ⵜⵙⵙⴽⵕⵥ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵎⴰⵙ ⵉⴳⴰ ⵓⵣⵔⴼ ⴳ ⵜⵓⴷⵔⵜ "ⴰⵣⵔⴼ ⴰⵎⴰⴳⴷⴰⵣ ⵏⵏⵉ ⵓⵔ ⵔⴰⴷ ⵏⵙⵢⵢⵉⵀ ⴳ ⴽⵔⴰⵢⴳⴰⵜ ⵜⵎⵙⵓⵜⵍⵜ ⵙⴳ ⵜⵎⵙⵓⵜⴰⵍ ⴷ ⴷⴷⵓ ⵏ ⴽⵔⴰⵢⴳⴰⵜ ⵜⵎⵏⵜⵍⵜ", ⵜⵙⵙⵓⵜⵔ ⵙⴳ ⵜⵔⴰⴱⴱⵓⵜ ⵜⴰⴳⵔⴰⵖⵍⴰⵏⵜ, ⴰⴷ ⵜⴰⴷⴼ ⵃⵎⴰ ⴰⴷ ⵉⵜⵜⵡⴰⴼⵔⴰⴳ ⵓⵣⵔⴼ ⴳ ⵜⵓⴷⵔⵜ ⴷ ⵜⵏⴼⵔⵓⵜ ⵏⵏⵙ ⴳ ⵓⵎⵏⴰⴹ ⵏ ⵜⵓⴽⵢⴰ ⵓⵔ ⵉⵍⵉⵏ ⴰⵏⴰⵡ ⴳ ⵓⴳⵎⵎⵓⴹ ⴰⵏⴰⵎⵎⴰⵙ, ⴷ ⴰⴷ ⵜⵙⵡⵓⵔⵉ ⵅⴼ ⵓⵙⴱⵉⴷⴷ ⵏ ⵓⵕⵥⵥⵓⵎ ⵉ ⵡⴰⴼⴰ ⵙ ⵜⵡⵉⵍⴰ ⵜⴰⴷⵖⵢⴰⵏⵜ ⴷ ⵜⵙⵓⵍⴰⵏⵜ ⴷ ⵓⴼⵔⴰⴳ ⵏ ⵓⵖⵔⵉⵎⵏ ⵃⵎⴰ ⴰⴷ ⵉⵜⵜⵓⵏⴼⵔⵓ ⵓⵣⵔⴼ ⵏⵏⵙⵏ ⴳ ⵜⵓⴷⵔⵜ.

ⴳ ⵜⴳⵓⵔⵉ ⵏⵏⵙ ⴳ ⵓⵕⵥⵥⵓⵎ ⵏ ⵜⵉⵏⴰⵡⵜ ⵏ ⵜⵏⵖⵎⴰⵙⵜ ⵏⵏⴰ ⵉⵙⵏⵎⴰⵍⴰ ⵓⵙⵇⵇⵉⵎ ⴰⵙⵙ ⵏ ⵓⴽⵡⴰⵙ 10 ⴽⵟⵓⴱⵕ 2024 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴳ ⵕⵕⴱⴰⵟ, ⵙ ⵓⵣⵎⵎⵣⵓ ⵏ ⵡⴰⵙⵙ ⴰⵎⴰⴹⵍⴰⵏ ⵏ ⵓⵙⴱⴷⴷⵉ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⴷ ⵉⵎⴷⵔⴰⵡⵏ ⵏⵏⵙ ⵜⴰⴹⴰ ⵜⴰⵎⵖⵔⵉⴱⵉⵜ ⵅⴼ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴷ ⵓⵙⴰⴹⴰⴼ ⴰⵎⵖⵔⵉⴱⵉ ⵏ ⵉⵖⵣⵓⵜⵏ, ⵙ ⵓⵎⵢⴰⵡⴰⵙ ⴷ ⵉⵥⵟⵟⴰⵜⵏ ⵉⵏⴰⵎⵓⵔⵏⵏ ⵅⴼ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴳ ⵢⵉⴳⵔⴰⵏ ⵏ ⵜⵎⴰⵙⵜⴰⵏⵜ ⴷ ⵓⵙⵍⵎⴷ ⴷ ⵜⵎⵙⵙⵏⵜⵉⵜ ⴷ ⵜⵏⵖⵎⴰⵙⵜ ⴷ ⴳ ⵓⴱⵕⵍⴰⵎⴰⵏ, ⴷ ⵙ ⵜⵎⴷⵔⴰⵡⵜ ⴰⴽⴷ ⵜⵎⵙⵎⵓⵏⵜ ⵏ "ⵇⴰⵃ ⵎⴳⴰⵍ ⵜⴰⵎⵔⵔⵓⵜ ⵏ ⵜⵎⵏⵖⵉⵡⵜ, ⵜⵙⵉⵙⴼⵉⵡ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵙⵢⴰⴼⴰⵏ ⵉⵎⵏⴳⴰⵍⵏ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴽⵉⴳⴰⵏ ⵎⴰⵙ "ⵉⵙⵖⴰⵡⵙⴰ ⵓⵢⵏⵏⴰ ⵏⵜⵜⴳⴳⴰ ⵙ ⵓⴱⵓⵢ ⵏ ⵓⴱⵔⵉⴷ ⵉⵖⵣⵣⵉⴼⵏ ⵃⵎⴰ ⴰⴷ ⵜⵜⵡⴰⵙⵔⴰⵢⵏ ⵉⵙⴷⵢⴰⵜⵏ ⵏⵏⵉ ⵉⵜⵜⵓⵙⵎⵔⴰⵙⵏ ⵃⵎⴰ ⴰⴷ ⵜⴻⵜⵜⵓⵎⵛⵓⵛⵛⴹ ⵜⵙⵓⵍⴰⵏⵜ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⴷ ⵎⴰⵙ ⵔⴰⴷ ⵏⵎⵓⵔⵙ ⴳ ⵓⵙⵏⴼⵍ ⵏ ⵜⵎⵛⵓⵛⵛⴰⴹ ⴰⴷ, ⴰⵛⴽⵓ ⵏⴳⴰ ⵉⵎⵉⵖⵉⵙⵏ, ⵉⴳ ⵓⵙⵖⵉⵡⵙ ⵏⵏⵖ ⵅⴼ ⵜⵓⵙⵙⵔⴰ ⴰⵎⴷⵔⵓ, ⵜⴳ ⴰⴽⴽⵯ ⵜⴽⴰⵢⵍⴰⵍⵜ ⵏⵏⵖ ⵅⴼ ⵉⵖⵉⵎⵉ ⵏ ⵜⵓⴷⵔⵜ ⴰⵎⴷⵔⵓ ⴽⵉⴳⴰⵏ.

ⵜⵔⵏⵓ ⵎⴰⵙ ⵎⴰⵙ ⵉⵛⵇⵇⴰ ⵓⵙⵙⵉⴳⵍ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴷ ⵜⵉⵍⵉⵜ ⵏⵏⵙ ⵙⵓⵍ ⵖ ⵉⵙⵍⴳⵏⵏ ⵓⴳⴳⴰⵔ ⵅⴼ ⵓⵣⵣⴳⵉⵔ ⵏⵏⵙ, ⵙ ⵓⵙⵡⵉⵏⴳⵎ ⵖ ⵉⴹⵉⵚ ⴰⵏⵢⵉⵎⴰⵏ ⴷ ⵓⵏⴰⵎⵓⵏ ⵏ ⵓⵙⵔⴼⵓⴼⵏ ⵏⵏⵉ ⵙ ⵉⵙⵢⴰⴼⴰ ⵓⵙⵙⵉⴳⵍ ⴰⴷ. ⵜⵙⵎⴰⵢⵏⵓ ⵜⴰⵖⵓⵔⵉ ⵏ ⵓⵙⵇⵇⵉⵎ ⴷ ⵉⵎⴷⵔⴰⵡⵏ ⵏⵏⵙ ⵙ "ⵓⵙⵙⵓⴼⵖ ⵏ ⵡⵉⴷⴰ ⵜⵜⵡⴰⵏⴱⴰⴹⵏⵉⵏ ⵙ ⵜⵎⵔⵔⵓⵜ ⴰⴷ ⴷ ⵜⵡⵊⵉⵡⵉⵏ ⵏⵏⵙⵏ ⵙⴳ ⵡⴰⴷⴷⴰⴷ ⵏ ⵓⴳⴳⴰⵏⵏⴰ ⵉⵛⵇⵇⴰⵏ ⵏⵏⵉ ⵎⵉ ⵏⴳⴰⴷⴷⴰⵏ, ⵏⵉⵖ ⴰⴽⴽⵯ ⵓⵜⵉⵢⵏ, ⵉⴱⵔⵔⵉⵡⵏ ⵏⵏⵙ ⵉⵏⵢⵉⵎⴰⵏⵏ ⴷ ⵉⴹⵉⵚⵏ ⵏⵏⵙ ⵉⵏⴰⵎⵓⵏⵏ, ⴰⵣⵣⴳⵉⵔ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ".  ⵜⵙⴷⴷⵉⴷ ⴳ ⵓⵎⵏⴰⴹ ⵏⵏⴰⵖ, ⵜⵓⵍⵍⵣⴰ ⵏ ⵉⵎⵏⴳⴰⵍⵏ ⵏ ⵜⵎⵔⵔⵓⵜ ⴰⴷ, ⵎⴰⵙ "ⵓⵔ ⴷⴰ ⵜⴼⵔⴰⴳ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴰⵡⴷ ⵢⴰⵏ... ⴷ ⵓⵔ ⵉⴳⵉ ⵓⵣⵣⴳⵉⵔ ⵏⵏⵙ ⴰⴹⴰⴽⴰⵍ ⵏ ⵜⵉⵍⵉⵜ ⵏ ⵜⵓⵎⵔⵜ ⵉ ⴰⵢⵜ ⵓⵅⴰⵎ ⵏ ⵓⵏⴳⵉⵙⵏ ⵡⴰⵍⴰ  ⵜⴰⵏⴼⵔⵓⵜ ⵏ ⵡⴰⵎⵓⵏ". 

ⵓⵔ ⵜⴻⵜⵜⵓ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⴷ ⵜⵉⵏⵉ ⵎⴰⵙ ⴷ ⵜⵉⵔⵙⵍⵜ ⵜⴰⴷⵙⵍⴰⵏⵜ ⵏ ⵓⵙⵇⵇⵉⵎ ⵍⵍⵉ ⵅⴼ ⵉⴱⵉⴷⴷ ⵓⵙⵎⴰⵇⵇⵍ ⵏⵏⵙ ⵉⵇⵇⴰⵔⵏ ⵙ ⵜⵓⵙⵙⵔⴰ ⵏ ⵜⵎⵏⵖⵉⵡⵜ ⵉⴳⴰ ⵜⵜ ⵜⴰⵡⵙⵉⵜ ⵏ ⵓⵣⵔⴼ, ⴰⵕⵚⵍⵉ ⴷ ⵓⵎⴰⴳⴷⴰⵣ, ⵍⵍⵉ ⵅⴼ ⵜⵜⵓⵙⵏⵚⴱⵏ ⴽⵓⵍⵍⵓ ⵉⵣⵔⴼⴰⵏ ⵢⴰⴹⵏⵉⵏ. ⵉⵍⵎⵎⴰ, ⴰⵏⴰⵡ ⵏ ⵓⵙⵇⵇⵉⵎ ⵏⵏⵉ ⵉⴳⴰⵏ ⵜⵉⵎⵔⵙⵍⵜ ⵜⴰⵏⴰⵎⵓⵔⵜ ⵉⵜⵜⴰⵡⵣⵏ ⵅⴼ ⵓⴼⵔⴰⴳ ⵏ ⵓⵣⵔⴼ ⴰⴷ, ⴰⵔ ⵉⵇⵇⴰⵔ ⵉ ⵓⵏⵣⵔⴰⴼ ⴰⴷ ⵉⵙⵙⵓⵖⵍ ⵉⵙⴱⴷⴰⴷⵏ ⵓⵍⴳⵉⵏⵏ ⵙ ⵓⵎⵙⴰⵙⴰ ⴷ ⵓⵎⴳⵔⴰⴷ 20 ⵏ ⵓⴷⵓⵙⵜⵓⵔ, ⴷ ⵉⵎⵉⵔⵓⵜⵏ ⴷ ⵜⵎⵢⴰⵇⵇⴰⵏⵉⵏ ⵍⵍⵉ ⵉⵙⵙⴳⵎⴹ ⵍⵎⵖⵔⵉⴱ.

ⴳ ⵓⵎⵏⴰⴹ ⵏ ⵓⵙⴼⵓⴳⵍⵓ ⵏ ⵓⵙⵇⵇⵉⵎ ⵙ ⵜⵙⵉⵎⵔⴰⵡⵜ ⵏ ⵓⵙⵓⵎⵓ ⴷ ⵓⵎⵙⴼⵔⵓ, ⵜⵏⵏⴰ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵜⵏⵏⵓⵔⵣ ⴰⴷ ⵉⵣⵣⵉⴳⵣ ⵍⵎⵖⵔⵉⴱ ⵜⵉⵙⵓⵔⵉⴼⵉⵏ ⵏ ⵓⵙⵖⵣⵏ ⵏ ⵓⴱⵕⵓⵟⵓⴽⵓⵍ ⴰⵔⵓⵛⵛⵉⵍ ⵉⴹⴼⵕⵏ ⵉ ⵓⵎⵉⵔⵓ ⴰⴳⵔⴰⵖⵍⴰⵏ ⴷ ⵓⵙⵜⴰⵢ ⵉⵚⴰⵃⴰⵏ ⵉ ⵜⵖⵜⴰⵙⵜ ⵜⴰⴳⵔⴰⵖⵍⴰⵏⵜ ⵏ ⵓⵙⴱⵉⴷⴷ ⵏ ⵓⵣⵣⴳⵉⵔ ⴳ ⵜⵙⵎⵓⵏⵉ ⵏ ⵜⵙⵇⵇⵉⵎⵜ ⵜⵉⵙⵙ ⴽⵕⴰⴹⵜ ⴳ ⴷⵓⵊⴰⵏⴱⵉⵔ ⴷ ⵉⴷⴷⴰⵏ, ⴷ ⵙ ⵢⵉⵙⵎ ⵏ "ⵜⴰⴹⴰ ⵜⴰⵎⵖⵔⵉⴱⵉⵜ ⵉ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ", ⵉⵙⵉⵙⴼⵉⵡ ⵎⴰⵙⵙ ⵄⴱⴷ ⵕⵕⴰⵃⵉⵎ ⵍⵊⴰⵎⵉⵄⵉ ⵎⴰⵙ ⵜⵟⵟⴰⴼ ⵜⵎⵔⵔⵓⵜ ⴰⴷ ⵉⵎⵉⵣⵉⵜⵏ ⵉⵙⵔⵜⴰⵏⵏ ⴷ ⵉⵣⵔⴼⴰⵏⵏ ⴷ ⵓⵣⵔⵉⴼⵏ ⴷ ⵉⵏⵣⵔⴼⵏ ⴷ ⵉⴷⵍⵙⴰⵏⵏ, ⴰⵔ ⴱⴷⴷⴰ ⵜⵏⵜ ⵜⵜⴻⵜⵜⵓⵏ ⵉⵎⵖⵔⵉⵜⵏ ⵙ ⵉⵖⵉⵎⵉ ⵏⵏⵙ, ⵉⵙⴷⴷⵉⴷ ⵎⴰⵙ ⵜⵙⵙⵎⵜⵔ ⵜⴰⴹⴰ ⵙ ⵉⵎⵉⵣⵉⵜⵏ ⴰⴷ ⵙ ⵓⵙⵎⴽⵜⵉ ⵙ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵓⴷⵓⵙⵜⵓⵔ ⴰⵎⵖⵔⵉⴱⵉ ⴷ ⵜⴰⵏⴰⴹⵉⵏ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴰⵏⴰⴹⵉⵏ ⵏ ⵜⵎⴰⴷⴷⴰⵙⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵜⵏⴰⵎⵓⵔⵉⵏ.

ⴳ ⵜⵙⴳⴰ ⵏⵏⵙ, ⴰⵔ ⵜⵜⴰⵏⵏⴰⵢ ⵜⵎⵙⵇⴰⴷⵜ ⵏ ⵜⴰⵎⵓⵏⵜ ⵏ ⵓⵕⵓⴱⴱⴰ ⴳ ⵍⵎⵖⵔⵉⴱ ⵎⴰⵙ ⴷⴰ ⵜⴻⵜⵜⴰⵡⵙ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴳ ⵓⵙⴷⵓⵙ ⵏ ⵡⴰⴷⴷⵓⵔ ⴰⵏⴼⴳⴰⵏ ⴷ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ. ⵜⵙⵙⵉⵔⵖⵓⴷ ⵜⵏⵎⵀⴰⵍⵜ ⵜⴰⵎⵣⵣⴳⴰⵔⵜ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⵎⴳⴰⵍ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⴳ ⵢⴰⵜ ⵜⴳⵓⵔⵉ ⵉⵜⵜⵓⵙⵙⵓⵍⴼⵏ, ⵍⵎⵖⵔⵉⴱ ⵅⴼ ⵓⴱⵓⵖⵍⵓ ⵍⵍⵉ ⵢⵓⵡⴹ ⴳ ⵓⴱⵔⵉⴷ ⵏ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⵜⵙⵙⵓⵜⵔ ⵙⴳ ⵍⵎⵖⵔⵉⴱ ⴰⴷ ⵉⵙⵜⵉ ⵜⴰⵖⵜⴰⵙⵜ ⵏ ⵜⵎⵜⵜⴰ ⵉⵎⴰⵏⵏ ⵉⵥⵍⵉⵏ ⵙ ⵓⵙⴱⵉⴷⴷ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⵉⴷⴷⵖ ⵉⴳⴰ ⵢⴰⵜ ⵜⵙⵓⵔⵉⴼⵜ ⵜⴰⵅⴰⵜⴰⵔⵜ ⴳ ⵓⴱⵔⵉⴷ ⵏ ⵓⵙⴱⵉⴷⴷ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴷ ⵉⵙⴱⴷⴰⴷⵏ ⵏⵏⵙ ⴳ ⵓⵙⵍⴳⵏ ⴰⵏⴱⴽⴰⴹ ⵙ ⵜⵎⵔⴰⵔⵓⵜ ⵉ ⵜⵉⵙⵓⵜⵔⵏ ⵏ ⵡⴰⵎⵓⵏ ⵓⵖⵔⵉⵎ ⴷ ⵜⵎⵙⵎⵓⵏⵉⵏ ⵜⵉⵣⵔⴼⴰⵏⵉⵏ.

ⴰⴳⵏⵙⴰⵙ ⵏ "ⵓⵙⴰⴹⴰⴼ ⴰⵎⵖⵔⵉⴱⵉ ⵏ ⵉⵖⵣⵓⵜⵏ" ⵎⴰⵙ ⵉⴷⵔⵓ ⵓⵙⴰⴹⴰⴼ ⵙ ⵜⵕⵡⵉ ⴳ ⵜⵓⴳⴳⴰⵣ ⵜⵉⵏⴰⵎⵓⵔⵉⵏ ⴷ ⵜⵙⴳⴰⵡⴰⵏⵉⵏ ⴷ ⵜⴳⵔⴰⵖⵍⴰⵏⵉⵏ ⵃⵎⴰ ⴰⴷ ⵢⵉⵍⵉ ⵓⵣⵣⵉⴳⵣ ⴳ ⵉⵎⵏⵖⵉ ⵏ ⵜⵓⵙⵙⵔⴰ ⴷ ⵓⵙⴱⵉⴷⴷ ⵏ ⵓⵣⵔⴼ ⴳ ⵜⵓⴷⵔⵜ ⵍⵍⵉ ⵉⴳⴰⵏ ⴰⵣⵔⴼ ⴰⵎⴰⵜⵜⴰⵢ ⴷ ⵓⴼⵓⵥⴰⵕ ⵏⵏⵉ ⵖⵜⵙⵏ ⵉⵏⴰⵡⴰⵢⵏ ⵉⴳⵔⴰⵖⵍⴰⵏⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵙⵎⴰⵢⵏⵓ ⴰⵙⵓⵖⵏ ⵏⵏⵙ ⵙ ⵜⵙⵓⵍⴰⵏⵜ ⵏ ⵜⵓⴳⴳⴰⵣ ⵏ ⵓⵏⵄⴰⵕ ⵎⵏⵉⴷ ⵏ ⵉⵎⴰⵙⵙⵏ ⵉⴳⵔⴰⵖⵍⴰⵏⵏ, ⴰⵎ ⵉⵎⵉⵙ ⵏ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⵙⵙⵏ ⵏ ⵜⵎⵢⴰⵇⵇⴰⵏⵉⵏ, ⵃⵎⴰ ⴰⴷ ⵉⵙⴷⵓⵙ ⴰⴼⵔⴰⴳ ⵏ ⵓⵣⵔⴼ ⴳ ⵜⵓⴷⵔⵜ.

ⴳ ⵜⵙⴳⴰ ⵏⵏⵙ, ⵉⵙⵎⵖⵔ ⵓⴳⵏⵙⴰⵙ ⵏ ⵜⵎⵙⵎⵓⵏⵜ "ⵇⴰⵃ ⵎⴳⴰⵍ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ" ⴳ ⵢⴰⵜ ⵜⴳⵓⵔⵉ ⵜⴰⵎⵙⵙⵓⵍⴼⵜ, ⵜⵉⵍⴰⵍⵜ ⵜⴰⵅⴰⵜⴰⵔⵜ ⵍⵍⵉ ⵉⵜⵜⵓⵔⴰⵔ ⵍⵎⵖⵔⵉⴱ ⵃⵎⴰ ⴰⴷ ⵉⵙⴱⵉⴷⴷ ⵜⴰⵎⵔⵔⵓⵜ ⵏ ⵜⵎⵏⵖⵉⵡⵜ ⴳ ⵜⵎⵏⴰⴹⵜ, ⵉⵙⵙⵎⵜⵔ ⵎⴰⵙ ⵍⵍⴰⵏⵜ ⵜⵎⵉⵜⴰⵔ ⵉⵙⵔⵇⴱⵏ ⴳ ⵓⴳⵏⵙⵓ ⵏ ⵡⴰⵎⵓⵏ ⴰⵎⵖⵔⵉⴱⵉ ⴳ ⵓⴱⵔⵉⴷ ⵏ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⵉⵙⴷⴷⵉⴷ ⵎⴰⵙ ⴷⴰ ⵜⵏⵏⴰⵍ ⵜⵎⵙⵎⵓⵏⵜ ⵏⵏⵙ ⵉⴳⵔⴰⵡⵏ ⵍⵍⵉ ⵉⵙⵙⵓⵜⵓⵔⵏ ⵜⵓⵙⵙⵔⴰ ⵏ ⵜⵎⵏⵖⵉⵡⵜ. ⵉⵙⵙⵓⵜⵔ ⵙⴳ ⵜⵏⴱⴰⴹⵜ ⵏ ⵍⵎⵖⵔⵉⴱ ⴰⴷ ⴰⵙⴷⴷⵔⴼ ⴳ ⵓⴱⵔⵉⴷ ⵏ ⵜⵖⵜⴰⵙⵜ ⵏ ⵜⵓⵙⵙⵔⴰ ⴰⵎ ⵜⵓⴳⵜ ⵏ ⵉⵡⴰⵏⴽⵏ.

ⵎⵙⴰⵙⴰⵏ ⵉⴳⵏⵙⴰⵙ ⴷ ⵜⴳⵙⴰⵙⵉⵏ ⵏ ⵉⵥⵟⵟⴰⵜⵏ ⵏ ⵉⴱⵕⵍⴰⵎⴰⵏⵉⵢⵏ ⴷ ⵉⵎⵓⵔⴰ ⴷ ⵉⵙⵍⵎⴰⴷⵏ ⴷ ⵉⵏⵖⵎⴰⵙⵏ ⴷ ⵉⵎⵙⵙⵏⵜⴰⵢ ⵎⴳⴰⵍ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⵅⴼ ⵡⴰⴷⴷⵓⵔ ⵏ ⵓⵙⴼⵓⴳⵍⵓ ⵙ ⵡⴰⵙⵙ ⴰⴷ ⴰⴼⴰⴷ ⴰⴷ ⵢⵉⵍⵉ ⵓⵙⴼⵔⴽ ⵙ ⵓⵣⵔⴼ ⴳ ⵜⵓⴷⵔⵜ, ⵍⵍⵉ ⵉⵜⵜⵢⴰⵔⴰⵏ ⴳ ⵓⴷⵓⵙⵜⵓⵔ ⵏ ⵜⴳⵍⴷⵉⵜ, ⵙⴷⴷⵉⴷⵏ ⵅⴼ ⵓⵙⵓⵖⵏ ⵏⵏⵙⵏ ⵙ ⵓⵙⴱⴷⴷⵉ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⴷ ⵓⵣⴷⴰⵢ ⵏ ⵓⵏⵄⴰⵕ ⵏⵏⵙ ⴰⴼⴰⴷ ⴰⴷ ⴳⵓⵍⵓⵏ ⴰⵡⵜⵜⴰⵙ ⵏ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ.