ⵓⵙⵔⵓⵙ ⵏ ⵉⵎⴰⵙⵙⵏ ⵉⵏⵎⵛⴰⵡⴰⵕⵏ ⴷ ⵉⵏⵎⵔⵙⴰⵍⵏ, ⵙ ⵓⵡⵜⵜⴰⵙ ⵏ ⵓⴱⵓⵢ ⴰⴽⴷ ⵜⵕⵥⵉⵢⵉⵏ ⵏ ⵉⵣⵔⵉ, ⴷ ⵓⵙⴷⵓⵙ ⵏ ⵓⵙⵡⵓⴷⴷⵓ ⴰⴳⴷⵓⴷⴰⵏ ⵉⵙⵏⵓⴱⴳⵏ ⵉⵙⵖⵣⵏⵏ ⵉⵍⵓⴳⵏⵏ ⵏ ⵓⵡⴰⵏⴽ ⵏ ⵓⵣⵔⴼ ⴷ ⵓⵙⵍⴳⵏ ⴷ ⵓⵙⵉⵙⴼⵉⵡ ⵏ ⵜⴷⵉⵏⴰⵎⵉⵜ ⵜⴰⵎⵙⵎⴰⵢⵏⵓⵜ.

ⵜⵙⵙⵏ ⵜⵖⵉⵎⵉⵜ ⴰⴷ ⵏ ⵓⵕⵥⵥⵓⵎ ⴰⵕⵥⵥⵓⵎ ⵏ ⵓⵙⴼⵙⵔ ⵏ ⵜⵙⵉⵎⵔⴰⵡⵜ ⵏ ⵜⵉⴷⵜ ⴷ ⵓⵙⵓⵎⵓ ⴷ ⵓⵎⵙⴼⵔⵓ ⴳ ⵓⵙⵖⵉⵎ ⵏ ⵓⴱⵕⵍⴰⵎⴰⵏ, ⴷ ⵜⵉⵍⵉⵜ ⵏ ⴽⵉⴳⴰⵏ ⵏ ⵉⵎⵙⵜⴳⴳⴰⵔⵏ ⵉⵏⴰⵎⵓⵔⵏ ⴷ ⵉⴱⵕⵕⴰⵏⵏ, ⵉⵙⵎⴷⵢⴰⵏ ⵜⴰⵏⴱⴰⴹⵜ ⴷ ⵓⴱⵕⵍⴰⵎⴰⵏ ⴷ ⵜⵏⴱⴹⴰⵢⵜ ⴷ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⵙⵙⵏ ⵉⵏⴰⵎⵓⵔⵏ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ, ⴷ ⵓⵍⴰ ⵉⵎⵙⵜⴳⴳⴰⵔⵏ ⵏ ⵜⵎⵜⵜⴰ ⵉⵎⵓⵏⵏ ⴷ ⵜⴰⵎⵓⵏⵜ ⵏ ⵉⴼⵔⵉⵇⵢⴰ, ⴷ ⵉⴳⵏⵙⴰⵙ ⵅⴼ ⵜⵎⴰⴷⴷⴰⵙⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵜⵙⴳⴰⵡⴰⵏⵉⵏ ⴷ ⵜⵏⴰⵎⵓⵔⵉⵏ ⵏ ⵡⴰⵎⵓⵏ ⵓⵖⵔⵉⵎ, ⴷ ⵓⵍⴰ ⵉⵎⵓⵣⴰⵢⵏ ⴷ ⵉⵎⵙⴽⵍⴰⵏⵏ.

ⵉ ⵓⵙⴽⵜⵉ, ⵉⵙⵙⵉⴷⵔ ⵓⵙⴼⵓⴳⵍⵓ ⵙ ⵓⴽⵜⵜⵓⵢ ⵏ ⵓⵙⵔⵓⵙ ⵏ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ ⵢⴰⵏ ⵓⵙⴰⴽⴰ ⵉⴽⴽⴰⵏ ⵙⵉⵎⵔⴰⵡ ⵏ ⵉⵙⴳⴳⵯⴰⵙⵏ, ⵢⴰⴷⵙ ⵜⵉⵢⴰⴼⵓⵜⵉⵏ ⴷ ⵉⴷⵔⵉⵣⵏ ⵏ ⵜⵉⵔⵎⵉⵜ ⵉⵙⵙⵕⵚⴰⵏ ⴰⵎⵙⴰⴳⴰⵔ ⵉⴷⵔⴰⵏ ⵉⵏⴳⵔ ⵙⵉⵏ ⵡⴰⵍⵍⴰⵍⵏ ⵉⴷⵙⵍⴰⵏⵏ : ⵜⴰⵣⵔⴼⵜ ⵜⴰⵏⵎⵓⵜⵜⵉⵜ ⴷ ⵜⵓⵚⴽⴰ ⵜⴰⵎⵔⵙⴰⵍⵜ. ⵉⴳ ⵓⵎⵙⴰⴳⴰⵔ ⴰⴷ , ⵏⵏⴰ ⵢⵓⵎⴰⵏ ⴰⵙⵎⴽⵍ ⵏ ⵜⵕⵥⵉⵢⵉⵏ ⵏ ⵉⵣⵔⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴳⴳⴷ ⵏ ⵉⵎⴰⵍⴰⴷⵏ ⴷ ⵓⵎⵓⴽⵏ ⴰⵎⵔⵙⴰⵍ ⴷ ⵓⵣⵔⵉⴼ, ⵜⴰⵎⴰⵜⴰⵔⵜ ⵏ ⵉⵎⴹⴰⴽⴰⵕⵏ ⵢⵓⴷⴼⵏ ⴷ ⴰⴳⵜ ⵜⴼⵓⵍⵉⵏ ⵉⵕⵛⵎⵏ ⴰⵙⴰⴽⴰ ⴰⴷⵉⵎⵓⵇⵕⴰⵟⵉ ⴳ ⵍⵎⵖⵔⵉⴱ.
 

ⵜⴰⵙⴷⵍⵉⵙⵜ ⵉⵥⵍⵉⵏ ⵙ ⵜⵉⵏⴰⵡⵜ