ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵓⵎⵢⴰⵡⴰⵙ ⴰⴽⴷ ⵜⵎⵚⵕⵉⵢⵜ ⵜⴰⴳⵔⴰⵖⵍⴰⵏⵜ ⵏ ⵉⵄⵔⵔⵉⵎⵏ ⴳ ⵕⵕⴱⴰⵟ (JCI RABAT), ⴰⵙⵙ ⵏ ⵓⴽⵡⴰⵙ 31 ⴽⵟⵓⴱⵕ 2024, ⵜⴰⵙⵓⵜⵍⵜ ⵏⵏⵙ ⵜⵉⵙⵙ ⵚⴹⵉⵚⵜ ⵏ ⵓⵙⵎⵓⵜⵜⴳ ⴳ ⵓⵙⴰⵜⵉ ⵏ ⵜⵙⵓⵡⴰⵔ ⵏ ⵓⵙⵎⵓⵜⵜⴳ "ⵙⴰⵡⵍⴰⵜ ⴰⵖ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ!"

ⵜⴳⴰ ⵜⵙⴰⵡⵔⵜ ⴰⴷ, ⵍⵍⵉ ⵉⵙⵙⵓⵜⵉⵢ ⵎⴰⵙⵙ ⵄⴱⴷ ⵍⵖⵏⵉ ⴱⵔⴷⵉ, ⴰⵏⵙⵙⵉⵅⴼ ⵏ ⵜⵣⵓⵏⵉ ⵏ ⵜⴰⵜⵉⴽⵏⵓⵍⵓⵊⵉⵜ ⴷ ⵓⵙⴰⵢⵔⴰⵔ ⴰⵎⵓⵟⵟⵓⵏ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵣⵎⵣⵣⵓ ⵉ ⵉⵎⴷⵔⴰⵡⵏ ⴰⴼⴰⴷ ⴰⴷ ⵉⵙⴰⵏⵏ ⵉⵔⵎⵎⵓⵙⵏ ⵉⴷⵙⵍⴰⵏⵏ ⵉⵣⴷⵉⵏ ⵙ ⵉⵣⵎⴰⵣ ⴷ ⵜⵏⵥⴰⵕ ⵏ ⵓⵙⴰⵢⵔⴰⵔ ⴰⵎⵓⵟⵟⵓⵏ ⴷ ⵉⵏⴰⴳⵔⴰⵡⵏ ⵏ ⵜⵖⵉⵙⵜ ⵜⵉⵎⵍⵥⵉⵜ ⵅⴼ ⵜⴷⵔⴼⵉⵏ ⴷ ⵉⵣⵔⴼⴰⵏ ⵏ ⵓⴼⴳⴰⵏ.

ⵎⴽⴷⴰ ⵜⵙⵙⵏ ⵜⵙⵓⵜⵍⵜ ⴰⴷ ⴰⵙⵙⵉⴷⴷ ⵅⴼ ⵓⵣⴷⴰⵢ ⵉⵏⴳⵔ ⵉⵣⵔⴼⴰⵏ ⴷ ⵓⵙⴰⵢⵔⴰⵔ ⴰⵎⵓⵟⵟⵓⵏ: ⵜⴰⴷⵔⴼⵉ ⵏ ⵓⵎⵏⴰⴷ ⴷ ⵓⵡⵏⵏⵉ, ⴰⵣⵔⴼ ⴳ ⵜⵓⴷⵔⵜ ⵉⵥⵍⵉⵏ, ⵜⴰⴷⵔⴼⵉ ⵏ ⵜⵏⵖⵎⴰⵙⵜ, ⵜⴰⴷⵔⴼⵉ ⵏ ⵡⴰⴷⴰⴼ ⵙ ⵓⵎⵍⵉ, ⵉⵙⴽⵉⵍ ⴷ ⵡⴰⵔ ⴰⵙⵏⵓⵃⵢⵓ....

ⴰⴷ ⵏⵙⴽⵜⵉ ⵎⴰⵙ ⵙⵡⴰⵜⵜⵙⵏⵜ ⵜⵙⵓⵡⴰⵔ ⴰⴷ ⵏ ⵓⵙⵎⵓⵜⵜⴳ ⴰⴷ ⵙⵎⵖⵔⵏⵜ ⵜⵉⵣⵎⵎⴰⵔ ⴷ ⵜⵓⵙⵙⵏⴰ ⵏ ⵉⵄⵔⵔⵉⵎⵏ ⴷⵔⵓⵏⵉⵏ ⴳ ⵎⴰⴷ ⵉⵥⵍⵉⵏ ⵙ ⵉⵔⵎⵎⵓⵙⵏ ⵉⴷⵙⵍⴰⵏⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⴼⵔⴽ ⵏⵏⵙ ⵙ ⵉⵎⵙⵓⵔⴰⵙ ⴷ ⵜⵏⵥⴰⵕ ⵉⵣⴷⵉⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⵎⴽⴷⴰ ⵙ ⵜⵜⵡⴰⵙⵙⴰⵏⵏ ⴳ ⵓⵙⵡⵉⵔ ⴰⵖⵣⵓⵔⴰⵏ.

ⴰⵎⵓⵏⵜ ⵜⵙⵓⵡⴰⵔ ⴰⴷ ⵏ ⵓⵙⵎⵓⵜⵜⴳ, ⵍⵍⵉ ⵔⴰⴷ ⵉⵜⵜⵓⵙⵏⵎⴰⵍⴰ ⴽⵓ ⴰⵙⵙ ⵏ ⵓⴽⵡⴰⵙ ⴰⵔ 7 ⵏⵓⵡⴰⵏⴱⵉⵔ 2024, ⴳ ⵓⵙⴰⵜⵉ ⵏ ⵢⴰⵏ ⵓⵙⵏⵜⵉ ⵉⵛⵛⴰⵔⵏ ⵉⵏⴳⵔ ⵓⵙⵇⵇⵉⵎ ⴷ ⵜⵎⵙⵎⵓⵏⵜ ⵏ "ⵜⵎⵚⵕⵉⵢⵜ ⵜⴰⵄⵔⵔⵉⵎⵜ ⵜⴰⴳⵔⴰⵖⵍⴰⵏⵜ ⴳ ⵕⵕⴱⴰⵟ", ⵙⵡⴰⵜⵜⵙⵏ ⵉⵔⵉⵎ ⵏ ⵉⵄⵔⵔⵉⵎⵏ ⴳ ⵢⵉⴳⵔ ⵏ ⵓⵎⵣⴰⵖ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵙⵎⵓⵜⵜⴳ ⵏⵏⵙⵏ ⵙ ⵉⵎⴰⵙⵙⵏ ⵉⵏⴱⵣⴰⵣⵏ ⴰⴼⴰⴷ ⴰⴷ ⴳⵉⵏ ⵉⵎⵙⴽⴰⵔⵏ ⵉⵎⵙⵙⵓⵖⵏⵏ ⴳ ⵡⴰⵎⵓⵏ ⵓⵖⵔⵉⵎ.