ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵓⵎⵢⴰⵡⴰⵙ ⴰⴽⴷ ⵜⵎⵚⵕⵉⵢⵜ ⵜⴰⴳⵔⴰⵖⵍⴰⵏⵜ ⵏ ⵉⵄⵔⵔⵉⵎⵏ ⴳ ⵕⵕⴱⴰⵟ (JCI RABAT), ⵜⴰⵙⵓⵜⵍⵜ ⵏⵏⵙ ⵜⵉⵙⵙ ⴽⴽⵓⵥⵜ ⵏ ⵓⵙⵎⵓⵜⵜⴳ ⴳ ⵓⵙⴰⵜⵉ ⵏ ⵜⵙⵓⵡⴰⵔ ⵏ ⵓⵙⵎⵓⵜⵜⴳ "ⵙⴰⵡⵍⴰⵜ ⴰⵖ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ!"

ⵜⴳⴰ ⵜⵙⴰⵡⵔⵜ ⴰⴷ, ⵍⵍⵉ ⵜⵙⵙⵓⵜⵉⵢ ⵎⴰⵙⵙⴰ ⵓⵖⵉⵍⵉ ⵉⵕⴰⵏⵉ, ⵜⴰⵏⵙⵙⵉⵅⴼⵜ ⵏ ⵜⵣⵓⵏⵉ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵉⴱⵕⵕⴰⵏⵉⵢⵏ ⴳ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵣⵎⵣⵣⵓ ⵉ ⵉⵎⴷⵔⴰⵡⵏ ⴰⴼⴰⴷ ⴰⴷ ⵉⵙⴰⵏⵏ ⵉⵔⵎⵎⵓⵙⵏ ⵉⴷⵙⵍⴰⵏⵏ ⵉⵣⴷⵉⵏ ⵙ ⵜⵎⵣⵡⴰⴳⵜ, ⴷ ⵉⵏⴰⵡⴰⵢⵏ ⵉⴳⵔⴰⵖⵍⴰⵏⵏ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵜⵎⵣⵡⴰⴳⵜ ⴷ ⵓⵎⵏⴰⴹ ⴰⵏⴰⵎⵓⵔ ⵉⵣⴷⵉⵏ ⵙ ⵜⵎⵣⵡⴰⴳⵜ ⴳ ⵍⵎⵖⵔⵉⴱ.

ⵎⴽⴷⴰ ⵜⵙⵙⵏ ⵜⵙⵓⵜⵍⵜ ⴰⴷ ⴰⵙⵙⵉⴷⴷ ⵅⴼ ⵜⵉⵍⴰⵍⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵡⵓⵔⵉⵡⵉⵏ ⵏⵏⵙ ⴳ ⵢⵉⴳⵔ ⵏ ⵜⵎⵣⵡⴰⴳⵜ. ⵢⵓⴷⵊⴰ ⵓⵎⴹⴰⴽⴰⵕ ⴰⴷ ⵉⵎⴷⵔⴰⵡⵏ ⴰⴷ ⴰⵎⵥⵏ ⵉⵎⴰⵙⵙⵏ ⵍⵍⵉ ⵜⵏ ⵉⵜⵜⴰⴷⵊⴰⵏ ⴰⴷ ⵔⵎⵙⵏ ⵓⴳⴳⴰⵔ ⵜⵉⵏⵥⴰⵕ ⵜⵉⵜⵔⴰⵔⵉⵏ ⵉⵣⴷⵉⵏ ⵙ ⵉⵣⵔⴼⴰⵏ ⵏ ⵉⵎⵣⵡⴰⴳⵏ.

ⴰⴷ ⵏⵙⴽⵜⵉ ⵎⴰⵙ ⵙⵡⴰⵜⵜⵙⵏⵜ ⵜⵙⵓⵡⴰⵔ ⴰⴷ ⵏ ⵓⵙⵎⵓⵜⵜⴳ ⴰⴷ ⵙⵎⵖⵔⵏⵜ ⵜⵉⵣⵎⵎⴰⵔ ⴷ ⵜⵓⵙⵙⵏⴰ ⵏ ⵉⵄⵔⵔⵉⵎⵏ ⴷⵔⵓⵏⵉⵏ ⴳ ⵎⴰⴷ ⵉⵥⵍⵉⵏ ⵙ ⵉⵔⵎⵎⵓⵙⵏ ⵉⴷⵙⵍⴰⵏⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴼⵔⴽ ⵏⵏⵙ ⵙ ⵉⵎⵙⵓⵔⴰⵙ ⴷ ⵜⵏⵥⴰⵕ ⵉⵣⴷⵉⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⵎⴽⴷⴰ ⵙ ⵜⵜⵡⴰⵙⵙⴰⵏⵏ ⴳ ⵓⵙⵡⵉⵔ ⴰⵖⵣⵓⵔⴰⵏ.

ⴰⵎⵓⵏⵜ ⵜⵙⵓⵡⴰⵔ ⴰⴷ ⵏ ⵓⵙⵎⵓⵜⵜⴳ, ⵍⵍⵉ ⵔⴰⴷ ⵉⵜⵜⵓⵙⵏⵎⴰⵍⴰ ⴽⵓ ⴰⵙⵙ ⵏ ⵓⴽⵡⴰⵙ ⴰⵔ 7 ⵏⵓⵡⴰⵏⴱⵉⵔ 2024, ⴳ ⵓⵙⴰⵜⵉ ⵏ ⵢⴰⵏ ⵓⵙⵏⵜⵉ ⵉⵛⵛⴰⵔⵏ ⵉⵏⴳⵔ ⵓⵙⵇⵇⵉⵎ ⴷ ⵜⵎⵙⵎⵓⵏⵜ ⵏ "ⵜⵎⵚⵕⵉⵢⵜ ⵜⴰⵄⵔⵔⵉⵎⵜ ⵜⴰⴳⵔⴰⵖⵍⴰⵏⵜ ⴳ ⵕⵕⴱⴰⵟ", ⵙⵡⴰⵜⵜⵙⵏ ⵉⵔⵉⵎ ⵏ ⵉⵄⵔⵔⵉⵎⵏ ⴳ ⵢⵉⴳⵔ ⵏ ⵓⵎⵣⴰⵖ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵎⵓⵜⵜⴳ ⵏⵏⵙⵏ ⵙ ⵉⵎⴰⵙⵙⵏ ⵉⵏⴱⵣⴰⵣⵏ ⴰⴼⴰⴷ ⴰⴷ ⴳⵉⵏ ⵉⵎⵙⴽⴰⵔⵏ ⵉⵎⵙⵙⵓⵖⵏⵏ ⴳ ⵡⴰⵎⵓⵏ ⵓⵖⵔⵉⵎ.