ⵉⴷⵔⵓ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵙⵙ ⵏ ⵓⵙⵉⵏⴰⵙ 22 ⵎⴰⵕⵚ 2022 ⵙ ⵜⴳⵏⵙⴰⵙⵜ ⵏ ⵎⴰⵙⵙ ⵎⵓⵕⴰⴷ ⵕⵕⴰⵖⵉⴱ, ⴰⵏⵎⵀⴰⵍ ⵏ ⵓⴱⵔⵙⵉⵔⴰ ⵏ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ, ⴳ ⵓⵎⴹⴰⴽⴰⵕ ⵅⴼ ⵡⴰⴷⴷⵓⵔ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵜⵏⵓⴼⴰ ⵉⵟⵟⴰⴼⵏ ⵉⵙⵓⴳⴰⵎ ⵢⵓⴷⴰⵏ ⵉ ⵓⴼⵔⴰⴳ ⵏ ⵉⵣⵔⴼⴰⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⴷⵍⵙⴰⵏⵏ, ⵉⵜⵜⵓⵙⵏⵎⴰⵍⴰⵏ ⴳ ⵓⵙⴰⵜⵉ ⵏ ⵜⵙⵓⵜⵍⵜ ⵜⵉⵙ 49ⵏ ⵓⵙⵇⵇⵉⵎ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵉⵜⵜⵓⵏⵎⴰⵍⴰⵏ ⴳ ⵊⵓⵏⵉⴼ ⵉⵏⴳⵔ 28 ⴱⵕⴰⵢⵕ ⴷ 01 ⵉⴱⵔⵉⵔ 2022. ⵉⵙⴷⴷⵉⴷ ⵓⵙⵇⵇⵉⵎ, ⴳ ⵜⴽⵛⵛⵓⵎⵜ ⵏⵏⵙ ⴳ ⵜⵓⴳⴳⵓⴳⵜ, ⵅⴼ ⵓⵙⵓⵖⵏ ⵏ ⵓⵎⵛⴰⵡⴰⵕ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵡⴰⵎⵓⵏ ⵓⵖⵔⵉⵎ ⴷ ⵜⵓⴳⵜ ⵏ ⵉⵎⴳⴳⴰⵢⵏ ⴳ ⵜⵙⵉⵍⴰⵡⵜ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵓⵙⵓⵜⴳ ⵏⵏⵙⵏⵜ, ⵎⴰⵢⴰ ⵏⵏ ⴰ ⵅⴼ ⴷⴰ ⵉⵜⵜⴷⵔⵓ ⵓⵙⵇⵇⵉⵎ ⴱⴰⵀⵔⴰ ⴳ ⵓⵙⴷⵓⵙ ⵏ ⵓⵎⴹⴰⴽⴰⵕ ⵉⵏⴳⵔ ⵜⵓⴳⵜ ⵏ ⵉⵏⴽⵛⴰⵎⵏ ⴷ ⵉⵎⴳⴳⴰⵢⵏ ⵅⴼ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ, ⴰⵔ ⵉⵥⵍⴰⵢ ⴽⵓ ⴰⵙⴳⴳⵯⴰⵙ ⵢⴰⵏ ⵓⴳⵣⵣⵓⵎ ⵙⴳ ⵜⴰⵏⴰⴹⵜ ⵏⵏⵙ ⵉ ⵓⵙⵓⵜⴳ ⵏ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⴰⴷ ⴷ ⵓⵎⴷⴰⵢ ⵏ ⵉⵏⴰⵥⴰⵕⵏ ⴷ ⵓⵙⵙⵓⴼⵖ ⵏ ⵉⵙⵖⵍⴰⴼ ⵉ ⵜⵓⴳⵜ ⵏ ⵉⵎⴳⴳⴰⵢⵏ. ⴳ ⵓⵙⴰⵜⵉ ⴰⴷ, ⵉⴱⵔⵔⴽ ⵓⵙⵇⵇⵉⵎ ⵙ ⵜⵙⵖⵣⵏⵜ ⵏ ⵓⵙⵍⴳⵏ-ⴰⵙⴰⵜⵉ ⵓⵟⵟⵓⵏ 21.09 ⵉⵣⴷⵉⵏ ⵙ ⵓⴼⵔⴰⴳ ⴰⵏⴰⵎⵓⵏ ⴷ ⵓⵙⵙⵓⴼⵖ ⵏ ⵓⵙⵍⴳⵏ ⵓⵟⵟⵓⵏ 72.18 ⵉⵣⴷⵉⵏ ⵙ ⵓⵎⵙⵓⵙⵔ ⴰⵏⴰⵎⵓⵏ ⵉⵎⵓⵏⵏ ⴷ ⵓⵙⴳⵎⴹ ⵏ ⴽⵕⴰⴹⵜ ⵜⵎⵢⴰⵇⵇⴰⵏⵉⵏ ⵅⴼ ⵓⵙⵎⴰⵜⴰ ⵏ ⵓⴼⵔⴰⴳ ⴰⵏⴰⵎⵓⵏ ⴳ ⵉⴱⵔⵉⵔ 2021 ⵉⵚⴰⵃⴰⵏ ⵉ ⵉⵎⴽⵔⴰⵣⵏ ⴷ ⵉⵙⴱⴱⴰⴱⵏ ⴷ ⵉⵣⵣⵓⵍⴰⵏⵏ ⴷ ⵉⵎⵙⵡⵓⵔⵉⵢⵏ ⵉⵙⵉⵎⴰⵏⵏ. ⵉⵙⵙⴽⵜⵉ ⵓⵙⵇⵇⵉⵎ ⵙ ⵜⵎⵍⴷⴰ ⴰⴷ, ⵙ ⴽⵔⴰ ⵏ ⵉⵙⵖⵍⴰⴼ ⴳ ⵓⵙⴰⵜⵉ ⴰⴷ, ⵏⵏⴰ ⴷ ⵢⵓⵡⵉⵏ ⵙ ⵓⵎⴰⵜⴰ ⵅⴼ: ⵜⴰⵙⵖⵣⵏⵜ ⵏ ⵜⵙⵜⵕⴰⵜⵉⵊⵉⵢ ⵜⴰⵏⴰⵎⵓⵔⵜ ⵏ ⵜⴷⵓⵙⵉ ⵏⵏⴰ ⵉⴳⴰⵏ ⴰⴳⵣⵣⵓⵎ ⵓⵔ ⵢⴰⵟⵟⵓⵏ ⴰⴽⴷ ⵜⵙⵔⵜⵉⵜ ⵜⴰⴳⴷⵓⴷⴰⵏⵜ ⵏ ⵓⵡⴰⵏⴽ ⵙ ⵓⵙⵏⴰⵍ ⵏⵏⵙ ⵅⴼ ⵜⵎⵢⴰⴷⴰⵙⵜ ⵜⴰⵣⵔⴼⴰⵏⵜ ⴷ ⵜⵉⵏⵏⵓⵎⵙⴰ ⵏ ⵜⵉⵍⴰⵍⵜ ⵏ ⵓⵡⴰⵏⴽ ⴳ ⵜⵏⴼⵔⵓⵜ ⵏ ⵉⵣⵔⴼⴰⵏ ⴷ ⵓⴼⵔⴰⴳ ⵏⵏⵙⵏ; ⵜⵓⵚⴽⴰ ⵏ ⵜⵙⵜⵕⴰⵜⵉⵊⵉⵜ ⵜⴰⵙⴳⵎⴰⵏⵜ ⵜⴰⵖⵣⵓⵔⴰⵏⵜ ⵉ ⵓⵙⵓⵜⴳ ⵏ ⵜⵓⵙⵙⵏⵉⵡⵉⵏ ⴷ ⵉⴼⵓⴽⵙⵏ ⴷ ⵓⴼⵙⵙⴰⵢ ⵏ ⵜⵎⵓⴽⵔⵉⵙⵉⵏ ⴷ ⵓⵎⵙⴰⵙⴰ ⴰⴽⴷ ⵓⵏⵎⵉⵍⴰ ⴷ ⵜⵙⵖⵣⵏⵜ ⵏ ⵜⵢⴰⴷⵓⵣⵜ ⵜⴰⵏⵉⵎⴰⵏⵜ ⵏⵏⴰ ⵉⴳⴰⵏ ⵢⴰⵜ ⵙⴳ ⵜⵔⵙⴰⵍ ⵏ ⵜⵙⵜⵕⴰⵜⵉⵊⵉⵜ ⴰⴷ; ⴳ ⵓⵎⴳⴳⴰⵔⵓ ⴰⵙⵎⵀⵍ ⵏ ⵜⵎⵔⵉⵙⵉⵏ ⵜⵓⵏⴱⵉⴹⵉⵏ ⴷ ⵉⵎⵙⴳⵔⴰ ⵏ ⵡⴰⵏⴰⵡ ⴰⵏⴳⵎⵓ ⴰⵎⴰⵢⵏⵓ, ⵙ ⵎⴰⴷ ⵉⵙⵙⵉⵡⵉⴹⵏ ⵙ ⵉⵡⵜⵜⴰⵙ ⵏ ⵜⴳⵎⵉ ⵜⴰⵙⵓⵍⴰⵏⵜ, ⵉⵙⵙⵓⴳⵔ ⴰⵙⴷⵓⵙ ⵏ ⵡⴰⴷⴷⵓⵔ ⴰⵏⴼⴳⴰⵏ ⴷ ⵓⵡⵜⵜⵓ ⵏ ⵉⵎⵣⴰⵔⴰⵢⵏ ⵉⵏⴰⵎⵓⵏⵏ ⴷ ⵉⵏⵊⵎⵓⵜⵏ, ⴷ ⴰⴷ ⵓⵔ ⵏⵏ ⵉⵇⴰⵎⴰ ⴰⵡⴷ ⵢⴰⵏ ⴹⴰⵕⴰⵜ ⵏ ⵓⴽⴰⴱⴰⵕ.