ⴳ ⵓⵙⴰⵜⵉ ⵏ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⵏⵏⴰ ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵅⴼ "ⵉⵏⴰⵡⴰⵢⵏ ⴷ ⵜⵎⵙⴽⵔⵉⵏ ⵣⴷⵉⵏⵉⵏ ⵙ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴳ ⵓⵣⵎⵣ ⵏ ⵓⵙⴱⴷⴷⵉ ⴷ ⵓⵙⵙⴼⵍⴷ ⴷ ⴳ ⵜⵏⵎⴰⵜⵔⵜ ⵜⵉⵎⵉⵥⵉⵕⵜ”, ⵎⵔⴰⵔⴰⵏ ⵉⵎⴷⵔⴰⵡⵏ ⴳ ⵜⵖⵉⵎⵉⵜ ⵜⴰⵎⵣⵡⴰⵔⵓⵜ, ⵏⵏⴰ ⵉⵙⵙⵡⵀⵏ ⵎⴰⵙⵙ ⵎⵓⵃⵎⵎⴰⴷ ⵓⵊⴰⵕ, ⴰⵎⴰⵡⵙⴰⵙ ⴰⵎⵣⵡⴰⵔ ⵏ ⵜⵣⵔⴼⵜ, ⵅⴼ ⵉⵍⵓⴳⵏⵏ ⴷ ⵉⵏⴰⵡⴰⵢⵏ ⵓⵍⴳⵉⵏⵏ ⵉⴳⵔⴰⵖⵍⴰⵏⵏ ⵣⴷⵉⵏⵉⵏ ⵙ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴷ ⵜⵓⵎⵙⵉⵙⵜ ⵏⵏⵙⵏ ⴰⴽⴷ ⵉⵣⵣⵔⴰⴼⵏ ⵉⵏⴰⵎⵓⵔⵏ ⴷ ⵜⵉⵍⴰⵍⵜ ⵏ ⵜⵏⴱⴰⴹⵜ ⴳ ⵢⵉⴳⵔ ⴰⴷ. ⵙ ⵜⵎⵍⴷⴰ ⴰⴷ, ⵉⵙⵎⵏⵉⴷ ⵎⴰⵙⵙ ⵄⴱⴷ ⵕⵕⵥⵥⴰⵇ ⵕⴰⵡⴰⵏ, ⴰⵏⴳⵎⴰⵎ ⵏ ⵜⵙⵇⵇⵉⵎⵜ ⵏ ⵓⵙⴱⴷⴷⵉ ⵏ ⵓⵙⵔⴼⵓⴼⵏ ⵏ ⵜⵎⵜⵜⴰ ⵉⵎⵓⵏⵏ, ⵉⵎⵏⵏⵉⵜⵏ ⵉⴽⵙⵡⴰⵜⵏ ⵏ ⵜⵎⵢⴰⵇⵇⴰⵏⵜ ⵜⴰⴳⵔⴰⵖⵍⵏⵜ ⵏ ⵓⵙⴱⴷⴷⵉ ⵏ ⵓⵙⵔⴼⵓⴼⵏ ( ⴰⵙⵉⵙⴼⵉⵡ ⵏ ⵜⵎⵏⵜⵉⵍⵉⵏ ⵏ ⵓⵙⴱⴷⴷⵉ, ⴰⴼⵊⵊⵉⵊ ⵙ ⵓⵎⵢⴰⵡⴰⵙ ⵏ ⵢⴰⵏ ⵓⵎⵙⵜⴰⵏ, ⴰⵣⵔⴼ ⴳ ⵓⵙⵏⵖⵎⵙ ⵏ ⵜⴼⵓⵍⵜ ⵜⵉⵙ ⴽⵕⴰⴹⵜ, ⴰⵣⵣⵔⴰⵢ ⵅⴼ ⵉⵍⵓⴳⵏⵏ ⵏ ⵓⵙⵙⴼⵍⴷ ⴷ ⵜⴱⵔⵉⴷⵉⵏ ⵏⵏⵙ ⴷ ⵜⵖⵍⴰⴼ ⵏⵏⵙ ⴷ ⵜⵎⵙⴽⵔⵉⵏ ⵏⵏⵙ, ⴰⵣⵎⵎⴻⵎ ⴰⵙⵍⵉⵥⵕ, ⴷ ⵓⴳⴳⴰⵔ), ⵉⵙⵎⵍ ⵎⴰⵙ ⵣⴷⵉⵏ ⵉⵏⴰⵡⴰⵢⵏ ⵏⵜⴰⵢⵏⵉⵏ ⵙ ⵉⵙⴱⴷⴰⴷⵏ ⵏ ⵜⵎⵜⵜⴰⵡⵉⵏ ⴰⴷ ⵙ ⵜⵎⴳⴳⵉⵜⵉⵏ ⵜⵓⵣⵣⵔⵉⴼⵉⵏ ⴷ ⵜⵎⵙⵙⵓⴳⵓⵔⵉⵏ ⴷ ⵜⵏⵣⵔⴼⵉⵏ ⵙ ⴷ ⵉⵇⵇⴰⵏ ⴰⴷ ⵙⵖⵣⵏⵏ ⵉⵡⴰⵏⴽⵏ ⴳⴰⵏⵉⵏ ⵜⵉⴼⵓⵍⵉⵏ ⵉ ⵓⵙⴱⴷⴷⵉ ⵏ ⵓⴱⴽⴽⵉⴹ ⵏ ⵓⵙⵔⴼⵓⴼⵏ ⵙ ⵉⵅⵚⵚⴰ ⴰⴷ ⴷⵉⴷⵙ ⵎⵙⴰⵙⴰⵏⵜ, ⵉⵙⵙⵎⵜⵔ ⵎⴰⵙ ⴱⴷⴷⴰ ⵜⵇⵇⴰⵔ ⵜⵙⵇⵇⵉⵎⵜ ⵉ ⵉⵡⴰⵏⴽ ⴳⴰⵏⵉⵏ ⵜⵉⴼⵓⵍⵉⵏ, ⵙ ⵜⵎⵍⴷⴰ ⵏ ⵓⵣⵣⵔⴰⵢ ⵅⴼ ⵜⴰⵏⴰⴹⵉⵏ ⵏⵏⵙⵏ ⵜⵉⵣⵎⵣⴰⵏⵉⵏ, ⵙ ⵓⵙⴱⴽⴽⴹ ⵏ ⵓⵙⵔⴼⵓⴼⵏ ⴷ ⵓⵙⵎⵀⵍ ⵏ ⵜⵏⴼⵔⵓⵜⵉⵏ ⴰⴷ ⴷ ⵓⵙⵎⵓⵜⵜⴳ ⵏ ⵜⵙⵜⵔⴰⵜⵉⵊⵉⵢⵉⵏ ⵉⴼⴰⵡⵏ ⴳ ⵓⵎⵏⵉⴷ ⴰⴷ. ⴳ ⵎⴰⴷ ⵉⵥⵍⵉⵏ ⵙ ⵓⵏⴰⴳⵔⴰⵡ ⴰⴼⵔⵉⵇⵉ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵙⵎⵏⵉⴷ ⵎⴰⵙⵙ ⵔⵉⵎⵉ ⵏⴳⵓⵢ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ, ⵜⵉⵏⴼⵔⵓⵜⵉⵏ ⵜⵓⵍⴳⵉⵏⵉⵏ ⴷ ⵜⵏⵣⵔⴰⴼⵉⵏ ⵜⵉⴽⵙⵡⴰⵜⵉⵏ ⵏⵏⴰ ⵜⵙⵙⵓⵊⴰⴷ ⵜⵙⵇⵇⵉⵎⵜ ⵉ ⵓⴼⵔⴰⴳ ⵙⴳ ⵓⵙⵔⴼⵓⴼⵏ ⴷ ⵓⵙⴱⴷⴷⵉ ⵏⵏⵙ ⴰⵎ: ⵜⴰⴹⴰ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ, ⵜⴰⵙⵇⵇⵉⵎⵜ ⵏ ⵓⵙⴱⴷⴷⵉ ⵏ ⵓⵙⵔⴼⵓⴼⵏ ⴳ ⵉⴼⵔⵉⵇⵢⴰ, ⵜⴰⴹⴰ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⴷ ⵓⴼⵊⵊⵉⵊ ⵏ ⵡⴰⵣⵣⴰⵏⵏ, ⵉⵎⵏⵣⴰⵢⵏ ⵏ ⵓⵙⵡⴰⵍⴰ “ⵔⵓⴱⵏ ⴰⵢⵍⴰⵏⴷ”, ⵉⵎⵏⵣⴰⵢⵏ ⵏ ⵓⵙⵡⴰⵍⴰ “ⵍⵓⵡⴰⵏⴷⴰ”, ⵜⴰⵙⵏⴱⴹⴰⵢⵜ ⵜⴰⴼⵔⵉⵇⵉⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⴷⴰⵏⵏ, ⴷ ⵓⴳⴳⴰⵔ. ⵉⵙⵉⵙⴼⵉⵡ ⵎⴰⵙ ⵉⵜⵜⵡⴰⵜⵜⵔ ⵙⴳ ⵉⵡⴰⵏⴽⵏ ⴳⴰⵏⵉⵏ ⵜⵉⴼⵓⵍⵉⵏ ⴰⴷ ⵙⵎⵀⵍⵏ ⵜⵉⵏⴼⵔⵓⵜⵉⵏ ⴰⴷ ⵜⵓⵍⴳⵉⵏⵉⵏ ⴷ ⵜⵏⵣⵔⴰⴼⵉⵏ ⴳ ⵓⵣⵎⵣ ⵓⵙⴱⴷⴷⵉ ⴷ ⵓⵙⵙⴼⵍⴷ ⴷ ⵜⵏⵎⴰⵜⵔⵜ ⵜⵉⵎⵉⵥⵉⵕⵜ, ⴷ ⴰⵡⴷ ⵎⴰⴷ ⵉⵥⵍⵉⵏ ⵙ ⵜⵎⵙⴰⵔⵉⵏ ⵣⴷⵉⵏⵉⵏ ⵙ ⵜⵡⵓⵔⵉⵡⵉⵏ ⵜⵉⴱⵔⵙⴳⴳⵯⴰⴷⵉⵏ, ⵉⵙⵙⴼⴰⵡ ⵎⴰⵙ ⴷⴰ ⵜⵜⵏⴼⵔⵓⵏⵜ ⴰⵡⴷ ⵉⵣⵔⴼⴰⵏ ⵏ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⴽⵓⴽⴹ ⴷ ⵜⵡⵜⵎⵉⵏ ⴷ ⵡⴰⵣⵣⴰⵏⵏ ⴷ ⵓⴳⴳⵉⴷⵏ ⴳ ⵓⵙⵓⵔⵙ ⵏ ⵓⵎⵎⵓⵄⴹⵕ. ⵙⴳ ⵜⵙⴳ ⵏⵏⵙ, ⵉⵙⵉⵙⴼⵉⵡ ⵎⴰⵙⵙ ⵃⴰⴽⵉⵎ ⵡⵔⴷⵉ, ⵉⵏⴱⴹⵉ ⴰⵎⴹⴼⴰⵕ, ⴰⴳⵎⴰⵎ ⴳ ⵓⴱⵔⵙⵉⵔⴰ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵜⵏⴱⴰⴹⵜ ⵜⴰⵏⵣⵔⴰⴼⵜ, ⵎⴰⵙ ⵉⵟⵟⴰⴼ ⵍⵎⵖⵔⵉⴱ ⵢⴰⵜ ⵜⵉⵔⵎⵉⵜ ⵜⴰⵎⵇⵇⵔⴰⵏⵜ ⴳ ⵓⴱⵔⵉⴷ ⵏ ⵓⵙⴱⴷⴷⵉ ⵏ ⵓⵙⵔⴼⵓⴼⵏ ⴳ ⵓⵙⵡⵉⵔ ⵓⵣⵔⵉⴼ ⴷ ⵓⵏⵣⵔⴰⴼ ⵉ ⵓⵙⵎⵀⵍ ⵏ ⵜⵎⵢⴰⵇⵇⴰⵏⵜ ⵜⴰⴳⵔⴰⵖⵍⴰⵏⵜ ⵉ ⵓⵙⴱⴷⴷⵉ ⵏ ⵓⵙⵔⴼⵓⴼⵏ. ⵉⵙⵙⵎⵜⵔ ⵎⴰⵙ ⵉⵣⴷⵉ ⵓⵡⵇⵇⵔ ⵏ ⵜⵏⴼⵔⵓⵜⵉⵏ ⵜⵓⵍⴳⵉⵏⵉⵏ ⴷ ⵜⵏⵣⵔⴰⴼⵉⵏ ⵉⵙⵓⵖⵏⵏ ⵉ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⵙ ⵜⵙⵏⵙⵉ ⵏⵏⵙⵏⵜ ⴷ ⵓⵙⵎⵀⵍ ⵏ ⵓⵙⴱⴷⴷⵉ ⵏⵏⵙ ⵙ ⵜⵎⵙⴽⵔⵜ ⵜⴰⵎⵢⴰⴳⴰⵏⵜ ⵉⵜⵜⴼⵔⴰⴳⵏ ⴰⵏⵎⵓⵔⵉ ⴳ ⵓⵎⵏⴰⵍⴰ ⵏ ⴽⵔⴰⵢⴳⴰⵜ ⵜⵕⵥⵉ ⵏⵏⵙⵏⵜ (ⵜⵓⵍⴳⵉⵏⵜ ⵏ ⵓⵙⴱⴷⴷⵉ, ⴰⵙⵏⵖⵎⵙ ⵏ ⵜⵡⵊⵉⵡⵉⵏ, ⴰⵙⵓⵔⴼ ⵙ ⵓⵔⵣⴰⴼ ⵉ ⵓⵎⵙⵜⴰⵏ ⵏ ⵓⴳⴳⵉⴷ ⵉⵜⵜⵡⴰⵙⵙⴱⴷⴰⴷⵏ, ⵜⵉⵣⵉ ⵏ ⵓⵙⵔⵓⵙ ⴷ ⵜⵎⵙⵓⵜⴰⵍ ⵏⵏⵙ, ⵓⵜⵛⵉ ⴷ ⵓⵙⵓⵊⵊⵉ, ⵜⴰⵣⴷⴳⵉ, ⴰⵏⵜⴰⵎ) ⵙⵍⴰⵡⴰⵏ ⴰⴽⴽⵯ ⴳ ⵓⵣⵎⵣ ⵏ ⵜⵏⵎⴰⵜⵔⵜ ⵜⵉⵎⵉⵥⵉⵕⵜ. ⵜⵙⵎⵏⵉⴷ ⵎⴰⵙⵙⴰ ⴽⴰⵡⵟⴰⵕ ⵍⵛⵀⴱ, ⵜⵉⵏⴱⴹⵉⵜ ⵉⵜⵜⵓⵙⵎⴰⴳⵍⵏ ⵙ ⵜⵎⵙⴰⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵜⴰⵎⵀⵍⴰ ⵏ ⵜⵖⴰⵡⵙⵉⵡⵉⵏ ⵜⵉⵏⴱⴽⴰⴹⵉⵏ ⴷ ⵓⵙⵓⵔⴼ ⴳ ⵜⵎⴰⵡⴰⵙⵜ ⵏ ⵜⵣⵔⴼⵜ, ⵜⵉⵍⵍⴰⵡⵜ ⵏ ⵜⵙⵔⵜⵉⵜ ⵜⴰⵏⴱⴽⴰⴹⵜ ⴳ ⵢⵉⴳⵔ ⵏ ⵓⵙⴱⴷⴷⵉ ⵏ ⵓⵙⵔⴼⵓⴼⵏ ⴳ ⵜⴳⵔⵓⵎⵎⴰ ⵏ ⵓⵙⵍⴳⵏ ⴰⵏⴱⴽⴰⴹ ⴷ ⵜⴱⵔⵉⴷⵜ ⵜⴰⵏⴱⴽⴰⴹⵜ, ⵜⵙⵙⵎⵜⵔ ⵎⴰⵙ ⵉⵙⴱⴽⴽⴹ ⵍⵎⵖⵔⵉⴱ ⴰⵙⵔⴼⵓⴼⵏ, ⵎⴰⵢⴰ ⵏⵏ ⴰⴷ ⵉⴳⴰⵏ ⵜⴰⵙⵓⵔⵉⴼⵜ ⵜⴰⴽⵙⵡⴰⵜ ⴳ ⵢⵉⴳⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵔⵙⵏ ⵙ ⵎⴰⴷ ⵉⵎⵙⴰⵙⴰⵏ ⴰⴽⴷ ⵓⴳⴷⴷⵓⵍ ⵏ ⵓⵙⵔⴼⵓⴼⵏ ⵙ ⵡⴰⵏⴰⵡⵏ ⵏⵏⵙ ⵇⴰⵃ. ⵉ ⵓⵙⴽⵜⵉ, ⵜⴰⵎⵓ ⵜⵉⵏⴰⵡⵜ ⴰⴷ ⵜⴰⴳⵔⴰⵖⵍⴰⵏⵜ, ⵉⵜⵜⵓⵙⵏⵎⴰⵍⴰⵏ ⴰⵙⵙ ⵏ ⵓⵙⵉⵏⴰⵙ 20 ⵛⵓⵜⴰⵏⴱⵉⵔ 2022, ⵜⵎⵢⴰⵇⵇⴰⵏⵜ ⵏ ⵓⵎⵢⴰⵡⴰⵙ ⵉⵏⴳⵔ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ, ⵙⵡⵓⵔⵉⵏ ⴳⵉⵙ ⵉⵎⴷⵔⴰⵡⵏ ⵅⴼ ⵜⵖⵓⵔⵉ ⵏ ⵜⵏⴼⵔⵓⵜⵉⵏ ⵜⵓⵍⴳⵉⵏⵉⵏ ⴷ ⵜⵏⵣⵔⴰⴼⵉⵏ ⵉ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴷ ⵉⵎⴰⵙⵙⵏ ⴷ ⵜⵎⴳⴳⵉⵜⵉⵏ ⵏ ⵡⴰⵔⴰⵢ ⵙⴳⵉⵙ, ⵙ ⵜⴷⵔⴰⵡⵜ ⵏ ⵉⵎⵓⵣⴰⵢⵏ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ ⴷ ⵉⴳⵏⵙⴰⵙ ⵏ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴷ ⵜⵊⵉⴹⵕⵎⵜ ⵜⴰⴳⵍⴷⴰⵏⵜ ⴷ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵜⵏⴱⴰⴹⵜ ⵜⴰⵏⴱⴽⴰⴹⵜ ⴷ ⵜⵏⵙⵙⵉⵅⴼⵜ ⵏ ⵜⵎⵓⵔⴰⵢⵜ ⵜⴰⵎⴰⵜⴰⵢⵜ ⴷ ⵜⵎⴰⵡⴰⵙⵜ ⵏ ⵜⵣⵔⴼⵜ ⴷ ⵜⵎⴰⴷⴷⴰⵙⵉⵏ ⵏ ⵡⴰⵎⵓⵏ ⵓⵖⵔⵉⵎ ⴷ ⵜⵙⴷⴰⵡⵉⵢⵉⵏ ⴷ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵎⴰⵙⵙⵏ ⵉⵏⴰⵎⵓⵔⵏ ⵏ ⵡⴰⵔⴰⵢ ⵙⴳ ⵓⵙⵔⴼⵓⴼⵏ, ⴷ ⵓⴳⴳⴰⵔ.