ⵙ ⵜⵎⵍⴷⴰ ⵏ ⵡⴰⵙⵙ ⴰⵎⴰⴹⵍⴰⵏ ⵏ ⵓⵙⴱⴷⴷⵉ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⵏⵏⵉ ⵙ ⵉⵙⴼⵓⴳⵍⵓ ⵓⵎⴰⴹⴰⵍ ⴳ 10 ⴽⵟⵓⴱⵕ ⵏ ⴽⵓ ⴰⵙⴳⴳⵯⴰⵙ, ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴰⴹⴰ ⵜⴰⵎⵖⵔⵉⴱⵉⵜ ⵎⴳⴰⵍ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴷ ⵓⵙⴰⴹⴰⴼ ⴰⵎⵖⵔⵉⴱⵉ ⵏ ⵉⵖⵣⵓⵜⵏ ⴷ ⵜⵎⵙⵎⵓⵏⵜ ⵎⴰⵕⵕⴰ ⵏⵏⵖ ⵎⴳⴰⵍ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴷ ⵉⵥⵟⵟⴰⵜⵏ ⵏ ⵉⴱⵕⵍⴰⵎⴰⵏⵉⵢⵏ ⴷ ⵉⵎⵙⵜⴰⵏⵏ ⴷ ⵉⵏⵖⵎⴰⵙⵏ ⴷ ⵉⵙⵍⵎⴰⴷⵏ ⵎⴳⴰⵍ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⵢⴰⵜ ⵜⵉⵏⴰⵡⵜ ⵜⴰⵏⵖⵎⴰⵙⵜ, ⴰⵙⵙ ⵏ ⵓⴽⵕⴰⵙ 12 ⴽⵟⵓⴱⵕ 2022 ⴳ ⵓⵙⵖⵉⵎ ⵏ ⵕⵕⴱⴰⵟ, ⴷⵔⵓⵏ ⴳⵉⵙ ⵜⵓⴳⵜ ⵏ ⵉⵎⴳⴳⴰⵢⵏ ⵉⵎⵔⵙⴰⵍⵏ ⴷ ⵓⵖⵔⵉⵎⵏ ⵏⵏⵉ ⵉⵎⵙⴰⵙⴰⵏ ⵅⴼ ⵓⵙⵓⵖⵏ ⵏ ⵓⵙⴷⵓⵙ ⵏ ⵓⵏⵄⴰⵕ ⵅⴼ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⵙⴷⴷⵉⴷⵏ ⵅⴼ ⵉⵏⵏⵉⵢ ⵏ ⵎⴰⵙ ⵜⴳⴰ ⵜⴰⵎⵔⵔⵓⵜ ⵜⴰⵔⵜⵏⴼⴳⴰⵏⵜ ⵉⵕⵥⵥⴰⵏ ⵙ ⵜⵡⵉⵍⴰ ⵉⵀⵔⵛⵏ ⴰⵣⵔⴼ ⴰⵎⵣⵡⴰⵔⵓ ⵙⴳ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵣⵔⴼ ⴳ ⵜⵓⴷⵔⵜ, ⴰⴽⵜⵜⵓⵢ ⵡⵉⵙ 20 ⴷⴷⴰⵡ ⵜⵎⴰⵜⴰⵔⵜ :"ⵜⴰⵎⵔⵔⵓⵜ ⵏ ⵜⵎⵏⵖⵉⵡⵜ: ⴰⴱⵔⵉⴷ ⵉⵏⵎⵏ ⵉ ⵓⵙⵔⴼⵓⴼⵏ"

ⴳ ⵜⴳⵓⵔⵉ ⵏⵏⵙ ⵙ ⵜⵎⵍⴷⴰ ⴰⴷ, ⵜⵙⵉⵙⴼⵉⵡ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵎⴰⵙ ⴷⴰ ⴰⵖ ⵉⵜⵜⴰⴷⵊⴰ ⵓⵙⵜⴰⵢ ⵏ ⵜⵎⴰⵜⴰⵔⵜ ⵏ ⵓⵙⴳⴳⵯⴰⵙ ⴰⴷ "ⵜⴰⵎⵔⵔⵓⵜ ⵏ ⵜⵎⵏⵖⵉⵡⵜ: ⴰⴱⵔⵉⴷ ⵉⵏⵎⵏ ⵉ ⵓⵙⵔⴼⵓⴼⵏ" ⴰⴷ ⵏⵙⵡⵉⵏⴳⵎ ⴳ ⵓⵎⵢⴰⵙⵙⴰ ⵉⵏⴳⵔ ⵓⵙⵔⴼⵓⴼⵏ ⴷ ⵓⵙⵎⵔⵙ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⵏⵉⵖ ⵜⵉⵎⵔⵔⵓⵜⵉⵏ ⵏⵉⵖ ⵉⵎⵓⴳⴳⵓⵜⵏ ⵢⴰⴹⵏⵉⵏ ⵏ ⵓⴷⵔⵡⵙ ⴷ ⵜⴰⵔⵜⵏⴼⴳⴰⵏⵜ ⴷ ⵓⵎⵔⵎⴷ, ⴰⵔ ⵜⵜⴰⵏⵏⴰⵢ ⵎⴰⵙ ⵜⴳⴰ ⵜⵎⵏⵖⵉⵡⵜ ⵜⴰⵎⵔⵔⵓⵜ ⵜⴰⵏⵉⵎⴰⵏⵜ ⴷ ⵜⵏⴰⵎⵓⵏⵜ ⵉⵏⵇⵇⴰⵏ, ⵉⵜⵜⴰⵙⵉⵏ ⴰⵏⴰⵔⵓⵣ ⴷ ⵜⵡⴰⵔⴳⵉⵜ ⵏ ⵡⵉⴷⴰ ⵙⵉⵔⵙ ⵜⵜⵡⴰⵏⴱⴰⴹⵏⵉⵏ.

ⵜⵣⵎⵎⴻⵎ ⵎⴰⵙⵙⴰ ⴱⵓⵄⵢⵢⴰⵛ ⴰⴳⴳⴰⵏⵉ ⵏ ⵡⴰⵎⵓⵏ ⴰⵏⵣⵔⴰⴼ ⴰⵎⵖⵔⵉⴱⵉ ⴷ ⵓⴳⵔⴰⵖⵍⴰⵏ ⵉ ⵓⵙⵜⴰⵢ ⵏ ⵍⵎⵖⵔⵉⴱ ⵉⵚⴰⵃⴰⵏ ⵏ ⵓⵙⵖⵍⴼ ⵏ ⵜⵙⵇⵇⵉⵎⵜ ⵜⵉⵙ ⴽⵕⴰⴹⵜ ⵉ ⵜⵎⵜⵜⴰ ⵉⵎⵓⵏⵏ ⵣⴷⵉⵏⵉⵏ ⵙ ⵓⵙⴱⴷⴷⵉ ⵏ ⵓⵣⵣⴳⵉⵔ ⵓⵍⴳⵉⵏ ⵉ ⵜⵎⵔⵔⵓⵜ ⵏ ⵜⵎⵏⵖⵉⵡⵜ "ⵉⴳⴰⵏ ⴰⵎ ⵜⴰⵙⵓⵔⵉⴼⵜ ⴳ ⵓⴱⵔⵉⴷ ⵏⵏⵖ ⵏⴽⴽⵯⵏⵉ ⵏⵏⵉ ⵉⴳⴰⵏ ⴰⵎⵓⵏ ⵏ ⵜⵓⵙⵙⵔⴰ ⵜⴰⵎⴳⴳⴰⵔⵓⵜ ⵉ ⵜⵎⵔⵔⵓⵜ ⵏ ⵜⵎⵏⵖⵉⵡⵜ", ⴷ ⵓⵍⴰ ⴰⵙⴷⵓⵙ ⵏ ⵜⴷⵔⴰⵡⵜ ⵏⵏⵙ ⴳ ⵓⵏⴰⴳⵔⴰⵡ ⴰⵖⵣⵓⵔⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵜⴰⵎⵓⵜ ⴳ ⵓⴱⵔⵓⵜⵓⴽⵓⵍ ⴰⵔⵓⵛⵛⵉⵍ ⵡⵉⵙ ⵙⵉⵏ ⵉⵥⵍⵉⵏ ⵙ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ. ⴳ ⵓⵎⵏⴰⴹ ⵏ ⵓⵙⵙⴽⵜⵉ ⵏⵏⵙ ⵙ ⵡⴰⴷⴷⴰⴷ ⵏ ⵓⵄⵔⵔⵉⵎ ⴱⵕⴰⵀⵉⵎ ⵙⵄⴷⵓⵏ, ⵏⵏⵉ ⵉⵜⵜⵡⴰⵏⴱⴰⴹⵏ ⵙ ⵜⵎⵏⵖⵉⵡⵜ ⴳ ⵓⴽⵕⴰⵏⵉⵢⴰ, ⴰⵔ ⵜⵜⴰⵏⵏⴰⵢ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵎⴰⵙ ⵉⴳⴰ ⵓⵏⵏⵓⵕⵥⵎ ⵏⵏⵙ "ⴰⵎⵓⵔⵙ ⵏ ⵓⵏⴰⴷⴰⴷ ⵏ ⵉⵎⵙⵜⴰⵏⵏ ⵅⴼ ⵜⵓⵙⵙⵔⴰ ⴷ ⵓⵙⴷⴷⵉⴷ ⵅⴼ ⵎⴰⵙ ⵓⵔ ⵜⵍⵍⵉ ⴰⵡⴷ ⵢⴰⵜ ⵜⵥⵍⴰⵢⵜ ⵜⴰⵏⴰⵎⵓⵏⵜ ⵜⴰⵎⵖⵔⵉⴱⵉⵜ ⵉ ⵡⴰⵏⵏⴰⵍ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ", ⵜⵙⴷⴷⵉⴷ ⵎⴰⵙ ⵜⵓⵡⴹ ⵜⵉⵣⵉ ⵏ ⵓⴱⵓⵢ ⴰⴽⴷ ⵜⵎⵔⵔⵓⵜ ⴰⴷ.

ⵓⵔ ⵜⴻⵜⵜⵓ ⵎⴰⵙⵙⴰ ⴱⵓⵄⵢⵢⴰⵛ ⴰⴷ ⵜⵙⵙⴽⵜⵉ ⵙ ⵜⵙⵏⵜⴰⵢⵜ ⵏⵏⵉ ⵉⵕⵥⵎ ⵓⵙⵇⵇⵉⵎ, ⵙⴳ ⵎⵔⴰⵡ ⵏ ⴽⵟⵓⴱⵕ ⴰⴷ, ⵙ ⵓⵣⵓⵣⵣⵔ ⵏ ⵜⵓⴳⴳⴰ ⵏ ⵜⵓⴳⵜ ⵏ ⵡⵉⴷⴰ ⵜⵜⵡⴰⵏⴱⴰⴹⵏⵉⵏ ⵙ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴰⴼⴰⴷ ⴰⴷ ⴰⵙⵏ ⵜⵜⵡⴰⴼⴽ ⵜⵎⵍⴷⴰ ⵏ ⵓⵙⵉⵡⵍ ⵅⴼ ⵜⵓⴼⵔⴰⵢⵉⵏ ⵏⵏⵙⵏ ⴷ ⵉⵏⵓⵔⴰⵣ ⵏⵏⵙⵏ ⵉⵡⵍⴰⵍⵍⴰⵙⵏ ⴳ ⵉⵙⴰⵔⴰⴳⵏ ⵏ ⵜⵎⵏⵖⵉⵡⵜ ⵉⵏⴳⵔ ⵓⴳⴳⴰⵏⵉ ⵏ ⵜⵎⵜⵜⴰⵏⵜ ⴷ ⵓⵏⴰⵔⵓⵣ ⴳ ⵜⵓⴷⵔⵜ. ⵙ ⵡⴰⵙⵙⴰⵖ ⵏ ⵜⴰⴹⴰ ⵜⴰⵎⵖⵔⵉⴱⵉⵜ ⵅⴼ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ", ⵉⵙⴷⴷⵉⴷ ⵓⵏⵎⵖⵓⵔ ⵄⴱⴷ ⵕⵕⴰⵃⵉⵎ ⵍⵊⴰⵎⵉⵄⵉ ⵎⴰⵙ ⵜⵙⵖⴰⵡⵙⴰ ⵜⵎⵙⴰⵔⵜ ⵏ ⵓⵣⵔⴼ ⴳ ⵜⵓⴷⵔⵜ ⵙ ⵓⵙⵎⵓⵙⵙⵓ ⵏ ⵡⴰⵎⵓⵏ ⴰⵎⵖⵔⵉⴱⵉ ⵇⴰⵃ, ⵉⴷⴷⵖ ⵉⴳⴰ ⵓⵃⵟⵟⵓ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴳ ⵓⵙⵍⴳⵏ ⴰⵏⴱⴽⴰⴹ ⴰⵎⵖⵔⵉⴱⵉ ⴰⵙⴷⵓⵙ ⵏ ⵜⵡⵓⵔⵉ ⵜⴰⵎⵅⵉⴱⵜ, ⵜⵜ ⵉⴳⴰⵏ ⴷ ⵓⵙⵔⴼⵓⴼⵏ, ⵍⵓⵎⵎⵏ ⵍⵍⵉⴳ ⵉⵜⵜⵏⴱⴽⴹ ⴳ ⵉⴹⵕⵉⵚⵏ ⵉⴳⵔⴰⵖⵍⴰⵏⵏ ⴷ ⵓⴷⵓⵙⵜⵓⵔ ⵏ ⵜⴳⵍⴷⵉⵜ ⴷ ⵉⵙⵍⴳⵏⵏ ⵉⵏⴰⵎⵓⵔⵏ.

ⵙⴳ ⵜⵙⴳⴰ ⵏⵏⵙ, ⵉⵙⵉⵙⴼⵉⵡ ⵓⴳⵏⵙⴰⵙ ⵏ "ⵓⵙⴰⴹⴰⴼ ⴰⵎⵖⵔⵉⴱⵉ ⵉ ⵉⵖⵣⵓⵜⵏ" ⵎⴰⵙ ⴰⴽⴽⵯ ⵜⵙⴰⵙⵡⴰ ⵉⵏⴳⵔ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴷ ⵓⵙⵔⴼⵓⴼⵏ, ⵉⵙⵙⵎⵜⵔ ⵎⴰⵙ ⵉⴳⴰ ⵓⵙⵍⴳⵏ ⴰⴳⵔⴰⵖⵍⴰⵏ ⴰⵏⴼⴳⴰⵏ ⴰⵙⵔⴼⵓⴼⵏ ⴷ ⵜⵕⵥⵉ ⵉⵛⵇⵇⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙⴳ ⵓⵎⵏⵉⴷ ⴰⴷ, ⴰⵔ ⵉⵜⵜⴰⵏⵏⴰⵢ ⵓⵢⵏⵔ ⵏ ⵉⵎⵙⵜⴰⵏⵏ ⵅⴼ ⵜⵓⵙⵙⵔⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵜⴰⵎⵔⵔⵓⵜ ⵜⴰⵔⵜⵏⴼⴳⴰⵏⵜ, ⴷ ⵜⵉⵏ ⵓⵎⵔⵎⴷ ⴷ ⵉⵙⵍⴽⵉ ⵓⵔ ⵉⵙⵜⵜⵖⵏ. ⴰⴳⵏⵙⴰⵙ ⵏ ⵜⵎⵙⵎⵓⵏⵜ " ⵎⴰⵕⵕⴰ ⵏⵏⵖ ⵎⴳⴰⵍ ⵜⵎⵔⵔⵓⵜ ⵏ ⵜⵎⵏⵖⵉⵡⵜ" ⵏⵜⵜⴰⵏ ⵢⵓⵍⵍⵖ ⴳ ⵜⴳⵓⵔⵉ ⵏⵏⵙ ⵙ ⵜⴷⵔⴰⵡⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵏⵄⴰⵕ ⵅⴼ ⵜⵓⵙⵙⵔⴰ ⵏ ⵜⵎⵔⵔⵓⵜ ⴰⴷ ⴷ ⵡⴰⵏⵏⴰⵍ ⵏⵏⵙ ⴰⵙⵓⵍⴰⵏ ⵉ ⵜⵎⴰⴷⴷⴰⵙⵉⵏ ⵙⵙⵓⵜⵔⵏⵉⵏ ⵜⵓⵙⵙⵔⴰ, ⴰⵔ ⵉⵜⵜⴰⵏⵏⴰⵢ ⵎⴰⵙ ⵉⴳⴰ ⵓⵙⵇⵇⵉⵎ ⵢⴰⵜ ⵙⴳ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴱⴰⵀⵔⴰⴷⵔⵓⵏⵉⵏ ⴳ ⵓⴱⵔⵉⴷ ⴰⴷ. ⵉⴷⵎⵓ ⴳ ⵓⵙⴰⵜⵉ ⴰⴷ ⵎⴰⵙ ⵔⴰⴷ ⵜⴳ ⵉⴼⵔⵉⵇⵢⴰ ⴰⵎⵏⵥⴰⵡ ⵏ ⵜⵓⵙⵙⵔⴰ ⴳ ⵎⴰⴷ ⴷ ⵉⴷⴷⴰⵏ, ⵉⴷⴷⵖ ⵢⵓⵡⴹ ⵓⵟⵟⵓⵏ ⵏ ⵉⵡⴰⵏⴽⵏ ⵏ ⵉⴼⵔⵉⵇⵢⴰ ⵙⵙⵔⵏⵉⵏ ⵜⴰⵎⵔⵔⵓⵜ ⵏ ⵜⵎⵏⵖⵉⵡⵜ ⴰⵔ ⴰⵙⵙⴰ, 23 ⵏ ⵉⵡⴰⵏⴽⵏ.

ⵙⴳ ⵜⵙⴳⴰ ⵏⵏⵙ, ⵜⵖⵔⴰ ⵜⵏⴱⴷⴰⴷⵜ ⵅⴼ ⵜⵡⵓⵔⵉⵡⵉⵏ ⴳ ⵓⴽⴰⴱⴰⵕ ⵏ ⵜⴰⵎⵓⵏⵜ ⵏ ⵓⵕⵓⴱⴱⴰ ⴳ ⵍⵎⵖⵔⵉⴱ ⵉ ⵜⵏⴱⴰⴹⵜ ⵜⴰⵎⵖⵔⵉⴱⵉⵜ ⵙ ⵓⴹⴼⴼⵓⵕ ⵏ 120 ⵏ ⵉⵡⴰⵏⴽⵏ ⵙⵙⵔⵏⵉⵏ ⵜⴰⵎⵔⵔⵓⵜ ⵏ ⵜⵎⵏⵖⵉⵡⵜ ⴳ ⵉⵙⵍⴳⵏⵏ ⵏⵏⵙⵏ, ⵙⵖⵣⵏⵏ ⵜⴰⵖⵜⴰⵙⵜ ⵏ ⵜⵎⵜⵜⴰ ⵉⵎⵓⵏⵏ ⵏⵏⵉ ⴷⴰⵔ ⴰⵣⴷⴰⵢ, ⵜⵖⵔ ⵙ ⵡⴰⵔ ⵓⵙⵎⵔⴽⵙ ⵉⵏⴳⵔ ⵓⵡⴰⴹ ⵏ ⵜⵣⵔⴼⵜ ⴷ ⵓⵖⵙⵙⵍ. ⵎⵙⴰⵙⴰⵏ ⵉⴳⵏⵙⴰⵙ ⵏ ⵉⵥⵟⵟⴰⵜⵏ ⵉⴱⵕⵍⴰⵎⴰⵏⵉⵢⵏ ⴷ ⵉⵎⵙⵜⴰⵏⵏ ⴷ ⵉⵙⵍⵎⴰⴷⵏ ⴷ ⵉⵏⵖⵎⴰⵙⵏ ⵎⴳⴰⵍ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⵅⴼ ⵎⴰⵙ ⵉⴳⴰ ⵓⵡⵜⵜⴰⵙ ⵏ ⵡⴰⵎⵓⵏ ⴰⵣⵔⴼⴰⵏ ⴰⵎⵖⵔⵉⴱⵉ ⴰⴹⴼⴼⵓⵕ ⵏ ⵍⵎⵖⵔⵉⴱ ⵉ ⵜⴱⵔⵉⴷⵜ ⵏⵏⵉ ⴹⴼⴰⵕⵏ ⵉⵡⴰⵏⴽⵏ ⵙⵙⵔⵏⵉⵏ ⵜⴰⵎⵏⵖⵉⵡⵜ ⵙⴳ ⵉⵙⵍⴳⵏⵏ ⵏⵏⵙⵏ, ⵢⴰⴷⵊ ⵜⴰⵎⵢⵓⵔⵜ ⵏ ⵜⴰⴳⵯⵉⵜ ⵏ ⵓⵙⵜⴰⵢ, ⵎⴽⴷⴰ ⵜⵖⵔⴰ ⵙ ⵜⴷⵔⴰⵡⵜ ⵉⵕⵡⴰⵏ ⵏ ⵍⵎⵖⵔⵉⴱ ⴳ ⵓⴳⵔⴰⵡ ⴰⵎⴰⴹⵍⴰⵏ ⵡⵉⵙ ⵜⴰⵎ ⵅⴼ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⵏⵏⵉ ⵔⴰⴷ ⵜⵙⴷⵍ ⴱⵉⵔⵍⵉⵏ, ⵜⵎⴰⵥⵓⵏⵜ ⵏ ⵍⴰⵍⵎⴰⵏ, ⴳ ⵓⵣⴳⵏ ⵏ ⵡⴰⵢⵢⵓⵔ ⵏ ⵏⵓⵡⴰⵏⴱⵉⵔ 2022. ⵙⴷⴷⵉⴷⵏ ⵉⵥⵟⵟⴰⵜⵏ ⴰⴷ ⵅⴼ ⵡⴰⴷⴷⵓⵔ ⵏ ⵓⵙⴼⵔⴽ ⵙ ⵡⴰⴷⴷⵓⵔ ⵏ ⵓⵣⵔⴼ ⴳ ⵜⵓⴷⵔⵜ, ⵏⵏⵉ ⵅⴼ ⵉⵙⴹⵕⵚ ⵓⴷⵓⵙⵜⵓⵔ ⴰⵎⵖⵔⵉⴱⵉ, ⴷ ⵓⵙⵉⵙⴼⵉⵡ ⵏ ⵡⴰⴷⴷⵓⵔ ⵏ ⵜⵓⵙⵙⵔⴰ ⵏ ⵜⵎⵏⵖⵉⵡⵜ ⴷ ⵉⴹⵉⵚ ⵏⵏⵙ ⵉⵅⵛⵏⵏ ⵅⴼ ⵡⴰⵎⵓⵏⵏ ⵇⴰⵃ.