ⵙ ⵜⵎⵍⴷⴰ ⵏ ⵡⴰⵙⵙ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵔ ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵢⴰⵏ ⵓⵙⴼⵙⵔ ⵏ ⵜⵡⵓⵔⵉⵡⵉⵏ ⵅⴼ ⵜⵓⵙⵙⵔⴰ ⵏ ⵜⵎⵏⵖⵉⵡⵜ ⵏⵏⴰ ⵜⵜⵓⴳⴰⵏⵉⵏ ⵙ ⵜⵎⵍⴷⴰ ⵏ ⵡⴰⵙⵙ ⴰⵎⴰⴹⵍⴰⵏ ⵏ ⵓⵙⴱⴷⴷⵉ ⵏ ⵜⵎⵏⵖⵉⵡⵜ, ⵙⴳ 10 ⴰⵔ 17 ⴷⵓⵊⴰⵏⴱⵉⵔ 2021 ⴳ ⵓⵖⴳⵯⵎⵎⵉ ⵏ ⵜⵥⵓⵕⵉ ⵏⵡⵉⴳⴰ. ⵜⵉⵡⵓⵔⵉⵡⵉⵏ ⴰⴷ ⵏⵏⴰ ⵉⵜⵜⵓⴳⴰⵏ ⴳ ⵓⵙⴰⵜⵉ ⵏ ⵜⵙⵓⵡⴰⵔ ⵜⵉⵏⴰⵥⵓⵕⵉⵏ ⵜⵜⵓⴳⴰⵏⵉⵏ ⵙ ⵜⵎⴷⵔⴰⵡⵜ ⴰⴽⴷ ⵉⵎⴳⴳⴰⵢⵏ ⵏ ⵜⵓⵙⵙⵔⴰ ⵙⴳ ⵡⴰⵎⵓⵏ ⵓⵖⵔⵉⵎ ⴷ ⵜⴽⴰⴷⵉⵎⵉⵜⵉⵏ ⵜⵉⵏⵎⵏⴰⴹⵉⵏ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⵏ ⵜⴳⵎⵎⵉ ⵜⵓⵎⵍⵉⵍⵜ (ⵙⵉⴷⵉ ⵍⴱⵕⵏⵓⵙⵉ) ⴷ ⵕⵕⴱⴰⵟ ⴷ ⵓⵍⴰ ⵜⵉⵏⵎⵍ ⵜⴰⵏⴰⴼⵍⵍⴰⵜ ⵏ ⵜⵥⵓⵕⵉⵡⵉⵏ ⴼⵓⵍⴽⵉⵏⵉⵏ ⴳ ⵜⴳⵎⵎⵉ ⵜⵓⵎⵍⵉⵍⵜ ⴷⴷⴰⵡ ⵓⵜⵓⵢ ⵏ ⵉⵏⴰⵥⵓⵕⵏ ⵢⵓⵙⴼ ⵙⴰⵄⴷⵓⵏ ⴷ ⵏⴰⵕⵊⵉⵙ ⵍⵊⵓⴱⴰⵕⵉ. ⵜⵜⵓⵙⵙⵉⴷⴼⵏⵜ ⵜⵡⵓⵔⵉⵡⵉⵏ ⵏ ⵓⵙⴼⵙⵔ ⴰⴷ ⴳ ⵢⴰⵏ ⵓⵖⴰⴽⴽⴰⴷ ⵏⵏⴰ ⵉⵙⵙⴼⴰⵡⵏ ⵜⵉⵔⵎⵉⵜ ⵜⴰⴱⴰⵖⵓⵔⵜ ⵢⵓⵙⵉⵏ ⴰⵏⴰⵔⵓⵣ ⵅⴼ ⵏ ⵜⵙⵓⵡⴰⵔ ⵏ ⵉⵡⵏⵏⵉⵜⵏ ⵉⵏⴰⵥⵓⵕⵏ ⵏⵏⴰ ⴳⴰⵏ ⵡⴰⵣⵣⴰⵏⵏ ⴷ ⵉⵄⵔⵔⵉⵎⵏ ⵅⴼ ⵜⵎⵙⵍⴰⵢⵜ ⵏ ⵓⵣⵔⴼ ⴳ ⵜⵓⴷⵔⵜ. ⵜⴰⵡⵏⴳⵉⵎⵜ ⵜⴳⴰ ⵜⴰⵎⴰⵏⵓⵣⵜ ⴷ ⵜⵎⴽⴰⵢⵍⴰⵍⵜ, ⴰⵙⵙⵉⴷⴼ ⵏ ⵡⴰⵣⵣⴰⵏⵏ, ⵉⵄⵔⵔⵉⵎⵏ, ⵜⵉⵔⵓⴱⴱⴰ ⵜⵉⴱⵉⴷⴰⴳⵓⵊⵉⵜⵉⵏ ⴷ ⵉⵏⴰⵥⵓⵕⵏ ⴳ ⵢⴰⵏ ⵓⵙⵖⵏⵓ ⵏⵏⴰ ⵉⵟⵟⴰⴼⵏ ⴰⵏⴰⵎⴽ ⵓⵖⵔⵉⵎ, ⵏⵏⴰ ⵉⵙⵇⵙⴰⵏ ⴰⵡⵡⵉⵏⴳⵎ ⵏⵏⵙⵏ, ⵜⵓⵏⴳⵉⵎⵜ ⵏⵏⵙⵏ ⵜⴰⵏⴼⵔⴰⵏⵜ ⴷ ⵏⵏⴰ ⴰⵙⵏ ⵉⵙⵙⵓⵜⵔⵏ ⴰⴷ ⵙⵇⵙⴰⵏ, ⵜⵜⵓⵡⵛⴰⵏⵜ ⴰⵙⵏ ⵜⵎⵓⵛⴰ ⴷ ⵜⵓⵙⵙⵏⵉⵡⵉⵏ ⴷ ⵜⴱⵔⵉⴷⵉⵏ ⵏ ⵓⵙⵡⵉⵏⴳⵎ ⴰⴼⴰⴷ ⴰⴷ ⵙⴱⵓⵖⵍⵓⵏ ⵉⵎⵏⵉⴷⵏ ⵏ ⵓⵔⵎⴰⵙ ⵏ ⵢⴰⵜ ⵜⵎⵙⵍⴰⵢⵜ ⵜⴰⵏⴰⵎⵓⵏⵜ ⴰⵎ ⵜⴰⵎⵙⵍⴰⵢⵜ ⵏ ⵜⵎⵏⵖⵉⵡⵜ. ⵉⵜⵜⵓⵙⵎⵓⵙⵙⴰ ⵓⵏⵓⵖ ⴰⴷ ⵉⴳ ⵢⴰⵜ ⵜⵡⵉⵍⴰ ⵏ ⵓⵡⵏⵏⵉ ⵏ ⵉⵣⵔⴼⴰⵏ, ⴰⵎ ⵎⴽⴷⴰ ⵉⴳⴰ ⵓⵎⵣⴳⵓⵏ ⴷ ⵓⵥⴰⵡⴰⵏ. ⵜⵉⵡⵉⵍⴰⵡⵉⵏ ⴰⴷ ⵜⵉⵏⴰⵥⵓⵕⵉⵏ ⴷ ⵓⵎⴰⵡⴰⵢ ⴰⵎⴷⵡⵓⵙ ⵏ ⵓⵙⴳⵎⵉ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵢⴰⵏ ⵓⵛⴹⴰⵕ ⴰⵇⵓⵔⴰⵔ ⵉ ⵜⵎⵢⴰⵎⴰⵥⵜ ⵜⴰⵏⴰⵎⵓⵏⵜ ⴷ ⵓⵡⴰⵏⴽ ⵏ ⵓⵣⵔⴼ ⴷ ⵓⵙⵍⴳⵏ. ⵉⵜⵜⵓⵙⵏⵎⴰⵍⴰ ⵢⴰⵏ ⵓⵖⴰⵡⴰⵙ ⵏ ⵓⵙⵎⵓⵙⵙⵓ ⴷ ⵉⵔⵣⴰⴼⵏ ⵏ ⵜⵔⵓⴱⴱⴰ ⵜⵉⵏⵎⵍⴰⵏⵉⵏ ⵙ ⵜⵎⴷⵔⴰⵡⵜ ⴰⴽⴷ ⵜⴽⴰⴷⵉⵎⵉⵜ ⵜⴰⵏⵎⵏⴰⴹⵜ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⵏⵏⴰ ⵉⴳⴰⵏ ⵜⴰⵎⵏⵜⴰⵢⵜ ⴳ ⵓⵣⵎⵣ ⵏ ⵓⵙⴼⵙⵔ. ⵔⴰⴷ ⵉⵜⵜⵓⵙⵏⵎⴰⵍⴰ ⵢⴰⵏ ⵓⵙⴼⵙⵔ ⴰⵏⴰⵥⵓⵕ ⴰⵙⵙ ⵏ ⵓⵙⵉⵎⵡⴰⵙ 10 ⴷⵓⵊⴰⵏⴱⵉⵔ ⴳ 17ⵙⵔⴳ ⵙ ⵜⵉⵍⵉⵜ ⵏ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵓⵖⴳⵯⵎⵎⵉ ⵏ ⵜⵥⵓⵕⵉ ⵏⵡⵉⴳⴰ, ⵏⵏⴰ ⵉⵍⵍⴰⵏ ⴳ 2, ⵜⴰⵙⵓⴽⵜ ⵍⵊⴰⵎⵄ, ⵜⵉⵖⵔⵎⵜ ⵏ ⵍⵓⵡⴷⴰⵢⴰ, ⵕⵕⴱⴰⵟ.