ⵍⵍⴰⵏ ⴳ ⵜⴰⵏⴰⴹⵜ ⵏ ⵓⵙⵇⵇⵉⵎ 332 ⵏ ⵓⵙⵖⵍⴼ ⴰⵎⵙⵖⴰⵔⵓ ⵏⵉⵖ ⴰⵎⴰⵜⴰⵢ, ⴳⵉⵙⵏ 122 ⵏ ⵓⵙⵖⵍⴼ ⵙⵙⴰⴼⵖⵏ ⵜⵏ ⴷ ⵉⵎⴰⵙⵙⵏ ⵉⵏⴰⵎⵓⵔⵏ ⵙ ⴽⵕⴰⴹ ⴷ 41 ⵏ ⵓⵙⵖⵍⴼ ⵓⵚⴽⵉⵡ.

ⵉⵙⵙⴰⴼⵖ ⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵙⵙ ⵏ ⵓⵙⵉⵏⴰⵙ 02 ⵢⵓⵍⵢⵓⵣ 2024, ⵜⴰⵏⴰⴹⵜ ⵏⵏⵙ ⵜⴰⵙⴳⵯⵙⴰⵏⵜ ⵅⴼ ⵡⴰⴷⴷⴰⴷ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵍⵎⵖⵔⵉⴱ ⴳ ⵓⵙⴳⴳⵯⴰⵙ ⵏ 2023 ⴷⴷⴰⵡ ⵏ ⵜⵎⴰⵜⴰⵔⵜ "ⴰⵙⵕⵚⵚⴰ ⵏ ⵜⵔⵙⴰⵍ ⵏ ⵓⵏⴳⵔⴰⵡ ⴰⵏⴰⵎⵓⵔ ⵉ ⵓⴼⵔⴰⴳ ⵏ ⵉⵣⵔⴼⴰⵏ ⵉⴷⴰⵎⵙⴰⵏⵏ ⴷ ⵉⵏⴰⵎⵓⵏⵏ”.
ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵎⴰⵙ ⵜⴻⵜⵜⵡⴰⵙⵙⴰⵏ ⵜⴰⵏⴰⴹⵜ ⴰⴷ, ⵏⵏⵉ ⵉⴳⴰⵏ ⵜⵉⵙⵙ ⵙⵎⵎⵓⵙⵜ ⴳ ⵜⵥⵍⴰⵢⵜ ⵏ ⵓⵙⵇⵇⵉⵎ ⵖⵉⵍⴰⴷ, “ⵙ ⵓⵙⴼⵙⵉ ⴷ ⵓⵙⵜⴰⵍ ⵉⵎⵙⵖⴰⵔⵓⵜⵏ ⵅⴼ ⵡⴰⴷⴷⴰⴷ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⴰⵣⵉⵔⵜ ⵏⵏⵖ, ⴷ ⵉⴽⵛⵛⵓⵎⵏ ⵏ ⵓⵙⵇⵇⵉⵎ ⵉⵥⵍⵉⵏ ⵙ ⵓⴼⵔⴰⴳ ⴷ ⵜⵏⴽⵔⴰ ⴷ ⵡⴰⵔⴰⵢ ⵙⴳ ⵜⵕⵥⵉⵢⵉⵏ ⴰⴽⴷ ⵉⵙⴼⴽⴰ ⵉⵥⵍⵉⵏ ⵙ 21 ⵏ ⵓⵣⵔⴼ ⴰⵎⵙⵖⴰⵔⵓ ⴷ 5 ⵏ ⵉⵣⵔⴼⴰⵏ ⵉⵙⵎⵉⵍⵏ, ⴷ ⵉⵣⵔⴼⴰⵏ ⵏ ⵜⵎⵖⴰⵔⵉⵏ ⴷ ⵜⵔⴱⴰⵜⵉⵏ ⵙ ⵓⵙⵎⵔⵙ ⵏ ⵜⵎⵢⴰⴷⴰⵙⵜ ⵜⴰⵏⵊⵎⵓⵜ ⵏⵏⴰ ⵉⴳⴰⵏ ⵢⴰⵏ ⴰⴳⵣⵣⵓⵎ ⴰⴷⵙⵍⴰⵏ ⴳ ⵜⵙⵜⵔⴰⵜⵉⵊⵉⵜ ⵏ ⵜⵡⵓⵔⵉ ⵏ ⵓⵙⵇⵇⵉⵎ. ⵏⵏⵉ ⵅⴼ ⵉⵖⵜⵙ ⴰⴷ ⵉⵏⵄⵕ ⴰⴼⴰⴷ ⴰⴷ ⵜⴻⵜⵜⵓⵙⴷⵓⵙ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⴷ ⵜⴷⵔⴼⵉⵏ ⴳ ⵓⵎⵏⴰⵍⴰ ⵏ ⵜⵏⵥⴰⵕ ⵉⵜⵜⵓⵙⵎⴰⵢⵏⵓⵏ ⴷ ⵉⵎⵢⴰⵏⴰⵡⵏ ⵏⵏⵉ ⵙⵙⵓⵖⵏⵏ ⵉⵙⵉⵣⵡⵉⵔⵏ ⵏ ⴽⵓ ⵜⴼⵔⴽⵜ ⴳ ⵢⵉⴳⵔ ⴰⴷ".

ⵜⵙⵙⴼⵔⵓ ⵎⴰⵙⵙ ⴱⵓⵄⵢⵢⴰⵛ ⵎⴰⵙ ⵉⴳⴰ ⵓⵙⵜⴰⵢ ⵏ ⵜⵎⴰⵜⴰⵔⵜ ⵏ ⵜⴰⵏⴰⴹⵜ ⵜⴰⵍⵖⴰ ⵏ ⵜⵎⵀⵍⵜ ⵏ ⵓⵙⵏⴰⵢ ⵏ ⴽⵓⵍⵍⵓ ⵎⴰⴷ ⵉⴹⴼⵕ ⵓⵙⵇⵇⵉⵎ ⵏ ⵉⵙⵏⴼⴰⵕ ⴷ ⵜⵙⵏⵜⴰⵢⵉⵏ ⴷ ⵉⵖⴰⵡⴰⵙⵏ ⴳ ⵓⵙⴰⵜⵉ ⵏ ⵓⴹⴼⴼⵓⵕ ⵏⵏⵙ ⵉ ⵜⵙⵔⵜⴰⵢ ⵜⵉⵎⴰⵜⴰⵢⵉⵏ ⵙⴳ ⵜⵙⴳⴰ ⵏ ⵜⵎⵢⴰⴷⴰⵙⵜ ⵉⴱⴷⴷⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵓⵍⴰ ⵎⴰⴷ ⵉⵣⵎⵎⴻⵎ ⵏ ⵜⵎⵓⴽⵔⵉⵙⵉⵏ ⴷ ⵉⵣⴰⴽⴰⵏ ⴷ ⵉⵏⴳⵣⴰⵏ. ⵜⵔⵏⴰ ⵎⴰⵙ ⵉⴳⴰ ⵓⵙⴳⵓⴷⵉ ⵏ ⵉⴼⵔⴷⵉⵙⵏ ⴰⴷ ⴰⴽⴽⵯ ⴷ ⵓⵙⴼⵙⵉ ⵏⵏⵙⵏ ⵉⵜⵜⵢⴰⵡⵙⴽⴰⵔ ⵙⴳ ⵓⵙⴰⵜⵉ ⴰⵎⵙⵓⵖⵍ ⵏ ⵜⵡⵓⵔⵉ ⵏ ⵓⵙⵇⵇⵉⵎ, ⵙⵍⴰⵡⴰⵏ ⴰⴽⴽⵯ ⵜⵉⵎⵔⵉⵙⵉⵏ ⵜⵉⴳⵔⴰⵖⵍⴰⵏⵉⵏ ⵏ ⵜⴳⵍⴷⵉⵜ ⴷ ⵉⵙⴱⴷⴰⴷⵏ ⵉⴷⵙⵜⴰⵔⵏ ⵉⵥⵍⵉⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⴳ ⵓⵙⵙⵉⴷⴷ ⵏ ⵜⵏⵥⴰⵕ ⵉⵣⴷⵉⵏ ⵙ ⵓⵎⵏⴰⴹ ⴰⵎⴰⵜⴰⵢ ⴰⵏⴰⵎⵓⵔ ⴷ ⵓⴳⵔⴰⵖⵍⴰⵏ.
ⵜⵙⵎⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴳ ⵜⴳⵓⵔⵉ ⵏⵏⵙ ⵎⴰⵙ ⵉⵙⵖⴰⵡⵙⴰ ⵓⵙⴷⵓⵙ ⵏ ⵜⵔⵙⴰⵍ ⵏ ⵓⵏⴰⴳⵔⴰⵡ ⴰⵏⴰⵎⵓⵔ ⵉ ⵓⴼⵔⴰⴳ ⵏ ⵉⵣⵔⴼⴰⵏ ⵉⴷⴰⵎⵙⴰⵏⵏ ⴷ ⵉⵏⴰⵎⵓⵏⵏ ⴰⵙⴷⴷⵔⴼ ⵏ ⵓⵙⴰⵡⵔ ⵏ ⵓⵎⵓⴽⵏ ⵏ ⵓⵙⵍⵎⴷ ⵃⵎⴰ ⴰⴷ ⵉⵜⵜⵓⵏⴼⵔⵓ ⵓⵣⵔⴼ ⴳ ⵓⵙⵍⵎⴷ ⵉⵕⵡⴰⵏ ⵉ ⵇⴰⵃ ⴷ ⵓⵙⴷⵓⵙ ⵏ ⵓⴷⴳⴰⵔ ⴰⵏⴼⴳⴰⵏ ⴰⵏⴰⵎⵓⵔ, ⴷ ⵓⵍⴰ ⴰⵙⵖⵓⵏ ⵏ ⵜⵙⵓⵍⴰⵏⵜ ⵏ ⵓⵎⵓⴽⵏ ⴰⵏⵔⴳⴰⵢ ⴷ ⵓⵙⵎⵀⵍ ⵏ ⵇⴰⵃ ⵉⵙⴱⴷⴰⴷⵏ ⵏ ⵓⵙⵍⴳⵏ ⴰⵙⴰⵜⵉ ⵅⴼ ⵓⵎⵓⴽⵏ ⴰⵏⵔⴳⴰⵢ ⵏⵏⵉ ⵉⴳⴰⵏ ⵢⴰⵏ ⵙⴳ ⵉⴼⵔⴷⵉⵙⵏ ⵉⴷⵙⵍⴰⵏⵏ ⵏ ⵓⵙⵙⵥⵕⴼ ⵏ ⵉⵣⵔⴼⴰⵏ ⵉⴷⴰⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵓⵙⴷⵓⵙ ⵏ ⵜⵣⵔⴼⵜ ⵜⴰⴼⵔⴽⴰⵏⵜ.
ⵉⴼⵓⴽ ⴰⴷ ⵏⵙⵙⴽⵜⵉ ⵎⴰⵙ ⴷ ⴰⵎⵓⵏ ⴳ ⵜⴰⵏⴰⴹⵜ ⵏ ⵓⵙⴳⴳⵯⴰⵙ ⵏ 2023 ⵎⴰⴷ ⵉⵜⵜⴳⴰⵏ 332 ⵏ ⵉⵙⵖⵍⴰⴼ ⵉⵎⵙⵖⴰⵔⵓⵜⵏ ⵏⵉⵖ ⵉⵎⴰⵜⴰⵢⵏ, ⴳⵉⵙⵏ 122 ⵏ ⵓⵙⵖⵍⴼ ⵙⵙⴰⴼⵖⵏ ⵜⵏ ⴷ ⵉⵎⴰⵙⵙⵏ ⵉⵏⴰⵎⵓⵔⵏ ⵙ ⴽⵕⴰⴹ ⴷ 41 ⵏ ⵓⵙⵖⵍⴼ ⵓⵚⴽⵉⵡ, ⴰⴷ ⵜⵏⵏⴰ ⵎⴰⵙⵙⴰ ⴱⵓⵄⵢⵢⴰⵛ, ⵎⴰⵙ ⴷ ⵜⵜⵓⵙⵏⵉⵍⴰⵏ ⵉⵙⵖⵍⴰⴼ ⴰⴷ ⵉ ⵜⵏⴱⴰⴹⵉⵏ ⵜⵉⵎⴰⵜⴰⵢⵉⵏ, ⵥⵍⵉⵏ ⵙ ⵜⵎⵙⴽⵔⵜ ⵜⴰⵎⵢⴰⵇⵇⴰⵏⵜ ⵏ ⵜⵎⴰⵣⵉⵔⵜ ⵏⵏⵖ ⴷ ⵓⵎⵢⴰⵖ ⵏⵏⵙ ⴷ ⵓⵏⴰⴳⵔⴰⵡ ⴰⴳⵔⴰⵖⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴷ ⵓⵙⴰⵜⵉ ⴰⵣⵔⴼⴰⵏ ⴷ ⵓⵎⵔⵙⴰⵍ.
ⴳⵉⵙⵏⵜ ⵜⵉⵏⵏⴰ ⵉⵇⵇⴰⵔⵏ ⵙ ⵓⵙⵎⵖⵔ ⵙ ⵓⵙⵔⵙ ⵏ ⵉⵣⵔⴼⴰⵏ ⵉⵎⵣⵡⵓⵔⴰ ⴳ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵉⵙⴳⴰ ⴳ ⵓⵖⵣⴷⵉⵙ ⵏ ⵜⵙⵔⵜⵉⵜⵉⵏ ⵜⵉⵎⴰⵜⴰⵢⵉⵏ ⴷ ⵉⵖⴰⵡⴰⵙⵏ. ⴳⵉⵙⵏⵜ ⵓⵍⴰ ⵜⵉⵏⵏⴰ ⵉⵜⵜⵙⴷⴷⵉⴷⵏ ⴰⵙⵖⵓⵏ ⵏ ⵓⵙⵎⴰⴷ ⵏ ⵜⵙⵖⵣⵏⵜ ⵏ ⵇⴰⵃ ⵉⴼⵔⴷⵉⵙⵏ ⵏ ⵓⴼⵔⴰⴳ ⴰⵏⴰⵎⵓⵏ ⴷ ⵓⵙⵙⵉⵔⵉⵡ ⵏ ⵓⵙⴰⵜⵉ ⵏⵏⵙⵏ ⵉ ⵓⵙⵕⵚⵚⴰ ⴰⵎⵢⴰⴳⴰⵏ ⵏ ⵓⵏⴳⵔⴰⵡ ⴰⵏⴰⵎⵓⵔ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵉⴷⴰⵎⵙⴰⵏⵏ ⴷ ⵉⵏⴰⵎⵓⵏⵏ, ⵙⵍⴰⵡⴰⵏ ⴰⴽⴽⵯ ⵡⵉⴷ ⵥⵍⵉⵏⵉⵏ ⵙ ⵉⵏⴰⵡⴰⵢⵏ ⵓⵣⴷⵉⵔⵏ ⵏ ⵜⵏⴼⵔⵓⵜ ⵜⴰⵏⴰⵎⵓⵏⵜ, ⵉⵣⴷⵉ ⵓⵙⴽⴽⵉⵏ ⵙ ⵉⵎⵢⴰⵡⴰⵙⵏ ⵏ ⵜⵡⵙⵔⵜ ⴷ ⵜⵡⵉⵙⵉ ⵏ ⵜⴰⵔⵡⵓⵔⵉ ⴷ ⵜⵏⴼⵔⵓⵜⵉⵏ ⵏ ⵉⵎⵙⵡⵓⵔⵉⵢⵏ ⴷ ⵜⵡⵉⵙⵉ ⵏ ⵉⵎⵊⵕⵉⵜⵏ ⵏ ⵜⵡⵓⵔⵉ, ⴷ ⵓⴳⴳⴰⵔ.