ⵉⴷⵔⵓ ⵎⴰⵙⵙ ⵎⵓⵏⵉⵔ ⴱⵏⵚⴰⵍⵃ, ⴰⵏⴼⵍⵓⵙ ⴰⵎⴰⵜⴰⵢ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ , ⴰⵙⵙ ⵏ 12 ⴱⵕⴰⵢⵕ 2022 ⴳ ⵓⵕⵥⵥⵓⵎ ⵏ ⵓⵙⴳⵔⴰⵡ ⴰⵎⵣⵡⴰⵔⵓ ⵏ ⵓⵙⵏⵖⵎⵙ ⴰⵎⵙⵎⵓⵏ ⴷ ⵓⵏⴰⵎⵓⵏ ⴳ ⵍⵎⵖⵔⵉⴱ, ⵏⵏⴰ ⵉⵙⵏⵎⴰⵍⴰ ⵓⵙⴳⵔⴰⵡ ⵏ ⵉⵎⴽⴽⴰⵙⴰⵏ ⵏ ⵍⵎⵖⵔⵉⴱ ⵙ ⵜⵎⵍⴷⴰ ⵏ ⵡⴰⵙⵙ ⴰⵎⴰⴹⵍⴰⵏ ⵏ ⵜⵏⵣⵡⴰⵢⵜ.

ⴳ ⵜⴽⵛⵛⵓⵎⵜ ⵏⵏⵙ ⴳ ⵓⵕⵥⵥⵓⵎ ⵏ ⵓⵙⴳⵔⴰⵡ ⴰⴷ, ⵏⵏⴰ ⵉⴽⴽⴰⵏ ⵙⵉⵏ ⵡⵓⵙⵙⴰⵏ, ⵉⵙⴷⴷⵉⴷ ⵎⴰⵙⵙ ⴱⵏⵚⴰⵍⵃ ⵅⴼ ⵡⴰⴷⴷⵓⵔ ⵏⵏⴰ ⵢⴰⴽⴽⴰ ⵓⵙⵇⵇⵉⵎ ⵉ ⵜⵎⵙⴰⵔⵜ ⵏ ⵜⴷⵔⴼⵉ ⵏ ⵓⵡⵏⵏⵉ. ⴳ ⵓⵣⵎⵣ ⵍⵍⵉ ⵖ ⵉⵙⵙⴽⵜⵉ ⵙ ⵉⵙⵖⵍⴰⴼ ⵏ ⵜⴰⵏⴰⴹⵜ ⵜⴰⵙⴳⵯⵙⴰⵏⵜ ⵏ ⵓⵙⵇⵇⵉⵎ ⵏ ⵓⵙⴳⴳⵯⴰⵙ 2019, ⵉⵙⴷⴷⵉⴷ ⵎⴰⵙⵙ ⴱⵏⵚⴰⵍⵃ ⵅⴼ ⵡⴰⴷⴷⵓⵔ ⵏ ⵓⵙⵏⵖⵎⵙ ⴰⵎⵙⵎⵓⵏ ⵏⵏⴰ ⵉⵙⵙⵓⵖⵍⵏ ⵉⵎⵏⵉⴷⵏ ⵉⵎⴰⵢⵏⵓⵜⵏ, ⴰⵡⵙⵏ ⴳ ⵓⵙⴷⵓⵙ ⵏ ⵓⵏⴰⴳⵔⴰⵡ ⴰⵙⵏⵖⵎⴰⵙ ⴰⵏⴰⵎⵓⵔ.

ⴳ ⵓⵎⵏⵉⴷ ⴰⴷ, ⵉⵙⵙⴽⵜⵉ ⵙ ⵉⵙⵖⵍⴰⴼ ⵏ ⵓⵙⵇⵇⵉⵎ ⵏⵏⴰ ⵉⵇⵇⴰⵔⵏ ⵙ "ⵓⵕⵥⵥⵓⵎ ⵏ ⵓⵎⵙⴳⴷⴰⵍ ⴰⴳⴷⵓⴷⴰⵏ ⵅⴼ ⵜⴷⵔⴼⵉ ⵏ ⵓⵡⵏⵏⵉ ⴷ ⵜⴰⵏⵏⴰⵢⵜ ⴷ ⵜⵏⵖⵎⴰⵙⵜ, ⵙ ⵜⴷⵔⴰⵡⵜ ⵏ ⵇⴰⵃ ⵉⵎⴳⴳⴰⵢⵏ ⵏⵏⴰ ⴳⴰⵏⵉⵏ ⵉⵎⵏⵜⴰⵢⵏ, ⵙ ⵓⵙⵢⵉⵍⵉ ⵏ ⵎⴰⵕⵕⴰ ⵉⵙⵏⴼⵍⵏ ⵜⵜⵡⴰⵙⵙⵏⵏⵉⵏ ⴳ ⵢⵉⴳⵔ ⴰⴷ, ⵍⵓⵎⴰⵕ ⴳ ⵓⵙⴰⵢⵔⴰⵔ ⴰⵎⵓⵟⵟⵓⵏ, ⴷ ⵜⵕⵉⵕⴹⵉⵏ ⵏ ⵉⵥⵟⵟⴰⵜⵏ ⵉⵏⴰⵎⵓⵏⵏ".

ⵉⵙⵙⴼⴰⵡ ⵎⴰⵙⵙ ⴱⵏⵚⴰⵍⵃ, ⴳ ⵓⵎⵏⵉⴷ ⴰⴷ, ⵎⴰⵙ ⴷ ⵙ ⵓⵣⵣⴳⵉⵔ ⵏ ⵓⵙⵖⵍⴼ ⴰⴷ, ⵉⵙⵏⵎⴰⵍⴰ ⵓⵙⵇⵇⵉⵎ ⴳ ⴱⵕⴰⵢⵕ 2020, ⵢⴰⵏⵓⵎⵛⴰⵡⴰⵕ ⴰⴽⴷ ⵜⵙⴳⴳⵯⵉⵏ ⵏⵏⴰ ⴷ ⴷⴰⵔ ⴰⵣⴷⴰⵢ ⵙ ⵉⵎⵔⵙⵉ". ⵢⴰⵏ ⵓⵎⵛⴰⵡⴰⵕ ⵉⵣⵎⵔⵏ ⴰⴷ ⵉⵙⵓⵙⵙⵏ ⵙ ⴽⵉⴳⴰⵏ ⵏ ⵉⵏⴰⵥⴰⵕⵏ, ⴰⵎ ⵜⴰⵎⵔⵔⵓⵜ ⵏ ⵓⵏⵖⴰⵍ ⵏ ⵓⵙⴰⵢⵔⴰⵔ ⴰⵎⵓⵟⵟⵓⵏ ⵃⵎⴰ ⴰⴷ ⵢⵉⵍⵉ ⵓⵙⵉⴷⴼ ⵏ ⵇⴰⵃ ⵙ ⵍⴰⵏⵜⵉⵔⵏⵉⵜ, ⴰⵏⴰⵥⴰⵕ ⵏ ⵜⵎⵔⵔⵓⵜ ⵏ ⵓⵙⵏⵎⴰⵍⴰ ⵏⵏⵙ ⴷ ⵜⵙⵏⵙⵉ ⵏ ⵉⵙⴱⴷⴰⴷⵏ ⵏ ⵉⵣⵔⴼⴰⵏⵏ ⵏ ⵖⵉⵍⴰ, ⴰⵔⴰⵢ ⵏ ⵜⴰⵏⵏⴰⵢⵜ ⵜⴰⴳⴷⵓⴷⴰⵏⵜ ⴷ ⵜⴽⵏⴷⴰⵡⵜ ⴷ ⵓⵏⵖⴰⵍ ⵙ ⵓⵙⴷⴷⵔⴼ ⵏ ⵉⵏⵖⵎⵉⵙⵏ ⵣⴳⵍⵏⵉⵏ ⴷ ⵓⵙⵎⵔⵙ ⵏ ⵉⵙⴰⵢⵔⴰⵔⵏ ⴰⴷ ⵎⴳⴰⵍ ⵜⵕⵥⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ".

ⴳ ⵓⵣⵎⵣ ⵍⵍⵉ ⵖ ⴷ ⵢⵓⵡⵉ ⴽⵔⴰ ⵏ ⵉⵙⵇⵙⵉⵜⵏ ⵅⴼ ⵓⵎⵛⴰⵡⴰⵕ ⴰⴷ, ⵉⵙⵙⴽⵜⵉ ⵎⴰⵙⵙ ⴱⵏⵚⴰⵍⵃ ⵎⴰⵙ "ⵉⵕⵥⵎ ⵓⵙⵇⵇⵉⵎ ⴳ ⵓⵙⴳⴳⵯⴰⵙ ⴰⵏⵏ ⵏⵉⵜ ⵢⴰⵜ ⵜⵉⵕⵉⵕⴹⵜ "ⵜⵄⴱⵉⵔⴰⵜ ⵕⴰⵇⵎⵉⵢⴰ" (ⵉⵡⵏⵏⵉⵜⵏ ⵉⵎⵓⵟⵟⵓⵏⵏ) ⴰⴼⴰⴷ ⴰⴷ ⴳⵉⵙ ⵢⴰⴳⵯⵎ ⵜⵉⴷⵔⴰⵡⵉⵏ ⵏ ⵉⵎⵓⵣⴰⵢⵏ ⴷ ⵉⵏⵎⵓⵔⴰⵏ ⵅⴼ ⵓⵙⴳⵓⵎ ⴰⴷ". "ⵜⴰⴷⵔⴼⵉ ⵏ ⵓⵡⵏⵏⵉ ⴷ ⵓⵣⵔⴼ ⴰⴽⵙⵡⴰⵜ ⵏ ⵜⵉⵍⵉⵜ, ⵎⴰⵛ ⴰⵡⴷ ⵢⴰⵏ ⵓⵣⵔⴼ ⵉⵜⵜⴰⴷⵊⴰⵏ ⵡⵉⵢⵢⴰⴹ ⴰⴷ ⴳⵏ ⵉⵎⴳⴳⴰⵢⵏ. ⵙ ⵎⴰⵏ ⴰⵢⴰ, ⵏⵖⵉⵢ ⴰⴷ ⵏⵙⵏⵓⵎⵎⵍ ⵜⴰⴷⵔⴼⵉ ⵏ ⵓⵡⵏⵏⵉ ⵙ ⵓⵥⵕⵓ ⵏ ⵜⵖⵎⵔⵜ ⵏ ⴽⵔⴰⵢⴳⴰⵜ ⵡⴰⵎⵓⵏ ⴳ ⵜⵍⵍⴰ ⵜⴷⵔⴼⵉ ⴷ ⵜⴷⵉⵎⵓⵇⵕⴰⵟⵉⵜ. ⵉⵡⵏⵏⵉⵜⵏ ⵉⵎⴰⵢⵏⵓⵜⵏ ⵉⴳⴷⵓⴷⴰⵏⵏ, ⵙ ⵡⴰⵏⴰⵡ ⵏⵏⵙⵏ ⵉⵎⴰⵢⵏⵓⵜⵏ, ⵍⵓⵎⴰⵕ ⵉⵎⵓⵟⵟⵓⵏⵏ, ⵏⵏⴰ ⴳⴰⵏⵉⵏ ⵢⴰⵜ ⵜⵡⵉⵍⴰ ⵉⵙⴷⵓⵙⵏ ⵜⵉⴷⵔⴼⵉⵏ ⵜⵉⴳⴷⵓⴷⴰⵏⵉⵏ ⴳ ⵜⵎⴰⵣⵉⵔⵜ ⵏⵏⵖ", ⴰⴷ ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴳ ⵜⵉⵣⵉ ⵏ ⵓⵕⵥⵥⵓⵎ ⵏ ⵜⵕⵉⵕⴹⵜ ⴰⴷ.

ⴳ ⵓⵎⵏⵉⴷ ⵢⴰⴹⵏⵉⵏ, ⵉⵙⵙⴽⵜⵉ ⵓⵏⴼⵍⵓⵙ ⴰⵎⴰⵜⴰⵢ ⵙ ⵉⵙⵖⵍⴰⴼ ⵏ ⵜⴰⵏⴰⴹⵜ ⵜⴰⵙⴳⵯⵙⴰⵏⵜ ⵏ ⵓⵙⵇⵇⵉⵎ ⵏ 2020, ⵣⵓⵏⴷ ⴰⵙⴷⵓⵙ ⵏ ⵉⵎⴰⵙⵙⵏ ⵏ ⵓⵙⵎⵓⵎⵎⵉ, ⴰⵏⵣⵔⴰⴼ ⴷ ⵡⴰⵔ ⴰⵏⵣⵔⴰⴼ, ⵏ ⵉⵏⵎⵓⵔⴰⵏ ⴷ ⵜⵏⵎⵓⵔⵉⵢⵉⵏ ⵙ ⵓⵎⵢⴰⵙⵙⴰ ⴰⴽⴷ ⵜⴰⵜⵉⴽⵏⵓⵍⵓⵊⵉⵜ ⴷ ⵓⴼⵓⵍⵍⵙ ⵉⵎⵍⵥⵉⵢ , ⴰⵕⵥⵥⵓⵎ ⵏ ⵓⵎⵙⴳⴷⴰⵍ ⴰⴳⴷⵓⴷⴰⵏ ⵅⴼ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⴰⵢⵔⴰⵔ ⴰⵎⵓⵟⵟⵓⵏ ⴷ ⵓⴼⵓⵍⵍⵙ ⵉⵎⵍⵥⵉⵢ, ⴰⵙⴷⵓⵙ ⵏ ⵓⵙⵏⵎⴰⵍⴰ ⴷ ⵜⵉⵏⵏⵓⴱⴹⴰ ⵏ ⵓⴳⴰⴷⴰⵣ ⴰⴳⴷⵓⴷⴰⵏ, ⴰⵙⴷⵓⵙ ⵏ ⵓⵙⴳⵎⵉ ⴰⵙⵏⵖⵎⴰⵙ ⴷ ⵓⵙⴷⵓⵙ ⵏ ⵓⵙⵎⵓⵜⵜⴳ ⴰⴷⴰⵙⵉⵍ ⴷ ⵓⵙⵓⵍⴰⵏ.

ⵉⵜⵜⵡⴰⵙⵙⵏ ⵓⵙⴳⵔⴰⵡ ⴰⴷ ⵙ ⵜⴷⵔⴰⵡⵜ ⵏ ⵉⴳⵏⵙⴰⵙ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵉⵎⵢⴰⵙⵙⴰⵏ ⴰⴽⴷ ⵓⵙⵏⵖⵎⵙ, ⵉⵙⵍⵎⴰⴷⵏ ⵉⵎⵙⴷⴰⵡⵏ, ⵉⵎⵓⵣⴰⵢⵏ, ⵉⵎⴳⴳⴰⵢⵏ ⵉⵎⵙⵎⵓⵏⵏ ⴷ ⵉⵎⵙⵏⵖⵎⴰⵙⵏ, ⴷ ⵉⵎⵖⵏⴰⵙ ⵏ ⵉⵎⴰⵙⵙⵏ ⵉⵎⴳⵔⴰ ⵏ ⵓⵙⵏⵖⵎⵙ, ⵉⵙⵙⵓⵜⵔ ⴰⵙⴷⵓⵙ ⵏ ⵓⵥⵟⵟⴰ ⵏ ⵓⵙⵏⵖⵎⵙ ⴰⵎⵙⵎⵓⵏ ⴳ ⵍⵎⵖⵔⵉⴱ, ⴰⵎⵔⴰⵔⴰ ⵏ ⵡⴰⵡⴰⵍ ⵅⴼ ⴽⵉⴳⴰⵏ ⵏ ⵜⵎⵙⵍⴰⵢⵉⵏ ⴷ ⵉⵙⴳⵓⵎⵏ ⵣⴷⵉⵏⵉⵏ ⵙ ⵜⵎⴰⴳⵓⵜ ⵏ ⵉⵎⴰⵙⵙⵏ ⵏ ⵓⵙⵏⵖⵎⵙ ⴷ ⵜⴷⵔⴼⵉ ⵏ ⵓⵡⵏⵏⵉ.