ⵜⵙⴷⴷⵉⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵙⵙ ⵏ ⵓⴽⵡⴰⵙ ⴰⴷ, ⵅⴼ ⵡⴰⴷⴷⵓⵔ ⵏ ⵜⴷⵔⴼⵉ ⵏ ⵓⵎⵢⴰⵏⴰⵡ ⵏ ⵓⵎⵍⴰⵏ ⴷ ⵓⵣⴷⴰⵢ ⵏⵏⵙ ⴷ ⵜⵎⵢⴰⴳⴰⵏⵜ ⵏ ⵜⵎⵙⴽⵔⵜ ⵏ ⵓⵣⵔⴼ ⵏ ⵜⴷⵔⴼⵉ ⵏ ⵓⵡⵏⵏⵉ, ⵙⵍⴰⵡⴰⵏ ⴰⴽⴽⵯ ⴳ ⵓⵣⵎⵣ ⵏ ⵉⵙⵏⴼⵍⵏ ⵏⵏⴰ ⵉⵙⵙⵏ ⵓⵙⴰⵢⵔⴰⵔ ⴰⵎⵓⵟⵟⵓⵏ ⴷ ⵓⵏⵖⵎⴰⵙ. ⵜⵏⵏⴰ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵎⴰⵙ ⵏⵙⵖⴰⵡⵙⴰ ⴰⵙⵙ ⴰ ⵙ ⵓⵔⵎⴰⵙ ⴷ ⵡⴰⵎⵎⴰⵥ ⵏ ⵉⵙⵏⴼⵍⵏ ⵜⵜⵓⵙⴷⴷⵔⴼⵏⵉⵏ ⴷ ⵖⴱⴰⵏⵉⵏ ⵏⵏⴰ ⵙⵙⵏⵏ ⵉⵎⴰⵙⵙⵏ ⴷ ⵜⵉⵜⵉⵇⵏⵉⵜⵉⵏ ⵏ ⵓⵎⵢⴰⵡⴰⴹ ⴰⵜⵔⴰⵔ ⴷ ⵎⴰⵙ ⵙⵢⴰⴼⴰⵏ ⵏ ⵉⴷⵔⵉⵣⵏ ⵉⵎⵢⴰⵏⴰⵡⵏ ⵅⴼ ⵜⵎⵙⴽⵔⵜ ⵏ ⵜⴷⵔⴼⵉ ⵏ ⵓⵡⵏⵏⵉ.

ⵉⴷⴷⴰ ⴷ ⵖⴰⵢⴰⴷ ⴳ ⵜⴳⵓⵔⵉ ⵏ ⵓⵕⵥⵥⵓⵎ ⵏ "ⴰⴳⵓⵔⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ", ⵏⵏⴰ ⵉⵙⵏⵎⴰⵍⴰ ⵓⵙⵉⵏⴰⴳ ⵏ ⵕⵕⴱⴰⵟ ⴷⵔⵉⵙ ⴱⵏⵣⴽⵔⵉ ⵉ ⵉⵣⵔⴼⴰⵏ ⵏ ⵓⴼⴳⴰⵏ ⴰⵙⵙ ⵏ ⵓⴽⵡⴰⵙ ⴰⴷ 12 ⵢⵓⵏⵢⵓ 2025, ⵏⵏⴰ ⵅⴼ ⴷ ⵜⵓⵡⵉ ⵜⵙⵇⵇⴰⵢⵎⵓⵜ ⵏⵏⵙ ⵜⵉⵙⵙ ⵚⴹⵉⵚⵜ ⵅⴼ ⵓⵙⵏⵜⵍ "ⵜⴰⴷⵔⴼⵉ ⵏ ⵓⵎⵢⴰⵏⴰⵡ ⵏ ⵓⵎⵍⴰⵏ, ⵜⴰⵏⴼⵔⵓⵜ ⵉ ⵓⵙⴷⵓⵙ ⵏ ⵜⵎⵢⴰⴳⴰⵏⵜ ⵏ ⵜⵎⵙⴽⵔⵜ ⵏ ⵜⴷⵔⴼⵉ ⵏ ⵓⵡⵏⵏⵉ".

"ⵢⴰⵖⵓⵍ ⵓⵣⵣⵉⴳⵣ ⴰⵅⴰⵜⴰⵔ ⴳ ⵓⴼⴰⵔⵙ ⴷ ⵓⵙⵙⴰⵔⵓ ⵏ ⵓⵎⵍⴰⵏ" ⵜⵏⵏⴰ ⵎⴰⵙⵙⴰ ⴱⵓⵄⵢⵢⴰⵛ, "ⵍⴰ ⵉⵙⵙⵔⴰⵙ ⴰⵙⵙ ⴰ ⵜⵉⵏⵥⴰⵕ ⵜⵉⵎⵢⴰⴳⴰⵏⵉⵏ, ⵉⵙⵙⴼⴰⵡⵏ ⵢⴰⵜ ⴰⵎⵣⴰⵔⴰⵢ ⵉⵜⵜⴳⴰⴷⴰⵢⵏ ⵏⴳⵔ ⵜⵉⵍⴰⵡⵜ ⵏ ⵜⵎⵙⴽⵔⵜ ⵏ ⵜⴷⵔⴼⵉ ⵏ ⵓⵡⵏⵏⵉ ⴷ ⵓⵙⴰⵜⵉ ⵓⵍⴳⵉⵏ ⵜⵜ ⵉⵙⵏⵎⴰⵍⴰⵏ", ⵙⵍⴰⵡⴰⵏ ⴰⴽⴽⵯ ⴰⴽⴷ ⵓⵙⵏⴼⵍ ⴰⵥⵓⵕⴰⵏ ⴳ ⵡⴰⵏⴰⵡⵏ ⵏ ⵓⴼⴰⵔⵙ ⵏ ⵜⵓⵎⴰⵢⵜ ⴷ ⵓⵎⵢⴰⵏⴰⵡ ⵏ ⵉⵎⴰⵙⵙⵏ ⵉⵜⵜⵓⵙⵙⵎⵔⴰⵙⵏ ⵉ ⵓⴼⴰⵔⵙ ⵏⵏⵙ.

ⵙ ⵓⴹⴼⴼⵓⵕ ⵏⵏⵖ ⴰⵙⵓⵍⴰⵏ ⵉ ⵢⵉⴳⵔ ⴰⴷ, ⵜⵙⴷⴷⵉⴷ, "ⵏⵍⴽⵎ ⵖⵔ ⵢⴰⵜ ⵜⵓⵍⵍⵣⴰ ⵜⴰⵎⴰⴷⵓⵙⵜ ⵎⴰⵙ ⵜⵍⵍⴰ ⵜⴷⵔⵙⵉ ⵏ ⵜⵎⵢⴰⴷⴰⵙⵜ ⵉⵜⵜⵓⵙⵖⵣⵏⵏ ⵖⵉⵍⴰⴷ ⴳ ⵓⵙⵎⴽⵍ ⵏ ⵉⵎⵓⴽⵔⵉⵙⵏ ⵉⵎⴰⵢⵏⵓⵜⵏ ⵉⵣⴷⵉⵏ ⵙ ⵜⵎⵙⴽⵔⵜ ⵏ ⵜⴷⵔⴼⵉ ⵏ ⵓⵡⵏⵏⵉ, ⵏⵏⴰ ⵉⵙⵙⵓⵖⵏⵏ ⵖⵓⵔⵏⵖ ⴰⵙⵙ ⴰ ⴰⵙⵖⵓⵏ ⵏ ⵓⵙⵜⴰⵢ ⵏ ⵓⵎⵏⵉⴷ ⴰⵎⵉⵔⵉⵡ ⵉⵣⵔⵉⵏ ⴰⵔⵎⵎⵓⵙ ⴰⵇⴱⵓⵔ ⵏ ⵜⴷⵔⴼⵉ ⵏ ⵜⵏⵖⵎⴰⵙⵜ, ⴰⴼⴰⴷ ⴰⴷ ⵢⴰⵎⵓ ⴰⴽⴽⵯ ⵜⴰⵍⵖⵉⵡⵉⵏ ⵜⵉⵜⵔⴰⵔⵉⵏ ⵏ ⵓⵡⵏⵏⵉ ⵏⵏⴰ ⴷ ⵉⴼⵍ ⵓⵙⴰⵢⵔⴰⵔ ⴰⵎⵓⵟⵟⵓⵏ."

ⵜⵏⵏⴰ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵜⴳⴰ ⵜⴷⵔⴼⵉ ⵏ ⵜⵏⵖⵎⴰⵙⵜ ⴰⵣⵔⴼ ⵏ ⵜⵎⵔⵙⴰⵍ ⵜⵉⵏⵖⵎⴰⵙⵉⵏ ⴷ ⵉⵏⵖⵎⴰⵙⵏ ⴳ ⵓⵣⵣⵔⴰⵢ ⵏ ⵉⵏⵖⵎⵉⵙⵏ, ⴷ ⵓⵙⴽⴰⵔ ⵏ ⵉⵙⴰⴳⴳⵯⵏ, ⴷ ⵓⵣⵣⵓⵣⵣⵔ ⵏ ⵓⵎⵍⴰⵏ ⴱⵍⴰ ⴰⴽⵛⵛⵓⵎ ⵏⵖ ⴰⵎⴰⵜⵔ ⵓⵛⵛⵉⵍ ⵏ ⵜⵏⴱⴰⴹⵉⵏ. ⵉⵣⴷⵉ ⵓⵔⵎⵎⵓⵙ ⴰⴷ ⵢⴰⴷⵍⵍⵉ ⵙ ⵉⵖⵎⵉⵙⵏ ⴷ ⵜⵙⵖⵓⵏⵉⵏ, ⴷⴰⵜ ⴰⴷ ⵉⵎⵎⵓⵜⵜⵉ ⴰⴷ ⵢⴰⵎⵓ ⵜⴰⵏⵖⵎⴰⵙⵜ ⵜⴰⵎⵓⵟⵟⵓⵏⵜ.

ⵜⴰⵖⵓⵍ ⵜⴷⵔⴼⵉ ⵏ ⵍⵎⵉⴷⵢⴰ ⵜⵓⵎⴰ ⵉⵎⴰⵙⵙⵏ ⵏ ⵓⵎⵢⴰⵡⴰⴹ ⵉⵎⵢⴰⵏⴰⵡⵏ ⵉⵇⴱⵓⵔⵏ ⴷ ⵉⵜⵔⴰⵔⵏ, ⴰⵎ ⵜⵉⵍⵉⴼⵉⵣⵢⵓⵏ ⴷ ⵜⵏⵣⵡⴰⵢⵜ ⴷ ⵉⵙⵉⵜⵏ ⵉⵍⵉⴽⵟⵕⵓⵏⵉⵢⵏ, ⴳ ⵉⴳⴳⵉ ⵏ ⵜⴷⴰⴱⵓⵜⵉⵏ ⵏ ⵓⵎⵢⴰⵡⴰⴹ ⴰⵏⴰⵎⵓⵏ. ⵜⴰⴷⵔⴼⵉ ⴰⴷ, ⵜⵔⵏⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵍⵍⴰ ⵖⵔ ⵓⴼⵔⵉⴷⵏ ⴷ ⴰⵡⴷ ⵜⵉⵎⵔⵙⴰⵍ, ⵙ ⵎⴰⴷ ⴰⵙⵏ ⵉⵜⵜⴰⵊⵊⴰⵏ ⴰⴷ ⴼⴰⵔⵙⵏ ⵎⵔⴰⵔⴰⵏ ⵜⵓⵎⴰⵢⵜ ⵜⴰⵏⵖⵎⴰⵙⵜ ⵏⵖ ⵜⴰⴷⵍⵙⴰⵏⵜ ⵏⵖ ⵜⴰⵎⵙⵓⵔⴰⵔⵜ ⵏⵖ ⵜⵓⴼⵔⵉⴷⵜ ⵙ ⵜⴷⵔⴼⵉ, ⴷ ⴱⵍⴰ ⵉⵙⴽⵔⴰⴼ ⵓⵔ ⵉⵍⵉⵏ ⴰⵙⵓⵖⵏ.

ⵜⵙⵎⴰⵢⵏⵓ ⵎⴰⵙⵙⴰ ⴱⵓⵄⵢⵢⴰⵛ ⵜⴰⵖⵓⵔⵉ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵙ ⵓⵙⵎⵉⵔⵉⵡ ⵏ ⵓⵎⴹⴰⴽⴰⵕ ⴰⴳⴷⵓⴷⴰⵏ ⵅⴼ ⵓⵙⵖⵓⵏ ⵏ ⵓⵙⵖⵣⵏ ⵏ ⵓⵙⵍⴳⵏ ⵉⵥⵍⵉⵏ ⵙ ⵜⴷⵔⴼⵉ ⵏ ⵓⵎⵢⴰⵏⴰⵡ ⵏ ⵓⵎⵍⴰⵏ, ⴰⴷ ⵉⴳ ⴰⵙⴰⵜⵉ ⴰⵎⵙⵙⴰⵖⵓⵍ ⵉⵙⵓⵜⵉⵢⵏ ⵜⵉⵎⵙⴽⵔⵉⵏ ⵜⵉⵏⵖⵎⴰⵙⵉⵏ ⵜⵉⵎⴰⵢⵏⵓⵜⵉⵏ ⵢⵓⵎⴰⵏ ⵜⵉⵏⵥⴰⵕ ⵉⵣⴷⵉⵏ ⵙ ⵜⵓⵎⴰⵢⵜ ⵜⴰⵎⵓⵟⵟⵓⵏⵜ, ⵙⴳ ⵜⴽⵏⴷⴰⵡⵜ ⴷ ⵉⵏⵖⵎⵉⵙⵏ ⵉⵙⴽⵏⴷⴰⵡⵏ ⴷ ⵢⵉⵏⴰⵡ ⵏ ⵓⴽⵙⴰⵏ.