ⴷⴰ ⵢⴰⴽⴽⴰ ⵓⴷⵓⵙⵜⵓⵔ ⵏ ⵜⴳⵍⴷⵉⵜ ⵏ ⵓⵙⴳⴳⵯⴰⵙ 2011 ⴰⵣⵔⴼ ⵏ ⵓⴼⵊⵊⵉⵊ ⵏ ⵉⴱⵕⵕⴰⵏⵉⵢⵏ ⵙ ⵜⴷⵔⴼⵉⵏ ⵜⵉⴷⵙⵍⴰⵏⵉⵏ ⵉⵜⵜⴰⵡⴼⴽⴰⵏ ⵉ ⵉⵏⵎⵓⵔⴰⵏ ⴷ ⵜⵏⵎⵓⵔⵉⵢⵉⵏ ⵉⵎⵖⵔⴰⴱⵉⵢⵏ, ⵙ ⵓⵎⵙⴰⵙⴰ ⴷ ⵓⵙⵍⴳⵏ, ⴷ ⵓⵍⴰ ⴰⵎⵛⴰⵛⴽⴰ ⴰⵎⴰⴹⵍⴰⵏ ⵉ ⵜⵎⵣⵡⴰⴳⵜ ⵜⴰⵎⵏⴼⵔⵓⵜ ⴷ ⵜⵎⵙⵙⵓⴷⵙⵜ ⴷ ⵜⵍⵓⴳⴰⵏⵜ, ⵎⵇⵇⴰⵔ ⵉⴳⴰ ⴰⴹⵕⵉⵚ ⴰⵔⵓⵛⵛⵉⵍ, ⴰⵎⵛⴰⵛⴽⴰ ⴰⵎⵙⵎⵓⴷ ⵉⴷⵍⵏ ⴰⴽⴽⵯ ⵉⵎⵏⵣⴰⵢⵏ ⵏ ⵜⵎⵣⵡⴰⴳⵜ ⵜⴰⴳⵔⴰⵖⵍⴰⵏⵜ ⵙ ⵜⴱⵔⵉⴷⵜ ⵜⴰⵙⵎⵎⵓⴷⵜ ⴷ ⵜⵖⵣⵓⵔⴰⵏⵜ.
ⵉⵙⵙⵓⴼⵖ ⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⵙⴳⴳⵯⴰⵙ ⵏ 2023 ⵢⴰⵜ ⵜⵣⵔⴰⵡⵜ (ⵜⴰⵖⵓⵔⵉ) ⵅⴼ ⵡⴰⴷⴰⴼ ⵙ ⵜⵣⵔⴼⵜ, ⵏⵏⵉ ⵉⵣⵎⵔⵏ ⴰⴷ ⵉⵙⵙⵉⵜⴳ ⴰⵙⵓⵔⵙ ⵏ ⵉⴱⵕⵕⴰⵏⵉⵢⵏ ⴳ ⵍⵎⵖⵔⵉⴱ, ⵜⵙⵏⵜⵎ ⵜ, ⵙⵍⴰⵡⴰⵏ ⴰⴽⴽⵯ ⵎⴰⴷ ⵉⵥⵍⵉⵏ ⵙ ⵡⴰⴷⴰⴼ ⵙ ⵜⵣⵔⴼⵜ, ⵜⵣⵎⵔ ⴰⵡⴷ ⴰⴷ ⵜⵙⵡⵓⵜⵜⵓ ⴽⵔⴰ ⵏ ⵜⵖⵎⵔⵉⵏ ⵉⵣⴷⵉⵏ ⵙ ⵜⵎⵓⴽⵔⵉⵙⵉⵏ ⵥⵍⵉⵏⵉⵏ ⵏⵏⴰ ⵜⵜⵎⵏⴰⵍⴰⵏ ⵉⴱⵕⵕⴰⵏⵉⵢⵏ ⴳ ⵓⵎⵏⵉⴷ ⴰⴷ, ⵎⴽⵍⵍⵉ ⵜⴼⴽⴰ ⵜⵣⵔⴰⵡⵜ ⵜⵉⵙⵓⵎⴰⵔ ⵥⴹⴰⵕⵏⵉⵏ ⴰⴷ ⵙⵖⵓⴷⵓⵏⵜ ⴰⵣⵔⴼ ⴰⴷ ⵙ ⵓⵎⵙⴰⵙⴰ ⴷ ⵎⴰⵙ ⵜⵙⵖⴰⵡⵙⴰ ⵜⵏⵜⴰⵎⵜ ⵜⴰⴷⵙⵜⴰⵔⵜ ⴷ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⵉⵣⴷⵉⵏ ⴷ ⵓⵢⴰ, ⵉⵙⴷⴷⵉⴷ ⵓⵙⵇⵇⵉⵎ ⵅⴼ ⵜⵉⵏⴷⵉ ⵏ ⵓⵙⵉⴷⴼ ⵏ ⵉⴱⵕⵕⴰⵏⵉⵢⵏ ⴳ ⵓⵙⵓⵔⵙ ⴰⵎⵙⵙⵓⴳⵓⵔ ⴰⵍⵓⴳⴰⵏ ⴳ ⵉⵖⴰⵡⴰⵙⵏ ⵏ ⵓⴼⵔⴰⴳ ⴰⵏⴰⵎⵓⵏ.
ⴳ ⵓⵙⵡⵉⵔ ⴰⵙⴳⴰⵡⴰⵏ, ⵉⵙⵙⵉⵅⴼ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⴰⵔⴰⴱⴱⵓⵜ ⵏ ⵜⵡⵓⵔⵉ ⵉⵥⵍⵉⵏ ⵙ ⵓⵣⵡⴰⴳ ⴰⴳⵯⵏⵙ ⵏ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⴼⵔⵉⵇⵉⵢⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵙⵡⵓⵜⵜⵙ ⵜⵔⴰⴱⴱⵓⵜ ⴰⴷ ⴰⵙⵓⵊⴷ ⵏ ⵓⵙⴰⵜⵉ ⴰⵎⴰⵢⵏⵓ ⴷ ⵓⵙⴷⵓⵙ ⵏ ⵓⵎⵙⴰⵡⴰⵍ ⵅⴼ ⵜⵎⵣⵡⴰⴳⵜ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵉⵥⵓⵥⵜ ⵅⴼ ⵓⴹⴼⴰⵕ ⵏ ⵜⴷⵉⵏⴰⵎⵉⵢⵉⵏ ⵏ ⵉⵙⵏⴼⴰⵍ ⴷ ⵓⵙⴳⵓⴷⵉ ⵏ ⵓⵙⵏⴼⵍ ⵏ ⵜⵎⵓⵣⴰⵢⵉⵏ ⴷ ⵓⵎⵙⴰⵡⴰⵍ ⴳⵔ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⴷ ⵡⴰⵎⵓⵏ ⵓⵖⵔⵉⵎ ⴷ ⵜⵏⴱⴰⴹⵉⵏ ⴷ ⵜⵎⵏⴰⴹⵉⵏ ⵜⵉⵎⴳⴳⴰⵢⵉⵏ ⵢⴰⴹⵏ.
ⵉⴽⴽⴰ ⵓⵙⵇⵇⵉⵎ ⵉⵙⵙⵓⴼⵖ ⴷ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⵙⴳⴳⵯⴰⵙ ⵏ 2013 ⵉⵙⴳⵣⴰⵍⵏ ⵏ ⵜⴰⵏⴰⴹⵜ ⵏⵏⵙ ⵅⴼ ⵓⵣⵡⴰⴳ ⵉⵖⵔⴰ ⴷⵉⴳⵙ ⵙ ⵜⵙⵉⵍⴰⵡⵜ ⴷ ⵓⵣⵣⴳⵉⵔ ⵏ ⵜⵙⵔⵜⵉⵜ ⵜⴰⴳⴷⵓⴷⴰⵏⵜ ⵜⴰⵎⵢⴰⴳⴰⵏⵜ ⴳ ⵢⵉⴳⵔ ⵏ ⵜⵎⵣⵡⴰⴳⵜ, ⵉⵏⴼⵔⵓⵏ ⴰⴼⵔⴰⴳ ⵏ ⵉⵣⵔⴼⴰⵏ ⴷ ⵉⵏⵏⵓⵎⵙⵏ ⵅⴼ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ, ⵜⴱⴷⴷ ⵅⴼ ⵓⵙⵉⴷⴼ ⵏ ⵡⴰⵎⵓⵏ ⵓⵖⵔⵉⵎ. ⵜⴰⵏⴰⴹⵜ ⴰⵏⵏ ⴰⴷ ⴷ ⵜⵎⵢⴰⵖ ⵜⵏⴱⴰⴹⵜ, ⵜⵙⵔⵙ ⵢⴰⵜ ⵜⵙⵔⵜⵉⵜ ⵜⴰⵎⴰⵢⵏⵓⵜ ⴳ ⵢⵉⴳⵔ ⵏ ⵓⵣⵡⴰⴳ ⵉⵏⵏⴰⵍⵏ, ⵅⴼ ⵢⴰⵜ ⵜⵎⵢⴰⴷⴰⵙⵜ ⵜⴰⵖⵣⵓⵔⴰⵏⵜ ⴷ ⵜⵏⴼⴳⴰⵏⵜ ⴰⴷ ⵜⵙⵙⵓⵖⵏ ⵙ ⵉⵙⴱⴷⴰⴷⵏ ⵏ ⵓⵙⵍⴳⵏ ⴰⴳⵔⴰⵖⵍⴰⵏ ⴷ ⵜⵉⴳⴰⵡⵜ ⵏ ⵓⵎⵢⴰⵡⴰⵙ ⴰⴳⵜⵉⵔⴰⵏ.
ⵜⴻⵜⵜⵓⵙⵓⵖⵍ ⵜⵙⵔⵜⵉⵜ ⴰⴷ ⴳ ⵜⵉⵍⴰⵡⵜ ⴰⵙⴳⴳⵯⴰⵙ 2014 ⴷ 2016 ⵙ ⵙⵏⴰⵜ ⵜⵎⵀⴰⵍ ⵏ ⵓⵙⵎⵙⴰⵙⴰ ⵓⵙⵍⵉⴷ ⵏ ⵓⵙⵓⵔⵙ ⵏ ⵉⵙⵎⵉⵍⵏ ⵏ ⵉⵎⵣⵡⴰⴳⵏ ⵉⵍⵍⴰⵏ ⴳ ⵓⵙⵓⵔⵙ ⴰⵔⵓⵍⴳⵉⵏ, ⵙ ⵡⴰⵏⵏⴰⵍ ⵅⴼ ⵜⵉⵔⵛⵜ ⵏ ⵉⵏⴰⵡⴰⵢⵏ, ⴷ ⵓⵙⵔⵓⵙ ⵏ ⵜⵙⵇⵇⵉⵎⵜ ⵜⴰⵏⴰⵎⵓⵔⵜ ⵏ ⵓⴹⴼⵓⵕ ⵏ ⵉⵙⴷⴰⵡⵏ ⵏ ⵓⵙⵎⵙⴰⵙⴰ ⴷ ⵜⵖⵓⵔⵉ ⵏ ⵉⵔⴰⴷⴰⵖⵏ (ⵉⵙⵎⴰⵎⵎⵉⵢⵏ) ⴷ ⵓⵙⵎⴰⵔ ⵏ ⵜⵙⵜⵕⴰⵜⵉⵊⵉⵜ ⵜⴰⵏⴰⵎⵓⵔⵜ ⵏ ⵜⵎⵣⵡⴰⴳⵜ ⴷ ⵜⵓⵔⴳⵙⴰ ⴷ ⵓⵏⵏⵓⵕⵥⵎ ⵏ ⵓⵙⴰⴽⴰ ⵏ ⵉⵎⵓⴽⵏⵏ ⵓⵍⴳⵉⵏⵏ ⵉⵣⴷⵉⵏ ⵙ ⵓⵙⵣⵡⴰⴳ ⴷ ⵜⵓⵔⴳⵙⴰ ⴷ ⵜⵙⴱⴱⴰⴱⵜ ⴳ ⵉⵡⴷⴰⵏ.
ⵜⵉⵎⵉⵔⵉⵏ
