ⵜⵙⵎⴰⵢⵏⵓ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⴰⵎⵏⴰⴷ ⵏ ⵓⵙⵇⵇⵉⵎ ⴰⵔⵎⵙⴽⵉⵍ ⴷ ⵓⵎⵙⵜⴰⵡ ⵅⴼ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⵏⵏⵉ ⵉⴳⴰⵏ "ⵜⵉⵕⵥⵉ ⵜⵉⵎⵉⵣⵉⵜ ⵏ ⵓⵣⵔⴼ ⴳ ⵜⵓⴷⵔⵜ, ⴰⵣⵔⴼ ⴰⴷ ⴰⵥⵓⵕⴰⵏ ⴷ ⵓⵎⵓⵣⵣⵓⵔ ⴷ ⵓⵎⴰⵜⵓ, ⴱⵍⴰ ⵏⵜⵜⴰⵏ ⵓⵔ ⵉⵍⵍⵉ ⴰⵡⴷ ⵢⴰⵏ ⵓⵣⵔⴼ, ⵡⴰⵍⴰ ⵜⴰⴷⵔⴼⵉ, ⵡⴰⵍⴰ ⵜⴰⵣⵔⴼⵜ". 

ⵜⵙⵙⴼⴰⵡ ⵎⴰⵙⵙⴰ ⴱⵓⵄⵢⵢⴰⵛ ⴳ ⵜⴳⵓⵔⵉ ⵏⵏⵙ ⵏ ⵓⵏⵏⵓⵕⵥⵎ ⵏ ⵓⴳⵔⴰⵡ ⴰⵎⴰⵜⴰⵢ ⵏ ⵜⴰⴹⴰ ⵜⴰⵎⵖⵔⵉⴱⵉⵜ ⵅⴼ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⵉⵜⵜⵓⵙⵏⵎⴰⵍⴰⵏ ⵜⵉⴼⴰⵡⵜ ⵏ ⵡⴰⵙⵙ ⴰⴷ ⴰⵙⵉⵎⵡⴰⵙ 18 ⵎⴰⵕⵚ 2022 ⴳ ⵕⵕⴱⴰⵟ, "ⴰⵙⵙⵏⵥⵉ ⵙ ⵜⵎⵏⵜⵉⵍⵉⵏ ⵜⵉⵏⴰⵎⵓⵏⵉⵏ ⵏⵉⵖ ⵜⵉⴷⵍⵙⴰⵏⵉⵏ ⵥⵍⵉⵏⵉⵏ ⵙ ⵡⴰⵎⵓⵏ ⴰⵎⵖⵔⵉⴱⵉ, ⴳ ⵓⵙⵙⵏⵥⵉ ⵏ ⵓⵏⵀⵍⵍⴰ ⵏ ⴽⵔⴰⵢⴳⴰⵜ ⵜⵥⵍⴰⵢⵜ ⵣⴷⵉⵏⵉⵏ ⵙ ⵜⵎⵔⵔⵓⵜ ⵏ ⵜⵓⵙⵙⵔⴰ, ⵢⴰⵎⵓ ⴳ ⵜⵓⵣⵓⵏⵜ ⵏ ⵜⵣⴳⴰⵍⵜ ⴳ ⵓⵙⵓⵜⴳ, ⴷ ⵓⵔ ⵢⴰⵜⵜⵓⵢ ⵙ ⵎⴰⵙ ⵜⵙⵖⴰⵡⵙⴰ ⵜⴼⵔⴽⵜ ⴰⴷ ⵜⴰⵎⵣⵔⴰⵢⵜ ⵙⴳ ⵜⵎⵙⵜⴳⴳⴰⵔⵜ ⵜⴰⵙⵔⵜⵉⵜ ⵜⴰⵎⴷⵉⴷⴷⵉⵜ". 

ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ ⵅⴼ ⵓⵙⵓⵖⵏ ⵏ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⵉⴷⴷⵖ ⵜⵓⵎⵏ ⵎⴰⵙ "ⵢⴰⵎⵓ ⴳ ⵢⵉⴳⵔ ⵏ ⵓⵙⴳⴳⴷ ⵏ ⵓⵏⴰⴳⵔⴰⵡ ⴰⵏⴱⴽⴰⴹ ⵙ ⵓⵎⵏⵉⴷ ⵏ ⵜⵎⵢⴰⴷⴰⵙⵜ ⵜⴰⵎⵏⵍⵍⵉⵜ ⵜⴰⵎⴷⵉⴷⴷⵉⵜ, ⴰⵔ ⵜⴻⵜⵜⴷⴷⵓ ⴳ ⵓⵎⵣⵡⴰⵔⵓ ⴳ ⵓⵎⵏⵉⴷ ⵏ ⵓⵎⵙⴰⵙⴰ ⴰⴽⴷ ⵓⴱⵔⵉⴷ ⵏⵏⵖ ⴰⵣⵔⴼⴰⵏ, ⴳ ⵡⵉⵙ ⵙⵉⵏ ⴰⴽⴷ ⵓⴷⵓⵙⵜⵓⵔ ⴰⵎⵖⵔⵉⴱⵉ, ⴳ ⵡⵉⵙ ⴽⵕⴰⴹ ⴰⴽⴷ ⵓⵙⵖⵍⴼ ⵏ ⵓⴳⵎⴰⵎ ⵏ ⵓⵙⵓⵎⵓ ⴷ ⵓⵎⵙⴼⵔ, ⴳ ⵡⵉⵙ ⴽⴽⵓⵥ ⴰⴽⴷ ⵜⵎⵔⵉⵙⵉⵏ ⵏⵏⵖ ⵜⵉⴳⵔⴰⵖⵍⴰⵏⵉⵏ", ⵜⵙⴷⴷⵉⴷ ⵎⴰⵙ ⵜⴳⴰ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴰⵙⵙⵏⵜⵉ ⵏ ⵓⵙⵎⵀⵍ ⴰⵎⵢⴰⴳⴰⵏ ⵏ ⵓⵙⵎⵙⴰⵙⴰ ⵉⵏⴳⵔ ⵓⵙⵍⴳⵏ ⴰⵏⴱⴽⴰⴹ ⴷ ⵓⴷⵓⵙⵜⵓⵔ ⴷ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ. 

ⵜⵙⵙⵎⵜⵔ ⵎⴰⵙⵙⴰ ⴱⵓⵄⵢⵢⴰⵛ ⵎⴰⵙ ⵢⴰⵎⵓ ⵓⵎⵏⴰⴷ ⵏ ⵓⵙⵇⵇⵉⵎ ⵅⴼ ⵜⵎⵔⵔⵓⵜ ⴰⴷ ⴳ ⵓⵙⴰⵜⵉ ⵏ ⵜⵙⵎⵉⴳⴰⵍ ⵏⵏⵙ ⴷ ⵉⵔⵎⵙⴽⵉⵍⵏ ⵏⵏⵙ ⴱⴷⴷⵏⵉⵏ ⵅⴼ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵔⵙⵏ, ⵉⴷⴷⵖ ⵜⴱⴷⴷ ⵅⴼ ⵜⵉⵖⴰⵡⵜ ⵙⴳ ⵡⴰⴷ ⵉⵜⵜⵡⴰⵏⴱⴰⴹⵏ ⴳ ⵓⴷⵖⴰⵔ ⵏ ⵓⵙⴳⴳⴷ ⴷ ⵡⴰⵍⵍⴰⵙ ⵏ ⵓⵙⵉⴷⴼ ⴳ ⵡⴰⵎⵓⵏ, ⵜⵔⵏⵓ ⵎⴰⵙ ⵙⴷⴷⵉⴷⵏⵜ ⵜⵣⵔⴰⵡⵉⵏ ⵜⵉⴳⵔⴰⵖⵍⴰⵏⵉⵏ ⴳ ⵜⵓⴳⵜ ⵏ ⵉⵡⴰⵏⴽⵏ ⵏⵏⴰ ⵉⵣⵣⴳⴰⵔⵏ ⵜⴰⵎⵔⵔⵓⵜ ⴰⴷ ⵎⴰⵙ ⵜⴳⴰ ⵜⴰⵎⵔⵔⵓⵜ ⵓⵔ ⵉⵙⵍⴳⴰⵎⵏ ⴰⴱⴽⴽⵉⴹ ⵡⴰⵍⴰ ⵜⴰⴷ ⵕⵡⴰⵏⵉⵏ. 

ⵜⴻⵜⵜⵡⴰⵙⵏ ⵜⵖⵉⵎⵉⵜ ⵏ ⵓⵏⵏⵓⵕⵥ ⵏ ⵓⵏⵎⵓⵇⵇⴰⵔ ⴰⴷ, ⵏⵏⴰ ⵉⵙⵙⵅⴼ ⵓⵎⵣⴷⴰⵢ ⵏ ⵜⴰⴹⴰ ⵜⴰⵎⵖⵔⵉⴱⵉⵜ ⵅⴼ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⵙ ⵜⵎⴷⵔⴰⵡⵜ ⵏ ⵓⵎⴰⵡⴰⵙ ⵏ ⵜⵣⵔⴼ ⴷ ⵜⴷⵔⴼⵉⵏ, ⵜⴰⵏⵙⵙⵉⵅⴼⵜ ⵏ ⵜⵎⵓⵔⴰⵢⵜ ⵜⴰⵎⴰⵜⴰⵢⵜ, ⵜⴰⵎⴰⴷⴷⴰⵙⵜ "ⵇⴰⵃ ⵏⵏⵖ ⵎⴳⴰⵍ ⵜⵎⵔⵔⵓⵜ ⵏ ⵜⵎⵏⵖⵉⵡⵜ", ⴰⵙⴰⴹⴰⴼ ⴰⵎⵖⵔⵉⴱⵉ ⵏ ⵉⵖⵣⵓⵜⵏ, ⵜⴰⴹⴰ ⵜⴰⵎⴰⴹⵍⴰⵏⵜ ⵅⴼ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ, ⴷ ⵉⴳⵏⵙⴰⵙ ⵏ ⵉⵥⵟⵟⴰⵜⵏ ⵏ ⵜⵎⵙⵜⴰⵏⵉⵏ ⴷ ⵉⵎⵙⵜⴰⵏⵏ ⴷ ⵜⵏⵖⵎⴰⵙⵉⵏ ⴷ ⵉⵏⵖⵎⴰⵙⵏ ⴷ ⵜⵡⵜⵎⵉⵏ ⴷ ⵉⵔⴳⵣⵏ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⵎⴳⴰⵍ ⵜⵎⵔⵔⵓⵜ ⵏ ⵜⵎⵏⵖⵉⵡⵜ. 

ⵉⴼⵓⴽ ⴰⴷ ⵏⵙⵙⴽⵜⵉ ⵎⴰⵙ ⵢⴰⴷ ⵉⵙⵙⴽⵜⵉ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵙⵙⴽⵜⵉⵜ ⵏⵏⵙ ⵏ ⵓⵣⵣⵔⴰⵢ ⵅⴼ ⵓⵙⵍⴳⵏ ⴰⵏⴱⴽⴰⴹ ⴳ ⴽⵟⵓⴱⵕ 2019 ⵅⴼ ⵜⵓⵙⵙⵔⴰ ⵜⴰⵎⴰⴷⴷⵓⴷⵜ ⵏ ⵜⵎⵔⵔⵓⵜ ⴰⴷ, ⵉⵙⵙⵓⵜⵔ ⵙⴳ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⴰⴷ ⴳⵏⵜ ⵜⴰⵙⵓⵔⵉⴼⵜ ⵖⵔ ⵜⵓⵙⵙⵔⴰ ⵙ ⵓⵙⵜⴰⵢ ⵉⵚⴰⵃⴰⵏ ⵉ ⵓⵙⴱⴷⴷⵉ ⴰⵎⴰⴹⵍⴰⵏ ⵏ ⵓⵣⵣⴳⵉⵔ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ ⴳ ⵡⴰⵢⵢⵓⵔ ⵏ ⴷⵓⵊⴰⵏⴱⵉⵔ 2020. ⵎⴽⴷⴰ ⵉⵙⵙⵓⵜⵔ ⵓⵙⵇⵇⵉⵎ ⵉ ⵜⵏⴱⴰⴹⵜ ⵜⴰⵎⵖⵔⵉⴱⵉⵜ, ⴳ ⴽⵉⴳⴰⵏ ⵏ ⵉⵣⵎⴰⵣ, ⴰⴷ ⵜⴰⵎⵓ ⴳ ⵓⴱⵕⵓⵜⵓⴽⵓⵍ ⴰⵔⵓⵛⵛⵉⵍ ⵡⵉⵙ ⵙⵉⵏ ⵉⴹⴼⵕⵏ ⵉ ⵓⵎⵉⵔⵓ ⴰⴳⵔⴰⵖⵍⴰⵏ ⵉⵥⵍⵉⵏ ⵙ ⵉⵣⵔⴼⴰⵏ ⵓⵖⵔⵉⵎⵏ ⴷ ⵉⵙⵔⵜⴰⵏⵏ ⵉⵙⵡⵓⵜⵜⵙⵏ ⵜⵓⵙⵙⵔⴰ ⵏ ⵜⵎⵔⵔⵓⵜ ⵏ ⵜⵎⵏⵖⵉⵡⵜ.