ⵉⵙⵓⵍ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷⴰ ⵉⵙⴽⴰⵔ ⴰⵙⵎⵓⵙⵙⵓ ⵏⵏⵙ ⴰⴼⵔⴳⴰⵏ ⴷ ⵓⵣⵔⴼⴰⵏ ⵉ ⵜⵉⵔⵎⵉⵜⵉⵏ ⵏ ⵓⵣⵔⴰⵢ ⵉⴳⴳⵓⵜⵏ ⴷ ⵉⵜⵜⵡⴰⵍⴰⵙⵏ ⴳ ⵓⵙⵡⵉⵔ ⵏ ⵜⵎⵏⴱⴰⴹⵜ ⵏ ⵍⵎⴹⵢⵇ-ⵍⴼⵏⵉⴷⵇ ⴷ ⵎⴰⵕⵕⴰ ⵜⵉⵙⴳⴳⵯⵉⵏ ⴷ ⵜⵎⵓⴽⵔⵉⵙⵉⵏ ⵙⵉⵔⵙⵏⵜ ⵉⵣⴷⵉⵏ  ⵏⵉⵖ ⵜⵉⴷⴰ ⵙ ⵙⵢⴰⴼⴰⵏⵜ.

ⴳ ⵓⵎⵏⴰⴹ ⴰⴷ, ⴷ ⴳ ⵓⵙⵉⴷⴷ ⵅⴼ ⵓⵎⵍⴰⵏ ⵉⵜⵜⵓⵙⵎⵓⵏⵏ ⴰⵔ ⵖⵉⵍⴰⴷ, ⵉⵖ ⵉⴳⴰ ⵙⴳ ⵓⴹⴼⴼⵉⵕ ⵏ ⵉⵥⵟⵟⴰⵜⵏ ⵏ ⵓⵎⵢⴰⵡⴰⴹ ⴰⵏⴰⵎⵓⵏ ⵏⵖⴷ ⵙⴳ ⵜⴹⴼⵕⵉ ⵖ ⵓⴱⴰⵔⴰⵣ, ⵏⵏⴰ ⵜⵙⴽⴰⵔ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏ ⵟⴰⵏⵊⴰ-ⵜⵉⵟⵡⴰⵏ ⵍⵃⵓⵙⵉⵎⴰ, ⴳ ⵎⴰⴷ ⵉⵥⵍⵉⵏ ⵙ ⵜⵉⵔⵎⵉⵜⵉⵏ ⴳⴳⵓⵜⵏⵉⵏ ⴷ ⵜⵜⵡⴰⵍⴰⵙⵏⵉⵏ ⵏ ⵓⵣⵔⴰⵢ, ⵙⵍⴰⵡⴰⵏ ⴰⴽⴽⵯ ⴳ ⵡⴰⵙⵙ ⵏ 15 ⵛⵓⵜⴰⵏⴱⵉⵔ ⴳ ⵍⴼⵏⵉⴷⵇ, ⵜⵙⵏⵎⴰⵍⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵢⴰⵜ ⵜⵙⵎⵓⵏⵉ ⴷ ⵜⵔⵓⴱⴱⴰ ⵥⵍⵉⵏⵉⵏ ⵏ ⵓⵙⵇⵇⵉⵎ, ⴳ ⵡⴰⵙⵙ ⵏ ⵓⴽⵕⴰⵙ 18 ⵛⵓⵜⴰⵏⴱⵉⵔ, ⴳ ⵓⵙⵖⵉⵎ ⴰⵏⴰⵎⵎⴰⵙ ⵏ ⵜⵎⵔⵙⵍⵜ ⴳ ⵕⵕⴱⴰⵟ. ⴷⴼⴼⵉⵔ ⵏ ⵓⵎⵔⴰⵔⴰ ⵏ ⵡⴰⵡⴰⵍ ⵅⴼ ⵜⵏⴰⴼⵓⵜⵉⵏ ⵜⵉⵎⵣⵡⵓⵔⴰ ⵏ ⵜⴹⴼⵕⵉ ⴷ ⵓⴹⴼⴼⵉⵕ ⵏⵏⴰ ⵉⵙⴽⵔ ⵓⵙⵇⵇⵉⵎ ⴷ ⵜⵙⵇⵇⵉⵎⵜ ⵏⵏⵙ ⵜⴰⵏⵎⵏⴰⴹⵜ, ⴷ ⴳ ⵓⵙⴰⵜⵉ ⵏ ⵓⴳⴳⴰⵏⵏⴰ ⵏ ⵜⵢⴰⴼⵓⵜⵉⵏ ⵏ ⵓⵔⵣⵣⵓ ⴰⵏⴱⴽⴰⴹ ⵉⵕⵥⵎⵏ ⴷⴷⴰⵡ ⵏ ⵡⵓⵜⵓⵢ ⵏ ⵜⵏⵙⵙⵉⵅⴼⵜ ⵏ ⵜⵎⵓⵔⴰⵢⵜ ⵜⴰⵎⴰⵜⴰⵢⵜ ⴳ ⵜⵙⵏⴱⴹⴰⵢⵜ ⵏ ⵡⴰⵍⴰⵙ ⵏ ⵜⵉⵟⵡⴰⵏ, ⵅⴼ ⴽⵔⴰ ⵏ ⵉⵎⵊⵕⵉⵜⵏ ⴷ ⵜⵡⵍⴰⴼⵉⵏ ⵏⵏⴰ ⵉⵜⵜⵓⵙⴷⵉⵡⵍⵏ, ⴷ ⵓⵙⵓⵖⵏ ⵏ ⵓⵙⵙⵓⵎⵓ ⵏ ⵓⴼⵔⵉⴷⵏ ⴳⴰⵏⵉⵏ ⵉⵎⵏⵜⴰⵢⵏ ⵉⵎⵔⴷⴰⵢⵏ, ⵉⵜⵜⵡⴰⵖⵜⴰⵙ ⴷⴼⴼⵉⵔ ⵏ ⵜⵙⵎⵓⵏⵉ ⴰⴷ:

• ⴰⵙⵙⵓⵜⵔ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⵉ ⵉⴳⴰⵏ ⵉⵎⵉⵙ ⵏ ⵓⵙⵙⵓⵎⵓ ⴷ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙⴳ ⴽⵓⵍⵍⵓ ⵓⴳⴳⵉⴷⵏ, ⵉⵄⵔⵔⵉⵎⵏ ⵏⵖ ⴰⵣⵣⴰⵏⵏ, ⵏⵖ ⵉⵏⵙⵎⴰⴳⴰⵍⵏ ⵏ ⵉⵙⴽⴽⵉⵏⵏ ⵏⵏⵙⵏ, ⵏⵏⴰ ⵉⵥⴹⴰⵕⵏ ⴰⴷ ⴳⵏ ⴰⵙⵏⵜⵍ ⵏ ⴽⵔⴰ ⵏ ⵜⵕⵥⵉ ⵏ ⵢⴰⵏ ⵓⵣⵔⴼ ⵙⴳ ⵉⵣⵔⴼⴰⵏ ⵏⵏⵙⵏ, ⴰⴷ ⵎⵢⴰⵡⴰⴹⵏ ⴷ ⵓⵙⵇⵇⵉⵎ, ⴰⴼⴰⴷ ⴰⴷ ⵙⵔⵙⵏ ⵉⵜⵜⵓⵙⴼⴼⵍⴷ ⴳ ⵓⵎⵏⴰⴹ ⵏ ⵉⵔⵣⵣⵓⵜⵏ ⵏⵏⴰ ⵉⵙⵙⵏⵜⵉ ⴳ ⵓⵙⵡⵉⵔ ⴰⵏⴰⵎⵎⴰⵙ ⵏⵖ ⴳ ⵓⵙⵡⵉⵔ ⴰⵙⴳⴰⵡⴰⵏ.
  ⵃⵎⴰ ⴰⴷ ⵜⵎⵢⴰⵡⴰⴹⵎ ⴷ ⵓⵙⵇⵇⵉⵎ, ⵅⴼ ⵎⴰⵢⴰ:
  ⵜⴰⵙⴰⵡⴰⵢⵜ ⵜⴰⵍⵉⴽⵟⵕⵓⵏⵉⵜ: monitoring@cndh.org.ma
  ⵜⵉⵍⵉⴼⵓⵏ: 0537540033
• ⴰⵏⵏⴰⵍ ⵏ ⵜⵙⵇⵇⵉⵎⵜ ⵜⴰⵏⵎⵏⴰⴹⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵏ ⵟⴰⵏⵊⴰ-ⵜⵉⵟⵡⴰⵏ-ⵍⵃⵓⵙⵉⵎⴰ ⵙ ⵢⴰⵜ ⵜⵔⴰⴱⴱⵓⵜ ⵉⵙⵎⴷⵏ ⵉ ⵉⵏⵥⵉ ⵏ ⵓⵎⵚⴰⵕⴰⴹ ⵏ ⵓⴳⴳⵉⴷⵏ ⵉⵜⵜⵓⵙⵎⵏⵉⴷⵏ ⵅⴼ ⵜⵎⵓⵔⴰⵢⵜ ⵜⴰⵎⴰⵜⴰⵢⵜ, ⵜⵖⵜⵙ ⴰⴷ ⵜⵏ ⵜⴹⴼⵕ ⴳ ⵡⴰⴷⴷⴰⴷ ⵏ ⵢⵉⵎⵉⵥ.

ⵎⴽⴷⴰ ⵉⵣⴷⵉ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⴰⴹⴼⵕⵉ ⵏⵏⵙ ⵉ ⵓⵙⴰⵢⵔⴰⵔ ⴰⵎⵓⵟⵟⵓⵏ ⴷ ⵉⵙⵉⵜⵏ ⵏ ⵓⵎⵢⴰⵡⴰⴹ ⴰⵏⴰⵎⵓⵏ, ⵉⵖ ⵉⴳⴰ ⵎⴰⴷ ⵉⵥⵍⵉⵏ ⵙ ⵜⵉⵔⵎⵉⵜⵉⵏ ⵏ ⵓⵣⵔⴰⵢ ⵉⵣⵔⵉⵏ ⵏⵖ ⵜⵉⵔⵎⵉⵜⵉⵏ ⵜⵉⵎⴰⵢⵏⵓⵜⵉⵏ, ⵙⵍⴰⵡⴰⵏ ⴰⴽⴽⵯ ⴳ ⵓⵎⴰⵍⵓ ⵏ ⵓⴳⵓⴷⵉ ⵏ ⵓⵎⵍⴰⵏ ⵉⵜⵜⵓⵙⴷⵉⵡⵍⵏ, ⵏⵏⵉ ⵙ ⵉⵣⵎⵔ ⴽⵔⴰ ⴳⵉⵙⵏ ⴰⴷ ⵉⴳ ⵜⵉⴷⵜ, ⴷ ⴽⵔⴰ ⵢⴰⴹⵏⵉⵏ ⴰⴷ ⵓⵔ ⵉⴳ ⵓⵏⵖⵉⴷ, ⵏⵖ ⴰⴷ ⵉⴳ ⵜⴰⵣⴳⴰⵍⵜ ⵏⵖ ⵜⴰⴽⵏⴷⴰⵡⵜ.