ⵉⵍⴽⵎ ⵓⵟⵟⵓⵏ ⵏ ⵡⵉⵏⵏⴰ ⵉⵜⵜⵡⴰⵏⴱⴰⴹⵏ ⵙ ⵜⵎⵏⵖⵉⵡⵜ 83 ⵏ ⵓⵎⵏⴽⴰⴹ ⴰⵔ ⵜⴳⵉⵔⴰ ⵏ ⵓⵙⴳⴳⵯⴰⵙ ⵏ 2023, ⴳⵉⵙⵏ 81 ⵏ ⵓⵎⵏⴽⴰⴹ ⵜⵜⵡⴰⵏⴱⴰⴹⵏ ⵙ ⵉⴱⴹⵉⵢⵏ ⵉⵎⴳⴳⵓⵔⴰ,  ⴷ ⵙⵉⵏ ⵉⴱⴹⵉⵢⵏ ⵉⵎⵣⵡⵓⵔⴰ ⴼⴼⵓⵖⵏ ⴷ ⴳ 2023.

ⴷⴰ ⵉⵜⵜⴰⵏⵏⴰⵢ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵎⴰⵙ ⵉⴳⴰ ⵓⵣⵔⴼ ⴳ ⵜⵓⴷⵔⵜ ⴰⵎⵣⵡⴰⵔⵓ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⴰⵣⵔⴼ ⴰⴷⵙⵜⴰⵔ ⵉⴼⵔⴰⴳ ⵓⵙⵍⴳⵏ ⵉⴷⴷⵖ ⵉⴳⴰ ⴰⵣⵔⴼ ⵏⵏⴰ ⵅⴼ ⵜⵜⵓⵚⴽⴰⵏ ⴽⵓⵍⵍⵓ ⵉⵣⵔⴼⴰⵏ ⵢⴰⴹⵏⵉⵏ, ⵙ ⵓⵣⴷⴷⵓⵢ ⵙ ⵓⵎⴰⴳⵔⴰⴷ ⵡⵉⵙⵙ ⵙⵉⵏ ⵏ ⵓⴷⵓⵙⵜⵓⵔ. ⵉⵣⴷⵉ ⵓⵙⵇⵇⵉⵎ ⵜⵉⴹⴼⵕⵉ ⵏ ⵓⵔⵣⴰⴽ ⵏ ⵓⵣⵔⴼ ⴰⴷ, ⴷ ⵡⴰⵔ ⵜⵕⵥⵉ ⵏⵏⵙ ⵙ ⴽⵔⴰⵢⴳⴰⵜ ⵜⵡⵉⵍⴰ ⵏⵖ ⵙ ⴽⵔⴰⵢⴳⴰⵜ ⵜⵎⵏⵜⵉⵍⵜ, ⵙⵍⴰⵡⴰⵏ ⴰⴽⴽⴽⵯ ⵙ ⵓⴹⴼⴼⵓⵕ ⵏ ⵜⵎⵙⴰⵔⵉⵏ ⵏ ⵡⵉⵏⵏⴰ ⵉⵜⵜⵡⴰⵏⴱⴰⴹⵏ ⵙ ⵜⵎⵏⵖⵉⵡⵜ ⴷ ⵜⴹⴼⵕⵉ ⵏ ⵡⴰⴷⴷⴰⴷⵏ ⵏ ⵓⵙⵍⴰⴳ ⵅⴼ ⵡⵓⵜⵛⵉ ⴷ ⵡⴰⴷⴷⴰⴷⵏ ⵏ ⵜⵎⵜⵜⴰⵏⵜ ⴳ ⵉⴷⵖⴰⵔⵏ ⵏ ⵜⴼⴰⵜⵉⵜ ⵙⴳ ⵜⴷⵔⴼⵉ.

"ⵜⴰⵙⵓⵍⴰⵏⵜ ⵏ ⵓⵙⵙⵓⴼⵖ ⵏ ⵉⴱⴹⵉⵢⵏ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⵏⵏⵉ ⵢⵓⵡⴹⵏ 83 ⵏ ⵉⴱⴹⵉ ⵙⴳⵉⵙⵏ 81 ⵏ ⵉⴱⴹⵉ ⴳⴰⵏⵉⵏ ⵉⴱⴹⵉ ⴰⵎⴳⴳⴰⵔⵓ, ⵎⵇⵇⴰⵔ ⴷ ⵢⵉⵡⵉ ⵓⴷⵓⵙⵜⵓⵔ ⴰⵣⵔⴼ ⵏ ⵜⵓⴷⵔⵜ ⴷ ⵓⵣⵔⴼ ⵏ ⵡⴰⵔ ⵜⵕⵥⵉ ⵏ ⵜⵏⴼⵔⵓⵜ ⵏ ⵜⴼⴳⴳⴰ ⴷ ⵜⵡⵏⴳⵉⵎⵜ ⵉ ⴽⵔⴰⵢⴳⴰⵜ ⵓⴳⴳⵉⴷ, ⵏⵙⵙⵔⵇⴱ ⴰⵡⴷ ⵜⵏⴱⴰⴹⵜ ⴰⴷ ⵜⴰⵍⵙ ⵉⵥⵕⵉ ⵏⵏⵙ ⴳ ⵓⵎⵏⴰⴷ ⵏⵏⵙ ⵉⵣⴷⵉⵏ ⵙ ⴽⵔⴰ ⵏ ⵉⵙⵖⵍⴰⴼ ⵉⵜⵜⵢⴰⴳⵉⵏ ⵙ ⵉⵎⵉⴽ ⵏⵉⵖ ⵇⴰⵃ ⴰⵎ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴳ ⵓⵙⵍⴳⵏ ⴷ ⵜⵎⵙⴽⵔⵜ". ⵎⴰⵙⵙⴰ ⴰⵎⵉⵏⴰ ⴱⵓⵄⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ.

ⵉⵣⵎⵎⴻⵎ ⵓⵙⵇⵇⵉⵎ ⵜⴰⵙⵓⵍⴰⵏⵜ ⵏ ⵜⵏⴰⴱⴱⴰⵢⵜ ⵏ ⵜⴱⵔⵉⴷⵜ ⵉⴼⴰⵡⵏ ⵣⵖ ⴷⴰⵔ ⵜⵏⴱⴰⴹⵜ ⴷ ⵓⴱⵕⵍⴰⵎⴰⵏ ⵉ ⵓⵙⵏⵎⴰⵍⴰ ⵏ ⵓⵎⵙⴰⵡⴰⵍ ⴰⵏⴰⵎⵓⵔ ⵅⴼ ⵜⵓⵙⵙⵔⴰ ⵏ ⵜⵎⵔⵔⵓⵜ, ⵏⵏⵉ ⵉⴳⴰⵏ ⵜⴰⵎⵔⵉⵙⵜ ⴷ ⵉⴷⴷⴰⵏ ⴳ ⵓⵖⴰⵡⴰⵙ ⵏ ⵜⵡⵓⵔⵉ ⴰⵏⴰⵎⵓⵔ  ⴳ ⵢⵉⴳⵔ ⵏ ⵜⴷⵉⵎⵓⵇⵕⴰⵟⵉⵜ ⴷ ⵉⵣⵔⴼⴰⵏ ⵏ ⵓⴼⴳⴰⵏ 2018-2021 ⴷ ⵜⵎⵔⵉⵙⵜ ⵅⴼ ⵓⵎⵢⴰⵖ ⵏ ⵍⵎⵖⵔⵉⴱ ⴰⴽⴷ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⴰⵜⵉ ⵏ ⵓⵙⵎⵏⵉⴷ ⴰⵣⵎⵣⴰⵏ ⴰⵖⵣⵓⵔⴰ, ⵏⵏⵉ ⵙ ⵉⵙⵢⵢⵀ ⵉⵙⵖⵍⴰⴼ ⵏⵏⵉ ⴰⵙ ⵉⵇⵇⴰⵔⵏ ⵙ ⵓⵣⴷⴷⵓⵢ ⵏ ⵓⵎⵙⴰⵡⴰⵍ ⵅⴼ ⵜⵓⵙⵙⵔⴰ ⵏ ⵜⵎⵔⵔⵓⵜ ⴰⴷ. ⵢⴰⵡⵉ ⴷ ⵓⵙⵡⵓⴷⴷⵓ  365 ⵏ ⵓⵖⴰⵡⴰⵙ ⴰⵏⴰⵎⵓⵔ ⵏ ⵜⵡⵓⵔⵉ ⴳ ⵢⵉⴳⵔ ⵏ ⵜⴷⵉⵎⵓⵇⵕⴰⵟⵉⵜ ⴷ ⵉⵣⵔⴼⴰⵏ ⵏ ⵓⴼⴳⴰⵏ 2018-2021 ⵅⴼ « ⵜⴰⵙⵓⵍⴰⵏⵜ ⵏ ⵓⵎⵙⴰⵡⴰⵍ ⴰⵎⵓⵏⴰⵏ ⵅⴼ ⵜⵡⵎⴰⵏⵉⵜ ⵙ ⵓⴱⵕⵓⵟⵓⴽⵓⵍ ⴰⵔⵓⵛⵛⵉⵍ ⵡⵉⵙ ⵙⵉⵏ ⵏ ⵓⵎⵉⵔⵓ ⴰⴳⵔⴰⵖⵍⴰⵏ ⵏ ⵉⵣⵔⴼⴰⵏ ⵓⵖⵔⵉⵎⵏ ⴷ ⵉⵙⵔⵜⴰⵏⵏ ⵙⵡⵓⵜⵜⵙⵏⵉⵏ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ».

ⴷⴰ ⵉⵙⵎⵓⵙⵙⵓ ⵓⵙⵇⵇⵉⵎ ⴳ ⵓⵙⵡⵉⵔ ⴰⵏⴰⵎⵓⵔ ⴷ ⴰⵎⴰⴹⵍⴰⵏ ⴰⴼⴰⴷ ⴰⴷ ⵉⵜⵜⵓⵙⵏⴼⵍ ⵓⵙⵍⴳⵏ ⵏ ⵜⵎⵜⵜⴰⵏⵜ ⴳ ⵓⵙⵍⴳⵏ ⴷ ⵜⵎⵙⴽⵔⵜ, ⴰⵔ ⵉⵙⵡⵓⵔⵉ ⴰⴼⴰⴷ ⴰⴷ ⵉⵙⵎⵓⵙⵙⵓ ⵉⵎⵙⵜⴳⴳⴰⵔⵏ ⵉⵙⵔⵜⴰⵏⵏ ⴷ ⵜⴰⵏⵏⴰⵢⵜ ⵜⴰⴳⴷⵓⴷⴰⵏⵜ ⵅⴼ ⵓⵙⴱⴷⴷⵉ ⵏ ⵜⵎⵜⵜⴰⵏⵜ ⴳ ⵓⵙⵡⵉⵔ ⴰⵏⴰⵎⵓⵔ ⴷ ⴰⵎⴰⴹⵍⴰⵏ.
ⴳ ⵓⵙⴰⵜⵉ ⵏ ⵓⵙⴱⵉⴷⴷ ⵏ ⵜⵎⵜⵜⴰⵏⵜ, ⴰⵔ ⵉⵜⵜⵃⵟⵟⵓ ⵓⵙⵇⵇⵉⵎ ⵉⵣⵔⴼⴰⵏ ⵏ ⵎⴷⴷⵏ ⵉⵜⵜⵓⵥⵕⴳⵏ ⵙ ⵜⵎⵜⵜⴰⵏⵜ, ⴰⵔ ⵉⵜⵜⴹⴼⵕ ⴰⴷⴷⴰⴷ ⵏ ⵜⵔⴰⴱⴱⵓⵜ ⵏ ⵉⵎⵖⵔⴰⴱⵉⵢⵏ ⵙ ⵓⵙⵙⵉⵅⴼ ⵏ ⵜⵡⵓⵔⵉⵡⵉⵏ ⵏ ⵜⴷⵓⵙⵉ ⵏⵏⵙⵏ ⴷ ⵓⴹⴼⴰⵕ ⵏⵏⵙⵏ ⴳ ⵜⵡⵓⵔⵉⵡⵉⵏ ⵏ ⵜⵔⵎⵉⵜⵉⵏ ⵏⵏⵙⵏ, ⴷ ⵓⵙⴷⵓⵙ ⵏ ⵡⵉⵏⵏⴰ ⵉⵟⵟⴰⴼⵏ ⵜⵎⴰⴹⵓⵏⵉⵏ ⵜⵉⵙⵓⵍⴰⵏⵉⵏ ⵏⵖⴷ ⵜⵎⴰⴹⵓⵏⵉⵏ ⵜⵉⴷⵍⵙⴰⵏⵉⵏ ⴷ ⵜⵉⵡⵏⴳⵉⵎⵉⵏ, ⴷ ⵓⵙⵙⵉⴷⴼ ⵏ ⵡⵉⵏⵏⴰ ⵉⵟⵟⴰⴼⵏ ⵜⴰⵖⴰⵔⴰⵙⵜ ⵏ ⵜⴷⵓⵙⵉ.

ⵉⵙⵖⵍⴰⴼ ⵙ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴳ ⵓⵙⵍⴳⵏ ⴷ ⵜⵎⵙⴽⵔⵜ

ⴷⴰ ⵉⵙⵖⵍⴰⴼ ⵓⵙⵇⵇⵉⵎ ⴳ ⵎⴰⴷ ⵉⵥⵍⵉⵏ ⵙ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴰⵙⵖⵣⵏ ⵏ ⵢⴰⵜ ⵜⴱⵔⵉⴷⵜ ⵉⴼⴰⵡⵏ ⵏ ⵓⵕⵥⵥⵓⵎ ⵏ ⵓⵎⵙⴰⵡⴰⵍ ⴰⵏⴰⵎⵓⵔ ⵅⴼ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⵉⵙⴷⴷⵉⴷ ⵅⴼ ⵉⵙⵖⵍⴰⴼ ⵏⵏⵙ ⵉⵣⵡⵓⵔⵏ ⵉⵣⴷⵉⵏ ⵙ ⵎⴰⵢⴰ ⴷ :
- ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴳ ⵓⵙⵍⴳⵏ ⴷ ⵜⵎⵙⴽⵔⵜ;
- ⴰⵙⵜⴰⵢ ⵉⵚⴰⵃⴰⵏ ⵉ ⵜⵖⵜⴰⵙⵜ ⵏ ⵓⴳⵔⴰⵡ ⴰⵎⴰⵜⴰⵢ ⵏ ⵜⵎⵜⵜⴰ ⵉⵎⵓⵏⵏ ⵉⵏⴱⴹⵏ ⵙ ⵓⵙⴱⴷⴷⵉ ⵏ ⵜⵡⵓⵔⵉ ⵙ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⵏⵏⵉ ⵔⴰⴷ ⴷ ⵉⴼⴼⵖ ⴳ ⴷⵓⵊⴰⵏⴱⵉⵔ 2024.