ⵜⴰⵣⵡⵓⵔⵜ
ⴰⵎⵉⵏⴰ ⴱⵓⵄⵢⵢⴰⵛ
ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ

ⵀⴰ ⴷ ⵍⵎⵖⵔⵉⴱ ⵉⵔⵛⵎ ⴰⵙⵙ ⴰⴷ ⴰⵙⴰⵜⵉ ⴰⵎⴰⴷⴷⵓⴷ ⴰⵏⵎⵜⵜⴰ ⵅⴼ ⵓⵙⵓⵔⵙ ⵏ ⵜⵓⵥⵥⵓⵎⵜ ⵏ ⵓⴱⵔⵉⴷ ⵏⵏⵖ ⵖⵔ ⵜⵓⵙⵙⵔⴰ, ⵉⵣⵎⵎⴻⵎ17 ⴷⵓⵊⴰⵏⴱⵉⵔ 2024 ⵙ ⵓⵣⵔⵉⴳ ⴰⵎⵇⵇⵔⴰⵏ ⵉⴼⴰⵡⵏ ⴳ ⵜⵎⴽⵜⵉⵜ ⵏⵏⵖ ⵜⴰⵣⵔⴼⴰⵏⵜ ⵜⴰⵎⵖⵔⵉⴱⵉⵜ, ⵅⴼ ⵎⴰⴷ ⵜⴳⴰ ⵜⵖⵜⴰⵙⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵙ ⵓⵙⵜⴰⵢ ⵉⵚⴰⵃⴰⵏ ⵉ ⵓⵙⴱⵉⴷⴷ ⴰⵖⵣⵓⵔⴰⵏ ⵏ ⵓⵣⵣⴳⵉⵔ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⵏ ⵉⵏⵓⵎⴰⴽ ⴷ ⵜⴷⵓⴳⴰⵎⵜ.

ⵉⴳⴰ ⵙ ⵜⵉⴷⵜ, ⵉⵎⵊⵕⵉ ⴰⵎⵣⵔⴰⵢ, ⵉⵜⵜⴰⵍⵙⵏ ⴰⵙⴷⴷⵉⴷ ⵅⴼ ⵓⵙⵖⵓⵏ ⵏ ⵍⵎⵖⵔⵉⴱ ⵙ ⵓⴼⵔⴰⴳ ⵏ ⵓⵣⵔⴼ ⴳ ⵜⵓⴷⵔⵜ ⴷ ⵡⴰⴷⴷⵓⵔ ⴰⵏⴼⴳⴰⵏ… ⴰⵙⵜⴰⵢ ⵓⵏⴱⵉⴹ ⵉⴼⴰⵡⵏ ⵙ ⵜⴰⴳⴳⵯⴰⵜⵉⵏ ⵜⵓⴼⵔⵉⴷⵉⵏ, ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⵏⵍⵍⴰ ⴳ ⵜⴳⵉⵔⴰ ⵏ ⵓⵙⴼⵓⴳⵍⵓ ⵙ ⵓⴽⵜⵜⵓⵢ ⵡⵉⵙ 20 ⵏ ⵓⵙⵔⵓⵙ ⵏ ⵓⵏⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔⵓ, ⵏⵏⵉ ⵉⴳⴰⵏ ⵜⵉⵔⵎⵉⵜ ⵜⵓⴼⵔⵉⴷⵜ ⴳ ⵓⵎⴰⴹⴰⵍ, ⵉⵙⵔⵙⵏ ⵉ ⵜⵎⵢⴰⴷⴰⵙⵜ ⴷ ⵓⵣⵓⵔⵜ ⴰⵎⵖⵔⵉⴱⵉ ⵉⵣⴷⴷⵉⴳⵏ ⴳ ⵓⵎⵔⴰⵔⴰ ⴷ ⵜⵎⵙⴰⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵉⵔⵎⵉⵜ ⴷ ⵓⵏⴳⵎⴰⵎ, ⵉⵏⵄⴰⵕⵏ ⴽⵉⴳⴰⵏ ⵅⴼ ⵜⵙⵖⵣⵏⵜ ⵏ ⵓⴱⵕⵓⵟⵓⴽⵓⵍ ⴰⵔⵓⵛⵛⵉⵍ ⵡⵉⵙ ⵙⵉⵏ ⵉⴹⴼⵕⵏ ⵉ ⵓⵎⵉⵔⵓ ⴰⴳⵔⴰⵖⵍⴰⵏ ⵉⵥⵍⵉⵏ ⵙ ⵉⵣⵔⴼⴰⵏ ⵓⵖⵔⵉⵎⵏ ⴷ ⵉⵙⵔⵜⴰⵏⵏ, ⵏⵏⵉ ⵉⵙⵡⴰⵜⵜⵙⵏ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ.

ⵙ ⵜⵎⵍⴷⴰ ⵏ ⵓⵙⵏⵓⴱⴳ ⵏ ⵎⵕⵕⴰⴽⵛ ⵉ ⵓⵙⴳⵔⴰⵡ ⴰⴳⵔⴰⵖⵍⴰⵏ ⵡⵉⵙ ⵙⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⴳⴳⵯⴰⵙ ⵏ 2014, ⵉⵙⵔⵙ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⴰⵙⵏⵜⵍ ⴰⴷ ⴳ ⵜⵙⴽⵯⴼⵍⵜ ⵏ ⵓⵙⵉⵣⵡⵔ ⴰⵏⴰⵎⵓⵔ, ⵉⵖⵔⴰ ⵙ ⵓⵙⵡⵉⵏⴳⵎ ⴰⵎⴳⵔⵓ ⴷ ⵓⵎⴷⵔⵓ ⵉⵙⵎⴰⵏⵏ ⵜⵓⴳⵜ ⵏ ⵉⵎⵙⴽⴰⵔⵏ ⵓⵖⵔⵉⵎⵏ ⴷ ⵉⴱⵕⵍⴰⵎⴰⵏⵉⵢⵏ ⴷ ⵉⵎⵓⵣⴰⵢⵏ ⵓⵍⴳⵉⵏⵏ. ⵉⴳ ⵉⵎⵊⵕⵉ ⴰⴷ, ⴰⴽⵓⴷ ⴰⵏⵏ, ⵜⵉⵣⵉ ⵜⴰⵙⵏⴼⴰⵍⵜ ⴷ ⵜⵎⴽⴰⵎⵜ ⵉ ⵓⵎⵓⵙⵙⵓ ⵏ ⵉⵏⵎⵣⴰⵖⵏ ⴷ ⵜⵏⵎⵣⴰⵖⵉⵏ ⵅⴼ ⵓⵣⵔⴼ ⴳ ⵜⵓⴷⵔⵜ ⴷ ⵓⵏⵄⴰⵕ ⵅⴼ ⵜⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⵏⵏⵉ ⵓⵔ ⵉⴱⵉⴷⴷⵏ ⵙⴳ ⵡⴰⴽⵓⴷ ⴰⵏⵏ ⵅⴼ ⵓⵡⵏⵏⵉ ⵅⴼ ⵜⴽⴰⵢⵍⴰⵍⵜ ⵉⴼⴰⵡⵏ ⵉⵜⵜⴱⴰⵢⵢⴰⵏⵏ ⴳ ⵓⵜⴽⴰⵢ ⵖⵔ ⵓⵙⵎⵏⵉⴷ ⵏ ⵓⵙⴱⵉⴷⴷ ⴰⵖⵣⵓⵔⴰⵏ ⵏ ⵓⵣⵣⴳⵉⵔ ⵏ ⵜⵎⵏⵖⵉⵡⵜ, ⵉⴷⴷⵖ ⵉⴳⴰ ⵜⴰⵙⵓⵔⵉⴼⵜ ⵜⴰⴷⵙⵍⴰⵏⵜ ⴳ ⵓⴱⵔⵉⴷ ⵏⵏⵖ ⵖⵔ ⵜⵓⵙⵙⵔⴰ ⵜⴰⵎⴳⴳⴰⵔⵓⵜ ⵏ ⵜⵎⵔⵔⵓⵜ ⵏ ⵜⵎⵜⵜⴰⵏⵜ ⴷ ⵜⵎⵏⵖⵉⵡⵜ ⵙ ⵡⴰⵙⵙⴰⵖ ⵏ ⵓⵙⵍⴳⵏ. ⴰⵡⵙⵏⵜ ⵜⵓⴳⴳⴰⵣ ⵉⵣⴷⵉⵏ ⵜⵉⴳⵉⵔⴰ ⴰⴷ ⴳ ⵓⵙⵔⵓⵙ ⵏ ⵜⵔⵙⴰⵍ ⵏ ⵓⵙⵏⴼⵍ ⵉⴷⵔⴰⵏ ⵏⵏⴰ ⴳ ⵓⵔ ⵜⵍⵍⵉ ⵜⵓⵖⵓⵍⵜ.

ⵉⴳⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵉⵙⵓⵍ ⵖⵎⴽⴽ ⵍⵍⵉ, ⴰⵎⵙⵎⵓⵙⵙⵓ ⴰⴷⵙⵍⴰⵏ ⴳ ⵡⵓⵍ ⵏ ⵜⴷⵉⵏⴰⵎⵉⵜ ⴰⴷ, ⵉⵜⵜⵡⴰⵙⵙⴰⵏ ⵙ ⵜⵉⵍⵉⵜ ⵏⵏⵙ ⵜⴰⴳⵔⴰⵖⵍⴰⵏⵜ ⵉⴷⵓⵙⵏ, ⵙⵍⴰⵡⴰⵏ ⴰⴽⴽⵯ ⴳ ⵉⴱⵔⴳⵔⴰⵡⵏ ⵉⴳⵔⴰⵖⵍⴰⵏⵏ ⵏ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⵅⴼ ⵓⵙⵖⵓⵏ ⵏⵏⵙ ⵉⵣⵣⴳⴰⵏ ⴳ ⵓⴱⴰⵔⴰⵣ ⴰⵎⴰⴹⵍⴰⵏ, ⴷ ⵓⵍⴰ ⴰⵎⵣⴰⵖ ⵏⵏⵙ ⴷ ⵓⵏⵄⴰⵕ ⵏⵏⵙ ⵉⴷⵓⵙⵏ ⴷ ⵉⵣⴷⵉⵏ ⴳ ⵓⵙⵡⵉⵔ ⴰⵏⴰⵎⵓⵔ ⴰⴼⴰⴷ ⴰⴷ ⵉⴷⵔⵓ ⴳ ⵓⵏⵣⴰⵖ ⵖⵔ ⵜⵣⵔⴼⵜ ⵏⵏⴰ ⴳ ⵓⵔ ⵜⵍⵍⵉ ⵜⵎⴰⵜⴰⵔⵜ ⵏ ⵜⵉⵖⴰⵡⵜ, ⵉⵙⵏⴰⵍⵏ ⵉ ⵜⵓⵍⵍⵣⴰ ⵉⵕⵚⴰⵏ ⵉⵜⵜⵡⴰⵕⵚⴰⵏ ⴷ ⵜⵉⵔⴰⵜ ⵉⴷⵓⵙⵏ ⵏ ⵜⵓⵚⴽⴰ ⵏ ⵡⴰⵎⵓⵏ ⴰⵎⵖⵔⵉⴱⵉ ⴳ ⵉⵣⵣⵉⴳⵣ ⵓⵔⵎⵎⵓⵙ ⵏ ⵜⵣⵔⴼⵜ ⴷⴰⵢ ⵜⴰⵎⵔⵔⵓⵜ, ⵃⵎⴰ ⴰⴷ ⵜⴳ ⵜⵣⵔⴼⵜ ⴰⴷ ⴰⴱⵔⵉⴷ ⵏ ⵓⵙⵡⵔⵔⵉ ⴷ ⵓⵙⴷⴷⵉⴷ ⵏ ⵡⴰⴷⴷⵓⵔ ⴷ ⵜⴷⵔⴼⵉ ⴷ ⵜⵏⴼⴳⴰⵏⵜ ⵉ ⵇⴰⵃ.

ⵓⵔ ⵜⵣⴷⵉ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⵖⴰⵙ ⵅⴼ ⵉⵎⵏⵉⴷⵏ ⵓⵣⵔⵉⴼⵏ ⵉⵣⴷⴷⵉⴳⵏ; ⵎⴰⵛⴰ ⵉⴳⴰ ⵜⴳⴰ ⴰⵙⵖⵓⵏ ⴰⵖⴰⵔⴰⵏ ⴷ ⵓⵣⴰⵍⴰⵏ ⴷ ⵓⵙⵓⵜⵔ ⴰⵏⴼⴳⴰⵏ…، ⵉⴳⴰ ⴰⵙⵜⴰⵢ ⵏ ⵡⴰⵎⵓⵏ ⵉⴽⴰⵢⵍⴰⵍⵏ ⴰⴷ ⵢⴰⵡⴹ ⵜⴰⵣⵔⴼⵜ ⵙ ⵜⵉⴷⵜ. ⵜⴰⵎⵔⵔⵓⵜ ⵏ ⵜⵎⵏⵖⵉⵡⵜ ⵓⵔ ⵜⵏⵏⵉ ⴰⴷ ⵜⴳ ⴰⵡⴷ ⵢⴰⵏ ⵓⴼⵙⵙⴰⵢ ⵏⵉⵖ ⵜⴰⵎⵢⴰⴷⴰⵙⵜ ⵏ ⵓⵙⵎⴽⵍ ⵉⵕⵡⴰⵏ, ⵎⴰⵛⴰ ⵜⴳⴰ, ⴰⵎⵏⵉⴳ ⵏ ⵎⴰⵢⴰⵏⵏ, ⵜⵓⵙⵏⵜ ⵙ ⵓⵏⴳⵓⴼ ⴰⵎⴳⵔⵓ ⴷ ⵜⵙⵓⵍⴳⵉⵏⵜ ⵏ ⵜⴽⵕⴹⵉ ⵏⵏⵉ ⵜⵜⴻⵜⵜⵔ ⵜⵣⵔⴼⵜ ⴰⴷ ⵏⵉⵜ ⴰⴷ ⵜⵙⴱⵉⴷⴷ ⴰⵎ ⵏⵜⵜⴰ.

ⴷ ⵉⵖ ⵉⴳⴰ ⵓⵙⵜⴰⵢ ⵉⵚⴰⵃⴰⵏ ⵉ ⵓⵙⴱⵉⴷⴷ ⴰⵖⵣⵓⵔⴰⵏ ⵏ ⵓⵣⵣⴳⵉⵔ ⵏ ⵜⵎⵏⵖⵉⵡⵜ, ⴱⵍⴰ ⵜⵓⵔⴷⴰ ⵏⵉⵖ ⴰⵙⵓⵔⴷⵓ, ⵓⵎⵄⵉⵏ ⵏ ⵜⵉⴷⵜ ⴷ ⵓⵙⵔⵙ ⵏ ⵜⵣⵣⵉⴳⵣⵜ ⵉⴼⴰⵡⵏ, ⵉⵇⵇⴰⵏ ⴷ ⴰⴷ ⵓⵔ ⵉⴳ ⵅⵙ ⵜⵉⴽⵍⵉ ⵜⴰⵏⵎⵓⵜⵜⵉⵜ, ⵉⵙⵙⵓⵜⵓⵔⵏ ⴰⵙⵏⴼⵍ ⴰⵣⵔⴼⴰⵏ ⵉⵣⵄⵎⵏ, ⵏⵏⴰ ⴳ ⵓⵔ ⵜⵍⵍⵉ ⵜⵓⵖⵓⵍⵜ, ⴰⵖ ⵉⵜⵜⴰⴷⵊⴰⵏ ⴰⴷ ⵏⵙⴷⵓⵙ ⵜⴰⵣⵣⵉⴳⵣⵜ ⴰⴷ ⴷ ⵓⵙⵎⴷⵢⴰ ⵏⵏⵙ ⴳ ⵓⵙⴰⵜⵉ ⵏⵏⵖ ⴰⵣⵔⴼⴰⵏ ⴰⵏⴰⵎⵓⵔ.

ⵙ ⵜⵎⵢⴰⴷⴰⵙⵜ ⴰⴷ, ⵉⵙⴷⴷⵉⴷ ⵍⵎⵖⵔⵉⴱ ⴰⵙⵜⴰⵢ ⵓⵏⴱⵉⴹ ⴰⵎⵅⴰⵙ ⵏⵏⴰ ⴳ ⵓⵔ ⵜⵍⵍⵉ ⵜⵓⵖⵓⵍⵜ ⵙ ⵓⵣⵣⵉⴳⵣ ⵏ ⵓⵙⵖⵓⵏ ⵏⵏⵙ ⴰⵣⵔⴼⴰⵏ ⴰⴳⵔⴰⵖⵍⴰⵏ, ⵙ ⵜⵎⴰⵎⴽⵜ ⵜⴼⴰⵡ ⵡⴰⵔ ⵜⴷⵙⵜⴰⵔⵜ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ… ⴰⵙⵜⴰⵢ ⵉⵕⵥⵎⵏ ⵢⴰⵏ ⵉⵎⵉⵔ ⴰⵎⴰⵢⵏⵓ ⴳ ⵓⵎⵣⵔⵓⵢ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⴳⵍⴷⵉⵜ; ⵉⵎⵉⵔ ⴳ ⵜⴰⴳⴳⵓⴳⵜ ⵜⵣⵔⴼⵜ ⵅⴼ ⴽⵔⴰⵢⴳⴰⵜ ⴰⵎⵏⵉⴷ ⵏ ⵜⵉⵖⴰⵡⵜ, ⴰⴼⴰⴷ ⴰⴷ ⵜⴳ ⵜⴰⵔⵙⵍⵜ ⵏ ⵡⴰⵎⵓⵏ ⴳ ⵉⵜⵜⵓⵡⵇⵇⴰⵔ ⵡⴰⴷⴷⵓⵔ ⴰⵏⴼⴳⴰⵏ ⵏ ⴰⴽⴽⵯ ⵜⵏⵎⵓⵔⵉⵢⵉⵏ ⴷ ⵉⵏⵎⵓⵔⴰⵏ ⵏⵏⵙ, ⴷ ⴰⴷ ⴳⵉⵙ ⵢⵉⵍⵉ ⵓⴼⵔⴰⴳ ⵉⵙⵎⴷⵏ ⵉ ⵡⴰⴷⴷⵓⵔ ⴰⴷ… ⴳ ⵓⴱⵔⵉⴷ ⵏⵏⵖ ⵖⵔ ⵜⵓⵙⵙⵔⴰ ⵏ ⵜⵎⵏⵖⵉⵡⵜ ⴰⵙⴷⴷⵉⴷ ⵉⵜⵜⵓⵙⵎⴰⵢⵏⵓⵏ ⵙ ⵓⴷⵡⴰⵙ ⵎⴰⵙ ⵜⴳⴰ ⵜⵎⵔⵔⵓⵜ ⴰⴷ ⵢⴰⵜ ⵙⴳ ⵜⵕⵥⵉⵢⵉⵏ ⵉⵅⵛⵏⵏ ⵏ ⵓⵣⵔⴼ ⴳ ⵜⵓⴷⵔⵜ, ⵏⵏⵉ ⵉⴳⴰⵏ ⴰⵣⵔⴼ ⴰⵕⵚⵍⵉ ⵢⵓⵜⵏ ⵙ ⵉⵥⵓⵚⴰⵏ; ⴰⵣⵔⴼ ⴰⵎⴰⴳⴷⴰⵣ ⴷ ⴰⵎⴰⵜⵜⴰⵢ, ⵓⵔ ⵉⵥⴹⴰⵕⵏ ⴰⴷ ⴰⵙ ⵉⵜⵜⵓⴳⴰ ⴽⵔⴰ ⵏ ⵓⵙⵏⴼⵍ ⵏⵉⵖ ⴽⵔⴰ ⵓⵙⵍⵉⴷ, ⴰⵣⵔⴼ ⵏⵏⴰ ⵎⵉ ⵓⵔ ⵉⵍⵍⵉ ⵡⴰⵜⵉⴳ ⵡⴰⵍⴰ ⵜⵉⵍⵉⵜ ⵏ ⴽⵔⴰ ⵏ ⵜⴷⵔⴼⵉ ⵏⵉⵖ ⴰⵣⵔⴼ ⵢⴰⴹⵏ, ⴷ ⵓⵍⴰ ⵜⴰⵣⵔⴼⵜ, ⴱⵍⴰ ⵏⵜⵜⴰⵏ.