ⴷⴰ ⵢⴰⴽⴽⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⵉⵏⴷⵉ ⵉⵅⴰⵜⵔⵏ ⵉ ⵓⵙⴳⵓⵎ ⵏ ⵓⴹⴼⴼⵓⵕ ⴷ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴳ ⵓⵙⴰⵜⵉ ⵏ ⵜⵙⵜⵕⴰⵜⵉⵊⵉⵜ ⵏ ⵜⵡⵓⵔⵉ ⵏⵏⵙ, ⵉⴷⴷⵖ ⵖⵓⵔⵙ ⵜⵍⵍⴰ ⵜⵎⵍⴰⵍⵜ ⵜⴰⴷⵙⵍⴰⵏⵜ ⴳ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵙⵏ, ⴷ ⵓⵙⵎⴽⵍ ⵏ ⵜⵎⵙⴰⵔⵉⵏ ⵜⵉⴽⵙⵡⴰⵜⵉⵏ ⵏⵏⵉ ⵖⵓⵔ ⵉⵍⵍⴰ ⵓⵙⵉⵣⵡⵔ ⴳ ⵓⴳⵯⵏⵙ ⵏ ⵡⴰⵎⵓⵏ.
ⴳ ⵓⵙⴰⵜⵉ ⴰⴷ, ⴷⴰ ⵉⵙⵡⵓⵔⵉ ⵓⵙⵇⵇⵉⵎ, ⵙ ⵜⵡⵉⵍⴰ ⵜⴰⵣⵎⵣⴰⵏⵜ ⴷ ⵜⵡⵓⵔⵎⴰⵏⵜ, ⵜⵉⵣⵉ ⵏⵏⴰ ⴳⵉⵙ ⵉⵜⵜⵓⵜⵜⵔ ⵓⵢⴰ ⵏⵏ, ⵅⴼ ⵓⵙⵎⵏⵉⴷ ⵏ ⵜⵡⵉⵙⵉ ⴷ ⵓⵙⵎⵉⴳⵉⵍ ⵉ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴳ ⵢⵉⴳⵔ ⵏ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵉⵣⴷⵉⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ.
ⴳ ⵓⵙⴰⵜⵉ ⵏ ⵜⵏⵥⴰⵕ ⵉⵍⵍⴰⵏ, ⴷⴰ ⵉⵜⵜⴰⵏⵏⴰⵢ ⵓⵙⵇⵇⵉⵎ ⵎⴰⵙ ⵉⴳⴰ ⵓⴹⴼⴼⵓⵕ ⴷ ⵓⵙⵓⵜⴳ ⵏ ⵜⵙⵔⵜⴰⵢ ⵙ ⵜⵡⵉⵍⴰ ⵜⴰⵍⵓⴳⴰⵏⵜ ⴰⵙⵓⵖⵏ ⴷ ⵉⵇⵇⴰⵏⵏ ⵉ ⵓⴹⴰⴽⴰⵍ ⵏ ⵓⵍⴽⴰⵎ ⵏ ⵉⵡⵜⵜⴰⵙⵏ ⴷ ⵓⵙⵖⴰⵍ ⵏ ⵜⵡⵓⵔⵉ ⵙ ⵉⵏⵎⵎⴰⵍⵏ ⵉⵎⵏⵖⵓⴷⵏ, ⵉⴷⴷⵖ ⵍⴰⵃ ⵉⵎⴰⵙⵙⵏ ⵕⵡⴰⵏⵉⵏ ⵉ ⵓⴹⴼⴼⵓⵕ ⵏ ⵜⵙⵔⵜⴰⵢ, ⴰⵢⵍⵍⵉ ⵉⵜⵜⴳⴳⴰⵏ ⵜⴰⴱⴱⴰⵢⴹⴰⵕⵜ ⵏ ⵓⵙⵓⵜⴳ ⴰⵎⵏⵖⵓⴷ, ⴰⵔ ⵉⵙⵙⵉⴷⵔⵓⵙ ⵙⴳ ⵜⵣⴷⴰⵢⵜ ⴷ ⵜⵎⵙⴰⴳⴰⵔⵜ ⴳⵔ ⵜⵓⴳⵜ ⵏ ⵉⵎⴽⵛⴰⵎⵏ.
ⵎⴽⵍⵍⵉ ⵉⵙⵙⴽⵕⴰⵥ ⵓⵙⵇⵇⵉⵎ ⵅⴼ ⵜⵉⵏⴷⵉ ⵏ ⵓⵙⴷⵖⵉ ⴷ ⵓⵙⵖⵓⴷⵓ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵙ ⵜⵡⵉⵍⴰ ⵜⴰⵖⵣⵓⵔⴰⵏⵜ, ⴳ ⵉⵍⵍⴰ ⴰⵡⴷ ⵓⵙⴷⵓⵙ ⵏ ⵜⵎⴰⴼⴰⵡⵜ ⴷ ⵓⵙⵎⴰⴷ ⵏ ⵓⵎⵍⴰⵏ ⵉⵣⴷⵉⵏ ⵙ ⵜⵙⵔⵜⴰⵢ ⴰⵏⵏ, ⴷ ⴰⵔ ⵢⴰⵇⵇⴰⵔⴰ ⵙ ⵓⵙⵓⵊⴷ ⵏ ⵉⵙⵓⴳⴰⵎ ⵉⵥⵕⴼⴰⵏⵏ ⴳⵓⵎⵏⵉⵏ ⵉ ⵜⵙⵔⵜⴰⵢ ⵉⵣⴷⵉⵏ ⵙ ⵓⵙⵍⵎⴷ ⴷ ⵜⴷⵓⵙⵉ ⴷ ⵓⴼⵔⴰⴳ ⴰⵏⴰⵎⵓⵏ, ⴷ ⵓⵙⵓⵖⵏ ⵏ ⵜⴰⵣⵣⴰⵣⵜ ⵏ ⵓⵙⴳⴳⴷ ⴰⵏⴱⴽⴰⴷ ⵉ ⵓⵍⴽⴰⵎ ⵏ ⵜⵣⵔⴼⵜ ⵜⴰⵏⴰⵎⵓⵏⵜ.
ⵉⵙⴷⴷⵉⴷ ⴰⵡⴷ ⵅⴼ ⵓⵙⵓⵖⵏ ⵏ ⵓⵙⵎⵀⵍ ⴷ ⵜⵙⵏⵙⵉ ⵏ ⵜⵎⵍⴰⵍⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏⵜⴰⵢⵏⵉⵏ ⵙ ⵜⵡⵏⵏⴰⴹⵜ ⴷ ⵡⴰⵎⴰⵏ ⴷ ⵓⵏⴳⵉⴳⵜ ⴷⴷⵓ ⵓⵎⴰⵍⵓ ⵏ ⵜⵏⵥⴰⵕ ⵏ ⵓⴼⵔⴰⴳ ⵏ ⵜⵡⵏⵏⴰⴹⵜ ⴷ ⵓⵍⴽⴰⵎ ⵏ ⵜⴳⵎⵉ ⵜⴰⵙⵓⵍⴰⵏⵜ, ⴷ ⵜⵡⵓⵔⵉ ⵅⴼ ⵓⵏⵄⴰⵕ ⴰⴼⴰⴷ ⴰⴷ ⵜⵉⵍⵉ ⵜⴰⵣⵣⴰⵣⵜ ⵏ ⵉⵙⴳⴳⴷⵏ ⵉⵏⵎⴰⵍⴰⵏ ⵉ ⵓⴹⴰⴽⴰⵍ ⵏ ⵓⵍⴽⴰⵎ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵉ ⵉⵡⵜⵜⴰⵙⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴷⵓⵙ ⵏ ⵜⴷⵔⴰⵡⵜ ⴷ ⵜⵎⴰⴼⴰⵡⵜ ⴳ ⵜⵎⵀⵍⵜ ⵏ ⵉⴳⵉ ⵏ ⵜⵖⵜⵙⵜ.
ⴰⵔ ⵉⵥⵕⵕⴰ ⵓⵙⵇⵇⵉⵎ ⵎⴰⵙ ⵟⵟⴰⴼⵏⵜ ⵜⵎⴰⴷⴷⴰⵙⵉⵏ ⵏ ⵡⴰⵎⵓⵏ ⵓⵖⵔⵉⵎ ⵢⴰⵜ ⵜⵎⵍⴰⵍⵜ ⵉⵕⵡⴰⵏ ⴳ ⵓⵙⴷⵓⵙ ⵏ ⵜⴷⵔⴰⵡⵜ ⵜⴰⵎⵓⵔⵉⵜ, ⴰⵔ ⵢⴰⵇⵇⵔⴰ ⵙ ⵓⵙⵔⵓⵙ ⵏ ⵓⵙⴰⵜⵉ ⵓⵍⴳⵉⵏ ⵉ ⵓⵎⵛⴰⵡⴰⵕ ⴰⴳⴷⵓⴷⴰⵏ ⵉ ⵓⵙⵣⵎⵔ ⵏ ⵡⴰⵎⵓⵏ ⵓⵖⵔⵉⵎ ⵅⴼ ⵜⵡⵉⵙⵉ ⵙ ⵜⵡⵉⵍⴰ ⵉⵕⵡⴰⵏ ⴳ ⵓⵙⴰⴽⴰ ⴰⵏⴳⵎⵓ ⴳ ⵜⵎⴰⵣⵉⵔⵜ ⵏⵏⵖ.
ⴰⵔ ⵉⵜⵜⴰⵏⵏⵉ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵎⴰⵙ ⴷ ⵜⵉⵎⵙⵓⵜⴰⵍ ⵏ ⵖⵉⵍⴰⴷ, ⵖ ⵍⵍⴰⵏⵜ ⴰⵡⴷ ⵜⴰⵙⵙⴰⵙⵉⵏ ⵣⵔⵉⵏⵉⵏ ⴷ ⵜⵏⵥⴰⵕ ⵜⵉⵎⵢⴰⵏⴰⵡⵉⵏ, ⴳⴰⵏⵜ ⴰⵣⵎⵣ ⵏ ⵓⵍⴽⴰⵎ ⵏ ⵓⵙⵏⴼⵍ ⴳ ⵜⵖⴰⵔⴰⵙⵜ ⵏⵏⵉ ⵙ ⵜⵍⵍⴰ ⵜⵡⵓⵔⵉ ⴳ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵙ ⵜⵙⵖⵣⵏⵜ ⵏ “ⵓⵙⵡⵉⵏⴳⵎ ⵏ ⵡⵓⵖⵓⵍ” ⴷ ⵓⵙⴷⵓⵙ ⵏ ⵓⵙⵎⴰⴷ ⵏⵏⵙ ⴳ ⵓⵙⴼⵙⵉ ⴷ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ. ⴰⵛⴽⵓ ⴷⴰ ⵉⵜⵜⴰⵡⵙ ⴳ ⵓⵙⵇⵙⵉ ⵏ ⵜⵎⵓⴽⵔⵉⵙⵉⵏ ⴷ ⵓⵙⵎⵏⵉⴷ ⵏ ⵓⴼⵙⵙⴰⵢ ⵉ ⵜⵏⵥⴰⵕ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ.
ⵎⴽⵍⵍⵉ ⵢⴰⵇⵇⵔⴰ ⵙ ⵓⵙⵡⵉⵏⴳⵎ ⴳ ⵜⴱⵔⵉⴷⵜ ⵏ ⵓⵙⵏⴼⵍ ⵏ ⵜⵉⵔⵉⵎⵉⵜⵉⵏ ⵣⵡⴰⵔⵏⵉⵏ ⴳ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵙ ⵜⵎⵙⵙⵉⵔⴷⵉⵏ ⴷ ⵓⵔⵎⴰⵙ ⵏ ⵜⵎⵓⴽⵔⵉⵙⵉⵏ ⴷ ⵓⵙⵡⵓⵜⵜⵓ ⵏ ⵜⵏⵇⵇⴰⴹ ⵏⵏⴰ ⵉⵙⵖⴰⵡⵙⴰⵏ ⵙ ⵡⴰⵍⴰⵙ ⵏ ⵓⵙⵓⵜⴳ, ⴷ ⵜⵡⵓⵔⵉ ⵅⴼ ⵓⵎⵓⵜⵜⵉ ⵖⵔ ⵜⵉⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵏⵏⴰ ⵉⵙⴽⴰⵔⵏ ⵙ ⵜⵓⴳⵜ ⵏ ⵉⵙⵓⵔⵙⵏ, ⵙⵎⴽⵍⵏⵜ ⵉⵏⴷⵍⴰⴼ ⵙ ⵜⵡⵉⵍⴰ ⵜⴰⵖⵣⵓⵔⴰⵏⵜ.
ⵢⵓⴽⵍⴰⵍ ⴰⴷ ⵏⴱⴷⵔ ⵎⴰⵙ ⴷⴰ ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⵏⵎⵓⵇⵇⴰⵔⵏ ⵏ ⵓⵎⵛⴰⵡⴰⵕ ⴰⴼⴰⴷ ⴰⴷ ⵉⵙⵎⵓⵜⵜⴳ ⵜⴰⵏⴰⴹⵉⵏ ⵏⵏⵙ ⵜⵉⵙⴳⵯⵙⴰⵏⵉⵏ ⴷ ⵜⵙⴳⵓⵎⴰⵏⵉⵏ ⴷ ⵜⵎⵙⵙⴽⵜⵉⵜⵉⵏ ⴷ ⵉⵎⵏⴰⴷⵏ ⵉⵎⵛⴰⵡⴰⵕⵏ ⵙ ⵓⵎⵙⴰⵙⴰ ⴷ ⵜⵎⵢⴰⴷⴰⵙⵜ ⵜⴰⵏⵊⵎⵓⵜ ⵉⵏⵏⴰⵍⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⵉⵙⵡⵓⵜⵜⵙⵏ ⴰⵍⴽⴰⵎ ⵏ ⵓⵎⵙⴰⴳⴰⵔ ⴷ ⵓⵙⵎⴰⴷ ⵏ ⵜⵡⵏⴳⵉⵎⵉⵏ ⵃⵎⴰ ⴰⴷ ⵉⵚⴽⵓ ⵢⴰⵏ ⵉⵥⵕⵉ ⴰⵖⵣⵓⵔⴰⵏ ⵅⴼ ⵜⵎⵍⴰⵍⵜ ⵏ ⵓⵙⵇⵇⵉⵎ ⴷ ⵜⵉⵏⴷⵉ ⵏⵏⵙ ⴳ ⵓⵙⴷⵓⵙ ⵏ ⵜⵕⵡⵉ ⴷ ⵜⵣⵔⴼⵜ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ.
ⵜⵉⵎⵉⵔⵉⵏ
