ⵔⴰⴷ ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ (CNDH) ⵙ ⵓⵎⵢⴰⵡⴰⵙ ⴰⴽⴷ ⵡⴰⵎⵎⴰⵙ ⴰⴳⵔⴰⵖⵍⴰⵏ ⵏ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ - ⵍⵢⵓⵏⵉⵙⴽⵓ (CIPDH-UNESCO), ⴰⵙⴳⵔⴰⵡ ⴰⵎⴰⴹⵍⴰⵏ ⵏ ⵕⵕⴱⴰⵟ ⵉ ⵉⵣⵔⴼⴰⵏ ⵏ ⵓⴼⴳⴰⵏ, ⵓⵙⵙⴰⵏ ⵏ 17 ⴷ 18 ⴱⵕⴰⵢⵕ 2023 ⵙⴳ ⵜⵙⵔⴰⴳⵜ ⵜⵉⵙ ⵜⵥⴰⵜ ⴳ ⵜⴳⴰⴷⵉⵔⵜ ⵏ ⴱⵓⵔⴳⵔⴳ, ⴳ ⵓⵎⵏⵉⴷ ⵏ ⵓⵙⵏⵎⴰⵍⴰ ⵏ ⵜⵙⵓⵜⵍⵜ ⵜⵉⵙ ⴽⵕⴰⴹⵜ ⵏ ⵓⵙⴳⵔⴰⵡⴰ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏⵏⵉ ⵔⴰⴷ ⵉⵜⵜⵓⵙⵏⵎⴰⵍⴰ ⴳ ⵜⴰⵎⴰⵥⵓⵏⵜ ⵏ ⵍⴰⵕⵊⵓⵏⵜⵉⵏ, ⴱⵢⵓⵏⵉⵙ ⴰⵢⵕⵉⵚ, ⴳ ⵡⴰⵢⵢⵓⵔ ⵏ ⵎⴰⵕⵚ 2023. ⵔⴰⴷ ⴷⵔⵓⵏ ⴳ ⵓⵙⴳⵔⴰⵡ ⴰⴷ, ⵏⵏⵉ ⵔⴰⴷ ⵉⵜⵜⵓⵙⵏⵎⴰⵍⴰ ⴳ ⵙⵉⵏ ⵡⵓⵙⵙⴰⵏ, ⵉⵎⴳⴳⴰⵢⵏ ⵉⵎⵔⵙⴰⵍⵏ ⴷ ⵉⵎⵓⵣⴰⵢⵏ ⴷ ⵉⴽⴰⴷⵉⵎⵉⵢⵏ ⴷ ⵉⴳⵏⵙⴰⵙ ⵏ ⵜⵎⴰⴷⴷⴰⵙⵉⵏ ⵜⵉⵏⴰⵎⵓⵔⵉⵏ ⴷ ⵜⴳⵔⴰⵖⵍⴰⵏⵉⵏ ⵙⵡⵓⵔⵉⵏⵉⵏ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵍⵓⵎⵎⵏ ⵜⵉⵎⵜⵜⴰ ⵉⵎⵓⵏⵏ ⴷ ⵜⵎⵓⵏⵉ ⵏ ⵉⴼⵔⵉⵇⵢⴰ ⴷ ⵎⴰⵔⵉⴽⴰⵏ ⵜⴰⵍⴰⵜⵉⵏⵉⵜ, ⵃⵎⴰ ⴰⴷ ⵎⵙⴳⴷⴰⵍⵏ ⵜⵉⵣⵣⵉⴳⵣⵉⵏ ⵜⵉⴽⵙⵡⴰⵜⵉⵏ ⴷ ⵉⵏⴰⵥⴰⵕⵏ ⵉⵣⵔⴼⴰⵏⵏ ⴷ ⵢⵓⴳⴳⴰⵏ ⵏⵏⵉ ⵉⵣⴷⵉⵏ ⵙ ⵜⵎⵙⴰⵔⵉⵏ ⵏ “ⴰⵙⵏⴼⵍ ⵏ ⵓⵏⵣⵡⵉ”, “ⵜⴰⵣⵔⴼⵜ ⵏ ⵓⵎⵓⵜⵜⵓ ⴷ ⵜⵎⴽⵜⵉⵜ” ⴷ “ⵜⵎⵣⵡⴰⴳⵜ ⴷ ⵓⵎⵓⵜⵜⵉ ⴰⵏⴼⴳⴰⵏ”. ⵔⴰⵏ ⴰⴷ ⴱⴹⵓⵏ ⵓⴳⴳⴰⵔ ⵏ 300 ⵏ ⵜⵎⴷⵔⴰⵡⵉⵏ ⴷ ⵓⵎⴷⵔⴰⵡⵏ ⵏ ⵜⵏⴰⵎⵣⴰⵖⵉⵏ ⴷ ⵉⵏⴰⵎⵣⴰⵖⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⴷⴷⴰⵏ ⵙⴳ 50 ⵏ ⵓⵡⴰⵏⴽ, ⵜⵉⵔⵎⵉⵜⵉⵏ ⴷ ⵜⵎⵙⴽⵔⵉⵏ ⵜⵉⵎⵓⴼⴰⵢⵉⵏ, ⵏⵏⵉ ⵔⴰⴷ ⵉⴼⴼⵖ ⵙ ⵉⵙⵖⵍⴰⴼ ⴷ ⵜⵙⵓⵎⵔⵉⵏ ⴷ ⵜⵙⵏⵜⴰⵢⵉⵏ ⵜⵉⵎⵢⴰⴳⴰⵏⵉⵏ ⵕⵡⴰⵏⵉⵏ, ⵔⴰⴷ ⴳⵏ ⵜⴰⴷⴰⵙⵉⵍⵜ ⵏ ⵓⵏⵄⴰⵕ ⴰⴳⵔⴰⵖⵍⴰⵏ ⵉⵜⵜⵓⵙⵎⴰⵢⵏⵓⵏ ⵉⵙⴽⴰⵔⵏ ⵙⴳ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵔⵙⵏ ⴰⵙⵏⵜⵉ ⴷ ⵓⵎⵔⵏⵓ ⴷ ⵓⵡⵜⵜⴰⵙ, ⵉⵙⵖⵍⴰⴼ ⴰⴷ ⵔⴰⴷ ⵜⵜⵓⵙⵎⵏⵉⴷⵏ ⴳ ⵜⵙⵓⵜⵍⵜ ⵜⵉⵙ ⴽⵕⴰⴹⵜ ⵏ ⵓⵙⴳⵔⴰⵡ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏ ⵍⴰⵕⵊⵓⵏⵜⵉⵏ. “ ⵓⵔ ⵉⴳⵉ ⵓⵏⵎⵓⵇⵇⴰⵔ ⴰⴷ ⴷⴰⵢ ⴰⵣⵎⵣ ⵏ ⵓⵙⵙⵉⴷⴷ ⵅⴼ ⵜⵎⵙⴰⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵉⵡⵍ ⵅⴼ ⵜⵎⵏⵜⵉⵍⵉⵏ ⵜⵉⴷⵙⵍⴰⵏⵉⵏ ⵏ ⵉⵏⴰⵥⴰⵕⵏ ⵣⵔⵔⵉⵏⵉⵏ ⵜⵉⵎⵓⵔⵉⵏ ⴷ ⵉⵙⴷⵉⴷⴷⵉⵢⵏ ⴷ ⵢⵓⴳⴳⴰⵏ, ⵎⴰⵛ ⵉⴳⴰ ⴰⵡⴷ ⴰⵙⴳⵔⴰⵡ ⵙⴳ ⵏⵙⵡⵓⵜⵜⵙ ⴰⴷ ⵏⴰⵡⴹ ⵜⵉⵙⵏⵜⴰⵢ ⵜⵉⵎⵢⴰⴳⴰⵏⵉⵏ ⵕⵡⴰⵏⵉⵏ ⴷ ⵓⴼⵓⵖ ⵙ ⵉⵙⵖⵍⴰⴼ ⵏⵏⵉ ⵔⴰⴷ ⵏⵙⵎⵏⵉⴷ ⵉ ⵓⵙⴳⵔⴰⵡ ⴰⵎⴰⴹⵍⴰⵏ ⵡⵉⵙ ⴽⵕⴰⴹ ⴳ ⵍⴰⵕⵊⵓⵏⵜⵉⵏ”. ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⴰⵎⵓ ⴳ ⵓⵖⴰⵡⴰⵙ ⵏ ⵓⵙⴳⵔⴰⵡ ⴰⴷ ⴰⴳⵔⴰⵖⵍⴰⵏ ⵢⴰⵜ ⵜⵖⵉⵎⵉⵜ ⵜⴰⵎⴰⵜⴰⵢⵜ ⵏⵏⵉ ⵖ ⵔⴰⴷ ⵜⵜⵓⵙⵎⵏⵉⴷⵏⵜ ⵜⵣⵣⵉⴳⵣⵉⵏ ⴷ ⵉⵏⴰⵥⴰⵕⵏ ⴷ ⵢⵓⴳⴳⴰⵏ ⵣⴷⵉⵏⵉⵏ ⵙ ⵜⵎⵙⴰⵔⵉⵏ ⵏ “ⵜⵣⵔⴼⵜ ⵏ ⵓⵎⵓⵜⵜⵓ ⴷ ⵜⵎⴽⵜⵉⵜ”, “ⴰⵙⵏⴼⵍ ⵏ ⵓⵏⵣⵡⵉ” ⴷ “ⵜⵎⵣⵡⴰⴳⵜ ⴷ ⵓⵎⵓⵜⵜⵉ ⴰⵏⴼⴳⴰⵏ”. ⴹⴼⵓⵕⵏⵜ ⵜⵜ ⵉⴷ ⴽⵕⴰⴹⵜ ⵜⵖⵉⵎⵉⵜⵉⵏ ⵜⵉⵙⴳⵓⵎⴰⵏⵉⵏ ⵏⵏⵉ ⵔⴰⴷ ⵉⵙⴼⵙⵉ ⵜⵉⵎⵙⴰⵔⵉⵏ ⴰⴷ ⵙ ⵉⴼⵙⵔⴰⵏ ⵏ ⵓⵙⵎⵏⵉⴷ ⵏ ⵉⵎⴳⴳⴰⵢⵏ ⵉⵣⵔⴼⴰⵏⵏ ⵎⵇⵇⵓⵔⵏⵉⵏ ⴳ ⵜⵓⴳⵜ ⵏ ⵜⵎⵉⵣⴰⵔ ⵏ ⵓⵎⴰⴹⴰⵍ. ⵔⴰⴷ ⵉⴳ ⵓⵙⴳⵔⴰⵡ ⴰⴷ ⵜⴰⵎⵍⴷⴰ ⵏⵏⵉ ⵖ ⵔⴰⴷ ⵜⵜⵓⵙⵎⵖⵔⵏ (6) ⵚⴹⵉⵚ ⵏ ⵓⴷⵎⴰⵡⵏ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ ⵎⵇⵇⵓⵔⵏ, ⵜⵜⵡⴰⵙⵙⵏⵏⵉⵏ ⵙ ⵜⵖⵏⵙⴰ ⵏⵏⵙⵏ ⴷ ⵜⵏⴼⴽⴰⵢⵜ ⵏⵏⵙⵏ ⴳ ⵢⵉⴳⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵔⵙⵏ. ⵔⴰⴷ ⴷⵔⵓⵏ ⴳ ⵓⵕⵥⵥⵓⵎ ⵏ ⵜⵡⵓⵔⵉⵡⵉⵏ ⵏ ⵓⵏⵎⵓⵇⵇⴰⵔ ⴰⴷ ⴰⵎⴰⴹⵍⴰⵏ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ; ⵎⴰⵙⵙ ⵏⴰⵚⵕ ⴱⵓⵕⵉⵟⴰ, ⴰⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴼⵔⵉⵇⵉ ⴷ ⵉⵎⵖⵔⵉⴱⵉⵢⵏ ⵉⵣⴷⵖⵏ ⴳ ⵜⵎⵉⵣⴰⵔ ⵏ ⴱⵕⵕⴰ ; ⵎⴰⵙⵙ ⵙⴰⵏⵜⵢⴰⴳⵓ ⴽⴰⴼⵢⵉⵕⵓ, ⴰⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ, ⵏ ⵜⵙⴱⴱⴰⴱⵜ ⵜⴰⴳⵔⴰⵖⵍⴰⵏⵜ ⴷ ⵓⵙⴳⴷ ⵏ ⵍⴰⵕⵊⵓⵏⵜⵉⵏ ; ⴼⵉⵔⵏⴰⵏⴷⴰ ⵊⵉⵍ ⵍⵓⵥⴰⵏⵓ, ⵜⴰⵏⵎⵀⴰⵍⵜ ⵜⴰⵎⵣⵣⴳⴰⵔⵜ ⵏ ⵡⴰⵎⵎⴰⵙ ⴰⴳⵔⴰⵖⵍⴰⵏ ⵏ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ -ⵍⵢⵓⵏⵉⵙⴽⵓ, ⵍⴰⵕⵊⵓⵏⵜⵉⵏ. ⴰⵙⵖⵓⵏ ⵏ ⵓⵙⵉⵜ ⴰⵍⵉⴽⵟⵕⵓⵏⵉ ⵉⵥⵍⵉⵏ ⵙ ⵓⵏⵎⵓⵇⵇⴰⵔ ⴰⵎⴰⴹⵍⴰⵏ ⵏ ⵕⵕⴱⴰⵟ ⵉ ⵉⵣⵔⴼⴰⵏ ⵏ ⵓⴼⴳⴰⵏ : (www.rabatpreforumintldh.cndh.ma/ma) ⵉ ⵓⵎⵢⴰⵡⴰⴹ : 06 62 76 32 44