ⴳⴰ ⵓⵣⵔⴼ ⴳ ⵜⵓⴷⵔⵜ ⵙⴳ ⵉⵣⵔⴼⴰⵏ ⵏ ⵓⴼⴳⴰⵏ ⴰⵜⵜⵓⵢⵏⵉⵏ, ⵉⴳ ⴰⵣⵔⴼ ⴰⴷⵙⵜⴰⵔ ⵉⴼⵔⴳ ⵜ ⵓⵙⵍⴳⵏ, ⴰⵛⴽⵓ ⵉⴳⴰ ⴰⵣⵔⴼ ⵏⵏⵉ ⵅⴼ ⵜⵜⵓⵚⴽⴰⵏ ⵉⵣⵔⴼⴰⵏ ⵢⴰⴹⵏ. ⵉⴹⴼⵕ ⵓⵙⵇⵇⵉⵎ ⵜⵉⴹⴰⴼ ⵏ ⵓⵙⵖⵍ ⵏ ⵓⵣⵔⴰⴽ ⵏ ⵓⵣⵔⴼ ⴰⴷ, ⴷ ⵡⴰⵔ ⵜⵉⵕⵥⵉ ⵏⵏⵙ ⵙ ⵎⴽⵏⵏⴰ ⵜⴳⴰ ⵜⵡⵉⵍⴰ ⵙⴳ ⵜⵡⵉⵍⴰⵜⵉⵏ, ⵏⵉⵖ ⵙ ⵜⵎⵏⵜⵉⵍⵜ ⵏⵏⴰ ⴽⴰ ⵉⵍⵍⴰⵏ, ⵙⵍⴰⵡⴰⵏ ⴰⴽⴽⵯ ⵙⴳ ⵓⴹⴼⴼⵓⵕ ⵏ ⵜⵎⵙⴰⵔⵉⵏ ⵏ ⵡⵉⴷ ⵅⴼ ⵜⴻⵜⵜⵓⵏⴱⴰⴹ ⵜⵎⵏⵖⵉⵡⵜ, ⴷ ⵜⵉⴹⴰⴼ ⵏ ⵡⴰⴷⴷⴰⴷⵏ ⵏ ⵓⵙⵍⴰⴳ ⵅⴼ ⵡⵓⵜⵛⵉ ⴷ ⵡⴰⴷⴷⴰⴷⵏ ⵏ ⵜⵎⵜⵜⴰⵏⵉⵏ ⴳ ⵉⴷⵖⴰⵔⵏ ⵏ ⵜⴼⴰⵜⵉⵜ ⵙⴳ ⵜⴷⵔⴼⵉ, ⴰⵔ ⵉⵙⵡⵓⵔⵉ ⵙ ⵜⵡⵉⵍⴰ ⵜⴰⵎⵖⴰⵡⵍⵜ ⴰⴷ ⵉⵙⵎⴽⵍ ⵜⵉⵏⵓⵔⵣⵉⵏ ⴷ ⵉⵙⵎⴰⵎⵎⵉⵢⵏ ⵏⵏⴰ ⵜ ⵉⴷ ⵉⵍⴽⴽⵎⵏ ⴳ ⵓⵎⵏⵉⴷ ⴰⴷ.
ⵜⴳⴰ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⵜⵉⵕⵥⵉ ⵉⵅⵛⵏⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵡⵓⴽⵓⵙ ⵏ ⵓⵣⵔⴼ ⴳ ⵜⵓⴷⵔⵜ ⵏⵏⴰ ⵉⴳⴰⵏ ⴰⵣⵔⴼ ⴰⵕⵚⵍⵉ ⴷ ⴰⵎⴰⴳⴷⴰⵣ ⵉ ⵜⵉⵍⵉⵜ ⵏ ⴽⵓ ⴰⴼⴳⴰⵏ, ⵙ ⵓⵢⴰ ⵉⴳⴰ ⵜⴰⴼⴰⴷⴰ ⵜⴰⴷⵙⵍⴰⵏⵜ ⵏ ⵜⵎⵙⴽⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵢⴰⴹⵏⵉⵏ, ⴳ ⵓⵎⵏⴰⴹ ⴰⴷ, ⵉⴽⴽⴰ ⵜⵜ ⵉⵏⵏ ⵓⵙⵇⵇⵉⵎ ⵉⵙⵎⵏⵉⴷ ⵜⴰⵎⵙⵙⴽⵜⵉⵜ ⵏⵏⵙ ⵉ ⵓⴱⵕⵍⴰⵎⴰⵏ ⴳ ⵎⴰⴷ ⵉⵥⵍⵉⵏ ⵙ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 10.16 ⵏⵏⴰ ⵔⴰⴷ ⵉⵙⵏⴼⵍ ⵉⵙⵎⴷ ⴰⵙⵍⴳⵏ ⴰⵏⴱⴽⴰⴹ, ⴳ ⵓⵙⴰⴽⵓⴷ ⵏ 28 ⴽⵟⵓⴱⵕ 2019, ⵏⵏⴰ ⴳ ⵉⵙⵖⵍⴼ ⵙ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ.
ⴰⵔ ⵉⵙⵡⵓⵔⵉ ⵓⵙⵇⵇⵉⵎ ⴷ ⵜⵙⵇⵇⵉⵎⵉⵏ ⵏⵏⵙ ⵜⵉⵏⵎⵏⴰⴹⵉⵏ ⵅⴼ ⵓⴹⴼⴼⵓⵕ ⵏ ⵉⵣⵔⴼⴰⵏ ⵏ ⵓⴳⴳⵉⴷⵏ ⵉⵜⵜⵓⵏⴱⴰⴹⵏ ⵙ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⴳ ⵉⵍⵍⴰ ⴰⵡⴷ ⵓⵙⵏⵎⴰⵍⴰ ⵏ ⵡⴰⵔⵣⴰⴼⵏ ⵉⵍⵓⴳⴰⵏⵏ ⵙ ⵖⴰⵔⵙⵏ, ⵉⴹⴼⵕ ⵓⵙⵇⵇⵉⵎ ⵓⵙⵎⵉⵍ ⴰⴷ ⵏ ⵉⵎⵖⵣⵓⵜⵏ ⵙ ⵓⵙⵏⵎⴰⵍⴰ ⵏ ⵡⴰⵔⵣⴰⴼ ⵙ ⵖⴰⵔⵙⵏ ⴷ ⵜⵉⴹⴰⴼ ⵏ ⵉⵙⵓⵔⵙⵏ ⵏⵏⵙⵏ ⵉⴷⵓⵙⴰⵏⵏ, ⵙⵍⴰⵡⴰⵏ ⴰⴽⴽⵯ ⴰⵙⵓⵔⵙ ⵏ ⵡⵉⴷ ⵢⵓⴹⵏⵏ ⵙ ⵜⵎⵓⴹⴰⵏ ⵓⵔ ⵉⵜⵜⵊⵊⵉⵏ (ⵡⵉⴷ ⵉⵜⵜⵖⵓⴷⴰⵏ), ⴷ ⵜⵎⵓⴹⴰⵏ ⵜⵉⵏⵢⵉⵎⴰⵏⵉⵏ ⴷ ⵜⵎⵏⵉⵍⵍⵉⵜⵉⵏ (ⵜⵉⵏ ⵓⵏⵓⴼⵍ), ⴷ ⵓⴹⴼⴼⵓⵕ ⵏⵏⵙⵏ ⴳ ⵜⴼⵔⴽⵜ ⵏ ⵓⵎⵚⵉⵕⵉⴹ, ⴷ ⵡⴰⵏⵏⴰⵍ ⵏ ⵡⵉⴷ ⵉⵍⵍⴰⵏ ⴳ ⵓⵙⵓⵔⵙ ⵉⴽⵓⴽⴹⵏ.
ⵉⴹⴼⵕ ⵓⵙⵇⵇⵉⵎ ⴰⵏⵄⴰⵕ ⵃⵎⴰ ⴰⴷ ⵉⵍⵖⴷ ⵜⴰⵏⴱⴰⴹⵜ ⵜⴰⵎⵖⵔⵉⴱⵉⵜ ⴰⴷ ⵜⵍⴽⵎ ⵉⵡⴰⵏⴽⵏ ⵏⵏⴰ ⵉⵙⵙⴰⵔⵏ ⵜⴰⵎⵔⵔⵓⵜ, ⵖ ⵓⵙⵍⴳⵏ ⵏⵉⵖ ⵜⵉⵎⵙⴽⵔⵜ, ⵏⵏⴰ ⵉⵍⴽⵎ ⵡⵓⵟⵟⵓⵏ ⵏⵏⵙⵏ ⵓⴳⴳⴰⵔ ⵏ ⵙⵏⴰⵜ ⵜⴽⵕⴰⴹⵉⵏ ⵏ ⵉⵡⴰⵏⴽⵏ (144 ⵏ ⵓⵡⴰⵏⴽ), ⵍⵍⵉⵖ ⴰⵔ ⵢⴰⵇⵇⵔⴰ ⵙ ⵓⵙⵜⴰⵢ ⵉⵚⴰⵃⴰⵏ ⵉ ⵜⵖⵜⴰⵙⵜ ⵏ ⵓⴳⵔⴰⵡ ⴰⵎⴰⵜⴰⵢ ⵏ ⵜⵎⵜⵜⴰ ⵉⵎⵓⵏⵏ ⵏⵏⴰ ⵔⴰⴷ ⵉⵙⴱⴷⴷ ⵜⴰⵡⵓⵔⵉ ⵙ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⵏⵏⴰ ⵔⴰⴷ ⴷ ⵉⴼⴼⵖ ⴳ ⴷⵓⵊⴰⵏⴱⵉⵔ 2024, ⴷ ⵜⵙⵖⵣⵏⵜ ⵏ ⵓⴱⵕⵓⵜⵓⴽⵓⵍ ⴰⵔⵓⵛⵛⵓⵍ ⵡⵉⵙ ⵙⵉⵏ ⵏ ⵓⵎⵉⵔⵓ ⴰⴳⵔⴰⵖⵍⴰⵏ ⵉⵥⵍⵉⵏ ⵙ ⵉⵣⵔⴼⴰⵏ ⵓⵖⵔⵉⵎⵏ ⴷ ⵉⵙⵔⵜⴰⵏⵏ ⵉⵙⵡⵓⵜⵜⵙⵏ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ.
ⴳ ⵓⵎⵏⵉⴷ ⴰⴷ, ⴷⴰ ⵉⵜⵜⵣⵎⵎⵉⵎ ⵓⵙⵇⵇⵉⵎ ⵎⴰⵙ ⴷ 90 ⵏ ⵓⵡⴰⵏⴽ ⵉⵙⵖⵣⵏ ⴰⴱⵕⵓⵜⵓⴽⵓⵍ ⴰⵔⵓⵛⵛⵉⵍ ⵡⵉⵙ ⵙⵉⵏ ⴰⵎⴹⴼⴰⵕ ⵙ ⵓⵎⵉⵔⵓ ⴰⴳⵔⴰⵖⵍⴰⵏ ⵉⵥⵍⵉⵏ ⵙ ⵉⵣⵔⴼⴰⵏ ⵓⵖⵔⵉⵎⵏ ⴷ ⵉⵙⵔⵜⴰⵏⵏ ⵉⵙⵡⵓⵜⵜⵙⵏ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⵙ ⵎⴽⵍⵍⵉ ⵙⵙⴰⵔⵏ ⵏⵉⵖ ⵙⵙⵓⵖⵏⵏ ⵙ ⵓⵙⴱⵉⴷⴷ ⵏ ⵓⵣⵣⴳⵉⵔ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⵙ ⵜⵡⵉⵍⴰ ⵜⴰⵔⵓⵛⵛⵉⵍⵜ 33 ⵏ ⵓⵡⴰⵏⴽ ⵙⴳ 57 ⵏ ⵓⵡⴰⵏⴽ ⴰⴳⵎⴰⵎ ⵏ ⵜⵎⴰⴷⴷⴰⵙⵜ ⵏ ⵓⵎⵢⴰⵡⴰⵙ ⵓⵙⵍⵉⵎ. ⴰⵔ ⵉⵜⵜⵙⵏⵏⴰⴷ ⵓⵙⵇⵇⵉⵎ ⴳ ⵓⵏⵄⴰⵕ ⵏⵏⵙ ⵅⴼ ⵓⵙⵙⵕⵚⵓ ⴰⴷⵙⵜⴰⵔ ⵏ ⵓⵣⵔⴼ ⴳ ⵜⵓⴷⵔⵜ ⵉⵜⵜⵢⴰⵡⴱⴷⴰⵔⵏ ⴳ ⵓⵎⴰⴳⵔⴰⴷ 20 ⵙⴳ ⵓⴷⵓⵙⵜⵓⵔ ⵏ 2011, ⴷ ⵜⵓⴳⵜ ⵏ ⵜⵎⵔⵉⵙⵉⵏ ⵜⵉⴳⵔⴰⵖⵍⴰⵏⵉⵏ ⵏ ⵜⵎⴰⵣⵉⵔⵜ ⵏⵏⵖ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵜⵎⵔⵏⵉⵡⵜ ⵏ ⵡⴰⵔ ⵜⵉⵍⵉⵜ ⵏ ⵢⴰⵏ ⵡⴰⵏⵥⴰ ⴰⴽⵎⴰⵎ ⵅⴼ ⴽⵔⴰⵢⴳⴰⵜ ⵉⴹⵉⵚ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⵅⴼ ⵓⵙⵙⵉⴷⵔⵓⵙ ⵏ ⵉⵙⵡⵉⵔⵏ ⵏ ⵓⴱⴽⴽⵉⴹ.
ⵉⵙⴷⴷⵉⴷ ⵓⵙⵇⵇⵉⵎ ⴰⵎⵏⴰⴷ ⵏⵏⵙ ⵉⴷⵓⵙⵏ ⵎⴳⴰⵍ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⵉⵏⵏⴰⵍⵏ ⵅⴼ ⵉⵙⴼⴽⴰ ⵉⵏⵉⵍⴰⵡⵏ ⴷ ⵓⵙⴼⵙⵉ ⴰⵎⵏⵍⵍⵉ ⴷ ⵜⵎⵢⴰⴷⴰⵙⵜ ⵜⴰⵙⵎⵣⴰⵣⴰⵍⵜ ⵉⵜⵜⵙⴷⴷⵉⴷⵏ ⴰⴽⴽⵯ ⵅⴼ ⵎⴰⵙ ⴷ ⵜⴱⴷⴷ ⵜⴰⵎⵏⵖⵉⵡⵜ ⵅⴼ ⵓⵔⵎⵎⵓⵙ ⵏ ⵜⵉⵖⴰⵡⵜ ⴳ ⵓⴷⵖⴰⵔ ⵏ ⵓⵙⴳⴳⴷ ⴷ ⵓⵙⵉⴷⴼ, ⵎⴽⵍⵍⵉ ⵜⴳⴰ ⵜⵓⵙⵙⵔⴰ ⵏ ⵜⵎⵔⵔⵓⵜ ⴰⴷ ⵢⴰⵏ ⵓⵏⴱⵣⴰⵣ ⴰⴽⵙⵡⴰⵜ ⵍⵍⵉⵖ ⵜⴳⴰ ⵜⵉⵔⵙⵍⵜ ⵜⵓⵍⴳⵉⵏⵜ ⴷ ⵜⵏⴱⴽⴰⴹⵜ ⵏ ⵓⵡⴰⵏⴽ ⵉⵙⵙⵓⵖⵏⵏ ⵙ ⵉⵎⵏⵣⴰⵢⵏ ⴷ ⵉⵏⴰⵡⴰⵢⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⵢⴰⵖⵓⵍ ⵍⵎⵖⵔⵉⴱ ⵓⵔ ⴰⵔ ⵙⵓⵍ ⵙⵉⵙ ⵉⵙⴽⴰⵔ ⵙⴳ ⵎⴰⴷ ⵉⴳⴰⵏ ⵜⴰⴽⵕⴰⴹⵜ ⵏ ⵜⴰⵙⵓⵜ, ⵉⴷⴷⵖ ⵓⵔ ⵙⵓⵍ ⴷⴰ ⵜⵜⵎⵓⵏ ⴰⴽⴷ ⵜⴼⵍⵙⴰⴼⵜ ⵏ ⵜⵎⵔⵔⵓⵜ ⴳ ⵓⵣⵎⵣ ⵏⵏⵖ ⵖⵉⵍⴰⴷ.
ⵜⵉⵎⵉⵔⵉⵏ
