ⵜⴰⵏⴰⴹⵜ ⵜⴰⵙⴳⵯⵙⴰⵏⵜ ⵅⴼ ⵡⴰⴷⴷⴰⴷ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵍⵎⵖⵔⵉⴱ ⴳ ⵓⵙⴳⴳⵯⴰⵙ ⵏ 2022: "ⴰⵍⴰⵙ ⵏ ⵓⵏⵎⴰⵍⴰ ⵏ ⵉⵙⵉⵣⵡⵉⵔⵏ ⵉ ⵓⵙⴷⵓⵙ ⵏ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ" ⵉⵙⵙⴰⴼⵖ ⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵙⵙ ⵏ ⴰⴽⵕⴰⵙ 10 ⵎⴰⵢⵢⵓ 2023, ⵜⴰⵏⴰⴹⵜ ⵏⵏⵙ ⵜⴰⵙⴳⵯⵙⴰⵏⵜ ⵅⴼ ⵡⴰⴷⴷⴰⴷ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵍⵎⵖⵔⵉⴱ ⴳ ⵓⵙⴳⴳⵯⴰⵙ ⵏ 2022: "ⴰⵍⴰⵙ ⵏ ⵓⵏⵎⴰⵍⴰ ⵏ ⵉⵙⵉⵣⵡⵉⵔⵏ ⵉ ⵓⵙⴷⵓⵙ ⵏ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ" ⵏⵏⵉ ⵉⴳⴰⵏ ⵜⵉⵎⵔⵙⵍⵜ ⵜⴰⵏⴰⵎⵓⵔⵜ ⵜⴰⵏⵎⴰⴳⵓⵜⵜ ⴷ ⵜⵙⵉⵎⴰⵏⵜ, ⵍⴰ ⵏⵏ ⵜⴻⵜⵜⵡⴰⵍⴰ ⴰⵣⵣⵔⴰⵢ ⵏ ⵜⵎⵙⴰⵔⵉⵏ ⴰⴽⴽⵯ ⵥⵍⵉⵏⵉⵏ ⵙ ⵓⵎⵣⴰⵖ ⴷ ⵡⴰⵔⴰⵢ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴷⵔⴼⵉⵏ, ⴷ ⵜⵏⴼⵔⵓⵜ ⵏ ⵓⵙⵎⵔⵙ ⵏⵏⵙⵏ ⵉⵙⵎⴷⵏ, ⴷ ⵜⵏⴽⵔⴰ ⵙⵔⵙⵏ ⴷ ⵓⴼⵔⴰⴳ ⵏ ⵓⴱⵓⵔⵣ ⴷ ⵉⵣⵔⴼⴰⵏ ⴷ ⵜⴷⵔⴼⵉⵏ ⵏ ⵜⵏⵎⵓⵔⵉⵢⵉⵏ ⴷ ⵉⵏⵎⵓⵔⴰⵏ, ⴷ ⵙ ⵓⵙⵎⵀⵍ ⵏ ⵜⵎⵜⵜⴰⵡⵉⵏ 48 ⴷ 51 ⵏ ⵓⵙⵍⴳⵏ 76.15 ⵉⵣⴷⵉⵏ ⵙ ⵡⴰⵍⴰⵙ ⵏ ⵓⵏⵎⴰⵍⴰ ⵏⵏⵙ; ⴷ ⴹⴰⵕⴰⵜ ⵎⴰⴷ ⵜ ⵉⵙⵖⵣⵏ ⵓⴳⵔⴰⵡ ⴰⵎⴰⵜⴰⵢ ⵙ ⵓⵙⵎⴰⵜⴰ.

ⵜⵙⵙⵎⵜⵔ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⴳ ⵜⴳⵓⵔⵉ ⵏⵏⵙ ⴳ ⵜⵉⵏⴰⵡⵜ ⵜⴰⵏⵖⵎⴰⵙⵜ ⵎⴰⵙ ⵜⴳⴰ ⵜⴰⵏⴰⴹⵜ ⴰⴷ ⵜⴰⵙⴳⵯⵙⴰⵏⵜ ⵜⴰⵏⴰⴹⵜ ⵜⵉⵙ ⴽⴽⵓⵥⵜ ⴳ ⵜⵥⵍⴰⵢⵜ ⵏ ⵖⵉⵍⴰⴷ ⵏ ⵓⵙⵇⵇⵉⵎ, ⵉⴷⴷⵓ ⴷ ⴳ ⵓⵣⵎⵣ ⵏ ⵓⵙⴼⵓⴳⵍⵓ ⵏ ⵓⵙⵇⵇⵉⵎ ⵙ ⵓⴽⵜⵜⵓⵢ ⵡⵉⵙ 33 ⵏ ⵓⵙⵔⵓⵙ ⵏⵏⵙ, ⵜⵉⵏⵉ ⵎⴰⵙ ⴷⴰ ⵉⵜⵜⵙⴷⴷⵉⴷ ⵓⴱⵔⵉⴷ ⴰⴷ ⵜⴰⴷⵔⴰⵡⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵓⵏⴰⴳⵔⴰⵡ ⴰⵡⵓⵔⵎⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵣⵣⵉⴳⵣⵜ ⵏ ⵓⵙⵇⵇⵉⵎ ⴳ ⵓⵙⵡⵓⵔⵉ ⵏⵏⵙ ⵅⴼ ⵜⵎⵙⴰⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴽⵛⵛⵓⵎⵉⵏ ⵏⵏⵙ ⵣⴷⵉⵏⵉⵏ ⵙ ⵓⴼⵔⴰⴳ ⴷ ⵜⵏⴽⵔⴰ ⴷ ⵡⴰⵔⴰⵢ ⵙⴳ ⵜⵕⵥⵉⵢⵉⵏ (...) ⴰⵔ ⵉⵎⵎⴰⵍ ⵜⵉⵎⵉⵜⴰⵔ ⵜⵉⵎⵇⵇⵔⴰⵏⵉⵏ ⵏ ⵡⴰⴷⴷⴰⴷ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵍⵎⵖⵔⵉⴱ. ⵙ ⵜⵓⵚⴽⴰ ⵅⴼ ⵜⵖⵔⵉ ⵉⵕⵚⴰⵏ ⵉ ⵜⴳⵔⵓⵎⵎⴰ ⵏ ⵜⵎⵏⵜⵉⵍⵉⵏ ⵉⵜⵜⴹⵉⵚⵏ ⵅⴼ ⵜⵡⵓⵔⵉ ⵏ ⵜⵓⴳⵜ ⵏ ⵉⵙⴳⵔⵏ ⵏ ⵓⵏⴰⴳⵔⴰⵡ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ.

ⵜⵙⵙⴽⵕⵥ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⴷ ⴽⵓ ⴰⵙⴳⴳⵯⴰⵙ, "ⵉⴱⴷⴷ ⵓⵙⵎⵓⵜⵜⴳ ⵏ ⵜⴰⵏⴰⴹⵜ ⵅⴼ ⵢⴰⵜ ⵜⵎⵢⴰⴷⴰⵙⵜ ⵜⴰⵏⵊⵎⵓⵜ, ⵉⴷⴷⵖ ⵜ ⵜⵙⵎⵓⵜⵜⴳ ⵢⴰⵜ ⵜⴰⵢⵎⵓⵏⵜ ⵜⴰⵎⵥⵍⵉⵜ ⴷⴷⴰⵡ ⵓⵜⵓⵢ ⵏ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴷ ⵜⴷⵔⴰⵡⵜ ⵏ ⵇⴰⵃ ⵉⵙⴳⵔⵏ ⵏ ⵓⵙⵇⵇⵉⵎ ⵙⴳ ⵉⴳⵎⴰⵎⵏ ⵏ ⵓⴳⵔⴰⵡ ⴰⵎⴰⵜⴰⵢ ⴷ ⵓⵙⵉⵔⴰ ⵏ ⵓⵙⵇⵇⵉⵎ ⴷ ⵜⵙⵇⵇⵉⵎⵉⵏ ⵜⵉⵏⵎⵏⴰⴹⵉⵏ ⴷ ⵉⵎⴰⵙⵙⵏ ⵉⵏⴰⵎⵓⵔⵏ ⴷ ⵜⵓⵚⴽⵉⵡⵉⵏ ⵜⵉⵎⵙⵙⵓⴳⵓⵔⵉⵏ".

ⵉ ⵓⵙⴽⵜⵉ, ⴷⴰ ⵜⵙⵎⵏⵉⴷ ⵜⴰⵏⴰⴹⵜ ⵏ ⵓⵙⵇⵇⵉⵎ, ⵏⵏⵉ ⴳ ⵍⵍⴰⵏⵜ 300 ⵏ ⵜⴰⵙⵏⵉⵡⵉⵏ, ⵓⵎⵍⴰⵏ ⵏⵖⴷⵏⵉⵏ ⴷ ⵉⵎⵙⵖⴰⵔⵓⵜⵏ ⵉⵜⵜⴰⴷⵊⴰⵏ ⵉⵎⵖⵔⵉ ⴷ ⵓⵎⵏⵜⴰⵢ ⴰⴷ ⵉⵙⵙⵓⵜⴳ ⵜⴰⵣⵣⵉⴳⵣⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⴳⵍⴷⵉⵜ ⴷ ⵓⵎⴹⴰⴽⴰⵕ ⴰⴷⵖⵔⵉ ⴷ ⵓⵎⵢⴰⵏⴰⵡ ⵏ ⵎⴰⵕⵕⴰ ⵉⵎⴳⴳⴰⵢⵏ ⵅⴼ ⵓⵎⵄⵉⵏⵏ ⵉⵜⵜⴳⴰⴷⴰⵢⵏ ⵉ ⵓⵙⴷⵓⵙ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵉⵏⴰⵥⴰⵕⵏ ⵏⵏⵉ ⵉⵜⵜⵎⵏⴰⵍⴰⵏ ⴰⴼⵊⵊⵉⵊ ⴰⵎⵢⴰⴳⴰⵏ ⵙ ⵉⵣⵔⴼⴰⵏ ⴷ ⵜⴷⵔⴼⵉⵏ. ⵎⴽⴷⴰ ⴳⵉⵙ ⵍⵍⴰⵏ 249 ⵏ ⵉⵙⵖⵍⴰⴼ ⵉⵙⴳⵓⵎⴰⵏⵏ ⵏⵉⵖ ⵉⵎⴰⵜⴰⵢⵏ, ⵙⴳⵉⵙⵏ 87 ⵏ ⵓⵙⵖⵍⴼ ⵙⵙⴰⴼⵖⵏ ⵜⵏ ⴷ ⵉⵎⴰⵙⵙⵏ ⵉⵏⴰⵎⵓⵔⵏ ⴷ 41 ⵏ ⵓⵙⵖⵍⴼ ⵓⵚⴽⵉⵡ ⵣⴷⵉⵏⵉⵏ ⵙ ⵜⵎⵙⴽⵔⵜ ⵜⴰⵎⵢⴰⵇⵇⴰⵏⵜ ⵏ ⵍⵎⵖⵔⵉⴱ ⴷ ⵓⵎⵢⴰⵖ ⵏⵏⵙ ⴰⴽⴷ ⵓⵏⴰⴳⵔⴰⵡ ⴰⴳⵔⴰⵖⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵙ ⵓⵙⴰⵜⵉ ⵓⵍⴳⵉⵏ ⴷ ⵓⵎⵔⵙⴰⵍ ⴷ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵉⵖⴰⵡⴰⵙⵏ ⴷ ⵜⵎⵙⴽⵔⵉⵏ.